تازيون خبرون

Daily Archives: October 15, 2014

ڌرڻي وارا پهريان نئون خيبرپختونخواهه ته ٺاهين، جلد ڪيچ آئوٽ ٿي ويندا: نوازشريف

اچ شريف (م.ڊ/اين اين آءِ/اي پي پي) وزيراعظم محمد نواز شريف چيو آهي ته احتجاج ۽ ڌرڻن جي منفي سياست پاڪستان کي تمام گهڻو نقصان پهچايو آهي، ملڪ ان کي برداشت نه ٿو ڪري سگهي، نئين پاڪستان جو نعرو هڻندڙ پهرين خيبرپختونخواهه صوبي ۾ ترقي ۽ بهتري آڻي نئون خيبرپختونخواهه ٺاهين، منفي سياست کي خدا حافظ چئي ايندڙ نسل جي خوشحالي ۽ پاڪستان جي ترقي ۽ استحڪام جي لاءِ حڪومت جو ساٿ ڏنو وڃي. هن اها ڳالهه ڪالهه اربع ڏينهن هتي احمد پور شرقيه تعلقي ۾ اچ شريف جي ڳوٺ بيٽ بختياري ۾ ٻوڏ متاثرين کي خطاب ڪندي چئي. وزيراعظم چيو ته ڌرڻن ۽ احتجاج جي سياست پاڪستان جو قيمتي وقت ضايع ڪيو آهي، اهڙي قسم جي سياست ڪندڙن تمام گهڻو افسوسناڪ ڪردار ادا ڪيو آهي، ان سان سيڙپڪاري کي تمام وڏو ڌچڪو لڳو آهي. وزيراعظم نئين پاڪستان ٺاهڻ جي دعويٰ ڪندڙن کي مخاطب ٿيندي چيو ته نئين خيبرپختونخواهه ٺاهڻ کانپوءِ نئين پاڪستان ٺاهڻ جي ڳالهه ڪن، خيبرپختونخواهه ۾ گذريل هڪ سال دوران حالتون جيتريون خراب ٿيون آهن ان جو صوبي جي تاريخ ۾ پهرين ڪو مثال نه ٿو ملي. وزيراعظم منفي سياست ڪندڙن تي زور ڀريو ته هو عوام جي ايندڙ نسل جي خوشحالي، پاڪستان جي ترقي لاءِ اسان جو ساٿ ڏين، اهڙي قسم جي منفي سياست هاڻي پاڪستان ۾ نه هلندي. هن چيو ته ڪجهه سياستدان ملڪ کي پٺتي وٺي وڃڻ چاهين ٿا، اهي نه ٿا چاهين ته عوام خوشحال ٿئي، انهن جون مصيبتون ختم ٿين، غربت جو خاتمو ٿئي، نوجوان نسل تعليم حاصل ڪري ۽ پڙهي لکي سٺا شهري بڻجن، ملڪ ترقي ڪري، عام ماڻهو جي لاءِ اسڪول ۽ اسپتالون ٺهن، بيروزگاري ختم ٿئي، اهي رڳو نواز شريف جي استعيفيٰ چاهين ٿا، اهي استعيفيٰ ڇو ٿا چاهين جڏهن ته عوام جي اڪثريت نواز شريف جي حمايت ڪئي آهي. هن چيو ته عوام مسلم ليگ (ن) کي هڪ ڪروڙ 60 لک کان وڌيڪ ووٽ ڏنا آهن، ڪروڙين ماڻهو ووٽ ڏين ۽ رڳو 10 کان 30 هزار ماڻهو استعيفيٰ گهرن، اهو هن قوم سان هڪ مذاق ٿي رهيو آهي. هن چيو ته اسان ڏينهن رات ديانتداري سان قوم جي خدمت ۾ مصروف آهيون، الله چاهيو ته اسان جي حڪومت هن قوم جي ڀرپور خدمت ڪندي، 5 سالن ۾ اهڙي خدمت ڪنداسين جنهن جو مثال تاريخ ۾ نه ملندو. وزيراعظم نواز شريف چيو ته عوام جنهن محبت سان ۽ خوشي سان اسان کي ووٽ ڏنا آهن ان جو بدلو نه ٿا لاهي سگهون. هن چيو ته هو عوام جي خدمت عبادت سمجهي ڪن ته جيئن الله تعاليٰ اسان کان راضي ٿئي، الله راضي هوندو ته عوام راضي هوندو. هن چيو ته آئون ڪو منافق سياستدان نه آهيان، جيڪا ڳالهه زبان مان نڪري اها دل ۾ هجڻ گهرجي، اهو نه ته دل ۾ ڪجهه ٻيو آهي ۽ زبان تي ڪجهه ٻيو. وزيراعظم چيو ته حيف آهي انهن سياستدانن، سياسي پارٽين ۽ انهن جي اڳواڻن تي جن حق ۽ سچ جو ساٿ ڏنو آهي، پارليامينٽ جي اندر هڪ مثبت ڪردار ادا ڪيو آهي، ملڪ کي اڳيان وٺي وڃڻ جي لاءِ ڪردار ادا ڪيو آهي. وزيراعظم چيو ته مون ٻوڏ متاثر ماڻهن جي ڏکن ۾ شريڪ ٿيڻ جي لاءِ اچ شريف جو دورو ڪيو، ٻوڏ سبب اجڙي ويل گهر ڏٺا آهن، ٻوڏ سندن سڀ ڪجهه وهائي ويو، سندن چوپائي مال سان گڏوگڏ انهن جون فصلون خراب ٿيون، ڪنهن جو گهر اجڙڻ ڪا ننڍي ڳالهه نه آهي، جنهن مصيبت ۽ مشڪل مان اهي ماڻهو گذري رهيا آهن، انهن جي حوصلي جي داد ڏيان ٿو، آئون سندن ڏک ونڊڻ آيو آهيان، انهن جو حال پڇڻ آيو آهيان، منهنجو دل انهن متاثرين جي دلين سان گڏ ڌڙڪي ٿو، انهن جي گهرن کي ٻيهر تعمير ڪري رهيا آهيون، انهن کي گهرن ۾ آباد ڪرڻ تائين اطمينان سان نه ويهندس. وزيراعظم چيو ته منهنجو ضمير ۽ دل چوي ٿو ته جيستائين متاثرين آباد نه ٿا ٿين انهن سان گڏ رهو، جيتري ٿي سگهي انهن جي مدد ڪريو، هن چيو ته اها مدد انهن تي ڪو احسان يا مهرباني نه آهي، اهو انهن جو حق آهي ۽ منهنجو فرض آهي، آئون پنهنجو فرض ادا ڪرڻ جي لاءِ هتي آيو آهيان. وزيراعظم چيو ته ٻوڏ متاثرين جا گهر اجڙي وڃن ۽ آئون اسلام آباد ۾ ويهي رهان، انهن جا گهر اجڙي وڃن شهباز شيرف لاهور ۾ ويهي رهي ائين ڪڏهن به ٿو ٿي سگهي، تنهن ڪري انهن جي لاءِ ڏينهن رات منهنجو به دل تڙپي ٿو ته صبح شام انهن سان گڏ گذاريان ۽ ٻين کي به ان ڳالهه جي ترغيب ڏيان ته هو به اچي انهن جي خدمت ڪن ۽ انهن جو خيال رکن، رڳو ڌرڻن ۾ نه ويهن، وزيراعظم چيو ته ڳالهه غريبن جي ڪرڻ ۽ اسلام آباد ۾ پنهنجي محلن، اي سي ڪنٽينرن ۽ ڌرڻن ۾ ويهڻ اها ڳالهه سونهين نه ٿي. وزيراعظم ڌرڻا هڻندڙن طرف اشارو ڪندي چيو ته جيڪڏهن انهن کي هن قوم جو درد آهي ته انهن متاثرين وٽ اچي ويهن، انهن جو حال ۽ مسئلا پڇن. وزيراعظم چيو ته ٻوڏ متاثرين کي 25 هزار رپين جي پهرين قسط ملي چڪي آهي، متاثرين جي مدد ڪرڻ جي لاءِ جيتري تيزي سان ڪم ڪيو ويو ان جو ملڪ جي تاريخ ۾ ڪو مثال نه ٿو ملي، هاڻي 20 آڪٽوبر کان 25 هزار جي ٻي قسط ملندي، هن چيو ته اها ٻوڏ اوچتو آئي ۽ اچي توهان جي زمينن تي پکڙجي وئي، گهرن کي تباهه ڪيو، الله جو شڪر آهي جو هن علائقي ۾ ڪو موت نه ٿيو، گهر تباهه ٿيا آهن، جن فصلن کي نقصان پهتو آهي ان جي به سروي ٿي رهي آهي ته جيئن معاوضو ادا ڪري سگهجي. هن چيو ته حڪومت گهٽ وسيلن جي باوجود متاثرين جي ڀرپور مددي جي لاءِ پوري ڪوشش ڪري رهي آهي. ملڪ ۾ لوڊشيڊنگ جي خاتمي لاءِ حڪومتي قدمن جو ذڪر ڪندي هن چيو ته بجلي جي لاءِ بهاولپور ۾ 100 ميگاواٽ جو سولر پارڪ ٺهي رهيو آهي، ان جي سگهه کي گهٽ ۾ گهٽ 500 ميگاواٽ تائين آڻينداسين، جنهن سان نه رڳو بهاولپور پر پورو ڏکڻ پنجاب روشن ٿيندو. هن چيو ته مون کي خبر آهي ته ان سگهه کي هڪ هزار ميگاواٽ تائين وٺي وڃڻ چاهيون ٿا پر آئون احتياط سان ڳالهه ڪري رهيو آهيان. وزيراعظم هلڪي ڦلڪي انداز ۾ چيو ته ڇڪا چوڪا ناهيان هڻندو، آئون ان عمر مان ٻاهر نڪري آيو آهيان ۽ ان عمر مان ٻيا ماڻهو به ٻاهر نڪري آيا آهن پر پوءِ به ڇڪن چوڪن جي ڳالهه ڪري رهيا آهن، ڪڏهن بال بائونڊري جي اندر ڪري ٿو ۽ ڪڏهن بائونڊري تي ڪيچ ٿي وڃي ٿو، سوچي سمجهي چوڪو ڇڪو هڻڻ گهرجي، اهو سوچڻ گهرجي ته ڪيچ آئوٽ نه ٿي وڃي. وزيراعظم ملڪ جي آبادگار برادري جو ذڪر ڪندي چيو ته هو آبادگار برادري جي بهتري جو خواهشمند آهي، غريب آبادگارن جي لاءِ ڀاڻ، تيل ۽ ٻج جون قيمتون گهٽ ٿيڻ گهرجن، هن قوم جو آبادگار خوشحال هوندو ته پوري قوم خوشحال هوندي، آئون چاهيان ٿو ته هن دور ۾ آبادگارن کي خوش ڏسان. هن چيو ته انشاءَ الله هن ملڪ جي اندر تبديلي ايندي ان جي لاءِ اسان ڏينهن رات ڪم ڪري رهيا آهيون، اسان ڏينهن رات ڪم ڪري پاڪستان جي شڪل بدلائينداسين. علائقي جي لاءِ ترقياتي منصوبن جو ذڪر ڪندي وزيراعظم چيو ته انشاءَ الله بهاولپور جي هن علائقي جي ويجهو هڪ نئين موٽروي گذرندي جيڪا لاهور کان ڪراچي ويندي، انشاءَ الله هڪ نئين موٽروي ٺاهينداسين ته جيئن هتان کان ڪراچي، ملتان ۽ ڏکڻ پنجاب جي ٻين علائقن ۾ وڃي سگهن. هن ياد ڏياريو ته لاهور کان اسلام آباد ۽ لاهور کان پشاور تائين موٽروي به نواز شريف ٺاهي هئي جيڪڏهن اها ٺهي سگهي ٿي ته هي ڇو نه ٿي ٺهي سگهي؟ وزيراعظم نواز شريف چيو ته آئون سياست جي لاءِ ڪوڙ ناهيان ڳالهائيندو. ملڪ مان لوڊشيڊنگ ختم ڪنداسين، اسان کي وسيلن جي ضرورت آهي، اسان محنت ڪري وسيلا گڏ ڪنداسين، اڄ جيڪا کوٽ آهي اها 5 هزار ميگاواٽ جي لڳ ڀڳ آهي. هن چيو ته پاڪستان ۾ قتل، لاقانونيت، چوري ڌاڙن جو سدائين جي لاءِ خاتمو چاهيون ٿا. وزيراعظم احمدپور شرقيه کان اچ شريف تائين ٻن ڦارن واري رستي جي تعمير، ٻوڏ جي روڪٿام جي لاءِ بند تعمير ڪرڻ ۽ چني ڪوٽ ۾ گرلز ڪاليج قائم ڪرڻ جو اعلان ڪيو. هن ٻوڏ متاثرين جي مدد ڪرڻ تي پنجاب جي وڏي وزير شهباز شريف، پاڪ فوج جي جوانن، پوليس اهلڪارن، ريسڪيو 1122، انتظاميا ۽ مسلم ليگ (ن) جي ڪارڪنن جي ڪوشش کي ساراهيو. وزيراعظم پنهنجي خطاب مڪمل ٿيڻ تي پاڪستان زندهه آباد جو نعرو هنيو. بين الصوبائي رابطن جو وفاقي وزير رياض حسين پيرزاده، مملڪتي وزير انجنيئر بليغ الرحمان، قومي اسيمبلي ميمبر علي حسن گيلاني، صوبائي اسيمبلي ميمبر قاضي عدنان فريد ۽ ٻيا پڻ ان موقعي تي موجود هئا. ا

 

نظريه ضرورت دفن ٿي چڪو هاڻي ان کي جيئرو ٿيڻ نه ڏينداسين: سپريم ڪورٽ

اسلام آباد (بيورو) سپريم ڪورٽ ۾ وزيراعظم نوازشريف جي نااهلي بابت درخواستن جي ٻڌڻي، عدالت وزيراعظم جي اسيمبلي ۾ سرڪاري تقرير جو متن طلب ڪري ورتو، جسٽس جواد ايس خواجه چيو آهي ته وزيراعظم خلاف الزام جو سڄو دارومدار ان ڳالهه تي آهي ته ثبوت ۽ شاهد آندا وڃن، عدالتون ثبوت ڏسي فيصلا ڪنديون آهن. اسيمبلي جي ڪارروائي پبلڪ پراپرٽي هوندي آهي سڀني کي ملڻ گهرجي، عوام کي خبر پوڻ گهرجي ته سندس مستقبل جو فيصلو ڪيئن ۽ ڪٿي ٿي رهيو آهي. وزيراعظم ۽ آرمي چيف جي ملاقات ۾ جيڪي لفظ وزيراعظم چيا آهن اهي ئي اصل ثبوت آهي، صادق ۽ امين واري شق ڪنهن آندي، صادق ۽ امين هجڻ جي تقاصا صرف پارليامينٽ ناهي عدالت ذميواري پوري ڪرڻ ۾ اکيون نه ٿي پوري سگهي، آئين ۾ 62 ۽ 63 جي شق شامل ڪندڙ پاڻ غاصب هيو، اهو پاڻ صادق ۽ امين نه هيو ۽ ٻينجي صادق ۽ امين هجڻ جي ڳالهه پيو ڪري، ڪيس جو فيصلو اردو ۾ ڏنو ويندو ته جيئن عوام کي خبر پئجي سگهجي، آءِ ايس پي آر طرفان ميڊيا کي گهرائي بريفنگ ڏني ويندي آهي پر ان معاملي تي آءِ ايس پي آر پاران ٽوئيٽ ڪيو ويو، ڇا ٽوئيٽ قبولڻ جوڳي شاهدي ٿي سگهي ٿي، جيڪڏهن ڌرين کان جواب طلب ڪيو وڃي ته سچ سامهون اچي سگهي ٿو، ڏسڻو پوندو ته وزيراعظم آرمي چيف سان ملاقات ۾ ڪهڙا لفظ استعمال ڪيا، وزيراعظم جي اصل لفظن مان خبر پوندي ته ڇا صحيح آهي ڇا غلط آهي، فوج کي بدنام ڪرڻ جي معاملي تي به غور ڪيو ويندو، سپريم ڪورٽ ۾ وزيراعظم نواز شريف جي نااهلي خلاف درخواستن جي ٻڌڻي شروع ٿي وئي آهي، جسٽس جواد ايس خواجه چيو آهي ته عدالت کي وزيراعظم جي سرڪاري تقرير جو متن ڏنو وڃي، درخواست گذار گوهر نواز سنڌو جو چوڻ آهي ته هن اسيمبلي ۾ تقرير جو متن ڏيڻ جي درخواست ڪئي پر ان تي ڪوبه جواب ناهي ڏنو ويو. سپريم ڪورٽ جي ريسرچ اسٽاف تقرير جو متن وٺڻ جي ڪوشش ڪئي پر اهو نه ملي سگهيو، چوڌري نثار جي اسيمبلي ۾ تقرير سان ايئن سان لڳو ته فوج تحريڪ انصاف جي چوڻ تي وچ ۾ پئي، سياسي نه قانوني معاملو آهي عدالت فيصلو ڏئي سگهي ٿي، فوج جو ڪردار شڪي بنائڻ جي ڪوشش ڪئي وئي، گوهر نواز سنڌو، پهريان اهو ڏسڻو پوندو ته ڪنهن ڪنهن کي ڇا چيو.

 

بهتر حج انتطام حڪومت جي لاءِ اعزاز آهي: پرويز رشيد

اسلام آباد (بيورو) اطلاعات ۽ نشريات جي وفاقي وزير سينيٽر پرويز رشيد چيو آهي ته بهتر حج انتطام حڪومت جي لاءِ اعزاز آهي، وزيراعظم محمد نواز شريف مذهبي معاملن جي وفاقي وزير سردار محمد يوسف کي پاڪستانين کي حج جو فرض ادا ڪرڻ جي سهولت جي لاءِ جيڪا ذميواري ڏني هئي اها هن گذريل سال وانگر هن سال به بهتر طريقي سان انجام ڏني. ڪالهه اربع ڏينهن هتي مذهبي معاملن جي وفاقي وزير سردار محمد يوسف سان گڏيل پريس ڪانفرنس کي خطاب ڪندي هن بهتر حج انتظامن جي تفصيلن کان آگاهه ڪيو، اطلاعات واري وفاقي وزير پرويز رشيد چيو ته حاجي سڳورن جي چونڊ شفافيت ۽ اهليت ۽ پهرين اچو پهرين وٺو جي بنياد تي ڪئي وئي ۽ ان سلسلي ۾ حڪومت پاران ڪا مداخلت نه هئي. اسان حج انتظامن جي سلسلي ۾ ڪميٽي جوڙي جيڪا مولا بخش چانڊيو، شگفته جماڻي ۽ حافظ عبدالڪريم تي ٻڌل هئي جنهن پنهنجا فرض محنت سان سرانجام ڏنا. هن چيو ته وزيراعظم محمد نواز شريف جي خاص هدايتن تي مڪي شريف ۽ مدينه منوره ۾ معياري کاڌي جو اهتمام ڪيو ويو جنهن جو خرچ 82 ڪروڙ 70 لک 64 هزار رپيا حج پئڪيج ۾ شامل نه هو. هن چيو ته حاجين کي رهائش ۽ ٽرانسپورٽ جون بهتر سهولتون فراهم ڪيون ويون. شڪايتون نه هجڻ جي برابر آهن. هن چيو ته رهائش جو ڀارو جيڪو گذريل سال 3800 ريال هو ان کي گهٽ ڪري هن سال 3000 ريال ڪيو ويو. خرچن ۾ گهٽتائي سان هر حاجي کي اٽڪل 27 هزار رپيا واپس ڪيا ويا. ان موقعي تي حاجي سڳورن جي تاثرن بابت هڪ دستاويزي فلم پڻ ڏيکاري وئي جن حڪومت جي بهتر انتظامن تي ٿورن جو اظهار ڪيو ۽ چيو ته هنن اطمينان سان حج جو فرض ادا ڪيو، سمورا انتظام بهتر هئا. مذهبي معاملن جي وفاقي وزير سردار محمد يوسف چيو ته اسان بهتر حج آپريشن جي لاءِ سمورا انتظام ڪيا، وزيراعظم جي هدايتن تي ان سلسلي ۾ پورو آپريشن ڪيو ويو، سمورين ڌرين سان رابطا ڪري تجويزون حاصل ڪيون ويون جن کي حج پاليسي ۾ شامل ڪيو ويو. هن چيو ته هي هڪ مقدس فرض هو جنهن کي بهتر طريقي سان اد اڪيو ويو. گذريل سال وانگر هن سال به حج انتظام بهتر هئا. هن چيو ته سمورن پاڪستانين جي خواهش هوندي آهي ته هو ضرور حج يا عمرو ادا ڪن ۽ حڪومت ان فرض کي عبادت سمجهندي ان جي لاءِ انتظام ڪيا. هن چيو ته الله تعاليٰ جو شڪر آهي جو 2014ع جو حج آپريشن ڪاميابي سان مڪمل ٿي رهيو آهي. آخري حج فلائيٽ ايندڙ مهيني 10 نومبر تي پهچندي. هن چيو ته انهن سمورن انتظامن تي آئون حڪومت، وزيراعظم ۽ پاڪستاني عوام کي مبارڪباد ڏيان ٿو. وفاقي وزير چيو ته سعودي حڪومت پاران گذريل سال حرم شريف کي وڌائڻ سبب اسان کي پاڪستانين جي 20 سيڪڙو ڪوٽا ۾ گهٽتائي کان آگاهه ڪيو ويو هو ۽ خاطري ڪرائي وئي هئي ته ايندڙ سال وڌيڪ انگ ۾ پاڪستاني حاجين کي ڪوٽا ڏني ويندي. هن چيو ته حج سيزن شروع ٿيڻ تي رڳو هڪ ڏينهن ۾ ئي هڪ لک کان وڌيڪ حج درخواستون مليون. هن سال حج خرچن جو پئڪيج گهٽ ڪري 2 لک 73 هزار ڪيو ويو جيڪو گذريل سال ٻه لک 95 هزار هو. هر حاجي کي حج تي وڃڻ کان اڳ 27 هزار رپيا واپس ڪيا ويا. حج واري وزارت پئڪيج جو اعلان ڪيو جنهن ۾ کاڌي جو انتظام پڻ شامل هو. ڊالر جي قيمت گهٽ ٿيڻ سبب اسان کي به فائدو ٿيو ۽ حاجين جي لاءِ بهتر سهولتون فراهم ڪيون ويون. هن چيو ته سعودي عرب ۾ سمورن حاجين جي لاءِ ٽرانسپورٽ جو 24 ڪلاڪ انتظام موجود هو. ان کانسواءِ بيمار حاجين جي لاءِ اسپتال ۽ ڊسپينسريون قائم ڪيون ويون جتي پاڪستاني ڊاڪٽرن وڏي محنت سان ڪم ڪيو. وفاقي وزير چيو ته بهتر حج انتظامن تي حاجي سڳورن پاڪستاني حڪومت کي دعائون ڏنيون ۽ وزيراعظم نواز شريف زندهه آباد جا نعرا هنيا. حاجين جي لاءِ 108 عمارتون ڀاري تي ورتيون ويون، ٽرانسپورٽ جي لاءِ گذريل سال جي ڀيٽ ۾ بهتر بسون حاصل ڪيون ويون. هن چيو ته اسان ايندڙ سال حج انتظامن کي وڌيڪ بهتر بڻائڻ جا خواهشمند آهيون. هن چيو ته ڪنهن کي سرڪاري خرچ تي حج ناهي ڪرايو ويو، جيڪو اهلڪار ويو اهو مختلف فرضن جي لاءِ مقرر ڪيو ويو هو. وفاقي وزير چيو ته خادم الحرمين الشريفين حاجي سڳورن جي سهولت جي لاءِ ساراهه جوڳا انتظام ڪيا. اسان به کيس مبارڪباد ڏيون ٿا. هن چيو ته مون سعودي جي حج واري وزير سان بهتر انتظامن ۽ سهولتن تي ڳالهه ٻولهه ڪئي. اسان کي هن سال رڳو 1400 شڪايتون مليون، هڪ سوال تي هن ٻڌايو ته هن سال 71 حاجي سڳورن جي فوتگي ٿي.

 

سنڌ جو غيور عوام ڪڏهن به سنڌ کي ٻه ٽڪڙا ٿيڻ نه ڏيندو: وڏو وزير

نوشهرو فيروز(ڊ.ر) سنڌ جو وڏو وزير سيد قائم علي شاهه اربع تي ڀريا سٽي لڳ ڳوٺ دريا خان جلباني پهتو. جتي هن اڳوڻي صوبائي وزير احمد علي جلباڻي جي وفات تي سندس وارثن سان ڏک جو اظهار ڪيو. ان موقعي تي ميڊيا جي نمائندن سان ڳالهائيندي وزير اعليٰ چيوته مرحوم احمد علي جلباني اسان جي ننڍپڻ جو ساٿي هو. ۽ سندس وفات سان پيدا ٿيندڙ خلا ڪڏهن به پورو نه ٿو ٿي سگهي. هن ان موقعي تي صحافين جي سوالن جا جواب ڏيندي چيو ته 18 آڪٽوبر جو جلسو تمام وڏو هوندو ان ۾ شريڪ ٿيندڙ عوام جو اندازو لڳائڻ ڏاڍو ڏکيو آهي. نوشهروفيروز ضلعي جي روڊ رستن جي سوال جي جواب ۾ وڏي وزير چيو ته جلد اهي روڊ رستا ۽ ڊرينيج جون اسڪيمون ٺاهي ان کي بهتر ڪيو ويندو. تعليم جي بهتري لاءِ صوبائي وزير تعليم نثارکهڙو جون ڪوششون ساراهه جوڳيون آهن. سنڌ جي 46 هزار کان وڌيڪ اسڪولن کي منهن ڏيڻ هڪ چيلنج آهي. اسان جي ڪوشش آهي ته پرائمري تعليم کي عام ڪيو وڃي. ڇوته تعليم اسان جي اولين ترجيح آهي.ان لاءِ بجيٽ ۾ به ڪافي رقم رکي وئي آهي ته جئين تعليم بهتر کان بهتر ٿي سگهي. سنڌ کي ٻن حصن ۾ ورهائڻ جي سوال جي جواب ۾ سيد قائم علي شاهه چيو ته سنڌ جو غيور عوام ۽ نوجوان سنڌ کي ڪڏهن به ٻن حصن ۾ ورهائجڻ نه ڏيندا. ان موقعي تي سنڌ جو صوبائي وزير تعيلم نثار احمد کهڙو، سنڌ اسمبلي جو ميمبر سيد ابرار شاهه، پيپلز پارٽي جو تعلقي صدر شڪيل احمد جلباڻي، سليم رضا جلباڻي ۽ ٻيا پڻ موجود هئا.

 

قوم کي لاش قرار ڏيڻ تي عمران خان معافي وٺي: شرجيل ميمڻ

ڪراچي(اسٽاف رپورٽر)پاڪستان پيپلز پارٽي جي مرڪزي ڊپٽي سيڪريٽري اطلاعات ۽ سنڌ جي اطلاعات ۽ بلديات واري وزير شرجيل انعام ميمڻ چيو آهي ته 18 آڪٽوبر تي ڪراچي ۾ ٿيندڙ جلسو هڪ تاريخي جلسو هوندو، جنهن ۾ پارٽي جو چيئرمين 18 آڪٽوبر سانحي ۽ پارٽي جي ايندڙ پروگرامن جي حوالي سان خطاب ڪندو. 18 آڪٽوبر وارو جلسو ڪجهه ماڻهن کي هضم ناهي ٿي رهيو. عمران خان کي هن ملڪ ۾ بدتميزي جو ڪنهن به لائسنس ناهي ڏنو. هن ٻه ڏينهن اڳ  هن جلسي شريڪ ٿيندڙ غريب عوام کي ٻڪريون ۽ لاشن جا لقب ڏنا آهن ان تي هو قوم کان معافي وٺي. جلسي ۾ لکن جي تعداد ۾ پيپلز پارٽي جا جيالا ۽ غيرتمند عوام شريڪ ٿيندو ۽ اهو هن ملڪ جي تاريخ جو سڀ کان وڏو جلسو هوندو، جنهن لاءِ سمورا انتظام مڪمل ڪيا ويا آهن. اهڙن خيالن جو اظهار هن اربع تي جلسي گاهه جي دوري جي موقعي تي پريس ڪانفرنس کي خطاب ڪندي ڪيو. ان موقعي تي پيپلز پارٽي ڪراچي ڊويزن جو سيڪريٽري جنرل نجمي عالم، پيپلز پارٽي ڪي پي ڪي جي صدر خانزاده خان، وقار مهدي، راشد رباني، آغا سردار، منظور عباس ۽ ٻيا به ساڻس گڏ هئا . شرجيل انعام ميمڻ چيو ته ماهرن مطابق باغ جناح پاڪستان جو سڀ کان وڏو گرائونڊ آهي ۽ ان ۾ لکن جي تعداد ۾ عوام جي گنجائش موجود آهي. هن چيو ته پي پي ڪراچي ڊويزن جي تحت ان جلسي جون سموريون تياريون مڪمل ڪيون ويون آهن ۽ ان جلسي ۾ شريڪ ٿيندڙ عوام کي سيڪيورٽي ۽ ٻين سمورين سهولتن جي فراهمي کي يقيني بڻائڻ لاءِ انتظام مڪمل ڪيا ويا آهن. هن چيو ته جلسي ۾ پوري ملڪ جو غريب عوام، پورهيت، مزدور، هاري، عورتون ۽ شاگردن جي وڏي انگ ۾ شرڪت متوقع آهي ۽ اسان کي خدشو آهي ته جلسي واري ڏينهن ڪراچي جا سمورا رستا ۽ گهوٽيون عوام جو سمنڊ نه بڻجي وڃن. هن چيو ته عوام پنهنجي ليڊر بلاول ڀٽو زرداري جو تاريخي خطاب ٻڌڻ لاءِ بيتاب آهي ۽ 18 آڪٽوبر تي بلاول ڀٽو زرداري 18 آڪٽوبر واري سانحي ۽ پارٽي جي ايندڙ پروگرامن جي حوالي سان خطاب ڪندو. شرجيل ميمڻ چيو ته ڪراچي جي جلسي جي تيارين مان ڪجهه سياسي جماعتن کي اهو جلسو هضم ٿيندو نظر نٿو اچي ۽ هو ان جلسي ۾ ايندڙن کي ٻڪريون ۽ رڍون ۽ زندهه لاش جهڙا لقب ڏيڻ ۾ لڳا پيا آهن. هن چيو ته تحريڪ انصاف جو سربراهه عمران خان سياسي اڳواڻن سان بدتميزي کان پوءِ هاڻ هن ملڪ جي غريب ۽ پورهيت عوام کي جنهن انداز ۾ لقب ڏنا آهن اهي افسوس جوڳا آهن ۽ آئون مطالبو ڪريان ٿو ته عمران خان فوري طور تي پنهنجن لفظن تي عوام کان معافي گهري. شرجيل ميمڻ وڌيڪ چيو ته عمران خان کي سياستدانن جي توهين ڪرڻ جو اعزاز ته حاصل هو هاڻ کيس عوام جي توهين ڪرڻ جو به ڪريڊيٽ ملي ويو آهي. هن چيو ته غريب، پورهيتن، مزدورن، هارين ۽ شاگردن کي ٻڪريون ۽ رڍون ۽ زندهه لاش جهڙن لفظن جي استعمال سان ان جي سوچ جي ڀرپور عڪاسي ٿي وئي آهي ۽ عوام هاڻ ان جي بدتميزي کي ڪنهن صورت برداشت نه ڪندو. هڪ سوال جي جواب ۾ شرجيل انعام ميمڻ چيو ته پيپلز پارٽي هن ملڪ جي واحد سياسي جماعت آهي، جنهن عوام جي طاقت تي سياست ڪئي آهي ۽ جلسا ۽ جلوس ڪيا آهن. هن چيو ته اسان اڄ تائين نه ته ڪنهن جي اشاري تي ڊڪٽيشن تي ڪو جلسو ڪيو آهي ۽ نه ئي ڌرڻو هنيو آهي. هن چيو ته اسان جي جلسن ۽ جلوسن ۾ ڪوبه سرڪاري ملازم، پٽواري يا تپيدار ناهي بلڪ عوام جو سمنڊ هوندو آهي. هن چيو ته پيپلز پارٽي جو اهو ڪلچر ئي ناهي ته هو سرڪاري ملازمن يا ٻين کي جبري طور تي پنهنجي جلسن ۽ جلوسن ۾ آڻي. هڪ ٻي سوال جي جواب ۾ شرجيل انعام ميمڻ چيو ته جلسي جي تيارين ۾ سرڪاري مشينري جي استعمال جي خبرن ۾ ڪنهن قسم جي ڪابه صداقت ناهي. هن چيو ته ڪنهن به سياسي جماعت جو ڪراچي يا سنڌ ۾ ڪو جلسو ٿيندو آهي ته سنڌ حڪومت جي ذميواري هوندي آهي ته هو نه صرف انهن جلسن ۽ جلوسن کي مڪمل فول پروف سيڪيورٽي فراهم ڪري بلڪ موجود وسيلا به فراهم ڪري ۽ پي پي پي جي جلسي ۾ به سنڌ حڪومت پنهنجي ذميواري پوري ڪري رهي آهي. هن سيڪيورٽي جي حوالي سان پڇيل سوال جي جواب ۾ چيو ته آئي جي سنڌ ۽ ايڊيشنل آئي جي ڪراچي پاران جلسي گاهه ۽ جلسي ۾ شريڪ ٿيندڙن کي فول پروف سڪيورٽي جي فراهمي لاءِ سمورا انتظام مڪمل ڪيا ويا آهن ۽ انشاءَالله ملڪ جي تاريخ جي  سڀ کان وڏي جلسي عام ۾ عوام کي ڪنهن به قسم جي تڪليف کي منهن ڏيڻو نه پوندو. بلاول ڀٽو ۽ خود ان حوالي سان ٿريٽس ۽ ان سلسلي ۾ وفاقي ۽ صوبائي گهرو کاتي کي ملندڙ خط جي سوال تي هن چيو ته موت ۽ زندگي الله جي هٿ ۾ آهي. هن چيو ته اسان جو ايمان آهي ته جيڪا رات قبر ۾ لکي آهي اها ايندي ۽ جيڪا زندگي هن دنيا ۾ جيئڻي آهي ان کي ڪير ختم نٿو ڪري سگهي. هن چيو ته اسان ڪنهن خوف ۾ مبتلا ٿيندڙن جا پيروڪار ناهيون. اسان جو باني اڳواڻ شهيد ذوالفقار علي ڀٽو ۽ اسانجي شهيد قائد محترمه بينظير ڀٽو ۽ پوري ڀٽي خاندان شهادتون حاصل ڪيون آهن ۽ هو ڪنهن به وقت خوف جو شڪار ناهي ٿي. هڪ ٻي سوال جي جواب ۾ هن چيو ته 18 آڪٽوبر جو جلسو ڪنهن سياسي جماعت جي جلسي يا ڪنهن مڊٽرم چونڊن جي تياري ناهي بلڪ 18 آڪٽوبر جي سانحي جي حوالي سان هي جلسو ڪيو پيو وڃي. ان موقعي تي نجمي عالم ۽ ٻين پيپلز پارٽي جي اڳواڻن جلسي جي تيارين جي حوالي سان مڪمل آگاهي فراهم ڪئي جڏهن ته ڪي پي ڪي جي صوبائي صدر خانزاده خان ٻڌايو ته ڪراچي ۾ پختون آبادين ۾ ان جلسي کي وٺي وڏو جوش خروش جاري آهي ۽ انشاءَالله 18 آڪٽوبر جي جلسي ۾ پختون برادري جي هڪ وڏي تعداد شريڪ ٿيندي. ان موقعي تي صحافين پاران ڪراچي جي جلسي جي حوالي سان پيپلز پارٽي ۾ ڌڙابندي جي سوال تي نجمي عالم ۽ ٻين پارٽي اڳواڻن چيو ته ڪراچي ۾ صرف هڪ ڏينهن اندر 27 جاين تي گذريل آچر تي جلسي جي تيارين جي حوالي سان جلسا منعقد ٿيا آهن ۽ اڄ به ڪراچي جي سمورن علائقن ۾ استقباليه ڪيمپون لڳل آهن جيڪا ان ڳالهه جو دليل آهي ته پي پي ۾ ڌڙابندين جون افواهون پکيڙيندڙن کي منهن سان لڳندي ۽ الحمدالله پيپلز پارٽي جو هڪ هڪ جيالو پنهنجي چيئرمين بلاول ڀٽو زرداري ۽ پارٽي قيادت تي مڪمل اعتماد ڪري ٿو. شرجيل ميمڻ ۽ ٻين اڳواڻن جلسي گاهه ۾ تيار ٿيندڙ اسٽيج ۽ ٻين ڪمن جو معائنو ڪيو ۽ اطمينان جو اظهار ڪيو.

 

بهتر هوندو ميڊيا جعلي ڌمڪين ۽ سيڪيورٽي انتظامن جي رپورٽنگ بند ڪري ڇڏي: بلاول ڀٽو

اسلام آباد (بيورو) پاڪستان پيپلزپارٽي جي چيئرمين بلاول ڀٽو زرداري دهشتگردن جي ڌمڪين جي ترديد ڪري ڇڏي، بهتر هوندو ميڊيا جعلي ڌمڪين ۽ سيڪيورٽي انتظامن جي رپورٽنگ بند ڪري ڇڏي پر دهشتگرد ته مونکانڊنل آهن اهي مونکي ڇا ڌمڪيون ڏيندا. اربع ڏينهن ٽوئيٽر تي پنهنجي پيغام ۾ سندس چوڻ هو ته 8 1 آڪٽوبر جي جلسي لاءِ دهشتگردن جي ڌمڪين هرگز سامنو نه آهي، دهشتگرد مونکي ڇا ڌمڪيون ڏيندا پر اهي ته مونکان ڊنل آهن.

 

ناڻي کاتي هٿيار ۽ ٻئي سامان جي خريداري لاءِ سنڌ پوليس کي 0 1 ڪروڙ رپيا جاري ڪري ڇڏيا

ڪراچي (اسٽاف رپورٽر) ناڻي کاتي سنڌ پوليس کي 0 1 ڪروڙ رپيا جاري ڪري ڇڏيا، رقم هٿيار ۽ ٻئي سامان جي خريداري جي سلسلي ۾ جاري ڪئي وئي. تفصيل موجب ناڻي کاتي طرفان سنڌ پوليس کي 0 1 ڪروڙ رپيا جاري ڪيا ويا آهن. ترجمان موجب جاري ڪيل رقم بلٽ ۽ بم پروف گاڏين، بلٽ پروف جيڪيٽس، هٿيار ۽ ٻئي سامان جي خريداري جي سلسلي ۾ ڏني وئي آهي. رقم ملڻ بعد سنڌ پوليس جي ترجمان موجب هٿيار ۽ ٻئي سامان جي خريداري بعد پوليس جي ڪارڪردگي بهتر ٿيندي ۽ ڪراچي دهشتگردن سان منهن ڏيڻ ۽ امن امان قائم ڪرڻ ۾ مدد ملندي.

 

طاهر القادري جي اباڻي شهر ۾ ”گو قادري گو“ جا نعرا لڳي ويا

جهنگ (م.ڊ) پاڪستان عوامي تحريڪ جي سربراهه ڊاڪٽر طاهر القادري جي اباڻي شهر جهنگ ۾ ”گو قادري گو“ جا نعرا لڳي ويا. نجي ٽي وي موجب عوامي تحريڪ جو اڳواڻ ڊاڪٽر طاهر القادري ڳڙهه مهاراجا ويندي رستي ۾ قصبه وڊ سلطان پهتو ته اُتي موجود ڪارڪنن ”گو قادري گو“ جا نعرا لڳايا.

 

ڪنب ڀرسان مهراڻ نيشنل هاءِ وي تي حادثو، 2 ٻارڙن سميت هڪ عورت فوت، هڪ ٻارڙو زخمي

ڪنب (نمائندو) ڪنب ڀرسان مهراڻ نيشنل هاءِ وي تي جاگير آغا هاشم شاهه وٽ نوابشاهه کان سکر ويندڙ تيز رفتار ڪلٽس ڪار جو موٽر سائڪلسوارن سان ٽڪر 2 ٻارڙن سميت هڪ عورت فوت هڪ ٻارڙو زخمي، ڊائيور ڪار سميت فرار ٿي رهيو هيو ته ڳوٺاڻن سندس پيشو ڪري جهنڊا شاخ وٽان کيس پڪڙي پوليس جي حوالي ڪيو ويو روڊ حادثي ۾ فوت ٿي ويلن نواب خاتون زال مبارڪ علي، تاج محمد ، سمين عباس گوپانگ جا لاش کڻي سندس وارثن ڪنب نوابشاهه روڊ تي ڌرڻو هنيو جنهن سبب ٽريفڪ معطل ٿي وئي. ڌرڻي واري هنڌ تي ڪنب پوليس پهچي متاثرين کي انصاف جي خاطري ڪرائي ڌرڻو ختم ڪرائي ڇڏيو. آخري اطلاع تائين روڊ حادثي جو ڪوبه ڪيس داخل نه ٿي سگهيو آهي. پوليس ۽ ڳوٺاڻن پاران ناڪابندي ڪري فرار ٿيڻ جي ڪوشش ڪندڙ ڪارڊرائيور عبدالله چاچڙ کي جهنڊا شاخ ڀرسان گرفتار ڪري لاڪپ ڪري ڇڏيو آهي. ٻئي پاسي ٽنهي فوتين جا لاش ڪنب لڳ ڳوٺ غلام رضا گوپانگ ۾ سندن جي گهر پهتا ته ڪهرام مچي ويو. واضع رهي ته مزڪورا فوتي خاندان موٽر سائيڪل تي دوا وٺڻ جي لاءِ اسپتال وڃي رهيا هيا ته حادثي جو شڪار ٿي ويا

 

اليڪشن ڪميشن هوا مان پمفليٽ اڇلائڻ کي قانوني قرار ڏئي ڇڏيو ، جهاز ذريعي پمفليٽ اڇلائڻ چونڊ مهم جو حصو آهي: جاويد هاشمي

اسلام آباد/ملتان (بيورو) اليڪشن ڪميشن آف پاڪستان هوا مان پمفليٽ اڇلائڻ کي قانوني ۽ ضابطه اخلاق موجب سڏيو آهي اليڪشن ڪميشن طرفان جاري ڪيل هڪ بيان ۾ چيو ويو آهي ته اين اي 149 ۾ ننڍي چونڊ کان اڳ هوا مان پمفليٽ اڇلائڻ غير قانوني ناهي ۽ نه ئي ضابطه اخلاق جي ڀڃڪڙي آهي اليڪشن ڪميشن جو چوڻ آهي ته پولنگ اسٽيشن جي 400 والن وارين حدن اندر ووٽ گهرڻ غير قانوني آهي ۽ چونڊ ضابطن ۾ پمفليٽ ورهائڻ بابت ڪابه وضاحت ڪيل ناهي ۽ رڳو چونڊ کان 48 ڪلاڪ اڳ جلسن جلوسن تي پابندي جو ذڪر آهي ياد رهي ته قومي اسيمبلي جي تڪ اين اي 149 ۾ ننڍي چونڊ سڀاڻي خميس ڏينهن ٿي رهي آهي ۽ چونڊ مهم 24 ڪلاڪ اڳ ختم ٿي چڪي آهي ۽ ان کانپوءِ اڄ هوا مان هيليڪاپٽر ذريعي جاويد هاشمي جا پمفليٽ اڇلايا ويا جنهن تي اليڪشن ڪميشن پهريان نوٽيس ورتو پر پوءِ ان کي قانوني ۽ ضابطه اخلاق تحت قرار ڏئي ڇڏيو. ٻئي طرف ملتان مان ننڍي چونڊ ۾ اميدوار جاويد هاشمي جو چوڻ آهي ته جهاز ذريعي پمفليٽ اڇلائڻ چونڊ مهم نه پر اشتهار آهي ۽ جيڪڏهن ڪنهن کي قانون سمجهه ۾ نٿو اچي ته ڪنٽينر وارن کان پڇي وٺن پنهنجي رهائشگاهه تي اخباري ڪانفرنس کي ڪندي جاويد هاشمي جو چوڻ هو ته جنهن هيليڪاپٽر مان پمفليٽ اڇلايا ويا اهو منهنجي دوست ڊاڪٽر اظهر بلوچ بڪ ڪرايو هو ۽ ان تي چاليهه هزار روپيا خرچ آيو هن شاهه محمود قريشي تي چٿڙ ڪندي چيو ته کيس قانون جي ڪهڙي خبر ۽ کيس ياد ڏياريان ٿو ته 2002ع ۾ به اليڪشن ڪميشن ڊاڪٽر طاهر القادري کي اهڙي قسم جي مهم هلائڻ جي اجازت ڏني هئي ياد رهي ته پمفليٽن بابت ملتان جي فلائنگ ڪلب جو موقف آهي ته وٽن هڪ ڊرائيور 30 هزار روپين جي عيوض هيليڪاپٽر بڪ ڪرايو هو پر هاڻ کين ان جي خبر ناهي ۽ ان ڊرائيور جي سڃاڻپ ڪئي پئي وڃي.