تازيون خبرون

Daily Archives: November 5, 2014

آخري دهشتگرد جي خاتمي تائين آپريشن جاري رهندو : سياسي ۽ عسڪري قيادت

اسلام آباد (بيورو) سياسي ۽ عسڪري قيادت ملڪ مان دهشتگردي جي خاتمي لاءِ هڪ ڀيرو وري ڀرپور عزم جو اظهار ڪندي چيو آهي ته آخري دهشتگرد جي خاتمي تائين آپريشن جاري رهندو، پاڪستان خطي ۾ امن جو خواهشمند آهي، ڪنهن ٻئي ملڪ جي معاملن ۾ مداخلت نٿا ڪريون نه ئي ڪنهن کي پنهنجي معاملن ۾ مداخلت جي اجازت ڏينداسين، پاڪستان ۾ دهشتگردي يا دهشتگردن جي مدد جي ڏيهي، پرڏيهي ڪوششن سان سختي سان منهن ڏنو ويندو. ان ڳالهه جو اظهار وزيراعظم نواز شريف سان آرمي چيف جنرل راحيل شريف جي وزيراعظم هائوس ۾ ملاقات دوران ڪيو ويو. ملاقات ۾ قومي سلامتي، ڏيهي پرڏيهي صورتحال، واهگا سانحي سميت دهشتگردي جي ڪجهه هاڻوڪي واقعن، آپريشن ضرب عضب، آرمي چيف جي 6 1 نومبر کان ڄاڻايل آمريڪي دوري سميت ٻين معاملن تي تفصيلي ڳالهايو ويو. وزيراعظم نواز شريف چيو ته پوري قوم دهشتگردي جي خاتمي لاءِ حڪومت ۽ فوج سان گڏ آهي. وزيراعظم چيو ته دهشتگردي خلاف قومي سلامتي جي تمام ادارن کي پنهنجي گڏيل رابطن کي وڌيڪ مضبوط بڻائڻو پوندو. دهشتگردي خلاف قومي اداري کي جلد کان جلد فعال ڪيو ويندو. ملاقات ۾ واهگا سانحي تي به تفصيلي ڳالهايو ويو، آرمي چيف ان حوالي سان وزيراعظم کي ڪجهه اهم انٽيليجنس رپورٽن کان به آگاهه ڪيو. آرمي چيف وزيراعظم کي آپريشن ضرب عضب ۾ ٿيل پيشرفت کان به آگاهه ڪندي ٻڌايو ته دهشتگردن جا اٽڪل تمام اهم ٺڪاڻا تباهه ڪري سندن چيلهه ڀڃي ڇڏي آهي، ڪجهه علائقن ۾ سندن طرفان مزاحمت کي به ختم ڪيو پيو وڃي. وزيراعظم آپريشن ضرب عضب ۾ پاڪ فوج جي جوانن ۽ آفيسرن طرفان ڏنل قربانين کي ڀيٽا ڏيندي چيو ته پوري قوم پنهنجي شهيدن ۽ غازين کي سندن قربانين تي سلام ڪري ٿي. آرمي چيف وزيراعظم کي 6 1 نومبر کان شروع ٿيندڙ ڄاڻايل آمريڪي دوري جي حوالي سان به اعتماد ۾ ورتو ۽ ٻڌايو ته ان دوري دوران ڪهڙن معاملن تي آمريڪي فوجي قيادت سان ڳالهائيندو.

 

عمران خان ڌانڌلين جي جاچ سپريم ڪورٽ کان ڪرائڻ تي راضي ٿي ويو

اسلام آباد(بيورو) پاڪستان تحريڪ انصاف جو سربراهه عمران خان جماعت اسلامي جي امير سراج الحق سان ملاقات لاءِ جماعت جي اڳواڻ ميان اسلم جي رهائشگاهه پهچي ويو، عمران خان جڏهن اتي پهتو ته سراج الحق ساڻس ڀاڪر پائي مليو ۽ کيس جوس پياري سندس آجيان ڪئي، شروعاتي طور تي وفدن جي ملاقات ۽ فوٽو ڪڍرائڻ کانپوءِ ٻنهي اڳواڻن پاڻ ۾ اڪيلي ملاقات به ڪئي، عمران خان سان گڏ خيبرپختونخواهه جو وڏو وزير پرويز خٽڪ، اسد قيصر هئا جڏهن ته ان موقعي تي جماعت اسلامي جا ٻيا مرڪزي اڳواڻ به موجود هئا عمران خان جي اچڻ کان اڳ ميڊيا سان مختصر ڳالهه ٻولهه ۾ سراج الحق چيو ته ٻنهي پارٽين وچ ۾اهي ويڇا ڪجهه ننڍين غلط فهمين جي بنياد تي ٿيا هئا جن تي ميڊيا جي ڪن گروپن به معذرت ڪئي آهي تنهن ڪري بهتر آهي ته هاڻ ٻئي ڄڻا دليون صاف ڪري پاڻ ۾ ٺهي هلون ياد رهي ته ٻنهي اڳواڻن ۾ ڇڪتاڻ کانپوءِ سراج الحق عمران خان کي پاڻ وٽ چانهه جي دعوت ڏني هئي ته جيئن هنن وچ ۾ پيدا ٿيل سياسي غلط فهمي کي ختم ڪيو وڃي ذريعن جو چوڻ آهي ته هن اهم ملاقات ۾ تحريڪ انصاف ۽ حڪومت وچ ۾ امڪاني ڳالهه ٻولهه تي به خيالن جي ڏي وٺ ڪئي وئي. مليل ڄاڻ موجب سراج الحق ملاقات دوران عمران خان کي ڌرڻو ختم ڪرڻ لاءِ راضي ڪري ورتو آهي، عمران خان جو چوڻ آهي ته جيڪڏهن سپريم ڪورٽ چونڊن ۾ٿيل ڌانڌلي جي جاچ ڪري ٿي ته هو ڌرڻو ختم ڪرڻ لاءِ تيار آهي، هن اهو به چيو ته طاهر القادري جي ڌرڻي ختم ڪرڻ سان مٿس ڪو به فرق نه ٿو پوي، هن چيو ته سندس جي ڌرڻي سبب حڪومت سخت پريشان آهي.

 

صدر سان ڊي جي آءِ ايس آءِ ظهير السلام جي الوداعي ملاقات

اسلام آباد (بيورو) صدر ممنون حسين سان انٽر سروسز انٽيلي جنس (آءِ ايس آءِ) جي ڊائريڪٽر جنرل محمد ظهير السلام اربع ڏينهن ايوان صدر ۾ الوداعي ملاقات ڪئي. صدر ملڪ جي دفاع ۽ انٽيلي جنس ڍانچي جي استحڪام جي لاءِ ليفٽيننٽ جنرل ظهير السلام جي خدمتن کي ساراهيو. صدر ممنون حسين عهدو ڇڏيندڙ ڊي جي آءِ ايس آءِ جي مستقبل ۾ نيڪ خواهشن جو اظهار به ڪيو.

 

چيف اليڪشن ڪمشنر جي مقرري تي مشاورت ۾ دير جي ذميدار حڪومت هوندي: خورشيد شاهه

اسلام آباد، سکر (بيورو) قومي اسيمبلي ۾ مخالف ڌُر جي اڳواڻ سيد خورشيد شاهه چيو آهي ته چيف اليڪشن ڪمشنر جي مقرري لاءِ وزيراعظم نواز شريف اڃا تائين ڪو رابطو ناهي ڪيو، مقرري تي مشاورت ۾ دير جي ذميدار حڪومت آهي، مشاورت لاءِ تحريڪ انصاف سان رابطو ڪندس، ايم ڪيو ايم کي متفق ڪرڻ حڪومت جي ذميداري آهي. ميڊيا سان نئين چيف اليڪشن ڪمشنر جي مقرري بابت ڳالهائيندي سيد خورشيد شاهه وڌيڪ چيو ته 9 نومبر تي هو ملڪ کان ٻاهر وڃي رهيو آهي، 4 2 نومبر تي واپسي ٿيندي، ان حوالي سان سينيٽر اسحاق ڊار کي آگاهه ڪيو ويو آهي. سيد خورشيد شاهه چيو ته چيف اليڪشن ڪمشنر جي مقرري لاءِ تحريڪ انصاف سان مشاورت ڪئي ويندي پرپوءِ ايم ڪيو ايم کي متفق ڪرڻ حڪومت جي ذميداري آهي. هن چيو ته تحريڪ انصاف مذاڪرات ڪري ته تمام معاملن تي ڳالهه ٿي سگهي ٿي، تحريڪ انصاف قومي اسيمبلي جي مدت چار سال ڪرڻ ۾ اسان جي حمايت ڪري.

 

وزيراعظم جو پوليو خلاف اعلانِ جنگ، 6 مهينن ۾ پوليو جي خاتمي جي عزم، ڪميٽي قائم

اسلام آباد (بيورو) وزيراعظم نواز شريف جو پوليو خلاف اعلانِ جنگ، پوليو روڪٿام لاءِ ڪابينا جي ڪميٽي جوڙي ڇڏي، 6 مهينن ۾ پوليو جي خاتمي جي عزم جو ورجاءُ. تفصيل موجب وزيراعظم نواز شريف جي سربراهي ۾ پوليو روڪٿام ڪميٽي جو اجلاس ٿيو. اجلاس ۾ وفاقي وزيرن سميت چئني وڏن وزيرن شرڪت ڪئي. وزيراعظم نواز شريف پوليو روڪٿام لاءِ وفاقي ڪابينا جي ڪميٽي جوڙي ڇڏي. پوليو روڪٿام ڪميٽي دفاع، گهرو ۽ صحت جي وزير تي ٻڌل هوندي. اجلاس ۾ وزيراعظمنواز شريف پوليو روڪٿام فوڪس گروپ به قائم ڪري ڇڏيو جيڪو پوليو روڪٿام جي تمام عمل جي نگراني ڪندو. فوڪس گروپ ۽ پوليو روڪٿام ڪميٽي هر 5 1 ڏينهن بعد وزيراعظم کي پنهنجي رپورٽ پيش ڪندا. اجلاس بعد وزيراعظم هائوس مان جاري ڪيل پڌرنامي ۾ چيو ويو آهي ته 6 مهينن ۾ پاڪستان کي پوليو مان پاڪ ڪري ڇڏينداسين.

 

حڪومت ملڪي معيشت کي آءِ ايم ايف وٽ گروي رکي ڇڏيو آهي: پ پ

ڪراچي(اسٽاف رپورٽر) پاڪستان پيپلزپارٽي جي مرڪزي ايڊيشنل جنرل سيڪريٽري سينيٽر رضا رباني چيو آهي ته موجوده حڪومت ملڪ جي معيشت کي آءِ ايم ايف وٽ گروي رکي ڇڏيو آهي ملڪي نفعو ڏيندڙ ادارن کي خانڳائڻ عالمي سازش لڳي ٿي دنيا ۾ هن وقت تيل جي ذخيرن تي قبضي جي جنگ هلي رهي آهي اولهه ملڪ چاهين ٿا ته جن ملڪن وٽ تيل جا ذخيرا آهن انهن جي وسيلن تي قبضو ڪيو وڃي پيپلزپارٽي موجوده حڪومت کي ڊي ريل ڪري آمريت جو رستو هموار نٿي ڪرڻ گهري قومي ادارن کي خانڳائڻ جي خلاف هر فورم تي پرامن احتجاج ڪنداسين پيپلزپارٽي کي قومي ادارا خانڳائڻ قبول نه آهن قومي ادارن کي خانڳائي حڪومت لکين مزدورن جي گهرن ۾ فاڪا ڪشي آڻڻ گهري ٿي اهڙن خيالن جو اظهار هن اربع تي پيپلزپارٽي ميڊيا سيل سنڌ ۾ پريس ڪانفرنس کي خطاب ڪندي ڪيو ان موقعي تي سينيٽر سعيد غني، شمشاد قريشي، لطيف مغل ۽ منظور عباس موجود هئا هن چيو ته حڪومت آءِ ايم ايف جون شرطون پوريون ڪرڻ لاءِ قومي ادارن کي ڀڳڙن جي مٺ تي پنهنجن فرنٽ مئنن ۽ بزنس پارٽنرن کي وڪرو ڪري رهي آهي آءِ ايم ايف حڪومت کي واضح ڪيو آهي ته بجلي جي قيمتن ۾ وڌيڪ اضافو ڪيو وڃي ۽ قومي ادارن جي نجڪاري جو عمل تيز ڪيو وڃي. جيستائين شرطون پوريون نه ٿينديون اڳئين قرض جي قسط جاري نه ڪئي ويندي حڪومتي پاليسين جو اندازو اهڙي طرح لڳائي سگهجي ٿو ته آءِ ايم ايف جي وفد پاڪستان اچڻ کان انڪار ڪري ڇڏيو آهي ۽ هاڻي حڪومت ۽ آءِ ايم ايف وچ ۾ ڳالهيون دبئي ۾ ٿي رهيون آهن رضا رباني چيو ته حڪومت 69 قومي ادارن جي نجڪاري جو پلان ٺاهيو آهي جنهن ۾ صرف 18 ادارا خساري ۾ آهن جيڪڏهن انهن 18 مان به انهن 7 ادارن جي نجڪاري ڪئي وڃي ته بعد ۾ به سبسڊي جي مد ۾ حڪومت کي پئسا ادا ڪرڻا پوندا هن چيو ته آئل اينڊ گئس ڊيولپمينٽ ڪمپني لميٽيڊ ملڪ ۾ تيل پيدا ڪرڻ جي سڀ کان وڏي ڪمپني اهي حڪومت ان جي نجڪاري ڪري ملڪي تيل جي پيداوري وسيلن کي پرڏيهي هٿن ۾ وڪرو ڪرڻ گهري ٿي. او جي ڊي سي ايل هڪ نفعو ڏيندڙ ڪمپني آهي جنهن جو گذريل سال نفعو 90 ارب رپيا هو هن چيو ته او جي ڊي سي ايل جي مزدورن کي نجڪاري جي خلاف احتجاج ڪرڻ تي مٿن تشدد ڪيو ويو انهن تي ڪوڙا ڪيس داخل ڪيا ويا سوين مزدورن کي گرفتار ڪيو ويو هاڻي انهن جون ضمانتون به نٿيون ورتيون وڃن هن چيو ته پيپلزپارٽي او جي ڊي سي ايل جي مزدورن سان گڏ آهي انهن جو جيڪو لائحه عمل هوندو پيپلزپارٽي انهن جو ساٿ ڏيندي هن يو ته بجلي جون قيمتون به آءِ ايم ايف جي چوڻ تي وڌايون پيون وڃن 52 پئسا في يونٽ قيمت ۾ واڌ مذمت جوڳو عمل آهي بجلي جي قيمت وڌائي ان جو بار عام ماڻهو تي وڌو پيو وڃي جيڪو اڳواٽ ئي مهانگائي ۽ غربت جي چڪي ۾ پيسجي رهيو آهي. هڪ سوال جي جواب ۾ هن چيو ته حڪومت پي آءِ اي ۽ اسٽيل مل کي خانڳائڻ جو به ارادو رکي ٿي ۽ ان حوالي سان اطلاع آهن ته انهن ادارن جي نجڪاري لاءِ رٿابندي ڪئي پئي وڃي هن چيو ته پيپلزپارٽي ڪڏهن به مزدورن کي بيرزوگار ٿيڻ نه ڏيندي هن چيو ته 18هين ترميم ۾ اها ڳالهه واضح آهي ته تيل ۽ بين قدرتي وسيلن جا ذخيرا جن صوبن ۾ هوندا انهن ۾ 50 سيڪڙو حصو وفاق ۽ 50 سيڪڙو حصو واسطيدار صوبي جو هوندو. هن چيو ته قومي ادارن جي نجڪاري جي پاليسي تي صوبن کي اعتماد ۾ نه ورتو ويو آهي. هن حڪومت تي واضح ڪيو ته هو قومي ادارن جي نجڪاري کان پاسو ڪري ٻي صورت ۾ پيپلزپارٽي پورهيتن سان گڏجي رستن تي احتجاج ڪندي. هي احتجاج آئين ۽ قانون مطابق هوندو.

 

عدالت کي هر فيصلو آئين مطابق ڪرڻو آهي چاهي نتيجو ڪجهه به نڪري: سپريم ڪورٽ

اسلام آباد (بيورو) سپريم ڪورٽ چيو آهي ته وزيراعظم يا گهرو وزير جي نااهل ٿيڻ سان اسان کي سروڪار ناهي، عدالت کي هر فيصلو آئين مطابق ڪرڻو آهي چاهي ان جا ڪجهه به نتيجا نڪرن، آئين ۾ صادق ۽ امين جي شرط رکي وئي آهي ان جو تعين عدالت کي ڪرڻو آهي، اسپيڪر درخواست گذارن جون درخواستون رد ڪري ڇڏيون هيون، درخواست گذار آخر ڪڏي وڃن، درخواست گذار به ذهن ۾ رکن ته آئين جو آرٽيڪل 0 1 اي به موجود آهي. وقتي چيف جسٽس جواد ايس خواجا چيف جسٽس ناصر الملڪ جي ٻاهرين ملڪ دوري تي هجڻ سبب ڪيس جي ٻڌڻي ڪئي، ان کان پهريان جسٽس جواد ايس خواجا پاڻ کي وزيراعظم نااهلي ڪيس جي ٻڌڻي کان الڳ ڪري ڇڏيو هو پرپوءِ هو بئنچ۾ بطور وقتي چيف جسٽس شامل ٿيو. جسٽس جواد ايس خواجا جي سربراهي ۾ جسٽس سرمد جلال عثماني ۽ جسٽس مشير عالم ڪيس جي ٻڌڻي ڪئي. ٻڌڻي دوران جسٽس جواد ايس خواجا اهي رمارڪس ڏنا. بئنچ وزيراعظم جي نااهلي متعلق چوڌري شجاعت حسين، گوهر نواز ۽ اسحاق خاڪواني جي داخل درخواستن جي ٻڌڻي ڪئي. ٻڌڻي دوران سپريم ڪورٽ اٽارني جنرل کان 4 سوالن تي مدد گهري جنهن ۾ چيو ويو ته جيڪڏهن ڪنهن اسيمبلي ميمبر جي نااهل هجڻ جي درخواست اچي ٿي ته مجاز فورم ڪهڙو آهي؟ جيڪڏهن طي ٿئي ٿو ته معاملو عدالت ٻڌندي ته ڪهڙي مجاز عدالت هوندي؟ نااهلي لاءِ ڄاڻايل طريقيڪار ڪهڙو هوندو؟ ۽ آخري سوال اهو ته نااهلي لاءِ ڄاڻايل طريقيڪار لاءِ ثبوت ڇا هوندا. ان موقعي تي جسٽس جواد جو چوڻ هو ته ڪنهن جي صادق هجڻ جو تعين عدالت کي ڪرڻو آهي جڏهن ته اسپيڪر به درخواست گذارن جون درخواستون رد ڪيون ته اهي ڪڏي وڃن ۽ درخواست گذارن کي به ذهن ۾ رکڻ گهرجي ته آئين جو آرٽيڪل 0 1 اي به موجود آهي پرپوءِ ان سان ڪو سروڪار نه آهي ته وزيراعظم ۽ گهرو وزير نااهل ٿي وڃي پر اسان کي آئين مطابق فيصلو ڪرڻو آهي.

 

وفاقي حڪومت بجلي جي اگهن ۾ 52 پئسا في يونٽ اضافو ڪري ڇڏيو

اسلام آباد(بيورو) وفاقي حڪومت بجلي جي اگهن ۾ 52 پئسا في يونٽ واڌ جو نوٽيفڪيشن جاري ڪري ڇڏيو آهي اهو نوٽيفڪيشن نيپرا طرفان جاري ڪيو ويو آهي جنهن موجب بجلي جي اگهن ۾ اهو اضافو ماهانهفيول ايڊجسٽمينٽ جي مد ۾ ڪيو ويو آهي اهو اضافو هلندڙ مهيني لاڳو ٿيندو پر تنهن هوندي به لائيف لائين ۽ ڪراچي جي صارفين تي اهو اضافو لاڳو نه ٿيندو.

 

پاڪستان ڀارت ۽ افغانستان خلاف شدت پسندن کي استعمال پيو ڪري: آمريڪا جو الزام

واشنگٽن (اين اين آءِ) آمريڪي دفاع واري وزارت الزام مڙهيو آهي ته پاڪستان هاڻي به ڀارت ۽ افغانستان جي خلاف شدت پسند تنظيمن کي استعمال ڪري رهيو آهي ۽ هي ڳالهه پوري خطي جي استحڪام لاءِ خطرناڪ آهي. پينٽاگون پاران آمريڪي ڪانگريس لاءِ هر ڇهين مهيني جاري ٿيندڙ هن رپورٽ موجب ته پاڪستان ان پراڪسي فورسز يا بلواسطه وڙهندڙ طاقتن جو استعمال افغانستان ۾ پنهنجي گهٽ ٿيندڙ اثر رسوخ جي ڪري ۽ ڀارت جي بهتر فوجي طاقت جي خلاف حڪمت عملي طور ڪري رهيو آهي رپورٽ ۾ چيو ويو آهي ته پاڪستاني سرحد اندر لڪل طالبان هاڻي به افغانستان ۾ حملا ڪري رهيا آهن ۽ اهو ته پاڪستان افغانستان ٻطرفو لاڳاپن لاءِ ڏکيائيون پيدا ڪري رهيو آهي. پيٽاگون پاران 6 مهينا اڳ جاري رپورٽ ۾ به پاڪستان تي اهڙي قسم جا الزام مڙهيا ويا هئا پر هن رپورٽ ۾ پهريون ڀيرو چيو ويو آهي ته پاڪستان انهن شدت پسندن کي هندستان جي بهتر فوج جي خلاف حڪمت عملي جي طور تي استعمال ڪري رهيو آهي رپورٽ ۾ نريندر مودي جي تاج پوشي وقت افغانستان جي حرات شهر ۾ ڀارتي ڪونصليٽ تي حملي جو به ذڪر آهي.

 

جيئن ڪالا باغ ڊيم نه ٺهيو، تيئن سنڌ ۾ ڪو ٻيو صوبو نه ٺهندو: نثار کهڙو

لاڙڪاڻو(بيورو ) سنڌ جي سينيئر صوبائي وزير تعليم نثار احمد کهڙو چيو آهي ته 1973ع جي آئين ۾ چار صوبا لکيل آهي ۽ انهن جي ضمانت ڏنل آهي ته ٻيا صوبا نه ٺهندا. جيئن ڪالا باغ ڊيم نه ٺهيو، ائين سنڌ ۾ ڪو ٻيو صوبو نه ٺهندو. ڌرڻي وارن پنهنجي سياسي شڪست تسليم ڪئي آهي. آمر ۽ ڌاڙو هڻندڙن جا رستا روڪڻ لاءِ جمهوريت ئي حل آهي. چونڊن ۾ سڌارا آڻي اڳتي وڌنداسين. اهڙو اظهار هن ڪالهه لاڙڪاڻو پريس ڪلب ۾ صحافين سان ڳالهائيندي وڌيڪ چيو ته جيڪڏهن ٻيا صوبا ٺاهڻا آهن ته آبادي ۽ پارٽي جي منظور ۾ آڻي بعد ۾ ان کي صوبائي ۽ قومي اسيمبلي ۾ بحث لاءِ موڪلي سگهجي ٿو. هن چيو ته ڪراچي ۾ استادن جي ڀرتي لاءِ 15 سو خالي جايون هيون، جنهن تي آفيسرن ڪرپشن ڪري 13 هزار ڀرتيون ڪيون. انهن آفيسرن کي معطل ڪيو ويو پر بعد ۾ ڪورٽ مان اسٽي آرڊر وٺي آيا. پر انهن کي پوسٽنگ ناهي ڏني وئي. ڪورٽ جو فيصلو اڃان نه آيو آهي. هن چيو ته ڌرڻي هڻندڙن پنهنجي شڪست تسيلم ڪئي آهي ۽ مولانا طاهر القادري ٻاهر هليو ويو آهي. ڌرڻا سياست ختم ٿي چڪي آهي. هن چيو ته اسان جي مٿان ڪرپشن جا الزام هڻندڙ کي سندن مٿان لڳل الزام نظر نه ٿا اچن. ڪرپشن جي خاتمي لاءِ نيب، ڪورٽ ۽ ٻيا ادارموجود آهن.پي ٽي آءِ هڪ پاسي قومي اسيمبلي تي عدم اعتماد ڪري استيعفيٰ ڏيڻ ۽ ان ئي اسيمبلي ۾ اچي تقريرون ڪري ٿي ته ٻئِي پاسي ڪي پي ڪي اسيمبلي ۾ استعفيائون نه ڏيڻ پڻ اخلاقي ڪرپشن آهي. هن چيو ته نئون پاڪستان ٺاهڻ وارن صوبائي خودمختياري هئڻ باوجود پنهنجي صوبي ۾ مڪاني چونڊون وساري ڇڏيون آهن. پنجاب ان حوالي سان قانون ئي نه ٺاهيو آهي. سنڌ حڪومت لوڪل گورنمينٽ جو قانون جوڙيو ۽ اسيمبلي مان پاس ڪرايو ۽ اسان وقت تي چونڊون ڪرائڻ چاهيون پيا، پر ايم ڪيو ايم ڪورٽ ۾ هلي وئي. هن چيو ته ارباب غلام رحيم دور ۾ سندس هڪ ڳوٺ ۾ عوامي پئسن خرچ ڪري 84 اسڪول ڏيکاريا ويا. پر اهي آبادي ئي ڏسڻ ۾ نه ٿي اچي. هن چيو ته جيڪڏهن عدليه ۾ آسرو هجي ها ته مان ضرور ڪيس داخل ڪريان ها. هن چيو ته شهيد ذوالفقار علي ڀٽو آمريت آڏو کوڏا نه کوڙي اسان کي جمهوريت ڏئي جمهوري رستا سيکاريا، بيگم نصرت ڀٽو جو جمهوريت لاءِ ادا ڪيل ڪردار وساري نه ٿو سگهجي، آمريت واري دور ۾ حق وٺڻ جي همت نه هئي. هن ايم آر ڊي جي تحريڪ هلائي عوام جو آواز بلند ڪيو. شهيد بينظير ڀٽو اسلامي دنيا جي پهرين جمهوري وزير اعظم عورت بڻي، جنهن تي اسان کي فخر آهي. هن چيو ته آمر ڪيترائي ڀيرا اقتدار تي قبضو ڪري ويٺا پر شهيد ذوالفقار علي ڀٽو جي آئين کي ختم نه ڪري سگهيا. اسان اهڙي جمهوري نظآم کي لاڳو ڪرائي ان جي عزت ڪرائي آهي. پاڪستان جي 66 سالن جي عمر ۾ پهريون ڀيرو هڪ سول حڪومت ٻئي سول حڪومت کي پر امن طريقي سان اقتدار منقتل ڪيو. جنهن کي دنيا ۾ ساراهيو ويو ۽ اسان ڪنڌ کڻڻ جهڙا ٿياسين. هن هڪ سوال جي جواب ۾ چيو ته شاهه محمود قريشي، جماعت اسلامي جي امير مولانا سراج الحق لاڙڪاڻي اچي پنهنجا جلسا ڪيا ۽ عمران خان به بنا خوف اچي. اسان اهڙا بي ظرف نه آهيون. هن چيو ته شهيد بينظير ڀٽو جي قتل ڪيس تان هٿ ڪيئن ٿا کڻي سگهون. ڪيس جي پوئواري ٿي رهي آهي. شهيد ذوالفقار علي ڀٽو جو ريفرنس موڪليو هيوسين، پر ان تي سپريم ڪورٽ ڇو خاموش آهي. قتل ڪندڙ هن وقت به ويٺا آهن ۽ ڪورٽ هڪ جملي جا ريمارڪس به نه ڏنا. هن هڪ سوال جي هن چيو ته سنڌ جي وڏ وزارت تبديل نه پئي ٿئي. باقي ڪابينا ۾ ردوبدل ٿي سگهي ٿي. ترقي بهتري لاءِ آخري حد نه آهي. لاڙڪاڻو بهتر ٿيڻ گهرجي. نساسڪ جي ڪارڪردگي زيرو آهي.جيڪڏهن ان ڪارڪردگي بهتر نه ڪئي ته ماڻهو آفيسن جو گهيراءُ ڪندا. ڊپٽي ڪمشنر ۽ ڪمشنر ڪم نه ٿو ڪري ته ان تي نظر رکڻ گهرجي. هن چيو ته اڪيلي سر حڪمراني جو ذهن ۾ به نه رکيو آهي. سڀني کي گڏجي ويهي ملڪ جي بهتري لاءِ بهتر فيصلا ڪرڻ کپن ۽ اسان اهي ڪري ڏيکارياسين. هن چيو ته پاڪستان جي سياست جون پاڙون اڃان مضبوط نه آهن. ان کي چونڊ سڌارن ذريعي ئي مضبوط بڻايو ويندو. هن چيو ته شهيد محترمه بينظير ڀٽو جي ورسي جي موقعي تي جمهوريت جي بقا لاءِ اسڪولن ۾ مشاعرا، تقريرون ۽ ڪوئز ڪامپيٽيشن لاءِ هفتو ملهايو ويندو.ا