تازيون خبرون

Daily Archives: September 22, 2014

آرمي چيف جي وزير اعظم سان ملاقات، ملڪي صورتحال تي ڳالهيون

اسلام آباد (بيورو) وزيراعظم نواز شريف سان آرمي چيف جنرل راحيل شريف جي وزيراعظم هائوس ۾ ملاقات، آپريشن ضرب عضب ۽ آءِ ڊي پيز جي بحالي جي حڪمت عملي تي ويچاريو ويو. تفصيل موجب آرمي چيف جنرل راحيل شريف وزيراعظم هائوس ۾ وزيراعظم نواز شريف سان ملاقات ڪئي، ملاقات ۾ آپريشن ضرب عضب جي حوالي سان تفصيلي ڳالهايو ويو، وزيراعظم ۽ آرمي چيف ملاقات ۾ اتر وزيرستان جي لڏي آيلن جي بحالي جي حڪمت تي ويچاريو ويو. وزيراعظم آپريشن ضرب عضب ۾ ٿيندڙ ڪاميابين تي اطمينان جو اظهار ڪيو، ملاقات ۾ ٻوڏ سٽيلن جي حوالي سان به تفصيلي ڳالهايو ويو. ملاقات ۾ ٻنهي پاسن جي قيادت دهشتگردن کان ڪليئر ڪرايل علائقن ۾ آءِ ڊي پيز جي بحالي جي حوالي سان جائزو ورتو. آرمي چيف جنرل راحيل شريف اتر وزيرستان ۾ جاري آپريشن ضرب عضب تي وزيراعظم کي بريفنگ ڏني. ذريعن موجبوزيراعظم جي گڏيل قومن جي دوري جي حوالي سان به ملاقات ۾ ويچاريو ويو، ملاقات ۾ عسڪري ۽ سياسي قيادت ان ڳالهه تي اتفاق ڪيو ته وزيراعظم نواز شريف گڏيل قومن جي جنرل اسيمبلي جي اجلاس ۾ وزيراعظم جي حيثيت سان ڪشمير تڪرار جي حوالي سان ڳالهائيندو. ملاقات ۾ گهرو ۽ پرڏيهي صورتحال جي حوالي سان به خيالن جي ڏي وٺ ڪئي وئي. وزيراعظم نواز شريف ملاقات ۾ خواهش ظاهر ڪئي ته جن علائقن کي دهشتگردن مان خالي ڪرايو ويو آهي اتي جلد کان جلد لڏي آيلن جي بحالي جو عمل شروع ڪيو وڃي.

 

وفاقي ڪابينا پاران سرڪاري نوڪرين تي لڳل پابندي ختم ڪرڻ جو اعلان

اسلام آباد (بيورو) وزيراعظم جي صدارت ۾ ٿيندڙ وفاقي ڪابينا جي اجلاس ۾ سرڪاري نوڪرين تي لڳل پابندي ختم ڪرڻ جو فيصلو ڪيو ويو آهي. وزيراعظم نواز شريف هڪ ڀيرو وري بجلي جي واڌو بلن جو نوٽيس وٺندي صارفين کي موڪليل غلط بلن کي هنگامي بنيادن تي صحيح ڪرڻ جو حڪم ڏئي ڇڏيو جڏهن ته وفاقي ڪابينا بجلي جي وڌيڪ بلن جي ذميدارن خلاف سخت ڪاروائي جو فيصلو ڪندي بجلي صارفين کان ورتل وڌيڪ بلن کي اڳين مهيني ۾ ايڊجسٽ ڪرڻ جون هدايتون جاري ڪري ڇڏيون. وزيراعظم جي سربراهي ۾ وفاقي ڪابينا جي اجلاس ۾ ٻوڏ جي تباهڪارين ۽ بجلي جي وڌيڪ بلن تي ويچاريو ويو. وزيراعظم نواز شريف جي سربراهي ۾ وفاقيڪابينا جو اجلاس ٿيو جنهن ۾ وفاقي وزيرن کان علاوه وزيراعظم جي توانائي جي صلاحڪار مصدق ملڪ ۽ اين ڊي ايم اي چيئرمين به شرڪت ڪئي. مصدق ملڪ اجلاس ۾ بجلي جي وڌيڪ بلن تي ڪابينا کي رپورٽ پيش ڪئي جنهن ۾ پاڻي ۽ بجلي وزارت طرفان وڌيڪ بلن جي واپسي ۽ عوامي شڪايتن جي ازالي لاءِ سفارشون به ڏنيون ويون. پاڻي ۽ بجلي صلاحڪار پنهنجي رپورٽ ۾ چيو ته ميٽر ريڊرز ريڊنگ ڪرڻ بغير اندازي موجب ريڊنگ وڌي، اندازي موجب 5 3  سيڪڙو صارفين کي بجلي جا وڌيڪ بل موڪليا ويا، بجلي ونڊيندڙ ڪمپنين تي سرڪلر ڊيٽ تي ضابطي آڻڻ جو سخت دٻاءُ هو جنهن سبب گهربل هدف حاصل ڪرڻ لاءِ واڌو بل موڪليا ويا. اجلاس ۾ وفاقي ڪابينا بجلي جي گهڻن بلن جي ذميدارن خلاف سخت ڪاروائي جو فيصلو ڪندي بجلي جي صارفين کان ورتل وڌيڪ بلن کي اڳين مهيني ۾ ايڊجسٽ ڪرڻ جون هدايتون جاري ڪري ڇڏيون. وزيراعظم نواز شريف بجلي جي واڌو بلن جي معاملي کي آڊٽ ڪرائڻ جو به حڪم ڏئي ڇڏيو جڏهن ته انهيءَ دوران اجلاس ۾ مصدق ملڪ عوامي شڪايتن جي ازالي جي حوالي سان به سفارشون پيش ڪيون آهن. اجلاس ۾ اين ڊي ايم اي چيئرمين ٻوڏ جي تباهڪارين ۽ امدادي سرگرمين تي تفصيلي بريفنگ ڏني. بريفنگ ۾ چيو ويو ته ٻوڏ جي تباهي سان ابتدائي ڪاٿي موجب 6  لک خاندان متاثر ٿيا، وفاقي ڪابينا جي اجلاس ۾ ٻوڏ سٽيل علائقن ۾ خاندانن جي بحالي لاءِ جامعه پيڪيج تيار ڪرڻ جي منظوري ڏني وئي. اجلاس ۾ ملڪ جي موجودهه سياسي صورتحال ۽ آپريشن ضرب عضب متعلق معاملن جو به جائزو ورتو ويو. وزيراعظم نواز شريف پنهنجي گڏيل قومن جي دوري متعلق وفاقي ڪابينا سان مشاورت ڪئي. اجلاس ۾ بجلي چوري جي بل ۾ سزائن ۽ ڏنڊن ۾ ترميمن جو مسودو پيش ڪيو ويو. اجلاس ۾ وفاقي ڪابينا نيشنل ميٽرولاجيڪل انسٽيٽيوٽ قائم ڪرڻ جي بل جي به منظوري ڏني. وفاقي ڪابينا جي اجلاس کانپوءِ پريس ڪانفرنس ڪندي اطلاعات واري وفاقي وزير سينيٽر پرويز رشيد چيو آهي ته وزيراعظم جي صدارت ۾ صدارت ۾ ٿيندڙ اجلاس ۾ 4 اهم فيصلا ڪيا ويا آهن. وفاقي ڪابينا سرڪاري نوڪرين تي لڳل پابندي ختم ڪرڻ جي منظوري ڏئي ڇڏي آهي. سمورا سرڪاري کاتا  خالي جاين تي ڀرتين ۾ آزاد هوندا. ميرٽ تي نوڪريون حاصل ڪرڻ ماڻهن جو حق آهي. سرڪاري نوڪريون ميرٽ تي ڏنيون وينديون. ٻوڏ متاثرن هر خاندان کي عيد کان اڳ ۾ 25 هزار روپيا ڏنا ويندا. متاثرن لاءِ اڌ رقم صوبائي حڪومت جڏهن ته اڌ رقم وفاقي حڪومت پاران جاري ڪئي ويندي. وفاق حڪومت فصلن جي نقصان جو ازالو ڪندي جڏهن ته گهرن جي تعمير ۽ مال جي نقصان جي ازالي لاءِ معاونت فراهم ڪئي ويندي. پرويز رشيد چيو ته گذريل سال جي مقابلي ۾ وڌيڪ يونٽس وارن کي سهوليت ڏني ويندي. 200 يونٽ وارن صارفين کي اضافي بل ايندڙ مهيني ايڊجسٽ ڪيا ويندا. ڪابينا جي اجلاس ۾ مزدور جي گهٽ ۾ گهٽ پگهار 12 هزار ڪرڻ کي قانوني تحفظ ڏيڻ جو فيصلو ڪيو ويو آهي. گهٽ  ۾ گهٽ 12 هزار پگهار کي يقيني بڻائڻ لاءِ قانونسازي ڪئي ويندي. پريس ڪانفرنس ۾ عابد شير علي جو چوڻ هو ته حڪومت پنهنجين ذميوارين کان آگھاهه آهي. عوامي مسئلا اسان جا نه پر گذريل حڪومت جا پيدا ڪيل اهي. وزيراعظم بجلي جي واڌو بلن ي جانچ ۽ سڄي معاملي جو ٽن مختلف ڪمپنين کان آڊٽ ڪرائڻ جو حڪم ڏنو آهي. هن چيو ته اضافي بل کاتي جي ملي ڀڳت کانسواءِ ممڪن ناهن. اوور بلنگ خلاف ڪارروائي ڪئي ويندي.

 

ڪراچي ۾ جلسو تحريڪ انصاف ۽ ايم ڪيو ايم جي ملي ڀڳت هئي: پرويز رشيد

اسلام آباد (بيورو) سڌسماءَ واري وفاقي وزير پرويز رشيد چيو آهي ته ڪراچي ۾ جلسو تحريڪ انصاف ۽ ايم ڪيو ايم جي ملي ڀڳت هئي عمران خان قوم کي ٻڌائي ته قادري سان گڏجي جمهوريت کي ڊي ريل ڪرڻ جو پلان ڇو رٿيو، ڪوڙو الزام لڳائڻ لاءِ عمران خان کي ثبوت نه مائڪ جي ضرورت هوندي آهي هڪ بيان ۾ هن چيو ته عمران خان شيخ رشيد کي هنج ۾ وٺي ڪهڙو نئون پاڪستان بنائڻ گهري ٿو گجرات جو چوڌري ۽ جهنگ جو قادري نئين پاڪستان جون ڀتيون ٺاهيندا يا ڪيترائيندا پرويز رشيد چيو ته عمران 14 مهينن دوران ڪي پي ڪي ۾ ڪهڙو انقلاب آندو آهي هن صرف انتشار جي سياست کي هٿي ڏني عمران قادري ملاقات ۾ انقلاب ۽ تبديلي لاءِ ڪهڙو روڊ ميپ تشڪيل ڏنو ويو ۽ ٻنهي جي ملاقاتن کي ميڊيا کان ڳجهو رکڻ جي ڪهڙي ضرورت هئي عمران خان ۽ طاهرالقادري جي ملاقاتن سان تحريڪ انصاف مسلسل ڇو انڪار ڪري ٿي پرويز رشيد چيو ته ڪراچي ۾ جلسي کان اڳ ئي طئي ڪيو ويو هو ته اوهان اسان جي خلاف ڪجهه نه ڳالهائجو ۽ اسان اوهان جي خلاف ڪجهه نه ڳالهائينداسين آچر تي ٿيل جلسو تحريڪ انصاف ۽ متحده قومي موومينٽ جي وچ ۾ سوديبازي ۽ ملي ڀڳت هئي هن چيو ته عمران خان ڪهڙي منهن سان قانون جي حڪمراني جي ڳالهه ڪري ٿو جڏهن ته هو پاڻ بجلي جو بل ادا نه پيو ڪري ۽ سڄي قوم کي بغاوت تي ڀڙڪائي رهيو آهي.

 

گھوسٽ ملازمن کي برداشت نه ڪيو ويندو : شرجيل ميمڻ

ڪراچي(اسٽاف رپورٽر):سنڌ جي اطلاعات ۽ بلديات واري کاتي جي صوبائي وزير شرجيل انعام ميمڻ سومر ڏينهن ڪراچي جي علائقي ميري دير ٽاور وٽ پاڻ ٻهارو ڏئي صوبي ۾ صفائي ۽ قبضن جي خاتمي واري مهم جو آغاز ڪيو. ان موقعي تي هن چيو ته ڪراچي، ٺٽي ۽ ڪشمور کان ٿرپارڪر تائين ان مهم جو اڄ کان آغاز ڪيو ويو آهي ۽ ان سلسلي ۾ هاڻ ڪنهن به قسم جي ڪوتاهي برداشت نه ڪئي ويندي، سڀئي سياسي جماعتون، سول سوسائٽي، ميڊيا ۽ عوام به ان مهم ۾ اسان جو ساٿ ڏين ۽ پنهنجي گھرن جيان پنهنجي پاڙن ۽ گھٽين ۾ به صفائي جو خيال رکن. تفصيل موجب اطلاعات واري وزير شرجيل انعام ميمڻ سموري صوبي ۾ صفائي ۽ قبضن جي خاتمي واري مهم جو سومر ڏينهن باقاعدا آعاز ڪري ڇڏيو. ان سلسلي ۾ صوبائي وزير سيڪريٽري بلديات، سجاد عباسي، ايڊمنسٽريٽر ڪراچي روئوف اختر فاروقي، ايڊمنسٽريٽر سائوٿ افضال زيدي ۽ ميونسپل ڪمشنر سائوٿ محمد رئيسي سان گڏ ميري ويدر ٽاور وٽ تي روڊ کي ٻهارو ڏئي ان مهم جو آغاز ڪيو. ان موقعي تي موجود عوام جي وڏي انگ ان مهم جي آجيان ڪئي ۽ صوبائي وزير جي ڪوششڻ کي ساراهيو. بعد ۾ميڊيا سان ڳالهائيندي شرجيل انعام ميمڻ چيو ته مهم جي آغاز جو مقصد پنهنجي شهرن ۽ ڳوٺن ۾ موجود گند ڪچري ۽ قبضن جو خاتمون ڪرڻ آهي. هن چيو ته اها مهم هڪ مهينو بنا ڪنهن رڪاوٽ جي جاري رهندي ۽ ان مهم ۾ شرڪت لاءِ مختلف سياسي جماعتن، سول سوسائٽي، شوبز، رانديگرن، سيلبريٽيز، ميڊيا ۽ عوام کي شامل ٿيڻ جي دعوت ڏني وئي آهي. هن چيو ته ان سلسلي ۾ صوبي جي سمورن ايڊمنسٽريٽرز، مسونسپل ۽ ٽائون ميونسپل ڪمشنرن ۽ انهن جي ماتحت آفيسرن ۽ اهلڪارن کي خصوصي هدايتون ڏنيون ويون آهن. هن چيو ته ان سلسلي ۾ ڪا به ڪوتاهي برداشت نه ڪئي ويندي ۽ نه ئي ڪنهن کي ڪا رعايت ڏني ويندي. هن چيو ته پيپلز پارٽي جي اعليٰ قيادت به ان مهم جي حوالي سان سمورا اُپاءَ وٺڻ جي هدايت ڪئي آهي ۽ انشاءَالله اسان هڪ مهيني اندر شهرن ۽ ڳوٺن مان قبضي ۽ گند ڪچري جو مڪمل خاتمون ڪنداسين. هڪ سوال جي جواب ۾ شرجيل انعام ميمڻ چيو ته ڪافي علائقن ۾ ايڊمنسٽريٽرن ميونسپل ڪمشنرن ۽ ٽائون ميونسپل ڪمشنرن پاران گھوسٽ ملازمن جون شڪايتون ملي رهيون آهن. ان ڪري هاڻ فيصلو ڪيو ويو آهي ته ڪنهن به کاتي ۾ گھوسٽ ملازمن کي برداشت نه ڪيو ويندو هن چيو ته اسان کي ڪنهن کي به نوڪري مان ڪڍڻ جو حق ناهي ، پر جيڪڏهن ڪو ڪم نه ڪندو ته ته ان کي پگھار ڪنهن به صورت نه ڏني ويندي. هڪ سوال جي جواب ۾ هن چيو ته سڀني کاتن ۾ سنڌ حڪومت پاران فنڊ باقاعده فراهم ڪيا پيا وڃن۽ ڪيترن ئي کاتن جي آفيسرن پاران ان ۾ ڪرپشن جي شڪايتن تي ايڪشن ورتو آهي ۽ سڀني ٽي ايم اوز کان 6 مهينن جي رپورٽ طلب ڪئي وئي آهي. هن چيو ته جيڪو به آفيسر ڪرپشن ۾ ملوث هوندو ان کي گھر ڀيڙو ڪيو ويندو. عيدالعضحيٰ جي موقعي تي صفائي جي خاص انتظامن بابت هڪ سوال جي جواب ۾ صوبائي وزير چيو ته ان مهم سان گڏوگڏ عيد العضحيٰ جي موقعي تي گند ڪچري کي ٺڪاڻي لڳائڻ ۽ صوبي ۾ ڊينگي ۽ ڪانگو وائرس کان بچائڻ لاءِ اسپري مهم جو حڪم پهرين ئي ڏنو ويو آهي ۽ خاص ڪري ڪانگو وائرس جيڪو جانورن ذريعي پکڙجندو آهي ان تي ڪڙي نظر رکڻ ۽ ان حوالي سان ڀرپور اسپري مهم هلائڻ جي هدايت ڏني وئي آهي. صوبائي وزير ان موقعي تي رستي تان گذرندڙ هڪ گرين بس کي روڪي ان ۾ سوار ٿي بس ۾ موجود عورتن ۽ مرد مسافرن سان ان بس جي سروس جي حوالي سان شڪايتون معلوم ڪيون . هن چيو ته سنڌ حڪومت شهرين کي سفر جي سٺي ، سستي سهولتون فراهم ڪرڻ جي ڪوشش ڪري رهي آهي۽ گرين بس جون وڌيڪ فريڊ جلد ئي باقي روٽن تي به هلايون وينديون. ان موقعي تي گرين بس ۾ موجود عورتن ۽ مرد مسافرن گرين بس سروس جي آغاز تي صوبائي وزير ۽ پاڪستان پيپلز پارٽي جي صوبائي ۽ پارٽي قيادت جا دل جي گھراين سان ٿورا مڃيان ۽ ٻڌايو ته ان سروس سان جتي کين سفر جي بهتر سهولت مهيا ٿي آهي اتي کين ماهوار بجيٽ ۾ بچت ٿي آهي

 

ميجر جنرل رضوان اختر ڊائريڪٽر جنرل آءِ ايس آءِ ۽ 4 عملدار ڪور ڪمانڊر مقرر

راولپنڊي(م.ڊ) پاڪ فوج طرفان 6 ميجر جنرلن کي ليفٽيننٽ جنرل جي عهدن تي ترقي ڏئي ڇڏي آهي. ترقي ماڻيندڙ ميجر جنرلن ۾ ميجر جنرل رضوان اختر، ميجر جنرل ميان هلال حسين، ميجر جنرل غيور محمود، ميجر جنرل نذير احمد بٽ،  ميجر جنرل هدايت الرحمان ۽ ميجر جنرل نويد مختار شامل آهن. آءِ ايس پي آر مطابق ميجر جنرل رضوان اختر کي ترقي ڏئي انٽر سروسز انٽيليجنس (آءِ ايس آءِ) جو ڊائريڪٽر جنرل مقرر ڪيو ويو آهي. هو 8 نومبر 2014ع تي پنهنجو عهدو سنڀاليندو. ميجر جنرل رضوان اختر پاڪ فوج جي فرنٽيئر فورس ريجمينٽ ۾ 1982ع ۾ ڪميشن حاصل ڪئي. هن ڪمانڊ اينڊ اسٽاف ڪاليج ڪوئيٽا مان گريجوئيشن ڪئي ۽ اين ڊي يو ۽ وار ڪورس آمريڪا مان ڪيو. ليفٽيننٽ جنرل رضوان اختر فاٽا ۾ انفينٽري برگيڊ ۽ ڊويزن جي ڪمانڊ پڻ ڪئي آهي ۽ هو پاڪستان رينجرس سنڌ جو ڊائريڪٽر جنرل پڻ رهي چڪو آهي. ميجر جنرل هلال حسين کي ترقي ڏيڻ بعد ڪور ڪمانڊر منگلا مقرر ڪيو ويو آهي، ميجر جنرل غيور محمود کي ترقي ڏئي ڪور ڪمانڊر گجرانوالا مقرر ڪيو ويو آهي، ميجر جنرل نويد مختار کي ترقي ڏئي ڪور ڪماندر ڪراچي مقرر ڪيو ويو آهي، ميجر جنرل هدايت الرحمان کي ترقي ڏيڻ بعد ڪور ڪمانڊر پشاور مقرر ڪيو ويو آهي، هوڏانهن ميجر جنرل نذير احمد بٽ کي ترقي ڏيڻ بعد سي آءِ اينڊ ٽي ۾ مقرر ڪيو ويو آهي، جاري ڪيل پڌرائي ۾ وڌيڪ ڄاڻايو ويو آهي ته ميجر جنرل ميان محمد هلال حسين هن وقت ڊائريڪٽر جنرل ملٽري ٽريننگ جي ايڇ ڪيو جي عهدي تي فائز هو. کيس 1982ع ۾ آرٽلري ريجمينٽ ۾ ڪميشن ڏني وئي. ميجر جنرل ميان محمد هلال حسين ڪمانڊ ۽ اسٽاف ڪاليج ڪوئيٽا، اين ڊي يو ۽ آسٽريليا مان گريجوئيشن جي ڊگري حاصل ڪئي. هو فاٽا ۾ انفينٽري برگيڊ جي ڪمان پڻ ڪئي آهي ۽ ڊائريڪٽر جنرل رينجرس پنجاب جي عهدي تي پڻ فائز رهيو آهي. هو گڏيل قومن پاڪستان جي مستقل نمائندي جو ملٽري ايڊوائزر ۽ صدر پاڪستان جو ملٽري سيڪريٽري پڻ رهي چڪو آهي. ميجر جنرل غيور محمود 1982ع ۾ فرنٽيئر فورس ريجمينٽ ۾ ڪميشن حاصل ڪئي. هن ڪمانڊ ۽ اسٽاف ڪاليج ڪوئيٽا، اين ڊي يو اسلام آباد ۽ ڪوالالمپور مان گريجوئيشن ڪئي. هو فاٽا ۾ انفينٽري ڊويزن جي ڪمان پڻ ڪري چڪو آهي. هو خيبرپختونخوا جي فرينٽيئر ڪور (ايف سي) جي ڊائريڪٽر جنرل جي عهدي تي فائز رهي چڪو آهي. ميجر جنرل غيور محمود هن وقت جنرل هيڊ ڪوارٽر ۾ وائيس چيف آف جنرل اسٽاف جي عهدي تي فائز پڻ رهي چڪو آهي. پاڪستان ملٽري اڪيڊمي جو ڪمانڊنٽ ميجر جنرل نذير احمد بٽ مارچ 1983ع ۾ فرنٽيئر فورس ريجمينٽ ۾ ڪميشن حاصل ڪئي. هن ڪمانڊ ۽ اسٽاف ڪاليج ڪوئيٽا ۽ اين ڊي يو اسلام آباد مان گريجوئيشن ڪئي. هو وزيراعظم جو ملٽري سيڪريٽري ۽ آمريڪا ۾ فوجي اتاشي جي عهدي تي پڻ فائز رهي چڪو آهي. هن پڻ فاٽا ۾ انفينٽري ڊويزن جي ڪمان پڻ ڪئي آهي. ميجر جنرل نويد مختار 1983ع ۾ آرمرڊ ڪور ريجمينٽ ۾ ڪميشن حاصل ڪئي آهي. هن ڪمانڊ اينڊ اسٽاف ڪاليج ڪوئيٽا ۽ اين ڊي يو اسلام آباد مان گريجوئيشن ۽ آمريڪا مان وار ڪورس پڻ ڪيو آهي. هو هن وقت آءِ ايس آءِ ۾ ڪم ڪري رهيو هو ۽ ميڪينائزڊ ڊويزن جي ڪمان پڻ ڪري چڪو آهي. ميجر جنرل هدايت الرحمان هن وقت اين ڊي يو اسلام آباد ۾ چيف انسٽرڪٽر جي عهدي تي فائز آهي ۽ هن 1983ع ۾ فوج  ۾ ڪميشن حاصل ڪئي. هو ڪمانڊ ۽ اسٽاف ڪاليج ڪوئيٽا ۽ اين ڊي يو اسلام آباد مان گريجوئيشن ڪئي. هو پڻ انفينٽري ڊويزن جي ڪمان پڻ ڪري چڪو آهي.

 

فلم ”خوبصورت“ پنهنجي اوپننگ جي ٻن ڏينهن ۾ 6 ڪروڙ رپين جو ڪاروبار ڪيو

ممبئي (شposter2وبز نيوز) سونم ڪپور ۽ پاڪستاني اداڪار فواد خان جي بالي ووڊ فلم ”خوبصورت“ پنهنجي اوپننگ جي ٻن ڏينهن ۾ صرف 6 ڪروڙ رپين جو ڪاروبار ڪيو، زريعن مطابق فلم خوبصورت جمعي تي پنهنجي رليز جي ڏينهن 2 ڪروڙ 74 لک ۽ ڇنڇر تي 3 ڪروڙ 74 لکبصورت ۾ فواد خان ۽ اداڪاره ڪرن کير جي اداڪاري کي پسند ڪيو ويو، جڏهن ته سونم اوور ايڪٽنگ جو شڪار نظر آئي، ڄاڻايل رپين جو ڪاروبار ڪيو، خوفلم 18 ڪروڙ رپين جي بجيٽ سان ٺاهي وئي آهي، فلم هڪ هفتي ۾ 18 ڪروڙ رپيا پورا ڪندي نظر اچي ٿي

بالي ووڊ ۾ شاندار انٽري بعد پاڪستاني اداڪار فواد خان جي وطن واپسي

لاهور (شوبز نيوز) بالي ووڊ جي ڪامياب فلم “خوبصورت” ۾ هيرو جو ڪردار ادا ڪندڙ پاڪستاني اداڪار فواد خان وطن واپس پهچي ويو. لاهور جي علامه اقبال انٽرنيشنل ايئرپورٽ تي ميڊيا سان ڳالهائيندي فواد خان جو چوڻ هو ته بالي ووڊ ۾ بڻيل سندس فلم “خوبصورت” ۳ ڏينهن 48 ڪروڙ رپين جو بزنس ڪيو آهي ۽ ان جو هر شو هائوس فل وڃي رهيو آهي. هن چيو ته ڀارت ۾ مونکي وڏي پذيرائي ملي آهي ۽ سونم ڪپور جهڙي سٺي اداڪار سان ڪم ڪري گهڻو ڪجهه سکڻ لاءِ مليو. فواد خان جو چوڻ هو ته مان سونم ڪپور کي پاڪستان اچڻ ۽ فلمن ۾ ڪم ڪرڻ جي آفر ڪئي آهي جيڪا هن قبولي ورتي آهي.

 

 

سنگيتا هڪ ڀيرو ٻيهر ٽي وي ڊرامن ۾ مصروف ٿي وئي

لاهور (شوبز نيوز) اداڪاره ۽ هدايتڪاره سنگيتا هڪ ڀيرو ٻيهر ٽي وي ڊرامن ۾ مصروف ٿي وئي آهي. سنگيتا اڄ ڪلهه ڪراچي ۾ ڊرامن جي شوٽنگ ۾ مصروف آهي. سنگيتا گذريل ڏينهن ايورنيو اسٽوڊيو ۾ ٻيهر فلمن جي ڊائريڪٽر  لاءِ پنهنجي آفيس ۾ ويهڻ شروع ڪري ڇڏيو هو. پر فلمي بحران سبب ڪنهن ناليواري فلمساز ان کان فلم ٺهرائڻ جي خواهش جو اظهار نه ڪيو. سنگيتا اڄ ڪلهه ٽي وي ڊرامن ۾ مصروف آهي

 

”دي فالٽ ان اوور اسٽارز“ هلندڙ سال سڀ کان وڌيڪ ڪامياب فلم، ٽن مهينن ۾ 300 ملين ڊالر جو ڪاروبار ڪيو

لاس ايجنلس (شوبز نيوز) فلم ”دي فالٽ ان اوور اسٽارز“ سموري دنيا ۾ 300 ملين ڊالرن جو ڪاروبار ڪري سال 2014ع جي سڀ کان ڪامياب فلم ثابت ٿي آهي، سڌ سماءَ جي ذريعن مطابق ڄانايل فلم 12 ملين ڊالر جي بجيٽ سان ٺاهي وئي هئي، جنهن جو هاڻي بالي ووڊ ميڪ به تيار ڪيو پيو وڃي. ان فلم جي ڪهاڻي ننڍي عمر جي هڪ جوڙي جي چوڌاري گهمي ٿي، سندن ملاقات ڪينر اسپورٽ گروپ ۾ شامل ٿيڻ کان پوءِ ٿيندي آهي. فلم کي جوش جون ڊائريڪٽ ڪيو آهي، اها فلم جون ۾ اُتر آمريڪا ۾ رليز ڪئي وئي هئي

 

فلم ”دعوت عشق“ جي اوپننگ وچولي درجي جي رهي، ٻن ڏينهن ۾ 8 ڪروڙ رپين جو بزنس ڪيو

ممبئي (شوبز نيوز) ڀارتي فلم ”دعوت عشق“ جي اوپننگ وچولي درجي جي رهي. گذريل ڏينهن تي پنهنجي رليز جي ٻن ڏينهن ۾ فلم رڳو 8 ڪروڙ رپيا ڪمايا، پهرين ڏينهن فلم 4.75 ڪروڙ ۽ ٻين ڏينهن تي سوا 3 ڪروڙ ڀارتي رپين جو ڪاروبار ڪيو پر ان فلم کي ڪمائي جي نظر ۾ سونم ڪپور جي فلم ”خوبصورت“ جي ڀيٽ ۾ بهتر قرار ڏنو ويو آهي