تازيون خبرون

Daily Archives: December 5, 2014

اليڪشن ڪميشن طرفان عام چونڊن دوران ڪل ووٽن جو 5 سيڪڙو اضافي بيلٽ پيپر ڇاپڻ قانوني پابندي آهي: ڪنور دلشاد

اسلام آباد(بيورو) اليڪشن ڪميشن طرفان عام چونڊن دوران ڪل ووٽن جو 5 سيڪڙو اضافي بيلٽ پيپر ڇاپڻ قانوني پابندي آهي، 1997ع ۾ 5 ڪروڙ 67 لک ڪل ووٽر هئا جڏهن ته 83 لک اضافي بيلٽ پيپر ڇاپيا ويا جڏهن ته اليڪشن ڪميشن جي اڳوڻي سيڪريٽري ڪنور دلشاد چيو آهي ته اضافي بيلٽ پيپر ڇاپڻ درست ۽ آئيني ضرورت آهي جن کي هنگامي صورتحال لاءِ ريٽرننگ آفيسرن وٽ رکيو ويندو آهي. اليڪشن ڪميشن جي ذريعن مطابق 2013ع جي عام چونڊن ۾ ڪل 17 ڪروڙ 24 لک بيلٽپيپر ڇاپيا ويا هئا جن مان 8 ڪروڙ 62 لک قومي اسيمبلي ۽ ايترا ئي صوبائي اسيمبلي جا بيلٽ پيپر ڇاپيا ويا هئا جڏهن ته 93 لک اضافي بيلٽ پيپر ڇاپيا ويا هئا جيڪي اليڪشن ڪميشن جي قانون مطابق ضروري آهي ڇاڪاڻ ته جيڪڏهن ڪنهن پولنگ اسٽيشن تي هڪ ووٽ به داخل آهي ته اتي موجود پرزائيڊنگ آفيسر کي بيلٽ پيپر جي 100 جي ڪاپي فراهم ڪئي ويندي آهي. اليڪشن ڪميشن مطابق اهي اضافي بيلٽ پيپر ريٽرننگ آفيسرن کي فراهم ڪيا ويندا آهن ۽ جيڪڏهن ڪنهن به پولنگ اسٽيشن تي ڪنهن حملي، پرنٽنگ جي خرابي، چر پر دوران ٿيلهو کسجي وڃڻ يا بيلٽ پيپرن تي باهه لڳائڻ جو معاملو درپيش ٿئي ته فوري طور تي اليڪشن ڪمشنر جي منظوري سان آر اوز اهي بيلٽ پيپر پرزائيڊنگ آفيسرن کي فراهم ڪندا آهن. 2008ع جي عام چونڊن ۾ 90 لک، 2002ع جي چونڊن ۾ 94 لک، 1997ع ۾ 83 لک اضافي بيلٽ پيپر ڇاپيا ويا.اليڪشن ڪميشن جي ترجمان مطابق اضافي بيلٽ پيپرن جي ڇپائي معمول جوڪم آهي ۽ اها ٽيڪنيڪل ۽ قانوني ضرورت هوندي آهي. ان جو مقصد ڪنهن کي فائدو پهچائڻ ناهي هوندو پر هڪ هڪ بيلٽ پيپر جو حساب موجود هوندو آهي. فارم 15 تي پي او طرفان هڪ هڪ بيلٽ پيپر جو حساب ڪتاب باقاعده طور تي لکيو ويندو آهي ۽ بعد ۾ سمورو رڪارڊ آر اوز وٽ ويندو آهي جو ان وٽ محفوظ ٿي ويندو آهي ۽ اليڪشن ٽربيونل پنجن سالن تائين ان کي طلب ڪري سگهي ٿو ۽ هو اها طلبي ريٽرننگ آفيسر کان ئي ڪندو. انهن بيلٽ پيپرن کي اهڙن لفافن ۾ وڌو ويندو آهي جو انهن کي هڪ ڀيرو کوليو وڃي ته ٻيهر انهن کي بند نه ٿو ڪري سگهجي ۽ انهن تي باقاعده پولنگ ايجنٽن کان صحيحون به ورتيون وينديون آهن. ڪنور دلشاد چيو ته هو حڪومت طرفان قائم ڪيل ڪميشن ۾ پيش ٿي اتي سڀئي ثبوت پيش ڪندو. هن چيو ته اهو چوڻ صحيح ناهي ته ريٽرننگ آفيسرن مسلم ليگ(ن) جي مدد ڪئي آهي، بد انتظامي چئني صوبن ۾ ٿي آهي.

 

ايڪتا ڏهاڙي تي عوام کي ڪهاڙي کڻڻ لاءِ ورغلائڻ انتشار ڦهلائڻ جي سازش آهي: نثار کهڙو

ڪراچي (اسٽاف رپورٽر) سنڌ جي تعليم واري سينئر وزير نثار احمد کهڙي ڪجهه ڌرين پاران ايڪتا ڏهاڙي تي ڪهاڙيون کڻڻ واري ڏنل بيان کي رد ڪندي چيو آهي ته ايڪتا ڏهاڙي تي عوام کي ڪهاڙي کڻڻ لاءِ ورغلائڻ انتشار ڦهلائڻ جي سازش آهي. اهڙي بيان بازي بند ٿيڻ گهرجي ۽ عوام اهڙي سازش کي ڪامياب ٿيڻ نه ڏيندو. اهڙن خيالن جو اظهار هن خميس ڏينهن سنڌ اسيمبليءَ ۾ پريس ڪانفرنس ڪنديڪيو. هن چيو ته ايڪتا ڏهاڙي تي ڌرتيءَ سان محبت جي اظهار طور سنڌ جي سڀني اسڪولن ۾ گل ۽ ٻوٽا پوکيا ويندا. هن چيو ته ايڪتا اصل ۾ ڌرتيءَ سان محبت ۽ عوام جي خدمت آهي، پيپلز پارٽيءَ کان وڌيڪ ڪو به محبت وطن، ڌرتيءَ سان پيار ڪندڙ ۽ عوام جي خدمت ڪندڙ نه ٿو ٿي سگهي. هن چيو ته پيپلز پارٽي بنا ڪنهن فرق جي عوام جي خدمت تي يقين رکي ٿي ۽ بنا ڪنهن فرق جي عوام جي خدمت ڪري رهي آهي. هن چيو ته پيپلز پارٽي اهو عزم ٿي ڪري ته ٻولي، ناڻي۽ پاڻي تي ڪابه مصلحت نه ڪنداسين ۽ صوبي جي سرحدن ۾ ڪا به تبديلي ٿيڻ نه ڏني ويندي، سنڌ هڪ آهي ۽ هڪ ئي رهندي ۽ ڌرتيءَ جي انچ انچ جي حفاظت ڪنداسين. هن هڪ سوال جي جواب ۾ چيو ته وسيم اختر پاران تعليم کاتي ۾ نوڪريون پئسن عيوض وڪرو ٿيڻ، پنهنجا نوازڻ ۽ نوڪرين ۾ شهري آباديءَ کي نظر انداز ڪرڻ واريون ڳالهيون غلط آهن، اهڙين ڳالهين ۾ ڪا به صداقت ناهي. بنا ڪنهن ثبوتن جي الزام بازي نه ٿيڻ گهرجي. هن چيو ته دعويٰ سان ٿا چئون ته تعليم کاتي ۾ نوڪريون اين ٽي ايس تحت ميرٽ تي ڏنيون پيون وڃن ۽ تازو ئي ڪراچي ڊويزن سان تعلق رکندڙ 1188 اميدوارن کي بنا ڪنهن فرق جي ميرٽ تي ايڇ ايس ٽي، جي ايس ٽي ۽ پي ايس ٽي طور ڀرتي ڪيو ويوآهي. هن چيو ته عمران خان هاڻي ڌرڻن تان پوئتي هٽندي نظر اچي رهيو آهي نئون پاڪستان ٺاهڻ جون ڳالهيون ڪندڙ عمران خان قوم کي ٻڌائي ته هو سياسي جماعتن جي مذاڪراتي ڪميٽي سان ڳالهيون ڪرڻ بدران آرمي چيف سان ڇو ملڻ ويو هو. ؟ هن چيو ته عمران خان جمهوريت جو دائي آهي ته پوءِ ٻڌائي ته هو ڌانڌليءَ جي جاچ ۾ آءِ ايس آءِ، آءِ بي کي ڪيئن شامل ڪرڻ جو مطالبو ڪري رهيو آهي . هن چيو ته ڌانڌليءَ جي اسان به خلاف آهيون ڀلي تڪ کولڻ جي ڳالهه ڪئي وڃي پر ان جي آڙ ۾ جمهوري سسٽم کي تباهه ٿيڻ نه ڏينداسين. هن چيو ته ڌرڻا هڻندڙ 58 ٽو بي جا حامي آهي هو چاهين ٿا ته سياسي نظام نه هلي ۽ رات جي اونڌاهيءَ ۾ ڪي ٻيا اچي وڃن.

 

ٿرپارڪر جي جبلن ۾ 26 بلين ٽن گرينائٽ موجود آهي: منظور وساڻ

ڪراچي (اسٽاف رپورٽر) سنڌ جي معدنيات، معدني ترقي ۽ جيلن واري صوبائي وزير منظور حسين وساڻ معدني ترقي واري کاتي کي هدايتون ڏنيون آهن ته سنڌ جي ضلعي ٿرپارڪر ۾ قيمتي گرينائٽ جي ذخيرن جي کاڻين جي ڪم جي شروعات ۽ پيداوار شروع ڪرڻ لاءِ سموريون قانوني رڪاوٽون ختم ڪيو وڃن ۽ ان سلسلي ۾ وفاقي حڪومت سان فوري رابطو ڪري معاملا حل ڪيا وڃن. صوبائي وزير منظورحسين وساڻ اهڙي هدايت خميس ڏينهن پنهنجي آفيس سنڌ سيڪريٽريٽ ۾ معدنيات ۽ معدني ترقي کاتي جي آفيسرن جي اجلاس ۾ جاري ڪئي. اجلاس ۾ سيڪريٽري معدنيات ۽ معدني ترقي زاهد حسين ميمڻ ۽ ٻيا آفيسر موجود هئا. اجلاس ۾ صوبائي وزير کي ٻڌايو ويو ته سنڌ جي ضلعي ٿرپارڪر جي جبلن جي سطح ۽ جبلن جي اندر دنيا جي بهترين ۽ مضبوط قسم جي گرينائيٽ موجود آهي جيڪا مختلف خوبصورت رنگن ۾ آهي. اندازو لڳايو ويو آهي ته اها گرينائيٽ 26 بلين ٽن جي تعداد ۾ موجود آهي، جنهن مان 10 بلين ٽن فوري طور تي مارڪيٽ ۾ آڻڻ جي قابل آهي. پاڪستان هن وقت چين، ڀارت ۽ ٻين ملڪن کان گرينائيٽ درآمد ڪري ٿو جيڪو تقريبن 500 رپيا اسڪوائر فٽ تي ملي ٿو. جڏهن ته ٿر مان ملندڙ گرينائيٽ پنهنجي ماهيت جي اعتبار سان چين ۽ ڀارت جي گرينائيٽ کان ڪافي وڌيڪ بهتر ۽ قيمتي آهي. ان موقعي تي صوبائي وزير منظور وساڻ چيو ته سنڌ حڪومت گرينائيٽ جي ليزنگ ۽ لائننگ لاءِ قانونسازي ڪئي آهي ۽ مختلف ڪمپنين کي مائنگ پرمٽ ۽ مائنگ ليٽر جاري ڪيا ويا آهن. هن هدايت ڪئي ته وفاقي حڪومت سان فوري طور تي رابطو ڪري سيڪيورٽي ۽ ٻين حوالن سان سموريون رڪاوٽون ختم ڪري گرينائيٽ جي کاڻين جو ڪم شروع ڪيو وڃي ته جيئن صوبي ۽ ملڪ کي قيمتي پرڏيهي ناڻو ملي سگهي.

 

ٿر ۾ ڏڪار جي ڏائنڻ ختم نه ٿي سگهي، سول اسپتال مٺي ۽ جناح اسپتال ڪراچي ۾ ٻه ٻارڙا فوت ٿي ويا

ٿرپارڪر(رپورٽر) ٿر ۾ ڏڪار جي ڏائنڻ ختم نه ٿي سگهي، اسلام ڪوٽ جو ڏڪار متاثر ٻارڙو ڪراچي جي جناح اسپتال ۾ فوت ٿي ويو، مٺي جي سول اسپتال ۾ به هڪ وڌيڪ معصوم ٻارڙو خوراڪ جي کوٽ سبب فوت ٿي ويو، 63 ڏينهن ۾وت ٿي ويلن جو انگ 169 ٿي ويو آهي…. مٺي جي سول اسپتال ۾ ٽن ڏينهن جو معصوم ٻارڙو پيرو خوراڪ جي کوٽ سبب فوت ٿي ويو، جڏهن ته اسلام ڪوٽ جي ڳوٺ دڪڙجو جو رهواسي 6 مهينن جو ديدار علي ڪراچي جي جناح اسپتال ۾ فوت ٿي ويو، 63 ڏينهن ۾ فوت ٿي ويل ٻارڙن جو انگ 168 ٿي ويو آهي. ٿر ۾ خوراڪ جي کوٽ شدت اختيار ڪري وئي آهي، جنهن سبب اسپتالن ۾ داخل ٿيل ڪيترائي معصوم ٻارڙا زندگي هارائي رهيا آهن… اسپتالن اندر بنيادي سهولتون ۽ صاف پاڻي نه هئڻ ڪري داخل ڪرايل ٻارڙا سخت تڪليفن کي منهن ڏئي رهيا آهن… ٿر متاثرن لاءِ حڪومتي امداد به اڃا تائين ڪيترن ئي علائقن ۾ ناهي پهتي، جنهن سبب ماڻهو بکن ۾ پاهه ٿي ويا آهن.. ٻن مهينن دوران پوڻا 2 سئو ٻارڙا فوت ٿيڻ باوجود امدادي سرگرمين ۾ تيزي ناهي آئي، جنهن سبب وڌيڪ جاني نقصان ٿي رهيو آهي.

 

سنڌي شاگرد سٿ پاران ڪراچي يونيورسٽي ۾ ثقافتي ڏهاڙو ملهايو ويو

ڪراچي(پ ر)ڪراچي يونيورسٽيءَ ۾ سنڌي شاگرد سٿ، سنڌي شاگردن جي تعليمي معاملن جي حل کان سواءِ ڪراچي يونيورسٽيءَ جهڙي اوپري ماحول ۾ سنڌي ثقافت کي اجاگر ڪرڻ لاءِ ڪم ڪري رهيو آهي. گذريل ڏينهن 4 ڊسمبر 2014ع تي سٿ پاران يونيورسٽيءَ ۾ ثقافتي ڏهاڙو ملهايو ويو، جنهن تحت ثقافتي لباس ۾ ملبوس شاگردن بيحد سادگيءَ سان ثقافتي ريلي ڪڍي. جيڪا ميرين بايولاجي پارڪ 10815397_764816620220583_776613027_oکان شروع ٿي، مختلف ڊپارٽمينٽ زولاجي، فارميسي، انٽرنيشنال ريليشنشپس، سنڌي جو گشت ڪندي اڊمسٽريشن بلاڪ کان ٿيندي ڪراچي يونيورسٽي جي مين گيٽ گولڊن جوبلي گيٽ‌ تي اختتام پذير ٿي وئي۔ ريلي جي شروعات کان اول ثقافتي مهفل ڪئي وئي، جنهن ۾ شاه لطيف جي وائي محمد بخش پنهنجي سريلي آواز ۾ پيش ڪئي، اسد ڪريم ۽ شاهد راجپر قومي گيت پيش ڪيا. سنڌي شاگرد سٿ جي اگواڻن اياز ڪمبوه، لجپت راءِ، اشفاق سبزوئي، معيد ابڙو، وزير سنڌي، سعيد شر، الطاف ناريجو ۽ ماجد جروار پنهنجي خيالن جو اظهار ڪندي چيو ته اسان کي پنهنجي ثقافت تي ناز آهي، هر سال جيئان هن سال به يونيورسٽي ۾ ثقافتي واڪ ڪري تمام سٺو لڳي رهيو آهي. سماجي اڳواڻ احمد سومري چيو ته ڏک ۽ سک انفرادي ۽ قومي زندگيءَ جو حصو آهن. زنده قوم اُها آهي، جيڪا ڏک توڻي سک ۾ ثابت قدم ۽ متحد رهي. ريلي ۾ مختلف ڊپارٽمينٽز جا شاگرد ۽‌ شاگردياڻِون ثقافتي ويس پهري شريڪ ٿيون.

 10822027_764816593553919_1120505297_o

ڪترينه ڪيف ”ووگ انڊيا ميگزين“ جي زينت بڻجي وئي

ممبئي(شوبز نيوز) بالي ووڊ اداڪاره ڪترينه ڪيف ”ووگ انڊيا ميگزين“ جي زينت بڻجي وئي آهي. سڌ سماءَ جي ذريعن مطابق بالي ووڊ ڪترينه ڪيف ”ووگ انڊيا ميگزين“ ڊسمبر ايڊيشن جي زينت بڻجي وئي آهي. هن کي سونهري رنگ جا ڪپڙا پاتل آهن، جنهن ۾ هوءَ تمام گهڻي پُرڪشش نظر اچي رهي آهي. ان ميگزين جي خصوصي ايڊيشن ۾ ڪترينه جي محبتن جا قصا به لکيا ويا آهن، جڏهن ته ان ميگزين جلد ئي مارڪيٽ ۾ ملندي.

 

فنڪارن طرفان مختلف سياسي پارٽين ۾ شامل ٿيڻ جو لاڙو وڌڻ لڳو

لاهور(شوبز نيوز) فنڪارن طرفان مختلف سياسي پارٽين ۾ شامل ٿيڻ جو لاڙو وڌڻ لڳو آهي. ان سلسلي ۾ سالن کان پاڪستان پيپلز پارٽي ۾ رهندڙ اداڪار مصطفيٰ قريشي پي ٽي آءِ ۾ شامل ٿيڻ جو اعلان ڪيو آهي. فلم اسٽار ميرا اڳ ۾ مسلم ليگ (ن) ۽ هاڻي پي ٽي آءِ جي ويجهو رهڻ جو اشارو ڏيڻ شروع ڪري ڇڏيو آهي. فلم اسٽار ليليٰ پڻ ڪنهن وڏي سياسي پارٽي ۾ شرڪت لاءِ ڪوشش ڪري رهي آهي. جڏهن ته ان کان سواءِ فلم اسٽار هدايتڪار، پروڊيوسر ۽ ٽي وي فنڪار پڻ پنهنجو فيصلو بدلائڻ لاءِ تياريون ڪري رهيا آهن.

 

پي ٽي وي گولڊن جوبلي، سينيئر فنڪار جي پورٽريٽ جي تياري شروع ڪئي وئي

لاهور(شوبز نيوز) پي ٽي وي پنهنجي گولڊن جوبلي مڪمل ٿيڻ تي پي ٽي وي جي سينيئر فنڪارن جي پورٽريٽ جي تياري شروع ڪئي وئي آهي. انهن فنڪارن ۾ قوي خان، مسعود اختر، افضل احمد، ياور حيات ۽ ٻيا شامل آهن. انهن پورٽريٽ ۾ پي ٽي وي انهن فنڪارن کي 50 سالن کان وڌيڪ فني خدمتن تي انهن کي خراج تحسين پيش ڪندو. انهن فنڪارن جي ڪم جون جهلڪيون پڻ ڏيکاريون وينديون.

 

”دل والي دلهنيا لي جائينگي“ کي جديد دؤر جي نوجوان نسل جي فلم جو خطاب ڏنو ويو

ممبئي(شوبز نيوز) بالي ووڊ فلمساز شيکر ڪپور فلم ”دلي والي دلهنيا لي جائينگي“ کي جديد دؤر جي نوجوان نسل جو خطاب ڏنو ويو آهي. بالي ووڊ فلمساز شيکر ڪپور پنهنجي انٽرويو ۾ چيو ته اديتيه چوپڙا جي هٽ فلم ”دل والي دلهنيا لي جائينگي“ جيڪا 1995ع ۾ رليز ٿي اها فلم سئينما گهرن ۾ شاندار نمائش ۽ هڪ هزار هفتن کان ڪاميابيءَ سان جاري آهي. فلم جي مقبوليت ۾ ٿوري به گهٽتائي ناهي ائي. هو اديتيا چوپڙا کي اهڙي معياري فلم ٺاهڻ تي مبارڪباد پيش ڪري ٿو جيڪا اڄ به نوجوان نسل ۾ مقبول آهي.

 

ڀارت ايندڙ سال رٿيل آءِ سي سي ورلڊ ڪپ ڪرڪيٽ ٽورنامينٽ جي لاءِ شروعاتي اسڪواڊ جو اعلان

ممبئي(اسپورٽس نيوز) ڀارت ايندڙ سال رٿيل آءِ سي سي ورلڊ ڪپ ڪرڪيٽ ٽورنامينٽ جي لاءِ شروعات اسڪواڊ جو اعلان ڪري ڇڏيو آهي جنهن ۾ 2011ع ۾ عالمي ڪپ ۾ بهترين ڪارڪردگي جو مظاهرو ڪندڙ يووراج سنگهه سميت سهواگ، گنڀير، ظهير خان ۽ هربجن سنگهه جاءِ ٺاهڻ ۾ ناڪام ٿي ويا آهن. 2011ع جي عالمي ڪپ کٽڻ ۾ بهترين ڪارڪردگي جو مظاهرو ڪندڙ فقط چئن رانديگرن ايم ايس ڌوني، ڪوهلي، رائنا ۽ ايشون کي ورلڊ ڪپ اسڪواڊ ۾ شامل ڪيو ويو آهي. امڪاني رانديگرن ۾ ايم ايس ڌوني، ويرات ڪوهلي، سريش رائنا، ورهت شرما، اجنڪيا راهني، روبن اوٿاپا، امبائي رائيڊو، ڪيدريا دائو، منوج تيواري، منيش پانڊي، وريدرمن ساها، سنجو سيمپسن، آر ايشون، پرويز رسل، ڪرن شرما، اميت مشرا، رويندرا جڊيجا، اڪشر پٽيل، اشانت شرما، ڀنشور ڪمار، محمد شامي، اوميش يادوا، وارن ايرن، ڌاول ڪلڪرني، اسٽورٽ بني، موهت شرما، آشوڪ وندا، ڪلديپ يادوو ۽ مرالي وجي شامل آهن.