تازيون خبرون

Category Archives: رانديون

سڄي حياتي وليمسن کان معافي گهرندو رهندس: اسٽوڪس

 

لنڊن (اسپورٽس نيوز) انگلينڊ کي پهرين ڀيرو عالمي چيمپيئن بڻائيندڙ آل رائونڊر بين اسٽوڪس عالمي ڪپ فائنل جي آخري اوور ۾ اڻڄاڻي ۾ بال جي رستي ۾ اچڻ تي ۽ اوور ٿرو جون چار رنسون ملڻ تي نيوزيلينڊ جي ڪپتان ڪين وليمسن کان معافي گهري ورتي آهي.لارڊز جي تاريخي ميدان تي ٿيل دلچسپ فائنل مقابلي ۾ انگلينڊ کي ڪاميابي لاءِ آخري اوور ۾ 15 رنسون گهربل هيون ۽  ٽيم آخري اميد بين اسٽوڪس ڪريز تي موجود هو.ڪيوي فاسٽ بالر بولٽ طرفان هلايل آخري اوور جي پهرين ٻن بالن تي ڪا به رنس نه ٺهي جنهن کانپوءِ ٽئين بال تي اسٽوڪس ڇڪو هنيو، اوور جو چوٿون بال تي هن ڊيپ مڊ وڪيٽ طرف کيڏيو ۽ ٻن رنسون ٺاهڻ لاءِ ڀڳو، ٻي رنس لاءِ واپسي ڪندي هن وڪيٽ بچائڻ لاءِ ڊائيو هنئي ته فيلڊر طرفان اڇلايل ٿرو ساڻس ٽڪرائي ٿرڊ مين بائونڊي پار ڪري ويو ، اهڙي ريت انگلينڊ کي ٻن بدران اضافي چار رنسن سان گڏ گڏيل طور تي 6 رنسون ملي ويون.باقي رهيل ٻن بالن تي انگلينڊ کي ڪاميابي لاءِ 3 رنسون گهربل هيون پر اسٽوڪس سمورين ڪوششن باوجود رڳو 2 رنسون ئي ٺاهي سگهيو ۽ ميچ برابر ٿي وئي.جنهن کانپوءِ سپر اوور ۾ به مقابلو ٽاءِ رهيو ۽ وڌيڪ بائونڊرين جي بنياد تي انگلش ٽيم ورلڊ چيمپيئن بڻجڻ ۾ ڪاميابي ٿي وئي.ان ڳالهه ۾ ڪو به شڪ ناهي ته اهي چار رنسون ميچ جي نتيجي تي اثر انداز ٿيون ۽ انگلينڊ جي ڪاميابي ۾ اهم ڪردار ادا ڪيو جنهن جي اهميت بين بين اسٽوڪس به  سمجهي ورتي.ميچ کانپوءِ واقعي بابت ڳالهائيندي بين اسٽوڪس چيو ته اوور ٿرو تي ڪين وليمسن کان معافي گهري ورتي آهي. آل رائونڊر چيو ته مون ڪين وليمسن کي چيو ته آئون ان لاءِ سڄي حياتي معافي گهرندو رهندس.جڏهن ڪين وليمسن کان ان بابت سوال ڪيو ويو ته هن جواب ڏيندي چيو ته ڪرڪيٽ ۾ اهڙي قسم جو شيون ٿينديون رهنديون آهن.،

 

ورلڊ ڪپ

ورلڊ ڪپ

 

مارٽن گپٽل عالمي ڪپ ۾ ذڪر جوڳي ڪارڪردگي نه ڏيکاري سگهيو

 

لنڊن(اسپورٽس نيوز) ڪرڪيٽ عالمي ڪپ 2019 نيوزيلينڊ ڪرڪيٽ ٽيم جي ڀلوڙ اوپننگ بيٽسمين مارٽن گپٽل انتهائي برو ثابت ٿيو.پنهنجي تيز بيٽنگ سبب سڃاتو ويندڙ مارٽن گپٽل هن عالمي ڪپ ۾ ذڪر جوڳي ڪارڪردگي ڏيکارڻ ۾ ناڪام رهيو.2015ع جو هيرو ورلڊ ڪپ 2019ع جي 11 ميچن ۾ رڳو 186 رنسون ٺاهي سگهيو، جنهن ۾ رڳو هڪ اڌ سينچري شامل هئي.اڄ لارڊز جي تاريخي ميدان کيڏي ويندڙ فائنل مقابلي ۾ به هو رڳو 19 رنسون ٺاهي ڪرس ووڪس جي بال تي ايل بي ڊبليو ٿي ويو.ها پر گپٽل هن عالمي ڪپ ۾ بهترين فيلڊنگ جو مظاهرو ڪندي سڀ کان وڌيڪ رنسون بچايون آهن، هن سيمي فائنل ۾ ايم ايس ڌوني کي رن آئوٽ ڪري نيوزيلينڊ جي فائنل ۾ جڳهه يقيني بڻائي هئي.

 

مان ٽيم ۾ واپس اچڻ جو ڪو به مطالبو نه ڪيو هو : اي بي ڊي ويليئرز

 

جوهانسبرگ (اسپورٽس نيوز) ڏکڻ آفريقي ڪرڪيٽ ٽيم جي اڳوڻي ڪپتان اي بي ڊي ويليئرز ورلڊ ڪپ اسڪواڊ ۾ واپسي جي ڪوشش بابت هلندڙ خبرن جي ترديد ڪندي چيو آهي ته هن ٽيم ۾ واپس اچڻ جو ڪو به مطالبو نه ڪيو هو.واضح رهي ته ورلڊ ڪپ دوران ڏکڻ آفريقي ٽيم جي لاڳيتو شڪستن کان پوءِ اهي خبرون سامهون آيون هيون ته اي بي ڊي ويليئرز ڪپتان فاف ڊيوپليسي سان ڳالهايو ۽ اسڪواڊ جي اعلان کان رڳو 24 ڪلاڪ اڳ پنهنجي موجود هجڻ بابت آگاهه ڪيو پر سليڪٽرز هن کي تسليم نه ڪيو.ڏکڻ آفريقا جي ڪرڪيٽ چونڊ پئنل جي سربراهه لنڊا زوني بعد ۾ ڊي ويليئرز جي آخري لمحن جي آڇ کي رد ڪرڻ جي تصديق ڪندي چيو هو ته اهو فيصلو ”اخلاقن ۽ اصولن“ کي نظر ۾ رکندي ڪيو ويو آهي.مئي 2018 ۾ انٽرنيشنل ڪرڪيٽ تان ريٽائرمينٽ جو اعلان ڪندڙ اي بي ڊويليئرز ان حوالي سان ٽوئيٽر تي هڪ بيان ۾ چيو آهي ته آئون ٽيم جو حصو بڻجڻ جي اميد نه ڪري رهيو هيس پر ورلڊ ڪپ ۾ امڪاني واپسي جي حوالي سان سوال تي آئون اتفاق ڪيو ته ها واپسي جو در کليل آهي، جيتوڻيڪ ان دوران ٽيم ٽورنامينٽ ۾ هلي وئي ۽ آئون ڪنهن سان به ناراض آهيان.هن چيو ته آئون ڪو به مطالبو ناهي ڪيو، آئون ٽورنامينٽ جي موقعي تي ورلڊ ڪپ اسڪواڊ ۾ پنهنجو رستو ڳولڻ جي ڪوشش صفا نه ڪئي ۽ نه ئي ان ۾ زبردستي شامل ٿيڻ جي مون کي ڪا اميد هئي، مون طرفان ڪو به مسئلو نه هو ۽ نه ئي ڪنهن ناانصافي جو احساس هو.ڊيويليئرز ان ڳالهه جي تصديق ڪئي ته هن ٽيم جي ڪپتان فاف ڊوپليسي سان ڳالهايو هو. سندس چوڻ هو ته فاف ۽ آئون اسڪول کان وٺي دوست آهيون ۽ ورلڊ ڪپ لاءِ ٽيم جو اعلان ٿيڻ کان ٻه ڏينهن اڳ منهنجي هن سان ڳالهه ٻولهه ٿي هئي، آئون انڊين پريميئر ليگ دوران سٺي فارم ۾ هيس ۽ آئون جيڪو به چيو هو ۽ ماضي جي ڳالهه ورجائيندي چيو هو ته جيڪڏهن ضرورت پئي ته آئون موجود آهيان پر رڳو ان صورت ۾ ته جيڪڏهن ٽيم کي منهنجي ضرورت هجي ته.ان ڳالهه ٻولهه جا تفصيل پهريون ڀيرو 6 جون تي سامهون آيا، جڏهن ڏکڻ آفريقا کي ورلڊ ڪپ ۾ ڀارت هٿان ناڪامي جو منهن ڏسڻو پيو، جيڪا ايونٽ ۾ هنن جي لاڳيتي ٽين شڪست هئي. اهو ايونٽ ڏکڻ آفريقا لاءِ ڪنهن ڀوائتي خواب کان گھٽ نه هو، جتي هو رڳو ٽي ميچون کٽڻ مان ڪامياب ٿيا ۽ 7 پوائنٽون حاصل ڪري سگهيا.اي بي موجب اها ڪهاڻي مان ميڊيا ۾ منظر تي نه کڻي آيس ۽ مون کي ان ڳالهه سان ڪو به فرق نٿو پوي ته اها ڪنهن منظر آندي پر ان ذريعي مون کي غلط انداز ۾ ضدي ۽ خود غرض ظاهر ڪرڻ جي ڪوشش ڪئي وئي، آئون گھڻي عاجزي سان چوان ٿو ته منهنجو ضمير صاف آهي.هن انٽرنيشنل ڪرڪيٽ  تان رٽائرمينٽ جو اعلان ڪندي چيو هو ته پنهنجي ڪم جو بار گھٽائڻ چاهيان ٿو ۽ اي بي هڪ ڀيرو ٻيهر واضح ڪيو ته رڳو چونڊيل 20 ليگز ۾ کيڏي رهيو آهي ۽ مالي فائدا منهنجي ترجيح ناهن.

 

امپائر سان جهيڙو ڪرڻ تي انگلينڊ جي رانديگر جيسن راءِ تي ڏنڊ لاڳو

 

ايجبيسٽن:(اسپورٽس نيوز) آءِ سي سي ورلڊ ڪپ 2019ع جي ٻئي سيمي فائنل ۾ انگلش بيٽسمين جيسن راءِ تي امپائر سان جهيڙو ڪرڻ تي ميچ فيس جو 30 سيڪڙو ڏنڊ لاڳو ڪيو ويو .آسٽريليا خلاف ميچ ۾ بيٽنگ ڪندي انگلش بيٽسمين جڏهن 85 رنسن تي پهتو ته پيٽ ڪيومنس جي بال تي سريلنڪن امپائر ڪمارا ڌرماسينا طرفان آئوٽ قرار ڏيڻ تي جيسن راءِ امپائر سان ڏند چڪ ڏنا. آءِ سي سي ظابطه اخلاق جي آرٽيڪل 2.8 جي ڀڃڪڙي ڪرڻ سبب انگلش بيٽسمين تي ميچ فيس جو 30 سيڪڙو ڏنڊ لاڳو ڪيو ويو آهي.آءِ سي سي طرفان جاري ڪيل بيان موجب جيسن راءِ پنهنجي غلطي مڃي ورتي آهي جنهن کانپوءِ ان معاملي ۾ وڌيڪ ڪارروائي جي ضرورت ناهي. راءِ جي غلطي مڃڻ کانپوءِ مٿس ميچ فيس جو 30 سيڪڙو ڏنڊ هنيو ويو ۽ هو پابندي کان بچي ويو آهي، انکانسواءِ ظابطه اخلاق جي ڀڃڪڙي تي جيسن راءِ  جي ريڪارڊ ۾ ٻن ڊي ميرٽ پوائنٽن کي به شامل ڪيو ويو آهي.واضح رهي ته ان کان اڳ عالمي ڪپ ۾ ڀارتي ڪپتان ورات ڪوهلي تي به آءِ سي سي قانونن جي ڀڃڪڙي ڪرڻ ڏنڊ هنيو ويو هو. ياد رهي ته ورلڊ ڪپ 2019 جي ٻئين سيمي فائنل ۾ انگلينڊ روايتي مخالف آسٽريليا کي هارائيندي 27 سالن کان پوءِ ورلڊ ڪپ فائنل کيڏڻ جو اعزاز حاصل ڪيو آهي.

 

ڀارت جي شڪست تي سوشل ميڊيا تي نيوزيلينڊ جي واکاڻ

 

ڪراچي(اسپورٽس نيوز) ڪرڪيٽ ورلڊ ڪپ 2019ع جي پهرين سيمي فائنل ۾ نيوزيلينڊ ڀارت کي شڪست ڏئي فائنل ۾ جاءِ ٺاهي ورتي آهي.ڀارتي ٽيم جي شڪست سان گڏ ئي پاڪستاني ٽوئٽر صارفين پاران سوشل ميڊيا تي ميمز شيئر ڪرڻ جو سلسلو جاري آهي، ميچ جي پڄاڻي تي جتي ڀارتي مداح ڪوهلي اليون جي ڪارڪردگي مان مايوسي ظاهر ڪري رهيا آهن اُتي وري پاڪستاني خوشي جو اظهار ڪري رهيا آهن.هڪ صارف لکيو ته نيوزيلينڊ کي شڪست ڏيڻ هر ڪنهن جي وس جي ڳالهه ناهي، هڪ ٻئي صارف آڇ ڪئي ته ڀارت جيڪڏهن چاهي ته پاڪستان کان چانهه جو ڪپ وٺي ڇڏي. هڪ صارف نيوزيلينڊ جي وزير اعظم جيسنڊا آرڊرن جي تصوير تي ڪيپشن لکيو ته“اوهان جي ڀيڻ ڪشمير به آزاد ڪرائيندي.هڪ صارف لکيو ته ڀارت کي جيڪڏهن بيٽنگ ڪوچ جي ضرورت آهي، اسان حاضر آهيون. واضح رهي ته مانچسٽر ۾ کيڏيل پهرين سيمي فائنل ۾ نيوزيلينڊ ٽاس کٽي پهرين بيٽنگ ڪندي 239 رنز ٺاهيون، ڀارتي مضبوط بيٽنگ لائين آڏو هدف آسان پئي لڳو پر نيوزيلينڊ دلچسپ مقابلي بعد ڀارت کي 18 رنز تان شڪست ڏني. ڪيويز بالرن پهرين 3 اوورن ۾ ئي 5 جي مجموعي اسڪور تي ڀارت جي 3 اهم رانديگرن کي پويلين موڪليو.

 

ڪرڪيٽ ورلڊ ڪپ ۾ ڀارت جي شڪست تي ڪشمير ۾ جشن

 

سرينگر (اسپورٽس نيوز) ڀارت جي هار تي والاريل ڪشمير ۾ خوشي لهر ڇائنجي وئي، آءِ سي سي ڪرڪيٽ ورلڊ ڪپ 2019ع جي پهرين سيمي فائنل ۾ نيوزيلينڊ هٿان شڪست ٿيندي شهرين جشن ملهائڻ شروع ڪيو.والاريل ڪشمير ۾ شهرين جي وڏي انگ ميچ جو نتيجو ايندي ئي روڊن تي آتشبازي ڪئي، نوجوانن ڀارت مخالف ۽ پاڪستان جي حق ۾ نعرا پڻ هنيا.ياد رهي ته گذريل ڏينهن نيوزيلينڊ ڀارت کي ڪرڪيٽ عالمي جي سيمي فائنل ۾ 18 رنسن تان هارايو هو.

 

ڀارتي ڪرڪيٽر محمد شامي مٿان عورت کي هراسان ڪرڻ جو الزام

 

ممبئي (اسپورٽس نيوز) ڀارتي ڪرڪيٽ ٽيم جي فاسٽ بالر محمد شامي مٿان سوشل ميڊيا تي هڪ عورت هراسان ڪرڻ جو الزام لڳايو آهي.سماجي رابطن جي ويب سائيٽ انسٽاگرام تي صوفيا نالي عورت پنهنجي پوسٽ ۾ محمد شامي جي پيغام جو اسڪرين شاٽ شيئر ڪندي لکيو ته ڪو مون کي ٻڌائي سگھي ٿو ته 1.4 ملين فالورز رکندڙ اهو اڻ ڄاتل ڪرڪيٽر مون کي ڇو هر هر ميسيج ڪري رهيو آهي.عورت جي پوسٽ تي موجود اسڪرين شاٽ مان ظاهر ٿي رهيو آهي ته عورت کي هر هر تنگ ڪندڙ ڪو ٻيو نه پر ڀارتي ڪرڪيٽر محمد شامي آهي ۽ اهو سندس آفيشل اڪائونٽ آهي.صوفيا نالي عورت جي پوسٽ ٿيڻ کان پوءِ واهپيدارن محمد شامي کي سخت تنقيد جو نشانو بڻايو آهي، هڪ واهپيدار لکيو ته اهو ئي سبب آهي جو محمد شامي ٽيم کان ٻاهر آهي، جڏهن ته هڪ ٻئي واهپيدار لکيو ته سڀ شامي کي ڳولي رهيا آهن ۽ شامي اهو سڀ ڪجهه ڪري رهيو آهي.واضح رهي ته محمد شامي پنهنجي ڪيريئر جي شروعات کان ئي تڪراري رهيو آهي، ان کان اڳ محمد شامي تي سندس زال به غير عورتن سان لاڳاپا رکڻ ۽ ميچ فڪسنگ جو الزام لڳايو هو. محمد شامي ميچ فڪسنگ جي الزامن مان ته بري ٿي ويو هو پر سندس زال هن کان ڌار ٿي وئي هئي.

 

ڀارت کي شڪست ، نيوزيلينڊ ورلڊ ڪپ جي فائنل ۾ پهچي ويو

 

مانچسٽر (اسپورٽس نيوز) نيوزيلينڊ جي ٽيم ورلڊ ڪپ 2019 جي پهرين سيمي فائنل ۾ ڀارت کي سخت مقابلي کانپوءِ 19 رنسن تان شڪست ڏئي فائنل لاءِ ڪواليفاءِ ڪري ورتو.مانچسٽر ۾ نيوزيلينڊ جي ٽيم  ڪالهه برسات سبب متاثر ٿيل پنهنجي اننگز اڄ پوري ڪئي ۽ ڀارت کي ڪاميابي لاءِ 240 رنسن جو هدف ڏنو.ڪيويز طرفان روز ٽيلر 74 ۽ ڪپتان ڪين وليمسن 67 رنسن سان ٽاپ اسڪورر رهيا، ٻين رانديگرن ۾ نڪولس 28، ڪولن ڊي گرينڊ هوم 16، نيشم 12، ٽام ليٿم 10، مچل سينٽنر 9 رنسون ٺاهي سگهيو.ڀارت طرفان ڀونيشور ڪمار 3، جڏهن ته جسپريت بمرا، هرديڪ پانڊيا، رويندرا جديجا ۽ يزويندرا چاهل هڪ – هڪ وڪيٽ ورتي.هدف جو پيڇو ڪندي ڀارتي ٽيم 49.3 اوورن ۾ 221 رنسن تي آل آئوٽ ٿي وئي.ڀارتي ٽاپ آرڊر جي ناڪامي ۽ رڳو 92 رنسن تي 6 وڪيٽون ڪرڻ کانپوءِ رويندرا جديجا اڳوڻي ڪپتان ايم ايس ڌوني سان گڏجي ذميواراڻي بيٽنگ ڪئي ۽ ٽيم کي ڪاميابي ڏيارڻ جي ڀرپور ڪوشش ڪئي پر ڀارتي آل رائونڊر 59 بالن تي 77 رنسن جي اننگز کيڏي همت هارائي ويٺو، جنهن کانپوءِ ڌوني به 50 رنسون ٺاهي رن آئوٽ ٿي ويو.هرديڪ پانڊيا 32 ۽ رشاڀ پنت 32-32 رنسون ٺاهيون، ٻين رانديگرن مان ڪو ڊبل فگر ۾ ئي نه پهچي سگهيو.نيوزيلينڊ طرفان ميٽ هينري 3، ٽرينٽ بولٽ ۽ مچل سينٽنر 2-2، جڏهن ته لوڪي فرگيوسن ۽ نيشم هڪ – هڪ وڪيٽ ورتي.

 

في الحال ڪنهن کي نه هٽائيندس ،نئين انتظاميا ضرور آڻينداسين :احسان ماني

 

ڪراچي(اسپورٽس نيوز) پاڪستان ڪرڪيٽ بورڊ جي چيئرمين احسان ماني چيو آهي ته هڪ مهيني ۾ ورلڊ ڪپ کيڏندڙ ٽيم جي ڪارڪردگي جو جائزو وٺي تڪڙ ۾ ڪو فيصلو ڪرڻ بدران شارٽ ٽرم انتظاميا تحت نئين انتظاميا آڻي سگهجي ٿي.خانگي خابرو اداري سان ڳالهائيندي احسان ماني چيو ته تبديلي اڻٽر آهي ته جيئن پاڪستان ٽيم ۾ بهتري آندي ويندي،سوچ ويچار بعد اهڙي ٽيم انتظاميا کي آندو ويندو جيڪي 3 کان ي سالن تائين پاڪستان ڪرڪيٽ ٽيم جون واڳون سنڀالي. هن چيو ته ڪنهن عهدي تي تبديلي يا مقرري تڪڙ ۾ نه ڪنداسين ۽ نه ئي ڪنهن خلاف انتقامي ڪارروائي ڪئي ويندي.پي سي بي جي چيئرمين وڌيڪ چيو ته پاڪستان ڪرڪيٽ جي بهتري لاءِ پروفيشنل ماڻهو آڻينداسين، ورلڊ ڪپ جي آخري 4 ميچز ۾ پاڪستان ٽيم جنهن ريت واپسي ڪئي، ان جي جيتري واکاڻ ڪجي اها گهٽ آهي، پر ويسٽ انڊيز خلاف شروعاتي ميچ ۾ شڪست بعد پاڪستان پاڻ سنڀالي نه سگهي، جنهن جو نقصان ٿيو.احسان ماني چيو ته پي سي بي چيئرمين جو عهدو گذريل سيٽپمبر ۾ سنڀاليو هو، ان کان اڳ پاڪستان ٽيم ۾ سموريون مقرريون ٿي چڪيون هيون، نيوزيلينڊ، آسٽريليا ۽ ڏکڻ آفريڪا خلاف ايونٽ اڳ ئي طئه هئا، ان وقت جيڪڏهن ڪا تبديلي ڪجي ها ته غلط تاثر وڃي ها.هن چيو ته آءِ سي سي سان گڏجاڻي بعد ڏيهه پهچي سمورا معامله ڏسندس، ورلڊ ڪپ سميت 3 سالن دوران ڪوچز ۽ سليڪشن ڪاميٽي جي ڪارڪردگي جو جائزو وٺنداسين، ڪرڪيٽ ڪاميٽي فيصلو ڪندي ته 3 سالن ۾ اسان ڇا حاصل ڪيو ۽ ڇا وڃايو. احسان ماني چيو ته جذباتي فصيلا نه ڪنداسين، ڪنهن کي تبديل ڪرڻ لاءِ اهو تاثر نه ڏينداسين ته انتقامي اڪرروائي تحت تبديل ڪيو پيو وڃي. هڪ سوال جي جواب ۾ هن چيو ته پاڪستان ۽ ڀارت وچ ۾ ميچ نه ٿيڻ سياسي معاملو آهي. هن وقت ٻنهي ملڪن جا لاڳاپا خراب آهن ۽ ڪرڪيٽ سيريز نه ٿيڻ جو به سبب سياسي مداخلت آهي.واضح رهي ته مڪي آرٿر منيجر طلعت علي، ڪوچنگ اسٽاف ۽ سليڪشن ڪاميٽي جي عهدن جو مدو ورلڊ ڪپ سان ئي پڄاڻي تي پهتو، مڪي آرٿر پي سي بي چيئرمين سان ملاقات ڪري معاهدو وڌائڻ جي پڻ خواهش ظاهر ڪئي.