تازيون خبرون

Daily Archives: September 18, 2014

قومي ٽي – 20 ڪپ ۾ اڄ ٽن ميچن جو فيصلو ٿيندو

اسلام آباد (اسپورٽس نيوز) قومي ٽي – 20 ڪپ ۾ (اڄ) جمعي ڏينهن ٽن ميچن جو فيصلو ٿيندو، تفصيل مطابق پي سي بي جي اهتمام هيٺ قومي ٽي – 20 ڪپ جا دلچسپ مقابلا نيشنل اسٽيڊيم ڪراچي ۾ جاري آهن، ان سلسلي جي پهرئين ميچ ۾ لاڙڪاڻو بلز ۽ سيالڪوٽ اسٽاليز جي ٽيمن وچ ۾ مقابلو ٿيندو، جڏهن تي ٻي ميچ فاٽا چيتاز ۽ ملتان ٽائيگرز جڏهن ته ٽئين ميچ ڪراچي ڊولفنز ۽ ڪوئيٽا بيئرز جي وچ ۾ کيڏي ويندي، 50هين قومي ٽي – 20 ڪپ ۾ سڀاڻي ڇنڇر تي ٽن ميچن جو فيصلو ٿيندو.

 

چيمپينز ٽرافي هاڪي ٽورنامينٽ 6 ڊسمبر کان ڀارت ۾ شروع ٿيندي

نئين دهلي (اbrunettes blondes women soccer 1920x1200 wallpaper_www.wallpapername.com_32سپورٽس نيوز) چيمپينز ٽرافي هاڪي ٽورنامينٽ 6 ڊسمبر کان ڀارت ۾ شروع ٿيندي، هاڪي جي ان ايونٽ ۾ گرين شرٽس کي گروپ اي ۾ آسٽريليا، انگلينڊ ۽ بيلجيئم سان گڏ رکيو ويو آهي، تفصيل مطابق ان سلسلي ۾ انٽرنيشنل هاڪي فيڊريشن (ايف آءِ ايڇ) هاڪي چيمپينز ٽرافي جي پولز ۽ ميچ شيڊول جو اعلان ڪيو آهي، 9 ڏينهن ج ايونٽ 6 ڊسمبر کان شروع ٿي 14 ڊسمبر تي ختم ٿيندو، جڏهن ته ان ايونٽ کي ڪامياب منعقد ڪرائڻ لاءِ ڀارت ۾ تياريون جاري آهن، عالمي چيمپين آسٽريلوي ٽيم ايونٽ ۾ ٽائيٽل جو دفاع ڪندي، جڏهن ته پاڪستاني ٽيم کي گروپ اي ۾ دفاعي چيمپين آسٽريليا، ڪامن ويلٿ گيمز برونز ميڊلسٽ انگلينڊ ۽ يورو نيشنز سلور ميڊلسٽ بيلجيئم جڏهن ته گروپ بي ۾ ميزبان ڀارت، ارجنٽائن،هالينڊ ۽ جرمني شامل آهن.

 

اسڪاٽ لينڊ جي آزادي ڏانهن اڏام: عبدالصبور گاڏهي

سماجي سائنس ۾ اسان جيڪڏهن ريفرنڊم جي وضاحت ڪنداسين ته اسان کي Direct Democracy  جو لفظ ملندو، جنهن ۾ عوام سڌي طرح پنهنجي راءِ جو اظهار ڪري ٿو، پوءِ اها ڪنهن آمريت کي وڌيڪ هٿي ڏيڻ لاءِ هجي يا وري وقت جي حڪمران کان سڌيءَ ريت ملڪي پاليسي لاءِ ريفرنڊم جو سهارو ورتو ويو هجي، ڪجهه ترقي يافته رياستن ۾ ته ضروري قانوني سازي Legislation لاءِ به سڌي طرح عوام کان راءِ ورتي وئي آهي، انهيءَ تي ڪڏهن ٻئي دفعي لکبو، اڄ صرف برطانوي شهنشاهيت جي زيراثر نيم خودمختيار رياست اسڪاٽ لينڊ ۾ ٿيندڙ آزاد رياست ۽ برطانيا سرڪار کان مڪمل آزادي لاءِ ٿيندڙ ريفرنڊم تي ڳالهائينداسين، دنيا جي خبرن واري شعبي ۾ ٻين خبرن سان گڏوگڏ اڄ 18 سيپٽمبر تي رٿيل ريفرنڊم به بحث هيٺ آهي.

اسڪاٽ لينڊ جي Scotish National Party جي صدر ايلڪس سيموئينڊ اسڪاٽ لينڊ جي آزادي جي حامي پارٽي آهي، جيڪا تمام ڀرپور نموني سان آزادي جي حق ۾ مهم هلائي رهي آهي، جڏهن ته ٻين ادارن جي سروي مان ان ڳالهه جو اندازو لڳايو پيو وڃي، ته ريفرنڊم جا نتيجا ٿوري ئي فرق سان “ها” يا “نه” ۾ اچي سگهن ٿا، SNP پارٽي اڳواڻ اليڪس سيموئينڊ ان ڳالهه تي زور ڀري رهيو آهي ته جيڪڏهن اسڪاٽ لينڊ جا ماڻهو آزادي جي حق ۾ ووٽ ڏين ٿا ته ملڪ ۾ تمام وڏي سماجي تبديلي اچي سگهي ٿي ۽ ان ڳالهه تي وڌيڪ زور ڏنو ته اسڪاٽ لينڊ ۾ موجود تيل جي ذخيرن، روانگي ۽ برآمدگي واپار مان ايترو ڪجهه حاصل ٿي سگهي ٿو جو اسين دنيا جي عظيم ملڪن ۾ شمار ٿي سگهون ٿا، هن وقت به اسڪاٽ لينڊ جي پنهنجي الڳ پارليامينٽ موجود آهي، پر ٽيڪس، پرڏيهي پاليسي ۽ اقتصادي پاليسي تي برطانيا پوري طرح حاوي آهي 300 سالن کان برطانيا سان گڏ رهندڙ اسڪاٽ لينڊ جا ماڻهو آزاد ٿيڻ لاءِ دٻاءُ جو شڪار آهن، ته ڪٿي برطانيا کان الڳ ٿيڻ کان پوءِ اسان پنهنجي سڃاڻپ وڃائي نه ڇڏيون ۽ ٻئي طرف برطانوي وزيراعظم ڊيوڊ ڪيمرون به هڪ هفتي ۾ ٻه دفعا اسڪاٽ لينڊ جو دورو ڪري چڪو آهي، ته جيئن اسڪاٽ لينڊ کي وڃائڻ کان بچائي سگهجي دوري جو مقصد صرف اهو آهي ته ريفرنڊم ۾ “ها” جي حامين کي “نه ” ۾ تبديل ڪري اسڪاٽ لينڊ کي برطانيا جو حصو رهڻ ڏنو وڃي، 1970ع ۾ به ساڳئي نموني برطانيا جي سرڪار اتر آئرلينڊ کي آزادي ڏيڻ واسطي ريفرنڊم ڪرايو هو، جنهن ۾ ريفرنڊم واري آزادي پسندن ووٽن جو بائيڪاٽ ڪري ڇڏيو هو، ۽ نتيجا هڪ پاسي جا اچي ويا، يعنيٰ ته اسان برطانيا سان گڏ رهڻ چاهيون ٿا، هن وقت به اها ئي  صورتحال آهي پر تجزيه نگارن جو اندازو آهي ته نتيجن ۾ “ها” يا “نه” لاءِ ٿورو ئي فرق هوندو، جنهن لاءِ اسان کي اڄ 18 سيپٽمبر جو انتظار ڪرڻو پوندو.

اسڪاٽ لينڊ تي هڪ نظر:

هي علائقو 3 طرفن کان ائٽلانٽڪ سمنڊ جي گهيري ۾ آهي ۽ صرف ڏاکڻي سرحد برطانيا سان ملي ٿي، اسڪاٽ لينڊ جو علائقو تقريبن 790 ننڍن وڏن ٻيٽن تي ٻڌل آهي، جنهن کي ٽوٽل ايراضي  Sq Miles30414 آهي، 2011ع ۾ ٿيندڙ آدمشماري مطابق اسڪاٽ لينڊ جي آبادي 5313600 ماڻهن تي مشتمل آهي، ايڊنبرگ جيڪو اسڪاٽ لينڊ جو ٻيو نمبر وڏو شهر آهي ۽ گادي جو هنڌ پڻ آهي،  گلاسڪو جيڪو وڏي شهر هجڻ سان گڏوگڏ واپاري مرڪزي شهر پڻ آهي، ان کان علاوه ايبرڍين، ديونڊي، انورنس، اسٽرلنگ سميت ٻيا ڪافي وڏا شهر آهن، اسڪاٽ لينڊ جي معيشيت جو دارومدار گلاسڪو شهر ۾ موجود Industrial Zoon تي وڌيڪ آهي، جتي اسٽيل ۽ پيٽروليم سان لاڳاپيل تيل جو واپار ڪيو ويندو آهي، آمريڪا، هائلينڊ، جرمني، فرانس، ان واپار جا مکيه مارڪيٽ آهن، 2011ع جي آدمشماري مطابق تقريبن 54 سيڪڙو اسڪاٽ لينڊ جا ماڻهو عيسائيت جا پيروڪار آهن، جڏهن ته 37 سيڪڙو اهڙا ماڻهو آهن، جيڪي ڪنهن به مذهب سان واسطو رکندڙ ناهن، جڏهن ته 0.9 سيڪڙو ماڻهو اسلام کي مڃيندڙ آهن، ان کان علاوه يهودي، سک ۽ هندو مذهبن جا ماڻهو به اتي آباد آهن، اسڪاٽ لينڊ ۾ ٽن ٻولين کي سرڪاري اهميت حاصل آهي، جنهن ۾ English,  ،Gaelic ۽ Scots  آهن.

اسڪاٽ لينڊ جي پنهنجي الڳ پارليامينٽ آهي، جنهن ۾ 129 ميمبر اسڪاٽ لينڊ جي 32 ڪائونسلز ۽ ريجنس مان 4 سالن لاءِ چونڊجي ايندا آهن،  انهن کي Member of the Scots Parliament سڏيو ويندو آهي،  ان کان علاوه 59 ميمبر برطانوي  House of Common جا ميمبر آهن، جيڪي اسڪاٽ لينڊ جي نمائندگي ڪن ٿا، 1997 ۾ برطانيه ۾ هڪ ريفرينڊم ذريعي اسڪاٽ لينڊ کي پنهنجي  قانون سازي لاءِ محدود اختيار ڏنا ويا هئا،  جيڪو بعد ۾ Scotland act 1998 جي نالي سان برطانوي پارليامينٽ مان منظور ڪرايو ويو هو، ان ئي ايڪٽ جي روشني ۾ 2006 ۾ پهريون ڀيرو اسڪاٽ لينڊ ۾ آزاد اليڪشن ڪرائي وئي.

هاڻي ڏسجي ته ڇا اسڪاٽ لينڊ جا ماڻهو ريفرينڊم ذريعي آزادي ماڻين ٿا يا وري پنهنجي سڃاڻپ وڃائڻ جي خوف کان برطانيا سان گڏ رهڻ کي اوليت ڏين ٿا جيڪڏهن واقعي اسڪاٽ لينڊ هڪ پرامن ريفرينڊم ذريعي آزادي حاصل ڪري دنيا جي نقشي تي هڪ آزاد رياست جي حيثيت سان نروار ٿئي ٿو ته يقينن ڏاڍي اٿساهه ڏيندڙ ڳالهه هوندي ڇو ته هن وقت دنيا ۾ ڪافي آزادي جو تحريڪون هلي رهيون آهن، جيڪي اڳتي هلي پڻ ريفرينڊم جو مطالبو ڪري سگهن ٿيون.

 

وحشي صفت جو هڪ ڀيرو ٻيهر انسانيت تي حملو

ڏهرڪي جي قطب ٽائون ۾ سورنهن سالن جي عرفان پٽ فيض الله شيخ پنهنجي ئي برادري جي ڇهن سالن جي زيب ڌيءَ محمد نواز شيخ کي بهاني سان بٺي لڳ هڪ خالي پيل جاءِ ۾ کڻي وڃي حوس جو نشانو بنائڻ بعدکيس واهه ۾ اڇلائي فرار ٿي ويو، اطلاع ملڻ تي نينگري جي والد محمد نواز، امڙ زرينه پنهنجي ننڍڙي پٽ ۽ ننڍي ڌيءُ سان گڏ زيب کي گڏهه گاڏي تي کڻي ٿاڻي تي پهتا، جتان پوليس وارن کين ليٽر ڏئي اسپتال روانو ڪيو، متاثر ٻارڙي جي امڙ دانهون ڪندي سرڪاري اسپتال ڏهرڪي پهتي ته ڊاڪٽرن ٻارڙيءَ کي فرسٽ ايڊ ڏيڻ بدران اهو چئي ايمبولينس به نه ڏني ته اسان وٽ ليڊي ڊاڪٽر ڪونهي، هي ڪيس اسان جو نه آهي ۽ اوهان نينگري کي کڻي گهوٽڪي اسپتال وڃو، جنهن بعد محمد نواز پنهنجي نياڻي کي بس ۾ کڻائي گهوٽڪي اسپتال ويو، ان موقعي تي صحافين سان ڳالهائيندي نينگري زيب جي پيءُ محمد نواز ميڊيا سان ڳالهائيندي چيو ته مان گڏهه گاڏو هلائيندو آهيان، منهنجي نياڻي سان ظلم ٿيو آهي، هن چيو ته غربت سبب اسان جا پاڙي وارا ۽ برادري جا ماڻهو به ساٿ ڏيڻ لاءِ تيار ناهن پوليس ڏي وياسين ته هنن ڪچي پني تي فرياد وٺي اسان جي هٿ ۾ ليٽر ڏنو ۽ سرڪاري اسپتال وارن منهنجي نينگري کي هڪ سئي به نه هنئي ۽ ايمبولنس به نه ڏني ۽ چيو ته هي ڪيس گهوٽڪي جو آهي هتي ڊاڪٽرياڻي موجود ڪونهي. هوڏانهن، واقعي بعد عرفان شيخ جي والد فيض الله وارا پنهنجو گهر خالي ڪري ويا آهن، جڏهن ته ڏهرڪي پوليس نالي ماتر ڪارروائي ڪئي پر جوابدار هٿ نه آيو،

 

حيدرآباد ليڊي هيلٿ ورڪرن جو احتجاج ۽ انتظاميه

آل پاڪستان ليڊي هيلٿ ورڪرس ايمپلائيز ايسوسيئشن سنڌ  طرفان حڪومت پاران پڪو نه ڪرڻ خلاف اعلانيل احتجاج جي سلسلي ۾ ڪالهه حيدرآباد پريس ڪلب سامهون سوين ليڊي هيلٿ ورڪرن نٽهڻ اس ۾ احتجاجي  مظاهرو ڪري مرڻ گهڙي تائين بک هڙتال جو اعلان ڪيو، 5 ڪلاڪ مسلسل ليڊي هيلٿ ورڪرن مطالبن جي مڃتا لاءِ نٽهڻ اُس ۾ ڌرڻو هڻي ويٺل رهيون، جنهن بعد صحت کاتي جي صوبائي ڪوآرڊينيٽر روشن ڀٽي ڌرڻي واري هنڌ پهچي ليڊي هيلٿ ورڪرن کي يقين ڏياريو ته سندن مطالبا 25 سيپٽمبر تائين حل ڪري ليڊي هيلٿ ورڪرز کي پڪا آرڊر ڏنا ويندا، اهڙي يقين ڌياني بعد ليڊي هيلٿ ورڪرن مرڻ گهڙي تائين اعلانيل بک هڙتال واپس ورتي ۽ پنهنجو ڌرڻو ختم ڪيو. ان موقعي تي ليڊي هيلٿ ورڪرز ايسوسيئيشن سنڌ جي صدر حليمه لغاري ”عوامي آواز“ کي ٻڌايو ته عدالتي حڪم ۽ صحت کاتي سنڌ پاران ليڊي هيلٿ ورڪرز کي پڪو ڪرڻ جي سلسلي ۾ جوڙيل ڪاميٽين پاران ڪاغذن جي ڇنڊڇاڻ باوجود سنڌ جي 24 هزار 68 ليڊي هيلٿ ورڪرن کي پڪو ناهي ڪيو ويو. هن چيو ته صحت کاتي جي اهڙي لاپرواهي مان ظاهر ٿي رهيو آهي ته حڪومت ليڊي هيلٿ ورڪرز کي پڪو ڪرڻ ۾ سنجيده نظر نٿي اچي. هن چيو ته اسان اهو محسوس ڪيو آهي ته سنڌ حڪومت پنهنجون من پسند ليڊي هيلٿ ورڪرز ڀرتي ڪرڻ چاهي ٿي. هن چيو ته سندن بار بار چتاءُ ڏيڻ باوجود ليڊي هيلٿ ورڪرن جي مسئلي طرف ڌيان نه ڏنو ويو، جنهن سبب مجبور ٿي احتجاجي تحريڪ شروع ڪئي. هن چيو ته جيڪڏهن سندن مسئلا 25 سيپٽمبر تائين حل نه ڪيا ويا ته هو حيدرآباد پريس ڪلب سامهون مرڻ گهڙيءَ تائين بک هڙتال جاري رکنديون. هوڏانهن صحت کاتي جي صوبائي ڪوآرڊينيٽر روشن ڀٽي ليڊي هيلٿ ورڪرز پاران مطالبن جي مڃتاءَ لاءِ حيدرآباد پريس ڪلب سامهون لڳل ڌرڻي تي پهچي ليڊي هيلٿ ورڪرز کي اها يقين ڌياني ڪرائي ته سمورين ليڊي هيلٿ ورڪرز جا مطالبا منظور ڪري کين 25 سيپٽمبر تائين پڪا آرڊر ڏنا ويندا، جنهن تي ليڊي هيلٿ ورڪرز پنهنجو احتجاجي ڌرڻو ختم ڪيو. ليڊي هيلٿ ورڪرز سان يڪجهتي طور عوامي جمهوري پارٽي جو اڳواڻ مختيار عباسي ڌرڻي ۾ شامل ٿيو. ضرورت ان ڳالهه جي آهي ته حڪومت کي گهرجي ته ليڊي هيلٿ ورڪرز جا جائز مطالبا منظور ڪري ۽ انهن کي رليف فراهم ڪري.