تازيون خبرون

Category Archives: سنڌ

 وزيراعظم کان عهدو ڇڏڻ جو مطالبو، بجيٽ ۾ عوام لاءِ  ڪو رليف نظر نه پيو اچي: مراد علي شاهه

ڪراچي (اسٽاف رپورٽر ) سنڌ جي وڏي وزير سيد مراد علي شاهه چيو آهي ته وفاقي منتقلين ۾ تقريباً 140 ارب رپين جو شارٽ فال سبب صوبائي حڪومت صوبي جي غريب ماڻهن کي ڪنهن به قسم جو ريليف ڏيڻ جي حوالي سان وڏي ڏکائين کي منهن ڏئي رهي آهي. هن اها ڳالهه اڄ علامه عباس ڪميلي جي رهائش گاه سولجر بازار ۾ ڪٽنب واسين سان تعزيت ڪرڻ کانپوءِ ميڊيا سان ڳالهيون ڪندي چئي. صوبائي وزير سعيد غني، امتياز شيخ ۽ کيس معاون خاص راشد رباني پڻ ان سان گڏ هئا. هن چيو ته وفاقي حڪومت جون ۾ هڪ خط ذريعي سنڌ حڪومت کي ٻڌايو ته هو هلندڙ مالي سال ۾ 666 ارب رپيا ڏيندي پر اسان (صوبائي حڪومت) کي اڃان تائين فقط 492 ارب رپيا وصول ٿيا آهن ۽ وفاقي حڪومت  هلندڙ مهيني جي آخر تائين تقريباً 174 ارب رپيا جاري ڪرڻا آهن. هن چيو ته اڄ صبح ناڻي کاتي کي هڪ خط موصول ٿيو جنهن تحت 35 ارب رپيا وڌيڪ صوبائي حڪومت جي حصي مان ڪٽيا ويا آهن. مراد علي شاهه چيو ته هن جي سنڌ حڪومت ماڻهن ڪجهه ريليف ڏيڻ جي قابل ٿيندي جيڪڏهن وفاقي حڪومت سنڌ کي 130 ارب رپيا جاري ڪري.  ھن چيو تھ اھا غير معمولي صورتحال فقط سنڌ حڪومت سان ئي نھ آھي پر ٻين صوبن بھ اھڙي قسم جي صورتحال آھي. وڏي وزير چيو تھ ھو گذريل 10 سالن کان صوبائي حڪومت جو بجيٽ ٺاھي رھيو آھي پر ھن ڪڏھن بھ اھڙي طرح جي سنگين مالي صورتحال نھ ڏٺي جنھن ۾ بجيٽ بڻائڻ ھڪ ڏکيو ڪم بڻجي وڃي. هڪ سوال جي جواب ۾ مراد علي شاهه چيو ته حڪومت بجيٽ تي هميشه تنقيد ٿيندي آهي پر هن ڀيري وفاقي حڪومت کي عوام پاران ناپسنديدگي درپيش اچڻ کيس پنهنجي نااهلي سبب هوندو ڇوته اهي ريونيو گڏ ڪرڻ جا هدف حاصل نه ڪري سگهي آهن ۽ هن ملڪ جي ماڻهن کي ڪنهن به قسم جي ريليف ڏيڻ کان مڪمل طور انڪار ڪيو آهي. هن چيو ته مونکي افسوس سان چوڻو پوي ٿو ته وفاقي حڪومت جو نه ڪو وزن آهي ۽ نه ئي کين پاڪستان جي غريب ماڻهن کي ريليف فراهم ڪرڻ جو خيال آهي. هڪ ٻئي سوال جي جواب ۾ هن چيو ته هو اهو توقع ڪري رهيو ته وزيراعظم 10 جون جو قوم جي نالي پنهنجي پيغام ۾ ڪا سٺي خبر ڏيندو پر هن 5 منٽ جي ويڊيو ٽاڪ ۾ ڪابه مثبت ڳالهه نه هئي. ڪي فور منصوبي بابت ڳالهائيندي وڏي وزير چيو ته پي ٽي آئي جا اڳواڻ هروڀرو جو هل هنگامو ڪري رهيا آهن ته صوبائي حڪومت منصوبي کي تباه ڪري ڇڏيو. ها! ٿي سگهي ٿو ته مون يا ڪنهن ٻئي منصوبي سان ڪجهه غلط ڪيو هجي پر انهيءَ جو اهو مطلب نه آهي ته اوهان (وفاقي حڪومت) ڪراچي جي ماڻهن کي اهو منصوبو ختم ڪندي سخت سزا ڏيو.  ھڪ سوال جي جواب ۾ مراد علي شاھھ چيو تھ حادثاتي طور تي پي ٽي آئي 2018 جي چونڊن ۾ ڪجھھ سيٽيون کٽي آھي، نھ تھ ڏٺو وڃي تھ ھن جي عوام  ۾ نھ پاڙون آھن ۽ نھ ئي انھن کي عوام ۾ پنھنجيون پاڙون بڻائڻ ۾ ڪابھ دلچسپي ۽ خيال آھي. ھن ميڊيا تي زور ڀريندي چيو تھ ھو ايم ڪيو ايم پاڪستان کان پڇي تھ پي ٽي آئي کيس روايتي حلقن خاص طور 90 جي علائقي مان ڪھڙي ريت ڪامياب حاصل ڪئي. ھن چيو تھ اھو ئي آئون چوڻ چاھيان ٿو تھ اھي حادثاتي طور تي اسيمبلين ۾ آيا آھن انھيءَ ڪري ھو ھن شھر جي تعمير ۽ ترقي بابت نھ پيا سوچين.  ان کان پھرين مراد علي شاھھ علامھ عباس ڪميلي جي لاڏاڻي تي کيس پٽ ڪاظم عباس ڪميلي سان تعزيت ڪئي ۽ مرحوم لاءِ فاتحھ خواني ڪئي. ھن چيو تھ علامھ عباس ڪميلي ھڪ عظيم انسان ھو ۽ ھن ھميشھ فرقيوارانھ ھم آھنگي لاءِ ڪم ڪيو. ھن جي لاڏاڻي سان ھڪ خلا پيدا ٿيو آھي جنھن کي ڀرڻ تمام ڏکيو ھوندو. ھن چيو تھ علامھ عباس ڪميلي جي خدمتن کي ھميشھ ياد رکيو ويندو.  ان کانپوءِ وڏو وزير سنڌ ميجر معيز شھيد جي گھر پھتو جيڪو 7 جون تي ڏکڻ وزيرستان ۾ شھيد ٿيو ھو. وڏي وزير شھيد ميجر معيز جي پيءُ مقصود بيگ سان تعزيت ڪئي. ان موقعي تي ميڊيا سان ڳالھائنيدي وڏي وزير چيو تھ قوم ۽ ميجر معيز جي گھرڀاتين کي کيس قرباني تي فخر آھي ۽ ھو ھميشھ قوم جو ھيرو طور ياد رکيو ويندو. ھڪ سوال جي جواب ۾ وڏي وزير چيو تھ صوبائي حڪومت ھميشھ پوليس ۽ رينجرز جي جوانن جي خاندانن کي معاوضو ڏيندي آھي جيڪو پنھنجي فرض کي انجام ڏيندي پنھنجيون جانيون قربان ڪندا آھن. ھن چيو تھ آئون شھيد ميجر معيز جي خاندان کي معاضو ڏيڻ لاءِ طريقيڪار ۽ رستو ڳوليندس.

 

تڪراري فيصلن کي عوام ڪڏهن به قبول ناهي ڪيو، جيالا پر امن رهن: بلاول زرداري

ڪراچي(ويب ڊيسڪ) پاڪستان پيپلز پارٽي جي چيئرمين بلاول ڀٽو زردراي ڪارڪنن کان پرامن رهڻ جي اپيل ڪري ڇڏي. تفصيل موجب پيپلز پارٽي جي شريڪ چيئرمين جي امڪاني گرفتاري جي ڪري هن چيو ته ڪارڪن ڪاوڙ ۾ نه اچن. پيپلز پارٽي جي چيئرمين بلاول ڀٽو زرداري جو چوڻ هو ته تڪراري فيصلن کي عوام ڪڏهن به قبول ناهي ڪيو. بلاول ڀٽو زرداري چيو ته اسان هميشه عدالتن ۾ بي گناهي کي ثابت ڪيو آهي. هن وڌيڪ چيو ته پيپلز پارٽي طرفان فيصلن جي باوجود قانون جي بالادستي تي يقين رکي ٿي.

 

وزيراعظم جو پيغام ٻڌي مايوسي ٿي، آصف زرداري تي سياسي ڪيس آهن، پ پ پنهنجي ايجنڊا نه ڇڏيندي: مرتضيٰ وهاب

ڪراچي ( ويب ڊيسڪ ) صوبائي صلاحڪار مرتضيٰ وهاب چيو آهي ته آصف علي زرداري تي ڪيس سياسي بنيادن تي ٺاهيا ويا آهن ۽ ان جو مقصد اسان جي قيادت کي هراسان ڪرڻ آهي پر پيپلز پارٽي پنهنجي ايجنڊا کان پوئتي نه هٽندي. خانگي ٽي وي چئنل سان ڳالهائيندي مرتضيٰ وهاب چيو ته عدالت جي تفصيلي فيصلي کان پوءِ حڪمت عملي ڏينداسين، اها نئين روايت آهي، ڪيس کي مختلف تاريخن تي ٻڌو ويو ۽ اڄ ان جو فيصلو ٻڌايو ويو، نه ٻڌايو ويو ته ڪهڙي قانون جي بنياد تي ضمانت رد ڪئي وئي. هن چيو ته هي ڪيس سياسي بنيادن تي ٺاهيا ويا ۽ ان جو مقصد پيپلز پارٽي جي قيادت کي هراسان ڪرڻو آهي، ماضي ۾ به اهو شيون ٿينديون رهيون آهن، بلاول ڀٽو زرداري ان ڏس ۾ سينٽرل ايگزيڪٽو ڪميٽي سان مشاورت کان پوءِ ايندڙ حڪمت عملي طئي ڪندو. مرتضيٰ وهاب جو چوڻ هو ته هي سڀ اسان لاءِ نئون ناهي، آصف زرداري 12 ورهيه قيد ڪاٽي چڪو آهي، هراسان ڪرڻ باوجود آصف زرداري بهادري سان ڪيسن کي منهن ڏنو، ماضي ۾ ڇا ۽ هاڻي ڇا ڪندا، اسان عوامي سياسي پارٽي آهيون ۽ عوام سان گڏ رهنداسين. سنڌ حڪومت جي صلاحڪار وڌيڪ چيو ته بلاول ڀٽو زرداري حڪومت مخالف تحريڪ اڃا شروع ناهي ڪئي، جڏهن کان عمران خان وزيراعظم بڻيو آهي ته 90 ڏينهن کان پوءِ ڏٺو ته هي پاليسي سان ڪم نه ڪري سگهيو ۽ پارليامنٽ کي اعتماد ۾ نه ورتو، حڪومت عوام دشمن معاشي پاليسي جوڙي ۽ ان جي بلاول کلي مخالف ڪئي. سندس چوڻ هو ته عوامي رابطا مهم هڪ الڳ ايجنڊا هو، پرهاڻ فيصلو اچي ويو آهي ته پوءِ ڪيس جي نوعيت ڏسنداسين، اڄوڪو سي اي سي جو اجلاس معمول جو هو پر هاڻ عدالتي فيصلي تي غور ويچار ڪنداسين، پيپلز پارٽي پنهنجي ايجنڊا کان پوئتي نه هٽنداسين، اسان عوامي مسئلن تي سياست ڪرڻ چاهيون ٿا، اسان ملڪ گير سياست ڪنداسين ۽ جتي احتجاج ڪرڻو پوندو اسان ڪنداسين. مرتضيٰ وهاب چيو ته آصف زرداري جي معاملي تي قانوني طريقيڪار کي فالو ڪنداسين، شايد انصاف فوري نه ملي پر ملندو. ٻئي طرف ويراعظم عمران خان جو پيغام ٻڌي مايوسي ٿي، يارنهن مهينن ۾ هڪ به سٺي خبر ناهي ملي. خانگي ٽي وي چئنل جي پروگرام ۾ ڳالهائيندي مرتضيٰ وهاب چيو ته وزيراعظم عمران خان جي اڄ قوم جي نالي پيغام کي تنقيد جو نشانو بڻايو. صوبائي صلاحڪار وڌيڪ چيو ته عمران اقتدار ۾ ايندي ئي معاشي ۽ سماجي انقلاب آڻن جون دعوائون ڪيون هيون، وقت اچي ويو آهي عمران خان ماضي ۾ رهڻ ڇڏي ڏئي

 

گمبٽ/کهڙا/ڪوئٽا ۾ خوفناڪ روڊ حادثا، 17 ڄڻا فوت

گمبٽ/کهڙا /زوب( ويب ڊيسڪ )گمبٽ ويجهو قومي شاهراهه تي  موٽر سائيڪل کي مسافر ڪوچ جو ٽڪر لڳڻ جي نتيجي ۾ هڪ ئي ڪٽنب جا چار ڀاتي فوت ٿي ويا.  اٽڪ پمپ وٽ تيز رفتار مسافر ڪوچ جو موٽر سائيڪل کي ٽڪر لڳڻ جي نتيجي ۾  کھڙا واسي پرڀومل. چندو مل. راجا  ۽ ڪنڊياري واسي سريش ڪمار اجل جو شڪار بڻجي ويا.   پورھيت رنگسازي  جو ڪم ڪند هئا مزدوري ڪرڻ لاءِ کھڙا کان راڻي پور وڃي رهيا هئا ته اوچتو تيز رفتار مسافر ڪوچ جو ٽڪر ٿي پيو.  حادثي کانپوءِ ھتان جي مقامي ماڻهن  فوتين مامڙهه  کڻائي گمبٽ گمس اسپتال منتقل ڪيا جتان قانوني ڪارروائي بعد لاش وارثن حوالي ڪيا ويا مڙهه گهرپهڇڻ تي ڪهرام مچي ويو جڏهن ته علائقي جو ماحول پڻ سوڳوار بڻجي ويو.

ڪوئيٽا قومي شاهراهه تي خطرناڪ ٽريفڪ حادثي جي نتيجي ۾ 13 ڄڻا فوت ٿي ويا، جڏهن ته ست زخمي ٿي پيا.بلوچستان جي شهر زوب ۾ ڪوئٽا قومي شاهراهه تي قلعا سيف الله ويجهو ٽرڪ ۽ وين ۾ زوردار ٽڪر ٿيڻ جي نتيجي ۾ 13 ڄڻا فوت ٿي ويا. پوليس موجب حادثي ۾ فوتين جو تعلق هڪ ئي خاندان سان آهي، مسافر وين ڪوئٽا کان زوب اچي رهي هئي ته خوفناڪ حادثي جو شڪار ٿي وئي.  لاشن ۽ زخمين کي ڊي ايڇ ڪيو اسپتال منتقل ڪيو ويو ۽ کين فوري طور امداد ڏني پئي وڃي. ذريعن موجب پوليس حادثي واري هنڌ کي سيل ڪري جاچ شروع ڪري ڇڏي آهي، جڏهن ته حادثي جو اصل سبب جاچ لاءِ جاچ جو سلسلو به جاري آهي.

 

وفاقي حڪومت (ايس ٿري) ۾ 50 سيڪڙو حصو ڏيڻ کان ڦري وئي: وڏو وزير

ڪراچي (اسٽاف رپورٽر): سنڌ جي وڏي وزير سيد مراد علي شاهه چيو آهي ته وفاقي حڪومت گريٽ سيوريج پلان (ايس ٿري) جي مجموعي اخراجات جو پنهنجو 50 سيڪڙو حصو ڏيڻ کان پوئتي هٽي وئي آهي جيڪا سنڌ جي ماڻهن سان ناانصافي آهي. هن چيو آهي ته هو ڪراچي جي ماڻهن جي وسيع تر مفاد ۾ وفاقي حڪومت کان کيس مجوزه حصو وٺڻ لاءِ فائيٽ ڪندو. هن اها ڳالهه اڄ وزيراعليٰ هائوس جي ڪميٽي نمبر 2 ۾ ايس ٿري پراجيڪٽ جي پڄاڻي بابت هڪ اجلاس جي صدارت ڪندي ڪئي. اجلاس ۾ صوبائي وزير  بلديات سعيد غني، چيف سيڪريٽري ممتاز شاهه، چيئرپرسن پي اينڊ ڊي ناهيد شاهه، سيڪريٽري ناڻو نجم شاهه، سيڪريٽري بلديات خالد حيدر شاهه، ممبر سروسز پي اينڊ ڊي خالد محمود، قائم مقام ايم ڊي ڪراچي واٽر سيورج بورڊ غلام قادر، پي ڊي ايس ٿري حنيف بلوچ ۽ ٻين لاڳاپيل عملدارن شرڪت ڪئي. صوبائي وزير بلديات سعيد غني وڏي وزير کي ڄاڻ ڏيندي ٻڌايو ته ايس ٿري منصوبي سان ڪراچي جي صفائي جي صورتحال ۽ ماحول بهتر ٿيندو ۽ هڪ ڪليڪشن، ٽريٽمنٽ ۽ سيوريج  جي نڪاي جو هڪ بهترين نظام دستياب آهي. هن چيو ته موجوده سيوريج ڊسپوزل سسٽم ٽريٽمنٽ جي سهولتن کانسواءِ سمنڊ ۾ وڃي ڪرندو آهي انهيءَ کي ٽريٽمنٽ پلانٽن ۾ تبديل ڪرڻ لاءِ نيٽورڪ جي ضرورت آهي.  چيئرپرسن پي اينڊ ڊي ناهيد شاهه چيو ته ان منصوبي لاءِ ايڪنڪ سيپٽمبر 2007 ۾ 7.98 بلين رپيا منظوري ڏئي چڪي آهي جنهن تحت وفاقي حڪومت جو منصوبي جي لاڳت جو 50 سيڪڙو حصو ڏيڻ هو ۽ باقي بچيل 50 سيڪڙو صوبائي حڪومت کي برداشت ڪرڻو هو. اسڪيم تي نظرثاني ڪئي وئي ۽ ايڪنڪ 7 فيبروري 2018 جو انهيءَ لاءِ 36.11 بلين رپين جي منظوري ڏني. منصوبي جا 2 حصا آهن هڪ لياري ريور بيسن جنهن جي لاڳت 121.31 بلين رپيا ۽ ملير ريور بيسن جنهن جي لاڳت 14.799 بلين رپيا آهي شامل ڪيا ويا. ايس ٿري منصوبي جو  جنهن تي نظرثاني ڪئي وئي جنهن جي نتيجي ۾ منصوبي جي لاڳت ۾ واڌ ٿيو. منصوبي ۾ لياري ۽ ملير ندي بيسن ۾ انڊر گرائونڊ آر سي سي ڪنڊيوٽ ذريعي سيوريج جي وهڪري جي ٽرانسميشن جو احاطو ڪيو ويو آهي ۽  انهيءَ جي ٽريٽمنٽ سيوريج ٽريٽمنٽ پلانٽن ذريعو سمنڊ ۾ ڪرڻ کان پهرين ڪرڻو آهي. ملير ۽ لياري ندين جو اضافو ۽ ٽريٽمنٽ پلانٽ جي تعمير، ملير ٽرنگ سيور ۽ هارون آباد سايئٽ ۾ 51 کان 100 ايم جي ڊي سيوريج ٽريٽمنٽ پلانٽ جي گنجائش ۾ واڌ ۽ اپگريڊيشن. ماڙيپور ۾ سيوريج ٽريٽمنٽ پلانٽ جو 54 کان 180 ايم جي ڊي گنجائش ۾ واڌ ۽ اپگريڊيشن ۽ ڪورنگي ۾ 180 ايم جي نعو سيوريج ٽريٽمنٽ پلانٽ جي تعمير، لياري ندي بيسن جي ڪمن جي موجوده اسٽيٽس بابت وڏي وزير کي ٻڌايو ويو ته ٽي پي –III لاءِ 77 ايم جي ڊي جي بحالي جو ڪم مڪمل ڪيو ويو آهي. سيوريج ٽرانسميشن جا پنج مختلف پيڪيجن جنهن جي ڊيگهه 20.151 ڪلوميٽر آهي اها به گهڻي حد تائين مڪمل ٿي چڪا آهن. 13.169 ڪلوميٽر جي ايل ايس-I، ايل ايس-II، ۽ ايل ايس-III جو ڪانٽريڪٽ پيڪيج مارچ ۾ ڪيو ويو. ٽي پي-I جي ڪانٽريڪٽ پيڪيج ، بحالي جو مرحلو 55 سيڪڙو مڪمل ٿي چڪو آهي ۽ اسٽيج –II ڪشادگي وارو ڪم 12 سيڪڙو ٿي چڪو آهي.

ملير روڊ بيسن:

سيوريج ٽرانسميشن لاءِ ايم ايس-I کان ايم ايس-III ڪانٽريڪٽ پيڪيج جنهن جي مجموعي ڊيگهه 14.950 ڪلوميٽر آهي جنهن جي بڊ ايوليوشن رپورٽس سيپرا جي ويب سائيٽ تي شايع ڪئي وئي. سيوريج ٽرانسميشن جنهن جي ڊيگهه 10.091 ڪلوميٽر آهي جو ايم ايس –IV کان ايس ايس-VI جو ڪانٽريڪٽ پيڪيج پڻ مشتهر ڪيو ويو ۽ بڊ موصول ٿيا جنهن کي ايويليوشن رپورٽ لاءِ پروڪيورمنٽ ڪميٽي کي اماڻيو ويو.

وڏي وزير چيو ته لياري ندي بيسن جتي 77 ايم جي ڊي ٽريٽ ڪيو ويندو اتي انهيءَ کي وڌيڪ ٽريٽ ڪندي انهيءَ کي سائيٽ ۾ صنعتي مقصدن لاءِ فرام ڪيو وڃي. هن چيف سيڪريٽري ممتاز شاهه کي پڻ هدايت ڪئي ته هو پبلڪ پرائيويٽ پارٽنرشپ شپ يونٽ سان به ڳالهه ٻولهه ڪري ۽ خانگي ڀائيوارن کي ڄانايل ٽئين درجي جي وهڪري (ٽريٽري افيولينٽ) کي صنعتي مقصدن جي استعمال لاءِ دعوت ڏئي ته هو انهيءَ حوالي سان ڪوبه پلان ترتيب ڏين. مراد علي شاهه چيو آهي ته ايس ٿري پڄاڻي سان سامونڊي پاڻي صاف ٿي ويندو ۽ انهيءَ سان مجموعي طور صحت ۽ حفظان صحت جي صورتحال به بهتر ٿي ويندي جنهن سان مڇين جي برآمداد ۾ واڌ ٿيندي ۽ انهيءَ سان ميرين اڪالوجي جي تحفظ ۾ مدد ملندي. وڏي وزير اجلاس جي آخر ۾ پنهنجي انهيءَ عزم جو اعادو ڪيو ته هو ڪراچي جو ڪيس وفاقي حڪومت آڏو رکي وڙهندو تههو پنهنجي ڪمٽمنٽ کي پورو ڪندي 50 سيڪڙو فنڊ ڏئي.

ايڪسائيز اينڊ ٽيڪسنيشن کاتي جي وهيڪ رجسٽريشن بڪ کي ڊجيٽل ڪرڻ:

وڏي وزير سيد مراد علي شاهه اڄ هڪ اجلاس جي صدارت ڪئي جنهن ۾ هن ايڪسائيز اينڊ ٽيڪسنشين کاتي کي هدايت ڪئي آهي ته هو وهيڪل رجسٽريشن بڪس جي جاءِ ريڊايبل ڊجيٽل ڪارڊ متعارف ڪرائي. هن چيو ته گاڏين جي رجسٽريشن بڪ سڄي دنيا مان ختم ٿي چڪا آهن. اسان کي گهرجي ته اسان جديد ٽيڪنالجي کان فائدو کڻيون ۽ ريڊايبل ڪاردز بيڪن جي طرز تي متعارف ڪرايا وڃن ته جيئن انهن جي تفصيل به چيڪنگ دوران پڙهي سگهجي. اجلاس ۾ ايڪسائيز اينڊ ٽيڪسيشن  وارو وزير مڪيش ڪمار چاولا، سيڪريٽري ايڪسائيز رحيم شيخ، سيڪريٽري ناڻو نجم شاهه، نارڪوٽڪس جي اي اينڊ ٽي دپارٽمنيٽ وارو ڊي جي شعيب صديقي، ڊي جي ايڪسائيز شبير شيخ ۽ ٻين شرڪت ڪئي. صوبائي وزير ايڪسائيز اينڊ ٽيڪسيشن مڪيش ڪمار چاولا وڏي وزير کي ٻڌايو ته ايڪسائيز اينڊ ٽيڪسيشن کاتي کي 72872 ملين رپيا وصولي جو هدف ڏنو ويو هو جيڪو هو هن مهيني جي آخر تائين حاصل ڪري وٺندو. ايڪسائيز اينڊ ٽيڪسيشن کاتي 7 ٽيڪس بشمول موٽروهيڪل ٽيڪس، ايڪسائز ان ايڪٽ منٽ، انفرااسٽڪرسيس ، ڪاٽن في، پروفيشنل ٽيڪس، پراپرٽي ٽيڪس ۽ انٽرٽينمنٽ ڊيوٽي وصول ڪرندو آهي.

 

حيدرآباد ۾ گهر جي ڇت ڪرڻ جي نتيجي ۾ نينگر سميت 3 ڄڻا فوت

حيدرآباد(بيورو رپورٽ) حيدرآباد ۾ گهر جي ڇ ڪرڻ جي نتيجي ۾ نينگر سميت 3 ڄڻا فوت ٿي ويا، سائيٽ ايريا جي محمدي چوڪ وٽ گهر جي ڇت ڪري پئي، جنهن جي نتيجي ۾ 3 ڄڻا فوت ٿي ويا، وارثن ۽ پاڙيوارن واقعي بعد ٽنهي جا لاش ٻاهر ڪڍي سول اسپتال منتقل ڪيا، فوتين ۾ 70 سالن جو ابراهيم، 4 سالن جو نينگر صابر ۽ 47 سالن جو يوسف شامل آهن، واقعي بعد علائقي ۾ سوڳ واري صورتحال پيدا ٿي وئي.

 

خيرپور ڀرسان اڳوڻي ڀيڻيوي هٿان سالي قتل، مزاحمت تي اڳوڻي سسُ ۽ سالو زخمي

خيرپور ناٿن شاهه (رپورٽر) خيرپور ڀرسان جوابدار ڌيءُ نه ڏيڻ تان اڳوڻي سالي کي قتل ڪري ڇڏيو، مزاحمت تي اڳوڻي سسُ ۽ سالي کي زخمي ڪرڻ بعد فرار ٿي ويو. ڳوٺ چيجاپور ۾ سڱاوتي تڪرار تان جوابدار دوست علي کوسو طلاق ڏنل زال وٽ ترسيل ڌيءُ کي وٺڻ ويو ته انڪار ڪرڻ تان کيس زبردستي وٺي وڄڻ جي ڪوشش ڪئي، مزاحمت تي جوابدار اڳوڻي سالي 30 ورهين جي روبينا زال نذير کوسو کي چاقو هڻي قتل ڪري ڇڏيو، جڏهن ته ناري جي ماءُ مسمات وزيران کوسو ۽ ڀاءُ زاهد کوسو زخمي ٿي پيا. واقعي کانپوءِ جوابدار فرار ٿي ويو. واضح رهي ته جوابدار ڪجهه عرصو اڳ زال وحيده کوسو کي طلاق ڏني هئي، کين هڪ ڌيءُ جو اولاد هو، جنهن جي حوالگي وارو معاملو عدالت تائين ويو ته عدالت ڌيءُ کي والده حوالي ڪري ڇڏيو هو.

 

رتوديرو ۾ ايڊز وگهي نينگري فوت، فوتين جو انگ وڌي 15 ٿي ويو، وڌيڪ 6 ڄڻن کي ايڊز وائرس جي تصديق

رتوديرو (رپورٽر) رتوديرو ۾ ايڊز وگهي نينگري فوت ٿي وئي، جڏهن ته وڌيڪ 6 ڄڻن کي ايڊز وائرس جي تصديق ڪئي وئي آهي. نادر شاهه پاڙي ۾ نينگري فرزانه ڌيءُ غلام علي ڀٽو ايڊز وائرس ۾ وڪوڙجڻ بعد فوت ٿي وئي، جنهن بعد ايڊز سبب فوت ٿيلن جو انگ وڌي 15 ٿي ويو. فوت ٿيل نينگري جي وارثن جو چوڻ آهي ته رتوديرو ڪئمپ تان ايڊز جي تصديق بعد لاڙڪاڻي ۾ علاج ڪرائڻ لاءِ وياسين پر ڪنهن به قسم جي سهولت مهيا نه هئي، ساڳئي گهر ۾ وڌيڪ ٽن ٻارن کي به ايڊز جي تصديق ٿي چڪي آهي. ٻئي پاسي رتوديرو ڪئمپ ۾ 160 ماڻهن جي رت جا جُزا وٺي اسڪريننگ ٽيسٽ ڪئي وئي، جنهن دوران چئن ٻارن ۽ ٻن عورتن ۾ ايڇ آءِ وي هجڻ جي تصديق ڪئي وئي، جنهن بعد ايڊز مريضن جو انگ وڌي 736 ٿي ويو آهي.

 

ملڪ جي مختلف شهرن ۾ روڊ حادثا، 27 کان وڌيڪ فوت، 44 کان وڌيڪ زخمي

ڪراچي/بدين /لاهور (ويب ڊيسڪ/اين اين آءِ) ضلعي بدين جانورن جا ست واپاري هڪ حادثي ۾ فوت ۽ چار زخمي ٿي پيا آهن اطلاعن موجب مني ٽرڪ ۾ سوار واپاري جڏهن بدين ڪراچي روڊ ويجهو بس اسٽاپ کوارچي پهتا ته سندن ٽرڪ تيز رفتاري سبب حادثي جو شڪار ٿي وئي حادثي سبب مٺي ٽائون جي ويجهي ڳوٺ ساگورو سان تعلق رکندڙ محمد حسن جوڻيجو ۽ غلام رحيم جوڻيجو ٿڏي تي فوت ٿي ويا ۽ ٻين ستن ڄڻن کي زخمي حالت ۾ اسپتال پهچايو ويو جاويد، نيڪ محمد جهنگرو، قربان جهنگرو ۽ اياز ۽ وي جي ڀيل کي بدين ۽ سجاول ۽ حيدرآباد جي مختلف اسپتالن ۾ ڳڻتي جوڳي حالت ۾ پهچايو ويو هو جتي اهي زخمن جا سور نه سهندي فوت ٿي ويا اسپتالن ۾ فوتي پنجن جو تعلق اسلام ڪوٽ جي ڳوٺ پنيارو سان هو واپاري جانورن کي وڪرو ڪرڻ کانپوءِ ڪراچي کان واپس پنهنجن گهرن ڏانهن وڃي رهيا هئا ته رستي ۾ اهو حادثو پيش آيو.

ملڪ جي مختلف شهرن ۾ روڊن حادثن ۾ 20 کان وڌيڪ فوت ۽ 40 کان وڌيڪ زخمي ٿي پيا. ٽريفڪ حادثا ڪشمور، چيچا وطني، ميانوالي، خانيوال، جهانيان، ڪوئيٽا، دالبدين ۽ بنون ۾ پيش آيا. ڪشمور ۾ عظيم ڦاٽڪ ويجهو رڪشي کي بچائيندي مسافر ڪوچ اونڌي ٿي وئي، جنهن جي نتيجي ۾ 4 مسافر فوت ۽ 13 کان وڌيڪ زخمي ٿي پيا، جن کي اسپتال نيو ويو. چيچا وطني ۾ گيمبر ڀرسان ٻه ٽرالر ٽڪرجڻ سبب 3 ڄڻا حياتيون وڃائي ويٺا، جهانيان جي ڀرسان ڳوٺ 147 ٽين آر ۾ ٽرڪ ۽ ٽرالر ۾ ٽڪر جي نتيجي ۾ هڪ ڊرائيور سميت 3 ڄڻا فوت ٿيا. بوري والا ۾ لاهور روڊ تي مانا موڙ وٽ بس اونڌي ٿي وئي، جنهن جي نتيجي ۾ 2 مسافر فوت ۽ 25 زخمي ٿي پيا. سرگوڌي ۾ ڪوٽ انٽرچينج ڀرسان راولپنڊي کان خانيوال ويندڙ مسافر ڪوچ ٽائر ڦاٽڻ سبب اونڌي ٿي ۽ حادثي ۾ ٻه مسافر فوت ۽ 7 سخت زخمي ٿي پيا، جن کي ويجهي اسپتال منتقل ڪيو ويو. هوڏانهن ڪوهاٽ ۾ انڊس هاءِ وي تي ڪار ۽ ٽرڪ ۾ ٽڪر جي نتيجي ۾ ٻه ڄڻا فوت ٿي ويا، جڏهن ته هڪ عورت ۽ ٻه ٻار زخمي ٿي پيا. ميانوالي ۾ موسيٰ خيل روڊ تي ٿيل حادثي جو هڪ زخمي ٻار سورن جي سٽ نه سهندي فوت ٿي ويو، جنهن کانپوءِ اتي فوتين جو انگ 5 ٿي ويو. بنون جي علائقي ڊوميل ۾ ٻن موٽر سائيڪلن ۾ ٽڪر سبب 2 ڄڻا فوت ٿي پيا ۽ ڪوئيٽا جي علائقي پشتون آباد ۾ ٽريڪٽر جي ٽڪر ۾ 5 ورهين جي ٻارڙي دم ڏنو.

 

پاڪستان مالي سال 20-2019 ۾ 12 ارب ڊالر پرڏيهي قرض وٺندو

ڪراچي (اين اين آءِ) پاڪستان مالي سال 20-2019 ۾ آءِ ايم ايف پروگرام تحت 12 ارب ڊالرز جا پرڏيهي قرض وٺڻ جو ارادو ڪري ورتو آهي پر ان لاءِ پهريان ئي ڏهه ڏهائي ست ارب ڊالرز جو قرض ادا ڪرڻ ۽ ناڻي مٽاسٽا جا ذخيرا سگهارا ڪرڻا پوندا عملدارن موجب وفاقي ناڻي جي وزارت ڪاٿو لڳايو آهي ته يورو بانڊ جاري ۽ عالمي ادارن کان قرض جي مد ۾ 12 ڏهائي ٽي ارب ڊالرز ملي سگهن ٿا جڏهن ته ملڪي ضرورتن لاءِ 19 ارب ڊالرز گهرجن جنهن ۾ ناڻي مٽا سٽا جا ذخيرن جي مضبوطي لاءِ واڌو ر5قم ۽ ٽن مهينن جي امپورٽيڊ لاءِ مالي ضرورتون شامل نه آهن حڪومت کي ٻاهريان قرض ادا ڪرڻ لاءِ ڏهه ڏهائي ست ارب ڊالرز ۽ ڪرنٽ اڪائونٽ خساري کي پورو ڪرڻ لاءِ 8 ڏهائي ٽي ارب ڊالرز گهرجن ذريعن موجب ٻه ڏهائي پنج ارب ڊالرز جي ٻاهرين سيڙپڪاري ۽ ادارا خانگائڻ سان ٻه ارب ڊالرز حاصل ٿيندا حڪومت لاءِ اصل چيلينج ناڻي جي مٽاسٽا ذّخيرن کي 13 ارب ڊالرز تائين آڻڻ آهي جيڪي هلندڙ مهيني جي آخر تائين 7 ارب ڊالرز تائين هوندا هن وقت ناڻي مٽاسٽا جا ذخيرا 8 ارب ڊالرز آهن اسٽيٽ بينڪ مالي سال 20-2019 ۾ ناڻي مٽاسٽا جي ذخيرن کي مضبوط رکڻ لاءِ  ڇهه کان ست ارب ڊالرز گهربل آهن.