تازيون خبرون

Category Archives: سنڌ

سنڌ جي مختلف شهرن ۾ بهار جو پهريو وسڪارو، روڊ رستا پاڻي سان ڀرجي ويا، موسم خوشگوار

اسلام آباد/ڪراچي(نمائندن وٽان ) سنڌ جي مختلف علائقن ۾ ڪٿي هلڪي ته ڪٿي وري تيز وسڪاري سيءُ ۾ واڌ ڪري ڇڏي، هيٺانهن علائقن ۾ پاڻي بيهجي ويو. ڪراچي، لاڙڪاڻي، جيڪب آباد، سکر، ڪنڌڪوٽ، گهوٽڪي، شڪارپور، خيرپور ضلعن جي وڏن توڙي ننڍن علائقن ۾ رات دير کان برسات جو سلسلو شروع ٿيو، جيڪو صبح تائين وفقي وقفي سان جاري رهيو. مورو شھر م رات کان پوندڙ ھلڪي برسات ميونسپل ڪاميٽي جي پت وائکي ڪري ڇڏي، پاڻي نيڪال نه ٿيڻ سبب برساتي پاڻي مين روڊ سميت مختلف چوراهن ۽ گھٽين م بيهجي ويو دڙو ۾ هلڪي برسات بعد بجلي بند ٿي وئي، ڳڙهي ياسين شهر توڙي ڀرپاسي تيز هوا سان گڏ برسات بعد موسم خوشگوار ٿي وئي، جڏهن ته مواصلاتي نظام درهم برهم ٿي ويو ڪشمور گڊو سميت ڀرپاسي ۾ بھار جي پھرين وسڪارو سبب موسم خوشگوار ٿي وئي، شڪارپور شھر ۽ ڀرپاسي ۾ برسات بعد ٿڌ ۾ ٿيڻ ڪري ماڻھون گھرن تائين محدود ٿي ويا، ڪرمپور، ميان صاحب، ڪنڌڪوٽ ۽ ڀرپاسي وارن علائقن ۾ گذريل 5 ڪلاڪن کان برسات جو سلسلو جاري رهيو. نئون ديرو ۽ ڀرپاسي ۾ برسات سبب ٿڌ ۾ اضافو ٿي ويو، هيٺانهن علائقن ۾ پاڻي بيهي ويو، ٺل ۽ آس پاس وارن علائقن ۾ تيز برسات سبب ٿڌ وڌي وئي ۽ بجلي بند ٿي وئي، پکو شھر ۽ آس پاس وارن علائقن ۾ رات کان وقفي وقفي سان برسات جو سلسلو جاري رهيو، ٿڌ ۾ واڌ ٿي وئي. ڳڙهي خيرو ۽ ڀرپاسي وارن علائقن ۾ برسات جو وسڪاري سيءُ ۾ واڌ ڪري ڇڏي، ماڻھو گھرن تائين محدود ٿي ويا، مواصلاتي نظام به درھم برهم ٿي ويو، ميروخان، وڳڻ، گڊو، اوٻاوڙو، ڏھرڪي، ڄام صاحب ۽ ٻين ڪيترن ئي علائقن ۾ برسات بعد ٿڌ وڌي وئي، ڪٿي وري هلڪي برسات سبب موسم خوشگوار ٿي ويو، ماڻهن تفريحي ماڳن ڏانهن رخ ڪيو.  پر ڪڻڪ جي آڳاٽي  فصل، سرنهن ، تورئي ۽ ٻين فصلن  کي نقصان پهتو آهيکير ٿر جابلو پٽي تي لاڳيتو وسڪاري بعد نئن گاج 13 فوٽ وهي آئي، ڪاڇي ۾ خوشي جي لهر پکڙجي وئي، 50 کان ڳوٺن جو دادو ۽ جوهي جي شهرن سان رابطو ڪٽجي ويو. دادو شهر سميت ضلعي جي مختلف شهرن جوهي، واهي پانڌي ۽ ٻين علائقن ۾ رات کان وٺي برسات جو سلسلو وقفي وقفي کان جاري آهي، گورک سميت کيرٿر جي جابلو سلسلي ۾ برسات پوڻ بعد نئن گاج 13 فوٽ وھي آئي آهي. برسات جي ڪري نئن گاج سميت مختلف 8 نئيون وهي اچڻ ڪري ڪاڇي جي ماروئڙن جا چهرا خوشي وچان ٻهڪي پيا، ان کانسواءِ نئيون وهي اچڻ ڪري ڪاڇي جي 50 کان وڌيڪ ڳوٺن جو جوهي ۽ دادو شهرن سان رابطو به ڪٽجي ويو آهي، مقامي آبادگارن جو چوڻ آهي ته تيز برسات سبب ڪڻڪ، ٽماٽرن ۽ مرچن جي فصل کي ڪپاري نقصان رسيو آهي. انهن حڪومت کان مطالبو ڪيو ته آبادگارن کي سبسڊي ڏئي کين معاشي نقصان کان بچايو وڃي.   ٻئي طرف موسميات کاتي اڄ ۽ سڀاڻي ڪراچي، لاهور، اسلام آباد ۽ ڪوئيٽا سميت ملڪ جي مختلف علائقن ۾ برسات جي اڳڪٿي ڪئي آهي. موسميات کاتي مطابق سنڌ جي مختلف حصن ۾ اڄ برسات جو امڪان آهي، جڏهن ته اسلام آباد، راولپنڊي، لاهور، گوجرانوالا ۽ سرگوڌا سميت ٻين علائقن ۾ به ڪڪر وسندا. ٻئي پاسي خيبرپختونخواهه ۽ بلوچستان ۾ پڻ تيز برسات جو امڪان آهي، ڪوئيٽا، زوب، مڪران ۽ قلات ۾ تيز برسات جي اڳڪٿي سبب نالن ۽ ندين ۾ ٻوڏ جو امڪان آهي.

 

سنڌ سرڪا ٻڌائي 2 ارب ڪيڏانهن ويا، وفاق سنڌ کي پئسا ڏنا ته ڏائڻ کائي ويندي: پير پاڳارو/ذوالفقار مرزا/ايازلطيف پليجو

ڪراچي (اسٽاف رپورٽر) پير پاڳاري جي صدارت هيٺ جي ڊي اي جي اجلاس ۾ فيصلو ڪيو ويو آهي ته مڪاني چونڊن ۾ حصو ورتو ويندو ۽ ٽڪيٽ هولڊرز جي حوالي سان هالا، ڪراچي، حيدرآباد ۽ لاڙڪاڻي ۾ اجلاس ڪيا ويندا. اجلاس کانپوءِ گڏيل پريس ڪانفرنس ڪندي صدر الدين شاهه راشدي چيو ته جي ڊي آءِ طرفان مڪاني چونڊن ۾ ڀرپور نموني حصو وٺڻ جو فيصلو ڪيو ويو آهي، اُن سلسلي ۾ ايندڙ اجلاس هالا ۾ ٿيندو. هُن چيو ته وفاقي سرڪار سمورن صوبن کي هڪ نظر سان ڏسي، پر سنڌ سرڪار ٻڌائي ته 2 هزار ارب رُپيا مليا هئا، اُهي ڪيڏانهن ويا. اياز لطيف پليجو چيو ته سنڌ حڪومت ٻڌائي ته اڃا تائين پبلڪ اڪائونٽس ڪميٽي جو چيئرمين ڇو مقرر نه ڪيو آهي؟ صوبائي اين ايف سي جو اجلاس ڇو ناهي ٿيو؟ ڊاڪٽرز جي هڙتال دوران فوت ٿيل مريضن جو حساب ڪير ڏيندو؟ سموري پاڪستان ۾ سڀ کان وڌيڪ ڪرپشن سنڌ ۾ ٿي رهي آهي، بدين، ميرپور خاص ۽ ٽنڊو الهيار ته تباهه ٿي چڪا آهن، پهرين ڪمند ۽ هاڻ ڪڻڪ جا اگهه نه ڏئي سنڌ جي زراعت کي تباهه ڪيو پيو وڃي. 20 مارچ تي سمورن ٽڪيٽ هولڊرز جو اجلاس ٿيندو ۽ 11 اپريل تي ٻيو اجلاس لاڙڪاڻي ۾ صفدر عباسي جي گهر تي ٿيندو. اجلاس ۾ ارشاد رانجهاڻي، رمشا وساڻ ۽ گونگي ناري شيرين بروهيءَ جي قتل جي به سخت لفظن ۾ مذمت ڪئي وئي. اُن موقعي تي ڳالهائيندي ذوالفقار مرزا  چيو ته وفاق کي ڊيڄارڻ جي ڪوشش ڪئي پئي وڃي، جنهن ڏينهن سنڌ کي پئسا ملندا ته ڏانئڻ کائي ويندي. وزيراعظم جلد سنڌ جي دوري تي ايندو.

 

سعودي شهزادي کي ڀليڪار، ڪشميرين کي حق ملي ها ته پلواما جهڙي دهشتگردي جا واقعا پيش نه اچن ها: بلاول ڀٽو

ميونخ (اين اين آءِ) پ پ پ چيئرمين بلاول ڀٽو زرداري چيو آهي ته جيڪڏهن ڪشميرين کي سندن حق ملکي ها ته پلواما جهڙا دهستگردي جا واقعا نه ٿين ها واقعي کان پوءِ ڀارت جو ردعمل هڪ فطرتي عمل آهي ڀارت پاران/ڏسو صفحو 3 بقايا نمبر 42

پاڪستان تي لڳايل الزام جذباتي نوعيت جا آهن جرمني جي شهر ميونخ ۾ هڪ سيڪيورٽي ڪانفرنس ۾ بلاول ڀٽو زرداري ينگ گلوبل ليڊر جي حيثيت سان شرڪت ڪئي جنهن کان پو3 ميڊيا سان ڳالهائيندي هن چيو ته ڀارت پاران پاڪستان تي لڳايل الزام جذباتي نوعيت جا آهن پ پ پ چيئرمين چيو ته دهشتگردي جي معاملي تي پاڪستان جو چٽو موقف آهي دهشتگردي جي نه ته حمايت ڪيون ٿا ۽ نه ئي دهشتگردي چاهيون ٿا پ پ پ چيئرمين سعودي ولي عهد شهزاد محمد بن سلمان جي پاڪستان اچڻ تي کيس ڀليڪار چيو ۽ چيو ته چاهيون ٿا ته پاڪستان جي پرڏيهي پاليسي خطي جي حالتن کي نطر ۾ رکندي وسيع بنيادن تي طئي ڪرڻ گهرجي هن چيو ته پاڪستان صرف هڪ ملڪ سان لاڳاپا بهتر نٿو رکي سگهي پر سڀني سان سٺا سفارتي لاڳاپا رکڻ گهرجن بلاول ڀٽو زرداري وزيراعطم کي مخاطب ٿيندي چيو ته بهتر ٿئي ته جيڪڏهن وزيراعظم پرڏيهي پاليسي ۾ پارليمان جي راءِ شامل ڪري ها سعودي ولي عهد جي دوري جي معاملي تي وزيراعظم مخالف ڌر کي ٻاهر رکيو ان جي باوجود مخالف ڌر جماعتن ان معاملي تي سياست نه ڪئي وزيراعظم کي سليڪٽڊ وزيراعظم جو لقب ڏيڻ جي بيان تي بلاول ڀٽو چيو ته هو ملڪ اندر رهندي مٿس تنقيد ڪري ٿو ڇو ته هو پاڪستان ۾ نه آهي تنهنڪري وزيراعظم کي سليڪٽڊ نه چوندو تحريڪ انصاف جي حڪومتي پاليسين تي تنقيد ڪندي بلاول ڀٽو زرداري چيو ته پرڏيهي پاليسي هجي يا اقتصادي، حڪومت جو منصوبو واضح نه آهي هر فيصلي تي يوٽرن وٺڻ سان نه ته معيشت هلي ٿي، نه ئي رياست ۽ نه ئي سياست بلاول ڀٽو زرداري چيو ته سندس جماعت وائيٽ پيپر تيار ڪرڻ تي ڪم ڪري رهي آهي جيڪو جلد عوام آڏو پڌرو ڪيو ويندو چونڊن جا نتيجا صرف آئين کي تڪراري نه بئاڻ جي ڪري قبول ڪيا پاڪستان ۾ ٽين جمهوري حڪومت پاڪستان پيپلزپارٽي جي نطريي جي فتح آهي پ پ پ چيئرمين وزيراعظم عمران خان کي مشورو ڏنو ته مفاهمت جي سياست ڪري ۽ اپوزيشن موڊ مان نڪري حڪومتي ذميواري قبول ڪري حڪومت کي اپوزيشن جماعتن سان گڏجي ملڪ جي مسئلن جو حل ڪڍڻ گهرجي.

 

رمشا وساڻ جي خون کي لوڙهڻ جي سازش ٿئي پئي ، ڪوبه جرڳو ناهي ٿيو ، پٽ کي بجائڻ لاءِ پرويز ڊرامو رچايو آهي: رمشا جي امڙ

ڪنب( رپورٽر )رمشا وساڻ جي خون کي لوڙهڻ جي سازش ٿئي پئي ڪوبه جرڳو ناهي ٿيو اظهار وساڻ کي بچائڻ لاء سندس والد پرويز وساڻ جرڳي جو ڊرامو رچايو آهي رمشا جي قاتلن کي سخت کان سخت سزا ڏني وڃي رمشا جي امڙ مسمات خرشيد جي ميڊيا سان ڳالهه ٻولهه خبر موجب 2 هفته اڳ ڪنب ٿاڻي جي حد ڳوٺ نواب خان وساڻ ۾ بي دردي سان قتل ٿيل رمشا وساڻ جي امڙ مسمات خرشيد وساڻ سندس مڙس پرويز وساڻ ميڊيا سان ڳالهائيندي چيو ته رمشا جي قتل جو ڪوبه جرڳو ناهي ٿيو اظهار وساڻ ذوالفقار وساڻ سان گڏ هو رمشا کي قتل ڪرڻ وقت،پوليس رمشا وساڻ جي قتل ۾ ملوث  اظهار وساڻ رياض عمران کي گرفتار نٿي ڪري اسان جي ماڻهن کي پوليس هرو ڀرو تنگ ڪري ٿي، جنسار وساڻ پنهنجي پٽ اظهار وساڻ کي بچائڻ لاءِ ڊرامو رچائي رهيو آهي ڪوبه جرڳو ناهي ٿيو رمشا جي قاتلن کي سخت کان سخت سزا ڏني وڃي جنسار وساڻ پوليس اهلڪار آهي اظهار وساڻ جو والد آهي ۽ قاتلن جو سهولت ڪار آهي،اظهار وساڻ رياض عمران رمشا جا قاتل آهن رمشا کي قتل ڪندڙ جوابدارن ذوالفقار عرف ذولفو اهڙو بيان اسان 164 تحت عدالت ۾ پڻ ڪيو آهي جرڳو ناهي ٿيو ميڊيا ۾ هلايل جرڳي واري خبر ۾ ڪابه صداقت ناهي

 

ڪوٽڙي ۾ گونگي ناري شيرين جو قتل، جوابدار اعتراف ڪري ورتو، ڪيس داخل نه ٿيو

ڪوٽڙي (ڊ.ر) ڪوٽري پوليس طرفان گونگي ناريءَ کي بدترين تشدد بعد گهٽا ڏئي قتل ڪندڙ جوابدار رحمان شيخ شيرين بروهيءَ جي لڄ لُٽڻ جو اعتراف ڪري ورتو آهي. پوليس موجب پُڇاڳاڇا دوران جوابدار اعتراف ڪيو آهي ته هُن گونگي ناريءَ سان لڄالٽ ڪئي ۽ مزاحمت ڪرڻ تي کيس بدترين تشدد جو نشانو بڻائڻ بعد گهٽا ڏئي قتل ڪري ڇڏيو. گذريل ڏينهن لڄالٽ ۽ بدترين تشدد بعد گهٽا ڏئي قتل ٿيل گونگي ناري شيرين بروهريءَ جي جنازي نماز ملڪ اسد سڪندر اسپورٽس ڪامپليڪس ۾ ادا ڪئي وئي، جنهن ۾ ن ليگ ايم اين اي کيئل داس ڪوهستاني ۽ پي ٽي آءِ ايم پي اي حليم عادل شيخ سوڌو وڏي انگ ۾ ماڻهو شريڪ ٿيا. شيرين بروهيءَ جو مڙهه جنازي نماز بعد ايراني پير قبرستان ۾ دفنايو ويو. ٻئي پاسي شيرين بروهيءَ جي بيرحماڻي قتل واري واقعي جو ڪيس داخل نه ٿي سگهيو آهي، جڏهن ته پوليس گرفتار جوابدار رحمان شيخ جو بلاول ميڊيڪل اسپتال مان ميڊيڪل چيڪ اپ ڪرائي ورتو آهي.

 

نئوديرو ۾ هٿياربندن هٿان 3 پورهيت قتل، وڏي وزير نوٽيس ورتو، جوابدارن جي گرفتاري جي هدايت

ڪراچي/لاڙڪاڻو(م.ڊ/اسٽاف رپورٽر)نئون ديرو شگر مل باءِ پاس روڊ تي موٽر سائيڪل سوار ٻن اڻڄاتل هٿياربندن چنگچيءَ مٿان فائرنگ ڪري ڏني، جنهن جي نتيجي ۾ چنگچيءَ ۾ ويٺل 2 ڄڻا ٿڏي تي مارجي ويا، جڏهن ته هڪ زخمي ٿي پيو. واقعي جي اطلاع تي نئون ديرو ٿاڻي جي پوليس مارجي ويلن جا لاش ۽ زخميءَ کي نئون ديرو اسپتال پهچايو، جتي زخميءَ جي حالت نازڪ هجڻ ڪري کيس چانڊڪا اسپتال لاڙڪاڻي نيو آندو ويو جتي هن به زخمين جا سور نه سهندي دم ڌڻي حوالي ڪيو. اسپتال ۾ موجود چنگچي ڊرائيور مختيار علي صحافين کي ٻڌايو ته آئون روزانو جي معمول جيان لاڙڪاڻي کان سواري کڻي نئون ديرو اچي رهيو هيس ته شگر مل باءِ پاس روڊ سان پاور هائوس وٽ موٽر سائيڪل تي سوار ٻن هٿياربندن چنگچيءَ جو اڳ جهلي فائرنگ ڪري ڏني جنهن ۾ چنگچيءَ ۾ ويٺل ٽئي ڄڻا رتورت ٿي ويا، آئون ڊڄي ويس مون هنن کي ايلاز منٿون ڪيا پر هنن هڪ به نه ٻڌي. هوڏانهن مارجي ويلن سان ڊنر سيٽ جا ٿانوَ به گڏ هئا، جيڪي چنگچيءَ ۾ پيل هئا،ڊي ايس پي نئين ديري  خان محمد کوسي  جوچوڻ آھي ته جوابدار  چنگچي تي فائرنگ ڪري ٻن ڄڻن کي قتل ۽ ھڪ ڄڻي کي زخمي ڪري فرار ٿي ويا آھن جڏهن تھ جوابدارن جي گرفتاري لاءِ  علائقي جي ناڪابندي ڪري ڇڏي آهي، کين جلد قانون جي ڪٽهڙي ۾ آندو ويندو. ٻئي پاسي سنڌ جي وڏي وزير سيد مراد علي شاهه نئون ديرو شگر مل ويجھو مزدورن جي قتل جو نوٽس وٺندي ڊي آءِ جي لاڙڪاڻي کي قاتلن جي فوري گرفتاريءَ جي ھدايت ڪئي. ھن چيو تھ قاتلن جي گرفتاريءَ لاءِ ناڪابندي ڪري ڪارروائي وڃي. وڏي وزير سيد مراد علي شاھھ ڪمشنر لاڙڪاڻي ۽ ڊي آءِ جي لاڙڪاڻي سان رابطو ڪيو ۽ سندن ھدايت ڪئي تھ قتل ٿيل مزدورن جي وارثن سان رابطو ڪيو وڃي. ھن چيو تھ مزدورن جا مڙھھ سندن ڳوٺن تائين پھچائڻ لاءِ ھر قسم جون سھولتون فراھم ڪيون وڃن. وڏي وزير چيو تھ اھو ھڪ انتھائي ڏکوئيندڙ واقعو آھي، جيڪو سنڌ جي امن امان کي خراب ڪرڻ جي ھڪ سازش آھي. ھن چيو تھ سنڌ ۾ رھندڙ ھر شخص چاھي اھو ڪابھ ٻولي ڳالھائيندو ھجي اھو سنڌي آھي ۽ اسانجو ڀاءُ آھي. مراد علي شاھھ چيو تھ جيڪو بھ سنڌ جي امن کي خراب ڪندو ۽ معصومن جو رت وھائيندو اھو سندس دشمن آھي ۽ انھن دشمن خلاف سخت ڪارروائي ڪئي ويندي. ھن چيو تھ ڪنھن جو رت وھائڻ ڪٿان جي انسانيت آھي. وڏي وزير ڊي آءِ جي لاڙڪاڻي کي ھدايت ڏيندي چيو تھ مونکي قاتل گرفتار ڪري انھن تي دھشتگرديءَ جي شق لڳائي ڪيس داخل ڪري رپورٽ پيش ڪئي وڃي ۽ قاتلن جي گرفتاريءَ تائين پوليس جي ڪارروائي جاري رکي وڃي.

 

ڊيل گهرجي نه وري ڪا ڍر، اين آر او گهرندڙن جا نالا ته کڻو: پيپلز پارٽي

سکر(بيورو رپورٽ) پ پ اڳواڻ خورشيد شاهه چيو آهي ته وفاقي سرڪار ٻڌائي ته ڪهڙي نڀاڳي اين آر او گهريو آهي، ڪو ته نالو کڻو، ڪجهه ته ٻڌايو، پي ٽي آءِ سرڪار وٽ اڪثريت ناهي، اسان ڪجهه به ڪري سگهون ٿا. سکر ۾ ڳالهائيندي خورشيد شاهه چيو ته پهريان ڪڏهن به اسٽيڊنگ ڪميٽي جي چيئرمين خلاف بي اعتمادي جي رٿ ناهي آئي، اسان کي به خبر آهي ته وزيراعظم عمران خان ۽ وزيرن خلاف نيب ڪيسز آهن، خورشيد شاهه چيو ته عمران خان وٽ اڪثريت ناهي، اسان گهڻو ڪجهه ڪري سگهون ٿا. خورشيد شاهه وفاقي سرڪار سان مخاطب ٿيندي چيو ته ڪهڙي نڀاڳي اوهان کان اين آر او گهريو آهي، ڪو ته نالو کڻو، ڪجهه ته ٻڌايو، هن چيو ته اسان کي نه ڪا ڊيل گهرجي. نه وري ڪا ڍر چاهيون ٿا.

 

ارشاد رانجهاڻي قتل واري واقعي کي لساني رنگ نه ڏنو وڃي، اهو انسانيت جو قتل هوۡ: مراد علي شاهه

ٽنڊو باگو/ ڪراچي (نمائندن وٽان) سنڌ جي وڏي وزير سيد مراد علي شاهه چيو آھي تھ ارشاد رانجھاڻي جي قتل کي لساني رنگ ڏيڻ جي ڪوشش ڪئي پئي وڃي اسان ان مامري تي ڪنھن کي بھ سياسي رنگ نھ ڏيڻ ڏينداسين. چيف جسٽس ايف آءِ اي کي بلاول ڀٽو زرداري ۽ سنڌ جي وڏي وزير سيد مراد علي شاھھ جو نالو اِي سي ايل مان فوري طور تي ڪڍڻ جو حڪم ڏنو آھي. سنڌ حڪومت تعليم جي بھتريءَ لاءِ ھر ممڪن ڪوشش ڪري رھي آھي. اسان صوبي ۾ يونيورسٽيون پڻ قائم ڪري رھيا آھيون. اھڙن خيالن جو اظھار ھن ٽنڊو باگو ۾ ميڊيا سان گفتگو دوران ڪيو، ميڊيا سان ڳالھائيندي وڏي وزير سيد مراد علي شاھھ چيو تھ اسڪولن ۾ سھولتن جي کوٽ کي ھنگامي بنيادن تي پورو ڪري رھيا آھيون. اسان سھولتن جي کوٽ کي پورو ڪرڻ لاءِ 4200 اسڪولن کي بجيٽ ڏنو آھي. ارشاد رانجھاڻي قتل جي حوالي سان سندس چوڻ ھو تھ ارشاد رانجھاڻي جي قتل کي لساني رنگ ڏيڻ جي ڪوشش ٿي رھي آھي. اھو واقعو انسانيت خلاف آھي جنھن سان بھ ناانصافي ٿيندي سنڌ حڪومت انھن سان بيٺل ھوندي، ھوُ سنڌي آھي يا ڪو ٻيو منھنجو ان سان ڪو تعلق نھ آھي. اسان ڄاڻايل مامري ۾ ڪنھن بھ قسم جو ڪو سياسي رنگ ھرگز برداشت نھ ڪيو ويندو. ڪنھن کي بھ پروپيگنڊا ۾ اچڻ جي ضرورت نھ آھي. ھن چيو تھ رمشا وساڻ ڪيس ۾ بھ اسان سختيءَ سان عمل ڪيو آھي. رمشا وساڻ ڪيس ۾ سمورن ڏوھارين کي گرفتار ڪيو آھي. اِي سي ايل ۾ شامل نالن جي حوالي سان وڏي وزير سيد مراد علي شاھھ چيو تھ چيف جسٽس ايف آءِ اي وارن کان پڇا ڪئي تھ اوھان ڪنھن جي چوڻ تي بلاول ڀٽو زرداري ۽ سنڌ جي وڏي وزير جو نالو اِي سي ايل ۾ وڌو آھي. چيف جسٽس کين بلاول ڀٽو زرداري ۽ مراد علي شاھھ جو نالو فوري طور تي اِي سي ايل مان ڪڍڻ جو حڪم ڏنو آھي. ھن پاڻيءَ جي کوٽ بابت چيو تھ سنڌ کي ان جي حصي جو پاڻي نھ پيو ڏنو وڃي جنھن ڪري سنڌ جا آبادگار پاڻي جي کوٽ ھئڻ ڪري پريشان آھن. وڏي وزير سيد مراد علي شاھھ چيو تھ وفاقي حڪومت پاران صوبن کي وسيلن جي ورڇ بھتر نھ پئي ڪئي وڃي. 85 سيڪڙو وسيلا صوبن کي وفاق کان ملندا آھن جنھن لاءِ اسان وفاق سان ڳالھايو آھي. تقريب کي خطاب دوران سنڌ جي تعليم واري وزير سيد سردار شاھھ چيو تھ استادن جي کوٽ گھڻي نھ آھي جيڪڏھن مقرري ۽ بدليءَ جو مسئلو ضرور آھي. ھن چيو تھ سنڌ ۾ 28 شاگردن لاءِ ھڪ استاد مقرر ھوندو آھي. 150000 شاگردن لاءِ 42000 استاد موجود آھن. اسان رڳو ريشنلائيز ڪري رھيا آھيون. جتي جتي استادن کي کوٽ ھوندي انھن اسڪولن کي استاد ڏنا ويندا. ھي مير غلام محمد ٽالپر اسڪ پراڻو اسڪول آھي ان کي اصل حالت ۾ بحال ڪرڻ لاءِ وڏي وزير ھدايتون ڪيون آھن. وڏي وزير جي ٽنڊو باگو پھچڻ تي سندس شاندار آجيان ڪئي وئي. انھيءَ بعد وڏي وزير سيد مراد علي شاھھ ٽنڊو باگو ۾ مير غلام محمد ٽالپر اسڪول جي سئو سالا تقريب ۾ شرڪت ڪئي. سيڪريٽري ڪاليجز پرويز احمد سيھڙ ڪاليج جي حوالي سان بريفنگ ڏني. وڏي وزير سيد مراد علي شاھھ ھڪ ڪلاس ۾ شاگردن سان ڳالھھ ٻول پڻ ڪئي. تقريب جا انتظام اولڊ بوائز ايسوسيئيشن ڪيا ھئا. ان موقعي تي محترمھ بينظير ڀٽو شھيد جي ايثال ثواب لاءِ دعا پڻ ڪئي وئي. انھيءَ بعد وڏي وزير سيد مراد علي شاھھ تقريب کي خطاب ڪندي چيو تھ بدين ۾ اڳ بھ آيو آھيان  پر اڄ وڌيڪ خوش آھيان ڇاڪاڻ تھ ھتي اسٽيج تي ٽالپر، جمالي، نظاماڻي، پير ۽ ٻيون اھم شخصيتون موجود آھن. مان تمام خوش آھيان تھ 100 سال پراڻي ترجيحي اسڪول ۾ آيو آھيان. مير غلام محمد ٽالپر جھڙي عظيم انسان جي اسڪول ۾ موجود ھئڻ مون لاءِ ھڪ اعزاز جي ڳالھھ آھي.، مير صاحب پنھنجي وقت جو سنڌ جو سر سيد ھو. اسان جا پراڻا ھندو ۽ پارسي تعليم جي ماھرن سنڌ ۾ تعليم کي اڳتي وڌائڻ ۾ اھم ڪردار ادا ڪيو آھي. مراد علي شاھھ ڊگري ڪاليج جو افتتاح ڪندي چيو تھ ٽنڊو باگو کي ھر سھول فراھم ڪئي ويندي. اسان ملازمن کي پڪو ڪندا آھيون جيڪي محترمھ شھيد ڀٽو جو سبق آھي ۽ ان تي عمل ڪندا رھنداسين. جن اسڪولن ۾ اينرولمنيٽ وڌيڪ آھي اسان انھن کي اھميت ڏئي رھيا آھيون. تعليم واري شعبي ۾ اسان کي اوھان سڀ ۽ خاص طور تي استادن کي دل سان ڪم ڪرڻ گھرجي. ھن چيو تھ مير غلام محمد ٽالپر جڏھن گرلز اسڪول بڻايو تھ ليڊي استاد جي ضرورت پئي مير صاحب ھڪ ليڊي استاد جو خاندان حيدرآباد کان بدين منتقل ڪرايو ۽ گرلز تعليم شروع ڪئي. ھن چيو تھ استادن جو ڪم آھي تھ ٻارن کي سٺي تعليم ڏني وڃي. استادن جي کوٽ نھ آھي پر اسان وٽ سائين ۽ رياضي جي استادن جي ضرورت آھي. اسان استادن کي نئين گھرجن ۽ ٽيڪنالاجي موجود سکيا ڏئي رھيا آھيون. اسان کي ھن ملڪ ۽ صوبي جي تعمير ڪرڻي آھي ۽ اھو رڳو تعليم سان کي ٿي سگھي ٿي. ھي قديم شھر آھي. مون ان جي روڊن جي تعمير لاءِ ورڪس کاتي کي ھدايت ڪئي آھي. ھن چيو تھ بدين پڇڙيءَ ۾ آھي اسان ھتان جي نھري نظام کي بھتر بڻائي رھيا آھيون. وفاقي حڪومت پنھنجو ڪم نھ پئي ڪري جنھن ڪري اسان کي گذريل سال کان بھ گھٽ فنڊ ملي رھيا آھن. فنڊن جي کوٽ آھي پر اسان ڪوشش ڪري مسئلن کي حل ڪنداسين. صحت واري شعبي ۾ بھ ھن ضلعي کي خاص توجھھ ڏئي رھيا آھيون. ھن اسڪول جي اولڊ بوائز جيڪي ھاڻي اولڊ مين ٿي ويا آھن سندن ڪوشش ڪري ھي پروگرام ٿي رھيو آھي مان انھن جو ٿورائتو آھيان. وڏي وزير چيو تھ ھن پراڻي اسڪول کي اصل حالت ۾ بحال ڪيو ويندو. ان موقعي تي ھن وڌيڪ چيو تھ اڄ ميڊيا ھلايو تھ مراد علي شاھھ گاڏين جي قافلي ۾ ٽنڊو باگو پھتو جڏھن تھ مون سان رڳو ھڪ گاڏي ھئي باقي ھتان جي دوستن جون ھيون. مراد علي شاھھ اولڊ بوائز ايسوسيئيشن مير غلام محمد خان ٽالپر اسڪول جي نمائندن ۾ ايوارڊ ورھايا.

 

ٿر ۾ خوراڪ جي کوٽ ۽ مختلف بيمارين وگهي وڌيڪ 2 ٻارڙا موت جو کاڄ بڻجي ويا

مٺي(رپورٽر) سول اسپتال مٺي ۾ خوراڪ جي کوٽ ۽ مختلف بيمارين وگهي وڌيڪ 2 ٻارڙا موت جو کاڄ بڻجي ويا آھن جنهن کان پوءُ هلندڙ مهيني فوتي ٻارڙن جو انگ 26 ۽ ھلندڙ سال 93 ٿي ويو آھي فوتي ٻارڙن ۾ 3 مهينن جو اشوڪ ڪولهي ۽ گلاب ميگهواڙ جو تازو ڄاول ٻار شامل آھي. جڏھن ته رڳو مٺي سول اسپتال ۾ 47 ٻارڙا زير علاج آھن. جڏھن ته سنڌ سرڪار پاران علاج ۽ بنيادي سهوليتن واريون دعوائون رڳو مٺي شھر تائين محدود آھن ضلع جي باقي شھرن توڙي 26 سئو کان به ڳوٺن ۾ علاج جون سهولتون اڃان تائين پهچي نه سگهيون آھن. جنهن سبب موت وارن واقعن تي ضابطو اچڻ مشڪل بڻيل آھي. ڇاڪاڻ ته فوت ٿيندڙ ٻارن جو 90 سيڪڙو تعلق ٻھراڙي جي ڳوٺن سان آھي.

 

سنڌ جي ٿر ۾ 610 ملين ڪيوبڪ ميٽر پاڻي جي موجودگي جو انڪشاف

حيدرآباد (م.ڊ) سنڌ جي ٿر زون جي ٻئي نمبر جر ۾ 610 ملين ڪيوبڪ ميٽر (0.5 ملين ايڪڙ فٽ) پاڻي جي موجودگي جو انڪشاف ٿيو آهي. اهڙو انڪشاف سنڌ جي آبپاشي کاتي پاران سال 2014ع کان 2016ع تائين ڪرايل هڪ سروي ۾ ٿيو آهي. اهو سروي آبپاشي کاتي جي بئراج امپروومينٽ پراجيڪٽ نگراني ۾ ٿيو جنهن ۾ سپارڪو، ڊبل اي ڪنسلٽنٽ ڪمپني ۽ ڊيپراڪ ڊرلنگ ڪمپني جون خدمتون به حاصل ڪيون ويون هيون. ان سروي تي مجموعي طور 6 ڪروڙ رپيا خرچ ڪيا ويا. سروي مطابق ٿر کي 4 زونز ۾ تقسيم ڪيو ويو هو جنهن ۾ هڪ زون رحيم يار خان وارو ٿر، ٻيو زون اڇڙو ٿر، ٽيون زون کوکرو پار وارو ٿر ۽ چوٿون زون مٺي ۽ اسلام ڪوٽ تي ٻڌل واري جي ڀٽن وارو ٿر شامل هئا. پهرين زون جي سروي ۾ اهو انڪشاف ٿيو ته سنڌ طاس معاهدي مطابق ڀياس ۽ ستلج درياهه هندستان جي حوالي ڪرڻ ۽ هنڌستان پاران انهن درياهن تي ڊيم ٺاهڻ جي ڪري ان زون ۾ پاڻي جي شديدکوٽ پيدا ٿيل آهي ۽ ان زون جا ماڻهو پيئڻ جي پاڻي جي حوالي سان سخت تنگي جو شڪار بڻيل آهن. سروي مطابق ٿر جو ٻيون زون جيڪو اڇڙي ٿر جي ايراضي تي مشتمل آهي ۾ به پيئڻ جي پاڻي جي وڏي کوٽ آهي جنهن جي نتيجي ۾ نه رڳو انسان پر جانور به پيئڻ جي پاڻي جي حوالي سان مشڪلاتن جو شڪار هجن ٿا. رپورٽ مطابق ٿر جي ٽيئن زون جي جر واري پاڻي ۾ ججهي مقدار ۾ فلورائيڊ هجڻ جي ڪري اهو پاڻي به انساني صحت لاءِ هاڃيڪار آهي جڏهن ته اهڙي مليل جليل صورتحال چوٿين زون سان به لاڳو آهي. رپورٽ ۾ ڄاڻايو ويو آهي ته ٿر زون جي جر جي 10 سيڪڙو پاڻي ۾ نمڪيات هڪ هزار پي پي ايم تائين موجود آهي جنهن پاڻي کي انسان واپرائي ۽ محدود زراعت لاءِ ڪتب آڻي سگهن ٿا. 30 سيڪڙو پاڻي ۾ نمڪيات هڪ هزار کان 3 هزار پي پي ايم آهي، جيڪو پاڻي پڻ جانورن ۽ قدرتي نباتات جي استعمال ۾ آڻي سگهجي ٿو. جڏهن ته 60 سيڪڙو پاڻي ۾ نمڪيات جو مقدار 3 هزار کان 5 هزار پي پي ايم تائين آهي جنهن کي آر او پلانٽس ذريعي مٺو بڻائي سگهجي ٿو ۽ ان پاڻي تي ٿر جي نباتات ۽ مڇين کي به پالي سگهجي ٿو جنهن سان ٿر ۾ غذائي کوٽ ختم ڪرڻ ۾ هٿي ملي سگهي ٿي. رپورٽ ۾ سفارش ڪئي وئي آهي ته گڊو بئراج وٽان نڪرندڙ ريڻي ڪئنال جي آر ڊي نمبر 180 وٽان 5 هزار ڪيوسڪ جي ڊسچارج رکندڙ ٿر ڪئنال ڪڍيو وڃي ته جيئن ٿر جي جر جي پاڻي کي ريچارج ڪرڻ سان گڏوگڏ انساني آبادين ۽ جانورن جي واهپي ۾ ڪم آڻي سگهجي. ذريعن موجب ان حوالي سان هڪ پي سي ون به تيار ڪئي وئي آهي جنهن ۾ تجويز ڪيو ويو آهي ته ريڻي ڪئنال جي آر ڊي 180 جي ديهه کنجهو مان ٿر ڪئنال ڪڍيو وڃي جنهن کي پهرين فيز ۾ اڇڙي ٿر جي ڊرينهن وارن ڍنڍن ۾ ڇوڙ ڪيو وڃي جنهن جو تعداد لڳ ڀڳ 40 کن آهي. ريڻي ڪئنال جي آر ڊي 180 کان ڊرينهن وارين ڍنڍن تائين تجويز ڪيل ٿر ڪئنال جي ڊيگهه 145 ڪلو ميٽر ڄاڻائي وئي آهي. ٿر ڪئنال جي پهرين فيز جي لاڳت جو تخمينو 20 ارب رپيا لڳايو ويو آهي. انهي رپورٽ ۾ ٿر ڪئنال جو ٻيو فيز به تجويز ڪيل آهي جنهن ۾ ڄاڻايو ويو آهي ته اڇڙي ٿر جي ڊرينهن وارن ڍنڍن کان ٿر ڪئنال جو ٻيو فيز شروع ڪيو وڃي جنهن کي ڇاڇري وٽ آڻي اتي پاڻي جي ذخيري لاءِ تلاءُ ٺاهيو وڃي ته جيئن ڇاڇري جي علائقي ۾ به جر ريچارج ٿي سگهي. ٿر ڪئنال جي ٻئي فيز جي ڊزائين ڊسچارج هڪ هزار ڪيوسڪ تجويز ڪيل آهي جنهن جي لاڳت جو تخمينو 5 ارب رپيا لڳايو ويو آهي. ذريعن موجب اها پي سي ون سنڌ حڪومت وٽ جمع به ڪرائي وئي آهي جنهن تي پلاننگ اينڊ ڊولپمينٽ ڊپارٽمينٽ ٻه اجلاس به ڪري چڪو آهي. پي سي ون موجب ٿر ڪئنال جي تعمير جو ڪم واپڊا حوالي ڪرڻ جي تجويز پڻ ڏني وئي آهي هوڏانهن ٿر جي علائقي ۾ پاڻي جي موجودگي جي حوالي سان سروي ڪندڙ آبپاشي کاتي جي ٽيڪنيڪل آفيسر حبيب عرساڻي جو چوڻ آهي ته ٿر ۾ پيئڻ جي پاڻي جي دستيابي جي حوالي سان سازدا کان وٺي ايريگيشن کاتي پاران 1988ع کان 2016ع تائين مختلف منصوبن تي ڪم ڪيو ويو آهي. اسان پنهنجي سروي رپورٽ ۾ اهو تجويز ڪيو آهي ته گڊو بئراج کان ٿر ڪئنال ڪڍي ان وسيلي اڇڙي ٿر جي ڊرينهن وارين ڍنڍن تائين پاڻي پهچائجي ته جيئن ٿر جي جر جي پاڻي جي ريچارج وارو مسئلو حل ٿي سگهي. هن چيو ته ٿر ۾ پاڻي پهچائڻ جو اهو ئي ڪار آمد حل آهي. هن چيو ته ڇاڇري ۾ پيئڻ جو پاڻي صحت لاءِ هاڃيڪار آهي جنهن کي حل ڪرڻ لاءِ ڇاڇري ۾ پاڻي جو ذخيرو ٺاهي ان کي به ٿر ڪئنال وسيلي پاڻي مهيا ڪري سگهجي ٿو. هڪ سوال جي جواب ۾ هن چيو ته اسان ٻن سالن دوران جيڪا سروي ڪئي آهي ان جي رپورٽ سنڌ حڪومت وٽ جمع ڪرائي ڇڏي آهي.