تازيون خبرون

Daily Archives: November 15, 2014

اين اي ايڇ ٺيڙهي حادثي جو ذميوار ڪوچ جو ڊرائيور قرار ڏئي ڇڏيو ، رپورٽ جاري

سکر (بيورو) نيشنل هاءِ وي اٿارٽي ٺيڙهي سانحي بابت شروعاتي رپورٽ پڌري ڪندي حادثي جو ذميوار مسافر ڪوچ جي ڊرائيور کي قرار ڏئي ڇڏيو آهي. اين ايڇ اَي پاران ٺيڙهي باءِ پاس سانحي جي شروعاتي جاچ رپورٽ تيار ڪئي وئي آهي جنهن ۾ چيو ويو آهي ته حادثو بس ڊرائيور جي غلط يوٽرن وٺڻ سبب پيش آيو. رپورٽموجب بس ڊرائيور پيٽرول پمپ تان غلط يوٽرن ورتو ۽ چوٿين لين ۾ گاڏي ڇڪي ويو. اين ايڇ اَي جي رپورٽ ۾ وڌيڪ چيو ويو ته بس جو ڊرائيور صبح پنجين وڳي منزل لاءِ روانو ٿيو هو جڏهن ته گذريل 23 ڪلاڪن کان ننڊ به نه ڪئي هو جيڪا حادثي جو سبب بڻي، حادثي واري جڳهه تي روڊ جون ٻئي حالتون بهتر هيون. رپورٽ ۾ اهو به ٻڌايو ويو ته حادثي بعد نيشنل هاءِ وي اٿارٽي ۾ وڏي پئماني تي تبديليون ڪيون ۽ جــِي ايم سکر لطيف مهيسر جي جڳهه تي منيش ڪمار کي مقرر ڪيو وي جڏهن ته ڊائريڪٽر سليم سومري جي جاءِ تي محمد ادريس ۽ پراجيڪٽ ڊائريڪٽر نور جي جڳهه تي جهانگير کي مقرر ڪيو ويو. واضح رهي ته خيرپور ڀرسان ٺيڙهي باءِ پاس وٽ مسافر بس ۽ ٽرڪ وچ ۾ پيش آيل ڏوکيندڙ حادثي ۾ 57 ڄڻا فوت ۽ 21 ڄڻا زخمي ٿي پيا هئا.

 

چورن مٿان مور، ڌاڙيلن جو پوليس تي ڀتو وٺڻ جو الزام، هٿيارکڻي احتجاجي مظاهرو

گهوٽڪي (نمائندو) گهوٽڪي ۾ ڌاڙيلن پوليس تي الزام هنيو آهي ته پوليس ڀتو وٺي کين ڦرڻ جو الزام هنيو ويو آهي. ڌاڙيلن هٿيار کڻي پوليس اهلڪارن خلاف سخت احتجاج ڪيو آهي. پوليس اختيارين جو چوڻ آهي ته ڏوهارين خلاف آپريشن سبب الزام هنيا پيا وڃن. ڳرا هٿيار هڻي ڌاڙيل ڪنهن واردات جي تياري نه پر پوليس خلاف احتجاج ڪري رهيا آهن. گهوٽڪي جي علائقي رانوتي ۾ ڏوهه ڪندر ڌاڙيل پوليس خلاف احتجاج ڪري رهيا آهن. ماڻهن کي ڦريندڙ ڌاڙيلن پاران پوليس تي کين ڦرڻ جو الزام هنيو آهي. سلطو گينگ جي ڌاڙيلن جو چوڻ هو ته پوليس کانئن ڀتو وٺي ٿي ۽ ڀتو نه ڏيڻ تي جعلي پوليس مقابلي ۾ ماريو وڃي ٿو. ڌاڙيلن الزام هنيو آهي ته کين هٿيار به پوليس ڏي ٿي. ڌاڙيلن جو موقف هو ته پوليس ساڻن مليل آهي سندن خلاف آپريشن رڳو ڏيکاءُ آهي. انهيءَ معاملي تي رانوتي ٿاڻي جي اهلڪار عبدالشڪور جو چوڻ هو ته سمورا ڌاڙيلن درجنين ڪيس ۾ پوليس کي ملوث آهن ۽ پوليس کي بدنام ڪري رهيا آهن گهوٽڪي جي ايس پي ابرار حسين جو چوڻ هو ته اُهو اهڙو علائقو آهي جتي ڪوبه اهلڪار ڊيوتي ڪرڻ لاءِ تيار ناهي. انهن خلاف آپريشن جي تياري ڪري رهيا آهيون ۽ ڌاڙيلن جي اچ وڃ جا سمورا رستا بند ڪري ڇڏيا آهن. پوليس اختيارين جو موقف پنهنجي جاءِ تي پر ڌاڙيلن جي انهيءَ الزام جي اعليٰ سطحي جانچ ٿيڻ گهرجي.

 

سنڌ اسيمبلي ۾ ايم ڪيو ايم ميمبرن جو هنگامو، گو شهلا گو جا نعرا

ڪراچي (اسٽاف رپورٽر) سنڌ اسيمبليءَ جي اجلاس دوران صوبي ۾ امن امان جي صورتحال تي بحث ڪيو ويو،جڏهن ته دماغ جي ڏهي واري ڊپٽي اسپيڪر شهلا رضا جي جملي تي ايم ڪيو ايم ميمبرن هنگامو ڪري گو شهلا گو جا نعرا هنيا،جنهن سبب ايوان مڇي مارڪيٽ بڻجي ويو. سنڌ اسيمبليءَ جو اجلاس اسپيڪر آغا سراج دراني جي صدارت هيٺ شروع ٿيو،جنهن ۾ امن امان جي صورتحال تي بحث ڪيو ويو. ايم ڪيو ايم جي ميمبر رئوف صديقي ۽ وقار شاهه ڳالهائيندي چيو ته سنڌ جي ٻهراڙيءَ وارن علائقن ۾ بااثر ماڻهو ڀنگ عيوض اغوا جي وارداتن ۾ ملوث آهن،جنهن سبب هندو برادري جا ماڻهو سنڌ مان ڀارت لڏي وڃڻ تي مجبور آهن. متحده ايم پي ايز جو چوڻ هو ته ڪراچي کان ڪشمور تائين امن امان جي صورتحال خراب آهي پر سنڌ حڪومت ڪوبه قدم کڻندي نظر نه پئي اچي. پ پ ميمبر ڊاڪٽر سڪندر شوري ترديد ڪندي چيو ته سنڌ جو امن مشرف جي دور ۾ تباهه ٿيو،عسڪريت پسندي ئي امن امان جي صورتحال ۾ وڏي رنڊڪ آهي. ايوان ۾ امن امان واري صورتحال تي بحث جاري هو ته متحده جي ميمبرن ڳالهائڻ کان روڪڻ تي هنگامو ڪيو ۽ گو شهلا گو جي نعريبازي ڪئي، جنهن سبب سنڌ اسيمبلي جو ايوان مڇي مارڪيٽ بڻجي ويو. متحده جي ايم پي اي محمد حسين،گذريل اجلاس دوران دماغ جي ڏهي ٺاهڻ واري جملي تي ڊپٽي اسپيڪر شهلا رضا کان معافي وٺڻ جو مطالبو ڪيو،جڏهن ته پ پ ميمبرن ڊپٽي اسپيڪر کي صلاح ڏني ته ايم ڪيو ايم وارن کي پاڻي ۽ لسي پيئاري وڃي. ايم ڪيو ايم ميمبرن جي احتجاج دوران ڊپٽي اسپيڪر شهلا رضا سيٽ ڇڏي هلي وئي ۽ اسپيڪر آغا سراج درانيءَ جي اچڻ بعد متحده ميمبر خاموش ٿي ويا. ان کان اڳ اپوزيشن ليڊر شهريار مهر ڀنگ عيوض اغوا جي وارداتن ۾ گهربل شخص جي اسپيڪر آغا سراج دراني سان گڏ نڪتل تصوير ايوان ۾ پيش ڪئي. شهريار مهر، اسپيڪر آغا سراج دراني کي مخاطب ٿيندي چيو ته اهو شخص اوهان سان گڏ سياسي جلسن ۾ شرڪت ڪندو آهي. شهريار مهر چيو ته صوبي ۾ امن امان جي صورتحال اطمينان جوڳي ناهي، خيرپور مان اغوا ٿيل ڪيترائي ماڻهو ڀنگ جي ادائيگي بعد آزاد ٿيا. هن چيو ته سانگهڙ، حيدرآباد ۽ شڪارپور ۾ ڀنگ عيوض اغوا جون وارداتون عروج تي آهن، اوقاف کاتي جي سيڪريٽري جو پٽ اغوا آهي پر اڃا تائين سندس پتو نه پئجي سگهيو آهي. شهريار مهر چيو ته ڀنگ عيوض اغوا جي واقعن انڊسٽري جي شڪل اختيار ڪري ورتي آهي. هن وڌيڪ چيو ته پوليس آفيسرن جو مقرريون سفارش ۽ رشوت تي ٿي رهيون آهن، ڪراچي ۾ ٽارگيٽ ڪلنگ جاري آهي وفاقي گهرو وزير جو ڌيان ڪراچي تي محدود آهي..

 

لاڙڪاڻي ڀرسان پيءُ اڳيان زال کي مڙس گوليون هڻي قتل ڪري ڇڏيو

لاڙڪاڻو (بيورو) پيڪن ڏانهن وڃڻ جي موڪل ڇو گهرئي؟ لاڙڪاڻي ڀرسان ڪچي جي ڳوٺ ميهڙ ڪلهوڙو ۾ بي رحم مڙس پنهنجي اڳ ڄائي پٽ سان گڏجي زال کي سندس پيءُ اڳيان بي درديءَ سان گوليون هڻي قتل ڪري فرار ٿي ويو آهي. خبر موجب لاڙڪاڻي ڀرسان ويهڙ ٿاڻي جي حد جي ڪچي واري علائقي جي ڳوٺ ميهڙ ڪلهوڙو ۾ جوابدار انور ڪلهوڙو پنهنجي زال ٽن ٻارن جي ماءُ رڪيه خاتون کي گوليون هڻي فرار ٿي ويو آهي. ويهڙ ٿاڻي جي پوليس جاءِ واردات تي پهچي عورت جو لاش کڻائي چانڊڪا سول اسپتال جي حادثن واري شعبي ۾ آندو جتي عورت جو پوسٽ مارٽم ڪري لاش وارثن حوالي ڪيو ويو. لاش کي مقتولا عورت جا وارث نئون ديرو ڀرسان ڳوٺ مٺي ڪلهوڙا ڏانهن کڻائي ويا. ان سلسلي ۾ اسپتال ۾ صحافين سان ڳالهائيندي مقتولا عورت جي پيءُ صدر الدين ڪلهوڙو ٻڌايو ته اسان نئون ديرو ڀرسان ڳوٺ مٺي ڪلهوڙا جا رهواسي آهيون ۽ مان پنهنجي گهر ڀاتين سان گڏجي پنهجي ڌيءُ سان ملڻ ڳوٺ ميهڙ ڪلهوڙو وياسين جتي منهنجي ناٺيءَ دعوت ڪئي هئي. منهنجي ڌيءُ رڪيه خاتون پنهنجي مڙس انور ڪلهوڙو کان اسان سان گڏ هلڻ جي موڪل گهري جنهن تان هن انڪار ڪري ڇڏيو ۽ گهران نڪري ويو، بعد ۾ پنهنجي اڳ ڄائي پٽ نظام ڪلهوڙو سان گڏجي گهر ۾ داخل ٿي منهنجي ڌيءُ کي منهنجي ئي اڳيان رپيٽر جا فائر ڪري بي درديءَ سان قتل ڪري ڇڏيو ۽ پاڻ فرار ٿي ويو. هن چيوته منهنجي ڌيءُ کي موڪل گهرڻ جي معمولي ڳالهه تي منهنجي ناٺيءَ بي گناهه قتل ڪري اسان سان ظلم ڪيو آهي. هوڏانهن اهڙي واقعي جي ايف آءِ آر مقتولا عورت جي پيءُ صدرالدين ڪلهوڙو جي فرياد تي ويهڙ ٿاڻي تي جوابدار انور ڪلهوڙو، ان جي اڳ ڄائي پٽ نظام ڪلهوڙو ۽ ٻين مٿان داخل ڪئي وئي آهي. آخري اطلائن تائين جوابدارن جي گرفتاري عمل ۾ نه اچي سگهي. رابطو ڪرڻ تي ويهڙ ٿاڻي جي ايس ايڇ او علي حسين ابڙو صحافين کي ٻڌايو ته جوابدار انور ڪلهوڙو پنهنجي زال کي پيڪن ڏانهن وڃڻ جي موڪل گهرڻ واري معمولي ڳالهه تي قتل ڪري فرار ٿي ويو آهي. جوابدار کي گرفتار ڪرڻ لاءِ پوليس ڪوششون ڪري رهي آهي.

 

جسقم جساف ڏوڪري طرفان بشير قريشي جي ايف آءِ آر داخل ڪرائڻ ۽ قومي ڪارڪنن جي گرفتاري بعد گمشدگي خلاف احتجاج

ڏوڪري(رپورٽر) جسقم جساف ڏوڪري طرفان بشير قريشي جي ايف آءِ آر داخل ڪرائڻ ۽ قومي ڪارڪنن جي گرفتاري بعد گمشدگي خلاف رڪ سنڌي، ارشاد ٻگهيو، فهد ڏيرو، جاني ٻگهيو ۽ ٻين جي اڳواڻي ۾ ڪارڪنن طرفان ٽائون هال ۾ 2 ڪلاڪ علامتي بک هڙتال ڪري احتجاجي مظاهرو ڪيو ويو. ان موقعي تي خطاب ڪندي جسقم اڳواڻن چيو ته بشير خان قريشي جي قتل جي ايف آءِ آر وارثن جي مرضي سان داخل ڪري وحيد لاشاري سميت قومي ڪارڪنن کي کنڀڻ ۽ چچريل لاشن جو سلسلو بند ڪيو وڃي، ٻئي صورت ۾ سخت احتجاج ڪيو ويندو.

 

عوام جي اسرار تي تحريڪ انصاف م شموليت ڪئي آهي، باضابطه اعلان عمران خان جي جلسي ۾ ڪيو ويندو؛عدنان انڙ/ غلام عمر انڙ

ڏوڪري(رپورٽر) 21 نومبر جي جلسي ڪامياب ڪرڻ لاءِ عدنان انڙ ۽ غلام عمر انڙ جا ڏوڪري باقراڻي تعلقن جي مختلف علائقن جا دورا، عوام پاران ڀرپور موٽ. تفصيل مطابق تحريڪ انصاف سربراهه عمران خان جي 21 نومبر تي لاڙڪاڻي علي آباد ۾ رٿيل جلسي کي ڪامياب بڻائڻ لاءِ انڙ خاندان جي عدنان الطاف انڙ، غلام عمر انڙ ۽ ٻين طرفان ڏوڪري ۽ باقراڻي تعلقن جي ڏوڪري، ڏيرا ڳوٺ، وڪڙو، بگي، ڪاراڻي، سيهڙ اسٽيشن ۽ ٻين علائقن جا دورا ڪيا. ڏوڪري لڳ ڳوٺ ڏيرا ۾ تحريڪ انصاف جي جلسي کي ڪامياب بنائڻ لاءِ سيد غلام شاه درگاه جي گادي نشين سيد ڪوڙل شاه لڪياري جي دعوت تي تحريڪ انصاف جا اڳواڻ عدنان خان انڙ،غلام عمر خان انڙ . بدرالدين ساريو، فاروق جتوئي ۽ ٻين جي پهچڻ تي سندن جو گلن جي ورکا سان شاندار استقبال ڪيو. تقريب کي آجياڻو ڏيندي غلام شاه درگاه جي گادي نشين سيد ڪوڙل شاه لڪياري چيو ته عمران خان جي 21 نومبر تي ٿيندڙ علي آباد جي جلسي ۾ عوام ڀرپور شرڪت ڪندو. تقريب کي خطاب ڪندي تحريڪ انصاف جي اڳواڻن غلام عمر خان انڙ، عدنان خان انڙ ۽ ٻين چيو ته عوام جي اسرار تي تحريڪ انصاف م شموليت ڪئي آهي، باضابطه اعلان عمران خان جي جلسي ۾ ڪيو ويندو. هن چيو ته انڙ خاندان کي ختم ڪرڻ جون ڳالهيون ڪندڙ ڪن کولي ٻڌي ڇڏين ته انڙ خاندان کي ڪوبه ختم نه ٿو ڪري سگهي. انڙ خاندان متحد آهي. هن چيو ته 21 نومبر تي ٿيندڙ تاريخي جلسي کي ڪامياب ڪرڻ لاءِ عوام وڌ ۾ وڌ شرڪت ڪري. ان موقعي تي مظهر گلال، عطا محمد ڀان، مظفر خان انڙ، محبوب پنهور ۽ ٻين پڻ شرڪت ڪئي.

 

مون کي شاهه رخ خان سان ڪم ڪرڻ پسند آهي ۽ مان سپر اسٽار جي گھڻي عزت ڪندو آهيان؛سيف علي خان

ممبئي (شوبز نيوز) بالي ووڊ اداڪار ۽ هدايتڪار سيف علي خان  جو چوڻ آهي ته مون کي شاهه رخ خان سان ڪم ڪرڻ پسند آهي ۽ مان سپر اسٽار جي گھڻي عزت ڪندو آهيان. انڊين ويب سائيٽ موجب ان کان اڳ سيف علي خان جو هڪ بيان سامهون آيو هو، جنهن ۾ هن چيو هو ته مان شاهه رخ خان جھڙي وڏي اسٽار سان ڪو هلڪو رول ڪرڻ بدران پنهنجي ذاتي پروڊڪشن ۾ ڪم ڪرڻ پسندڪندس. پر هاڻي هن جو چوڻ آهي ته ”مان شاهه رخ خان لاءِ ڪنهن به قسم جا خراب جذبا نه ٿو رکان“ 44 ورهين جي سيف عليءَ پنهنجي بيان جي وضاحت ڪندي چيو ته، مون جڏهن به شاهه رخ خان سان گڏ ڪم ڪيو، مون کي مزو آيو ۽ ڪم دوران هو منهنجي سوچ تي تمام گھڻو اثر انداز رهيو. هن چيو ته شاهه رخ خان هڪ بهترين انسان آهي ۽ انهن چند ماڻهن ۾ شامل آهي جن کي مون پنهنجي (ڀَت) شاديءَ جو سڏ ڏنو هو.

 

پي ٽي وي لاهور سينٽر جي پنجابي اسٽيج شو ”جي آيا نون“ جي رڪارڊنگ 17 نومبر تي شروع ٿيندي

لاهور (شوبز نيوز) پي ٽي وي لاهور سينٽر تي 17 ۽ 18 نومبر تي پنجابي اسٽيج شو ”جي آيا نون“ جي رڪارڊنگ ٿيندي، پروڊيوسر الياز چوڌري چيو ته پروگرامن جي رڪارڊنگز ۾ مشهور ٽي وي فنڪار ذولقرنين حيدر، شاهده مني کان علاوه ڪيترائي نوان فنڪار شرڪت ڪندا. پروگرام ”جي آيا نون“ جو ڪمپيئر ياسر قريشي ۽ حنا سحر آهي، اهو پروگرام 15 ڏينهن جو آهي ۽ اهو ڊرامو هفتي وار پيش ڪيو ويندو.

 

فلم انڊسٽري جي بحران جو سبب اسان پاڻ آهيون: هدايتڪار الطاف حسين

لاهور (شوبز نيوز)ماضي ۾ سپرهٽ فلمون ٺاهيندڙ هدايتڪار الطاف حسين چيو آهي ته فلم انڊسٽري جي مسلسل بحران جو سبب اسان پاڻ آهيون، هاڻ به انڊسٽري ۾ مفادپرستي جو مظاهرو ڪندي ان جي بهتري لاءِ ڪو به قدم نه ٿو کنيو وڃي، الطاف حسين چيو آهي ته ڀارتي فلمن جا حامي پڇتائين ٿا. هن وقت ڀارتي فلمن جي بزنس کي به نقصان ٿي رهيو آهي.

 

انقلابي شاعر فيض احمد فيض جي 30 هين ورسي 20 نومبر تي ملهائي ويندي

اسلام آباد(شوبز نيوز) ملڪ جي نامياري ترقي پسند انقلابي شاعر ۽ دانشور فيض احمد فيض جي 30 هين ورسي 20 نومبر تي ملهائي ويندي. ورسي جي حوالي سان ادبي حلقا ان موقعي تي قرآن خواني ۽ فاتحه جو اهتمام پڻ ڪندا. پنهنجي نادر لفظن کي محبت جي موتين ۾ سرجيندڙ فيض احمد فيض 13 فيبروري 1911ع تي سيالڪوٽ ۾ پيدا ٿيو. کيس شاعر مشرق ڊاڪٽر علامه اقبال ۽ مرزا غالب ان پوءِ اردو ادب جو عظيم شاعر هئڻ جو اعزاز به حاصل آهي. سندس شآعري جي هر دلعزيزي جو اندازو ان ڳالهه مان به لڳائي سگهجي ٿو ته سندس ادبي مجموعن جو انگريزي، فارسي، روسي، جرمن ۽ ٻين ٻولين ۾ به ترجمو ٿي چڪو آهي. فيض احمد فيض وڏي کنڊ ايشيا جو اهو واحد شاعر آهي جنهن کي روس طرفان لينن امن ايوارڊ سان به نوازيو ويو. سندس وفات کان اڳ نوبل انعام لاءِ به چونڊيو ويو هو. فيض احمد فيض 20 نومبر 1984ع تي 73 سالن جي عمر ۾ گذاري ويو هو.