تازيون خبرون

Category Archives: سنڌ

سانگهڙ ويجهو ٻن موٽر سائيڪلن ۾ ٽڪر، هڪ ڄڻو فوت، 3 ڄڻا سخت زخمي

سانگھڙ(ڊ.ر) سانگھڙ ويجهو نوابشاه روڊ تي رائوتياڻي لڳ گلستان شادي حال وٽ  ٻن موٽر سائيڪلنجو پاڻ ۾ ٽڪر هڪ ڄڻو فوت 50 ورهين جو حسين بخش سنجراڻي فوت ٿي ويو ۽ شاهپورچاڪر واسي ٽي  ڄڻا شديد زخمي تفصيل موجب سانگھڙ ويجهو نوابشاه روڊ تي رائوتياڻي لڳ گلستان شادي حال وٽ  ٻن موٽر سائيڪلن جو پاڻ ۾ ٽڪر هڪ ڄڻو فوت 50 ورهين جو حسين بخش سنجراڻي فوت ٿي ويو ۽ شاهپورچاڪر واسي ٽي  ڄڻا شديد زخمي ۽ فوتين کي سول ساسپتال سانگھڙ آندو ويو زخمين ۾ ۾گل مھر خان پٺاڻ خان سيال جيڪي ريلوي ڪالوني شاھپور چاڪر جا رھواسي آھن ان کانسواء شھمير پٽ الھورايو ڀٽي ويٺل ڳوٺ محمد قاسم ڀٽي عمر 45 سال ۽ ارشاد پٽ الھورايو ڀٽي شامل آھن جيڪي سخت زخمي ٿي پيا آھن جنهن کي طبي امداد ڏنو ويو فوتي جو تعلق سال ڳوٺ خيرو خان سنجراڻي تعلقو شھدادپور سان ٻڌايو ويو آهي

 

سنڌ سرڪار جو تاريخي فيصلو، پي اي ايف ۽ سنڌ حڪومت ايمبولينس سروس شروع ڪرڻ جي معاهدي تي صحيحون ڪري ڇڏيون

ڪراچي (اسٽاف رپورٽر) سنڌ وڏي وزير سيد مراد علي شاهه هڪ تاريخي فيصلو ڪيو آهي جنهن تحت ايمبيولنس سروس شروع ڪئي پئي وڃي، جنهن ۾ 60 مڪمل سامان سان آراستا گاڏيون شامل آهن. ان حوالي سان پيشنٽس ايڊ فائونڊيشن (پي اي ايف) سان هڪ معاهدو ڪيو ويو آهي جنهن تحت اها سروس پبلڪ پرائيوٽ پارٽنرشپ (پي پي پي) موڊ تحت شروع ڪئي ويندي. ان حوالي سان پي اي ايف ۽ سنڌ حڪومت وچ ۾ معاهدي سان پي اي ايف پاران مشتاق ڇاپرا ۽ سنڌ حڪومت پاران سيڪريٽري صحت عثمان چاچ وزيراعليٰ هائوس ۾ صحيون ڪيون. صحي ڪرڻ واري تقريب ۾ وڏي وزير سيد مراد علي شاهه، وڏي وزير جو صلاحڪار مرتضيٰ وهاب، وڏي وزير جو پرنسپل سيڪريٽري ساجد جمال ابڙو، ناڻي وارو سيڪريٽري سيد نجم شاهه، اسپيشل سيڪريٽري هيلٿ ڊاڪٽر دابر، پي اي ايف جو زاهد بشير، ايگزيڪيوٽو ڊائريڪٽر جناح اسپتال ڊاڪٽر سيمي جمالي، جناح اسپتال جو ڊاڪٽر طارق محمود، امن هيلٿ ڪيئر سروس جو مرتضيٰ وهاب قاسمي شامل هئا. وڏي وزير سيد مراد علي شاهه چيو آهي ته سنڌ حڪومت هلندڙ مالي سال دوران امن ايمبيولنس سروس سنڀاليندي ۽ ان کي پي اي ايف جي سهڪار سان ڪراچي شهر ۾ هلايو ويندو ۽ انهيءَ سلسلي جي ٻئي مرحلي ۾ 60 گاڏين کان وڌائي 2019ع تائين 200 ايمبيولنس گاڏين جو اضافو ڪيو ويندو. واضح رهي ته ٺٽي ۽ سجاول ضلعن ۾ اهڙو هڪ پائليٽ پروجيڪٽ 25 لائف سيونگ ايمبيولنس سنڌ پيپلز ايمبيولنس سروس جي نالي سان اڳئي ئي هلي رهيون آهن ۽ سروس گذريل ٻن ورهين کان ڪاميابيءَ سان هلي رهيون آهن. اهڙي طرح سنڌ حڪومت ۽ امن وچ ۾ پبلڪ پرائيوٽ پارٽنرشپ تحت معاهدو ڪيو ويو آهي. وڏي وزير چيو ته ڪراچي سميت صوبي جي ٻهراڙين وارن علائقن ۾ ان سروس کي وڌايو ويندو جنهن جو ڄاڻايل نالو سنڌ ايمرجنسي ميڊيڪل سروس تجويز ڏنو ويو آهي. هن چيو ته ايمبيولنس سروس کي سنڌ جي سمورن ضلعن تائين نون نالن سان توسيع ڏني ويندي. هن چيو ته موجوده ۽ ان سان گڏ توسيع ڪيل سروس عوام يج بهتر مفاد ۾ مفت ۽ فوري طور تي دستياب هوندي ۽ ان سان خاص طور محروم طبقي جي همٿ  افزائي ٿيندي ۽ ان اهي ان مان فائدو حاصل ڪندا.

 

 

وڏي وزير جو ٿر کان ڪينجهر ۽ ڪراچي کان ڪشمور تائين وڻڪاري جو اعلان

ڪراچي  (اسٽاف رپورٽر) سنڌ جو وڏو وزير سيد مراد علي شاهه چيو آهي ته سندس ڪجهه اهم رٿائن ڪراچي سرڪلر ريلوي (ڪي سي آر)، ڪيٽي بندر، ڌاٻيجي اسپيشل اڪنامڪ زون، درياهه جي لائننگ، ڪراچيءَ لاءِ ميگا ڊيسيلينيشن پلانٽ جهڙين رٿائن کي ڊسمبر 2018ع جي آخر ۾ رٿيل سي پيڪ بابت جوائنٽ ڪوآرڊينشن ڪميٽي (جي سي سي) اجلاس ۾ پيش ڪندو. هن اها ڳالهه بيجنگ ۾ ٿيندڙ جي جي سي واري اجلاس تياري ڪرڻ بابت هڪ اعليٰ سطحي اجلاس جي صدارت ڪندي ڪئي. اجلاس ۾ صوبائي زراعت وارو صوبائي وزير اسماعيل راهو، توانائي وارو صوبائي وزير امتياز شيخ، ٽرانسپورٽ وارو صوبائي وزير اويس شاهه، رٿابندي ۽ ترقيءَ وارو چيئرمين محمد وسيم، وڏي وزير جو پرنسپل سيڪريٽري ساجد جمال ابڙو، سنڌ بورڊ آف انويسٽمينٽ جي ڊائريڪٽر عظيم عقيليءَ ۽ لاڳاپيل سيڪريٽرين شرڪت ڪئي. وڏي وزير چيو ته 29 ڊسمبر 2018ع تي منعقد ٿيندڙ جي سي سي جي ڇهين اجلاس ۾ انهن ٽن رٿائن جي منظوري ڏني وئي هئي ۽ انهن کي ٻيهر اٿاريو ويندو. هن چيو ته سندس ڪيترين ئي فارملٽيز کي مڪمل ڪيو ويو آهي. ڪراچي سرڪلر ريلوي هڪ تمام اهم رٿا آهي جيڪا مان پنهنجي شهرين کي بطور تحفو ڏيڻ چاهيان ٿو. هن چيو ته اهو 1.97 بلين ڊالرن ۽ 43.24 ڪلوميٽر ڊگهي رٿا سان شهر جي ٽريفڪ جا مسئلا حل ٿيندا پر ان جي بدولت شهر جو اربن ٽرانسپورٽ واري سهولت جي حوالي سان گڏيل طور تي اميج پڻ بهتر ٿيندو. ڪي سي آر رٿا وزير مينشن کان شروع ٿيندو ۽ ٽاور، ڪراچي سٽي، ڊي او سيز، ڪراچي ڪينٽ، نيول، چنيسر، شهيد ملت، ڊرگ روڊ، ڊرگ ڪالوني، اسٽارگيٽ، جناح ٽرمنل، جوهر، الادين پارڪ، نيپا، گيلاني، ياسين آباد، لياقت آباد، ناظم آباد، اورنگ آباد، ڪي بي ايل، منگهوپير، سائيٽ، شاه لطيف، بلديا، لياري ۽ واپس وزير مينشن تائين آهي. ڌاٻيجي اسپيشل اڪنامڪ زون رٿا بابت ڳالهائيندي وڏي وزير چيو ته اها رٿا 1530 ايڪڙ ايراضيءَ تي قائم ڪيو پيو وڃي، اهو زون هڪ اهم هنڌ تي واقع آهي جيڪو نيشنل هاءِ وي سان ڳنڍيل آهي ۽ موٽر وي جي ويجهو آهي، ان رٿا تي اٽڪل 43 بلين رپيا لاڳت ايندي. چيئرمين پي اينڊ ڊي محمد وسيم وڏي وزير کي ٻڌايو ته ڪيٽي بندر جو ڪاغذي ڪم مڪمل ڪيو ويو آهي ۽ پهرين ڀاڱي ۾ اهو بطور هڪ جيٽي ڪوئلي جي برآمد لاءِ استعمال ڪيو ويندو ۽ ٻئي ڀاڱي ۾ انکي هڪ مڪمل بندرگاهه طور تي اپ گريڊ ڪيو ويندو. اها ويڪري ۽ وسيع روڊ سان گڏ بطور بندرگاهه ڳنڍيل آهي ۽ ان جي نيشنل هاءِ وي ۽ موٽر وي ڏانهن ويندڙ پهچ وارا روڊ هوندا. مراد علي شاهه چيو ته سندس ڪجهه ٻين رٿائن تي پڻ ڪم ڪيو آهي جن ۾ زراعت جي رٿا، ماحوليات وارو منصوبو، ڪراچيءَ لاءِ ميگا ڊيسيلينيشن پلانٽ ۽ گڊو کان سکر درياهه جي لائننگ جي درخواست ڪري سگهون ٿا. وڏي وزير چيو ته چين زراعت جي شعبي ۾ شاندار ترقي ڪئي آهي ۽ اسان انهن جي تحقيق ۽ عملي ڪم کان فائدو حاصل ڪرڻ چاهيون ٿا. هن چيو ته زراعت جي منصوبي ۾ فصلن جي پوکيءَ ۾ تبديلي، لو ڊيلٽا کي متعارف ڪرائڻ، وڌيڪ پيداوار حاصل ڪرڻ ۽ سموري زراعت جي نظام جو ميڪنيزم شامل آهي. ماحولياتي منصوبي تي ڳالهائيندي مراد علي شاهه چيو ته سندس سڄي صوبي کي ”سرسبز سنڌ“ طور ڏسڻ چاهي ٿو جنهن تحت لکن جي انگ ۾ وڻ ۽ ٻوٽا لڳايا ويندا ۽ انهن جي سارسنڀال ڪئي ويندي. هن چيو ته مان ٿر کان ڪينجهر ۽ ڪراچي کان ڪشمور وڻڪاري شروع ڪندس. هن چيو ته اهو سڀ سائنسٽيفڪ ريت ٿيندو. وڏي وزير چيو ته ماڻهو ماحوليات جي تبديليءَ جي ڳالهه ڪندا آهن پر اسان عملي طور تي پيرس معاهدي جي رهنمائيءَ ۾ مجموعي ماحول کي بهتر بڻائڻ لاءِ اپاءَ وٺنداسين. هن چيو ته سندس هڪ پلان جوڙيو آهي جنهن تحت گڊو بئراج کان سکر بئراج درياهه جي لائننگ ڪئي ويندي. هن چيو ته مون پاڻيءَ جي ماهرن سان صلاح مشورا شروع ڪيا آهن ۽ انهن صلاح مشورن کي ايندڙ 15 ڏينهن ۾ حتمي شڪل ڏني ويندي جيڪڏهن اهو منصوبو فزيبل آهي ته ان کي جي سي سي واري اجلاس ۾ پيش ڪيو ويندو. مراد علي شاهه چيو ته گڊو بئراج کان سکر بئراج درياهه جي لائننگ سان نه رڳو اهو ته پاڻي کي محفوظ ڪرڻ ۾ مدد ملندي پر ان جي ڪري درياهه جي ساڄي ۽ کاٻي پاسي دياهه جي ڪنارن تي وڻن جي ڪٽائي ۾ پڻ گهٽتائي ايندي جتي هزارين ايڪڙ ايراضي پاڻيءَ هيٺ آهي. هن چيو ته ان سان ڪچي وارا علائقا ٻوڏ کان پڻ محفوظ رهندا.

 

ارشد پپو قتل ڪيس: سرڪاري سرپرستي ۾ قتل ۽ ڏوهن جو اعتراف، رينجرز عزير بلوچ جو حلفي اعترافي بيان پيش ڪري ڇڏيو

ڪراچي(ويب ڊيسڪ) سنڌ هاءِ ڪورٽ ۾ ارشد پپو قتل ڪيس جي ٻڌڻي ٿي، عدالت جاچ آفيسر جي عدم حاضري تي ٻڌڻي ملتوي ڪري ڇڏي، رينجرز پراسيڪيوٽر عزير بلوچ جو حلفي بيان عدالت ۾ پيش ڪري ڇڏيو. تفصيل موجب سنڌ هاءِ ڪورٽ ارشد پپو قتل ڪيس جي ٻڌڻي جي موقعي تي جوابدارن جي ضمانت واري درخواست ۾ اهم اڳڀرائي ٿي آهي، جاچ آفيسر عدالت ۾ پيش نه ٿي سگهيو.  عدالت جو چوڻ هو ته پوليس کي هڪ ٻيو موقعو ڏيون ٿا نه ته وارنٽ جاري ڪري سگهون ٿا، بعد ۾ سنڌ هاءِ ڪورٽ ٻڌڻي 16 ڊسمبر تائين ملتوي ڪري ڇڏي. ان کان سواءِ رينجرز پراسيڪيوٽر عزير بلوچ جو حلفي بيان عدالت ۾ پيش ڪري ڇڏيو، حلفي اعترافي بيان ۾ عزير بلوچ سرڪاري سرپرستي ۾ قتل، ڀتا خوري ۽ زمينن تي قضبن جو اعتراف ڪيو آهي، عزير بلوچ جي اعترافي بيان ۾ چيو ويو آهي ته انسپڪٽر چاند نيازي به منهنجي اِشارن تي ڪم ڪندو هو. ٻئي وپاسي وڪيل جو چوڻ هو ته ڪنهن شاهد جوابدارن ۽ درخواستگذارن جي خلاف شاهدي ناهي ڏني، پراسيڪيوٽر رينجرز ساجد محبوب جو چوڻ هو ته اِهو بيان عزير بلوچ جي گرفتاري کان پهرين جا آهن، گرفتاري کان پوءِ واري صورتحال تبديل ٿي چڪي آهي، عدالت ٻڌڻي 16 ڊسمبر تائين ملتوي ڪري ڇڏي.

 

 

ٿر پاڪستان جو مستقبل آهي، جنوري جي آخري هفتي تائين بجلي جي پيداوار شروع ٿي ويندي: مراد علي شاهه

مٺي  (ڊ.ر) سنڌ جو وڏو وزير سيد مراد علي شاهه چيو آهي ته ٿر ڪول مان ايندڙ سال جنوري جي آخري هفتي تائين بجلي جي پيداوار جي شروعات ٿي ويندي ۽ ان پروجيڪٽ سميت ٿر ۾ 70 ارب رپين جي سيڙپڪاري ڪئي وئي آهي. هن اها ڳالهه اڄ خميس ڏينهن ٿر ۾ ٿيندڙ ترقياتي ڪمن جو جائزو وٺڻ جي موقعي تي ڪئي. وڏي وزير سان گڏ توانائي وارو صوبائي وزير امتياز شيخ، وڏي وزير جو صلاحڪار مرتضيٰ وهاب پڻ گڏ هئا. وڏي وزير سيد مراد علي شاهه اسلام ڪوٽ جي بختاور ايئرپورٽ تي پهتو جتي سندس آجيان سينٽر، قومي ۽ صوبائي اسيمبلين جي ميمبرن ڪئي. بختاور ايئرپروٽ اسلام ڪوٽ کي سنڌ حڪومت ٿر ۾ سيڙپڪارن جي سهولت لاءِ تعمير ڪرايو آهي. وڏي وزير سيد مراد علي شاهه ڪول مائنگ، ٿرڪول پاور پلانٽ، صحت جي سهولتن جو معائنو ڪيو. وڏي وزير سيد مراد علي شاهه چيو ته ٿر پاڪستان جو مستقبل آهي، انشاءَ الله جنوري 2019ع ۾ ٿر پاور پلانٽ مان بجلي پيدا ڪئي ويندي. مراد علي شاهه چيو ته پاڪستان پيپلز پارٽي جي سنڌ حڪومت سنڌ جي عوام بلڪه سڄي پاڪستان جي ترقيءَ ۽ بجلي جي بحران جي خاتمي لاءِ اپاءَ وٺي رهي آهي. هن ٿر ڪول بلاڪ ٽو پهچي ڪول مائننگ جو جائزو ورتو. ڪول مائننگ جو 96 سيڪڙو ڪم مڪمل ڪيو ويو آهي، پاور پلانٽ وارو ڪم به 96 سيڪڙو مڪمل ڪيو ويو آهي. مراد علي شاهه چيو ته پارو پلانٽ مان بجليءَ جي شيڊول پيداوار جون 2019ع ۾ ٿيڻي هئي جيڪا هاڻ جنوري 2019ع جي آخري هفتي يا فيبروري جي پهرين هفتي ۾ بجلي جي پيدا شروع ٿي  ويندي. ان پروجيڪٽ سميت ٿر ۾ 70 بلين رپين جي سيڙپڪاري ڪئي وئي آهي. هن چيو ته سنڌ حڪومت ٿر فائونڊيشن جي ذريعي 20 هزار ڪٽنبن کي سندن چوپائي مال لاءِ چارو فراهم ڪري رهي آهي. ٿر فائونڊيشن سان هن سال 90 ٻار انجنئيرنگ جو ڊپلوما ڪري رهيا آهن. ٿر فائونڊيشن اسپتال 2 بلين رپين جي لاڳت سان تعمير ٿي رهي آهي. ان اسپتال کي سنڌ حڪومت 50 ملين رپيا ڏئي رهي آهي. اسپتال جو پهريون بلاڪ جيڪو 82 بسترن تي مشتمل آهي فيبروري 2019ع ۾ ڪم شروع ڪندو. اهو اسپتال 250 بسترن تي مشتمل آهي، هن مهيني 20 ڊسمبر تي نئي سنهري ڳوٺ ۾ 172 ڪٽبن حڪومت پاران بڻايل گهرن ۾ منتقل ٿي ويندا. اهي 172 ڪٽنب ٿر ڪول بلاڪ ٽو کان متاثر ٿيا هئا. انهن 172 ڪٽنبن کي ٿر ڪول ۾ نوڪريون، سندن گهرن جو معاوضو، هر هڪ کي 1100 اسڪوائر ميٽر جو گهر، تعليم ۽ صحت جون سهولتون نئين ڳوٺ ۾ ڏنيون ويون آهن. 5000 ٻارن لاءِ سنڌ حڪومت ٿر فائونڊيشن ذريعي 25 اسڪول قائم ڪري رهي آهي، انهن اسڪولن تي ڪم هلندڙ آهي. وڏي وزير سيد مراد علي شاهه 150 ميٽر هيٺ وڃي ڪول مائن جو جائزو ورتو، اهو ڪول مائن 180 ميٽرن تائين هيٺ آهي هن وقت تائين 150 ميٽر کوٽائي ڪئي وئي آهي، 180 ميٽر جي ڪول سيم نڪرندي، اهو ڪول پاور پلانٽ جيڪو ڪول مائن کان 2.5 ڪلو ميٽرن جي مفاصلي تي آهي جنهن کي بجلي بڻائڻ لاءِ سپلاءِ ڪيو ويندو. وڏي وزير مراد علي شاهه چيو ته پاڪستان ٿر ڪول سان چمڪڻ وارو آهي قوم تيار رهي. ٿر ڪول پاور پلانٽ جي چمني 180 ميٽر آهي. پاور پلانٽ 660 ميگاواٽ بجلي پيدا ڪندو. وڏي وزير سيد مراد علي شاهه ڪچن گارڊننگ واري پروجيڪٽ جو معائنو ڪيو، اهو پروجيڪٽ ملهاڻو ڳوٺ ۾ شروع ڪيو ويو آهي. انهيءَ بعد وڏي وزير سيد مراد علي شاهه مٺي اسپتال و دورو پڻ ڪيو ۽ اتي صحت جي سهولتن جي فراهمي جو جائزو ورتو ۽ اسپتال جي عملي کي مريضن جي علاج معالج جي بهترين سهولتون فراهم ڪرڻ جي هدايت ڪئي.

وڏي وزير جي ميڊيا سان ڳالهه ٻول:

ميڊيا سان ڳالهائيندي سنڌ جي وڏي وزير سيد مراد علي شاهه چيو ته مون ٿر ڪول مائننگ واري ڪم جو جائزو ورتو آهي ۽ راستي ۾ اسان بي ايڇ يو جو دورو به ڪيو. ٿر ڪول رٿا پنهنجو وقت کان اڳ مڪمل ڪئي ويندي. آڪٽوبر 2019ع تائين ٿر ڪول رٿا جي مڪمل ٿيڻ جي تاريخ هئي، اسان جون 2019ع ۾ ئي ٿر ڪول رٿا مڪمل ڪئي ويندي. هن چيو ته ماڻهو يقين نه ڪندا هئا ته هتان ڪوئلو نڪرندو، هاڻ ڪوئلو نڪرندي نظر اچي رهي آهي. ڪجهه معاملا نظر آيا آهن اهي به ختم ٿي ويندا. ٻارن جا ماهر ڊاڪٽر به ٿر جي اسپتال ۾ موجود آهن بهتري اچي رهي آهي. هن چيو ته وڌيڪ ڊاڪٽر بدين ۽ عمرڪوٽ مان ٿر اچي رهيا آهن ڇاڪاڻ ته هتي سهولتون بهتر آهن. اسان وٽ ڊاڪٽر ڪافي محنت ڪندا آهن. هن چيو ته گهٽ وزن جي ٻارن جي پيدائش ٿي رهي آهي،جنهن ڪري ٻارن فوت ٿيندا آهن. اسان ٻارن جي پيدائش کان اڳ ڳوڙهاري عورت نشاندهي ڪرڻي آهي ته جئين کين ٻار تندرست ۽ صحتمند پيدا ٿئي. هن چيو ته ٻار خوراڪ جي کوٽ ڪري فوت ناهن ٿيندا بلڪه ماءُ ڪمزو هوندي ته ٻار ڪمزو پيدا ٿيندو.

 

آصف زرداري ۽ فريال ٽالپر احتساب جي ڄار ۾ ڦاسي چڪا آهن: ڊاڪٽر ذوالفقار مرزا

پنگريو (اين اين آءِ) اڳوڻي سنڌ جي گهرو وزير ڊاڪٽر ذوالفقار علي مرزا چيو آهي ته آصف علي زرداري ۽ فريال ٽالپر احتساب جي ڄار ۾ ڦاسجي چڪا آهن تنهنڪري پيرن فقيرن جي درگاهن تي وڃي پنهنجي جند ڇڏائڻ جي ڪوشش ڪري رهيا آهن پر هاڻي سندن احتساب جو وارو اچي چڪو آهي مان 8 سال اڳ سنڌ ڌرتي جي دشمنن ۽ ظالمن جي خلاف جيڪا جدوجهد شروع ڪئي هئي ۽ اڄ تائين ان جي خلاف وڙهي رهيو آهيان ان جو ڦل ملڻ وارو آهي ۽ هاڻي مهينن ۾ نه پر ڏينهن ۾ عوام کي ڪرپٽ ٽولي مان نجات ملڻ واري اهي پنگريو ويجهو ملڪاڻي شريف ۾ ڪوٺايل مچ ڪچهري کي خطاب ۽ ميڊيا سان ڳالهائيندي ڊاڪٽر ذوالفقار مرزا چيو ته ڪجهه ڏينهن اڳ مان لنڊن ۾ آخري ڌڪو ڏيئي ڇڏيو آهي جنهن جا نتيجا جلد ايندا ۽ سنڌ جي عوام جي ادا ۽ ادي مان جان آجي ٿي ويندي هن چيو ته انور مجيد جهڙو ماڻهو قانون جي چنڀي ۾ آهي اڳ ايئن نه هو هي ڪا ننڍڙي ڳالهه نه آهي انور مجيد کي ڊاڪٽر ذوالفقار علي مرزا چيو ته مان اهڙو ڪم ڪرڻ چاهيان ٿو ته سنڌ جا ايندڙ ست نسلن جي ڪرپٽ ٽولي مان جند آجي ٿي وڃي ۽ منهنجا سنڌي ڀائرن سک جو ساهه کڻن هن هڪ سوال جي جواب ۾ چيو ته آصف زرداري منهنجو ڇا احتساب ڪندو هن مون تي ۽ منهنجن ڪارڪنن تي 32 ، 32 ڪيس داخل ڪرايا آهن هي وڌيڪ منهنجو وار به ونگو نٿو ڪري سگهي هاڻي سندس احتساب جو وارو اچي چڪو اهي هن چيو ته بدين ضلعي ۾ سخت پاڻي جي کوٽ آهي ۽ اسان وٽ پنهنجن پيارن جي ميتن کي غسل ڏيڻ لاءِ پاڻي نه آهي پر سنڌ جي حڪمرانن جون ٽنڊوالهيار ۾ 100 سيڪڙو زمين آباد آهن هي ظلم نه آهي ته ٻيو اڇا آهي هن وڌيڪ چيو ته سنڌ جا آبپاشي آفيسر به حڪمران ٽولي لاءِ غيرقانوني ڪم ڪري رهيا آهن کين ايئن نه ڪرڻ گهرجي ٻي صورت ۾ انهن آفيسرن کي به جوابده ٿيڻو پوندو ذوالفقار مرزا چيو ته موجوده حڪومت کي اڃا 3 مهينا ٿيا آهن ٽن مهينن اندر ڪنهن جي ڪاڪردگي جو تعين ڪرڻ ممڪن نه آهي هن چيو ته جيڪڏهن آصف زرداري حڪومت هلائي سگهي ٿو ته پوءِ عمران خان ڇو نه حڪومت هلائي سگهندو عمران خان حڪومت به سٺي نموني هلائيندو ۽ احتساب جو سلسلو به جاري رکندو ۽ ڪنهن ڪرپٽ کي نه ڇڏيندو هن چيو ته کيس سنڌ ڌرتي سان پيار آهن سنڌ جي ثقافت جا رنگ نرالا آهن مچ ڪچهرين جو اهتمام ثقافت جو اظهار آهي اهڙين ڪچهرين سان عوام کي پاڻ ۾ ويجهو اچڻ جو موقعو ملو مچ ڪچهري کي لطف علي ملڪاڻي، دلبر سنڌي ۽ ٻين به خطاب ڪيو مچ ڪچهري ۾ سنڌ جي نالي وارن اديبن دانشورن شاعرن ۽ فنڪارن پنهنجي فن جو مظاهرو ڪيو ان کان اڳ  ڊاڪٽر ذوالفقار مرزا پنڱريو ۾ مختلف برادرين جي تڏي تي وڃي دعا گهري مرزا گروپ جا مقامي اڳواڻ به ان موقعي تي ان سان گڏ هئا.

 

سپريم ڪورٽ ۾ حددخلين جي خلاف آپريشن تي نظرثاني جي درخواست داخل ڪئي ويندي: مرتضيٰ وهاب

ڪراچي (اين اين آءِ) سنڌ جي وڏي وزير جي اطلاعات واري صلاحڪار بئريسٽر مرتضيٰ وهاب چيو آهي ته ماڻهن کي بي گهر ڪرڻ واري تبديلي سرڪار حددخلين جي خلاف آپريشن روڪرائڻ جو ڪريڊٽ وٺڻ جي ناڪام ڪوشش ڪري رهي آهي جڏهن ته سنڌ حڪومت پهريان ئي ڪراچي جي ميئر کي حددخلين جي آپريشن بابت حڪم ڏيئي ڇڏيا هئا جڏهن ته سنڌ حڪومت 6 ڊسمبر تي سپريم ڪورٽ ۾ حددخلين بابت نظرثاني جي درخواست داخل ڪندي ۽ سنڌ حڪومت نظرثاني جي درخواست داخل ڪرڻ جي مڪمل تياري ڪري ورتي آهي هن چيو ته حددخلين جي خلاف آپريسن تي نظرثاني جي درخواست جي منظوري سنڌ ڪابينه پهرين ڊسمبر تي ئي ڏيئي ڇڏي هئي ان ڳالهه جو اظهار هن اربع تي پنهنجي هڪ جاري ڪيل بيان ۾ ڪيو مرتضٰ وهاب چيو ته حددخلين جي خلاف آپريشن جي ڏس ۾ سنڌ حڪومت هڪ بهترين قدم به کنيو آهي جنهن مطابق آپريشن متاثر دڪاندارن کي هلندڙ مهيني تائين متبادل جڳهه فراهم ڪئيويندي پهرين مرحلي ۾ 4 هزار کان وڌيڪ متاثرن کي متبادل جڳهه ڏني ويندي ته جيئن اهي رزق هلال جي ذريعي پنهنجو ڪاروباري جاري رکي سگهن هن چيو ته حددخلين جي خلاف آپريشن ۾ ايم ڪيو ايم ۽ تحريڪ انصاف جو ڪردار ڪنهن کان ڳجهو نه آهي ڪراچي جي ميئر جي سياسي وابستگي جنهن جماعت سان آهي اها وفاقي حڪومت ۾ حڪومت جي اتحادي آهي هن چيو ته تحريڪ انصاف جي حڪومت تضادن جو ميڙ آهي وزيراعظم سياست چمڪائڻ لاءِ ون مين شو ڪري رهيو آهي.

 

جيڪڏهن نواز شريف کي عدالت اصغر خان ڪيس ۾ گهرايو ويو ته کيس پيش ٿيڻ گهرجي: خورشيد شاهه

سکر(ويب ڊيسڪ) پيپلز پارٽي جي اڳواڻ سيد خورشيد شاهه چيو آهي ته مخالف ڄاڻي ڇڏين ته سکر پاڪستان پيپلز پارٽي جو قلعو آهي. اهڙن خيالن جو اظهار هن سکر ۾ ميڊيا سان ڳالهائيندي ڪيو. هن چيو ته سنڌ ۾ اڪثريت سان ڪاميابي حاصل ڪنداسين. خورشد شاهه چيو ته اسان جي پهرين ترجيح آبادي ۽ پاڻي آهي، پارٽي منشور به هڪ هفتي جي اندر اچي ويندو، صحت، تعليم ۽ ترقي به اسان جي ترجيحن ۾ شامل آهي. هن چيو ته وزير اعظم جي تبديلي کان وڌيڪ اسيمبلي جو مدو پورو ڪرڻ اهم آهي، پيپلز پارٽي جي هميشه ڪوشش رهي ته پارليامينٽ پنهنجو مدو پورو ڪري. خورشيد شاهه چيو ته نيب چيئرمين جي مقرري چيلينج ڪرڻ واري معاملي تي پنهنجو فرض نڀايو، هاڻ معاملو عدالت ۾ آهي، سپريم ڪورٽ بهتر ڄاڻي ٿي ته ڇا ڪرڻو پوندو. هڪ سوال جي جواب ۾ هن چيو ته ريحام خان جي مسئلي ۾ اسان کي نه وڌو وڃي، اصغر خان ڪيس ۾ منهنجو نالو غلطي سان اچي ويو هو، اصغر خان ڪيس ۾ جيڪڏهن نواز شريف کي گهرايو ويو آهي ته هن کي پيش ٿيڻو پوندو. هن چيو ته جمهوريت کي غير مستحڪم ڪرڻ جي لاءِ ڪيترائي محاذ بڻيا، پر سمورا ناڪام رهيا ۽ مستقبل ۾ به ناڪام رهندا.

 

ڪراچي: بلاول هائوس ۾ پ پ لاڙڪاڻي ڊويزن ۽ ضلعي سانگهڙ جي پارٽي اڳواڻن جو اجلاس ٿي گذريو

ڪراچي (06 جون 2018) ملڪ جي اڳوڻي صدر ۽ پي پي پي پارليامينٽرينز جي سربراهه آصف علي زرداري جي صدارت هيٺ لاڙڪاڻي ڊويزن ۽ ضلعي سانگهڙ جي پارٽي اڳواڻن جو هڪ اجلاس بلاول هائوس ۾ ٿي گذريو. اجلاس ۾ پي پي پي ويمن ونگ جي مرڪزي صدر فريال ٽالپر، پي پي پي سنڌ جو صدر نثار احمد کهڙو، مير اعجاز جکراڻي، سهيل انور سيال، ضياءُ الحسن لنجار، روشن جوڻيجو، فدا حسين ڏيرو ۽ ٻيا پڻ موجود هئا.

 

پ پ پورهيتن جو استحصال ڪندڙ قوتن آڏو پهاڙ بڻجي سامهون ايندي: بلاول ڀٽو زرداري

ڪراچي (اسٽاف رپورٽر) پاڪستان پيپلز پارٽي جي چيئرمين بلاول ڀٽو زرداري ملڪ جي مزدور ۽ پورهيت طبقي کي خاطري ڪرائي آهي ته پي پي پي سندن حقن لاءِ جاکوڙيندي رهندي، ڇاڪاڻ ته سماج وانگر پارٽي لاءِ به ڪرنگهي جي حيثيت اهي پورهيت ئي آهن. مزدورن جي عالمي ڏينهن جي موقعي تي جاري ڪيل پنهنجي پيغام ۾ پي پي پي چيئرمين چيو ته وزيراعظم شهيد ذوالفقار علي ڀٽي 10 فيبروري 1972ع ۾ ملڪ ۾ پهريون ڀيرو مزدور پاليسي جو اعلان ڪيو ۽ ملڪ ۾ ٽريڊ يونينز جا حق متعارف ڪرايا. هن چيو ته اها عوامي حڪومت ئي هئي، جنهن بينظير امپلائيز اسٽڪ آپشن اسڪيم جي شروعات ڪئي ۽ قومي ادارن جي ملازمن کي شيئر مفت ۾ ڏنا. بلاول ڀٽو زرداري سنڌ حڪومت پاران ٽي-ڌري مزدور پاليسي جي واکاڻ ڪئي، جنهن جي منظوري حڪومت، پورهيتن ۽  نوڪري ڏيندڙن گڏيل اتفاق سان ڏني ۽ اهو پڻ اتفاق ڪيو ويو ته انهن وچ ۾ سهڪار ضروري آهي. هن چيو ته سنڌ حڪومت کانسواءِ ٻي ڪنهن به صوبائي حڪومت اهو سنگ ميل پار نه ڪيو، ڇاڪاڻ ته انهن پارٽين جي اوليتن ۾ پورهيت شامل ئي ناهن. سندس وڌيڪ چوڻ هو ته اها به پاڪستان پيپلز پارٽي ئي هئي، جنهن سنڌ ۾ بي زمين هارياڻين کي زرعي زمين جا مالڪاڻا حق ڏنا ۽ يونين ڪائونسل سطح تي غربت جي خاتمي لاءِ پروگرام شروع ڪيو، جنهن 6 لک ڪٽنبن کي غربت جو خول ٽوڙي ٻاهر نڪرڻ ممڪن بڻايو ۽ اهي ننڍن ڪاروبارن وسيلي پنهنجو گذر سفر ڪري رهيا آهن. پي پي پي چيئرمين ملڪ جي مزدورن ۽ پورهيتن تي زور ڀريو ته هو پي پي پي ۾ شامل ٿي ان کي وڌيڪ سگهارو بڻائين ته جيئن اها کين حق ڏياري ۽ انهن کي تحفظ ڏي. بلاول ڀٽو زرداري ان عزم جو ارادو ڪيو ته پي پي پي مستقبل ۾ وڌيڪ مزدور دوست قانونسازي ڪندي ۽ پورهيتن جو استحصال ڪندڙ قوتن آڏو پهاڙ بڻجي سامهون ايندي.