تازيون خبرون

Daily Archives: November 27, 2014

دهشتگردي بابت آگاهي لاءِ ڄاڻ جي ڏي وٺ ڪرڻي پوندي : نواز شريف

کٽمنڊو (مانيٽرنگ ڊيسڪ) وزيراعظم نواز شريف چيو آهي ته پاڪستان، دنيا ۾ امن جو خواهشمند آهي ۽ ان لاءِ ڪوششون جاري رکندو،سارڪ جــَي ميمبر ملڪن وچ ۾ ثقافتي ۽ واپاري لاڳاپن کي هٿي وٺرائڻي پوندي. نيپال جي گادي واري شهر کٽمنڊو ۾ 18 هين سارڪ سربراهي ڪانفرنس کي خطاب ڪندي وزيراعظم نواز شريف چيو ته هــُو سارڪ ڪانفرنس منعقد ڪرڻ تي نيپال جي حڪومت کي واڌايون ڏئي ٿو. نواز شريف چيو ته دهشتگردي سڄي دنيا لاءِ وڏو مسئلو بڻيل آهي، جنهن جي خاتمي لاءِ سارڪ ملڪن کي گڏجي ڪم ڪرڻو پوندو. هن چيو ته سارڪ جي ميمبر ملڪن کي عوام جو خيال رکڻو پوندو،کين پنهنجي پروگرامن ذريعن ثقافتي ۽ واپاري لاڳاپن کي هٿي وٺرائڻي پوندي ته جيئن خطو ترقي ڪري سگهي. وزيراعظم نواز شريف چيو ته ڏکڻ ايشيا جا سمورا ملڪ جمهوريت تي يقين رکن ٿا ۽ هــُو سارڪ ملڪن وچ ۾ واپاري لاڳاپن کي هٿي وٺرائڻ تي يقين رکي ٿو. وزيراعظم چيو ته هن وقت سارڪ ملڪن وچ ۾ ٻوڏ جي وارننگ جو نظام قائم ڪرڻ جي ضرورت آهي ته جيئن ڪنهن به وڏي نقصان کان محفوظ رهي سگهجي. سارڪ ملڪن، خطي ۾ امن ۽ خوشحاليءَ لاءِ گڏجي ڪم ڪرڻ توڙي لاڳاپا وڌائڻ تي زور ڀريو آهي،ڀارتي وزيراعظم نريندر موديءَ جو چوڻ آهي ته ميمبر ملڪن کي ڳالهيون ۽ واپاري معاهدا ڪرڻ گهرجن. نيپال جي گادي واري شهر کٽمنڊو ۾ ”امن ۽ خوشحالي لاءِ مضبوط رابطا“ جي عنوان هيٺ ٻن ڏينهن تي ٻڌل 18 هين سارڪ سربراهي ڪانفرنس جاري آهي. سارڪ ڪانفرنس ۾ پاڪستان، ڀارت، نيپال، ڀوٽان، مالديپ، افغانستان ۽ سريلنڪا جا سربراهه شريڪ آهن. ڪانفرنس کي خطاب ڪندي ڀارتي وزيراعظم نريندر مودي چيو ته هــُو خطي ۾ معاشي سهڪار کي هٿي وٺرائڻ چاهين ٿا، ڀارت امن ۽ ترقي لاءِ جاکوڙي رهيو آهي. نريندر مودي چيو ته سارڪ جا ميمبر ملڪ هڪ جهڙين ڏکيائين کي منهن ڏئي رهيا آهن، جڏهن ته ميمبر ملڪن ۾ ڳالهيون ۽ واپاري معاهدا ٿيڻ گهرجن. هن چيو ته علائقائي سهڪار کي هٿي ڏيڻ جي ضرورت آهي، تيل جون ضرورتون پوريون ڪرڻ لاءِ جلد مالديپ سان معاهدا ڪيا ويندا. ان کان اڳ سارڪ ڪانفرنس جي افتتاحي تقريب کي خطاب ڪندي نيپالي وزيراعظم ســُشيل ڪوئرالا چيو ته ڏکڻ ايشيائي خطو دهشتگردي ۽ ماحولياتي تبديلي کي منهن ڏئي رهيو آهي،خطي جي ملڪن کي غربت ۽ جهالت خلاف گڏجي ڪم ڪرڻو پوندو. سشيل ڪوئرالا چيو ته سارڪ ميمبر ملڪن ۾ ريل، روڊن ۽ هوائي رابطن کي هٿي وٺرائڻي پوندي،ڏکڻ ايشيا جا ملڪ سهڪار کي هٿي ڏئي ترقي ڪري سگهن ٿا. سشيل ڪوئرالا چيو ته ڄاڻ جي مٽا سٽا سان سڪيورٽي کي بهتر بڻائي سگهجي ٿو. هن چيو ته خطي جي ڪنهن مسئلي کي نظر انداز نه ٿو ڪري سگهجي،زراعت، صحت، تعليم ۽ عورتن کي اختيار ڏيڻ وارن معاملن تي ڌيان ڏيڻو پوندو. افغان صدر اشرف غني سارڪ ڪانفرنس کي خطاب ڪندي امن ۽ خوشحالي لاءِ مضبوط رابطن کي اڻٽر قرار ڏنو. هن چيو ته افغانستان دهشتگرديءَ کي منهن ڏئي رهيو آهي جنهن لاءِ سمورن ملڪن کي گڏجي ڪم ڪرڻو پوندو. افغان صدر اشرف غني چيو ته رياست جو غير رياستي عنصرن کي پناهه ڏيڻ خطرناڪ آهي. سريلنڪا جي صدر مهيندا راجا پاڪســَي ميمبر ملڪن کي ريلوي ۽ روڊن ذريعي هڪٻئي سان ڳنڍڻ جي ضرورت تي زور ڀريو. سريلنڪا جي صدر جو چوڻ هو ته سارڪ ملڪن کي معيشت کي ترقي ڏئي امير ۽ غريب جو فرق ختم ڪرڻو پوندو.

 

زبير خان تحريڪ انصاف ۾ آهي ته سٺو ، حڪومت ۾ اچي ته خراب، ڇو؟: پرويز رشيد

اسلام آباد (بيورو) اطلاعات واري وفاقي وزير پرويز رشيد عمران خان کي گار گند جي سياست جو باني قرار ڏيندي چيو آهي ته ٻين مٿان الزام لڳائيندڙ پي ٽي آءِ پنهنجي گريبان ۾ جهاتي پائي،  زبير خان تحريڪ انصاف سان گڏ هوندي سٺو هو حڪومت ۾ اچڻ کانپوءِ خراب ڇو ٿيو آهي.؟ عمران خان جي بيان تي رد عمل ظاهر ڪندي پرويز رشيد چيو ته عمران خان ڏينهن رات ڪنٽينر تي ويهي سڀني تي الزام لڳائيندو آهي، ٻين تي الزام لڳائڻ بدران پنهنجي جهاتي ۾ نظر وجهي ۽ پنهنجي زبان جي مذمت ڪري. هن چيو ته شريف ڀائرن جي پراپرٽي جو رڪارڊ جلد ميڊيا جي آڏو پيش ڪيو ويندو. هڪ سوال جي جواب ۾ پرويز رشيد چيو ته اسد عمر جو ڀاءُ زبير خان تحريڪ انصاف ۾ هو تڏهنسٺو هو پر حڪومت ۾ اچڻ بعد خراب ڇو ٿي ويو آهي.

 

وزيراعظم نااهلي ڪيس: سپريم ڪورٽ 7 رڪني لارجر بينچ قائم ڪري ڇڏي

اسلام آباد (بيورو) سپريم ڪورٽ،وزيراعظم نواز شريف جي نااهلي لاءِ داخل درخواستن جي ٻڌڻي لاءِ 7 رڪني لارجر بينچ جوڙي ڇڏي. سپريم ڪورٽ وزيراعظم نااهلي ڪيس جي ٻڌڻيءَ لاءِ چيف جسٽس ناصر المــُلڪ جي سربراهي ۾ 7 رڪني بينچ جوڙي آهي. لارجر بينچ ۾ جسٽس جواد ايس خواجا،جسٽس انور ظهير جمالي ۽ جسٽس آصف سعيد کوسه سميت سپريم ڪورٽ جا سينيئر ترين جج شامل آهن. لارجر بينچ پاران وزيراعظم جي نااهلي لاءِ داخل درخواستن تي ٻڌڻي ايندڙ هفتي ٿيڻ جوامڪان آهي. واضح رهي ته سپريم ڪورٽ جي ٽه رڪني بينچ، وزيراعظم جي نااهلي لاءِ داخل درخواستن جي ٻڌڻي بعد آئين جي آرٽيجل 62 ۽ 63 جي تشريح وارو معاملو چيف جسٽس ڏانهن اماڻيو هو،جنهن بعد ڪيس جي ٻڌڻيءَ لاءِ لارجر بينچ جوڙي وئي آهي.

 

ملڪ کي طالبان کان خطرو آهي, عمران خان هن وقت ماڊرن طالبان بڻيل آهي: شرجيل ميمڻ

ڪراچي (اسٽاف رپورٽر) سنڌ جي اطلاعات ۽ بلدياتي واري صوبائي وزير شرجيل انعام ميمڻ چيو آهي ته ملڪ کي طالبان کان خطرو آهي ۽ عمران خان هن وقت ماڊرن طالبان بڻيو ويٺو آهي سندس ۽ طالبان جي ايجنڊا هڪ ئي آهي ته جمهوريت کي ڊي ريل ڪيو وڃي. اڳوڻن ٽن ٽن وڏن وزيرن جي پريس ڪانفرنس ۽ سندن اتحاد سان پيپلز پارٽي کي نه ماضي ۾ ڪو فرق پيو نه هاڻي پوندو. ڪراچي ماضي ۾ به پيپلز پارٽي جو هو، هاڻ به آهي ۽ آئنده به رهندو. ڪراچي ۾ پيپلز پارٽي جي دور ۾ رڪارڊ ڪم ٿيا ۽ ترقياتي ڪمن جو بنياد شهيد ذوالفقار علي ڀٽو، محترمه بينظير ڀٽو ۽ اڳوڻي صدر آصف علي زرداري وڌو ۽ اڄ به پيپلز پارٽي جي چيئرمين بلاول ڀٽو زرداري جي خصوصي هدايتن تي انهن ترقياتي ڪمن جو سفر جاري آهي. اهڙن خيالن جو اظهار هن ڊسٽرڪٽ ويسٽ ۾ منگهوپير، ڪنواري ڪالوني ۽ ڀرپاسي جي علائقن ۾ پيئڻ جو صاف پاڻي فراهم ڪرڻ لاءِ ساڍا نو ارب روپين جي لاڳت سان مڪمل ٿيل واٽر اسڪيم ۽ شهيد مجيب الرحمان واٽر پمپنگ اسٽيشن جي افتتاحي تقريب کان پوءِ ميڊيا سان ڳالهائيندي ڪيو ان موقعي تي ايڊمنسٽريٽر ڪراچي رئوف اختر فاروقي، ايم ڊي واٽر بورڊ قطب الدين شيخ، ڊسٽرڪٽ ويسٽ جا ايڊمنسٽريٽر ۽ ميونسپل ڪمشنر، پيپلز پارٽي ڊسٽرڪٽ ويسٽ جو صدر نديم ڀٽو، جنرل سيڪريٽري صديق اڪبر، سٽي ايريا جو قائم مقام صدر هارون رشيد کان علاوه  پيپلز پارٽي ويسٽ جي ڪارڪنن ۽ ذميوارن جو وڏو انگ موجود هو. صوبائي وزير چيو ته پيپلز پارٽي هميشه پنهنجي ڪارڪنن ۽ جيالن جي عزت ڪئي آهي ۽ نهايت قدر جي نگاهه سان پنهنجي جيالن جي قربانين کي ياد رکندي آهي. هن چيو ته مون سميت اڄ جيترا به وزير پنهنجي منصب تي موجود آهن اهي انهن ڪارڪنن ۽ جيالن جي محنت جو ثمر آهي. شرجيل انعام ميمڻ تقريب کي خطاب ڪندي چيو ته ماضي ۾ ڪراچي جي ڏورانهن علائقن کي بنيادي سهولتن جي فراهمي کان محروم رکيو ويو پر پيپلز پارٽي هاڻي ڪراچي هجي يا ٿرپارڪر جهڙو پٺ تي پيل علائقو هجي اتي عوام کي پيئڻ جي صاف پاڻي جا فراهمي سميت ٻين بنيادي سهولتن جي فراهمي جي جيڪا شروعات ڪئي آهي ان سلسلي جي هڪ ڪڙي اڄ جي هن ڪنواري ڪالوني ۾ 12 کان وڌيڪ علائقن جن ۾ ميانوالي ڪالوني، اسلاميا ڪالوني، ڪرسچن محلو، لاشي محلو، مگسي محلو، ڪٽي پهاڙي سميت ٻين علائقن جي ٽن لکن کان وڌيڪ آبادي کي پيئڻ جي صاف پاني جي فراهمي جي منصوبي کي پورو ڪيو ويو آهي. جنهن تي تقريبن ساڍا نو لک روپيا لاڳت آئي آهي. هن چيو ته اهڙي طرح پيپلز پارٽي جي موجوده حڪومت ٿرپارڪر سميت ٻين پٺتي پيل علائقن ۾ سون جي تعداد ۾ آر و پلانٽ لڳائڻ جو ڪم شروع ڪري ڇڏيو آهي. شرجيل انعام ميمڻ چيو ته ڪراچي جي عوام کي هڪ وڏي خوش خبري شارع فيصل تي ٽريفڪ جي دٻاءَ کي نظر ۾ رکندي ايليويٽر رستي جي تعمير جو آغاز جي ڏينداسين ۽ ان منصوبي جو افتتاح به جلد ڪيو ويندو. شرجيل انعام ميمڻ چيو ته پيپلز پارٽي جي دور ۾ ڪراچي سميت سموري سنڌ ۾ جيترا ترقياتي ڪم ٿيا ان جو مثال ملڻ مشڪل آهي. هن چيو ته اسان ڪراچي کي ڪالھ به اون ڪندا هئاسين اڄ به ڪريون ٿا ۽ آئنده به ڪندا رهنداسين ڇو ته هي ڪالھ به پيپلز پارتي جو هو اڄ به ۽ آئنده به رهندو. ان کان پوءِ ميڊيا سان ڳالهائيندي شرجيل انعام ميمڻ چيو ته هن وقت ملڪ کي سڀ کان وڏو خطرو طالبان مان آهي عمران خان هن وقت ماڊرن طالبان بڻيل آهي. هن چيو ته درپرده طالبان ۽ عمران خان جهڙي ماڊرن طالبان جو هڪ ئي ايجنڊا آهي ته ملڪ ۾ جمهوريت کي ڊي ريل ڪيو وڃي پر اسان انشاءَ الله سندن ناپاڪ ارادن کي ڪامياب ٿيڻ نه ڏينداسين . هڪ سوال جي جواب ۾ شرجيل انعام ميمڻ چيو ته 2013 جي عام چونڊن ۾ پيپلز پارٽي جي خلاف 10 جماعتي گرينڊ الائنس بڻايوويو هو ۽ ان ۾ اهي ئي پارٽيون شامل هنيون جن مان ڪجھ اڳوڻن وڏي وزيرن گذريل ڏينهن پيپلز پارٽي خلاف الائنس بڻائڻ جو اعلان ڪيو هن چيو ته انهن مان ڪجھ ماڻهون پيپلز پارٽي ۾ اچڻ لاءِ ڪوششون ڪري رهيا آهن پر کين پارٽي ۾ شامل نه ڪيو ويندو. هن چيو ته اهڙي قسم جي الائنس سان پيپلز پارٽي کي ڪو به فرق نه پوندو. 2013 جي عام چونڊن ۾ عوام پيپلز پارٽي کي ڪلين سوئپ فتح ڏياري ثابت ڪيو ته هو پيپلز پارٽي سان آهي. هن چيو ته هن وقت ملڪ کي يڪجهتي جي ضرورت آهي ۽ جيڪي ماڻهون جمهوريت کي ڊي ريل ڪرڻ جي سازش ۾ مصروف آهن انهن کي ڪنهن به صورت ڪاميابي نصيب نه ٿيندي. هڪ سوال جي جواب ۾ هن چيو ته ڪراچي جي شهرين کي صاف پاڻي جي لاءِ ڪي فور منصوبي جو آغاز ڪيو ويو آهي پر هي منصوبو گھڻ مدتي آهي ۽ اسان ڪوشش ڪري رهيا آهيون ته ڌاٻيجي کي اپ گريڊ ڪري 100 ملين گيلن روزانه پاڻي جي فراهمي کي يقيني بنايو وڃي پر شهرين کي پاڻي جي فراهمي ۾ هن وقت سڀ کان وڏي رڪاوٽ ڪي اليڪٽرڪ بڻيل آهي. هن چيو ته ڪي اليڪٽرڪ ڪراچي مان اربين روپيا ڪمائي رهي آهي پر هو تنصيبن تي هڪ روپيو به خرچ نٿي ڪري ۽ پراڻين ترسيلي نظام جي ڪري شهر کي پاڻي جي فراهمي وارن پمپنگ اسٽيشنن کي روزانه ڪيترن ئي ڪلاڪن جي لوڊ شيڊنگ کي منهن ڏيڻو پوندو آهي. ان کان پوءِ صوبائي وزير شرجيل انعام ميمڻ پاڻي جي اسڪيم ۽ شهيد مجيب الرحمان پمپنگ اسٽيشن جي تختي جي نقاب ڪشائي ڪري باقاعده اسڪيم جو آغاز ڪيو.

 

قائم علي شاهه جي آصف زرداري سان ملاقات، ٿر صورتحال بابت بريفنگ

ڪراچي (اسٽاف رپورٽر) اڳوڻي صدر آصف علي زرداري سنڌ جي وڏي وزير سيد قائم علي شاهه سان ملاقات ڪئي وزيراعليٰ سنڌ اڳوڻي صدر کي ٿر جي صورتحال بابت بريفنگ ڏني ۽ حڪومتي قدمن بابت آگاهه ڪيو ڪراچي جي بلاول هائوس ۾ سنڌ جي وڏي وزير اڳوڻي صدر آصف زرداري سان ملاقات ڪئي ملاقات ۾ قائم علي شاهه سنڌ جي مجموعي سياسي صورتحال ۽ امن امان بابت خيالن جي ڏي وٺ ڪئي وئي سنڌ جي وڏي وزير اڳوڻي صدر کي ٿر جي صورتحال تي بريفنگ ڏني ۽ ٿر ۾ کنيل حڪومتي قدمن بابت آگاهه ڪيو.

 

پيپلز پارٽي پاران اسٽيل ملز ۽ پي آءِ اي جي نجڪاري خلاف مزاحمت جو اعلان

ڪراچي (استاف رپورٽر) پيپلز پارٽي اسٽيل ملز ۽ پي آءِ اي جي نجڪاري جي مزاحمت جو اعلان  ڪيو آهي، سينيٽر رضا رباني چيو آهي ته نفعو ڪمائيندڙ ادارن کي خانگايو ويو ته هاءِ ويز ۽ اڏامون روڪي سگهجن ٿيون. ڪراچي ۾ پ پ ميڊيا سيل تي پريس ڪانفرنس ڪندي رضا رباني چيو ته پي آءِ اي کي ٻن حصن ۾ ورهائڻ جون سازشون ٿي رهيون آهن ۽ پي آءِ اي ۾ دوستن کي نوازيو پيو وڃي. هن چيوته پي آءِ اي ۾ ڊائريڪٽر مارڪيٽنگ هئڻ باوجود چيف مارڪيٽنگ آفيسر مقرر ڪيو ويو آهي، جنهن جي پگهار 40 لک رپيا رکي وئي آهي. هن چيو ته پي آءِ اي کي خانگائڻ جون تياريون ٿي رهيون آهن ۽ 10 جهاز ويٽ ليز تي ورتا پيا وڃن. رضا رباني چيو ته ٽن مهينن کان اسٽيل ملز جي ملازمن کي پگهارون نه پيون ملن پر حڪمرانن وٽ پرڏيهي دورن لاءِ اربين رپيا موجود آهن. هن چيو ته حڪمرانن جون اسٽيل ملز جي زمين تي اکيون آهن. پيپلز پارٽي اڳواڻن اسٽيل ملز ۽ پي آءِ اي جي نجڪاري جي مزاحمت جو اعلان  ڪندي چيو  ته نفعو ڪمائيندڙ ادارن کي خانگايو ويو ته هاءِ ويز ۽ اڏامون روڪي سگهجن ٿيون.

 

نواز شريف جي حسني مبارڪ جمهوريت قبول ناهي: عمران خان

اسلام آباد (بيورو) تحريڪ انصاف جي چيئرمين عمران خان جو چوڻ آهي ته نواز شريف جي حسني مبارڪ جمهوريت قبول ناهي، 30 نومبر تي ڊي چوڪ تي حڪومت جي سمورن هٿڪنڊن جو ڄمي مقابلو ڪنداسين ، عمران خان چيو ته سموريون رڪاوٽون ختم ڪري اسلام آباد پهچنداسين، جيڪڏهن حڪومت  کين روڪڻ جي ڪوشش ڪئي ته خراب حالتن جي ذميوار به پاڻ هوندي. لاهور ۾ پـِي ٽـِي آءِ پنجاب جي اڳوڻي صدر ۽ باني ميمبر احسن رشيد جي جنازي نماز ۾ شرڪت بعد ميڊيا سان ڳالهائيندي عمران خان چيو ته محمد زبير کي تحريڪ انصاف جي اڳواڻن تي الزام نه لڳائڻ گهرجن ها، محمد زبير اسد عمر جو ڀاءُ آهي پر ان نجڪاري ڪميشن جي چيئرمين شپ لاءِ پنهنجو ضمير وڪيو آهي. هن چيو ته هاڻي عوام آڏو حقيقتون پڌريون ڪيون وينديون ته حڪمرانن ڪيئن سرڪاري وسيلن جو بي رحماڻو استعمال ڪري رهيا آهن. عمران خان چيو ته شريف خاندان پهريان سرڪاري وسيلن تي ڌانڌلي ڪندا آهن پوءِ انصاف جون ڳالهيون ڪندا آهن. 30 نومبر بابت جلسي جي جواب ۾ عمران خان چيو ته سموريون رڪاوٽون ختم ڪري اسلام آباد پهچنداسين، جيڪڏهن حڪومت    کين روڪڻ جي ڪوشش ڪئي ته خراب حالتن جي ذميوار به پاڻ هوندي.

 

ڪوئيٽا ۾ پوليو ٽيم تي حملو، 3 عورتن سميت 4 اهلڪار مارجي ويا

ڪوئيٽا/کٽمنڊو، اسلام آباد (م.ڊ) ڪوئيٽا ۾ نامعلوم هٿياربندن جي پوليو ٽيم تي فائرنگ سان 3 عورتن سميت 4 اهلڪار مارجي جڏهن ته 3 عورتون زخمي ٿي پيون. ڪوئيٽا جي علائقي اوڀر باءِ پاس تي مينگل ٽائون لڳ نامعلوم موٽر سائيڪل سوار هٿياربندن پوليو ورڪرز جي گاڏي تي انڌاڌنڌ فائرنگ ڪئي جنهن جي نتيجي ۾ 3 عورتن سميت 4 رضاڪار ارجي جڏهن ته 3 عورتون زخمي ٿي پيون جن کي تڪڙو سول اسپتال پهچائڻ بعد لاشن کي ضابطي جي ڪاروائي بعد وارثن حوالي ڪيو ويو جڏهن ته زخمين کي طبي امداد ڏني پئي وڃي، مارجي ويل عورتن ۾ 2 سڳيون ڀينر ٻڌايون وڃن ٿيون. ذريعن موجب رضاڪار پوليو روڪٿام مهم جي سلسلي ۾ ويجهي آبادي وڃي رهيا هئا ۽ کين ڪنهن قسم جي سيڪيورٽي فراهم نه ڪئي وئي هئي جنهن سبب هٿياربند آساني سان فرار ٿي ويا، جڏهن ته حڪام چيو آهي ته ٽيم جا ميمبر گهران صحت جي مرڪز اچي رهيا هئا. واقعي بعد پوليس علائقي جي ناڪابندي ڪري جوابدارن جي ڳولا شروع ڪري ڇڏي. واقعي بعد پوليو روڪٿام مهم روڪي وئي. ياد رهي هلندڙ سال دوران پاڪستان ۾ هيستائين 6 4 2 ٻار پوليو جو شڪار ٿي چڪا آهن جن مان 2 1 جو تعلق بلوچستان سان آهي. ٻئي طرف وزيراعظم نواز شريف ڪوئيٽا ۾ پوليو ٽيم تي فائرنگ جو نوٽيس وٺندي حملو ڪندڙن خلاف فوري ڪاروائي جو حڪم ڏئي ڇڏيو. وزيراعظم نواز شريف کٽمنڊو مان ڪوئيٽا ۾ اوڀر باءِ پاس تي پوليو روڪٿام ٽيم تي فائرنگ جو نوٽيس وٺندي حملو ڪندڙن خلاف تڪڙ ي ڪاروائي جو حڪم ڏنو، وزيراعظم چيو ته پاڪستان ۾ آخري دهشتگرد جي خاتمي تائين جنگ جاري رهندي، ايندڙ نسلن کي معذور ٿيندي نٿا ڏسي سگهون، ملڪ کي هر صورت پوليو مان پاڪ ڪنداسين، دهشتگرداڻا ڪارواين سان قوم کي ڊيڄاري نٿو سگهجي، پاڪستان ۾ دهشتگردي جي خاتمي لاءِ پاڪ فوج، قوم ۽ تمام سياسي پارٽيون هڪ پيج تي آهن.

 

پاڪستان ۾ ڊرون حملن ذريعي 874 بي گناهه شهري قتل ٿيا: رپورٽ

اسلام آباد(مانيٽرنگ ڊيسڪ) عالمي تنظيم ريپريو پنهنجي هڪ رپورٽ ۾ انڪشاف ڪيو آهي ته آمريڪا، پاڪستان ۾ 24 گهــُربل دهشتگردن کي ڊرون ذريعي مارڻ جي ڪوششن دوران 8 سئو 74 بي گناهه شهرين کي قتل ڪري ڇڏيو آهي، جن ۾ معصوم ٻارڙا ۽ عورتون به شامل آهن. عالمي تنظيم ريپريو طرفان ”يو نيور ڊاءِ ٽو وائس“ جي عنوان هيٺ جاري ڪيل رپورٽ ۾ چيو ويو آهي ته آمريڪا طرفان پاڪستان ۽ يمن ۾ گهــُربل دهشتگردن جي خاتمي لاءِ وڏي شدت سان ڊرون حملا ڪيا ويا آهنپر صورتحال اها آهي ته اهي ڊرون حملا رڳو 21 سيڪڙو تائين پنهنجا ٽارگيٽ حاصل ڪري سگهيا آهن. رپورٽ موجب عام طور جن دهشتگردن جي موجودگيءَ جي اطلاع تي ڊرون حملا ڪيا وڃن ٿا انهن مان هــُو بچي ويندا آهن پر ڪيترائي بيگناهه شهري پنهنجي حياتين تان هٿ ڌوئي ويهن ٿا. رپورٽ ۾ وڌيڪ چيو ويو ته پاڪستان ۽ يمن ۾ 41 اهڙا گهــُربل دهشتگرد آهن، جيڪي آمريڪي، پاڪستاني يا يمن اختيارين جي دعوائن موجب ڪيترائي ڀيرا ماريا ويا پر صورتحال اها آهي ته انهن 41 دهشتگردن مان 7 اڃا جيئرا آهن. رپورٽ موجب 41 گهــُربل ماڻهن مان 24 اهڙا دهشتگرد آهن،جن خلاف پاڪستان جي قبائلي علائقن ۾ ڊرون حملا ڪيا ويا ۽ انهن مان هر هڪ کي اٽڪل 3 – 3 ڀيرا مارڻ جون دعوائون ڪيون ويون پر حقيقت ۾ 874 بي گناهه شهري مارجي ويا،جن ۾ هڪ سئو 42 ٻار به هئا. رپورٽ ۾ وڌيڪ ڄاڻايو ويو آهي ته القاعده جي سربراهه ايمن الظواهري، ابو عبيده المصري، حقاني نيٽ ورڪ جي سراج الدين حقاني ۽ جلال الدين حقاني جي موجودگي واري اطلاع تي ڪيترائي ڀيرا ڊرون حملا ڪيا ويا پر انهن بدران 213 بي گناهه شهري نشانو بڻجي ويا. رپورٽ موجب رڳو ايمن الظواهري کي نشانو بڻائڻ لاءِ 76 ٻارڙن سميت هڪ سئو 5 ماڻهن کي موت جي منهن ۾ موڪليو ويو. رپورٽ ۾ چيو ويو ته ايمن الظواهري،سراج الدين حقاني ۽ جلال الدين حقاني اڃا به زنده آهن پر ابو عبيده المصري هن دنيا ۾ ناهي پر هــُو ڪنهن ڊرون حملي ۾ نه پر طبي موت جو شڪار ٿيو

 

دهشتگردي جي مسئلي سان ملي ڪري مقابلو ڪرڻ جي ضرورت آهي: نريندر مودي

کٽمنڊو (م.ڊ) ڀارتي وزيراعظم نريندر مودي چيو آهي ته دهشتگردي جي مسئلي کي ملي ڪري مقابلو ڪرڻ جي ضرورت آهي اسان کي هڪٻئي جي حفاظت ۽ ماڻهن جي زندگي جي باري ۾ حساس ٿيڻو پوندو. هڪ پنجاب مان ٻئي پنجاب ۾ سامان پهچائڻ ۾ ڪراچي ۽ دبئي کان به ڪيترا دفعا گهڻو وقت ۽ پئسو خرچ ٿئي ٿو اسان کي ڪاروبار سڌن رستن ذريعي ڪرڻو پوندو اربع تي 18هين سارڪ سربراهه اجلاس کي خطاب ڪندي ڀارتي وزيراعظم نريندر مودي سارڪ ڪانفرنس ۾ ممبئي حملي جو ذڪر ڪندي چيو ته دهشتگردي جي مسئلي جو ملي ڪري مقابلو ڪرڻ جي ضرورت آهي وزيراعظم مودي چيو ته اسان کي هڪٻئي جي حفاظت ۽ ماڻهن جي زندگين جي باري ۾ حساس ٿيڻو پوندو. ان واضح ڪيو ته اسان پنهنجي سرزمين کي پنهنجي پاڙيسرين جي خلاف استعمال ڪرڻ جي اجازت نه ڏينداسين ۽ نه ئي اسان جي سرزمين تي ڪوئي پنهنجا اوزار ۽ قوتن جي ذريعي جنگ ڪري سگهندو. افغان صدر اشرف غني امن ۽ خوشحالي لاءِ مضبوط رابطن کي اڻٽر قرار ڏنو. هن چيو ته افغانستان کي دهشتگردي جو مسئلو آهي جنهن جي لاءِ تمام ملڪن کي ملي ڪري ڪم ڪرڻو پوندو. افغان صدر چيو ته رياست جو غير رياستي عناصر کي پناهه ڏيڻ خطرناڪ آهي.