تازيون خبرون

Daily Archives: November 13, 2014

ملڪ ۾ هن وقت ڪو به دهشتگرد نيٽ ورڪ ناهي: نواز شريف

اسلام آباد (بيورو/اي پي پي) وزيراعظم محمد نواز شريف چيو آهي ته هن وقت ملڪ ۾ ڪو به دهشتگرد نيٽ ورڪ نه آهي، اسان جي فوج ان وقت تائين وڙهندي رهندي جيستائين دهشتگردي پنهنجي منطقي انجام تائين نٿي پهچي وڃي، اسان جا 50 هزار ماڻهو دهشتگردي جي ڪاررواين ۾ شهيد ٿيا آهن اسان دهشتگردن جي حمايت ڇو ڪنداسين، ايساف جي نڪرڻ کانپوءِ افغانستان جي لاءِ هڪ نئين دور جو آغاز ۽ خطي جي لاءِ هڪ نئون موقعو آهي، اسان کي دهشتگردي کي شڪست ڏيڻ جي لاءِ گڏجي ڪم ڪرڻ گهرجي، حڪومت جي لاءِ اولين ترجيح معيشت جو فروغ ۽ سڀ کان وڏو چئلينج بجلي جي فراهمي آهي، جرمني جي دوري دوران ان ڳالهه تي ڌيان ڏنو ويو ته ڪهڙي طرح جرمني پاڪستان جي توانائي ضرورتن کي پورو ڪرڻ ۾ مددگار منصوبا پيش ڪري سگهي ٿي. هن اها ڳالهه مشهور قومي اخبار “ڊائي ويلٽ” کي انٽرويو ڏيندي چئي. ملڪ ۾ دهشتگرد تنظيم آءِ ايس (داعش) جي خبرن جي باري ۾ سوال جي جواب ۾ وزيراعظم چيو ته اسان ڪنهن به دهشتگرد نيٽ ورڪ کي شڪست ڏيڻ ۽ تباهه ڪرڻ جي لاءِ پرعزم آهيون، اسان جي فوج ان وقت تائين وڙهندي رهندي جيستائين دهشتگردي پنهنجي منطقي انجام تائين نٿي پهچي وڃي، افغان طالبان کي پاڪستان جي حمايت حاصل ٿيڻ جي الزامن کي رد ڪندي وزيراعظم چيو ته کين اهڙي قسم جي الزامن جي پويان ڪو به مقصد ڏسڻ ۾ نٿو اچي، اهو قطئي طور تي غير لاڳاپيل آهي پر آئون اهو چوندس ته اسان اهو ملڪ آهيون جيڪو دهشتگردن جو مقابلو ۽ ان جي محفوظ ٺڪاڻن کي ختم ڪري رهيو آهي، هن چيو ته فوج ۽ شهرين سميت تقريبن 50 هزار ماڻهو دهشتگردي جي ڪارروائين ۾ شهيد ٿيا آهن ۽ دهشتگردي معيشت کي تمام گهڻو نقصان پهچايو آهي. اسان دهشتگردن جي حمايت ڇو ڪنداسين؟ اهو قطئي طور تي غلط ۽ سمجهه کان مٿانهي ڳالهه آهي. وزيراعظم محمد نواز شريف چيو ته ڪجهه ڏينهن اڳ ئي 60 ماڻهو لاهور ۾ حملي ۾ مارجي ويا ۽ اهو خيال ته دهشتگردن سان تعاون ڪندا آهيون، ناقابل تصور آهي، هن چيو ته اسان دهشتگردن سان وڙهندا آهيون، نواز شريف چيو ته حڪومت سڀني سياسي پارٽين ۽ رياستي ادارن جي وچ ۾ اتفاق راءِ کانپوءِ نهايت سنجيدگي کانپوءِ ڳالهين جو آغاز ڪيو هو، تنهن هوندي به دهشتگردن جون سرگرميون جاري رهيون ۽ اسان وٽ انهن سان وڙهڻ کانسواءِ ڪو به چارو نه هو. افغانستان مان “ايساف” جي نڪرڻ کانپوءِ پاڪستان جي سيڪيورٽي پاليسي جي باري ۾ سوال جي جواب ۾ وزيراعظم چيو ته اهو افغانستان جي لاءِ هڪ نئين دور جو آغاز آهي جيڪو سڄي خطي جي لاءِ هڪ نئون موقعو آهي. اسان کي دهشتگردي کي شڪست ڏيڻ لاءِ گڏجي ڪم ڪرڻ گهرجي، اسان کي هڪٻئي جي حمايت ڪرڻ گهرجي. اسان کي دهشتگردن جي حملن جي اجازت نه ڏيڻ گهرجي. هن چيو ته افغان صدر اشرف غني به اعلان ڪيو آهي ته هو اهڙين سرگرمين کي برداشت نه ڪندو. جڏهن ان کان سوال ڪيو ويو ته پاڪستان ۾ جمهوريت ڪيتري مضبوط آهي، ته وزيراعظم چيو ته اقتدار جي پرامن منتقلي ۽ جمهوري رستي تي آزاداڻيون ۽ منصفاڻيون چونڊون ملڪ لاءِ هڪ قابل فخر لمحو هو، هن چيو ته سياسي پارٽين جي وچ ۾ تعاون هڪ اهم قدم آهي، هن ان ڳالهه تي زور ڏنو ته ان ڳالهه کي يقيني بڻائڻ گهرجي ته جمهوريت عوام جي اميدن تي پورو لهي. هن چيو ته حڪومت جي لاءِ اولين ترجيح معيشت جو فروغ ۽ سڀ کان وڏو چئلينج بجلي جي فراهمي آهي. وزيراعظم چيو ته سندس جرمني جي دوري دوران ان ڳالهه تي ڌيان ڏنو ويو ته ڪهڙي طرح جرمني پاڪستان جي توانائي جي ضرورتن کي پورو ڪرڻ ۾ مددگار منصوبا پيش ڪري سگهي ٿي. هن چيو ته دنيا ۾ ڪڻڪ جي سڀني کان وڏي پيداوار ڪندڙ ۽ ڪپهه جي هڪ وڏي برآمد ڪندڙ جي حيثيت سان پاڪستان جا جرمني سان ڪامياب معاهدا ڪرڻ جي تمام گهڻي صلاحيت ڏٺي وڃي ٿي. جرمني چانسلر انجيلا مرڪل سان پنهنجي ملاقات جي باري ۾ هن چيو ته هوءَ عظيم عزم ۽ بصيرت جي حامل دانشمند عورت آهي. سندس قيادت جرمني کي وڏن مشڪل دورن ۾ جاري رکيو آهي، وزيراعظم چيو ته پاڪستان هڪ جديد ملڪ آهي جيڪو مستقبل جي طرف ڏسندو آهي، ترقي ۽ واڌ تي يقين رکندو آهي ۽ عالمي برادري سان گڏ هٿ هٿ ۾ ملائي ڪم ڪرڻ جو خواهشمند آهي. وزيراعظم چيو ته اسان نه رڳو هڪ پرامن خطو چاهيون ٿا پر اسان دنيا کي به وڌيڪ پرامن ۽ رهڻ جي لاءِ بهتر مقام ٺاهڻ ۾ ڪردار ادا ڪرڻ جا خواهشمند آهيون. پنجاب ۾ قرآن جي مبينه بي حرمتي جي الزام تي مسيحي جوڙي جي قتل جي باري ۾ نواز شريف چيو ته هن انسانيت ۽ مذهبي اقليتن جي لاءِ احترام جي پيش نظر ان ڪارروائي جي مذمت ڪئي، ملڪ جي وزيراعظم جي حيثيت سان مان ان ڳالهه کي يقيني بڻائڻ لاءِ ذميداري محسوس ڪريان ٿو ته جيڪا ان ڪارروائي ۾ ملوث آهن انهن کي انصاف جي ڪٽهڙي ۾ آندو وڃي ۽ عدالتن کي انهن کي جلد سزا ڏيڻ گهرجي، هن چيو ته تعليم حڪومت جي لاءِ بنيادي توجهه جو محور آهي ۽ هو تعليم جي شرح کي موجوده پارلياماني مدي جي خاتمي تائين مجموعي قومي پيداوار جي 2 کان 4 سيڪڙو تائين وڌائڻ جو خواهشمند آهي. هن ملاله يوسفزئي جي تعليم جي لاءِ ڪوششن تي ان جي واکاڻ ڪئي جنهن نوبل انعام حاصل ڪيو. وزيراعظم چيو ته پاڪستان ۾ نون ڊاڪٽرن مان اڌ عورتون آهن، ۽ تعليم جي ميدان ۾ به عورتون قائداڻو ڪردار ادا ڪري رهيون آهن.

 

ٿر ۾ بک نه پر ويم جو مسئلو آهي: قائم علي شاهه

مٺي(نمائندو) سنڌ جي علائقي ٿرپارڪر ۾ غذائي کوٽ سبب ننڍڙن ٻارڙن جي فوتگين تي تبصرو ڪندي وڏي وزير سيد قائم علي شاهه جو چوڻ هو ته ٿر ۾ بک جو ڪوبه مسئلو ناهي پر اصل مسئلو ته ويم جو آهي ۽ حڪومت جو ويم سان ڪوبه تعلق ناهي، اسان طرفان اسپتالن ۾ هر ممڪن سهولتون ڏنيون ويون آهن پر ٿر ۾ ويم اسپتالن ۾ نه پر جهوپڙين ۾ ٿين ٿا، ڪابينا جي خصوصي اجلاس جي صدارت کانپوءِ ميڊيا سان ڳالهائيندي سائين قائم علي شاهه چيو ته جيڪڏهن اسپتال ۾ ليڊر ڊاڪٽر موجود ناهن ته حڪومت ذميوار هوندي پر هتي ته اسپتال ۾ ٻار ان وقت آندا ويندا آهن جڏهن انهن جي حالت بلڪل نازڪ هوندي آهي هڪ سوال جي جواب ۾ وڏي وزير چيو ته صحت کاتي 20 سالن کان ٿر کي نظرانداز ڪري رکيو آهي، منهنجو سوال متحده جي صحت جي صوبائي وزير ڊاڪٽر صغير احمد کان آهي ته آخر ڪهڙو سبب آهي جو هو پونئين ٽن سالن کان هن علائقي ۾ آيو ئي ناهي جيڪڏهن هو هتي ايندو ته ماڻهو ان کي سڃاڻيندا ئي ڪونه. وڏي وزير سيد قائم علي شاهه هڪ ڀيرو ٻيهر چيو آهي ته ٿر ۾ خوراڪ جي کوٽ سبب هڪ به ٻار فوت ناهي ٿيو،مفت ڪڻڪ ورهائڻ بعد بک جو سوال ئي پيدا نه ٿو ٿئي. مٺي ۾ سنڌ ڪابينا جي ڊگهي اجلاس کانپوءِ ميڊيا کي بريفنگ ڏيندي سيد قائم علي شاهه چيو ته سنڌ سرڪار ٿر جي رهواسين ۾ مفت ڪڻڪ ورهائي آهي،بک جو سوال ئي پيدا نه ٿو ٿئي. وڏي وزير چيو ته ٿر ۾ ٻار بک وگهي نه پر مختلف بيمارين سبب فوت ٿيا آهن، ميڊيا کي حقيقتن تي ٻڌل رپورٽنگ ڪرڻ گهرجي. سيد قائم علي شاهه چيو ته مٺي اسپتال ۾ سٺا ڊاڪٽر ۽ علاج جون سموريون سهولتون موجود آهن. هن چيو ته حڪومتي ڪوششن سان ٿر ۾ صورتحال بهتر ٿي رهي آهي،صحافي حڪومت جي ڪجهه واکاڻ ڪري محبت جو به اظهار ڪن. سيد قائم علي شاهه چيو ته هـُنن ٿر جي عوام کي هرممڪن سهولتون فراهم ڪيون آهن،جيڪو سندن فرض آهي. هن چيو ته ٿر ۾ ڊاڪٽرن جون پگهارون وڌائي کين مقرر ڪيو ويو ۽ عارضي ڊاڪٽرن توڙي عملي کي پڻ مستقل ڪيو ويو آهي. سيد قائم علي شاهه چيو ته صحت کاتي جي اڳوڻي وزير پنهنجي پسند جو سيڪريٽري مقرر ڪرڻ جو مطالبو ڪيو، جيڪو نه مڃڻ تي ڊاڪٽر صغير احمد ۽ سندس وچ ۾ اختلاف رهندا هئا. ايم ڪيو ايم کي تنقيد جو نشانو بڻائيندي وڏي وزير چيو ته متحده کي حڪومت ۾ هوندي ڪڏهن به ٿر ياد نه آيو، پر هاڻي کين وڏو الڪو ٿي رهيو آهي. سيد قائم علي شاهه چيو ته ٻه هزار هڪ کان ٻه هزار 14 تائين متحده کي ٿر ۾ موت نظر نه آيو،هاڻي حڪومت کان ڌار ٿيا آهن ته واويلا پيا ڪن، 20 سالن تائين صحت کاتو ايم ڪيو ايم وٽ رهيو. هن چيو ته پيپلز پارٽي جي جيتري وقت تائين حڪومت رهي آهي،مٿن تنقيد به اوتري ئي ڪئي وڃي، آمرن کان ڪير پڇڻ وارو به ناهي رڳو عوامي حڪومت خلاف هاءِ گهوڙا ڪئي ويندي آهي. وڏي وزير جو چوڻ هو ته مٺي ۾ صورتحال جي جائزي لاءِ ٻه ڪميٽيون جوڙيون ويون آهن، صاف پاڻي جي فراهمي لاءِ به خاص قدم کنيا پيا وڃن. هن چيو ته ٿري عورتن جي بهتر نموني سار سنڀال لاءِ ليڊي هيلٿ ورڪرز کي تربيت ڏئي سندن ڊيوٽيون لڳايون وينديون. هن چيو ته ٿر ۾ 77 آر او پلانٽ لڳل آهن، 27 ڊسمبر تائين وڌيڪ ڏيڍ سئو ۽ جون 2015ع تائين ساڍا 8 سئو آر او پلانٽس لڳايا ويندا، جنهن کانپوءِ ٿر واسين کي پاڻي جي ڳولا لاءِ ڏورانهن علائقن ڏانهن نه وڃڻو پوندو. وڏي وزير جو چوڻ هو ته ڏيپلي کانپوءِ سڄي ٿر ۾ پائپ لائن وڇائي مٺي پاڻي جي فراهمي کي يقيني بڻايو ويندو، علائقي مان نڪرندڙ ڪوئلي تي سڀ کان پهريون حق ٿر واسين جو آهي.

 

عمران خان کي سمهندي جاڳندي رڳو نواز شريف نظر اچي ٿو: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته عمران خان کي سمهندي جاڳندي رڳو نواز شريف نظر اچي ٿو، عمران خان عدالت مان من پسند فيصلا وٺڻ لاءِ ڊيگهه ڏئي رهيو آهي ۽ پنهنجي جلسن ۾ ماڻهن کي پاڪستان ۾ باهه لڳائڻ تي اتساهي رهيو آهي جڏهن ته نواز شريف ملڪ جي تعمير ڪرڻ جون ڪوششون ڪري رهيو آهي. ڪالهه اربع ڏينهن پنهنجي بيان ۾ وفاقي وزير چيو ته الله تعاليٰ وزيراعظم محمد نواز شريف کي عزت ڏني آهي، عمران خان هروڀرو پاڻ کي خوار نه ڪري. هن چيو ته عمران خان کي اهو ذهن ۾ رکڻ گهرجي ته عزت الله جي هٿ ۾ آهي، عمران خان حوصلو رکي ۽ پنهنجي ناڪامي تي سچي دل سان غور ڪري ۽ بهتر سياست طرف اچي. هن چيو ته آڪسفورڊ مان پڙهندڙ عمران خان ماڻهن کي عدالتن جي خلاف اتساهي رهيو آهي ته جيئن معاشرو ۽ ملڪ انارڪي جو شڪار ٿئي. عمران خان عدالت مان پنهنجا من پسند فيصلا وٺڻ لاءِ ڊيگهه ڏئي رهيو آهي ۽ کيس پنهنجو ڪيس عدالتن ۾ کڻي وڃڻ گهرجي. وفاقي وزير چيو ته عمران خان رڳو اڌ ڳالهه ڪري ٿو ۽ سچ نه ٿو ڳالهائي. سينيٽر پرويز رشيد چيو ته اسحاق ڊار مشروط طور تي مطالبا تسليم ڪيا هئا، جيڪڏهن عمران خان ان وقت ڌرڻو ختم ڪري ها ته پوءِ حق بجانت هجي ها ته حڪومت تي الزام هڻي ها، هاڻي کيس تمام گهڻي دير کانپوءِ اهو خيال آيو آهي ته کانئس غلطي ٿي وئي آهي، هو سدائين ڳالهه مڃي ڦري وڃي ٿو ۽ هو پنهنجو اعتماد وڃائي چڪو آهي. اطلاعات واري وفاقي وزير چيو ته عمران خان پنهنجي جلسن ۾ ماڻهن کي پاڪستان ۾ باهه لڳائڻ تي اتساهي رهيو آهي جڏهن ته نواز شريف ملڪ جي تعمير ڪرڻ جون ڪوششون ڪري رهيو آهي.

 

ملڪ مان دهشتگردن جي تڏا ويڙهه ڪئي ويندي: ڪور ڪمانڊر ڪانفرنس

راولپنڊي (م.ڊ) آرمي چيف جنرل ر احيل شريف جي سربراهي ۾ 6 7 1 هين ڪور ڪمانڊر ڪانفرنس ۾ ڏيهي ۽ پرڏيهي سيڪيورٽي جي صورتحال تي ويچار، ڪور ڪمانڊرز جو پاڪستان مان دهشتگردي جي مڪمل خاتمي، آخري دهشتگرد جي خاتمي تائين آپريشن جاري رکڻ جي عزم جو ورجاءُ، آرمي چيف پنهنجي ڪابل دوري جي حوالي سان ڪانفرنس جي شريڪ ٿيلن کي اعتماد ۾ ورتو، ڪور ڪمانڊر ڪانفرنس ۾ اتر وزيرستان ۾ جاري آپريشن ضرب عضب ۽ خيبر ايجنسي ۾ جاري آپريشن خيبر ون جي حوالي سان ويچاريو ويو، ڪور ڪمانڊر ڪانفرنس ۾ اتر وزيرستان ۾ جاري آپريشن ضرب عضب ۾ هيستائين حاصل ٿيل ڪاميابين تي اطمينان جو اظهار ڪيو ويو، ڪور ڪمانڊرز ڪانفرنس ۾ ڪنٽرول لائين ۽ ورڪنگ بائونڊري جا معاملا ويچار هيٺ آيا. ڪانفرنس ۾ اتفاق ڪيو ويو ته پاڪ فوج پاڪستان جي سرحدن جي حفاظت لاءِ پوري طرح چوڪس آهي ۽ اوڀر اولهه سرحدن تي ڪنهن قسم جي وحشت برداشت نه ڪئي ويندي ۽ ڪنٽرول لائين جي ڀڃڪڙي ڪندڙ کي منهن ٽوڙ جواب ڏنو ويندو. پاڪ فوج جي سُڌ سماءَ واري شعبي (آءِ ايس پي آر) موجب آرمي چيف جنرل راحيل شريف جي سربراهي ۾ 6 7 1 هين ڪور ڪمانڊرز ڪانفرنس جنرل هيڊڪوارٽر راولپنڊي ۾ ٿي. ڪانفرنس ۾ ملڪ جي ڏيهي ۽ پرڏيهي سيڪيورٽي صورتحال تي تفصيلي ويچاريو ويو. آءِ ايس پي آر موجب ڪانفرنس ۾ ان عزم کي ورجايو ويو ته ملڪ مان دهشتگردي جو مڪمل تڏو ويڙهيو ويندو، دهشتگردن کي ٻيهر منظم ٿي انهن جي علائقن ۾ واپس نه اچڻ ڏنو ويندو. ڪانفرنس ۾ اتر وزيرستان آپريشن جي حوالي سان تفصيلي بريفنگ به ڏني وئي. آءِ ايس پي آر موجب آرمي چيف آپريشنز دوران سيڪيورٽي فورسز جي قربانين کي ساراهيو. آرمي چيف چيو ته سيڪيورٽي فورسز جون دهشتگردي خلاف قربانيون قابل قدر آهن، ڪور ڪمانڊرز ڪانفرنس ۾ ملڪ کي پيش ايندڙ موجودهه سيڪيورٽي چئلينجن جي حوالي سان به ويچاريو ويو. ڪانفرنس ۾ چيو ويو ته پاڪ فوج تمام چئلينجن سان منهن ڏيڻ لاءِ پوري طرح تيار آهي. ڪور ڪمانڊرز ڪانفرنس ۾ آرمي چيف جنرل راحيل شريف چيو ته اتر وزيرستان ۾ متاثرن جي بحالي ۽ گهرن ڏانهن واپسي کي جلد يقيني بڻايو ويندو.

 

اسحاق ڊار جو خورشيد شاهه سان هڪ ڀيرو ٻيهر فون تي رابطو، چيف اليڪشن ڪمشنر جي مقرري تي ويچار

اسلام آباد(بيورو) خزاني واري وفاقي وزير اسحاق ڊار هڪ ڀيرو ٻيهر اپوزيشن ليڊر خورشيد شاه سان ٽيليفون تي رابطو ڪيو ٻنهي اڳواڻن چيف اليڪشن ڪمشنر جي مقرري بابت صلاح مشورا ڪيا چيف اليڪشن ڪمشنر جي مقرري ۾ هڪ هفتو دير جو امڪان آهي، ذريعن مطابق سپريم ڪورٽ طرفان چيف اليڪشن ڪمشنر جي مقرري لاءِ ڏنل ڊيڊ لائين سڀاڻي ختم ٿيندي چيف اليڪشن ڪمشنر جي مقرري لاءِ سياسي پارٽين وچ ۾ اتفاق راءِ نه ٿي سگهي آهي، خزاني واري وزير اسحاقڊار لنڊن ۾ ٻيهر اپوزيشن ليڊر خورشيد شاهه سان ٽيليفون تي رابطو ڪيو آهي جنهن ۾ چيف اليڪشن ڪمشنر جي مقرري تي مشاورت ڪئي وئي چيف اليڪشن ڪمشنر جي مقرري ۾ وڌيڪ هڪ هفتي جو وقت لڳي سگهي ٿو.

 

سنڌ حڪومت جهمپير ۾ ونڊ پاور منصوبي لاءِ 680 ايڪڙ زمين الاٽ ڪري ڇڏي

ڪراچي (اسٽاف رپورٽر) سنڌ حڪومت ونڊ انرجي ذريعي 49.5 ميگاواٽ بجلي جي پيداواري منصوبي لاءِ خانگي ڪمپني سچل انرجي پرائيويٽ لميٽيڊ کي 680 ايڪڙ زمين 30 سالن لاءِ الاٽ ڪري ڇڏي. ان سلسلي ۾ اڱاري ڏينهن توانائي کاتي جي مرڪزي آفيس ۾ ان معاهدي تي صحيحون ڪيون. ان موقعي تي سيڪريٽري توانائي آغا واصف، ڊائريڪٽر متبادل توانائي محفوظ قاضي ۽ ٻيا به موجود هئا. متبادل توانائي بورڊ حڪومت سنڌ پاران شفقن شاهه، جڏهن ته سچل انرجي پاران ڪاشفانصاري معاهدي تي صحيحون ڪيون. سچل انرجي پرائيويٽ لميٽيڊ چيني ڪمپني هائرو چائنه زيبي جي شراڪت سان ٺٽي جي علائقي جهمپير ۾ پروجيڪٽ لڳائيندي. هي منصوبو پاڪ چين اڪانومڪ ڪوريڊور پروگرامن ۾ شامل آهي، چائنه انڊسٽريل اينڊ ڪمرشل بئنڪ ان منصوبي لاءِ 133 بلين ڊالر جي سيڙپڪاري ڪندي، جنهن سان سنڌ ۾ معيشيت کي مضبوط ڪرڻ سان گڏوگڌ توانائي بحران تي ڪنٽرول ڪرڻ ۾ مدد ملندي. ڪمپني ايندڙ مهيني تعميراتي ڪم شروع ڪندي، جيڪو 18 مهينن ۾ مڪمل ٿيندو. معاهدي مطابق ڪمپني ونڊ پاور ۾ 49.5 ميگاواٽ بجلي پيدا ڪري نيشنل گرڊ کي 2044 تائين بجلي فراهم ڪندو. سنڌ ۾ هوا ذريعي بجلي پيدا ڪرڻ جا ڪافي موقعا موجود آهن ۽ ان سلسلي ۾ جهمپير گهارو ونڊ ڪوريڊور ۾ ايستائين 50 هزار ميگاواٽ جي پيداوار تائين جي نشاندهي ٿي چڪي آهي. سنڌ حڪومت توانائي جي ضرورتن کي نظر ۾ رکندي جامع توانائي پاليسي جوڙي آهي، جنهن لاءِ ڪوئلي ۽ هوا جي ذريعي بجلي پيدا ڪرڻ لاءِ ڪافي ذريعن کي ترجيح ڏئي رهي آهي. هن وقت سنڌ ۾ 40 کان وڌيڪ ڪمپنيون هوا ذريعي3 هزار ميگاواٽ بجلي جي پيداوار لاءِ متحرڪ آهن. انرجي کاتي ونڊ پاور جي تعمير جي سلسلي ۾ ايندڙ سمورن رڪاوٽن جي حل لاءِ انهن سمورين ڪمپنين سان رابطي ۾ آهي. ياد رهي ته 50 ميگاواٽ جو هڪ ٻيو چائنيز پروجيڪٽ آخري مرحلي ۾ آهي ۽ چين ٿري گورجز ڪمپني ايندڙ ڪجهه هفتن ۾ نيشنل گرڊ کي 50 ميگاواٽ بجلي فراهم ڪرڻ شروع ڪندو.

 

وزيراعظم جي استعيفيٰ واري مطالبي تان هٿ ناهي کنيو، نواز شريف ۽ اسحاق ڊار ڪوڙ پيا ڳالهائين:عمران خان

اسلام آباد (بيورو) تحريڪ انصاف جي چيئرمين عمران خان،ڌانڌلين جي جاچ تائين ڌرڻو جار ي رکڻ جو اعلان ڪندي واضح ڪيو آهي ته وزيراعظم جي استعيفيٰ واري مطالبي تان هن هٿ ناهي کنيو، حڪومت جوڊيشل ڪميشن ۾ آءِ ايس آءِ ۽ ايم آءِ جي شموليت تي راضي هئي ۽ هاڻي اسحاق ڊار ڪوڙ ڳالهائي رهيو آهي. ننڪانا ۾ جلسي ۾ شرڪت کان اڳ اسلام آباد ۾ ميڊيا سان ڳالهائيندي پي ٽي آءِ سربراهه عمران خان چيو ته نواز شريف ۽ اسحاق ڊار ڪوڙ ڳالهائي رهيا آهن. هن چيو ته آرمي چيف کي ٽياڪڙي لاءِ نواز شريف چيو هو پر هاڻي ان ڳالهه تان ڦري ڪوڙ پيو ڳالهائي. عمران خان چيو ته وزيراعظم جي استعيفيٰ واري مطالبي تان هٿ ناهي کنيو. سندس چوڻ هو ته ترقي جو فيصلو اشتهارن نه پر زمين تي ٿيندو آهي. پي ٽي آءِ سربراهه مطالبو ڪيو ته صوبائي اليڪشن ڪميشن جي ميمبرن کي به تبديل ڪيو وڃي،جڏهن ته چيف اليڪشن ڪمشنر جي مقرري لاءِ ناصر اسلم زاهد سندن اميدوار آهي. هن چيو ته آئين موجب سپريم ڪورٽ جاچ لاءِ ڪميشن جوڙي سگهي ٿي. عمران خان چيو ته حڪومتي ٽيم آءِ ايس آءِ، آءِ بي ۽ ايم آءِ کان جاچ ڪرائڻ تي راضي هئي پر هاڻي وفاقي وزير اسحاق ڊار ڪوڙ ڳالهائي رهيو آهي.

 

سنڌ پوليس ۾ 10 هزار نوجوانن ڀرتي ڪرڻ جو فيصلو

ڪراچي (اسٽاف رپورٽر) آءِ جي سنڌ غلام حيدر جمالي جي صدارت هيٺ سينٽرل پوليس آفيس ۾ امن امان جي حوالي سان پوليس آفيسرن جو اعليٰ سطحي اجلاس ٿيو جنهن ۾ پوليس جي ڪارڪردگي کي بهتر بنائڻ ۽ ڏوهن جي خاتمي لاءِ مختلف معاملا بحث هيٺ آيا اجلاس ۾ سمورن ڊي آءِ جيز سان گڏوگڏ ڊي آءِ جي ايسٽ منير احمد شيخ ڊي آءِ جي ويسٽ طاهر نويد ڊي آءِ جي سائوٿ عبدالخالق شيخ ڊي آءِ جي ايدمن غلام سرور جمالي ڪراچي جا سمورا ست ضلعي ايس ايس پيز سميت ٻينشرڪت ڪئي اجلاس ۾ پوليس جي پيشاوراڻي صلاحيتن ۽ ڳجهي معلومات جي ڏي وٺ جي طريقين ۽ طرقا خيال تي خيالن جي ڏي وٺ ڪئي ويئي اجلاس ۾ فيصلو ڪيو ويو ته سنڌ حڪومت جي حڪم تي 10 هزار نوجوانن کي پوليس ۾ ڀرتي ڪيو ويندو جنهن ۾ هڪ هزار کان وڌيڪ اڳوڻن آرمي جي فوجين کي ڀرتي ڪيو ويندو آءِ جي سنڌ کي ٻڌايو ويو ته ڪراچي پوليس کي 37 هزار پوليس اهلڪارن بدران صرف 26181 پوليس اهلڪار آهن باقي کوٽ پوري ڪرڻ لاءِ جلد ڀرتيون ڪيون وينديون اجلاس ۾ ٻڌايو ويو ته سنڌ پوليس وٽ وسيلن جي کوت آهي جنهن جي باوجود ڏوهاري ماڻهن جي خلاف بهترين ڪارڪردگي ڪري رهي آهي سنڌ پوليس کي پوليس گاڏين سي سي ٽي وي ڪئمرا ۽ ٽيڪنيڪي اوزارن جي به ضرورت آهي اجلاس ۾ فيصلو ڪيو ويو ته انهن وسيلن جي فراهمي لاءِ اعليٰ عملدارن کي درخواست اماڻي ويندي اجلاس ۾ فيصلو ڪيو ويو ته پوليسنگ جو نظام بهتر بنائڻ جي ضرورت آهي جڏهن ته پوليس اهلڪارن جي ڪارڪردگي بهتر بنائڻ ۽ کيس معاشي طور تي مضبوط ڪرڻ لاءِ پگهارن ۾ 65 سيڪڙو واڌ جي به تجويز ڏني ويئي آهي.

 

سنڌ حڪومت پوليو جي خاتمي لاءِ سنجيده ناهي: سائره افضل تارڙ

ڪراچي (اسٽاف رپورٽر) قومي صحت بابت مملڪتي وزير سائره افضل تارڙ چيو آهي ته سنڌ حڪومت پوليو جي خاتمي لاءِ سنجيده ناهي، جيڪڏهن جوڳا قدم کنيا وڃن ها ته هن وقت تائين صوبي مان پوليو جو خاتمو اچي چڪو هجي ها. سنڌ جي چيف سيڪريٽري سجاد هوتيانه جي صدارت هيٺ ڪراچيءَ ۾ پوليو کان بچاءَ بابت اجلاس ٿيو،جنهن ۾ صحت بابت مملڪتي وزير سائره افضل تارڙ به شرڪت ڪئي. اجلاس ۾ سنڌ جي صحت واري وزير ۽ سيڪريٽري جي غيرحاضري تي مملڪتي وزير سائره افضل تارڙ ڪاوڙ جو اظهار ڪيو. اجلاس بعد ميڊيا سان ڳالهائيندي مملڪتي وزير سائره افضل تارڙ چيو ته سنڌ جي ڪجهه ضلعن ۾ پوليو خلاف مهم رڳو 6 سيڪڙو تائين مڪمل ٿي،جڏهن ته ڊسٽرڪٽ هيلٿ آفيسرن طرفان وفاق کي غلط ڊيٽا ڏني وئي. هن چيو ته صحت کاتو پنهنجون ذميواريون پوريون ڪري ته پوليو تي سولائي سان ڪنٽرول ٿي سگهي ٿو. سائره افضل تارڙ چيو ته سڄي دنيا ۾ پوليو جو خاتمو ايندو پيو وڃي،پر پاڪستان ۾ ڪيس وڌي رهيا آهن. سائره افضل تارڙ وڌيڪ چيو ته ملڪ ۾ پوليو جا 80 سيڪڙو ڪيس پختون علائقن ۾ ظاهر ٿين ٿا،پوليو جي خاتمي لاءِ سچ ڳالهائڻو پوندو. ان کان اڳ اجلاس ۾ فيصلو ڪيو ويو ته 7 ڊسمبر کان سنڌ جي حساس علائقن ۾ پوليو خلاف مهم شروع ڪئي ويندي،جڏهن ته پوليو مهم کي اثرائتو بڻائڻ لاءِ وفاقي آفيسرن کي به مقرر ڪيو ويندو. اجلاس ۾ پوليو جي حوالي سان ڪراچي جي 8 علائقن کي انتهائي حساس قرار ڏنو ويو جتي پوليو ورڪرز جي سڪيورٽي لاءِ رينجرز جون خدمتون حاصل ڪرڻ جو فيصلو ڪيو ويو.

 

اقتصادي رابطا ڪاميٽي 5 لک ميٽرڪ ٽن واڌو کنڊ ٻاهرين ملڪ موڪلڻ جي اجازت ڏئي ڇڏي

اسلام آباد (بيورو) اقتصادي رابطا ڪاميٽي 5 لک ميٽرڪ ٽن واڌو کنڊ ٻاهرين ملڪ موڪلڻ جي اجازت ڏئي ڇڏي، اقتصادي رابطا ڪاميٽي شوگر ملز مالڪ کي هارين کي رهتن جي ادائيگي جو پابند بڻائي ڇڏيو، اي سي سي هدايت ڪئي ته کنڊ گهرائڻ سان پهرين ملز مالڪ هارين کي رهتون ادا ڪن. تفصيل موجب ناڻي جوفاقي وزير اسحاق ڊار جي سربراهي ۾ اقتصادي رابطا ڪاميٽي جو اجلاس ٿيو، اجلاس ۾ 5 لک ميٽرڪ ٽن واڌو چيني ٻاهر موڪلڻ جي اجازت ڏني وئي پر اقتصادي رابطا ڪميٽي شوگر ملز مالڪن کي پهرين هارين کي رهتون ادا ڪرڻ جو پابند بڻائي ڇڏيو. اجلاس ۾ اقتصادي رابطا ڪاميٽي هدايت ڪئي ته چيني ٻاهر موڪلڻ کان پهرين ملز مالڪ هارين کي رهتون ادا ڪن، اي سي سي ڪمند جي ڪرشنگ سيزن 5 1 نومبر کان شروع ڪرڻ جي هدايت به ڪئي. اجلاس ۾ اقتصادي رابطا ڪميٽي ڪمند جي 0 0 3 1 رپيا في مڻ امدادي قيمت جي به منظوري ڏئي ڇڏي. اي سي سي ڪمند جي 0 0 3 1 رپيا في مڻ امدادي قيمت جي به توثيق ڪري ڇڏي.