تازيون خبرون

Daily Archives: January 4, 2015

آءِ سي سي ورلڊ ڪپ لاءِ قومي اسڪواڊ کي حتمي شڪل ڏيڻ لاءِ سليڪٽرز اڄ ڪراچي ۾ گڏ ٿيندا

اسلام آباد (اسپورٽس نيوز) هلندڙ سال منعقد ٿيندڙ آءِ سي سي ورلڊ ڪپ لاءِ قومي ٽيم جي اسڪواڊ کي حتمي شڪل ڏيڻ لاءِ پاڪستان ڪرڪيٽ بورڊ جي سليڪشن ڪميٽي جا سمورا ميبمبر (اڄ) آچر ڏينهن ڪراچي ۾ گڏ ٿيندا، چيف سليڪٽر ۽ اڳوڻي ڪپتان معين خان ميڊيا کي ٻڌايو ته سليڪٽرز پينٽگيولر ڪپ ۾ شامل ميگا ايونٽ لاءِ اعلان ڪيل 30 رڪني اسڪواڊ سان گڏوگڏ هر رانديگر جي ڪارڪردگي جو جائزو وٺندا ۽ بهترين ڪارڪردگي ڏيکاريندڙ رانديگرن کي ئي ميگا ايونٽ ۾ ملڪ جي نمائندگي جو موقعو ڏنو ويندو، هن چيو ته محمد اڪرم لاهور ۾ نيشنل ڪرڪيٽ اڪيڊمي ۾ رانديگرن جي بايومڪينڪس ٽيسٽ وٺڻ ۾ مصروف آهي، جڏهن ته ڪميٽي جا ٻيا ميمبر اعجاز احمد ۽ وجاهت الله واسطي ڪراچي ۾ جوائن ڪندا، قومي ٽيم جي هيڊ ڪوچ ۽ ڪپتان مصباح الحق کان به ٽيم جي چونڊ ۾ پنهنجون تجويزون شامل ڪندا، هن چيو ته سليڪشن ڪميٽي ڊگهي غور ويچار بعد ئي حتمي 15 رڪني اسڪواڊ جو اعلان 7 جنوري تي ڪندي.

 

عسڪري ۽ سياسي قيادت جو گڏيل فيصلو

 

ملڪ جي سياسي ۽ عسڪري قيادت 20 نڪاتي قومي ايڪشن پلان بابت نه رڳو بحث ڪندي رهي پر، ملڪ جي مڪمل سياسي قيادت جن ۾پاڪستان جي سڀني پارٽين جا اڳواڻ موجود هئا، ملڪ ۾ دهشتگردي جي خاتمي ۽ فوجي عدالتون قائم ڪرڻ بابت سڄو ڏينهن هلندڙ بحث کانپوءِ نيٺ وزيراعظم ميان نوازشريف کي اها ڳالهه چوڻي پئجي وئي ته فوجي عدالتن بابت تمام گهڻي مشاورت ٿي چڪي آهي ۽ هاڻ وڌيڪ بحث جي ضرورت ناهي. هن وڌيڪ چيو ته قومي ايڪشن پلان جي سڀني حمايت ڪئي هئي ۽ جيڪڏهن اسان دهشتگردن کي منهن ڏيئي نه ٿا سگهون ته پوءِ اسان جو هتي ويهڻ اجايو آهي، جيڪڏهن اسان بهادراڻا فيصلا نه ڪيا ته قوم جا اسان جي ڳچين ۾ هٿ هوندا ان ڪري اسان دهشتگردن کي ڪنهن به صورت ۾ نه ڇڏينداسين. ان موقعي تي آرمي چيف جنرل راحيل شريف خطاب ڪندي چيو ته خاص عدالتون فوج جي خواهش نه پر وقت جي ضرورت آهن دهشتگردي خلاف جنگ ۾ اسان ئي ڪامياب ٿينداسين، اسان جو اڄوڪو فيصلو قوم جي قسمت جو فيصلو ڪندو، جڏهن ته صورتحال بهتر ٿيڻ کانپوءِ سڀ ڪجهه معمول تي اچي ويندو. آل پارٽيز ڪانفرنس ۾ ٿيل تقريرن کانپوءِ اها ڳالهه واضح ٿي آهي ته عسڪري ۽ سياسي قيادت دهشتگردي جي خاتمي لاءِ متحد آهن ۽ دهشتگردن کي فوجي عدالتن ذريعي سزائون ڏيارڻ جي خواهش رکن ٿيون. ليڪن سوال اهو هو ته فوجي عدالتون ڪهڙي ريت جوڙيون وڃن.

ان سلسلي ۾ ٽي واضح موقف سامهون آيا، هڪ موقف اهو هو ته آئين ۾ ترميم ڪري فوجي عدالتون قائم ڪيون وڃن، ٻيو موقف هو ته پاڪستان جي آرمي ايڪٽ 1952ع ۾ ترميم ڪري اهي فوجي عدالتون قائم ڪيون وڃن. جڏهن ته ٽيون موقف اهو ته فوجي عدالتون قائم ڪرڻ بجاءِ دهشتگردن کي سزائون ڏيڻ لاءِ عدالتن جو انگ وڌايو وڃي. وزيراعظم ميان نوازشريف ۽ آرمي چيف سميت ڪجهه پارٽيون ان راءِ جون نظر آيون ته فوجي عدالتن کي آئيني ڪور ڏيڻ لاءِ آئين جي سيڪشن 256,212,204 ۾ ترميم ڪرڻ گهرجي. جڏهن ته پيپلز پارٽي ۽ تحريڪ انصاف جو موقف هو ته اسان فوجي عدالتن کي قائم ڪرڻ لاءِ آئين ۾ ٿيندڙ ڪنهن به ترميم جي حمايت نه ڪنداسين هاڻ   جڏهن عسڪري ۽ سياسي قيادت طرفان آرمي ايڪٽ ۾ ترميم ڪري ان کي آئيني تحفظ ڏيڻ لاءِ آئين ۾ ترميم جو فيصلو ٿي چڪو آهي ان کان پوءِ ڏسڻو اهو آهي ته آئين ۾ ترميم ڪرڻ لاءِ جيڪو بل تيار ڪيو ويو آهي، اهو بل اڄ جڏهن قومي اسيمبلي ۾ پيش ٿيئي ٿو ته ان مسودي سان ڪهڙي پارٽي اتفاق ڪري ٿي ۽ ڪهڙي پارٽي اڃا به ان جي مخالفت ڪري ٿي. ظاهري طرح ته جيڪو به مسودو حڪومت قومي اسيمبلي جي اڄوڪي اجلاس ۾ پيش ڪندي اهو اڪثريتي راءِ سان منظور ٿي ويندو.جڏهن اهو بل سڀاڻي سينٽ پيش ڪيو ويندو. هڪ طرف حڪومت ۽ عسڪري قيادت خاص عدالتن جي قيام بابت هڪ پيج تي بيٺل نظر اچي رهيون هيون ته ٻئي طرف ملڪ جون بار ڪائونسلون ۽ عدليا ٻئي طرف نه رڳو بيٺل نظر اچي رهيون آهن پر اهي اهڙي ڪنهن به ترميم خلاف مهاڏو اٽڪائڻ جو به واضح اعلان ڪري چڪيون آهن،

مثال طور لاهور بار ان سلسلي ۾ مخالفت ڪندي چيو آهي ته اسان فوجي عدالتن کي ڪنهن به صورت ۾ قائم ٿيڻ نه ڏينداسين ۽ جيڪڏهن اهي عدالتون قائم ٿيون ته انهن خلاف اعليٰ عدالتن ۾ پٽيشنون داخل ڪيون وينديون. سندن موقف آهي ته سپريم ڪورٽ 1999ع ۾ فيصلو ڏ يئي چڪي آهي ته آئين ۾ فوجي عدالتون جوڙڻ جي ڪا به گنجائش نه آهي ۽ جيڪڏهن اهڙيون عدالتون قائم ڪيون ويون ته پوءِ اها توهين عدالت هوندي. ان سلسلي ۾ ڪالهه سپريم ڪورٽ ۾ هڪ پٽيشن به داخل ڪئي وئي هئي.جنهن ۾ اعليٰ عدالت کي گذارش ڪئي وئي هئي ته اها 1999ع ۾ ڏنل پنهنجي فيصلي تي نظرثاني ڪري ۽ ان کي رد ڪيو وڃِي. جڏهن ته سپريم ڪورٽ جي رجسٽرار اعتراض هڻي اها پٽيشن واپس ڪري ڇڏي آهي. هتي اها ڳاله به ياد رکڻ جهڙي آهي ته 1977ع ۾ ذوالفقار علي ڀٽو به لاهور ۾ مارشل لا لاڳو ڪري آرمي ايڪٽ ۾ ترميم ڪري فوجي عدالتون قائم ڪيون هيون، جن کي بعد ۾ لاهور هاءِ ڪورٽ ختم ڪري ڇڏيو هو، هاڻي جيئن ته فوجي عدالتن جي قيام لاءِ آرمي ايڪٽ ۾ تبديل ڪرڻ ۽ ان کي آئيني تحفظ ڏيڻ لاءِ فيصلو ٿي چڪو آهي تڏهن به اڪثر قانوني حلقن جي راءِ آهي ته پارليامينٽ مان اها ترميم منظور ٿيڻ کانپوءِ به اعليٰ عدالتن ۾ ان ترميم خلاف ڪيتريون ئي پٽيشنون داخل ٿي سگهن ٿيون. ڪجهه وڌيڪ قانوني ماهرن جي راءِ آهي ته قانون موجب جيڪڏهن ڪو قانون اڄ ٺاهجي ٿو ته پوءِ ان قانون تحت سزا رڳو انهن جوابدارن کي ملندي جيڪي جوابدار اهو قانون پاس ٿيڻ کانپوءِ ٿيندڙ ڏوهه ۾ گرفتار ٿيندا. جڏهن ته قانون پاس ٿيڻ کان اڳ جيڪي گرفتار جوابدار هوندا تن کي ان نئين قانون تحت سزا نه ٿي ڏيئي سگهجي. بهرحال عسڪري ۽ فوجي قيادت فوجي عدالتن جي قيام بابت متفق ته ٿي ويون آهن پر انهن فوجي عدالتن کي اعليٰ عدالتون ۽ بار ڪائونسلون ڪهڙي اک سان ڏسن ٿيون ۽ ڪهڙا فيصلا ڏين ٿيون، ان جو اڃا فيصلو ٿيڻو باقي آهي. اسان کي اميد آهي ته فوجي ۽ عسڪري قيادت جيڪو فيصلو ڪيو آهي، اهو ملڪ ۽ قوم جي فائدي ۾ ويندو ۽ ملڪ مان دهشتگردي جي پاڙ پٽجي ويندي

 

تيل ۽ گئس حاصل ڪندڙ ڪمپنيون؛امير گاڏهي

عوام کي چوندي ڏٺو ويو آهي سنڌ جو ماڻهو صدين کان ماربو رهيو آهي، عربن جي سنڌ فتح ڪرڻ کان وٺي انگريرزن تائين سنڌ ڌرتي لٽبي ڦربي آئي آهي سنڌ جا سر سبز علائقا تباهه ٿيندا رهيا آهن سنڌ صوبو سنڌ جيڪو پکيڙ جي لحاظ کان 140915 اسڪوائر ڪلوميٽرن تي مشتمل آهي، جنهن جي آبادي پوري پاڪستان جي آبادي جي 23 سيڪڙو برابر ۽ پاڪستان جي 17.7 سيڪڙو زمين والاري ٿو ۽ جنهن جي پوکي لائق زمين 5.7 ملين هيڪٽر آهي. سنڌ پوري پاڪستان جي انڪم ٽيڪس جو 70 سيڪڙو ۽ سيلز ٽيڪس جي مد ۾ 62 سيڪڙو حصو ڏيندڙ صوبو آهي. ملڪ جي سمورين آئل فيلڊس جو 60 سيڪڙو ۽ گئس فيلڊس جو 44 سيڪڙو سنڌ ۾ آهن. ان کان علاوه پوري پاڪستان جي 56 سيڪڙو تيل ۽ 37 سيڪڙو گئس جي روزاني جي حساب سان پيداوار پڻ سنڌ صوبي ۾ آهي. اهي سمورا انگ اکر ٻڌائڻ جو مقصد صرف ايترو آهي ته ايتري امير سنڌ جي رهواسين جي جيڪا حالت اسان ميڊيا وسيلي ٻڌنڌا، پڙهندا ۽ ڏسندا آهيون تن کي پنهنجي اکين سان پروڙي سچ پچ لڱ ڪانڊارجي وڃن ٿا. سنڌ اهو صوبو جيڪو پوري پاڪستان جي معيشت جي ريڙهه جي هڏي آهي، قدرت جي ڪهڙي نعمت آهي جيڪا سنڌ ۾ ناهي پر پوءِ به سنڌ جا رهواسي زهر ڀري زندگي بسر ڪري رهيا آهن سنڌ جي ماڻهن جو. ڪو والي واهر ناهي، ٻار آهن ته اسڪول ناهن، جي اسڪولون آهن ته ماستر ناهن، بيماري لاءِ ڪو بنيادي صحت گهر ناهي، جي ڪٿي ڪو صحت گهر آهي ته اتي ڊاڪٽر ناهي، غريبن جي صحت سيکڙاٽ ڪپائونڊرن جي رحم ڪرم تي ڇڏيل آهي. ٻئي پاسي وائيٽ ڪالر طبقو ۽ حڪمران آهن جيڪي هينئر ته هاءِ سڪيورٽي زون ۾ ٿا رهن، سندس پروٽوڪول لاءِ اڳيان پويان پوليس جون موبائلون آهن، جيڪي اليڪشن جي وقت انهن ئي ميرن ڪپڙن واري خلق خدا سان گڏ ويهي ڪوڙا وعدا ڪري کيس سونهري خواب ڏيکاري ووٽ وٺي ويا ۽ اڄ کين لڙي نهارڻ لاءِ به تيار ناهن شاهوڪار سنڌ جا معصوم ماڻهو ڪنهن بددعا جهڙي زندگي گهارڻ تي مجبور آهن دادو ضلعو قدرتي وسيلن تيل ۽ گئس سان مالا مال آهي دادو ضلعو جتي وک وک تي تيل ۽ گئس حاصل ڪندڙ ڪمپنيون قائم آهن پر مقامي نوجوانن لاءِ روزگار جا دروازا بند آهن دادو ضلعي جي دادو جوهي مهيڙ خيرپور ناٿن شاهه تعلقن ۾ هزارين نوجوان بيروزگار تيل ۽ گئس ڪمپنين ۾ ٻاهريان ماڻهو ڀرتي بيروزگاري سبب وڏي انگ ۾ پڙهيل لکيل نوجوان پورهيو ڪري پيٽ گذر ڪرڻ تي مجبور بي ايڇ پي تيل ۽ گئس حاصل ڪندڙ ڪمپنين ۾ مقامي نوجوانن لاءِ روزگار جا دروازا بند پيل ٻاهرين ماڻهن کي نوڪرين جا آرڊر ملڻ لڳا دادو ضلعي جي لکن جي آبادي جا هزارين بيروزگار نوجوان غربت مفلسي سبب وڏي عذاب واري زندگي گزارڻ تي مجبور بڻيل آهن سندن ڪير به ٻڌڻ وارو نه آهي دادو ضلعو قدرتي وسيلن تيل ۽ گئس سان مالا مال آهي دادو ضلعي ۾ هزارين نوجوان بيروزگاري سبب هزارين تعليم يافت نوجوان پورهيو ڪري پيٽ پالي رهيا آهن مقامي ڳوٺاڻن دانهيو آهي ته ٻين صوبن جا ماڻهو ڀرتي ڪيا ويا آهن جنهن سبب دادو ضلعي جا نوجوان غربت ۽ بيروزگاري سبب پيٽ پالڻ لاءِ مزدوري هارپو ۽ ٻيو پورهيو ڪري زندگي گذاري رهيا آهن گئس ڪمپنين طرفان روزگارڻ نه ملڻ ڪري هزارين نوجوان دربدري واري زندگي گذاري پورهيو ڪري گذر سفر ڪري رهيا آهن دادو ضلعي جي لکن جي آبادي جنهن ۾ ڪچي ۽ ڪاڇي جو وڏو حصو آهي جتي هزارين نوجوان بي روزگار بڻيل آهي سڄاڳ ڌرين الزام هڻندي دانهيو آهي ته بي ايڇ پي تيل ۽ گئس ڪمپنين مقامي علائقي واسين لاءِ ساليانا ڪروڙ روپين جي بجيٽ هئڻ باوجود علائقي واسي روڊ رستن ۽ بنيادي تعليم صحت جي سهولتن کان اڪثر محروم آهن تيل ۽ گئس ڪمپني پاران مختلف علائقن ۾ صحت مرڪز ته آهن جتي ڊاڪٽرن ۽ عملي جون پگهارون ۽ سهولتون نه هجڻ جي برابر آهن ساڳيو حال بي ايڇ پي تيل ۽ گئس ڪمپني پاران قائم اسڪولن ۾ تعليم ڏيندڙ استادن جون پگهارون پڻ گهٽ آهن جڏهن ته کين ڪي به سهولتون نه آهن علائقي واسين پاران لاتعداد احتجاجن باوجود ساڳيا لاٽو ساڳيا چڳهه واري ڪار لڳي پئي آهي مخصوص مافيا گروپ سالن کان بي ايڇ پي تيل ۽ گئس ڪمپني انتظاميا سان ملي ڀڳت ڪري مقامي بيروزگار ڳوٺاڻن جا جائز حق غذب ڪري رهيا آهن کين کان ڪير پڇڻ وارو نه آهي بي ايڇ پي تيل ڪمپني مان مقامي ماڻهن کي نوڪري مان فارغ ڪرڻ خلاف مقامي ڳوٺاڻن جو ڪمپني جي گيٽ 8 ۽9 آڏو احتجاجي مظاهري ڪري ڌرڻ هنيو ان دوران جوهي پوليس مظاهرين تي لاٺي چارج ڪندي 6 ڄڻا گرفتار ڪري ورتا ان سلسلي ۾بي ايڇ پي تيل ڪمپني طرفان مقامي ملازمن کي بنا جواز نوڪرين مان ڪڍڻ واري عمل خلاف ڳوٺاڻن نور علي گاڏهي ، فاروق گاڏهي شاهه محمد گاڏهي خميسو گاڏهي امداد گاڏهي ۽ ٻين ڳوٺن جي ڳوٺاڻن بي ايڇ پي زم زم گيٽ 8 ۽ 9 آڏو احتجاجي مظاهرو ڪري ڌرڻو هنيو جنهن سبب ڪمپني ڏانهن ايندڙ ويندڙ تيل جا ٽرالر ۽ ٻيو گاڏيون بيهجي ويون ۽ ڪمنپي اندر هلندڙ ڪم اڌ ڪلاڪ تائين بند ٿي ويو، بعد ۾ جوهي پوليس پهچي مظاهرين تي لاٺي چارج ڪري 5 ڄڻن کي گرفتار ڪري ورتو ڳوٺاڻن صحافين آڏو دانهيو ته بي ايڇ پي تيل ڪمپني بنا جواز مقامي ماڻهن کي نوڪري مان ڪڍي ٻاهريان ماڻهو رکيا آهن هنن چيو ته پر امن احتجاج ڪرڻ تي ڪمپني پاران جوهي پوليس کي طلب ڪري ڳوٺاڻن کي گرفتار ڪرائي لاڪ اپ ڪرائي ڇڏيو آهي جيڪا سراسر مزدورن سان ناانصافي آهي، هنن چتاءِ ڏنو ته فوري طور تي گرفتار ٿيلن کي آزاد ڪري مقامي ماڻهن کي بي ايڇ پي ڪمپني ۾روزگار ڏنو وڃي ٻهير ڪمپني جو گهيراءِ ڪري احتجاج ڪيو ويندو هڪ طرف مهانگائي غريب عوام جي وات مان گرهه کسي ڇڏيو آهي ته ٻئي طرف غريب نوجوان تعليم پرائڻ باوجود بيروزگاري جي باهه ۾ سڙي رهيا آهن ضلعي جا نوجوان پڙهيل لکيل هجڻ باوجود بيروزگار آهن سياسي،سماجي، مذهبي، تنظيمن جي اڳواڻن ۽ هتان جي چونڊيل نمائندن غريب بي پهچ نوجوانن کي وساري ڇڏيو آهي سندن مطالبو رهيو آهي ته ضلعي انتظاميا ۽ اختياريون کين بنا فرق روزگار ڏئي سندن جائز مسئلا حل ڪن ته اهي مقامي ماڻهن لاءِ بهتر هوندو عوام کي چوندي ڏٺو ويو آهي ته اوهان سياستدانن جو حال ڏٺو آهي، انهن غريب ماڻهن جي لاءِ ڇا ڪيو آهي؟ اها خبر اوهان کي اوهان جي شهرن، علائقن ۽ ڳوٺن جي حالت ڏسي پوندي. سنڌ جي سياستدانن کي صرف چونڊن دوران سنڌ جي غريب ماڻهن کان ووٽ وٺڻو آهي ۽ ايوانن ۾ پهچڻو آهي، پوءِ ننڊ ڪرڻي ۽ غريب اهوئي ساڳيو ڌڪن ۽ ٿاٻن ۾ هوندو آهي جيستائين اسان جا نوجوان پنهنجن ڳوٺن ۽ علائقن جي جائز مسئلن کي حل ڪرائڻ لاءِ اڳتي نه ايندا، تيستائين اسان جي سنڌ بلڪل ترقي نه ڪنديآئون سنڌ جي نوجوانن کي اهوئي چوندس ته پنهنجي ووٽ جي اهميت ڪرايو توهان سماجي ڪمن ۾ دلچسپي وٺو عوام سان لهه وچڙ ۾ اچو، ، پنهنجن ڳوٺن ۽ علائقن جي مالڪي ڪريو ۽ تعليم جي ميدان ۾ اڳتي اچو، ، سماجي براين کي ختم ڪرائڻ لاءِ ڀرپور ڪردار ادا ڪيو، بي مقصد ڪمن کان پاسو ڪري سنڌ ڌرتي ۽ سنڌي ماڻهن کي اڳتي آڻيو سنڌ جي سياسي، سماجي، قومپرست ۽ ساڃاهه وند ڌرين کي اڳتي اچڻو پوندو

*********

 

…!ٻارنهن سالن جي نگهت کي پرڻائڻ جي ڪوشش

 

ڏهرڪي ويجهو ڳوٺ متارو شر جي رهواسڻ 12 سالن جي نگهت ڌيءُ نعمت شر کي والدين زوريءَ پرڻائڻ جي ڪوشش ڪئي، نينگري پرڻي کان انڪار ڪري وجهه وٺي ڏهرڪي ٿاڻي تي پهچي وئي. ان ڏس ۾نگهت ڏهرڪي ٿاڻي تي صحافين کي ٻڌايو ته هڪ سال اڳ والد منهنجي شادي پنهنجي ڀائٽي ذهني معذور ڪاشف پٽ عبدالطيف سان ڪرڻ گهري،جنهن خلاف مون بغاوت ڪئي منهنجي ماءُ ۽ چاچي منهنجي اها مڱڻي ختم ڪرائي بعد ۾منهنجي لالچي ناني ٻڍو شر منهنجي شادي پنجاب واسي غلام ياسين پٽ کبڙ سان طئي ڪئي جنهن لاءِ هن کبڙ کان پئسا ورتا هاڻي منهنجو پيءُ ۽ نانو مون کي زبردستي پرڻائڻ چاهين پيا آئون اتان نڪري پنهنجي زندگي بچائي ڏهرڪي ٿاڻي تي پهتي آهيان نينگري صحافين کي ٻڌايو ته مان هن وقت ستين ڪلاس ۾ پڙهي رهي آهيان، پنهنجي تعليم اڳتي جاري رکڻ چاهيان ٿي، شادي نه ٿي ڪرڻ چاهيان پوليس مونکي تحفظ فراهم ڪري. هوڏانهن ايس ايڇ او ڏهرڪي رابطو ڪرڻ تي ٻڌايو ته وچ ۾ چڱا مڙس آيا آهن، نينگري جي والدين ۽ سندس ويجهن عزيزن ۽ نينگري جي مسئلي تي ٺاهه ٿي ويو آهي هن چيو ته قانوني گهرجون پوريون ڪرڻ لاءِ اسان اڄ نينگري کي مقامي عدالت ۾ پيش ڪنداسين.ٻئي طرف نينگري جي چاچي سليم شر الزام مڙهيندي چيو ته نينگري جو نانو ٻڍو شر لالچي قسم جو شخص آهي هن پهرين به پنهنجون 2 ڌيئرون شفيعه ۽ ماريه پئسن عيوض پنجاب وڪرو ڪيون آهن، هو پنهنجي ڏوهٽي نگهت کي به ساڳين ماڻهن وٽ وڪرو ڪرڻ چاهي ٿو . ٻئي طرف پوليس نينگري جي دانهن تي سندس پيءُ ۽ ناني کي حراست ۾ وٺي لاڪ اپ ڪري ڇڏيو