تازيون خبرون

Daily Archives: January 2, 2015

حيدرآباد ڀرسان هٽڙي باءِ پاس وٽان هڪ ڪار مان ٻن ڄڻن جا لاش هٿ

حيدرآباد(بيورو) ڀرسان هٽڙي باءِ پاس وٽان هڪ ڪار مان ٻن ڄڻن جا لاش هٿ ڪيا ويا آهن، جن مان هڪ جي سڃاڻپ نصرپور واسي ۽ ٻي جي ٽنڊو ڄام واسي طور ڪئي وئي آهي.  هٽڙي باءِ پاس ڀرسان هڪ ڪار مان ٻن ڄڻن جا گوليون لڳل لاش هٿ ڪيا ويا، جن مان هڪ جي سڃاڻپ نصرپور واسي احسان ۽ ٻي جي سڃاڻپ ٽنڊو ڄام واسي سوڀو ڪاڪيپوٽو طور ٿي آهي. پوليس واقعي واري هنڌ پهچي مقتولن جا لاش کڻائي سول اسپتال حيدرآباد پهچايا، جتي پوسٽ مارٽم بعد وارثن حوالي ڪيا ويندا. مقتول سوڀي جي وارثن جو چوڻ آهي ته سندن نوجوان وڪيل احسان جو گارڊ هو، جيڪو هميشه وڪيل سان گڏ هوندو هو، جڏهن ته پوليس واقعي جي جاچ ڪري رهي آهي.

 

ڪراچي ۾ تيز هوائن سبب 3 پرڏيهي اڏامون لينڊ نه ڪري سگهيون

ڪراچي(اسٽاف رپورٽر) ڪراچي ۾ تيز هوائن سبب جناح انٽرنيشنل ايئرپورٽ تي پرڏيهي ايئرلائنز جون 3 اڏامون لينڊ نه ڪري سگهيون آهن، سي اي اي جي ترجمان مطابق ايئرلائنز کي موسم جي حوالي سان هدايتون جاري ڪيون ويون آهن، ڪراچي ايئرپورٽ تي ايندڙ 3 پرڏيهي اڏامون تيز هوائن سبب لينڊ نه ڪري سگهيون جنهن سبب انهن کي مختلف روٽس تي منتقل ڪيو ويو آهي، سي اي اي ترجمان مطابق عمان ايئر جي اڏام ڀارت جي شهر احمد آباد، ايران ايئر جي اڏام ايران جي شهر زاهدان جڏهن ته ايمريٽس ايئرلائن جي اڏام مسقط وئي آهي جڏهن ته ان ئي دوران سعودي ايئرلائن جي اڏام ڪراچي ايئرپورٽ تي لينڊن ڪئي آهي ترجمان مطابق ڪراچي ايئرپورٽ تي تيز هوائن سبب فلائيٽ آپريشن متاثر آهي، جنهن سبب ايئرلائنز کي موسم جي حوالي سان هدايتون جاري ڪيون ويون آهن، هر پائليٽ پنهنجي جهاز جي لحاظ سان فيصلو ڪندو ته اهو لهي سگهي وٿ يا نه، ترجمان مطابق جهازن جي ٽيڪ آف ۾ ڪا مشڪلات ناهي جڏهن ته جهازن کي لينڊنگ جي وقت مشڪلاتون پيش اچي سگهن ٿيون، ڪراچي ايئرپورٽ ايندڙ 3 پرڏيهي ايئرلائن جون اڏامون تيز هوائن سبب لينڊ ناهن ڪري سگهيون.

 

تحفظ پاڪستان قانون تحت ملڪ ۾ 3 خصوصي عدالتون قائم

اسلام آباد(بيورو) تحفظ پاڪستان قانون تحت ملڪ ۾ 5 مان 3 خصوصي عدالتون قائم ڪيون ويون آهن، دهشتگردن جي خلاف ڪيسن جي ٻڌڻي لاءِ لاهور، ڪوئيٽا ۽ پشاور ۾ خصوصي عدالتون قائم ڪيون ويون آهن، مقرب خان کي لاهور، ظفر علي خان کوسو کي ڪوئيٽا جڏهن ته انوار علي خان کي پشاور ۾ خصوصي عدالت جو جج مقرر ڪيو ويو آهي ياد رهي ته تحفظ پاڪستان قانون تحت پوري ملڪ ۾ 5 خصوصي عدالتون قائم ڪرڻيون آهن جڏهن ته اسلام آباد ۽ سنڌ ۾ هينئر تائين خصوصي عدالتون قائم نه ٿي سگهيون.

 

سڪرنڊ لڳ هلندڙ ڊاٽسن مان ڪري ماءُ ۽ ڌيءَ فوت

سڪرنڊ(رپورٽر) سڪرنڊ ڀرسان قومي شاهراهه تي قاضي احمد ويجهو پنج مورو کان لڏو کڻي ويندڙ ڊاٽسن جو اوچتو اڳيون در کلڻ ڪري 50 ورهين جي مسمات جنت خاتون ۽ ٻن ورهين جي سندس ڌيءَ زاهده رند ڪري فوت ٿي ويون اطلاع ملڻ تي ايمبولينس پهچي ٻنهي ماءُ ۽ ڌيءُ جا لاش تعلقه اسپتال سڪرنڊ کڻائي آئي، جتي ضروري ڪارروائي کانپوءِ لاش وارثن حوالي ڪيا ويا، جڏهن ته ڊاٽسن پنج مورو کان لڏو کڻي نواب ولي محمد وڃي رهي هئي ته هي حادثو پيش آيو جڏهن ته سندس وارث تعلقه اسپتال سڪرنڊ پهچي لاش پنجو مورو کڻي ويا جڏهن ته لاش پهچڻ تي گهر ۾ ڪهرام مچي ويو.

 

پروڊيوسر جي حيثيت سان فيصلو ڪرڻ تي ڏاڍو خوش آهيان: پريانڪا چوپڙا

ممبئي(شوبز نيوز)بالي ووڊ اداڪاره پريانڪا چوپڙا اداڪاري سان گڏوگڏ پهريون ڀيرو ڪنهن فلم لاءِ پروڊيوسر جا فرض سرانجام به ڏئي رهي آهي هن جو چوڻ آهي ته آئون فلم ماادام جي لاءِ پروڊيوسر طور فيصلو ڪرڻ سان تمام گهڻو لطف اندوز ٿي رهي آهيان، هڪ انٽرويو ۾ پريانڪا چوپڙا چيو آهي ته ماڻهو چوندا آهن ته هڪ عورت ڪڏهن به پروڊڪشن هائوس نه ٿي هلائي سگهي پر هاڻ آئون اداڪاره ۽ گلوڪاره سان گڏوگڏ پروڊيوسر به بڻجي وئي آهيان ۽ پنهنجي پروڊڪشن هائوس پرپل پيبل پڪچرز جي بينر هيٺ فلم مادام بڻائي رهي آهيان هي فلم هڪ غير حقيقي ڪهاڻي تي ٺهيل آهي جنهن ۾ هڪ اهڙي آئٽم گرل کي ڏيکاريو ويندو جنهن کي سياست ۾ ميدان ۾ ڌڪيو ويندو آهي آئون وڏي بجيٽ تي فلم ٺاهڻ جي قابل ناهيان پر منهنجي ڪوشش آهي ته ان ننڍي فلم ۾ وڏو ٽيلينٽ ڏيکاري سگهان  اداڪاره جو چوڻ هو ته پنهنجي ان فلم جي سلسلي ۾ ڪيترن ئي هدايتڪارن ۽ اداڪارن سان به ملاقات ڪري چڪي آهيان ۽ مون کي پروڊيوسر طور فيصلو ڪرڻ تي تمام گهڻو مزو اچي رهيو آهي.

 

ڪرشما ڪپور ۽ سنجي جي طلاق وارو معاملو عدالت به حل نه ڪري سگهي

ممبئي(شوبز نيوز)بالي ووڊ اداڪاره ڪرشما ڪپور ۽ دلي جي صنعتڪار سنجي ڪپور جي طلاق وارو معاملو عدالت به حل نه ڪري سگهي جج ڌرين کي معاملو پاڻ حل ڪرڻ لاءِ بن مهينن جي مهلت ڏئي ڇڏي، بالي ووڊ اداڪاره ڪرشما ڪپور ۽ سنجي ڪپور جي شادي ۾ ڪيترن ئي لاهن چاڙهن کانپوءِ ٻنهي ڇهه مهينا پهريان طلاق لاءِ عدالت سان رابطو ڪيو هو ڪيس جي آخري ٻڌڻي دوران ڪرشما ۽ سنجي ۾ ڌيئرن جي ڪفالت واري معاملي تي اختلافن کانپوءِ سخت جملن جي ڏي وٺ ٿي جج بحث ۽ تڪرار کان تنگ اچي ڌرين کي چيو ته هو ٻن مهينن اندر معاملي کي ڪورٽ کان ٻاهر طئه ڪن ان کان اڳ پهرين ڌيءَ جي پيدائش کانپوءِ به ڪرشما ڪپور ۽ سنجي ڪپور ۾ عليحدگي ٿي هئي جڏهن ته ٻنهي جي راضپي سان معاملو حل ڪيو ويو هو

 

بالي ووڊ جو مشهور موسيقار اي آر رحمان پروڊيوسر سان گڏوگڏ اسڪرپٽ رائيٽر به بڻجي ويو

ممبئي(شوبز نيوز): بالي ووڊ جو مشهور موسيقار اي آر رحمان جيڪو بالي ووڊ ۽ هالي ووڊ جي ڪيترين ئي فلمن کي پنهنجي موسيقي ڏئي چڪو آهي فلم پروڊڪشن ۽ اسڪرپٽ رائٽنگ جي ميدان ۾ به قدم رکي ڇڏيو آهي، اهو انڪشاف هن هڪ پريس ڪانفرنس دوران ڪيو 47 سالا موسيقار جو چوڻ هو ته آئون هنن ڏينهن ۾ هڪ فلم جنهن جو نالو اڃان ناهي رکيو ويو جي پروڊڪشن ۾ ڪم ڪري رهيو آهي ان سان گڏوگڏ ان جي اسڪرپٽ تي به ڪم ڪري رهيو آهيان

 

اتر پرديش جي وزير اعليٰ فلم ”پي ڪي” جي ٽيڪس فري نمائش جي اجازت ڏئي ڇڏي

ممبئي(شوبز نيوز) ڀارتي رياست اتر پرديش ۾ فلم ”پي ڪي” جي ٽيڪس فري نمائش جي اجازت ڏني وئي. بالي ووڊ جي ذريعن مطابق اتر پرديش جي وزيراعليٰ تڪراري فلم ”پي ڪي” اڳ ۾ ڏٺي، کيس فلم جو موضوع ايڏو پسند آيو ته هن اتر پرديش ۾ فلم جي ٽيڪس فري نمائش جي اجازت ڏئي ڇڏي آهي. فلم جي حوالي سان سندس چوڻ آهي ته ان فلم جو موضوع تمام سٺو آهي، هو ميڊيا جي نمائندن کي به اهو ئي چوندو ته فلم ڏسڻ لاءِ سينيما گهرن جو رخ ڪن.

 

نيوزيلينڊ ۽ سريلنڪا جي ڪرڪيٽ ٽيمن وچ ۾ ٻي ۽ آخري ٽيسٽ ميچ سڀاڻي ويلنگٽن ۾ کيڏي ويندي

ويلنگٽن (اسپورٽس نيوز) نيوزيلينڊ ۽ سريلنڪا جي ڪرڪيٽ ٽيمن وچ ۾ ٻي ۽ آخري ٽيسٽ ميچ سڀاڻي ويلنگٽن ۾ کيڏي ويندي، ميزبان ٽيم کي سريلنڪا خلاف ٻن ميچن جي سيريز ۾ 0-1 جي برتري حاصل آهي، نيوزيلينڊ جي ٽيم سريلنڪا کي پهرين ٽيسٽ ميچ ۾ 8 وڪيٽن تان شڪست ڏني هئي، ٽيسٽ سيريز بعد ٻنهي ٽيمن وچ ۾ 7 ون ڊي ميچن جي سيريز 11 جنوري کان شروع ٿيندي، پهرين ميچ 11 جنوري ڪرائيسٽ چرچ، ٻي ميچ 15 جنوري هيملٽن، ٽين ميچ 17 جنوري آڪلينڊ، چوٿين ميچ 20 جنوري نيلسن، پنجين ميچ 23 جنوري ڪوڊونيڊن، ڇهين ميچ 25 جنوري ڪوڊو نيڊن، جڏهن ته ستين ۽ آخري ون ڊي ميچ 29 جنوري تي ويلنگٽن ۾ کيڏي ويندي.

 

بي سي سي آءِ جي سليڪشن ڪميٽي جو اجلاس 6 جنوري تي ٿيندو

ممبئي(اسپورٽس نيوز) بورڊ آف ڪنٽرول فار ڪرڪيٽ ان انڊيا(بي سي سي آءِ) جي سليڪشن ڪميٽي جو اجلاس 6 جنوري تي ممبئي ۾ ٿيندو. بي سي سي آءِ جي سيڪريٽري سنجي پٽيل مطابق اجلاس ۾ هلندڙ سال رٿيل آءِ سي سي ورلڊ ڪپ ۽ ٽه ملڪي ون ڊي سيريز لاءِ ٽيمن جي چونڊ ڪئي ويندي.