تازيون خبرون

Category Archives: پاڪستان

پرڏيهي فنڊنگ ڪيس جي ٻڌڻي روزاني جي بنياد تي هلائي وڃي: مريم اورنگزيب

اسلام آباد (اين اين آءِ) ن ليگ جي ترجمان مريم اورنگزيب چيو آهي ته ن ليگ چيف اليڪشن ڪمشنر کي خط لکي ڇڏيو آهي، فارين فنڊنگ ڪيس جي روزانو ٻڌڻي ڪئي وڃي، هڪ بيان ۾ مريم اورنگزيب اسٽيٽ بينڪ جو ڊيٽا، ڳجها اڪائونٽ، ٻاهرين ملڪن مان اربين رپين جي غير قانوني رقم جو تفصيل جاري ڪرڻ جو مطالبو ڪيو، هن چيو ته ڪيس جي ٻڌڻي اوپن ٿيڻ گهرجي، قوم جو حق آهي ته حقيقتون ڄاڻي، هن چيو ته عمران صاحب پاران سموريون حقيقتن ۽ اليڪشن ڪميشن جي ڪارروائي کي ڳجهو رکڻ جي درخواست ڏني وئي آهي، جيڪڏهن چوري نه ڪئي ته تلاشي ڏيو، هن چيو ته 23 پارٽي جا اڪائونٽ ڳجها ڇو رکيا ويا، هن چيو ته ٻين جو 1970 کان ٽن نسلن ۽ ذاتي ڪاروباري جو حساب ۽ توهان بابت سوال نه ٿئي، جيڪڏهن چوري ناهي ڪئي ته تلاشي ڏيو، هن چيو ته وزيراعظم نواز شريف جي جي آءِ ٽي اڳيان پيش ٿي سگهي ٿو، عمران خان اليڪشن ڪميشن ۾ ڇو نه، هن چيو ته پيسا ڪٿان آيا ۽ ڇو لڪايا ويا تلاشي ڏيو، هن چيو ته ڪنهن پيسا ورتا ۽ ڪنهن جي اڪائونٽ ۾ آيا جيڪڏهن چوري ناهي ڪئي ته تلاشي ڏئي، جعلي ۽ ڳجهي اڪائونٽ مان پيسا ڪٿي استعمال ٿيا، جيڪڏهن چوري ناهي ڪئي ته تلاشي ڏيو، هن چيو ته ان ئي اڪائونٽ مان بني گالا جو محل ٺهيو، عليمه ڀيڻ جي اربين رپين جي ملڪ کان ٻاهر ملڪيت انهن ڳجهن اڪائونٽن مان ٺهي، جيڪڏهن چوري ناهي ڪئي ته تلاشي ڏيو.

 

 

اسان اڃا تائين مارشل لا جي ذهنيت ۾ پيا رهون: سپريم ڪورٽ

اسلام آباد (ويب ڊيسڪ) سپريم ڪورٽ جي جج جسٽس قاضي فائز عيسيٰ چيو آهي ته اسان اڃا تائين مارشل لا جي ذهنيت ۾ رهي رهيا آهيون ۽ هر ڳالهه تي آرڊيننس جاري ڪرڻا آهن ته جمهوريت ڪهڙي ڪم جي. جسٽس مشير عالم جي سربراهي ۾ سپريم ڪورٽ جي ٽي رڪني بئنچ سپريم ڪورٽ بار هائوسنگ سوسائٽي بابت ڪيس جي ٻڌڻي ڪئي. جسٽس اعجاز الاحسن چيو ته ڇا هائوسنگ فائونڊيشن متاثرن کي رقم ڏيڻ لاءِ تيار آهي؟ جيڪڏهن هائوسنگ فائونڊيشن متاثرن سان رقم جو معاملو طئي ڪري ڇڏي ته عدالت فيصلو ڪندي، ظاهري طور اصل معاملو 600 ڪنال جي رقم جو آهي. هائوسنگ فائونڊيشن جي وڪيل چيو ته حڪومت هائونسگ فائونڊيشن بابت جولاءِ ۾ صدارتي آرڊيننس جاري ڪيو آهي، اڳ ئي گهڻيون ادائيگيون ٿي چڪيون آهن، هاڻ ممڪن ناهي. جسٽس قاضي فائز عيسيٰ ريمارڪس ڏنا ته اسان اڃا تائين مارشل لاءِ جي ذهنيت ۾ رهي رهيا آهيون، جولاءِ ۾ اهو آرڊيننس آيو ۽ اسيمبلي ۾ ان تي بحث به نه ڪرايو ويو، جيڪڏهن هر ڳالهه تي آرڊيننس جاري ڪرڻو آهي ته پوءِ جمهوريت ڪهڙي ڪم جي آهي، اسيمبلي ۾ ڪنهن بل تي بحث ناهي ڪرايو ويندو. سپريم ڪورٽ بار جي صدر امان الله ڪنراڻي چيو ته اسان هائونسگ فائونڊيشن کي رقم ادا ڪري چڪا آهيون، اسان جو معاملو آءِ 14 کان الڳ آهي، اسان جي معاملي کي ۽ ان معاملي کي عدالت ڌار ڌار ڏسي. عدالت ۾ ايف 14 بابت متاثرن ۽ هائوسنگ فائونڊيشن جا دليل مڪمل ٿي ويا، جنهن کانپوءِ ڪيس جي وڌيڪ ٻڌڻي سومر تائين ملتوي ڪئي وئي.

 

اپوزيشن جو هڪ ئي موقف آهي ته موجوده حڪومت گهر ڀيڙو ٿيڻ گهرجي: ن ليگ/جي يو آ ءِ(ف)

اسلام آباد (بيورو رپورٽ) مولانا فضل الرحمان آزادي مارچ جي تاريخ تبديل ڪرڻ جي حوالي سان نواز ليگ جي سفارشن تي مجلس عاملا سان مشورن بعد جواب ڏيڻ جي خاطري ڪرائي ڇڏي. احسن اقبال جي اڳواڻيءَ ۾ نواز ليگ جي وفد جي يو آءِ سربراهه مولانا فضل الرحمان سان ملاقات ڪئي، جنهن دوران نواز ليگ جي وفد طرفان پارٽي جي ڪور ڪميٽي جي فيصلي بابت فضل الرحمان کي آگاهه ڪيو. اُن کانسواءِ آزادي مارچ جي تاريخ تبديل ڪرڻ جي حوالي سان به صلاح مشورا ڪيا ويا. ملاقات بعد مولانا فضل الرحمان ۽ نواز ليگ جي وفد گڏيل طور ميڊيا سان ڳالهايون ڪيون. احسن اقبال چيو ته سندن جماعت مولانا فضل الرحمان جي ڌرڻي جي حمايت ڪري ٿي، سمورين اپوزيشن پارٽيز جو اِن معاملي تي هڪڙو ئي موقف آهي ته موجوده حڪومت ڌانڌلي جي نتيجي ۾ آئي آهي، اُن کي گهر ڀيڙو ٿيڻ گهرجي. ملڪ ۾ مهانگائيءَ جي طوفان سبب ڪاروبار بند ٿي رهيا آهن، موجوده صورتحال جو ڪارڻ اناڙي وزيراعظم آهي، ائين نه ٿئي جو حڪومت جون ناڪامين جو بار عسڪري قيادت کي به کڻڻو پوي. نواز ليگ اڳواڻ چيو ته مولانا فضل الرحمان آڏو ڳالهه رکي وئي آهي ته آزاد مارچ لاءِ ڪجهه وقت ڏنو وڃي ته جيئن منظم ٿي بهتر نتيجا حاصل ڪري سگهجن، مولانا فضل الرحمان چيو آهي ته هو مجلس عاملا اڳيان نواز ليگ جون سفارشون رکندو. اُن موقعي تي ڳالهائيندي مولانا فضل الرحمان چيو ته سڀني جو اتفاق آهي ته ملڪ اندروني طور ٻُڏي رهيو آهي، مهانگائيءَ جي ڪري عام ماڻهو صبح شام پريشان آهي، پاڪستان جي مذهب سڃاڻپ پڻ ختم ٿي رهي آهي.

 

ملڪ ۾ 3 قسمن جا تعليمي نصاب هلي رهيا آهن، تعليم جو هڪجهڙو نصاب ترقي لاءِ ضروري آهي: وزيراعظم

اسلام آباد (اين اين آءِ) وزيراعظم عمران خان چيو آهي ته ملڪ ۾ 3 قسمن جو تعليمي نصاب هلي رهيو آهي، هڪجهڙو تعليمي نصاب ترقي لاءِ ضروري آهي، هاڻوڪي تعليمي نظام سبب اڪثريت مٿي نٿي اچي سگهي، طبقاتي تعليم جو نظام ختم ڪنداسين، مدرسن جي کتابين کي به جديد تعليم ذريعي مٿي اچڻ جو موقعو ملندو، پاڪستان، ترڪي ۽ ملائيشيا مسلمانن جي تاريخ ۽ موقف دنيا اڳيان پيش ڪرڻ لاءِ ٽي وي چينل شروع ڪندا، هو اربع تي تعليم جي وزارت جي انتظام هيٺ ديني مدرسن جي کتابين ۾ انعام ورهائڻ واري تقريب کي خطاب ڪري رهيو هو، ان موقعي تي شفقت محمود، نور الحق قادري، سيد اعجاز شاهه ۽ نعيم الحق موجود هو، وزيراعظم چيو ته نبي اڪرم صلم سڀ کان وڌيڪ تعليم حاصل ڪرڻ تي زور ڀريو، نبي ڪريم صلم فرمايو ته تعليم حاصل ڪريو پوءِ ڇو نه توهان کي چين وڃڻو پوي، ڇو ته پاڻ سڳورا ڄاڻيندا هئا ته تعليم کانسواءِ معاشرو ترقي نٿو ڪري سگهي، 70 سالن تائين دنيا جا مشهور سائنسدان مسلمان هئا، مسلمان تلوار سان نه پر علم سان ترقي ڪئي، هن چيو ته انگريزن هڪ منصوبي تحت مسلمانن جو تعليمي نصاب ختم ڪيو، تعليم ختم ٿي ته مسلمان ترقي نه ڪري سگهيو، هن وقت اسان جي ملڪ ۾ 3 قسمن جو مختلف نصاب هلي رهيو آهي، تحريڪ انصاف جي حڪومت فيصلو ڪيو آهي ته تعليم جي طبقاتي نظام کي ختم ڪيو ويندو، هڪ ئي ملڪ ۾ ٽن قسمن جو تعليمي نصاب وڏي ناانصافي آهي، ديني مدرسن جي کتابين کي ديني تعليم سان گڏ جديد دور جي تعليم حاصل ڪرڻي پوندي ته جيئن اهي به وڏن عهدن تي اچي سگهن ڇو ته هن وقت رڳو انگريزي تعليم جو نظام حاصل ڪندڙ ئي مٿي وڃي سگهي ٿو، هن چيو ته علامه اقبال اوڀر ۽ اولهه جي تهذيبن ۾ ڀيٽ ڪئي، تعليم جي وزير کي چوندس ته اسان جي تعليمي ادارن ۾ اقباليات جو مضمون لازمي پڙهايو وڃي ڇو ته اسان جو سياسي رول ماڊل قائد اعظم ۽ نظرياتي رول ماڊل علامه اقبال آهي، علامه اقبال کي سمجهڻ سان اهو پتو پوي ٿو ته مسلمانن جي تاريخ ۽ طاقت هئي، اهي دنيا تي ڪيئن ڇائنجي ويا، هن چيو ته اڄ هر هنڌ مسلمانن تي ظلم ٿي رهيو آهي، والاريل ڪشمير ۾ 80 لک ماڻهو کليل جيل ۾ بند آهن، ڪوشش آهي ته تعليم جي نظام ۾ هڪجهڙائي آڻي تحقيق جو رستو تيار ڪريون، هڪجهڙي تعليم لاءِ ڪميٽي جوڙي وئي آهي ته جئين نوجوان نسل اعليٰ ڪارڪردگي ڏيکاري سگهي، هن چيو ته ترڪي، پاڪستان ۽ ملائيشيا الجزيره ۽ بي بي سي وانگر ٽي وي چينل شروع ڪرڻ جو فيصلو ڪيو آهي، هن چينل جو مقصد مسلمانن جي نمائندگي ۽ دنيا اڳيان مسلمانن جو موقف پيش ڪرڻ آهي، هن چيو ته اسان اهڙيون فلمون ٺاهڻ چاهيون ٿا جن ذريعي اسان جي ٻارن کي پنهنجي هيروز جي خبر پوي، ترڪي سلطنت عثمانيا جي تاريخ جي آگاهي لاءِ اهڙي قسم جي هڪ فلم ٺاهي آهي، ان کان اڳ وزيراعظم مختلف امتحانن ۾ خاص ڪارڪردگي ڏيکاريندڙ ديني مدرسن جي شاگردن ۾ انعام ورهايا.

 

وفاقي حڪومت زلزلي متاثرن کي ٿيل نقصان جي برابر معاوضو ادا ڪري:بلاول ڀٽو جو مطالبو

ميرپور (ويب ڊيسڪ) پ پ چيئرمين بلاول ڀٽو زرداري سوال اٿاريندي چيو آهي ته وزيراعظم عمران خان ڪشميرين لاءِ ڪهڙو غير معمولي ڪم ڪيو آهي. بلاول ڀٽو زرداري ميرپور، آزاد ڪشمير ۾ زلزلي سبب متاثر علائقي جي دوري کانپوءِ صحافين سان ڳالهائيندي چيو ته وفاق جي ذميواري آهي ته عوام جو خيال رکي ۽ اسان سڀ ان لاءِ آواز اٿارينداسين، اسان متاثر سان يڪجهتي جي اظهار لاءِ هتي آيا آهيون، سنڌ حڪومت رليز لاءِ ڪئمپس ۽ ٻيون ضروري شيون موڪليون آهن ۽ متاثر ماڻهن جي ٿراپي لاءِ سنڌ جون اسپتالون ڪم ڪرڻ لاءِ تيار آهن. هن مطالبو ڪندي چيو ته وفاقي حڪومت زلزلي متاثرن کي ٿيل نقصان جي برابر معاوضو ادا ڪري. سندس وڌيڪ چوڻ هو 50 کان وڌيڪ ڏينهن کان والاريل ڪشمير ۾ قيد اسان جي ڀائرن ۽ ڀينرن تي ڀارتي ظلم جي مذمت ڪيون ٿا، ڪشميرين کي بنيادي حق ڏيارڻ لاءِ جدوجهد ڪنداسين، والاريل ڪشمير جي عوام تي تاريخي حملو ٿيو آهي، ان تي پاڪستان جيڪو به ڪري اهو گهٽ آهي، اسان کي انهن سان يڪجهتي جي اظهار لاءِ هر ممڪن ڪم ڪرڻ گهرجي. بلاول ڀٽو زرداري چيو ته وزيراعظم جي تقرير سٺي ٿي سگهي ٿي پر ان کي والاريل ڪشمير جي مسئلي تي وڌيڪ زور ڏيڻ گهرجي ها، عمران خان گڏيل قومن ۾ بيٺو هو ۽ کيس انهن جي ٺهرائن موجب والاريل ڪشمير جي عوام جي جمهوري حقن لاءِ ڳالهائڻ گهرجي ها. هڪ سوال جي جواب ۾ هن چيو ته قومي اسيمبلي ۾ اپوزيشن ۽ پيپلز پارٽي گڏيل اجلاس جو مطالبو ڪيو هو ته جيئن اسان ان مسئلي کي اٿاري سگهون پر بدقسمتي سان جهڙي ريت حڪومت اجلاس گهرايو، ان ۾ پرڏيهي وزير ئي موجود نه هو ۽ ويراعظم پارليامينٽ جي فلور تي سوال ڪري رهيو هو ته مان ڇا ڪيان، گڏيل قومن ۾ تقرير ته هر سال ٿيندي آهي پر عمران خان ڪهڙو غير معمولي ڪم ڪيو آهي؟ پ پ چيئرمين چيو ته والاريل ڪشمير جو عوام پاڪستان ڏانهن ڏسي رهيو آهي ۽ عمران خان اپوزيشن کي فتح ڪرڻ ۾ رڌل آهي. مولانا فضل الرحمان جي ڌرڻي ۾ شرڪت کان انڪار جي فيصلي بابت پڇيل سوال جو جواب ڏيندي بلاول ڀٽو زرداري چيو ته پ پ ڌرڻي جي سياست جي مخالف آهي، جڏهن ته مولانا صاحب جي ڌرڻي جي اخلاقي ۽ سياسي حمايت جو اعلان ڪيو آهي، جلد مولانا صاحب سان ملاقات ڪندس.

 

نيپرا بجلي جي قيمت ۾ في يونٽ هڪ روپيو 66 پئسن جي واڌ ڪري ڇڏي

اسلام آباد(م.ڊ)  نيشنل اليڪٽرڪ پاور ريگيوليٽري اٿارٽي نيپرا بجلي جي قيمتن ۾ هڪ روپيو 66 پئسا في يونٽ اضافي  جي منظوري ڏئي ڇڏي آهي. نيپرا پاران جاري ڪيل  بيان موجب اضافو هڪ مهيني جي لاءِ آگسٽ جي فيول ايڊجسٽمينٽ جي مد ۾ ڪيو ويو آهي جنهن سان صارفين تي 22 ارب 60 ڪروڙ جو اضافو  پوندو. نيپرا جي آفيسر موجب گيس ۽ آر ايل اين جي نيپرا جي ريفرنس قيمت کان وڌيڪ آهن. هن چيو ته جيڪڏهن ڪوئلي مان بهتر صلاحيت وارا پلانٽس هلايا وڃن ته 3.4 ارب جي بچت ڪري سگهجي ٿي. سي پي پي اي موجب آگسٽ ۾ پاڻي مان 40.33 سيڪڙو ۽ ڪوئلي مان 13.34 سيڪڙو بجلي پيدا ڪئي وئي. اهڙي طرح مقامي گيس مان 11.87 سيڪڙو ۽  درآمدي ايل اين جي مان 22.89  سيڪڙو بجلي پيدا ڪئي وئي. سي پي پي اي ٻڌايو ته فرنس آئل مان 3.60 سيڪڙو ۽ ايٽمي ذريعن مان 4.66 سيڪڙو بجلي پيدا ڪئي وئي آهي

 

والاريل ڪشمير ۾ ڪرفيو هٽڻ سان خونريزي ٿيندي، جنگ لڳي ته ڪجهه به ٿي سگهي ٿو: عمران خان

نيويارڪ(نيوز ڊيسڪ) وزيراعظم عمران خان گڏيل قومن کي والاريل ڪشمير مان ڪرفيو هٽائڻ لاءِ قدم کڻڻ جي اپيل ڪندي چيو آهي ته ڪشميرين سان جهڙو ظلم ڪيو پيو وڃي، اهڙو ظلم مونسان ٿئي ته مان به هٿيار کڻڻ تي مجبور ٿيندس. ڀارت کي ڪرفيو هٽائڻو پوندو، جنگ جي صورت ۾ ڪو به آپشن نه بچندو پر ان جو اثر دنيا تي به پوندو. وزيراعظم عمران خان گڏيل قومن جي جنرل اسيمبلي کي خطاب ڪندي والاريل ڪشمير ۾ ظلمن ۽ ڀارت جو ڪڌو چهرو وائکو ڪيو. وزيراعظم چيو ته پاڪستان سمورن انتهاپسندن گروپس کي ختم ڪري ڇڏيو آهي، گڏيل قومن کي درخواست ڪيان ٿو ته پنهنجو مشن پاڪستان اماڻي چيڪ ڪري. عمران خان چيو ته ڀارت سلامي ڪائونسل جي 11 ٺهرائن کي پٺي ڏيندي والاريل ڪشمير جي خاص حيثيت ختم ڪئي ۽ واڌو فوج اماڻي. ڀارت ڪرفيو لڳائي 80 لک ڪشميرين کي واڙي رکيو آهي، دنيا کي ڀارت جو اصلي ۽ ڪڌو چهرو ڏيکارينداسين ۽ والاريل ڪشمير ۾ جاري ڀارتي ظلم وائکا ڪنداسين. عمران خان چيو ته نريندر مودي چونڊ مهم ۾ ” اهو ته ٽريلر آهي، پڪچر اڃا رهيل آهي، پاڪستان کي سبق سيکاريندس“ جهڙا لفظ استعمال ڪيا. هن چيو ته نريندر مودي جو آر ايس ايس جو ميمبر آهي، اها تنظيم هلٽر مان متاثر ٿي ٺاهي وئي ۽ آر ايس ايس مسلمانن ۽ عيسائين سان نسل پرستي تي يقين رکي ٿي ۽ ڀارت مان مسلمانن جو خاتمو چاهي ٿي. گجرات جو وڏو وزير هئڻ دوران نريندر مودي آر ايس ايس جي ماڻهن کي مسلمانن جي قتلام لاءِ موڪليو. عمران خان چيو ته والاريل ڪشمير ۾ 80لک ماڻهن کي جانورن جيان واڙيو ويو آهي، اهو ناهي سوچيو ويو ته ڪشمير مان ڪرفيو هٽائڻ بعد ڇا ٿيندو، رتوڇاڻ ٿيندي، عوام رستن تي ايندو ته فوج انهن تي گوليون هلائيندي. هن چيو ته والاريل ڪشمير ۾ 11 هزار عورتن کي جنسي زيادتي جو نشانو بڻايو ويو، اهڙي صورتحال مان جيڪڏهن مان گذرندس ته مان به هٿيار کڻي سگهان ٿو. عمران خان چيو ته دنيا ڪشمير جي حالتن بابت ڄاڻ هئڻ باوجود ڪجهه ناهي ڪيو، ڇاڪاڻ ته ڀارت هڪ ارب کان وڌيڪ جي مارڪيٽ آهي. عمران خان چيو ته عالمي برادري مداخلت نه ڪئي ته 2 ايٽمي ملڪ آمهون سامهون ٿيندا، اهڙي صورتحال ۾ گڏيل قومن تي ذميواري لاڳو ٿئي ٿي. هن چيو ته جيڪڏهن پاڪستان ۽ ڀارت وچ ۾ جنگ ٿئي ٿي ته ڪجهه به ٿي سگهي ٿو، هي گڏيل قومن جي آزمائش جو وقت آهي، ڪشميرين کي خودمختياري جو حق ڏياريو وڃي. وزيراعظم عمران خان چيو ته ڀارت کي ڪشمير مان ڪرفيو هٽائڻو پوندو، ڪشميرين کي خودمختياري جو حق ڏيڻو پوندو. قيد سمورن ڪشميرين کي آزاد ڪرڻو پوندو.

 

سچ کي دٻائي نٿو سگهجي، تمام جلد سمورن سليڪٽيڊ ماڻهن کي گهر وڃڻو پوندو: بلاول ڀٽو

اسلام آباد(م.ڊ) بلاول ڀٽو قاسم سوري جي ڊي سيٽ ٿيڻ تي تبصرو ڪندي چيو ته قومي اسيمبلي ۾ لفظ سليڪٽيڊ تي پابندي هڻندڙ ڊپٽي اسپيڪر اڄ ڊي سيٽ ٿي ويو. تفصيل موجب سوشل ميڊيا تي پنهنجي پيغام ۾ بلاول ڀٽو زرداري جو چوڻ هو ته سچ کي دٻاءُ نه ٿو سگهجي، جلد سمورن سليڪٽيڊ ماڻهن کي وڃڻو پوندو. هن ڊپٽي اسپيڪر قاسم سوري جي ڊي سيٽ ٿيڻ تي تبصرو ڪندي چيو ته قاسم سوري جي تڪ جي 65 هزار ووٽن جي تصديق نه ٿي سگهي، قومي اسيمبلي ۾ سليڪٽيڊ جي لفظ تي پابندي لڳائيندڙ ڊپٽي اسپيڪر اڄ پنهنجي سيٽ کان محروم ٿي ويو آهي.  ٻئِ طرف پيپلز پارٽي چيئرمين بلاول ڀٽو زرداري عالمي سوشل ڊيموڪريٽڪ تنظيم سوشلسٽ انٽرنيشنل کي ڪشمير مسئلي تي خط لکيو آهي. پيپلز پارٽي چيئرمين بلاول ڀٽو زرداري خط ۾ چيو آهي ته ڏکڻ ايشيا جي هڪ سياسي پارٽي جو سربراهه هجڻ جي حيثيت ۾ ڪشمير مسئلي تي ڪامريڊز جي توجهه چاهيون ٿا، سوشلسٽ انٽرنيشنل سان لاڳاپيل سياسي پارٽين ڪشمير ۾ انساني حقن جي پامالي تي آواز اٿاريو. بلاول ڀٽو چيو ته ڪشميرين جي جدوجهد اصل ۾ جاگيدار ڊوگرن خلاف مزاحمت سان شروع ٿي، نو لک اڀرتي فوجين ڪشمير ۾ ڪرفيو لاڳو ڪري رکيو آهي، پنجاهه ڏينهن کان وڌيڪ ٿي چڪا آهن، ڪشميري ڪرفيو جي ڪري بنيادي انساني حقن کان محروم آهن.

 

ڪشمير مسئلو حل نه ٿيو ته گڏيل قومن جي ناڪامي هوندي: وزير اعظم

نيو يارڪ  (اين اين آءِ) وزيراعظم عمران خان چيو آهي ته آمريڪا کي ڪشمير مسئلي تي پنهنجو وزن گڏيل قومن جي پڙ ۾ وجهڻ گهرجي، جيڪڏهن مسئلو حل نه ڪيو ويو ته گڏيل قومن جي مڪمل ناڪامي ٿيندي، ڇا والاريل ڪشمير ۾ ڀارت جي 9 لک فوج دهشتگردي روڪڻ لاءِ آهي، خطي ۾ جنگ لڳي ته رڳو تيل جي قيمت ۾ واڌ ئي نه پر غربت وڌي ويندي، والاريل ڪشميرجي صورتحال ۾ هي ايڪشن وٺڻ جو وقت آهي، اسان کي ڪشميرين کي پنهنجو مستقبل جي فيصلي جو اختيار ڏيڻ گهرجي، ڀارت ۾ رهندڙ ڪروڙين مسلمانن به سخت ڏکيائين کي منهن ڏئي رهيا آهن، عالمي برادري کي ڪشيمر ۾ انساني حقن جي لتاڙ تي ڌيان ڏيڻ گهرجي، ڪرپشن سان ملڪي معاشي حالت تباهه ۽ رپئي جي ملهه ۾ گهٽتائي ٿي، دنيا ۾ مني لانڊرنگ روڪڻ لاءِ سخت قانوني جي ضرورت آهي،خطي ۾ امن سان دنيا جون وڏيون ڪمپنيون سرمايو لڳائڻ لاءِ تيار ٿي وينديون، افغانستان جو مسئلو حل ڪرائڻ ۾ خاص ڪردار ادا ڪري رهيا آهيون، ايران جي مسئلي تي اسان ٽياڪڙي ڪري سگهون ٿا پاڪستان ۾ ڪنهن به هٿياربند تنظيم کي ڪم ڪرڻ جي اجازت نه آهي، پاڪستان جو امن افغانستان جي پرامن حالتن سان مشروط آهي، خطي جي ترقي لاءِ مڪمل امن ضروري آهي، جمعي تي ايشيا سوسائٽي جي تقريب کي خطاب ڪندي وزيراعظم چيو ته منهنجو ملڪ لاءِ اهو ئي ويزن آهي جيڪو پاڪستان ٺاهيندڙن جو هو، مديني جي رياست سڀ کان جديد هئي، نبي ڪريم سڀ کان پهريان فلاحي رياست جو بنياد رکيو، مديني جي رياست ۾ سمورن مذهبن جي ماڻهن کي برابر جا حق حاصل هئا، هن چيو ته غلامن سان خاندان جي ماڻهن طور ورتاءُ ڪيو ويندو هو، قانون جي بالاستي ۾ حڪمران جوابده هوندو آهي، هن چيو ته پاڪستان اسلام جي نالي تي وجود ۾ آيو، وزيراعظم چيو ته قانون جي حڪمراني مهذب ۽ غير مهذب معاشري ۾ فرق ڪري ٿي، هڪ سوال جي جواب ۾ هن چيو ته جيڪڏهن توهان کي واپاري خسارو آهي ته ڏکيائين کي منهن ڏيڻو پوي ٿو، اسان ايف بي آر کي ٺيڪ ڪرڻ لاءِ قدم کڻي رهيا آهيون ڇو ته ملڪ ۾ تمام گهٽ ماڻهو ٽيڪس ڏين ٿا، ٽيڪس نيٽ ۾ واڌ ڪرڻ وڏو چئلينج آهي، ملڪ مان غربت ختم ڪرڻ هدف آهي، وزيراعظم چيو ته ڀارت 80 لک ڪشميرين کي بند ڪري ڇڏيو آهي، 53 ڏينهن کان ڪرفيو لاڳو آهي، ڪشمير ۾ ڪرفيو ختم ٿيڻ کانپوءِ رتو ڇاڻ جو خدشو آهي، فيبروري ۾ شروع ٿيندڙ پاڪ ڀارت ڇڪتاڻ آهستي آهستي وڌي وئي، هن چيو ته ڪرفيو کڄڻ کانپوءِ خراب صورتحال کي منهن ڏيڻو پئجي سگهي ٿو، ڀارت ۾ رهندڙ ڪروڙين مسلمان سخت ڏکيائين کي منهن ڏئي رهيا آهن،وزيراعظم چيو ته آمريڪا جي دوري دوران عالمي اڳواڻن والاريل وادي جي صورتحال کان آگاهه ڪيو،عالمي برادري کي ڪشمير جي صورتحال تي وڌ ۾ وڌ ڌياڻ ڏيڻ جي ضرورت آهي، هن چيو ته عالمي برادري کي موسمياتي تبديلي جي چئلينج سان ڪشمير ۾ انساني المئي تي به ڌيان ڏيڻو پوندو، وزيراعظم چيو ته نائين اليون کانپوءِ پاڪستان تي دهشتگردي جي جنگ مڙهي وئي، وزيراعظم چيو ته دهشتگردي سبب پاڪستان ۾ سياحت جو شعبو سخت متاثر ٿيو، سياحت لاءِ پاڪستاني ويزا حاصل ڪرڻ ڏکيو ٿي ويو هو، پاڪستان جا اتريان ۽ جابلو علائقا سونهن ۾ بي مثال آهن، سياحت جا ڪيترائي نوان هنڌ ڳولي لڌا، عمران خان چيو ته سياحت جي شعبي جي بهتري سان گڏ هڪ لک پرڏيهي سياح پاڪستان آيا، پاڪستان ۾ سياحت کي هٿي وٺرائڻ لاءِ اي ويزا شروع ڪئي، پاڪستان ۾ مذهبي ماڳ موجود آهن، هڪ سوال جي جواب ۾ هن چيو ته اسان کي علائقائي طور تي مختلف چئلينجز آهن، افغانستان جو مسئلو حل ڪرائڻ ۾ اهم ڪردار ادا ڪري رهيا آهيون، ايران جي مسئلي تي اسان ٽياڪڙي ڪري سگهون ٿا، غربت ۽ بيروزگاري خطي جي وڏن ملڪن جو اهم مسئلو آهي، وزيراعظم چيو ته مان چونڊجڻ کانپوءِ پاڙيسري ملڪ کي ڳالهين جي دعوت ڏني، ملڪ ۾ ڪنهن به هٿياربند نتظيم کي ڪم ڪرڻ جي اجازت نه آهي، ملڪ مان دهشتگردي ختم ڪرڻ لاءِ اثرائتا قدم کنيا، ڀارت ۾ جي بي پي جي ٻيهر چونڊجڻ تي ڳالهين جي ڪوشش ڪئي، هن چيو ته سنجينده لاڳاپا اسان جو ايجنڊا آهي، ڀارت سٺي موٽ نه ڏني، فيبروري ۾ شروع ٿيندڙ پاڪ ڀارت ڇڪتاڻ آهستي آهستي وڌي وئي، هن چيو ته ملڪ ۾ سيڙپڪارن لاءِ ماحول سازگار بڻائي رهيا آهن، ڪشمير ۾ به حالتن کي سازگار بڻائڻ جي ضرورت آهي. عمران خان چيو ته مودي گاندي ۽ نهرو جي فلسفي جا بکيا اڊيڙي ڇڏيا آهن تنهنڪري دنيا تسليم ڪري رهي آهي ته قائد اعظم جو ٻه قومي نظريو درست هو، ڇو ته ڀارت سان الهاق ڪندڙ رياستون هاڻ پڇتائي رهيون آهن، هن چيو ته ڀارت جي مذهبي جنونيت مهذب معاشرن لاءِ خطرو آهي، نائين اليون کانپوءِ مسلمان جي آزادي جي تحريڪن کي دهشتگردي جو نالو ڏنو ويو، ڪشمير ۾ 9 لک فوجي رڳو مسلمان آبادي کي دٻائڻ لاءِ موجود آهن، ڪشمير جا مسلمان ڀارتي رياستي دهشتگردي جو مقابلو ڪري رهيا آهن، هن چيو ته بدقمستي سان گڏيل قومن ثبوتن جي باوجود ڪشمير تي هاڪاري ڪردار ادا ناهي ڪيو، ڪشمير جي مستقبل جو فيصلو اتان جي عوام کي ڪرڻو آهي، هن چيو ته اسان کي ڪشميرين کي پنهنجي مستقبل جي فيصلي جو اختيار ڏيڻ گهرجي. وزيراعظم چيو ته 80 جي ڏهاڪي ۾ برطانيا ۾ مجاهدن لاءِ فنڊ گڏ ڪيا ويندا هئا، آمريڪا ۽ اولهه ملڪن مجاهدن کي سپورٽ ڪيو، هن چيو ته افغانستان مان روس جي وڃڻ کانپوءِ ساڳيا مجاهد دهشتگرد بڻجي ويا، افغانستان ۾ طالبان کي جهاد لاءِ آمريڪا تيار ڪيو، طالبان روس جي خلاف وڙهن ته جهاد ۽ آمريڪا جي خلاف وڙهن ته دهشتگردي، هن چيو ته چين هر ڏکئي وقت ۾ پاڪستان جي مدد ڪئي ۽ چين پاڪستان جي خودمختياري ۾ ڪنهن قسم جي مداخلت نٿو ڪري، هن چيو ته قائد اعظم عظيم شخص هو ڪڏهن به اصولن تي سوديبازي نه ڪئي، جڏهن ته پيشور سياستدانن جو ڪو به نظريو ناهي هوندو ان ڪري اهي هر ڳالهه تي سوديبازي ڪري وٺندا آهن.

 

ڪاروبار ۾ آساني لاءِ سڌارا ڪندڙ 20 ملڪن ۾ پاڪستان پهرين نمبر تي اچي ويو ، عالمي بئنڪ جي رپورٽ

اسلام آباد (اين اين آءِ) ڪاروبار ۾ آساني لاءِ سڌارا ڪندڙ 20 ملڪن ۾ پاڪستان لسٽ ۾ پهرين نمبر تي اچي ويو اهڙي حوالي سان عالمي بئنڪ رپورٽ جاري ڪري ڇڏي جمعي تي رپورٽ موجب پاڪستان ڪاروبار شروع ڪرڻ لاءِ 6 اهم شعبن ۾ رنڊڪون ختم ڪيون پاڪستان ۾ اڏاوتي ڪمن، بجلي ڪنيڪشن حاصل ڪرڻ ۽ پراپرٽي کي رجسٽرڊ ڪرڻ ۾ آساني پيدا ڪئي ٽيڪس ادا ڪرڻ ۽ پاڙيسري ملڪن سان واپار وڌائڻ لاءِ به آساني پيدا ڪئي ويئي حڪومت ملڪ ۾ معاشي شعبي ۾ سڌارا ڪري رهي آهي سڌارن تي عملدرامد لاءِ وزيراعظم جي صدارت هيٺ سڌار اسٽيرنگ ڪميٽي قائم ڪئي ويئي رپورٽ موجب پاڪستان ڪاروبار ۾ اساني لاءِ آن لائين قدم وڌايا آهن ڪراچي بلڊنگ ڪنترول اٿارٽي ۽ لاهور ڊيولپمينٽ اٿارٽي کان اڏاوت جي اجازت ۽ پراپرٽي جي رجسٽريشن کي آسان بڻايو ويو رپورٽ موجب بجلي جا نوان ڪمرشل ڪنيڪشن حاصل ڪرڻ لاءِ آن لائين درخواست سان ڪافي آساني ٿي رپورٽ موجب آن لائين ٽيڪس ڏيڻ جو طريقو متعارف ڪرائڻ سان به ٽيڪس ادائيگي ۾ سهولت حاصل ٿي ۽ ٽِڪس اڳاڙيون وڌيون. رپورٽ موجب پاڪستان بين الاقوامي سرحدن تي مال جي تيز رفتار ڪليرنس لاءِ ڪيترائي قدم کنيا بارڊر تي تجارتي سامان جي جلد ڪليرنس لاءِ مختلف سرڪاري ايجنسين ۾ رابطن کي بهتر بڻايو ويو رپورٽ موجب ڪاروبار ۾ اساني جي عالمي درجه بندي ۾ پاڪستان ڪيترو مٿي ويو ان جو تعين عالمي بئنڪ جي آڪٽوبر ۾ جاري ٿيندڙ رپورٽ ۾ ڪيو ويندو عالمي بئنڪ جي ڪنٽري هيڊ ٽوئٽ ڪيو ته پاڪستان ڇهن شعبن ۾ سڌارا ڪيا ڪاروبار ۾ آساني جي عالمي درجه بندي جي رپورٽ 24 آڪٽوبر تي جاري ٿيندي هن چيو ته وفاقي حڪومت سنڌ ۽ پنجاب جي حڪومتن جي قدمن جي تعريف ڪيون ٿا.