تازيون خبرون

Monthly Archives: October 2014

پيٽرول 9 رپيا 43 پئسا سستو ٿي ويو، وزير اعظم پاران تيل اگهن ۾ رڪارڊ گهٽتائي جو اعلان

اسلام آباد (بيورو) وزيراعظم نواز شريف چيو آهي ته ملڪ ۾ جمهوريت جي تسلسل لاءِ هر حڪومت کي پنهنجي 5 سالا آئيني مدت پوري ڪرڻ گهرجي، ڌرڻن باوجود پيٽروليم جي قيمتن ۾ مثالي گهٽتائي ڪئي آهي، معيشت جي بهتري سان بيروزگاري ختم ٿيندي، معاشي استحڪام ڏانهن گامزن هئاسين احتجاجي سياست سان خلل آيو، چيني صدر سميت ڪافي غير ملڪي وفدن جا دورا ڌرڻن سبب منسوخ ٿيا، ڌرڻي وارن پنهنجو سوچو قوم جو نه، خدا کين هدايت ڏئي، چونڊن ۾ ڪا ڌانڌلي ناهي ٿي اهو ته الزام ئي بي بنياد آهي، هڪ ڀيرو وري هر سطح تي معاملي جي جاچ جي آڇ ڪريان ٿو، وزيراعظم پاڻي ۽ بجلي وزارت طرفان بجلي جي وڌيڪ بلن متعلق پيش ڪيل آڊٽ رپورٽ تي عدم اطمينان جو اظهار ڪندي هڪ هفتي ۾ تيار ڪري پيش ڪرڻ جي هدايت ڪئي. وزيراعظم چيو ته وڌيڪ بلن جو معاملو سنجيدهه نوعيت جو آهي، جيڪڏهنعوام تي بوج وڌو آهي ته ازالو به ٿيڻ گهرجي، عوام جي مفادن جو تحفظ حڪومت جي ذميداري آهي جنهن کي هر صورت پورو ڪنداسين. وزيراعظم چيو ته بجلي جي وڌيڪ بلن سان حڪومت جو اميج متاثر ٿيو، بجلي جا وڌيڪ بل موڪليندڙن خلاف سخت ڪاروائي ڪئي وڃي، جنهن تي پاڻي ۽ بجلي جي مملڪتي وزير کيس ٻڌايو ته اوور بلنگ جي معاملي ۾ سمورا معاملا سامهون رکي رهيا آهيون. وزيراعظم وزارت کي واڌو بلن جي واپسي لاءِ موثر فارمولو تيار ڪرڻ جو حڪم ڏيندي چيو ته بجلي جي وڌيڪ بلن جي حوالي سان تمام شڪايتون ختم ڪيون وڃن. وزيراعظم ڪابينا کي پنهنجي خطاب ۾ پيٽروليم مصنوعات جي قيمتن ۾ گهٽتائي جو اعلان ڪندي چيو ته پيٽرول قيمت ۾ گهٽتائي سان ٽڪيٽ سستي، ٽرانسپورٽ جو ڪرايو گهٽ ٿيندو، پيٽرول جي قيمت ۾ لاٿ جو اثر هر ڪنهن وٽ پهچڻ گهرجي، صوبائي حڪومتون ٽرانسپورٽ جي ڪراين ۾ گهٽتائي آڻن. وزيراعظم نواز شريف چيو ته ڌرڻن باوجود پيٽرول، تيل جي قيمتن ۾ مثالي گهٽتائي آڻي رهيا آهيون. معيشت جي بهتري سان بيروزگاري ختم ٿيندي، معاشي استحڪام سان ڊيم، موٽرويز سميت پوري ملڪ ۾ ترقياتي منصوبا شروع ٿيندا. هن چيو ته معاشي استحڪام ڏانهن هلي رهيا هئاسين احتجاجي سياست سان خلل آيو. وزيراعظم پنهنجي خطاب ۾ وڌيڪ چيو ته ڌرڻن سان ٿيل نقصان جي تلافي ڪري رهيا آهيون، حڪومتي پاليسين سبب ڊالر جو ملهه 3 1 رپيا گهٽيو، بجلي جو بحران ختم ٿيڻ ۾ دير جا ذميدار ڌرڻي وارا هوندا. وزيراعظم پيٽرول جي قيمت 3 0 1 رپيا 2 6 پئسن مان گهٽائي 4 9 رپيا 9 1 پئسا، ڊيزل جي قيمت 7 0 1 رپيا 9 2 پئسن مان گهٽائي 1 0 1 رپيا 1 2 پئسا ڪرڻ جو اعلان به ڪيو. وزيراعظم چيو ته ڊيزل جي قيمت گهٽجڻ سان آبادگارن کي سڌو سنئون فائدو ٿيندو. وزيراعظم چيو ته هاءِ اوڪٽين 1 3 1 رپيا 3 1 پئسن مان گهٽجي 6 1 1 رپيا 5 4 پئسا في ليٽر ٿي ويو آهي، گاسليٽ 5 9 رپيا 8 6 پئسن مان گهٽجي 7 8 رپيا 2 5 پئسن جو ٿي ويو آهي. وزيراعظم هدايت ڪئي ته سمورا وڏا وزير تيل جون قيمتون گهٽجڻ سان ٽرانسپورٽ ڪرايا گهٽرائن. وزيراعظم نواز شريف وڌيڪ چيو ته چونڊن ۾ ڪا ڌانڌلي ناهي ٿي، ان موضوع تي ڳالهائڻ ئي بي بنياد آهي، اسان هر سطح تي معاملي جي جاچ لاءِ تيار آهيون.

 

اپوزيشن جو او جي ڊي سي ايل جي خانگائڻ ۽ مزدورن تي تشدد خلاف پارليامينٽ هائوس ٻاهران احتجاج ، ڌرڻو

اسلام آباد (بيورو) قومي اسيمبلي ۾ گڏيل آپوزيشن جو او جي ڊي سي ايل جي خانگائڻ، مزدورن تي تشدد، گرفتارين خلاف ٻانهن تي ڪاريون پٽيون ٻڌي جمعي تي ٻئي ڏينهن به پارليامينٽ هائوس ٻاهران گيٽ سامهون احتجاجي ڌرڻو، ڌرڻي ۾ پاڪستان پيپلزپارٽي، جماعت اسلامي ۽ عوامي نيشنل پارٽي سميت ٻيون پارٽيون شامل، ڌرڻي جي شريڪ مرد توڙي عورتن هٿن ۾ پلي ڪارڊز ٿامي رکيا هئا جن تي خانگائڻ نامنظور، مزدور دشمن پاليسي نا منظور ۽ لٺ گولي جي سرڪار نه هلندي جا نعرا لکيل هئا، آپوزيشن پارٽين جي ميمبرن جي حڪومت خلاف سخت تنقيد، پارليامينٽ هائوس ٻاهران اسان نٿا مڃون ظلم جا ضابطا، منشاگردي نه هلندي، نثار هٽايو سرڪار بچايو، ظالمو جواب ڏيو خون جو حساب ڏيو جا نعرا وڏي واڪي لڳائيندا رهيا، پارليامينٽ هائوس جي ٻاهر ۽ ڊي چوڪ ۾ پاڪستان عوامي تحريڪ ۽ تحريڪ انصاف جي ڌرڻن جي پارليامينٽ ۾ سخت مخالفت ڪندڙ تمام سياسي پارٽين طرفان ڏنل ڌرڻي سان دلچسپ صورتحال پيدا ٿي وئي، ڌرڻي جي شريڪ ٿيلن کي خطاب ڪندي پيپلزپارٽي جي اڳواڻ نفيسه شاهه ۽ شازيا مري چيو ته موجودهه حڪومت آءِ ايم ايف سان معاهدي تحت منعافو ڏيندڙ ادارن جي خانگائڻ جو عمل شروع ڪري ڇڏيو، جنهن سامهون پيپلزپارٽي هڪ مضبوط ديوار بڻجي بيهي رهندي کين مزدورن تي ظلم نه ڪرڻ ڏينداسين، حڪومت کي پنهنجي آمرڻا رويي کي تبديل ڪرڻو پوندو، پيپلزپارٽي هميشه مزدور، هارين ۽ غريب طبقي جي نمائندگي ڪئي آهي. هنن چيو ته او جي ڊي سي ايل جي مزدورن تي تشدد ڪرائي حڪومت رياستي دهشتگردي ڪئي آهي، جيڪا قابل مذمت آهي. هنن چيو ته پيپلزپارٽي شاهد خاقان عباسي ۽ احسن اقبال جي آڊٽ کي نٿي مڃي، هنن چيو ته حڪومت ڏنڊي سان ڀرپور ڌرڻو ڏيندڙن کي برداشت ڪري ورتو جن دفعه 4 4 1 کي به ليڙون ليڙون ڪيو ۽ پارليامينٽ تي به قبضو ڪيو هو پر حڪومت مزدورن کي برداشت نه ڪري رهي آهي. هن چيو ته پيپلزپارٽي خانگائڻ جي سخت مخالفت ڪندي رهندي، او جي ڊي سي ايل جو حشر به يو بي ايل، پي ٽي سي ايل جهڙو ٿيندو. جماعت اسلامي جي اڳواڻ صاحبزادي طارق الله چيو ته اڄ تائين جيترن به ادارن کي خانگايو ويو آهي انهن جو حشر پوري قوم سامهون آهي خانگائڻ وارو عمل ملڪ ۽ قوم لاءِ بهتر نه آهي، اهو آءِ ايم ايف جو ايجنڊو آهي انهن ادارن کي خانگايو وڃي جيڪي منعافو ڏيندڙ نه آهن جيڪي منعافو ڏئي رهيا آهن انهن کي خانگائڻ نه گهرجي. هن چيو ته پارليامينٽ تي 2 مهينا جن قبضو ڪري رکيو هو حڪومت انهن جو ڪجهه نه بگاڙيو مزدورن پنهنجي حقن لاءِ آواز حق بلند ڪيو ته مٿن وحشياڻو تشدد ڪيو ويو جنهن جي جيتري مذمت ڪئي وڃي گهٽ آهي. عوامي نيشنل پارٽي جي اڳواڻ غلام احمد بلور خطاب ڪندي چيو ته جن پاڪستان ٽيليويزن ۽ پارليامينٽ تي قبضو ڪيو هو حڪومت انهن کي ڪجهه نه چيو آهي ۽ مزدورن تي وحشياڻو تشدد ڪرائي ڇڏيو ۽ سندن خلاف ايف آءِ آر داخل ڪري کين جيلن ۾ اُڇلي ڇڏيو آهي اهو حڪومت جو ٻٽو معيار آهي. هن چيو ته عوامي نيشنل پارٽي خانگائڻ جي سخت مخالفت ڪندي رهندي، آءِ ايم ايف جي ايجنڊي تحت خانگايو پيو وڃي، ملڪ جي منعافو ڏيندڙ ادارن جو خانگائڻ روڪيو وڃي.

 

صدر سان ايم ڪيو ايم جي وفد جي ملاقات، سنڌ صوبي جي صورتحال تي ڳالهيون

ڪراچي (اسٽاف رپورٽر) صدر ممنون حسين سان متحده قومي موومينٽ (ايم ڪيو ايم) جي وفد ڊاڪٽر خالد مقبول صديقي جي سربراهي ۾ ڪالهه جمعي ڏينهن اسٽيٽ گيسٽ هائوس ڪراچي ۾ ملاقات ڪئي. ملاقات دوران ملڪ جي مجموعي ۽ خاص طور تي سنڌ صوبي جي صورتحال تي خيالن جي ڏي وٺ ڪئي وئي. وفد ۾ متحده قومي موومينٽجا سينيئر اڳواڻ ڊاڪٽر فاروق ستار ۽ سينيٽر نسرين جليل شامل هئا.

 

اليڪشن ۾ ڪا ڌانڌلي ناهي ٿي، ملڪ جي تقدير جا فيصلا روڊ رستن تي نه ٿيندا: وزيراعظم

اسلام آباد (بيورو) وزيراعظم نواز شريف چيو آهي ته اليڪشن ۾ ڪا ڌانڌلي ناهي ٿي ان تي ڳالهائڻ وقت جو ذيان آهي، ڌرڻا هڻندڙن پاڪستان جو به نه سوچو ملڪ جي تقدير جا فيصلا روڊ رستن تي نه ٿيندا. وفاقي ڪابينا جي خاص اجلاس کي خطاب ڪندي وزيراعظم چيو ته ملڪ ۾ وڏي پئماني تي پرڏيهي سيڙپڪار سيڙپڪاري ڪري رهيا هئا پر هــُو ڌرڻن سبب نه آيا. نواز شريف چيو ته هــُو پــُڇي ٿو ته ڌرڻي وارن پاڪستان جي ترقي جو رستو ڇو روڪيو آهي؟ هن چيو ته ڌرڻن سبب ڊالر جي قيمت ۾ اضافو ٿيو ۽ بجلي جي منصوبن تي ڪم شروع نه ٿيڻ جو ڪارڻ به ڌرڻا آهن. هن چيو ته ملڪ جي معاشي ترقي ۾ رڪاوٽ وڌي وئي آهي، عوام انهن ماڻهن کان پڇي ته ايئن ڇو ڪيوويو. وزيراعظم چيو ته اليڪشن ۾ ڪا به ڌانڌلي نه ٿي ان ڪري ان تي ڳالهائڻ فضول آهي. سندس چوڻ هو ته معيشت جي بهتري سان ئي ڊيم ۽ بندرگاهون ٺهنديون جڏهن ته غربت ۽ بيروزگاري جو به خاتمو ايندو.

 

سنڌ جي وڏي وزير جي صدارت هيٺ سنڌ ايجوڪيشن فائونڊيشن جو اجلاس، ڪارڪردگي جو جائزو ورتو ويو

ڪراچي (اسٽاف رپورٽر) سنڌ جو وڏو وزير سيد قائم علي شاهه جيڪو سنڌ ايجوڪيشن فائونڊيشن (سيف) جي بورڊ آف گورنر جو چيئرمين به آهي سيف جي مئنجمينٽ کي هدايت ڪئي آهي ته هو پنهنجي تعليمي نيٽ ورڪ جي دائري کي وڌائي خاص ڪري پٺتي پيل علائقن ۾ جتي تعليمي سهولتن جي کوٽ آهي ته جيئن 2018 تائين صرف ان جي نيٽ ورڪ سان 10 لک انرولمينٽ جو حدف حاصل ڪري سگهجي سنڌ جي وڏي وزير سيف جي مئنجمينٽ پاران صوبي ۾ 3 لک 50 هزار شاگردن لاءِ پهريان کان موجود 3000 اسڪولن جي انگ ۾ هلندڙ نومبر مهيني جي دوران 40 هزار شاگردن سان گڏ وڌيڪ 318 اسڪول قائم ڪندڙ عمل کي ساراهيندي چيو ته ان جي حڪومت تعليم جي معيار کي پهرين ترجيحي ڏيئي رهي آهي ۽ بجيٽ ۾ ڳچ رقم رکي آهي ۽ سڌارا آڻيندي هر شعبي ۾ ميرٽ کي يقيني بڻايو ويو آهي هن ڳالهه جو اظهار هن جمعي تي وزيراعليٰ هائوس ۾ سيف جي ڪارڪردگي جي جائزه اجلاس جي صدارت ڪندي ڪيو. اجلاس کي خطاب ڪندي سنڌ جي وڏي وزير چيو ته ڪميونٽي جي فعال شرڪت ۽ معياري ٽيچنگ فيڪلٽي جي ڪري اسان جديد دور جي تعليمي معيار جي چئلينجز کي منهن ڏيئي سگهون ٿا هن چيو ته صوبائي تعليم کاتي جي مختص فنڊ سميت سنڌ حڪومت هلندڙ مالي سال 2.215 بلين رپيا ايس اي ايف جي آپريشنل ۽ انتظامي خرچن لاءِ مختص ڪيا آهن ته جيئن صوبو خاص ڪري اهي پٺتي پيل علائقا جتي سرڪاري اسڪول موجود نه آهن اتي هيٺين سطح تي ماڻهن کي تعليم جي فراهمي کي ممڪن بڻائي سگهجي سنڌ جي وڏي وزير پرنسپل سيڪريٽري علم الدين بلو کي هدايت ڪئي ته هو مختص ڪيل فنڊ خاص ڪري هن جي اهم ضرورتن کي پورو ڪرڻ لاءِ فوري گهٽ مدي ۾ جاري ڪرڻ کي يقيني بنائڻ لاءِ قدم کنيا وڃن وڏي وزير ايس اي ايف جي مئنجيمينٽ کي هدايت ڪئي ته اها پنهنجي ٻن کان ٽن سالن جي حاصلات ۽ خرچ ۽ مستقبل جي تعليمي نيٽ ورڪ جي رٿابندي متعلق جامع رپورٽ هڪ هفتي اندر پيش ڪئي وڃي ته جيئن هو ان مطابق قدم کڻي سگهي. هن اجلاس ۾ شامل ٿيندڙن کي يقين ڏياريو ته ان جي حڪومت پنج بلين رپين جي افتتاحي شروعاتي فنڊ سان انرولمينٽ فنڊ قائم ڪرڻ جو فيصلو ڪيو پيو وڃي.

 

1986 ۾ ايم ڪيو ايم کي ختم ڪرڻ جي ڪوشش ڪئي وئي: الطاف حسين

ڪراچي (اسٽاف رپورٽر) ايم ڪيو ايم جي مرڪز نائين زيرو  تي ڪراچي ۽ حيدرآباد ۾ رابطا ڪميٽي، سينيٽرز، اسيمبلي ميمبرن ۽ ٻين عهديدارن کي ٽيلفونڪ خطاب ڪندي الطاف حسين جو چوڻ هو ته 31 آڪٽوبر 1986جو ڏهاڙو ان حوالي سان ڏکوئيندڙ آهي جنهن کي هميشه ياد رکيو ويندو. پڪي قلعي حيدرآباد جي جلسي جي موقعي تي خطاب ڪندي الطاف حسين چيو ته اسٽيبلشمينٽ ايم ڪيو ايم کي ختم ڪرڻ جي پوري قوت سان ڪوشش ڪئي. الطاف حسين جو چوڻ هو ته کيس ٽوڙڻ لاءِ تشدد جا مختلف حربا اختيار ڪيا ويا جڏهن سموريون ايجنسيون ڪيترن ئي ڏينهن تائين تشدد ڪري ٿڪجي پيون ته مختلف ڪيس بڻائي جيل منتقل ڪيو ويو. هي سانحي ايم ڪيو ايم جي جدوجهد جي هڪ اهڙو دردناڪ داستان آهي جيڪو وساري نٿو سگهجي.

 

ڪراچيءَ ۾ فائرنگ ۽ تشدد جي واقعن ۾ پوليس اهلڪار سميت 6 ڄڻا مارجي ويا

ڪراچي (اسٽاف رپورٽر) ڪراچي ۾ ٽارگيٽيڊ آپريشن ۽ محرم الحرام جي ڪري سخت سيڪيورٽي جي باوجود ٽارگيٽ ڪلرز خميس تي به نه مڙيا فائرنگ ۽ تشدد جي واقعي ۾ رينجرز ۽ پوليس اهلڪارن سميت 6 ڄڻا مارجي ويا جڏهن ته فائرنگ ۽ دستي بم حملي ۾ عورت سميت 4 ڄڻا زخمي ٿيا تفصيل موجب عزيزڀٽي ٿاڻي جي حد گلشن اقبال نيپا چورنگي ويجهو نامعلوم ماڻهن جي فائرنگ ۾ پوليس اهلڪار اي ايس آءِ قلندربخش ولد مهراب بخش مارجي ويو جڏهن ته اي ايس آءِ سرتاج ولد الله بخش سخت زخمي ٿي پيو مقتول پوليس اهلڪار گلشن اقبال ٿاڻي ۾ مقرر هو امام بارگاهه تي ڊيوٽي ڏيئي واپس اچي رهيو هو فيروز آباد ٿاڻي جي حد ۾ شاهراهه قائدين تي الله والي چورنگي ويجهو هٿياربندن جي فائرنگ ۾ ڪار ۾ سوار شخص سخت زخمي ٿي پيو فائرنگ سان علائقي ۾ ڏهڪاءُ پکڙجي ويو ۽ روڊ تي ڪيتريون ئي گاڏيون پاڻ ۾ ٽڪرائجي ويون واردات کان پوءِ جوابدار ڀڄي ويا. ڪار سوار کي سخت زخمي حالت ۾ جناح اسپتال نيو پئي ويو ته هو رستي تي ئي فوت ٿي ويو اسپتال ۾ مقتول جي سڃاڻپ محبوب علي ولد قاسم علي جي نالي سان ٿي آهي جيڪو پي اي سي ايڇ ايس بلاڪ 3 ۾ صائمه گارڊن جو رهواسي ۽ ايم اي جناح روڊ تي تبت سينٽر ويجهو حمزه ٽريڊز جي نالي سان ان جو دڪان آهي. سولجر بازار ٿاڻي جي حد گارڊن جي علائقي ۾ نشتر روڊ تي پاڪستان ڪوارٽر ويجهو اڻڄاتل هٿياربندن جي فائرنگ ۾ مرتضي ولد محمد صادق سخت زخمي ٿي پيو جنهن زخمن جا سور نه سهندي سول اسپتال ۾ دم ڏنو. شرافي ڳوٺ ٿاڻي جي حد ۾پيربخش ڳوٺ ۾ بجلي جي گرڊ اسٽيشن ويجهو موٽر سائيڪل سوار هٿياربندن جي فائرنگ ۾ رڪشا ڊرائيور محمد جاويد ولد محمد سليم سخت زخمي ٿي پيو جنهن کي جناح اسپتال نيو پئي ويو ته هو رستي ۾ ئي فوت ٿي ويو. پيرآباد ٿاڻي جي حد قصبا اسلاميه ڪالوني ۾ نامعلوم جوابدارن جي فائرنگ سان جان محمد مارجي ويو. فيريئر جي علائقي ريلوي ڪالوني ۾ نامعلوم ماڻهن جي فائرنگ ۾ عورت شميم بيبي زخمي ٿي پيو ارونگي جي علائقي نمبر 3 ۾ هٿياربندن جي فائرنگ ۾ نورمحمد زخمي ٿي پيو. زمان ٽائون جي علائقي ڪورنگي اڍائي نمبر تي رڪشي تي فائرنگ ۾ ڊرائيور عبدالرئوف ولد عبدالغفور زخمي ٿي پيو محمود آباد جي علائقي اعظم بستي ۾ فائرنگ جي واقعي ۾ ڪاشف ولد ياسين زخمي ٿي پيو سمورن زخمين کي ويجهي اسپتال منتقل ڪيو ويو.

 

ناڻي صلاحڪار مراد علي شاهه استعيفيٰ ڏئي ڇڏي، پي ايس 3 7 مان ضمني چونڊ وڙهندو

ڪراچي (اسٽاف رپورٽر) سنڌ جي وڏي وزير جي ناڻي صلاحڪار مراد علي شاهه عهدي تان استعيفيٰ ڏئي ڇڏي، مراد علي شاهه استعيفيٰ بعد اباڻي علائقي سيوهڻ شريف مان سنڌ اسيمبلي جي تڪ پي ايس 3 7 مان ضمني چونڊ ۾ حصو وٺندو، مراد علي شاهه جا قائم علي شاهه جي جاءِ تي سنڌ جو نئون وڏو وزير بڻجڻ جاامڪان. تفصيل موجب پيپلزپارٽي طرفان جوان وڏي وزير کي آڻڻ تي ويچار بعد وڏ وزارت جي اميدوار وڏي وزير جي ناڻي صلاحڪار مراد علي شاهه جمعي ڏينهن عهدي تان استعيفيٰ ڏئي ڇڏي. مراد علي شاهه 9 2 نومبر تي اباڻي علائقي سيوهڻ شريف مان ضمني چونڊ ۾ حصو وٺندو، مراد علي شاهه پي ايس 3 7 سيوهڻ شريف ۾ پيپلزپارٽي جي ٽڪيٽ تي ضمني چونڊن ۾ حصو وٺندو. پنهنجي هڪ بيان ۾ مراد علي شاهه چيو ته قانون تحت پنهنجو عهدو رکي سگهان پيو پر چونڊن ۾ شفافيت برقرار رکڻ لاءِ استعيفيٰ ڏني آهي. ياد رهي ته ان کان پهريان عدالت مراد علي شاهه جي ٻٽي شهريت تي سندس سيٽ خالي قرار ڏني هئي. اها ڳالهه قابل ذڪر آهي ته قائم علي شاهه جي بطور وڏو وزير ڪارڪردگي کي هاڻوڪي ڏينهن ۾ ڪڙي تنقيد جو نشانو بڻايو ويو آهي جنهن بعد اهي خبرون سامهون آيون ته پيپلزپارٽي جي قيادت وڏي وزير جي تبديلي جو فيصلو ڪري ڇڏيو آهي جنهن بعد اوچتو پي ايس 3 7 تان پيپلزپارٽي جي اسيمبلي ميمبر عبدالنبي شاهه استعيفيٰ ڏئي ڇڏي جيڪا اسپيڪر انهيءَ ڏينهن منظور ڪري ڇڏي هئي، جنهن بعد مراد علي شاهه جيڪو ٻٽي شهريت سبب پهرين پنهنجي صوبائي اسيمبلي جي رڪنيت ڇڏي چڪو هو اعلان ڪيو ته هن پنهنجي ٻٽي شهريت ڇڏي ڏني آهي ۽ ان جو سرٽيفڪيٽ به کيس ملي چڪو آهي. مراد علي شاهه کي پيپلزپارٽي جي شريڪ چيئرمين آصف علي زرداري جو تمام گهڻو اعتماد حاصل آهي ۽ سندس والد عبدالله شاهه به پيپلزپارٽي جي ٻئي دور ۾ سنڌ جو وڏو وزير رهي چڪو آهي.

 

ڪراچي جي علائقي سهراب ڳوٺ ۾ پوليس مقابلو، 3 دهشتگرد مارجي ويا

ڪراچي (اسٽاف رورٽر) ڪراچي جي علائقي سهراب ڳوٺ ۾ پوليس مقابلي ۾ آپگهاي بمبار سمت 3 دهشتگرد مارجي ويا آن. پوليس موجب دهشتگرد ايم اي جناح روڊ تي دهشتگردي جي منصوبابندي ڪري رهيا هئا. ڪارروائي دوران دهشتگردن جي قبضي مان پوليس وڏي انگ ۾ هٿيار، بارودي مواد، ڊيٽونيٽرز ۽ آپگهاتي جيڪٽس به هٿ ڪيا آهن. پوليس پاران علائقي جي سرچنگ جو عمل جاري آهي. پوليس موجب مارجي ويلن ۾ پابندي مرهيل تحريڪ طالبان ڪراچي جو امير سلطان به شامل آهي.

 

سامونڊي طوفان نيلوفر جو زور گهٽجي ويو، سنڌ جي ساحلي پٽي جي رهواسين ۾ خوف برقرار، برسات جو امڪان

ڪراچي (اسٽاف رپورٽر) عربي سمنڊ ۾ اُٿيل نيلوفر طوفان جو زور گهٽجي ويو، جڏهن ته سنڌ جي سامونڊي علائقن ۾ اڄ مينهن وسڻ جو امڪان آهي، موسميات کاتي جو چوڻ آهي ته طوفان عربي سمنڊ ۾ ئي 450 ڪلوميٽرن جي مفاصلي تي ختم ٿي سگهي ٿو. موسميات کاتي موجب سامونڊي طوفان نيلوفر جي شدت ۾ وڌيڪ گهٽتائي ٿي آهي ۽ اڄ شام تائين هوا جي گهٽ دٻاءَ ۾ تبديل ٿيڻ جو امڪان آهي. هوا جي گهٽ دٻاءَ سبب ايندڙ 24 کان 36 ڪلاڪن دوران سنڌ ۽ بلوچستان جي سامونڊي پٽي ۾ ڪٿي ڪٿي تيز هوائن ۽ گجگوڙ سان برسات پئجي سگهي ٿي. سامونڊي طوفان ڪراچي کان ڏکڻ اولهه ۾ 490 ڪلوميٽرن جي مفاصلي تي موجود آهي. موسميات کاتي جو چوڻ آهي ته سنڌ ۽ بلوچستان جا مهاڻا آچر کان معمول جون سرگرميون شروع ڪري سگهن ٿا. ايندڙ 24 ڪلاڪن دوران ڪراچي، ٺٽي، بدين، عمرڪوٽ، ٿرپاڪر، ميرپورخاص ۽ سکر ۾ مينهن پوڻ جو امڪان آهي. ٻئي طرف سامونڊي طوفان ۽ زوردار برساتن جي خطري سبب ڪراچي، حيدرآباد، ٺٽي، سجاول، بدين، ٿرپارڪر ۾ تعليمي ادارا بند آهن. سامونڊي طوفان نيلوفر جو خطرو ٽــَري وڃڻ باوجود سنڌ جي ساحلي پٽيءَ جي رهواسين ۾ خوف برقرار آهي. نيلوفر طوفان سبب ساحلي پٽيءَ ۾ آباد مهاڻا راتيون جاڳي گذارڻ تي مجبور آهن. جاتي تعلقي جي ساحلي پٽي جي 15 سئو ماڻهن کي زبردستي حفاظتي ڪئمپن ۾ ڏانهن منتقل ڪيو ويو آهي. ڪئمپن ۾ ترسيل ماڻهن جو چوڻ آهي ته کين ڪا به سهولت فراهم ناهي ڪئي وئي،جنهنڪري هو سخت ڏکيائين کي منهن ڏيڻ تي مجبور آهن. هنن چيو ته ڪئمپن ۾ کاڌ خوراڪ سميت سمورين سهولتن جي کوٽ آهي. جاتي تعلقي جي سامونڊي پٽيءَ واري علائقي ۾ وقفي وقفي سان مينهن وسڻ جو سلسلو به جاري آهي.