تازيون خبرون

Monthly Archives: November 2014

وزيراعظم سان چوڌري نثار ۽ مولانا فضل الرحمان جون ملاقاتون، ملڪي صورتحال تي ڳالهيون

اسلام آباد (بيورو) وزيراعظم ميان نواز شريف سان وفاقي گهرو وزير چوڌري نثار علي خان ملاقات ڪئي ۽ ضلعي انتظاميا ۽ تحريڪ انصاف وچ ۾ 0 3 نومبر واري جلسي جي حوالي سان ٿيل معاهدي جي تفصيل کان وزيراعظم کي آگاهه ڪيو. تفصيل موجب جمعي ڏينهن گهرو وزير چوڌري نثار علي خان وزيراعظم هائوس ۾ وزيراعظم سان ملاقات ڪئي، گهرو وزير وزيراعظم کي ضلعي انتظاميا ۽ تحريڪ انصاف وچ ۾ 0 3 نومبر واري جلسي جي حوالي سان ٿيل معاهدي جي تفصيل کان آگاهه ڪيو، وزيراعظم کي 0 3 نومبر واري جلسي جي سيڪيورٽي پلان کان به آگاهه ڪيو. ذريعن موجب وزيراعظم 0 3 نومبر جي حوالي سان سيڪيورٽي پلان جي منظوري به ڏئي ڇڏي. وزيراعظم نواز شريف سان جي يو آءِ (ف) جي سربراهه مولانا فضل الرحمان جي ملاقات، ملڪ جي مجموعي سياسي صورتحال تي ويچار، مولانا فضل الرحمان وزيراعظم کي قبائلي جرڳي جي آءِ ڊي پيز متعلق تحفظات کان آگاهه ڪيو، وزيراعظم نواز شريف مولانا فضل الرحمان کي خاطري ڏياري ته حڪومت آءِ ڊي پيز جي مسئلن کي ترجيحي بنيادن تي حل ڪرڻ جا قدم کڻي رهي آهي. تفصيل موجب جي يو آءِ (ف) جي سربراهه مولانا فضل الرحمان وزيراعظم هائوس ۾ وزيراعظم سان ملاقات ڪئي جنهن ۾ ملڪ جي مجموعي سياسي صورتحال تي ڳالهايو ويو. وزيراعظم نواز شريف مولانا فضل الرحمان کي سارڪ ڪانفرنس ۾ ٿيل معاهدن جي تفصيل کان آگاهه ڪيو، مولانا فضل الرحمان وزيراعظم کي اسلام آباد ۾ ٿيل قبائلي جرڳي جي آءِ ڊي پيز متعلق تحفظات کان وزيراعظم کي آگاهه ڪيو، جنهن تي وزيراعظم چيو ته حڪومت آءِ ڊي پيز جي مسئلن کي ترجيحي بنيادن تي حل ڪري رهي آهي، آءِ ڊي پيز جي جلد گهرن ڏانهن واپسي يقيني بڻائي رهيا آهيون. ملاقات ۾ ٻنهي اڳواڻن ۾ اتر وزيرستان ۾ جاري آپريشن ضرب عضب جي حوالي سان به ويچار ونڊيا ويا، وزيراعظم نواز شريف مولانا فضل الرحمان کي 0 3 نومبر تي اسلام آباد ۾ پي ٽي آءِ جي ٿيندڙ جلسي جي حوالي سان حڪومتي پاليسي تي اعتماد ۾ ورتو.

 

تحريڪ انصاف2013ع جي چونڊن کي فڪس قرار ڏئي ڇڏيو

اسلام آباد (بيورو) تحريڪ انصاف جَي چيئرمين عمران خان، 2013ع واري اليڪشن کي فڪس قرار ڏيندي چيو آهي ته ڌانڌليون ڪندڙن کي سزا ملڻ تائين ملڪ ترقي نٿو ڪري سگهي، ڌرڻو اڃا هاڻ شروع ٿيوآهي، 30 نومبر تي هو ايندڙ لائحه عمل جو اعلان ڪندو. اسلام آباد ۾ پريس ڪانفرنس ڪندي عمران خان چيو ته عام چونڊن ۾ ڌانڌلين خلاف هن آگسٽ ۾ ئي آواز اٿاريو هو پر ان وقت سندس هڪ به نه ٻڌي وئي. پي ٽي آءِ سربراهه چيو ته ڌانڌلين لاءِ 55 لک واڌو بيلٽ پيپرز ڇپرايا ويا هئا، ن ليگ ڌانڌلين جا اڳوڻا سمورا رڪارڊ ٽوڙي ڇڏيا. ڪپتان جو چوڻ هو ته سعد رفيق جي تڪ لاءِ هڪ لک 24 هزار واڌو بيلٽ پيپرز ڇپرايا ويا هئا، وڏي ڳالهه اها آهي ته ميچ فڪسنگ ۾ اڳوڻو چيف جسٽس افتخار چوڌري به ملوث هو. عمران خان چيو ته کيس حيرت ان ڳالهه جي آهي ته چونڊن ٿيل ڌانڌلين ۾ اليڪشن ڪميشن ۽ نگران حڪومت جو به وڏو هٿ هو. هـُن چيو ته 2013ع واري اليڪشن ۾ ڌانڌليون ڪندڙن کي سزا نه ملي ته اهي ايندڙ چونڊن ۾ به ڌانڌليون ڪرائيندا. عمران خان چيو ته جعلي مينڊيٽ سان اقتدار ۾ ايندڙ حڪمران ملڪ لاءِ ڪڏهن به بهتر نٿا سوچي سگهن. ڌرڻي بابت ڳالهائيندي عمران خان چيو ته ڌرڻو اڃا هاڻ شروع ٿيوآهي، 30 نومبر تي هو ايندڙ لائحه عمل جو اعلان ڪندو. ڪپتان چيو ته نواز شريف ۽ آصف زرداري ٽيڪس چورآهن، اهي عوام تي ٽيڪس ڏيڻ لاءِ ڪئين ٿا زور ڀري سگهن.

 

حڪومت بني گالا ۾ عمران خان جي رهائشگاهه کي محل قرار ڏئي ڇڏيو

اسلام آباد (بيورو) وفاقي حڪومت، بني گالا ۾ عمران خان جي رهائشگاهه کي محل قرار ڏيندي اسلام آباد ۾ فليٽ ۽ زمان پارڪ لاهور ۾ گهر، ڀــَڪر ۽ خانيوال ۾ ايراضي جا فٽيج ميڊيا آڏو پيش ڪري ڇڏيا، وفاقي وزير پرويز رشيد جو چوڻ آهي ته ڪپتان وٽ هڪ ڪروڙ 36 لک ڪيش آهن ٽيڪس رڳو هڪ لک رپيو ادا ڪندو آهي. اسلام آباد ۾ پريس ڪانفرنس ڪندي سڌ سماءَ واري وفاقي وزير پرويز رشيد چيو ته عمران خان وٽ هڪ ڪروڙ 36 ڪروڙ لک رپيا ڪيش آهن، ٽيڪس رڳو هڪ لکرپيا ادا ڪندو آهي. هن چيو ته عمران خان پرڏيهي ملڪ خدمتن عيوض 84 لک 45 هزار رپيا ، ٻڌايو وڃي ته هن ڪنهن کي، ڪڏهن ۽ ڪهڙيون خدمتون فراهم ڪيون؟ پرويز رشيد چيو ته پي ٽي آءِ سربراهه وٽ هڪ ڪروڙ 36 لک رپيا ڪيش موجود آهن جيڪي بليڪ مني جي زمري ۾ اچن ٿا. هن چيو ته عوام ڄاڻڻ چاهي ٿو ته عمران خان پرڏيهي ملڪ کي ڪرنسي سروسز ڏئي رهيو آهي ته هڪ سال ۾ 84 لک رپين کان وڌيڪ ڪمائي. پرويز رشيد چيو ته عمران خان زرعي ٽيڪس کان پاڻ کي محفوظ رکڻ لاءِ پنج لک رپين جو قرضي ظاهر ڪيو ، هن 23 لک 50 هزار رپين جي زرعي آمدني ظاهر ڪئي. هن چيو ته پي ٽي آءِ سربراهه چيني صدر جو پاڪستان وارو دورو ملتوي ڪرائڻ ۾ اهم ڪردار ادا ڪيو. پرويز رشيد چيو ته عمران خان جا پاڪستان ۾ چار محل آهن، پر رڳو هڪ لک رپيا ٽيڪس ادا ڪندو آهي. هن چيو ته 2007ع کان اڳ نواز شريف جبري طور جلا وطن ٿيو. سڌ سماءَ واري وفاقي وزير پرويز رشيد چيو ته نواز شريف جي شگر ملز 2005ع کان 2014ع تائين 2 ارب 44 ڪروڙ 70 لک 70 هزار 543 رپيا ٽيڪس ادا ڪئي. هن چيو ته 2014ع ۾ وزيراعظم نواز شريف 26 لک 95 هزار 912 رپيا ٽيڪس ادا ڪئي جڏهن ته عمران خان سال 2013 ۽ 2014ع ۾ رڳو هڪ لک 94 هزار 936 رپيا ٽيڪس ادا ڪئي.

 

چيف اليڪشن ڪمشنر لاءِ فرشتا نٿا آڻي سگهون: خورشيد شاهه

اسلام آباد (بيورو) قومي اسيمبلي ۾ مخالف ڌُر جي اڳواڻ سيد خورشيد شاهه چيو آهي ته چيف اليڪشن ڪمشنر لاءِ فرشتا نٿا آڻي سگهون، اميد آهي پهرين ڊسمبر کان پهرين اليڪشن ڪمشنر جي مقرري ٿي ويندي، اسان کي نوجوان اليڪشن ڪمشنر کپي، 4 7 سالا ينگ ماڻهو ملي رهيا آهن، عمران خان جيڪڏهن اعتراض نه ڪري ته کيس چيف اليڪشن ڪمشنر بڻائي ڇڏيون ٿا، وزيراعظم فون ڪئي، مصروفيت سبب فون نه کڻي سگهيس، حڪومت جي ڪارڪردگي مان مطمئن ناهيون، 0 3 نومبر تي ڪجهه ٿئي نه ٿئي، اهو ڪم حڪومت جي ڏسڻ جو آهي، سپريم ڪورٽ ۽ پارليامينٽ جي اڱڻ ۾ ڪنهن کي احتجاج جو حق ناهي. پارليامينٽ هائوس۾ پنهنجي چيمبر ۾ صحافين سان ڳالهائيندي سيد خورشيد شاهه وڌيڪ چيو ته رياست سڀني جي ماءُ آهي، جنهن سان وڙهڻ صحيح نه آهي، ڪجهه سياستدانن حڪومت کي رياست سمجهي رکيو آهي، حڪومت سان وڙهيو وڃي، رياست سان نه، 0 3 نومبر تي وفاقي گادي واري هنڌ ۾ ڇا ٿيندو، اهي ڪم حڪومت جي ڏسڻ جا آهن. مخالف ڌُر جي اڳواڻ چيو ته چيف اليڪشن ڪمشنر جي مقرري لاءِ اتفاق راءِ پيدا ڪرڻ سبب دير ٿي، اڄ وزيراعظم نواز شريف فون ڪئي هئي پر اسيمبلي ۾ مصروف هجڻ سبب فون تي ڳالهه نه ٿي سگهي، پرپوءِ اميد آهي ته پهرين ڊسمبر کان پهريان ئي تمام آئيني ۽ قانوني تقاضا پورا ڪري چيف اليڪشن ڪمشنر جي مقرري مڪمل ٿي ويندي. هڪ سوال جي جواب ۾ هن چيو ته اسان نوجوان اليڪشن ڪمشنر چاهيون ٿا، پر بدقسمتي سان 4 7 سالا نوجوان ملي رهيا آهن، ڇا ڪريون، اليڪشن ڪمشنر لاءِ فرشتا نٿا آڻي سگهون جيڪي آهن انهن مان ئي ڪنهن کي بڻائڻو پوندو. سيد خورشيد شاهه چيو ته جيڪڏهن عمران خان کي اعتراض نه هجي ته کيس چيف اليڪشن ڪمشنر لڳائي ڇڏيون ٿا، ان حوالي سان تمام سياسي پارٽين کي مان راضي ڪري وٺندس. هن چيو ته حڪومت جي ڪارڪردگي مان مطمئن ناهيون، جيڪڏهن پئسو بچائڻ جي پاليسي تي حڪومت عمل ڪري رهي آهي ته پئسو بچائڻ لاءِ وزيراعظم جي غير ملڪي دورن تي به پابندي لڳائي وڃڻ گهرجي، حڪومت لڳاتار پارليامينٽ کي نظرانداز ڪيو. هن مطالبو ڪيو ته ڊاڪٽر طاهر القادري ۽ عمران خان جي حوالي سان عدالتي فيصلن تي عمل ٿيڻ گهرجي.

 

تحريڪ انصاف معاهدي جي خلاف ورزي ڪئي ته قانون حرڪت ۾ ايندو: چوڌري نثار

اسلام آباد (بيورو) وزيراعظم نواز شريف سان وفاقي گهرو وزير چوڌري نثار ملاقات ڪري 30 نومبر تي پي ٽي آءِ جي جلسي جي سڪيورٽي انتظامن تي بريفنگ ڏني، چوڌري نثار چيو آهي ته پي ٽي آءِ کي جناح ايونيو ۾ جلسي جي اجازت ڏني وئي آهي ڪابه گڙٻڙ ٿي ته ان جي ذميواري پي ٽي آءِ تي هوندي. وفاقي گهرو وزير چوڌري نثار وزير اعظم ميان نواز شريف سان ملاقات ڪري پي ٽي آءِ جي 30 نومبر واري جلسي بابت ٿيل معاهدي ۽ سيڪيورٽي بابت بريفنگ ڏني. وزير اعظم سان ملاقات بعد پريسڪانفرنس ڪندي چوڌري نثار چيو ته پي ٽي آءِ ۽ اسلام آباد انتظاميه وچ ۾ 30 نومبر تي جلسي بابت معاهدو ٿي ويو آهي، معاهدي موجب پي ٽي آءِ جناح ايونيو تي جلسو ڪندو جيڪڏهن ان کان اڳتي وڌڻ جي ڪوشش ڪئي وئي ته ڪارروائي ٿيندي. چوڌري نثار چيو ته پي ٽي آءِ معاهدي تي صحيح ڪئي آهي ته جلسي ۾ ڪو به ٻار نه آندو ويندو ۽ نه وري ڪوئي ريڊ زون ۾ داخل ٿيڻ جي ڪوشش ئي ڪندو. گهرو وزير چيو ته ڳجهن ادارن جي رپورٽ موجب 30 نومبر تي پي ٽي آءِ جي جلسي ۾ دهشتگردي جو خدشو آهي، سيڪيورٽي لاءِ واڪ ٿرو دروازا لڳايا ويا آهن ۽ پرائيويٽ سيڪيورٽي گارڊز ذريعي جلسي ۾ شرڪت ڪندڙن جي تلاشي ورتي ويندي. هن چيو ته معاهدي موجب پي ٽي آءِ رات 11لڳي 59 منٽن تي جلسو ختم ڪندي ۽ جلسي ختم ٿيڻ بعد فوري طور  اسٽيج کي هٽايو ويندو. چوڌري نثار چيو ته طاهرالقادري سان حڪومت جي ڪابه ڊيل نه ٿي هئي، قادري پاڻ ڌرڻو ختم ڪري ويو هو. گهرو وزير چيو ته ڳالهين بابت بال پي ٽي آءِ جي ڪورٽ ۾ آهي ۽ اميد آهي ته 30 نومبر کانپوءِ ڳالهين جو عمل شروع ٿي ويندو.

 

سنڌ سرڪار پبلڪ سروس ڪميشن کان ڀرتين جا اختيار ڦرڻ وارين خبرن جي ترديد ڪري ڇڏي

ڪراچي (اسٽاف رپورٽر) سنڌ سرڪار، سنڌ پبلڪ سروس ڪميشن کان ڀرتين جا اختيار ڦرڻ وارين خبرن جي ترديد ڪري ڇڏي، وڏي وزير سيد قائم علي شاهه چيو آهي ته ايس پي ايس سي کان 17 ۽ ان کان مٿي گريڊ جي ڀرتين جا اختيار واپس ناهن ورتا ويا. ڪراچي مان جاري ڪيل پنهنجي بيان ۾ وڏي وزير سيد قائم علي شاهه سنڌ پبلڪ سروس ڪميشن کان ڀرتين جا اختيار ڦرڻ وارين خبرن جي ترديد ڪئي. وڏي وزير جو چوڻ هو ته 17هين ۽ ان کان مٿي گريڊ وارين ڀرتين جا اختيار سنڌ پبلڪسروس ڪميشن وٽ ئي موجود رهندا. سيد قائم علي شاهه جو چوڻ آهي ته ايس پي ايس سي کان ڀرتين جا اختيار ڦرڻ وارين خبرن ۾ ڪابه سچائي ناهي. وڏي وزير واضح ڪيو آهي ته ڏيڍ سال جي عرصي دوران رڳو پوليس کاتي ۾ 8 هزار سپاهي ڀرتي ڪيا ويا آهن. سيد قائم علي شاهه وڌيڪ چيو ته سپاهين جون ڀرتيون هر ضلعي جي جوڙيل ڪميٽين معرفت ڪيون. ٻئي طرف ناليواري آئيني ماهر بيرسٽر ضمير گهمري جو چوڻ آهي ته ڀرتين جو اختيار آئيني طور سنڌ پبلڪ سروس ڪميشن جي وٽ آهي، جنهن کان اختيار ڦريا ويا ته اهڙي عمل کي چيلينج ڪيو ويندو. بيرسٽر ضمير گهمري جو چوڻ آهي ته سنڌ پبلڪ سروس ڪميشن کان اختيار ڦرڻ وارو عمل صوبائي سرڪار کي ڪڏهن به ڦٻي نه سگهندو.

 

وزيراعظم جي پرڏيهي دورن تي 81 ڪروڙ رپيا خرچ آيو: تفصيل پڌرا

اسلام آباد (بيورو)قومي اسيمبلي جي اجلاس ۾ وزيراعظم جي پرڏيهي دورن جا تفصيل پيش ڪيا ويا آهن، پرڏيهي وزرارت جو چوڻ آهي ته وزيراعظم جي 2013 دوران پرڏيهي دورن تي 21 ڪروڙ ۽ 2014 ۾ 60 ڪروڙ رپيا خرچ آيو، جڏهن ته واپار واري وفاقي وزير خرم دستگير جو چوڻ آهي ته عرب شهزادن کي خير سگالي واري جذبي تحت شڪار جي اجازت ڏني وئي آهي. اسپيڪر اياز صادق جي صدارت هيٺ قومي اسيمبلي جو اجلاس جاري آهي، جنهن ۾ مختلف معاملن تي بحث ڪيو پيو وڃي. ايوان ۾ تحريڪ انصاف جي ميمبر اسد عمر، وزيراعظم جي پرڏيهي دورن جي خرچن وارو سوال اٿاريو، جنهن جي جواب ۾ پرڏيهي وزارت پاران لکت ۾ وزيراعظم جي پرڏيهي دورن جا تفصيل پيش ڪيا ويا. پرڏيهي وزارت ايوان کي ٻڌايو ته 2013 ۾ وزيراعظم جي پرڏيهي دورن تي 21 ڪروڙ ۽ هلندڙ سال 60 ڪروڙ 60 لک رپيا خرچ آيو آهي. اجلاس ۾ پ پ ايم اين اي نفيسه شاهه عرب شهزادن کي شڪار جي اجازت ڏيڻ وارو نقطو اٿاريو، جنهن جي جواب ۾ واپار واري وفاقي وزير خرم دستگير ايوان چيو ته ارب شهزادن کي شڪار جي اجازت واري پاليسي ڏهاڪن کان هلندي پئي اچي، اها پاليسي خير سگالي تحت آندي وئي آهي. خرم دستگير چيو ته ان پاليسي سان علائقن ۾ اسپتالون تعيمر ٿين ٿيون، ايئرپورٽ جي اڏاوت ڪئي ويندي آهي ۽ ڪيترن ئي ماڻهن کي روزگار پڻ ملندو آهي. واپار واري چيو ته جيڪڏهن ايوان چاهي ته ان معاملي تي بحث قومي اسيمبلي ۾ بحث ڪرائي سگهجي ٿو.

 

اسلام آباد انتظاميا تحريڪ انصاف کي جلسي جي اجازت ڏئي ڇڏي

اسلام آباد (م.ڊ) وفاقي گادي واري هنڌ جي انتظاميا پاڪستان تحريڪ انصاف کي اسلام آباد ۾ جلسي ڪرڻ جي اجازت ڏئي ڇڏي ۽ ان ڏس ۾ ضلعي انتظاميا ۽ تحريڪ انصاف ۾ معاهدو طئي ٿي ويو، معاهدي تحت 0 3 نومبر جو جلسو ڌرڻي واري هنڌ ٿيندو، پوليس کي ضلعي انتظاميا جي اجازت بغير ڪنهن ڪارڪن کي گرفتار ڪرڻ جي اجازت نه هوندي، ريڊ زون جي آس پاس ڪنٽينر لڳايا ويندا، اسلام آباد جي ٻين شاهراهن کي بلاڪ نه ڪيو ويندو، 0 3 نومبر واري جلسي لاءِ ٽريفڪ پلان ترتيب ڏنو ويو، جلسيگاهه اندر پاڪستان انصاف جا ڪارڪن ۽ پوليس گڏجي سيڪيورٽي جون خدمتون انجام ڏيندا، جلسي ٻاهران سيڪيورٽي جي ذميداري پوليس ۽ قانون لاڳو ڪندڙ ادارن جي هوندي، انتظاميا طرفان ان ڏس ۾ پنهنجو تحريري بيان اسلام آباد ڪورٽ ۾ جمع ڪرايو ويو. ٻئي پاسي اسلام آباد جي ضلعي انتظاميا ۽ پوليس جو چوڻ آهي ته هنن تحريڪ انصاف جي جلسي لاءِ فول پروف حفاظتي قدم مڪمل ڪري ڇڏيا آهن. ضلعي انتظاميا موجب معاهدي تحت ڪوبه ڪارڪن پاڻ سان هٿيار کڻي نه ايندو ۽ نه ئي ڪو ڪارڪن ڪنهن به رياستي عمارت يعني پارليامينٽ هائوس، ڪيبنٽ بلاڪ يا سرڪاري ٽيليويزن جي عمارت ۾ داخل ٿيندو. ياد رهي ته پاڪستان تحريڪ انصاف جي اڳواڻن اسلام آباد ۾ جلسي جي اجازت ڏيڻ ۽ ڪارڪنن کي هراسان ڪرڻ متعلق اسلام آباد هاءِ ڪورٽ ۾ درخواست ڏني هئي پرپوءِ عدالت کين گذريل ٻڌڻي دوران جلسي جي اجازت متعلق ضلعي انتظاميا سان رابطو ڪرڻ جي هدايت ڪئي هئي. ٻئي پالي راولپنڊي پوليس مختلف علائقن ۾ پاڪستان تحريڪ انصاف جي ڪارڪنن جي گهرن ۾ ڇاپا هڻي 0 0 1 کان وڌيڪ ڪارڪنن کي گرفتار ڪيو آهي، گرفتار ٿيل ماڻهو پنهنجي پارٽي ۾ متحرڪ هئا. پاڪستان تحريڪ انصاف جي مقامي قيادت انهن گرفتارين جي مذمت ڪئي آهي ۽ چيو آهي ته اهي پوليس جي ان قدم کي اعليٰ عدالتن ۾ چئلينج ڪندا.

 

ڪراچي ۾ رينجرز جي ڪارروائي، مقابلو، 4 گينگ وار مارجي ويا

ڪراچي (اسٽاف رپورٽر) ڪراچي جي علائقي لياري ۾ رينجرز جي مبينا مقابلي دوران لياري گينگ وار جا 4 ڪارندا مارجي ويا. تفصيل موجب لياري جي علائقي محمد لين ۾ رينجرز اهلڪارن گينگ وار جوابدارن جي گرفتاري لاءِ ڇاپو هنيو جتي اهلڪارن ۽ جوابدارن وچ ۾ دوبدو فائرنگ ٿي جنهن جي نتيجي ۾ 4 مبينا جوابدار مارجي ويا، مارجي ويل جوابدارن جو تعلق لياري گينگ وار جي گروهه سان آهي. مارجي ويل جوابدارن جي لاشن کي پوليس ڪاروائي لاءِ سول اسپتال پهچايو ويو. رينجرز ذريعن چيوآهي ته جوابدار فائرنگ، ڀتاخوري، اغوا براءِ تاوان جي وارڌاتن ۾ مبينا طور تي ملوث هئا.

 

سنڌ هاءِ ڪورٽ پهرين ڊسمبر کان شگر ملز هلائڻ جو حڪم ڏئي ڇڏيو

ڪراچي (اسٽاف رپورٽر) سنڌ هاءِ ڪورٽ،پهرين ڊسمبر کان شگر ملز هلائڻ جو حڪم ڏيندي صوبائي حڪومت کان کنڊ جو اگهه مقرر ڪرڻ لاءِ وڌيڪ ٻن ڏينهن جي ملهت ڏئي ڇڏي. چيف جسٽس، جسٽس مقبول باقر ۽ جسٽس شاهنواز طارق تي ٻـَڌل 2 رڪني بينچ، ميرپورخاص شگر ملز جي درخواست تي ٻــُڌڻي ڪئي. شگر ملز انتظاميه درخواست ۾ موقف اختيار ڪيو ته ڪمند جو اگهه مقرر ڪرڻ وارو اختيار شگر ملن کي ڏنو وڃي ۽ شگر ملن ڪمند جي پيڙهائي روڪڻ بابت پهرين ئي اسٽي آرڊر حاصل ڪيو هو. عدالت،موقف ٻڌڻ بعد اسٽي آرڊر پهرين ڊسمبر کان ختم ڪري شگر ملن کي ڪمند جي پيڙهائي شروع ڪرڻ جي هدايت ڪئي. سنڌ هاءِ ڪورٽ حڪم ڏنو ته ڪمند جي پيڙهائي شروع نه ڪندڙ شگر ملز خلاف ڪارروائي ڪئي ويندي. سنڌ هاءِ ڪورٽ چيف سيڪريٽري کي حڪم ڏنو ته سمورين ڌرين جي گڏجاڻي ڪوٺائي کنڊ جو اگهه پڻ مقرر ڪيو وڃي ۽ پهرين ڊسمبر تي رپورٽ ڏني وڃي .