تازيون خبرون

Daily Archives: October 17, 2014

پاڪستان امن جو خواهشمند آهي، آزادي ۽ خودمختياري تي ڪو به ٺاهه نه ڪندو: نواز شريف

لاهور (م.ڊ) وزيراعظم محمد نواز شريف صاف انداز ۾ واضح ڪيو آهي ته پاڪستان اندروني ۽ ٻاهرين ٻنهي لحاظن کان امن ۽ آتشي جو خواهشمند آهي تنهن هوندي به پنهنجي آزادي ۽ خودمختياري تي ڪو به ٺاهه نه ڪندو، حڪومت بحري حوالي سان ان خطي ۾ ٿيندڙ تبديلين کان غافل نه آهي ۽ ان جي نتيجي ۾ سامهون ايندڙ قومي معاملن کان به چڱي ريت آگاهه آهي، پاڪ بحريه هڪ قابل فخر قومي ادارو آهي، بحري حدن جي حفاظت ۽ ملڪي دفاع جي لاءِ پاڪ بحريه جي ضرورتن کي ڪڏهن به نظر انداز نه ڪيو ويندو. هن اها ڳالهه جمعي ڏينهن هتي پاڪستان نيوي وار ڪاليج بلڊنگ نيول ڪمپليڪس والٽن جي افتتاحي تقريب کي خطاب ڪندي چئي. ان موقعي تي چيف نيول آف اسٽاف ايڊمرل ذڪاءُ الله، ڪمانڊنٽ پاڪستان نيول وار ڪاليج، جنرل فليگ اينڊ ايئر آفيسرز به موجود هئا. وزيراعظم چيو ته اڄ اسان پنهنجي بقاءُ جي جنگ وڙهي رهيا آهيون ۽ هي هڪ فيصلي جو دور آهي، اسان جي بهادر هٿياربند فوج انتهاپسندي ۽ دهشتگردي جي لعنت کي سدائين جي لاءِ ختم ڪرڻ جي لاءِ جنگ ۾ مصروف آهي. ان جنگ ۾ هو بي مثال قربانيون پيش ڪري رهي آهي جنهن تي پوري قوم کي فخر آهي، وزيراعظم چيو ته اندروني ۽ ٻاهرين ٻنهي حوالن سان پاڪستان امن ۽ آشتي جو خواهشمند آهي ته جيئن اسان جي معيشت ۽ معاشرت کي ترقي حاصل ٿئي ڇو ته اسان جن قومي مقصدن جو تعين ڪيو آهي اهي ڪنهن قسم جي بدامني جي هوندي حاصل نٿا ڪري سگهجن، هن واضح ڪيو ته اسان پنهنجي آزادي ۽ خودمختياري تي ڪڏهن به ٺاهه نه ڪنداسين. هن يقين ڏياريو ته مسلسل عمل، محنت ۽ ڀرپور ڌيان سان طئي ٿيندڙ مقصد ضرور پورا ڪيا ويندا ۽ تمام جلد نتيجا اسان سڀني جي سامهون هوندا. وزيراعظم واضح ڪيو ته سامونڊي واپار جو هڪ وڏو حصو بحر هند تي ڀاڙي ٿو ۽ اسان بحري رستن جو تمام اهم حصو آهيون، جنهن ۾ ڪنهن قسم جو رخنو عالمي معيشت ۽ عالمي امن کي بري طرح متاثر ڪري سگهي ٿو، هن چيو ته پاڪستان اسٽريٽجڪ لحاظ کان بحيره عرب جي مرڪز ۾ واقع آهي جنهن ۾ ٽن براعظم ۽ ان ۾ واقع 50 ملڪ لاڳاپيل آهن جن ۾ ساحلي ۽ غير ساحلي ملڪ شامل آهن. انهن ملڪ ۾ سماجي، ماحولياتي ۽ سياسي عدم توازن جا اثر پاڪستان جي سلامتي ۽ استحڪام تي به ٿي سگهن ٿا جنهن کي نظر ۾ رکندي ان خطي ۾ اسان پنهنجو موثر ڪردار ادا ڪرڻ جي لاءِ تيار رهون ٿا. وزيراعظم ان ڳالهه تي خوشي جو اظهار ڪيو ته پاڪ بحريه کي عملي طور تي هڪ تمام موثر ۽ قابل اعتماد قوت جي طور تي تسليم ڪيو ويندو آهي جنهن سان انفرادي سطح تي ۽ گڏيل سهڪار سان گڏ بحري مشقن ۾ پنهنجي صلاحيتن جو اظهار ڪيو آهي. هن چيو ته پاڪستان نيوي جي سي ٽي ايف 150 ۽ سي ٽي ايف 151 جي بحري مشقن ۾ شرڪت کي عالمي سطح تي ساراهيو ويو آهي. ويسٽرن پيسفڪ نيول سيلپوزيم ۽ انڊين اوشن نيول سيلپوزيم جهڙن عالمي فورم ۾ شرڪت ۽ امن مشقن جو انعقاد پاڪستان نيوي جا واکاڻ جوڳا قدم آهن جڏهن ته انٽرنيشنل ميري ٽائيم ڪانفرنس منعقد ڪري پاڪستان نيوي واکاڻ جوڳو قدم کنيو آهي. هن چيو ته اهڙا قدم علائقائي ۽ قومي حوالي سان بحري معاملن تي اسٽيڪ هولڊرز لاءِ هڪ متفقه حڪمت عملي جوڙڻ ۾ مددگار ثابت ٿيندا آهن. انهن قدمن جي ڪري پاڪستان جي بحري فوج جو هڪ مثبت تاثر دنيا کي ملي ٿو جيڪو ملڪي پرڏيهي پاليسي ۽ سفارتڪاري جي لاءِ به ڪارآمد ثابت ٿيندا آهن. وزيراعظم نواز شريف چيو ته کيس هي ڄاڻي خوشي ٿي آهي ته پاڪستان نيوي ڪراچي شپ يارڊ ۾ مقامي طور تي وڏي جنگي جهاز ۽ تيزي سان حملا آور ٿيندر ڪرافٽ تيار ڪري رهي آهي، هن ان ڳالهه تي زور ڏنو ته مقامي سطح تي ۽ ٽيڪنالاجي جي منتقلي جي ذريعي سهڪاري عمل سان تعمير تي ڌيان ڏيڻ گهرجي. هن چيو ته مون کي خبر آهي ته پاڪستان نيوي تازو ئي قومي ميري ٽائيم پاليسي جوڙي آهي جنهن کي حتمي شڪل ڏني پئي وڃي جيڪو پاڪستان جي ميري ٽائيم نظريي ۽ قومي ميري ٽائيم حڪمت عملي جي وضاحت به ڪندي. انهن خدمتن کي قومي سطح تي سدائين قابل قدر حيثيت حاصل رهندي. هن اميد ظاهر ڪئي ته ان عمل سان پاڪستان ميري ٽائيم ڪلچر فروغ حاصل ڪندو. هن قومي ميري ٽائيم برادري کي خاطري ڪرائي ته حڪومت بحري حوالي سان ان خطي ۾ ٿيندڙ تبديلين کان غافل نه آهي ۽ ان جي نتيجي جي سامهون ايندڙ قومي معاملن کان به چڱي ريت آگاهه آهي. وزيراعظم چيو ته پلاننگ ڪميشن پاڪستان جي لاءِ هڪ ميري ٽائيم ويزن جوڙي رهيو آهي. هن ياد ڏياريو ته پاڪستان جي پهرين شپنگ پاليسي به سندس وزارت عظميٰ جي پهرين دور ۾ بڻائي وئي هئي. وزيراعظم ٻڌايو ته حڪومت گوادر پورٽ کي جلد کان جلد پوري طرح فعال بڻائڻ جي لاءِ سرگرم عمل آهي. گوادر کان شغر شاهراهه جي تعمير جو منصوبو به شروع ڪيو پيو وڃي. پاڪ چائنه اڪنامڪ ڪوريڊور جي حوالي سان ڪيترائي منصوبا عمل هيٺ آهن جيڪي پنهنجي اهميت ۽ ماليت جي لحاظ کان قابل ذڪر حيثيت رکندڙ آهن. نئين ايئرپورٽ، ايڪسپريس وي ۽ گوادر ۾ بجلي گهر جي تعمير جو مثال پيش ڪندي هن چيو ته معيار جي اعتبار سان گوادر کي عالمي سطح جي بندرگاهه بڻايو وڃي جنهن تي اعليٰ پيماني تي مواصلاتي سهولتن، معاونت ۽ شهري سهولتون دستياب هجن. هي بندرگاهه پاڪستان جي بحري، واپاري ۽ معاشرتي ترقي لاءِ ڪردار ادا ڪرڻ سان گڏوگڏ پوري خطي ۾ ترقياتي عمل کي تيز ڪندو. وزيراعظم پاڪستان نيوي وار ڪاليج لاهور جي عمارت جي افتتاح تي خوشي جو اظهار ڪندي چيو ته کيس يقين آهي ته ان پروقار عمارت ۾ پاڪستان نيوي جي وڌندڙ تربيتي ضرورتن کي پورو ڪرڻ جي خاطر خواه گنجائش موجود آهي. هن چيو ته ساحل کان تمام گهڻو پري هي عمارت لاهور ۾ واقع هجڻ جي باوجود پاڪستان نيوي جي صلاحيتن ۾ اضافي جي لاءِ بهترين ڪردار رکندي هوندي. هي صلاحيت پاڪستان جي ساحلي سرحدن جي نگراني ۽ حفاظت جي ضامن هوندي.، وزيراعظم ان خاطري جو اظهار ڪيو ته پاڪستان نيوي وار ڪاليج جي نئين سر تعمير جديد عمارت تاريخي اعتبار سان مثالي روايتن جي بنيادن تي تعمير ڪئي وئي آهي جيڪا قوم جي بحري مفادن ۽ وسيع تر مقصدن جي پڄاڻي ۾ پنهنجو ڪردار ادا ڪندي. هن ان اعتماد جو اظهار ڪيو ته پاڪستان نيوي وار ڪاليج دوست ملڪن جي آفيسرن کي تربيت فراهم ڪري انهن رشتن کي مستحڪم ڪندو جيڪو اسان جي پرڏيهي لاڳاپين لاءِ اهميت رکن ٿا ۽ ان سان گڏوگڏ بحري معاملن جي حوالي سان علمي حلقن به آگاهي کي فروغ ملندو. وزيراعظم نواز شريف چيو ته هو ان ڳالهه کان چڱي ريت آگاهه آهي ته پاڪستان نيوي جي ضرورتن جي مقابلي ۾ وسيلا ناڪافي آهن تنهن هوندي به هن خاطري ڪرائي ته بحري حدون جي حفاظت ۽ ملڪي دفاع جي لاءِ پاڪ بحريه جي ضرورتن کي ڪڏهن به نظر انداز نه ڪيو ويندو ۽ وسيلن جي فراهمي ضرور هوندي ڇو ته هي وقت جي گهرج آهي ۽ پاڪستان نيوي اسان جو هڪ قابل فخر ادارو آهي. وزيراعظم چيف آف نيول اسٽاف، پاڪستان نيوي جي آفيسرن ۽ سيلرز کي مبارڪباد پيش ڪئي جنهن مختصر وقت ۾ ان واکاڻ جوڳي منصوبي جي تڪميل کي ممڪن بڻايو. ان کان اڳ وزيراعظم تختي جو پردو هٽائي پاڪستان نيوي وار ڪاليج جي عمارت جو افتتاح ڪيو.

 

ڪراچي ۾ پ پ جو سمنڊ اڄ اٿلندو، 30 هزار کان وڌيڪ اهلڪار مقرر

ڪراچي (اسٽاف رپورٽر) پيپلز پارٽي طرفان اڄ ڪراچي ۾ رٿيل جلسي جون تياريون چوٽ چڙهيل آهن، ملڪ جي ڪنڊ ڪڙڇ ۽ آزاد ڪشمير مان قافلن جي آمد جو سلسلو جاري آهي،جڏهن ته سڪيورٽي خدشن سبب اڄ ڪراچي ۾ موبائل فون سروس بند رکي ويندي. ڪراچيءَ ۾ قائداعظم جي مزار ٻاهران روڊن رستن ۽ چوڪن سميت جلسي گاهه کي پي پي جي جهنڊن ۽ بينرز سان سينگاريو ويو آهي،جڏهن ته سڪيورٽي جا انتظام به سخت ڪيا ويا آهن. سنڌ حڪومت سڪيورٽي خدشن سبب سڀاڻي ڪراچي ۾ موبائل فون سروس بند رکڻ جي منظوري ڏئي ڇڏي آهي. جلسي جي حوالي سان پوليس ايمرجنسي سڪيورٽي پلان تيار ڪري ورتو آهي جنهن تحت جلسي ۾ آپگهاتي حملي جو خدشو آهي. پوليس جي سڪيورٽي پلان موجب جلسي گاهه ۾ موبائل فون ۽ پاڻي جون بوتلون آڻڻ تي پابندي هوندي. جناح گرائونڊ جي چوڌاري ڪنٽينر لڳائي جلسي گاهه جي سڪيورٽي سخت ڪئي وئي آهي جڏهن ته ان کان اڳ حساس علائقن ۾ سرچ آپريشن به ڪيو ويو. پ پ جي جلسي لاءِ سنڌ پوليس جا 22 هزار 500 اهلڪار سڪيورٽي جا انتظام سنڀاليندا جڏهن ته سنڌ ريزو پوليس ۽ رينجرز جي واڌو نفري به طلب ڪئي وئي آهي. ايڊيشنل آءِ جي پوليس غلام قادر ٿيٻو سڪيورٽي جي نگراني جا فرض سنڀاليندو. ان کانسواءِ ڪارساز پل،پيپلز چورنگي سميت شهر جي ٻين علائقن، مک روڊن ۽ چوراهن تي ڪارڪنن طرفان آجيان واريون ڪئمپون پڻ لڳايون ويون آهن. ڪراچي جي مختلف علائقن ۾ قائم ڪيل ڪيمپن تي جيالن جي سڄو ڏينهن رش لڳل رهي ٿي، جتي دلان تير بجا ۽ ٻين پارٽي جي گيتن تي نوجوان رقص ڪندا رهن ٿا.20 فٽ اوچو ۽ 320 فٽ ڊگهو اسٽيج تيار ڪيو ويو، سيڪيورٽي جا غيرمعمولي انتظام ڪيا ويا آهن، جڏهن ته سڄي ملڪ مان هزازين قافلا جلسي ۾ شرڪت لاءِ روانا ٿي ويا آهن، ڪيتريون ئي استقباليه ڪئمپون به لڳايون ويون آهن. پيپلز پارٽي طرفان سڀاڻي ڪراچي ۾ جناح باغ ۾ رٿيل جلسي جون تياريون آخري مرحلي ۾ داخل ٿي ويون آهن، 24 ڪنٽينرز ذريعي 20 فٽ اوچو ۽ 320 فٽ ڊگهو اسٽيج تيار ڪيو ويو آهي. جلسي لاءِ سيڪيورٽي انتظام انتهائي سخت ڪيا ويا آهن، جلسي لاءِ 30 هزار کان وڌيڪ اهلڪار مقرر ڪيا ويا آهن، جنهن ۾ رينجرز ۽ ڪمانڊوز به شامل آهن… جلسي گاهه ۽ آس پاس وارن علائقن ۾ 2 سئو کان وڌيڪ ڳجهون ڪئمرائون لڳايون ويون ۽ جلسي کي مانيٽر ڪرڻ لاءِ بس ڪنٽرول روم پڻ ٺاهيا ويا آهن. جلسي گاهه ڏانهن ايندڙ ويندڙ رستن نمائش چورنگي، شاهراه قائدين، پيپلز سيڪريٽريٽ، لائينز ايريا ۽ ٻين روڊن کي ڪنٽينر رکي سيل ڪيو ويو آهي، آس پاس وارا روڊ رستا سيل ڪري واڪ ٿرو گيٽ پڻ لڳايا ويا آهن… جلسي گاهه ۾ شرڪت لاءِ 6 گيٽ ٺاهيا ويا آهن، هر گيٽ تي ڊي آءِ جي رينڪ جو آفيسر مقرر هوندو.. گاڏين جي پارڪنگ جو بندوبست پڻ جلسي گاهه کان 2 ڪلوميٽر پري ڪيو ويو آهي، جلسي ۾ ڊرون ڪئرامون اڏائڻ تي پڻ پابندي لڳائي وئي آهي. جلسي گاهه ۾ پيپلز پارٽي جي ڪارڪنن جو وڏو انگ موجود آهي، جتي ميلي وارو سماءَ نظر اچي رهيو آهي… سڄي ملڪ مان پ پ جا هزارين قافلا جلسي ۾ شرڪت لاءِ ڪراچي ڏانهن روانا ٿي چڪا آهن، جڏهن ته ڪيترن ئي شهرن ۾ استقباليه ڪئمپون پڻ لڳايون ويون آهن..

 

هوشو شيدي جي نقش قدم تي هلندي ڌرتي لاءِ ان وانگر ئي جدوجهد ڪرڻ چاهيان ٿو: بلاول ڀٽو

حيدرآباد (بيورو) پ پ چيئرمين بلاول ڀٽو زرداري حيدرآباد ويجهو سنڌ جي عظيم مزاحمتي ڪردار شهيد هوش محمد شيديءَ جي مزار تي حاضري ڀري گلن جي چادر چاڙهي دعا گهري ، سندس آمد کان اڳ سيڪيورٽي جا انتظام انتهائي سخت ڪيا ويا هئا. ڳوٺ ٻڍي سيال ۾ بلاول ڀٽو زرداري جي آمد سلسلي ۾ سيڪيورٽي جا انتظام سخت ڪندي ايندڙ ويندڙ رستا سيل ڪيا ويا هئا. پ پ چيئرمين بلاول ڀٽو زرداري جي آجيان لاءِ پ پ اڳواڻ مولا بخش چانڊيو، زاهد ڀرڳڙي، سڪندر شورو، ڄام خان شورو، علي محمد سهتو ۽ ٻيا اڳواڻ به پهتا هئا. ٻئي طرف بلاول ڀٽو زرداري کي ڏسڻ لاءِ ڀرپاسي جي ڳوٺن جا رهواسي وڏي انگ ۾ شهيد هوش محمد شيديءَ جي مزار وٽ پهتا هئا. پ پ پ  چيئرمين بلاول ڀٽو زرداري چيو آهي ته اڄ هو شهيد هوش محمد شيدي جي مزار تي حاضري ڀرڻ  لاءِ آيو آهي، ڇاڪاڻ ته  هوش محمد شيدي پنهنجي ڌرتي لاءِ قرباني ڏيڻ  جو هڪ لازوال مثال آهي، هن چيو ته  هو پڻ هوش محمد شيدي جي نقش قدم تي هلندي ڌرتي لاءِ ان وانگر ئي جدوجهد ڪرڻ چاهي ٿو ۽ هو قرباني جي اهڙي جذبي سان سرشار آهي. اهڙو اظهار هن اڄ حيدرآباد ٻهراڙي تعلقي جي ڳوٺ ٻڍو سيال ديهه ناريجاڻي ۾ واقع هوش محمد شيدي جي مزار تي حاضري ڀرڻ ۽ چادر چاڙهي فاتحه ڪرڻ  بعد صحافين سان  ڳالهائيندي ڪيو. هن چيو ته سنڌ ۽  ملڪ لاءِ ڪراچي  تاج جي ڪوهه نور هيري وانگر آهي ۽ پاڪستان جي دل  جي ڌڙڪن  آهي جيڪو ملڪ کي تمام گهڻي آمدني ڏيندڙ شهرآهي تنهنڪري ڪراچي ۾ جلسو منعقد ڪيو پيو وڃي. ان موقعي تي بلاول ڀٽو زرداري عوامي ميڙ سامهون سنڌي ۽ اردو ۾ مرسون مرسون سنڌ نه ڏيسون ۽ هلو هلو  ڪراچي هلو جا نعرا هنيا ۽ هٿ لوڏي موجود عوام جي وڏي انگ نعرن جو پڻ جواب ڏنو. ان موقعي تي صحافين پاران پنجاب ۾ پيپلزپارٽي جون پاڙون مضبوط  ڪرڻ بابت پڇيل هڪ سوال جي جواب ۾  بلاول ڀٽو زرداري چيو ته پنجاب ۾ پ پ  جون پاڙون مضبوط  آهن ۽ ايندڙ چونڊن ۾ اهو ثابت ٿي ويندو ته پيپلزپارٽي ئي ملڪ جي واحد وڏي جمهوري پارٽي آهي جيڪا هميشه عوام جي طاقت سان اقتدار ۾ ايندي آهي ۽ پيپلزپارٽي ڪڏهن به ڌانڌلي يا چور دروازي ذريعي اقتدار ۾ نه آئي آهي ۽ نه ئي ان ڳالهه ۾ يقين رکي ٿي. هن وڌيڪ چيو ته  پنجاب ۾ پيپلزپارٽي کي سياسي دجال ۽ طالبان جي ذريعي  پٺتي ڪرڻ جي ناڪام ڪوشش ڪئي پئي وڃي پر سڀاڻي واري جلسي کانپوءِ سڀني کي جواب ملي ويندو ته آئون هاڻي اهڙين قوتن سان ڇا ٿو ڪيان! هن چيو ته عوام سندس قيادت ۾ متحد ۽ متحرڪ آهي ۽ عوام کي ڪڏهن به مايوس نه ٿيندي_ ان موقعي تي صحافين پاران بلاول ڀٽو زرداري کي پريس ڪلب حيدرآباد جو دورو ڪرڻ جي دعوت ڏيندي ٻڌايو ويو ته شهيد ذوالفقار علي ڀٽو ۽ شهيد محترمه بينظير ڀٽو حيدرآباد پريس ڪلب جا اعزازي ميمبر رهي چڪا آهن ۽ هن کي به حيدرآباد پريس ڪلب جو دورو ڪرڻ گهرجي جنهن تي بلاول ڀٽو زرداري يقين ڏياريو ته هو جلسي کانپوءِ جلد ئي حيدرآباد پريس ڪلب جو دورو ڪندو ۽ صحافين سان ملاقات ڪندو. ان موقعي تي اطلاعات ۽ بلديات وارو صوبائي وزير شرجيل انعام ميمڻ، سينيٽر مولابخش چانڊيو،صوبائي وزير ڄام خان شورو، ايم پي اي ڊاڪٽر سڪندر شورو، اڳوڻا  صوبائي وزير زاهد ڀرڳڙي، پير امجد شاهه جيلاني، ڊويزنل ڪمشنر حيدرآباد آصف حيدر شاهه، ڊي آءِ جي حيدرآباد ثناا لله عباسي، ڊي سي حيدرآباد فياض احمد جتوئي، پ پ پ اڳواڻ  ٻيا  عهديدار ۽ ڪارڪن پڻ موجود هئا.

 

لفظ مهاجر گار آهي، ڪنهن جي هندوستان واپسي نٿا چاهيون: خورشيد شاهه

ڪراچي (اسٽاف رپورٽر) پاڪستان پيپلزپارٽي جي مرڪزي اڳواڻ ۽ قومي اسيمبلي ۾ مخالف ڌر اڳواڻ سيد خورشيد احمد شاهه چيو آهي ته مهاجر لفظ گار آهي، اهو استعمال نه ڪيو مهاجر اهي هوندا آهن جيڪي ڪئمپن ۾ رهن اسان سڀني کي پاڻ سان گڏ رهائينداسين ڪنهن جي هندستان واپسي نٿا چاهيون عمران خان معصوم آهي ۽ سياست ۾ نئون نئون آيو آهي انهن جي الزامن جو مان ڇا جواب ڏيان هن مون تي جيڪي الزام مڙهيا هئا انهن الزامن تي معافيوٺڻ لاءِ نوٽيس اماڻي ڇڏيو آهي 14 ڏينهن ۾ جواب نه ڏنو ويو ته پوءِ ايندڙ حڪمت عملي جو اعلان ڪندس هو جمعي تي جناح باغ جي دوري جي موقعي تي ميڊيا سان ڳالهه ٻولهه ڪري رهيو هو خورشيد شاهه چيو ته پيپلزپارٽي جي جلسي ۾ سرڪاري وسيلا استعمال نه ڪيا پيا وڃن ميڊيا وارا جلسي جا انتظام ڪندڙن کان پڇي سگهن ٿا ته انهن کي پئسو سنڌ حڪومت ڏيئي رهي آهي يا پيپلزپارٽي هن چيو ته سيد قائم علي شاهه صوبي جي عوام جي ترقي لاءِ فنڊ جاري ڪري ٿو پر پارٽي لاءِ جاري نٿو ڪري هي فقط پروپيگنڊا آهن هڪ سوال جي جواب ۾ هن چيو ته الطاف حسين پاران پيپلزپارٽي جي جلسي کي خوش آئيند قرار ڏيڻ بهترين قدم آهي سياسي طاقتون هڪٻئي جو احترام ڪن ٿيون هي بهتر عمل آهي سنڌ ۾ انتظامي يونٽن جي حوالي سان هن چيو ته سنڌ ۾ رهندڙ جيڪي ماڻهو پنهنجو پاڻ کي مهاجر سمجهن ٿا مان مهاجر کي گار سمجهان ٿو ڇو ته مهاجر اهو هوندو آهي جنهن کي پنهنجو گهرگهاٽ ناهي هوندو ۽ اهو ڪئمپن ۾ رهندو آهي هندستان مان جيڪي ماڻهو لڏپلاڻ ڪري سنڌ ۾ آيا اهي سڀ هتان جا رهواسي آهن ۽ اسان ئي انهن کي پنهنجا گهر ڏنا اهي اسان جا ڀائر آهن انهن جو جيئڻ مرڻ هاڻي اسان سان ۽ سنڌ سان آهي انهن کي پنهنجو پاڻ کي مهاجر نه چوڻ گهرجي ۽ نه سمجهڻ گهرجي هن چيو ته هر مسئلي جو حل ڳالهه ٻولهه آهي الطاف بادشاهه ماڻهو آهي انهن جي بيانن کي اسان خراب نٿا سمجهون خورشيد شاهه چيو ته اسان جو جلسو ڪنهن جي حق يا مخالفت ۾ نه آهي 18 آڪٽوبر جي شيهدن کي خراج عقيدت پيش ڪرڻ لاءِ جلسو ڪري رهيا آهيون جلسي ۽ بلاول ڀٽو جي سيڪيورٽي جي حوالي سان پڇيل سوال جي جواب ۾ خورشيد شاهه جو چوڻ هو ته الله تعاليٰ جي ذات اسان جي حفاظت ڪندي خورشيد شاهه چيوته ملتان جي اليڪشن ۾ پارٽي جمهوريت لاءِ حصو ورتو ڇو ته بينظير ڀٽو چوندي هئي ته اليڪشن ڪنهن به طرح جي هجي پر ميدان خالي نه ڇڏجي ان کان پوءِ رحمان ملڪ ۽ جهانگير بدر به جلسي واري هنڌ جو دورو ڪيو ۽ انتظامن جو جائزو ورتو ان موقعي تي ميڊيا سان ڳالهائيندي رحمان ملڪ چيوته ملتان ۾ عامر ڊوگر جي ڪاميابي پيپلزپارٽي جي ڪري ئي ٿي آهي ڇو ته ماضي ۾ سندس واسطو پيپلزپارٽي سان هو پيپلزپارٽي ته اليڪشن مهم هلائي ئي نه آهي هڪ سوال ۾ هن چيو ته ملڪ کي نوجوان قيادت جي ضرورت آهي 63 سالن جي ڄمار ۾ پاڻ کي نوجوان سمجهندڙ پوڙهي کي نوجوان قيادت کي اڳتي آڻڻ گهرجي پيپلزپارٽي جو جلسو تاريخي هوندو ۽ عوام بلاول ڀٽو جو تاريخي استقبال ڪندو ان موقعي تي جهانگير بدر چيو ته پاڪستان جي سياست ۾ ٽين اڳڀرائي بلاول ڀٽو زرداري ڪئي آهي ۽ بلاول ڀٽو زرداري جي ئي اڳواڻي ۾ ئي پيپلزپارٽي فتح حاصل ڪندي.

 

پاڪستان ايران طرفان لڳايل دهشتگردي جي الزامن کي رد ڪري ڇڏيو

اسلام آباد(بيورو) پاڪستان جون هٿياربند فوجون اتر وزيرستان ۾ دهشتگردن خلاف ڪاميابي سان آپريشن ڪري رهيون آهن ۽ پاڪستان عالمي برادري تي زور ڀري ٿو ته اها به دهشتگردي جي پاڙ پٽڻ لاءِ پاڪستان جو ساٿ ڏئي. پرڏيهي آفيس جي ترجمان تسنيم اسلم جمعي ڏينهن هتي هفتيوار ميڊيا بريفنگ ڏيندي چيو ته دهشتگردي هڪ عالمي خطرو آهي ۽ اسان کي ان برائي کي ختم ڪرڻ لاءِ گڏيل ڪوششون ڪرڻ جي ضرورت آهي. هڪ سوال جو جواب ڏيندي پرڏيهي ترجمان چيو ته ايران ۽ پاڪستان وچ ۾ دهشتگردي جي واقعن تي ڳالهيون ڪرڻ جو ميڪانزم موجود آهي، ٻئي ملڪ هڪ ٻئي جا پاڙيسري آهن ۽ انهن جا هڪ ٻئي سان بهترين دلي ناتا آهن. ايران جي اسلامڪ رولوليوشن گارڊز ڪور جي ڊپٽي ڪمانڊر طرفان ڏنل بيان بابت سوال جو جواب ڏيندي تسنيم اسلم چيو ته اسان کي اهڙن واقعن تي تڪڙو رد عمل ظاهر نه ڪرڻ گهرجي خاص طور تي ان وقت جڏهن ڪو ثبوت ۽ شاهديون نه هجن. هن ايران تي زور ڀريو ته اهو دهشتگردي جي لعنت کي ختم ڪرڻ لاءِ دهشتگردي بابت ثبوت پاڪستان سان شيئر ڪري. هن چيو ته گذريل ڀيري پاڪستان تي ايراني گارڊز جي اغوا جو الزام هنيو ويو جيڪو غلط ثابت ٿيو. هن چيو ته اهو واقعو ايران جي حدن اندر پيش آيو. لائين آف ڪنٽرول تي ٿيندڙ خلاف ورزين بابت پرڏيهي ترجمان چيو ته ڀارتي فوج جي بنا جواز فائرنگ جي واقعن ۾ 12 پاڪستاني شهيد جڏهن ته 52 زخمي ٿيا آهن. هن چيو ته عالمي برادري به لائين آف ڪنٽرول ۽ ورڪنگ بائونڊري وٽ ٿيل خلاف ورزين تي تحفظات جو اظهار ڪيو آهي. پرڏيهي ترجمان ڀارتي اختيارين تي زور ڀريو ته اهي ڳالهين جي ميز تي اچن ۽ ڪشمير سميت تڪراري مسئلن بابت ڳالهيون ڪن. هن چيو ته پاڪستان خطي ۾ هٿيارن جي ڊوڙ جي حمايت نه ٿو ڪري ڇو ته ان خطي کي جنگ نه امن جي ضرورت آهي. تسنيم اسلم چيو ته پاڪستان دهشتگردي خلاف جنگ پنهجي مفاد ۾ شروع ڪئي ۽ اهو يقين به ڏياريو ته ان جي سرزمين کي ڪنهن به ملڪ خلاف استعمال ڪرڻ نه ڏنو ويندو ۽ ان حوالي سان برابري جي بنياد تي ملندڙ جواب دهشتگردي خلاف جاري ڪوششن کي وڌيڪ اثرائتو بڻائيندو. هن ڪاسا-1000 منصوبي جي حوالي سان ٿيل اڳڀرائي جي آجيان ڪندي چيو ته پاڪستان ۽ افغانستان وچ ۾ ٿيل ان معاهدي سان علائقائي ڳانڍاپي جو مسئلو حل ڪرڻ ۾ مدد ملندي. اهو منصوبو پاڪستان جو توانائي جون ضرورتون پوريون ڪرڻ سان گڏوگڏ افغانستان جي معاشي ترقي جي حوالي سان به اهم آهي. پرڏيهي ترجمان سوئيڊن طرفان فلسطين کي تسليم ڪرڻ ۽ برطانوي پارليامينٽ ۾ ٺهراءَ جي منظوري کي اهم اڳڀرائيون قرار ڏنو. هن چيو ته دنيا اهو محسوس ڪرڻ شروع ڪيو آهي ته فلسطين هڪ آزاد ۽ خود مختيار رياست آهي. ايبولا وائرس جي حوالي سان پرڏيهي ترجمان چيو ته پاڪستان جا پرڏيهه خاص طور تي ايبولا کان متاثر ملڪن ۾ سفارتي ۽ امن برقرار رکڻ لاءِ مقرر مشن صحت جي عالمي اداري (ڊبليو ايچ او) طرفان ڏنل رهنما اصولن تي عمل ڪري رهيا آهن. تسنيم اسلم چيو ته پاڪستان به ان وائرس جي ملڪ اندر ڦهلاءَ کي روڪڻ لاءِ حفاظتي اپاءَ ورتا آهن

 

وڏي وزير ۽ سنڌ هائر ايجوڪيشن ڪميشن جي چيئرمين جي گورنر سنڌ سان ملاقات

ڪراچي (اسٽاف رپورٽر) سنڌ جي وڏي وزير سنڌ هائر ايجوڪيشن جي چيئرمين ڊاڪٽر عاصم سان گڏ گذريل رات گورنر هائوس ۾ ڊاڪٽر عشرت العباد خان سان ملاقات ڪئي ملاقات ۾ صوبي ۾ جاري صورتحال ۽ اعليٰ تعليم جي حوالي سان تفصيلي ڳالهه ٻولهه ڪئي ويئي ٽنهي اڳواڻن ان ڳالهه تي اتفاق ڪيو ته صوبي ۾ هائر ايجوڪيشن کي خاص اهميت ڏني ويندي ۽ تعليم جو معيار بهتر کان بهتر بنائڻ لاءِ وسيلا وڌايا ويندا ۽ ادارن کي ميرٽ جو نمونو بڻايو ويندو هن صوبي ۾ ترقياتي ڪمن ۾ تيزي آڻڻ ۽ انهن لاءِ ضروري فنڊ جاري ڪرڻ جو عزم به ڪيو هن ان ڳالهه جو به اشارو ڏنو ته پيشاوراڻي تعليم کي وڌ کان وڌ زميني حقيقتن سان جوڙي شاگردن لاءِ روزگار جا بهتر ذريعا پيدا ڪيا ويندا هن انجينيئرنگ ۽ سوشل سائنسز ۽ ايگريڪلچر جي يونيورسٽين ۾ عملي امتحان کي انڊسٽري اورنٽيڊ بنائڻ تي به اتفاق ڪيو هن چيو ته يونيورسٽي جي سطح تي ريچرس ۽ ڊيولپمينٽ کي وڌيڪ فعال بڻايو ويندو ۽ جاچ مقالن تي عملي صورت ڏيڻ تي غور ڪيو ويو ته جيئن اعليٰ نوعيت جا مقالا جن کي بين الاقوامي شهرت حاصل هوندي ان تي عمل ڪري بهتري نتيجا حاصل ڪري سگهجن

 

ملتان ۾ جيڪو ڪجهه ٿيو اُهو نواز-زرداري لاءِ وڏو سبق آهي: عمران خان

سرگوڌا (مانيٽرنگ ڊيسڪ) تحريڪ انصاف جي سربراهه عمران خان چيو آهي ته نواز شريف ۽ زرداري ٻئي گڏجي ملڪ جو ٻيڙو ٻوڙي رهيا آهن انهن ٻنهي پنهنجن حڪومتي دورن ۾ اربين روپيا ڪرپشن ذريعي گڏ ڪيا ۽ هاڻ ان مان جاوا ڪري رهيا آهن عمران خان چيو ته نواز شريف جي دور ۾ بجلي جو اگهه 80 سيڪڙو وڌي ويو آهي ۽ هن حڪومت سنڀالڻ شرط بجلي ڪمپنين کي سرڪلر ڊيبٽ جي نالي تي 300 ارب روپيا ڏنا پر نه ڪو اهو قرض لٿو ۽ نه ئي لوڊشيڊنگ ختم ٿي ۽ ڏيڍ سال اندر اهو ساڳيو قرض هاڻي وڌي 500 ارب تائين پهچي چڪو آهي ۽ نواز شريف وري ٻيون ڀيرو اهو قرض واپس ڪرڻ جي بهاني تي کين اربين روپيا رشوت ڏيڻ جو پروگرام ٺاهي رهيو آهي عمران خان چيو ته 6 سال اڳ ملڪ جي شهري تي گڏيل طور تي 36 هزار روپيا پرڏيهي قرض هو جيڪو وڌي هن وقت 86 هزار روپيا ٿي چڪو آهي هن ن ليگ ۽ پ پ جي ڪارڪنن کان پڇو ته ڇا هو پنهنجو مستقبل سنوارڻ نٿا چاهين ۽ جيڪڏهن چاهين ٿا ته پوءِ انهن ٻنهي ڪرپٽ سياستدانن جي پويان ڇو لڳا پيا آهن عمران خان چيو ته زرداري مون کان پڇي ٿو ته مون ايترو پئسو ڪٿان آندو مون ته ڪرڪيٽ کيڏي ۽ ٻيا ڪم ڪري اهو پئسو ڪمايو پر هو پاڻ ته ٻڌائي ته بنا ڪم ڪار جي هن ايڏي ملڪيت ڪيئن ٺاهي جو هاڻي ملڪ جي هر صوبي ۾ نوان نوان بلاول هائوس ٺهي رهيا آهن دنيا جي هر ملڪ ۾ زرداري جو گهر آهي ۽ هر ملڪ جي بينڪ ۾ سندس پئسا پيا آهن هن زرداري کي چيو ته هو ماڻهن کي اهو گر ٻڌائي جنهن سان بنا ڪم ڪار جي پئسا ٺاهبا آهن ۽ يونيورسٽي ۾ اهڙو ڪو خاص ليڪچر ڏئي ته جيئن ماڻهن کي خبر پوي ته بنا محنت جي پئسو ڪيئن ڪمائبو آهي عمران خان چيو ته نواز شريف جي حالت اها ته هو چوي ٿو ته آئون ڀينگيو آهيان ۽ مون وٽ پئسا ئي ناهن منهنجا پٽ ٻاهران مون کي پئسا موڪليندا آهن جنهن جي ڪري آئون پنهنجو خرچ هلائيندو آهيان هن چيو ته آئون پنهنجي ماءُ جي گهر ۾ رهندو آهيان ۽ 6 سال اڳ هن رڳو 5 هزار روپيا ٽيڪس ڀريو پر خبر نٿي پوي ته هيڏي وڏي حڪومت هلائيندي به هو ايترو غريب ڇو آهي جڏهن ته سندس پٽ جو لنڊن ۾ رڳو هڪ ئي فليٽ 8 ارب روپين جو آهي ۽ هو اتي جيڪو ڪاروبار ڪري ٿو ان تي 200 ارب روپيا ڏئي ٿو هن چيو ته نواز شريف ۽ زرداري ٻئي هڪ ٻئي سان ڪوڙي جنگ وڙهي رهيا آهن نه ته اهي اندر ۾ مليل آهن عمران خان نواز شريف کي چئلينج ڪيو ته هن جيڪو ڪجهه خيبرپختونخواهه ۾ ترقياتي ڪم ڪيو اوترو رڳو پنجاب ۾ ڪري ڏيکاري عمران خان اعلان ڪيو ته هو ايندڙ جلسو گجرات ۾ ڪندو جنهن کانپوءِ جو اعلان اتي ڪيو ويندو.

 

پاڪ فوج جو خيبر ايجنسي ۾ آپريشن ”خيبر ون“ جو آغاز، 0 1 دهشتگرد مارجي ويا ، ڪيترائي زخمي، ٺڪاڻا تباهه

خيبر ايجنسي (م.ڊ) سيڪيورٽي فورسز خيبر ايجنسي جي علائقي باڙا ۾ آپريشن ”خيبر ون“ جو آغاز ڪري ڇڏيو جنهن دوران سپاهه ۾ شدت پسندن جا ٺڪاڻا تباهه ڪيا ويا. تفصيل موجب خيبر ايجنسي ۾ عسڪريت پسندن جي وڌندڙ ڪارواين بعد پاڪ فوج جمعي ڏينهن خيبر ايجنسي جي مختلف علائقن ۾ به آپريشن ”ضرب عضب خيبر ون“ شروع ڪري ڇڏيو جنهن دوران اڪاخيل ۾ سيڪيورٽي فورسز جي ڪاروائي دوران 0 1 دهشتگرد مارجي ويا جڏهن ته 0 1 شدت پسند زخمي ٿيا. هوڏانهن سپاهه ملڪ دين خيل ۽ نالا ۾ سيڪيورٽي فورسز شدت پسندن جي ٺڪاڻن کي نشانو بڻايو، آپريشن دوران سپاهه ۾ شدت پسندن جا ڪيترائي ٺڪاڻا تباهه ڪيا ويا.

 

سراج الحق جو شاهه محمود قريشي سان فون تي رابطو، سياسي ڇڪتاڻ گهٽائڻ تي ڳالهيون

لاهور (م.ڊ) امير جماعت اسلامي سراج الحق اندرون سنڌ جي ٽن ڏينهن جي دوري تي روانو ٿي ويو پنهنجي دوري ۾ سراج الحق ڪنڌ ڪوٽ، جيڪب آباد، شڪارپور، لاڙڪاڻو، خيرپور ۽ سکر ۾ عوامي جلسن کي خطاب سنڌ جي اهم سياسي ۽ سماجي شخصيتن سان ملاقاتون ڪندو ذريعن موجب سراج الحق شاهه محمود قريشي سان ٽيليفون تي رابطو ڪيو ۽ کيس ملتان ۾ پي ٽي آءِ جي حمايت يافته عامر ڊگر جي اليڪشن ۾ ڪاميابي تي مبارڪباد ڏني ۽ ملڪ ۾ سياسي ڇڪتاڻ گهٽائڻ تي ڳالهيون ڪيون.

 

سنڌ حڪومت اڄ ڪراچي ۾ موبائيل فون سروس بند رکڻ جي منظوري ڏيئي ڇڏي

ڪراچي (اسٽاف رپورٽر) پاڪستان پيپلزپارٽي جي مزار قائد تي جلسي ۾ وڏي تباهي جي خدشي سبب سيڪيورٽي پلان تيار ڪيو ويو آهي جڏهن ته سنڌ حڪومت ڪراچي ۾ موبائيل فون سرڪس بند رکڻ جي منظوري ڏيئي ڇڏي آهي ذريعن موجب 18 آڪٽوبر تي پاڪستان پيپلزپارٽي جي مزار قائد لڳ جناح گرائونڊ ۾ جلسي جي حوالي سان پوليس ايمرجنسي سيڪيورٽي پلان تيار ڪري ورتو آهي جڏهن ته دهشتگردي جي خطري سبب صوبائي حڪومت ڪراچي ۾ موبائيل فون سروس بند ڪرڻ جي منظوري ڏيندي وفاق کي ان حوالي سان درخواست اماڻي ڇڏي آهي. پوليس پلان موجب جلسي ۾ آپگهاتي حملن جو خدشو آهي تنهنڪري جلسي اندر موبائيل فون ۽ پاڻي جون بوتلون آڻڻ تي پابندي هوندي پوليس ذريعن موجب آپگهاتي حملي جي خطري سبب جلسي جي ڀرپاسي 30 ايمبولينس موجود هونديون جڏهن ته 5 ايمبولنس ۽ 2 فائر ٽينڊر وي آءِ پي پارڪنگ ۾ موجود هونديون هڪ هيليڪاپٽر به اسٽينڊ باءِ هوندو پيپلزپارٽي جي جلسي لاءِ سنڌ پوليس جا 22 هزار 500 اهلڪار سيڪيورٽي جون ذميواريون نڀائيندا جڏهن ته سنڌ ريزرو پوليس ۽ رينجرز جا واڌو اٽالا پڻ گهرايا ويا آهن جڏهن ته 27 پارڪنگ جون جايون ٺاهيون ويون آهن جلسي ۾ 110 واڪ ٿرو گيٽ لڳايا ويندا جڏهن ته سي سي ٽي وي ڪئمرائن جي مدد سان جلسي گاهه جي مانيٽرنگ ڪئي ويندي ميڊيا کي جلسي دوران ڊرون ڪئميرا اڏائڻ جي اجازت نه هوندي جناح گرائونڊ جي ڀرپاسي ڪنٽينر رکي جلسي واري هنڌ جي سيڪيورٽي سخت ڪئي ويئي آهي جڏهن ته هن کان اڳ قانون لاڳو ڪندڙ ادارن پاران حساس علائقن ۾ سرچ آپريشن پڻ ڪيو ويو ايڊيشنل آءِ جي سنڌ پوليس غلام قادر ٿيٻو سيڪيورٽي جي ذميواريون نڀائيندو ان کان علاوه ٽريفڪ پوليس به ٽريفڪ جي روانگي ۽ پارڪنگ لاءِ پلان تيار ڪري ڇڏيو آهي. ٻئي پاسي پيپلزپارٽي جي جلسي سبب جمعي جي شام نمائش چورنگي کي عام ٽريفڪ لاءِ بند ڪيو ويو.