تازيون خبرون

Daily Archives: January 7, 2015

قومي اسيمبلي ۽ سينيٽ آرمي ايڪٽ ۾ ترميم ۽ 21 هين ترميم جي منظوري ڏئي ڇڏي

اسلام آباد (بيورو) قومي اسيمبلي پاڪستان تحريڪ انصاف جي يو آءِ (ف) جماعت اسلامي جا ميمبر ۽ عوامي مسلم ليگ جي سربراهه شيخ رشيد احمد جي غير حاضري جي باوجود عسڪريت پسندي ۽ دهشتگردي کي منهن ڏيڻ لاءِ 21هين آئيني ترميم ۽ آرمي ايڪٽ 1952 ۾ ترميم جي گڏيل منظوري ڏيئي ڇڏي 247 ميمبرن ترميم جي حمايت ۾ ووٽ ڏنا ڪنهن ميمبر پاران مخالفت نه ڪئي ويئي قومي اسيمبلي مان منظوري کان پوءِ 21هين آئيني ترميم ۽ آرمي ايڪٽ ۾ ترميم جو بل سينيٽ مان منظور ڪيو ويندو جنهن کان پوءِ پاڪستان جو صدر صحيح ڪندو ۽ هي قانون بڻجي ويندو جيڪو فوري لاڳو ٿيندو جڏهن ته سيد خورشيد شاهه واضح ڪيو ته دين جي حڪمن جي خلاف ڪوئي قانون پاس ڪرڻ جو سوچڻ به گناهه آهي اسلام ئي اسان جو دين آهي آرمي ايڪٽ دين ۽ اسلام کي استعمال ڪندڙ دهشتگردن جي خلاف استعمال ٿيندو دهشتگرد مدرسي جو هجي يا گرامر اسڪول جو ڪنهن سان رعايت نه ٿيڻ گهرجي اڱاري تي قومي اسيمبلي جو اجلاس اسپيڪر اياز صادق جي صدارت هيٺ هڪ ڪلاڪ دير سان شروع ٿيو جنهن ۾ وزيراعظم نوازشريف به شامل ٿيو جڏهن ته جماعت اسلامي ۽ جمعيت علماءِ اسلام (ف) جا ميمبر ۽ عوامي مسلم ليگ جو سربراهه شيخ رشيد احمد موجود نه هو ان لاءِ ان پاران راءِ شماري ۾ حصو نه ورتو ويو پاڪستان تحريڪ انصاف جا ميمبر به ڌانڌلي جي حوالي سان جاري احتجاج جي ڪري اسيمبلي مان غير حاضر رهيا وفاقي وزير سينيٽر پرويز رشيد پاران پيش ڪيل پاڪستان آرمي ايڪٽ 1952 ۾ ترميم ڪرڻ جو بل پاڪستان آرمي ترميمي بل 2015 ڪجهه ترميمن سان اتفاق راءِ سان منظور ڪيو ويو. جماعت اسلامي پاران جمع ڪرايل ترميمون ميمبرن جي غير موجودگي جي ڪري رد ڪيون ويون 21هين ترميم لاءِ شق وار منظوري ورتي ويئي جنهن ۾ ڪنهن به ميمبر مخالفت نه ڪئي آئين ۾ ترميم لاءِ 342 رڪني ايوان ۾ 228 ميمبرن جي حمايت جي ضرورت به اڱاري تي ايوان ۾ 247 ميمبرن ترميم جي حمايت ۾ ووٽ ڏنا ايوان ۾ 190 ميمبرن جو تعلق حڪومتي جماعت مسلم ليگ (ن) سان آهي پيپلزپارٽي، ايم ڪيو ايم ۽ ٻين جماعتن جي ميمبرن جي حمايت سان حڪومت ترميم منظور ڪرڻ ۾ ڪامياب ٿي وزير ريلوي خواجه سعد رفيق عمري جي سعادت ماڻڻ سبب ملڪ مان ٻاهر هئڻ جي ڪري اجلاس ۾ موجود نه هو 21هين آئيني ترميم ۾ پهريان شق وار منظوري ورتو ويئي ان کان پوءِ ان جي منظوري لاءِ ٻه الڳ چيمبر ٺاهيا ويا جنهن ۾ ترميم جا حامي ۽ مخالف انهن چيمبرز ۾ وڃڻو هو ۽ حمايت لاءِ جوڙيل چيمبر ۾ حمايت ڪندڙ سمورا ميمبر ويا پر مخالفت لاءِ جوڙيل چيمبر خالي رهيو. جمعيت علماءِ اسلام (ف) گروپ ۽ جماعت اسلامي آئيني ترميم مسودي ۾ دهشتگردي سان مذهب فرقي جو نالو شامل ڪرڻ تي تحفظات جو اظهار ڪيو هو ۽ موقف اختيار ڪيو هو ته ان سان مذهب جي بدنامي ٿيندي انهي ڪري جماعت اسلامي آئين ۾ ترميم جي حوالي سان به هڪ بل جمع ڪرايو هو آئين ۾ ترميم جي حوالي سان ٿيندڙ اعتراضن تي حڪومت ترميم ۾ هي به شامل ڪيو ويو ته 2002 جي پوليٽيڪل آرڊر جي تحت رجسٽرڊ جماعتون هن ترميم جي زمري ۾ نه اينديون قومي اسيمبلي مان منظوري کان پوءِ هي ترميم سينيٽ مان منظور ڪئي ويندي جنهن کان پوءِ ان تي پاڪستان جو صدر صحيح ڪندو ۽ هي ترميم ملڪ ۾ لاڳو ٿي ويندي. اجلاس جي شروعات ۾ سيد خورشيد شاهه چيو ته پاڪستاني قوم دهشتگردي جي خاتمي تي متفق آهي خطابي مدرسي جو هجي يا شاگرد ڪاليج جو دين جي خلاف ڳالهائي نٿو سگهي هن چيو ته ملڪ ۾ بير رحيمي سان ماڻهن کي قتل ڪيو پيو وڃي. فوجي عدالتن جو ڪڙو ڊڪ دهشتگردن سان منهن ڏيڻ لاءِ پيتو پيو وڃي سيد خورشيد شاهه چيو ته آرمي ايڪٽ مذهب جي خلاف نه آهي آئين ۾ واضح آهي ته اسلام ئي اسان جو دين آهي آرمي ايڪٽ دين ۽ اسلام کي استعمال ڪندڙ دهشتگرد جي خلاف استعمال ٿيندو هن چيو ته يقين نه آيو ته فوجي عدالتون آئين جون لڄ رکنديون دهشتگرد مدرسي جو هجي يا گرامر اسڪول جو ڪنهن سان رعايت نه ٿيڻ گهرجي دهستگردن جي خلاف ڪارروائي ۾ ڪوئي فرق نه ٿيڻ گهرجي ڪجهه فيصلا وقت سان گڏ ڪيا وڃن ٿا دين جي حڪمن جي خلاف ڪوئي قانون پاس ڪرڻ جو سوچڻ به گناهه آهي سيد خوشيد شاهه چيو ته جڏهن حڪومت طالبان سان ڳالهين جو فيصلو ڪيو هو ته پيپلزپارٽي ساٿ ڏنو ته جيڪڏهن ان سان پاڪستان جو فائدو ٿئي ٿو ته جماعت حڪومت سان گڏ آهي سيد خورشيد شاهه چيو ته اڄ اسان سڀ ڏکين فيصلن لاءِ گڏ ٿيا آهيون ته جيئن پاڪستاني عوام ۽ زمين کي محفوظ ۽ بچائي سگهون هن چيو ته هي ترميمون انهن ماڻهن لاءِ آهن جيڪي ڌماڪن ۽ رتوچاڻ ۾ ملوث آهن هي ترميمون انهن جي لاءِ آهن جيڪي سلمان تاثير جي ياد ۾ شمع ٻارڙيندڙن تي حملو ڪن ٿا. ان کان پوءِ آئين ۾ ترميمن جي منظوري کان پوءِ قومي اسيمبلي آرمي ايڪٽ 1952 ۾ ترميم جي به گڏيل طور تي منظوري ڏيئي ڇڏي. عسڪريت پسندي کي منهن ڏيڻ لاءِ فوجي عدالتن جي قيام لاءِ آرمي ايڪٽ ۽ آئيني ۾ ايڪهيني ترميم قومي اسيمبلي 2 ڀاڳي 3 اڪثريت سان منظور ٿيڻ کانپوءِ سينيٽ ۾ به گڏيل طور منظور ڪئي وئي آهي، ترميم تي صدر جي صحيحي کانپوءِ قانون بڻجي ويندو جيڪو فوري تي لاڳو ٿي ويندو ۽ ٻن سالن تائين لاڳو رهندو، سينيٽ ۾ به جي يو آءِ جا ميمبر غير حاضر رهيا، 78 ميمبرن بل جي حق ۾ ووٽ ڏنو، ڪنهن ميمبر پاران مخالفت نه ڪئي وئي، اڱاري تي سينيٽ جو اجلاس چيئرمين سينيٽ نير حسين بخاري جي صدارت ۾ ٿيو، اجلاس دوران پهريان وفاقي وزير راڻا تنوير حسين سوالن جو وقفو موخر ڪرڻ جي تحريڪ پيش ڪئي جنهن تي چيئرمين قائد ايوان کي چيو ته وفاقي وزير سينيٽ جو ميمبر نه آهي ان لا3 تحريڪ ٻيهر پيش ڪئي وڃي، جنهن تي قائد ايوان راجا ظفر الحق رولز مطعل ڪري سوالن جو وقفو موخر ڪرڻ جي تحريڪ ٻيهر پيش ڪئي جنهن جي ايوان اتفاق راءِ سان منظوري ڏئي ڇڏي، جنهن کانپوءِ وفاقي وزير سينيٽر پرويز رشيد ايڪهيني آئيني ترميم ۽ آرمي ايڪٽ ۾ ترميمي بل پيش ڪيو ۽ ايوان ۾ ووٽنگ ڪئي وئي، سينيٽ ۾ موجود 78 ميمبرن ٻنهي بلن جي حق ۾ ووٽ ڏنا ڪنهن رڪن پاران مخالفت نه ڪئي وئي، جڏهن ته جي يو آءِ ف جي قومي اسيمبلي ميمبرن کانپوءِ سينيٽ مان به غير حاضر رهيا، جمعيت علماءِ اسلام ف ۽ جماعت اسلامي آئيني ترميمي مسودي ۾ دهشتگردي سان گڏ مذهب ۽ فرقي جو نالو شامل ڪرڻ تي تحفظات جو اظهار ڪيو هو ۽ موقف اختيار ڪيو هو ته ان سان مذهب جي بدنامي ٿيندي ، سينيٽ مان منظور ڪيل ترميمي بل ۾ چيو ويو ته ملڪ ۾ غير معمولي حالتون ان ڳالهه جي گهر ڪن ٿيون ته دهشتگردي ۽ پاڪستان خلاف جنگ جو ماحول پيدا ڪرڻ جي ڪيسن جي تيزي ٻڌڻي لاءِ خاص عدالتون قائم ڪيون وڃن.

 

ڪوشش آهي ته آئيني ترميمن تي اتفاق راءِ پيدا ٿي سگهجي: وزيراعظم

اسلام آباد(بيورو) وزيراعظم نواز شريف چيو آهي ته 21 هين آئيني ترميم جي حوالي سان جن سياسي اڳواڻن کي خدشا آهن انهن کي ختم ڪيو وڃي اسلام آباد ۾ پارليامينٽ ميمبرن جي اعزاز ۾ ڏنل ناشتي دوران ڳالهائيندي وزيراعظم چيو ته حڪومت ملڪ مان دهشتگردي جو خاتمو چاهي ٿي، آئيني ترميمون غير معمولي حالتن ۾ غيرمعمولي قدم آهي، اسيمبلي ميمبر پنهنجن پنهنجن تڪن ۾ وڄي عوام کي ان غير معمولي قدمن بابت آگاهه ڪن، وزيراعظ۾ جو چوڻ هو ته سمورا اتحادي اسان سان گڏ آهن ٻيون سياسي پارٽيون به اسان سان تعاون ڪن. دهشتگردي جو خاتمو ۽ امن امان جي فراهمي يقيني بڻائڻي آهي، غير معمولي حالتون آهن، انڪري فوجي عدالتون ضروري آهن. وزيراعظم نوازشريف چيو ته هو دهشتگردي خلاف متحد آهن ۽ متحد ٿي ڪري دهشتگردي جو مقابلو ڪرڻو آهي. وزيراعظم چيو ته سمورا اتحادي ساڻن گڏ آهن ۽ جيڪڏهن ڪنهن کي اختلاف آهن ته ايوان ۾ پيش ڪري. امن امان جي فراهمي کي هر صورت ۾ يقيني بڻايو ويندو. وزيراعظم چيو ته ملڪ ۾ غير معمولي حالتون آهن ۽ اهڙين حالتن ۾ فوجي عدالتون ضروري آهن.

 

حالتن کي بهتر بنائڻ جو واحد طريقو دهشتگردن جو مڪمل طور تي صفايو ڪيو وڃي: صدر ممنون حسين

اسلام آباد (بيورو) پاڪستان جي صدر ممنون حسين چيو آيه ته حالتن کي بهتر بنائڻ جي واحد طريقو دهشتگردن جو مڪمل طور تي صفائي ڪئي وڃي عوام دهشتگردي خلاف حڪومت ۽ فوج جو مڪمل ساٿ ڏي اها ڳالهه صدر ممنون حسين ٽرائيبل ايريا چيمبر آف ڪامرس اينڊ انڊسٽري جي وفد سان ڳالهائيندي ڪئي جنهن صدر سان ايوان صدر اسلام آباد ۾ ملاقات ڪئي ان موقعي تي ڳالهائيندي صدر چيو ته دهشتگردن پنهنجي طرز عمل سان ثابت ڪري ڇڏيو آهي ته هو مسلم اجتماعيت جو حصو نه آهن هن چيو ته الله تعاليٰ انهن جي دلين تي مهر هڻي ڇڏي آهي ان لاءِ انهن جي اصلاح به ممڪن نه آهي هاڻي حالتن کي بهتر بنائڻ جو واحد طريقو هي آحي ته دهستگردن جي مڪمل طور تي صفائي ڪئي وڇي صدر چيو ته قبائلي عوام دهشتگردي خلاف حڪومت ۽ فوج جو مڪمل ساٿ ڏي. ان موقعي تي ٽرائيبل ايريا چيمبر آف ڪامرس اينڊ انڊسٽري جي وفد پنهنجا مسئلا وفد جي آڏو رکيا وفد صدر کي ٻڌايو ته قبائلي علائقا انڪم ٽيڪس ۽ سيلز ٽيڪس کان آجا آهن ۽ ڪجهه ادارن جي ڪري انهن تي عملدرآمد نه پيو ٿئي جنهن جي ڪري صنعت مسئلن جو شڪار آهي وفد صدر کي کاڻين جي ليز جي حوالي سان پيش ايندڙ مسئلن کان به آگاهه ڪيو صدر ٽرائيبل ايريا چيمبر آف ڪامرس اينڊ انڊسٽري کي مسئلن جي حل جي خاطري ڪرائيندي قابل عمل تجويزون پوري تفصيل سان موڪلڻ جي هدايت ڪئي.

 

هميشه ڪوشش رهي آهي ته هن ملڪ جو قانون ۽ جمهوريت قائم رهي: خورشيد شاهه

اسلام آباد(بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته دهشتگردي جي خاتمي لاءِ پوري قوم گڏ آهي، آئين ۾ ترميمون دهشتگردن خلاف آهن ڪنهن سياسي يا مذهبي پارٽي خلاف نه، قومي اسيمبلي ۾ پنهنجن خيالن جو اظهار ڪندي سيد خورشيد شاهه جو چوڻ هو ته موجوده حالتن ۾ پارليامينٽ جي اهميت پوري ملڪ ۾ محسوس ڪئي پئي وڃي ڇو ته پارليامينٽ ڪنهن  به ملڪ جي عوام جي سوچ جي عڪاسي ڪندي آهي، اسان جي ڪوشش رهي آهي ته هن ملڪ جو قانون ۽ جمهوريت قائم رهي، ماضي ۾ ڪيترائي ڀيرا اها ڳالهه بحث هيٺ رهي ته جيڪو طبقو اسان جي دين جي حڪمن جو غلط استعمال ڪندي ماڻهن کي گمراهه ڪن ٿا انهن سان ڳالهيون ڪيون وڃن هي ملڪ ڪيترن ئي سالن کان دهشتگردي جو شڪار آهي اسان پنهنجي سموري زندگي ملڪ ۾ پارليامينٽ جي بالادستي ۽ عدليه جي آزادي لاءِ جدوجهد ڪئي آهي عوام جي زندگي جو تحفظ افضل آهي، حڪومت جي ذميواري آهي هت هو عوام کي تحفظ فراهم  ڪري، هن ملڪ ۾ اسلامي تعليم سان مقابلي ۾ ڪوبه قانون منظور نٿو ٿي سگهي اسلام امن ۽ سلامتي جو مذهب آهي پر اسان ڏٺو ته انسانن کي ان طرح قتل ڪيو پيو وڃي جنهن طرح جانورن جو رت به نه وهايو ويندو آهي.

 

آئيني ترميمن جو مقصد مسجدن ۽ مدرسن کي نشانو بڻائڻ ناهي: چوڌري نثار

لاهور(بيورو) وفاقي گهرو وزير چوڌري نٿار علي خان چيو آهي ته فوجي عدالتون قائم ڪرڻ لاءِ آئين ۾ ترميم جو مقصد مسجدن ۽ مدرسن کي نشانو بڻائڻ ناهي پاڪستان علماءَ ڪائونسل جي چيئرمين حافظ طاهر اشرفي سان ٽيليفون تي ڳالهائيندي چوڌري نثار علي خان چيو ته آئيني ترميم جو مقصد مسجدن ۽ مدرسن کي نشانو بڻائڻ ناهي۽ مدرسن کي مڪمل تحفظ ڏنو ويندو هن چيو ته مذهبي اڳواڻن کي موجوده صورتحال تي اعتماد ۾ ورتو ويندو ۽ ان حوالي سان تمام جلد مذهبي اڳواڻن ۽ مدرسن جي عالمن جو اجلاس گهرايو ويندو، ان موقعي تي حافظ طاهر اشرفي جو چوڻ هو ته مدسن ڪڏهن به دهشتگردي جي حمايت ناهي ڪئي ۽ سموريون مذهبي قوتون مسجدن، مدرسن ۾ دهشتگردي خلاف حڪومت ۽ فوج سان گڏ آهن.

 

21 آئيني ترميم جي گڏيل منظوري کانپوءِ پ پ سينيٽر رضا رباني روئي ويٺو

اسلام آباد (بيورو) سينيٽ ۾ ايڪيهين آئيني ترميم جي گڏيل منظوري کانپوءِ سينيٽر ميان رضا رباني روئي ويٺو ۽ چيو ته جيترو شرمشار مان اڄ آهيان ايترو اڳ نه هيس، ضمير خلاف ووٽ ڏنو، جڏهن ته ٻين سينيٽرز چيو ته هي فيصلا گهڻو اڳ ٿيڻ گهرجن ها، اڄ جون فوجي عدالتون ماضي جي عدالتن کان مختلف آهن، پهريان فوجي عدالتون آمر ٺاهيندا هئا ۽ هي عدالتون پارليامينٽ ٺاهيون آهن، ملڪ ۽ قوم جي مفاد ۾ ڪڙي گوري کائڻ پئي، هاڻ دهشتگردن جا نالا وٺنداسين، پوري قوم ۽ سياسي جماعتون هڪ صف تي آهن، فوجي عدالتون اسان جي ضرورت ۽ مجبوري هيون، آخري موقعو آهي جنگ هارائي ويٺاسين ته رياست پاڪستان هارائي ويهندو، هي جنگ هر هال ۾ کٽڻي آهي، اڱاري تي سينيٽ جي اجلاس ۾ ايڪيهين ترميم منظور ٿيڻ کانپوءِ خيالن جو اظهار ڪندي پ پ جي پارلياماني ليڊر ميان رضا رباني چيو ته مونکي اٽڪل 10 کان 12 سال سينيٽ ۾ ٿي چڪا آهن، سمجهان ٿو ته جيترو شرمسار مان اڄ آهيان، ان کان اڳ نه هيس، هي ووٽ پارٽي جي امانت هيو جيڪا مون ذميواري پوري ڪري ڇڏي، آئينده جو لائحه عمل منهنجي مٿان آهي، اڄ ضمير خلاف ووٽ ڏنو، سينيٽر ميان رضا رباني روئي ويٺو ۽ پنهنجي تقرير ختم ڪئي، سينيٽر افراسياب چيو ته بدقسمتي سان فيصلا دير سان ڪيا، اهي فيصلا گهڻو اڳ ٿيڻ گهرجن ها، 1980 ۾ ضياالحق ۽ افغان پاليسي ۾ اسان ڦاسي پياسين، باچا خان ان وقت چئي ڇڏيو هو ته هي درست فيصلو نه آهي، اي اين پي جو پهرين ڏينهن کان دهشتگردي خلاف چٽو موقف آهي، هاڻ سڄو پاڪستان اسان جي موقف سان گڏجي ويو آهي، اسان جا ٻارڙا مارجي ويا، امن ۾ والدين فوت ٿي وڃن ته انهن جا جنازي ٻارڙا کڻن ٿا پر اسان پنهنجي ٻارڙا جا جنازي کنيا، اسان جي حڪومت سوات ۾ ڪاروائي ڪئي ته اسان چيو ته هي اسان جي جنگ آهي، طالبان کي شڪست ڏئي پاڪستان جو جهنڊو ڦڙڪايو ويو، بعد ۾ چيو ويو ته سٺا ۽ خراب طالبان آهن، سٺو ٿيو اسان ابحام مان نڪري آيا آهيون ۽ هي ملڪي تاريخ جو اهم ڏينهن آهي، بحث ۾ حصو وٺندي ايم ڪيو ايم جي طاهر مشهدي حڪومت، عوام ۽ سياسي جماعتن کي واڌايو ڏيندي چيو ته اسان ڪڙي گوري قوم جي مفاد ۾ کاڌي، حڪومت قوم ڏانهن واجهائي رهي آهي ته جيڪا تاريخ جي سڀ کان مضبوط حڪومت بڻجي رهي آهي، عوام حڪومت ڏانهن واجهائي رهيو آهي ته دهشتگردن سان ڪيئن ڊيل ڪري ٿي جن مسجدن امام بارگاهن ۽ بي گناهه ماڻهن کي ماريو، اسان خاموش رهياسين، جڏهن اسان جي وجود تي بي رحمي سان حملو ڪيو ويو، پشاور ۾ ٻارڙن کي ماريو ويو، 60 هزار پاڪستاني شهيد ٿي ويا، 10 هزار فوجي شهيد ٿي ويا، انهن جي منڍين کي فوٽ بال ڪري انهن سان کيڏيو ويو، دهشتگردن اسان جي عزت ۽ غيرت ۾ هٿ وڌا، قوم چاهي ٿي ته دهشتگردن جي پاڙ پٽي وڃي. ايوان ۾ فنڪشنل ليگ جي سينيٽر سيد مظفر حسين شاهه به خطاب ڪيو.

 

21هين ترميم جي منظوري خوش آئيند آهي: الطاف حسين

لنڊن (مانيٽرنگ ڊيسڪ) ايم ڪيو ايم جي اڳواڻ الطاف حسين چيو آهي ته قومي اسيمبلي ۾ گڏيل طور تي 21هين ترميم جي منظوري ملڪ کي بچائڻ ۽ ملڪ جي مستقل لاءِ خوش آئيند آهي الطاف حسين جو چوڻ آهي ته سمورن سياسي جماعتن دهشتگردن کان ملڪ کي پاڪ ڪرڻ لاءِ هڪ صفحي تي گڏجي ملڪ ۾ مثبت روايت جو بنياد وڌو آهي اڄ دهشتگردي خلاف جنگ ۾ پاڪستان کي اتفاق راءِ جي ضرورت هئي نااتفاقي پيدا ڪندڙ طالبان ۽ دهشتگردي جا حمايتي آهن هن دعا ڪئي ته الله تعاليٰ پاڪستان کي دهشتگردي کان پاڪ ڪرڻ لاءِ هٿياربند فوج سياسي جماعتن ۽ پوري قوم کي جرئت ۽ همت ڏي.

 

عمران خان عدالتي ڪميشن جي قيام لاءِ 18 جنوري جي ڊيڊ لائين ڏئي ڇڏي

اسلام آباد (بيورو) پي ٽي آءِ حڪومت کي چونڊن ۾ ڌانڌلين جي جاڄ لاءِ عدالتي ڪميشن جي قيام لاءِ 18 جنوري جي ڊيڊ لائين ڏئي ڇڏي، عمران خان چيو آهي ته جيڪڏهن ڪميشن نه جوڙي وئي ته 18جنوري تي ڊي چوڪ تي گڏجي لائحه عمل جوڙيو ويندو. اسلام آباد ۾ پنهنجي رهائشگاهه تي پريس ڪانفرنس ڪندي عمران خان چيو ته اين اي 122 تي ووٽن جي ٻيهر ڳڻپ دوران 30 هزار ووٽ بوگس نڪتا آهن، پر ان تڪ تي ڳڻپ جو مسئلو نه هو، ڪيترين ئي پولنگس تي ٻئي نمبر جا بيلٽ پيپر مليا آهن. هن چيو ته پشاور سانحي سبب ڌرڻو ختم ڪيو ۽ حڪومت جو ساٿ ڏنو، تحريڪ انصاف جمهوريت تي يقين رکي ٿي. پي ٽي آءِ سربراهه چيو ته مضبوط جمهويت پاڪستان جي مضبوطيءَ لاءِ ضروري آهي. عمران خان چيو ته حڪومتي ڪميشن ۾ فراڊ پڪڙجڻ جو فائدو نه ٿيندو. عمران خان عدالتي ڪميشن جي قيام لاءِ حڪومت کي 18 جنوري تائين جي مهلت ڏيندي چيو ته عدالتي ڪميشن نه ٺهيو ته ٻيهر رستن تي هونداسين، 18جنوري تي ڊي چوڪ تي گڏ ٿينداسين، جتي هو اهم اعلان ڪندو. هن چيو ته اسان ٻن سالن لاءِ ڪوڙِي گوري کائڻ جِي حامي ڀري، ڌانڌلين جي جاچ لاءِ عدالتي ڪميشن جڙيو ته اهو اليڪشن کي رد ڪري ڇڏيندو. عمران خان چيو ته حڪومت شفاف نموني سان اچي ها ته جاچ کان نه ڊڄي ها. ٻي شادي واري سوال جي جواب تي عمران خان چيو ته شادي ڪرڻ سنت آهي، هفتي اندر خوشخبري ٻڌائيندس.

 

نيپرا جو بجلي جي قيمت ۾ گهٽتائي جو اعلان

ڪراچي (مانيٽرنگ ڊيسڪ) نيپرا طرفان بجلي جي قيمت ۾ گهٽتائي جو اعلان ڪيو ويو. تفصيل موجب  نيپرا ڪي اليڪٽرڪ کي حڪم جاري ڪندي بجلي جي في يونٽ قيمت ۾ 1  رپيو 4 6  پئسا في يونٽ گهٽتائي جو اعلان ڪري ڇڏيو. نيپرا ۽ ڪي اليڪٽرڪ طرفان صارفين کي واضح ڪيو ويو آهي ته اهو ريليف کين جنوري جي بلن ۾ ڏنو ويندو. جڏهن ته قيمتن ۾ گهٽتائي فيول ايڊجسٽمينٽ جي ڏس ۾ ڪئي وئي آهي

 

هي پاڪستان آهي بنگلاديش ناهي ۽ نه ئي حسينا واجد جي حڪومت اهي جو پاڪستان کي سيڪيولر ملڪ بڻايو وڃي: مولانا فضل الرحمان

اسلام آباد(بيورو) جميعت علماءِ اسلام (ف) جي سربراهه مولانا فضل الرحمان جو چوڻ آهي ته حڪومت طرفان 21 هين آئيني ترميم ۽ آرمي ايڪٽ ترميمي بل تي اعتماد ۾ نه ورتو ويو جڏهن ته اسان فوجي عدالتون قائم ڪرڻ جي گناهه لاءِ تيار ٿي ويا هئاسين پر حڪومت غير سنجيدگي جو مظاهرو ڪيو پارليامينٽ هائوس ٻاهران ميڊيا سان ڳالهائيندي مولانا فضل الرحمان جو چوڻ هو ته حڪومتي ٽيم ترميمن تي ڳالهين لاءِ حاضر ٿي پر ڳالهين دوران ئي قومي اسيمبلي ۾ بل پيش ڪيو ويو جيڪو حڪومتي غير سنجيدگي جو ثبوت آهي جڏهن ته اسان تجويز ڏني هئي ته فوجي عدالتن بابت سپريم ڪورٽ جو به ڪردار هجڻ گهرجي پر اسان طرفان ڏنل ڪابه تجويز بل ۾ شامل نه ڪئي وئي هن چيو ته پشاور سانحي کي مذهبي هيڪڙائي خلاف ڇو استعمال ڪيو پيو وڃي، اڄ ٻيهر دهشتگردي ۽ مذهب کي جوڙڻ جي ڪوشش ڪئي پئي وڃي  ۽ اسان ان موڙ تي بيٺل آهيون جتي ملڪ کي سيڪيولر بڻائڻ جي ڪوشش ڪئي پئي وڃي پر اسان ٻڌائڻ چاهيون ٿا ته هي ملڪ بنگلاديش ناهي ۽ نه ئي حسينا واجد جي حڪومت اهي جو پاڪستان کي سيڪيولر ملڪ بڻايو وڃي، جي يو آءِ (ف) جي سربراهه چيو ته آئين ۾ ترميم جي ان لهجي سان قوم ورهائجي ويندي، سموريون مذهبي، سياسي پارٽيون ۽ زندگي سان لاڳاپيل هر شعبي جا ماڻهو دهشتگردي جي خلاف هڪ ئي صف ۾ بيٺل آهن، دهشتگردي مذهبي ۽ غير مذهبي ۾ نٿي ورهائجي دهشتگردي کي ڏوهه قرار ڏنو وڃي ۽ سڀئي گڏجيان خلاف اٿن، هن چيو ته 21 هين ترميم تي مشاورت لاءِ زندگي جي هر شعبي سان لاڳاپيل ماڻهن کي گهرائينداسين ۽  قومياسيمبلي مان پاس ٿيدنڙ بل تي مشاورت کانپوءِ جامع ردعمل ڏينداسين.