تازيون خبرون

دفاعي نمائش آئيڊياز 2016ع

وزيراعظم نواز شريف دفاعي نمائش جو افتتاح ڪيو. افتتاحي تقريب ۽ سيمينار ۾ ٽنهي هٿياربند فوجن جي سربراهن، جوائنٽ چيفس آف اسٽاف ڪميٽي جي چيئرمين، دفاعي وزير خواجا آصف، دفاعي پيداوار جي وزير راڻا تنوير، سنڌ جي وڏي وزير مراد علي شاهه ۽ وفاقي وزيرن شرڪت ڪئي. نمائش ۾ 43 ملڪن جا 90 وفد شرڪت ڪري رهيا آهن ۽ انهن مان 30 نمائندا اعليٰ سطح جا آهن جن جي سربراهي انهن ملڪن جا دفاعي وزير، ڊفينس سيڪريٽريز، چيف ڊفيس اسٽاف ۽ حاضر سروس چيفس پاڻ ڪندا. مجموعي طور تي 261 پرڏيهي ۽ 157 پاڪستاني ڪمپنيون حصو وٺي رهيون آهن جڏهن ته 34 ملڪن جون 418 ڪمپنين نمائش ۾ پنهنجيون شيون رکيون آهن. عالمي دفاعي نمائش لاءِ سڪيورٽي جا انتظام انتهائي سخت ڪيا ويا آهي. سڪيورٽي پلان موجب 2 ايس پيز، 4 ڊي ايس پيز سميت 2 هزار پوليس اهلڪار سڪيورٽي تي مقرر آهن،سوڪ سينٽر جي چوڌاري روڊ ٽريفڪ لاءِ بند ڪيا پيا وڃن جڏهن ته شهرين کي متبادل رستا اختيار ڪرڻ جي به هدايت ڪئي وئي آهي.

دفاعي نمائش آئيڊياز جي افتتاحي تقريب کي خطاب ڪندي وزيراعظم جو چوڻ هو ته آئيڊياز 2016ع افتتاح ڪرڻ تي هـُو الله تعاليٰ جو ٿورائتو آهي ۽ نمائش ۾ شرڪت تي خوشي آهي. پاڪستان خطي ۾ هٿيارن جي ڊوڙ خلاف آهي ۽ سندن دفاعي اوزار امن کي هٿي وٺرائڻ لاءِ آهن، پاڪستان جون دفاعي شيون جديد ترين آهن ۽ ان جو مقابلو عالمي سطح تي ڪري سگهجي ٿو. پاڪستان ۾ دفاعي صنعت تيزي سان ترقي جي مرحلا عبور ڪري رهي آهي ملڪ ۾ سيڙپڪاري جا بهترين موقعا موجود آهن ۽ وياج جي شرح به ملڪي تاريخ جي گهٽ ترين سطح تي آهي هلندڙ سال جـِي ڊي پي 5کان وڌيڪ جو امڪان آهي. پاڪستان جي معاشي ترقي جو ذڪر عالمي سطح تي ڪيو پيو وڃي جنهن سبب اسٽينڊرڊ اينڊ پورز سميت موڊيز پاڪستان جي ڪريڊٽ ريٽنگ بهتر ڪئي آهي. حڪومت مستحڪم ۽ مضبوط معيشت لاءِ پـُرعزم آهي ۽ ملڪ ۾ پرڏيهي سيڙپڪاري کي ڀليڪار چيو ويندو. ملڪ ۾ توانائي جي کوٽ پوري ڪرڻ لاءِ ڪيترن ئي منصوبن تي ڪم ٿي رهيو آهي ۽ صنعتن ۾ لوڊشيڊنگ به ختم ڪئي وئي آهي 2018ع تائين توانائي جي بحران تي ڪنٽرول ڪيو ويندو. ملڪ اندر دهشتگردي جي واقعن ۾ گهٽائي ٿي آهي.34 ملڪن جي 418 ڪمپنين پاران پنهنجيون شيون رکيون ويون آهن، الخالد ٽينڪ، جـَي ايف سيونٽين ٿـَنڊر ۽ ٻيا جديد هٿيار به نمائش جو حصو آهن. ڪراچي جي ايڪسپو سينٽر ۾ دفاعي نمائش آئيڊياز 2016ع جي شروعات ٿي چڪي آهي،جيڪا 4 ڏينهن تائين جاري رهندي.

 

Leave a Reply

Your email address will not be published. Required fields are marked *