تازيون خبرون

Daily Archives: January 6, 2015

قوم متحد هوندي ته دهشتگردي خلاف جنگ کٽي وينداسين: چوڌري نثار

اسلام آباد (بيورو) وفاقي گهرو وزير چوڌري نثار علي خان چيو آهي ته فوجي عدالتون جنگ واري حالت ۾ ٺهنديون آهن ۽ اسان اهڙي جنگ حالت ۾ آهيون جنهن ۾ ٻي ڌر هر لحاظ کان بالاتر آهي، اسان جي فوج اسلامي، آئيني ۽ قانوني حدن جي پابندي آهي ڪنهن کي مارڻ مقصود هجي ها ته فوج پهريائين انهن جو ڪم تمام ڪري چڪي هجي ها، فوجي عدالتون ڪينگرو ڪورٽس نه هونديون جو جيڪو ويو ان کي ٽنگيو وڃي، اسان اصولن تي هلڻ جي ڳري قيمت ادا ڪئي، قومي قيادت جنيوا ڪنويشن ۽ انساني حقن تي مڪمل يقين رکي ٿي جيڪو ڪنهن قسم جي دهشتگردي ۾ ملوث نه آهي ان کي دڄڻ جي ضرورت نه آهي. فوجي عدالتن ۾ ڪيس موڪلڻ کان اڳ وفاقي ڪيسن کي سخت ڇنڊ ڇاڻ مان گذاريندو، دهشتگردن کي صفائي جو موقعو ملندو، مدرسن کي مدرسا طور ٽارگيٽ نه ڪنداسين، قوم متحد هوندي ته هر صورت ۾ هيءَ جنگ کٽينداس ين، جنهن ملڪ جي سياسي قيادت سمورن تلخين کي هڪ پاسي تي رکي مستقبل لاءِ گڏ ٿي وڃي دنيا جا ڪا طاقت ان کي شڪست نٿي ڏئي سگهي، دهشتگردن جي موقف سان ڪو به متفق نه آهي، اسان جو رستو حق ۽ دهشتگردن کي آخري انجام تائين پهچائڻ جو آهي، قومي اسيمبلي ۾ خيالن جو اظهار ڪندي هن چيو ته ايوان ۾ ايڪهين ترميم تي بحث ٿيندو، هيءَ هڪ اهڙي آئيني ترميم آهي جيڪا ظاهر ۾ پارلياماني نظام سان ٽڪراءُ آهي، ڪجهه سال اڳ ئي وهم ۽ غمان ۾ به نه هيو ته فوجي عدالتن لاءِ قانونسازي ٿيندي پر آئيني ترميم ذريعي ان کي قانون جو حصو بڻايو ويندو، فوجي عدالتون جمهوري نظام حڪومت ۾ جتي عدالتون ڪم ڪري رهيون هجن اتي فوجي عدالتن تي سمورين جماعتن جو متفق ٿيڻ ۽ قانونسازي ڪرڻ هڪ اڻ ٿيڻي ڳالهه آهي، هن چيو ته ملڪ ۾ غير معمولي صورتحال آهي، عوام ادارا، قيادت، اپوزيشن، ٻچو ٻچو جنگ جي صورتحال جو شڪار آهي، فوجي عدالتون جنگ ۽ عدل جي دوران يا جنگ کانپوءِ ٺاهيون وينديون آهن، نائين اليون کان پوءِ آمريڪا جهڙي ملڪ ۾ به ملٽري ٽربيونل جوڙيو ويو، هن چيو ته هيءَ غير معمولي جنگ آهي، اسان جي فوج آئيني حدن مطابق جنگ وڙهي رهي آهي، ٻئي پاسي دهشتگرد حدن کان بالاتر آهن انهن آڏو جنيوا ڪنوينشن نه آهي، هي ٻارڙن، عورتن، مسجدن ۽ درسگاهن کي نشانو بڻائين ٿا، جڏهن دهشتگردي جو حملو ٿئي ٿو ته ان ۾ 60 کان 70 ماڻهو شهيد ٿين ٿا ته وري انهن جي جنازي تي به حملو ڪيو وڃي ٿو، ٻئي طرفان ڪا انساني حد نه آهي، جڏهن 2 قوتون عسڪري طور تي پاڻ ۾ ٽڪرائين ته بي گناهه شهري به نشانو بڻجن ٿا، اسان جي اسلامي فوج حدن ۾ رهي وڙهي رهي آهي، ٻئي پاسي کان سمورين حدن کي هڪ پاسي رکي ملڪ جو جيڪو حشر ڪيو ويو آهي ان جو مثال نٿو ملي، هن ٻڌايو ته خودڪشن ڌماڪن ۽ دهشتگردي ۾ 40 هزار کان وڌيڪ بي گناهه شهري شهيد ٿي چڪا آهن، انهن جو ڏوهه صرف اهو آهي ته اهي ڪنهن دهشتگرد آڏو ناهن جهڪيا، هن ٻڌايو ته ميران شاهه ۾ ايترو بارود پڪڙيو ويو جو جيڪڏهن روزانو هڪ ڌماڪو ٿئي ها ته 15 سالن تائين ڪافي هو، اسان چاهيون ها ته ميران شاهه کي تباهه ڪري ڇڏيون ها پر عورتن ۽ ٻارڙن جو خاص خيال رکيو ويو، هن چيو ته اڄ فوج انٽيليجنس ۽ حڪومت تي الزام لڳي ٿو ته آپريشن ٿئي ٿو پر دهشتگرد ڀڄي وڃن ٿا، اسان اصولن مطابق هلڻ جي ڳري قيمت ادا ڪئي، هن چيو ته فوجي عدالتون محدود وقت ۽ غير معمولي حالتن لاءِ آهن، فوجي عدالتون عام شهرين لاءِ نه سياستدان، بزنس مين، ميڊيا پرسن ۽ سوسائٽي ماڻهن جو ٽرائيل انهن عدالتن ۾ ٿيندو، هن چيو ته سموري قيادت جو اتفاق هيو ته جيڪو به حل ڪڍيو وڃي اهو آئين مطابق هجي، گذريل حڪومت جي آخر ۾ فيئر ٽرائيل ايڪٽ ۽ اسان جي حڪومت دوران تحفظ پاڪستاني ايڪٽ تي اتفاق ٿيو، هي سموري قانونسازي ڪم ڇو نه آئي ڪنهنجي غلطي هئي، ان تي بحث نٿا ڪرڻ چاهيون، ڪوشش هئي ته گذريل 14 سالن کان موجوده عدالتي نظام ڪو طريقو ڪڍيو وڃي ته دهشتگردن جو سڀ کان تيز عدالتي ٽرائيل ٿئي پر افغانستان مان هڪ فوج اچي ٿي جنهن ۾ جج پوليس آفيسر کي چيو وڃي ٿو ته اسان کي خبر آهي ته توهان جو پٽ يا نياڻي ڪٿي پڙهن ٿا  توهان جي زال ڪهڙي بازار ۾ ويندي آهي، ان صورتحال ۾ ڪهڙو بهادر شخص هوندو جنهن کي اهو احساس نه ٿئي ته ان جي خاندان کي خطرو آهي، اولاد لاءِ وڏي کان وڏو شخص ڪمزور ٿي وڃي، روايت بڻجي وئي هئي ته هڪ پاسي ٽرائيل ٿيندو هو ته ٻئي پاسي ڌمڪيون ملڻ شروع ٿي وينديون هيون، هن چيو ته فوجي عدالتن ۾ جيڪي جج هوندا اهي پاڪستاني آهن، ڪنهن جج کي ڪو به خوف نه ٿئي، ان کي الله جو خوف هجڻ گهرجي، هيءَ پرڏيهي فوج نه آهي ڪنهن عام شهري کي ڳڻتي ڪرڻ جي ضرورت نه آهي، پهريان وفاقي حڪومت ڪيس جي چڱي ريت ڇنڊ ڇاڻ ڪندي ۽ پوءِ ان کي فوجي عدالت ۾ موڪليندي، اسان کي به قبر ۾ هلڻو آهي، هن ٻڌايو ته شفقت حسين جو ڪيس روڪيو ويو آهي ان تي انڪوائري ٿي رهي آهي، هن ايوان کي يقين ڏيارو ته سڀ ڪيس جاچ ۽ ڇنڊ ڇاڻ مان گذرندا، دهشتگردن کي صفائي جو موقعو ڏنو ويندو، سمري آف ايويڊنس پيش ڪئي ويندي، وڪيل هوندا، فوجي عدالتن ۾ صرف انهن جا ڪيس هوندا جيڪي پاڪستان ۾ رت جا راند کيڏڻ گهرن ٿا.

آصف زرداري سکر لڳ بجلي پئدا ڪندڙ 2 منصوبن جو بنياد رکي ڇڏيو

سکر(بيورو) اڳوڻي صدر آصف علي زرداري سکر  لڳ روهڙي ۽ نارا ڪئنال تي پاڻي مان بجلي پئدا ڪندڙ 84 ملين ڊالر جي لاڳت سان ٻن وڏن اهم منصوبن جي پيڙه جو پٿررکيو. ان موقعي تي آصف علي زرداري چيو ته روهڙي ۽ نارا ڪئنال تي جڙندڙ اهي اهم منصوبا بجلي جي کوٽ کي پورو ڪرڻ جي لاءِ وڏا ڪارآمد ثابت ٿيندا جن سان نه رڳو علائقي جي ماڻهن کي بجلي جي سهولت مهيا ٿيندي پر سنڌ کي معاشي ترقي حاصل ٿيندي، آصف علي زرداري سکر لڳ روهڙي ڪئنال جي آر ڊي 15 تي 36.4 ملين ڊالر سان تعمير ٿيندڙ 9 ميگا واٽ بجلي پئدا ڪندڙ منصوبي ۽ نارا ڪئنال جي آر ڊي 26 تي 47.7 ملين ڊالر جي لاڳت سان تعميرٿيندڙ 15 ميگا واٽ بجلي پئدا ڪندڙ منصوبي جي پيڙه جو پٿر رکيو. ان موقعي تي سابق صدر آصف علي زرداريءَ سان سنڌ جو وڏو وزير سيد قائم علي شاه ۽ بختاور ڀٽو زرداري پڻ گڏ هئا. ان موقعي تي اڳوڻي صدر آصف علي زرداري ڳالهائيندي چيو ته هنن ٻن هائيڊرو پاور پراجيڪٽس کان علاوه اهڙا ٻيا منصوبا به لڳايا ويندا، ان سا گڏ گڊو بئراج تي به 40 ميگا واٽ بجلي پيدا ڪرڻ جو منصوبو لڳايو ويندو. هن چيو ته سکر بئراج جو به اسٽرڪچر تبديل ڪرڻ کانسواءِ هائيڊرو پاور پراجيڪٽ هڻڻ لاءِ به اسٽڊي ڪئي وڃي ته جيئن سکر بئراج تي به بجلي پيدا ڪرڻ جو منصوبو لڳائي بجليءَ جي بحران تي ضابطو آڻي سگھجي ۽ هنن ٻن منصوبن کي مقرر ڪيل ٽائيم 2 سال 6 مهينن جي اندر مڪمل ڪيو وڃي. ان کان اڳ هائيڊرو پاور پراجيڪٽ جي ڪنسلٽنٽ خورشيد احمد جماليءَ سابق صدر کي منصوبن بابت تفصيلي بريفنگ ڏني. ان موقعي تي صوبائي وزير خزانه ۽ انرجي سيد مراد علي شاه، صوبائي اسيمبلي جو ميمبر سيد ناصر حسين شاه ۽ ٻين اعلي آفيسرن کان علاوه پ پ پ جي ڪارڪنن وڏي انگ ۾ شرڪت ڪئي.

 

وزيراعظم سان آمريڪي سفير جي ملاقات، پاڪستان دهشتگردي کان سخت متاثر ٿيو آهي: نواز شريف

اسلام آباد(بيورو) وزيراعظم نواز شريف سان آمريڪي سفير رچرڊ اولسن جي ملاقات، آمريڪي پرڏيهي وزير جان ڪيري جي پاڪستان جي دوري سميت ٻين گڏيل دلچسپي جي معاملن تي خيالن جي ڏي وٺ ڪئي وئي، ميڊيا جي رپورٽن موجب سومر ڏينهن وزيراعظم هائوس ۾ پاڪستان ۾ مقرر آمريڪي سفير رچرڊ اولسن وزيراعظم نواز شريف سان ملاقات ڪئي، ملاقات ۾ آمريڪي پرڏيهي وزير جان ڪيري جي پاڪستان جي دوري ۽ پاڪ آمريڪا تعلقات تي خيالن جي ڏي وٺ  ڪئي وئي، ان موقعي تي سفير پشاور سانحي جي سخت لفظن ۾ مذمت ڪندي چيو ته معصوم ٻارڙن جي قتل تي گهڻو ڏک ٿيو آهي آمريڪا خطي ۾ امن جو خواهان آهي، پاڪستان سان آمريڪا تعلقات کي وڏي اهميت ڏئي ٿو، جان ڪيري جو پاڪستان جو دورو به پنهنجي اهميت جو حامل آهي، آمريڪا پاڪستان کي پنهنجو اتحادي سمجهي ٿو، قومي ايڪشن پلان بابت آمريڪي سفير کي بريف ڪيو ويو آهي، وزيراعظم چيو ته آمريڪا وانگر پاڪستان به آمريڪا سان تعلقات کي اهميت ڏئي ٿو، سموري قوم دهشتگردي خلاف گڏ ٿي وئي آهي.

 

آرمي چيف جي صدارت هيٺ اپيڪس اجلاس، آءِ ڊي پيز جي مرحليوار واپسي جو فيصلو

پشاور (بيورو) آرمي چيف جنرل راحيل شريف جي صدارت ۾ ڪور هيڊڪوارٽر پشاور ۾ قومي ايڪشن پلان تي عملدرآمد بابت خيبرپختونخواهه ايپڪس ڪميٽي جو اجلاس ٿيو جنهن ۾ وزيراعليٰ پرويز خٽڪ، گورنر سردار مهتاب عباسي ۽ آءِ جي سميت ٻين عملدارن شرڪت ڪئي جڏهن ته اجلاس ۾ ڊي جي آءِ ايس آءِ ليفٽيننٽ جنرل رضوان اختر ۽ ڪور ڪمانڊر پشاور به شريڪ ٿيا، پاڪ فوج جي تجرمان مطابق اعليٰ سطحي اجلاس ۾ قومي ايڪشن پلان تي عملدرآمد سميت صوبي ۽ فاٽا جي سيڪيورٽي صورتحال جو به تفصيلي جائزو ورتو ويندو جڏهن ته ان موقعي تي اتر وزيرستان جي متاثرن جي ايندڙ مهيني گهرن ڏانهن واپسي جو به فيصلو ٿيو، ترجمان جو چوڻ هو ته اتر وزيرستان جي بي گهر ماڻهن جي انهن جي گهرن ڏانهن واپسي مرحليوار هوندي ۽ پاڪ فوج حڪومت ۽ پوليٽيڪل انتظاميه سان انهن جي واپسي کي يقيني بڻائيندي، ترجمان مطابق اجلاس کي خطاب ڪندي آرمي چيف جنرل راحيل شريف جو چوڻ هو ته پشاور سانحي کانپوءِ قوم دهشتگردي جي پار پٽڻ لاءِ متحد آهي جڏهن ته خيبرپختونخواهه جا ماڻهو دهشتگردن ساهون ديوار ثابت ٿيا آهن ۽ صوبن جي ماڻهن همت ۽ حوصلي سان دهشتگردن کي معاشري ۾ اڪيلو ڪري ڇڏيو آهي جنرل راحيل شريف جو چوڻ هو ته فوج حڪومت سان گڏجي اتروزيرستان جي متاثرن جي واپسي لاءِ ڪم ڪندي جڏهن ته قومي ايڪشن پلان تي عملدرآمد لاءِ به مڪمل تعاون ڪيو ويندو.

 

اليڪشن ڪميشن پاران مارچ ۾ سينيٽ چونڊون ڪرائڻ جو فيصلو

اسلام آباد(م.ڊ) فيبروري جي پهرين هفتي ۾ چونڊ شيڊول جاري ڪيو ويندو، ذريعن موجب اليڪشن ڪميشن سينيٽ جي چونڊن جي تياريون شروع ڪري ڇڏيون آهن، فيبروري جي پهرين هفتي ۾ چونڊ شيڊول جاري ڪيو ويندو جڏهن ته اليڪشن لاءِ پولنگ مارچ ۾ ڪرائڻ جو قومي امڪان آهي، ذريعن ٻڌايو آهي ته اميدوارن لاءِ نامزدگي پيپرز سيمت هدايت نامو ۽ چونڊن جي طريقيڪار تي ٻڌل ڪتابن جي ڇپائي مڪمل ڪئي وئي آهي، 11 مارچ 2015ع تي 52 سينيٽرز رٽائر ٿي رهيا آهن انهن ۾ بلوچستان ۽ خيبرپختونخواه جا 12، 12 جڏهن ته پنجاب ۽ سنڌ جا 11، 11، وفاقي گادي واري شهر جا 2 ۽ فاٽا جا 6 سينٽر شامل آهن، رٽائر ٿيل سينيٽرز ۾ بلوچستان کان عبدالرئوف لاله، مير حاصل خان بزنجو، ميرمحمد علي رند، مير ولي محمد، نواب محمد اڪبر مگسي، صابر علي بلوچ، سردار محمد يعقوب ناصر، محمد همايون مندوخيل، مولانا عبدالغفور حيدري، ڪلثوم پروين، ثريا امير الدين، هيمن داس شامل آهن جڏهن ته فاٽا جو عباس آفريدي، رشيد احمد خان، حاجي خان آفريدي، محمد ادريس صافي، وفاقي گادي واري شهر کان نيئر حسين بخاري ۽ سعيد اقبال شامل آهن، خيبرپختونخواه کان رٽائر ٿيل سينيٽرز ۾ عبدالنبي بنگش، گلزار احمد، حاجي غلام علي، محمد ادريس، محمد زاهد خان، سردار علي، وقار احمد، افنان خان، افراسياب خٽڪ، فرح عقيل، فرحت عباس ۽ مرجيت شامل آهن، پنجاب کان رٽائر ٿيلن ۾ جعفر اقبال، چوڌري شجاعت حسين، جهانگير بدر، مشاهدالله خان، پرويز رشيد، راجه ظفرالحق، ظفر علي شاهه، محمد ڪاظم خان، ساجد مير، نجمه حميد ۽ صغريٰ امام شامل آهي، سنڌ کان عبدالحسيب، بابر غوري، عبدالقيوم سرور، گل محمد لاٺ، اسلام الدين شيخ، مولا بخش چانڊيو، سليم مانڊوي والا، رحمان ملڪ، فاروق ايڇ نائيڪ، الماس پروين، شيرال المالڪ شامل آهن.

 

پشاور سانحي سبب شهيد ڀٽو جي سالگره انتهائي سادگي سان ملهائي ويندي: قائم علي شاهه

ڪراچي (اسٽاف رپورٽر) پاڪستان پيپلز پارٽي سنڌ جي صدر ۽ وزير اعليَ سيد قائم علي شاهه اعلان ڪيو آهي ته اڄ 5 جنوري تي پي پي پي جي باني چيئرمين شهيد ذوالفقار علي ڀٽو جي سالگره پشاور سانحي جي ڪري انتهائي سادگي سان ملهائي ويندي ۽ ڪيڪ ڪاٽڻ جي رسم ادا نه ڪئي ويندي  جڏهن ته ان موقعي تي صرف قرآن خواني ڪرائي ويندي . شهيد  ذوالفقار علي ڀٽو ۽ سانحه پشاور جي شهيدن جي ايصال ثواب لاءِ فاتحه خواني ڪئي ويندي ۽ لنگر ورهايو ويندو.

 

آصف زرداري سان امين فهيم جي ملاقات، وڏي وزير خلاف بي اعتمادي رٿ کي روڪڻ جو ٽاسڪ مخدوم حوالي

ڪراچي(اسٽاف رپورٽر) پيپلز پارٽي جي صدر مخدوم امين فهيم آچر ڏينهن اڳوڻي صدر آصف علي زرداري سان بلاول هائوس ۾ ملاقات ڪئي. ملاقات ۾ ٻنهي اڳواڻن ملڪ ۾ سياسي صورتحال ۽ پارٽي معاملن تي ڳالهيون ڪيون. ملاقات ۾ صوبائي وزير مخدوم جميل الزمان به موجود هو. پ پ جي شريڪ چيئرمين آصف علي زرداري وڏي وزير قائم علي شاهه خلاف بي اعتمادي رٿ کي روڪڻ جو ٽاسڪ مخدوم امين فهيم کي ڏئي ڇڏيو، مخدوم امين فهيم سان ملاقات کانپوءِ مخدوم امين فهيم جو پير پاڳاري سان رابطو، جلد ملاقات جو امڪان، شهريار مهر چيو آهي ته وڏي وزير خلاف بي اعتمادي جو خطرو ٽريو ناهي.

 

جماعت اسلامي نجڪاري خلاف مهم هلائڻ جو اعلان ڪري ڇڏيو

لاهور (بيورو) جماعت اسلامي جي امير سراج الحق، حڪومت طرفان ادارن کي خانگائڻ خلاف فيبروري ۾ مهم هلائڻ جو اعلان ڪري ڇڏيو، سندس چوڻ آهي ته ڪرپشن سبب ادارن جو نظام پٽڙي تان لهي رهيو آهي. لاهور ۾ ميڊيا سان ڳالهائيندي سراج الحق چيو ته معاشي حالتن سبب پورهيت پريشان آهن. جماعت اسلامي چيو ته پاڪستان ان وقت تائين معاشي ترقي نه ٿو ڪري سگهي جيسيتائين پورهيت ترقي نه ٿو ڪري. جماعت اسلامي جي امير چيو ته ملڪ ۾ روزگار ناهي ۽ جڏهن ماڻهن کي روزگار نه ملندو ته ڏوهن ۽ دهشتگردي ۾ به واڌ ٿيندي. سراج الحق فيبروري ۾ ادارن کي خانگائڻ خلاف مهم هلائڻ جو اعلان ڪندي چيو ته هــُو پي آءِ اي ۽ ريلوي کاتن کي خانگائڻ نه ڏيندا. سندس چوڻ هو ته ادارن جي ناڪامي ۾ سڀ کان وڏو هٿ حڪومت جو آهي ۽ ناقص سسٽم سبب ئي ادارا ناڪام ٿي رهيا آهن. سراج الحق چيو ته حڪومت ڪيترن ئي معاملن ۾ قانونن تي عملدرآمد نه ٿي ڪري جڏهن ته حالتن جي گهــُرج آهي ته قانون جو دائرو وڌايو وڃي.

 

اعتماد ۾ ناهي ورتو ويو، جي يو آءِ (ف) پاران آرمي ايڪٽ ۾ ترميم تي حڪومت جو ساٿ نه ڏيڻ جو فيصلو

اسلام آباد(بيورو) جميعت علماءِ اسلام (ف) 21 هين ترميم جي آئيني مسودي تي خدشن جو اظهار ڪري ڇڏيو آهي ۽ آرمي ايڪٽ ۾ ترميم تي حڪومت جو ساٿ نه ڏيڻ جو به فيصلو ڪيو آهي جي يو آءِ (ف) جي ترجمان جو چوڻ آهي ته جي يو آءِ (ف) حڪومت کي آئيني ترميم جي مسودي ۾ وڌيڪ ترميمن جون رجويزون ڏنيون هيون جن تي ڪنهن قسم جو عمل ناهي ڪيو ويو پر اسان اها ئي تجويز هاڻ حڪومت کي تحريري شڪل ۾ به جمع ڪرائينداسين ۽ جميعت علماءِ اسلام  آرمي ايڪٽ ۾ ترميم تي حڪومت جو ساٿ نه ڏيندي. جميعت علماءِ اسلام (ف) جي سربراهه مولانا فضل الرحمان جو چوڻ آهي ته آئيني ترميم جي مسودي ۾ اعتماد ۾ ناهي ورتو ويو، ان ڪري آرمي ايڪٽ ۾ ترميم تي حڪومت جو ساٿ نه ڏينداسين.

 

ڪراچي سميت سڄي ملڪ ۾ جشن عيد ميلاد النبي صه عقيدت ۽ احترام سان ملهايو ويو، شهرن ۾ چراغا

ڪراچي (نمائندن وٽان) سنڌ سميت سڄي ملڪ ۾ جشن عيد ميلاد النبي صلي الله عليه وآله وسلم عقيدت ۽ احترام سان ملهايو ويو، ان موقعي تي جلوس ۽ ريليون ڪيون ويون. صبح جي شروعات مسجدن ۾ قرآن خواني، اجتماعي دعائن ۽ درود سلام سان ٿي ۽ عالمن محفلن کي خطاب ڪيو. پاڪ فوج ڏينهن جي شروعاوفاقي گادي واري شهر ۾ 31 جڏهن ته صوبائي گادي وارن شهرن ۾ 21 – 21 توپن سان سلامي سان ڪئي. عيدميلاد النبي صهﷺ جي خوشي جي موقعي تي سڄي ملڪ ۾ چراغان ڪيو ويو آهي. ملڪ جي هر شهر، ڳوٺ، واهڻ ۽ گهٽيءَ کي خانه ڪعبه ۽ گنبد خضرا جي هورڊنگز، بينرز ۽ ساون جهنڊن سان سجايو ويو آهي. سرڪاري توڙي خانگي عمارتن، شاهراهن ۽ مسجدن کي به ساون جهنڊن، بتين، بينرز ۽ اسڪرينن ذريعي سجايو ويو آهي. ڪراچي ۾ جشن عيدميلاد النبي ﷺ جي مرڪزي آجياڻي ڪئمپ نمائش چورنگي ايم اي جناح روڊ تي لڳائي وئي آهي. شهر جي مختلف هنڌن تي به ڪئمپون قائم ڪيون ويون آهن. ڪراچي ۾ عيدميلاد النبي جو مرڪزي جلوس نيو ميمڻ مسجد بولٽن مارڪيٽ وٽان برآمد ٿيندو جيڪو ايم اي جناح روڊ کان ٿيندو نشترپارڪ پهچندو. جلوس ۾ شريڪ ٿيندڙ ٽيپهري ۽ سانجهيءَ جي نماز نشترپارڪ وٽ ادا ڪندا. عيدميلاد النبي جي مرڪزي جلوس ۾ خاص پاس وارين گاڏين کي داخل ٿيڻ جي اجازت هوندي. 12 ربيع الاول جي جلوس ۽ جلسي جا حفاظتي انتظام رينجرز ۽ پوليس اهلڪارن کانسواءِ اسڪائوٽس به سنڀاليو. مرڪزي جلوس جي حفاظت لاءِ 5 هزار پوليس اهلڪار مقرر ڪيا ويا. جشن عيدميلاد النبي جي موقعي تي لاهور سميت سڄي پنجاب کي به خوبصورتي سان سجايو ويو آهي. مختلف شهرن ۾ جلوس ۽ ريليون ڪڍيون ويون.  جڏهن ته جلوسن جي سڪيورٽي به سخت ڪئي وئي هئي. وفاقي گادي واري شهر اسلام آباد ۾ به جشن عيد ميلاد النبي جي سلسلي ۾ سرڪاري ۽ خانگي عمارتن سميت پارليامينٽ هائوس کي به ساون جهنڊن ۽ بتين سان سينگاريو ويو آهي. خيبر پختون خواهه، بلوچستان، گلگت بلتستان ۽ آزاد ڪشمير ۾ به ٻنهي جهانن جي سردار حضرت محمد مصطفيٰ ﷺ جي آمد جو جشن مذهبي عقيدت ۽ احترام سان ملهايو پيو وڃي. ميلاد مصطفيٰ ﷺ جي سلسلي ۾ جلوس ۽ ريليون ڪڍڻ جو سلسلو جاري آهي. جشن عيدميلاد النبي ﷺ جي موقعي تي فلسطين، ڪشمير، عراق، افغانستان،پشاور سانحي جي شهيدن جي روحن کي ثواب پهچائڻ لاءِ قرآن خواني، فاتحه خواني، اسلامي دنيا ۽ پاڪستان جي سلامتي، ترقي، خوشحالي ۽ امن لاءِ به خاص دعائون ڪيون پيون وڃن