تازيون خبرون

Category Archives: پاڪستان

مون کي يقين آهي ته ڌرڻو نه هنيو ويندو، سولائي سان ڌرڻي جي اجازت نه ملندي: شيخ رشيد

اسلام آباد (اين اين آءِ) ريلوي جي وفاقي وزير شيخ رشيد چيو آهي ته مون کي يقين آهي ته ڌرڻو نه هنيو ويندو، سولائي سان ڌرڻي جي اجازت نه ملندي، مولانا فضل رحمان سياسي ماڻهو آهي، هو ڄاڻي ٿو ته ڌرڻي جو نتيجو ڇا نڪرندو، صحافين سان ڳالهائيندي هن چيو ته شهباز شريف سدائين ادارن سان صلح جي پاليسي اختيار ڪئي آهي، هن چيو ته وزيراعظم 3 وڳي ميٽنگ سڏائي آهي، حڪمت عملي تيار ڪئي ويندي، هن چيو ته ڌرڻي بابت سموري صورتحال 26 آڪٽومبر تائين واضح ٿي ويندي، مولانا صاحب سان ڳالهيون ڪرڻ وارا ڪري رهيا آهن اڃا نتيجو ناهي نڪتو، شيخ رشيد چيو ته ڌرڻي تي اڻوندڙ واقعو ٿيو ته قانون حرڪت ۾ ايندو، وزيراعظم عمران خان ڪي به ڳالهيون نه پيو ڪري پر ڳالهيون ڪرڻ وارا ماڻهو مولانا سان رابطي ۾ آهن، ضروري نه آهي ته ڌرڻو هنيو وڃي رڳو جلسو به ٿي سگهي ٿو، پ پ ڌرڻي ۾ شامل نه ٿيندي، ن ليگ ٻن حصن ۾ ورهائجي وئي آهي، شهباز شريف ۾ ايتري همت ناهي جو هو کلي سامهون اچي سگهي، نواز شريف ڌرڻي جو حامي ۽ شهباز شريف نه آهي، وفاقي وزير چيو ته شهباز شريف چاهي ٿو ته معاملا صلح سان حل ڪيا وڃن، جڏهن ته سعد رفيق، خواجه آصف، اياز صادق سٺي سوچ رکڻ وارا آهن، ن ليگ ۾ ڪنهن وٽ اڃا فائنل ايجنڊا نه آهي، ن ليگ ڌرڻي ۾ وئي ته ان جي قيمت اپوزيشن کي ادا ڪرڻي پوندي.

 

نيب انور مجيد سوڌو ٻين جوابدارن خلاف ريفرنس داخل ڪرڻ ۽ ايس بي سي اي ۽ ڪي ايم سي خلاف جاچ جي منظوري ڏئي ڇڏي

اسلام آباد (بيورو رپورٽ) نيب جي اگزيڪيوٽو بورڊ انور مجيد سوڌو ٻين جوابدارن خلاف ريفرنس داخل ڪرڻ جي منظوري ڏئي ڇڏي، جڏهن ته ايس بي سي اي ۽ ڪي ايم سي خلاف جاچ جي به منظوري ڏني وئي آهي. نيب چيئرمين رٽائرڊ جسٽس جاويد اقبال جي سربراهيءَ ۾ ايگزيڪيوٽو بورڊ جو ٿيو، جنهن دوران ڪرپشن جا وڌيڪ 3 ريفرنسز داخل ڪرڻ جي منظوري ڏني وئي. نيب ترجمان طرفان جاري ڪيل پڌرائي موجب بورڊ انور مجيد ۽ ٻين جوابدارن خلاف ڪرپشن جو ريفرنس داخل ڪرڻ جي منظوري ڏني، مٿن مني لانڊرنگ ۽ ڪرپشن ذريعي قومي ناڻي کي 34 ڪروڙ رُپين جو نقصان پهچائڻ جو الزام آهي. نيب جي ايگزيڪيوٽو بورڊ سنڌ بلڊنگ ڪنٽرول اٿارٽي ۽ ڪراچي ميونسپل ڪارپوريشن جي آفيسرز توڙي ملازمن خلاف جاچ (انويسٽيگيشن) شروع ڪرڻ جي منظوري ڏئي ڇڏي. پڌرائي موجب ايگزيڪيوٽو بورڊ جي اجلاس دوران عالمي توڙي مقامي اين جي اوز ايس ڊي پي آءِ، فافن ۽ ايف اي او رورل پروگرام انتظاميا خلاف شاهديون نه ملڻ جي بنياد تي جاچ بند ڪرڻ جي به منظوري ڏني وئي.

 

حمزه شهباز کي ميڊيا سان ڳالهائڻ کان روڪڻ ۽ صحافين تي تشدد جي مذمت، ملڪ تي عمران سوچ مڙهيل آهي:مريم اورنگزيب

اسلام آباد (اين اين آءِ) پاڪستان مسلم ليگ (ن) ترجمان مريم اونگزيب حمزه شهباز سان ميڊيا کي ڳالهائڻ کان روڪڻ ۽ صحافين تي تشدد جي مذمت ڪندي چيو ته ملڪ تي عمران صاحب جي سوچ مڙهيل آهي عمران صاحب آواز بند ڪرڻ سان سچائي لڪي نٿي سگهي نه ئي ڪوڙ سچ ٿي سگهي ٿو اربع تي هڪ بيان ۾ هن چيو ته نااهل حڪومت سمورن سياسي مخالفن کي يرغمال بڻائي ڇڏيو آهي ۽ ان جا آواز به بند ڪري رهي آهي هن چيو ته سياسي مخالفن جي خلاف ڪرپشن نه پئي ملي حڪومت هاڻي آواز بند ڪري رهي آهي هن چيو ته راءِ جي اظهار جي آزادي تي تاريخ جون بدترين پابنديون مڙهيل آهن نالائق حڪومت رڳو عمران نامو چاهي ٿي هن چيو ته ميڊيا تي تسدد ۽ صحافين سان بداخلاقي حڪومت جو خوف ۾ مبتلا ٿيڻ جو ثبوت آهي هن چيو ته سرڪاري آفيسرن ادارن ۽ ميڊيا تي تشدد ۽ حملا ڪرڻ عمران صاحب جي جماعت جي پراڻي عادل آهي هن چيو ته عمران صاحب پنهنجي تڪبر ۽ ڪوڙ جي سزا ميڊيا کي ڏيڻ سان حقيقت تبديل نه ٿيندي هن چيو ته سياسي قيدين جو هر ڪيس حڪومت جي ڪوڙ ۽ انتقام جو آئينو بڻجي چڪو اهي هن چيو ته ميڊيا تي تشدد ڪندڙ اهلڪارن جي خلاف ڪيس داخل ڪيو وڃي ۽ قانوني ڪارروائي ڪئي وڃي.

 

پاڪستاني قوم  ڪشمير جي ماڻهن سان گڏ بيٺي آهي ۽ بيٺي رهندي: عمران خان

اسلام آباد(ويب ڊيسڪ) وزير اعظم عمران خان افسوس جو اظهار ڪندي چيو آهي ته ملڪن جي لاءِ انسانن کان وڌيڪ پيسو اهم آهي تڏهن ئي ته والاريل ڪشمير ۾ ٿيندڙ ظلم کي عالمي ميڊيا ۾ ڪوريج نه پئي ڏني وڃي. اسلام آباد ۾ ڪشمير سان ٻڌي جي اظهار لاءِ انساني هٿن جي زنجير بڻائڻ جي موقعي تي موجود شرڪت ڪندڙن سان خطاب ڪندي سندس چوڻ هو ته اڄ هتي اسان ان ڪري گڏ ٿيا آهيون ته ڪشميرين کي پيغام  ڏيو ته پاڪستاني قوم  ڪشمير جي ماڻهن سان گڏ بيٺي آهي ۽ بيٺي رهندي. هن چيو ته اسان هر هر دنيا کي اِهو پيغام ڏينداسين ته 80 لک انسانن کي ڀارت جي فوج ڪرفيو ۾ بند ڪيو آهي، جنهن کي 2 مهينن کان وڌيڪ وقت گذري چڪو آهي، عالمي ميڊيا هانگ ڪانگ جي احتجاج کي فرنٽ پيج، شهه سرخي ۽ خبرن ۾ بيان ڪري رهيو آهي ته اُتي هڪ جمهوري تحريڪ هلي رهي آهي جڏهن ته اُتي ٿورا ئي ماڻهو زخمي ٿيا ۽ کان 3 مارجي ويا آهن. پنهنجي ڳالهه کي جاري رکندي هن چيو ته والاريل ڪشمير ۾ 80 لک ماڻهن کي بند ئي بند ناهي ڪيو، ٻار، پوڙهام عورتون ۽ بيمار سڀ ماڻهو بند آهن ۽ عالمي ميڊيا ۾ ان جي ڪوريج نه ٿيڻ جي برابر آهي، گذريل 30 سالن ۾ گهٽ ۾ گهٽ هڪ لک ڪشميرين جي شهادت ٿي ڇو ته هو پنهنجو حق گهري رهيا آهن جيڪي عالمي برادري، گڏيل قومن جي سيڪيورٽي ڪونسل ڏنو هو ۽ اُهو حق خوداراديت آهي. وزير اعظم چيو ته ڪشميرين کي حق ڏنو ويو هو ته هو پنهنجي جو فيصلو پاڻ ڪندا هو حق نه ملڻ تي احتجاج ڪندا آهن، جنهن تي ڀارتي فوج ظلم ڪندي آهي پر ڀارتي ظلم جي اِهي داستان ڪڏهن ڪڏهن عالمي اخبارن ۾ ايندا آهن. عمران خان چيو ته اڄ دنيا جي سامهون ان ٻٽي معيار کي سامهون رکڻ چاهيان ٿو ته هڪ پاسي هڪ خطي ۾ ٿيل مظاهرن کي ايترو ڏيکاريو پيو وڃي جڏهن ته ٻئي پاسي ايترو ظلم ٿي رهيو آهي ۽ ان کي نه پيو ڏٺو وڃي، گڏوگڏ ئي هن چيو ته هانگ ڪانگ ته چين جو حصو آهي جڏهن ته والاريل ڪشمير ته ڀارت جو حصو به ناهي هو ته هڪ تڪراري علائقو آهي. ڳالهه کي اڳتي وڌائيندي هن چيو ته افسوس سان اِهو چوڻو پئجي رهيو آهي ته هتي دنيا اِهو ڏسي ٿي ته  هڪ ارب کان وڌيڪ ماڻهن جو ملڪ آهي، جنهن سان واپار ٿي سگهي ٿو ۽ ملڪن جي لاءِ پيسو انسانن کان وڌيڪ اهم آهي. هن چيو ته افسوس!  والاريل ڪشمير ۾ ايترو  ظلم ٿي رهيو آهي پر ميڊيا تي ان جي ايتري گهٽ ڪوريج آهي پر آئون پنهنجي قوم کي پيغام ڏيڻ چاهيان ٿو ته الله انسان جي هٿ ۾ ڪوشش ڏني آهي ڪاميابي الله ڏيندو آهي. ڪشميرين سان ٻڌي لاءِ موجود ماڻهن سان خطاب ۾ وزير اعظم  چيو ته اسان ڪوشش ڪري رهيا آهيون ۽ ڪندا رهنداسين، اسان جي پوري قوم ڪوشش ڪندي ۽ ڪشميرين کي ٻڌائينداسين ته اسان توهان سان گڏ آهيون، انشاء الله اسان جي اِها تحريڪ سمنڊ بڻجي ويندي. سندس چوڻ هو ته اِها  هڪ تحريڪ، جدوجهد آهي، نريندي مودي جيڪا حماقت ڪئي آهي ۽ پنهنجو آخري پتو کيڏي ورتو آهي، ڪشمير جا ماڻهو انتها تي پهچي ويا آهن ۽ انهن کي موت جو خوف ختم ٿي چڪو آهي، جيئن ئي ڪرفيو کڄندو ڪشميري روڊن تي نڪرندا ۽ منهنجو ايمان آهي ته اِهو رستو ڪشميرين جي آزادي جو آهي. ان کان اڳ وفاقي راڄڌاني اسلام آباد ۾ ڪشميرين سان ٻڌي جي اظهار لاءِ وڏي انگ ۾ عوام روڊن تي نڪتو ۽ ان سلسلي ۾ هڪ ريلي به ڪڍي وئي، جنهن ۾ ملڪ جو صدر ڊاڪٽر عارف علوي به شريڪ ٿيو. ان سان گڏوگڏ والاريل ڪشمير ۾ ڀارتي جبر جي ڪري محصور ٿيل مظلوم ڪشميرين سان ٻڌي جي لاءِ انساني هٿن جي زنجير بڻائي وئي، جنهن ۾  ملڪ جي صدر ڊاڪٽر عارف علوي ۽ وزير اعظم عمران خان پاڻ به شريڪ ٿيا.

 

چوڌري شگر ملز ڪيس: قيدي نواز شريف وري گرفتار، نيب حوالي

لاهور(ويب ڊيسڪ) احتساب عدالت العزيزيه اسٽيل ملز ڪيس ۾ سز ا ڀوڳيندڙ مسلم  ليگ ن جي سربراهه نواز شريف کي چوڌري شگر ملز ڪيس ۾ 14 ڏينهن جي جسماني ريمانڊ تي نيب جي حوالي ڪري ڇڏيو. قومي احتساب بيورو نيب چوڌري شگر ملز ڪيس ۾ اڳوڻي وزير اعظم نواز شريف کي ڪوٽ لکپت جيل مان گرفتار ڪري لاهور جي احتساب عدالت ۾ پيش ڪيو هو. احتساب عدالت جي منتظم جج چوڌري امير محمد خان ڪيس جي ٻڌڻي ڪئي ۽ ريمانڊ منظور ڪندي کيس ايندڙ ٻڌڻي تي 25 آڪٽوبر تي عدالت ۾ پيش ڪرڻ جو حڪم ڏنو. ان حوالي سان نيب پراسيڪيوٽر ٻڌايو ته نواز شريف جي گرفتاري  عدالت جي اجازت کان پوءِ عمل ۾ آندي وئي، ان سان گڏوگڏ ئي هن اڳوڻي وزير اعظم جي 15 ڏينهن جي جسماني ريمانڊ جي اپيل ڪئي هئي. چوڌري شگر ملز ۾ نواز شريف جي ڪردار جي حوالي سان دليل  ڏيندي نيب پراسيڪيوٽر جو چوڻ هو ته  2016ع ۾ نواز شريف چوڌري شگر ملز جو سڀ کان وڏو شيئر هولڊر رهيو آهي ۽ ان سان گڏوگڏ هن جا شميم شگر مل ۾ به شيئر هئا. هن جو چوڻ هو ته چوڌري شگر مل ۾ نواز شريف  سان گڏ مريم نواز، شهباز شريف ۽ شريف خاندان جا ٻيا ميمبر به شيئر هولڊر هئا. نيب جي وڪيل دعويٰ ڪئي ته چوڌري شگر ملز جي اڪائونٽ ۾ پرڏيهه مان رقم ايندي هئي ۽ 1992ع ۾ نواز شريف کي پرڏيهي ڪمپني هڪ ڪروڙ 55 لک رپيا ڏنا هئا پر اِها اڄ تائين خبر ناهي پئجي سگهي ته ان ڪمپني جو مالڪ ڪير هو. ٻڌڻي ۾ نواز شريف جي وڪيل امجد پرويز بٽ پنهنجا دليل ڏيندي چيو ته نواز شريف ڪڏهن به چوڌري شگر ملز جو شيئر هولڊر يا ڊائريڪٽر ناهي رهيو. سندس چوڻ هو ته نواز شريف جي اثاثن جي ڇنڊ ڇاڻ پهريون ڀيرو ناهي ٿي رهي ان کان اڳ به مخالف پارٽين پنهنجين حڪومتن ۾ ڪمپنين کي قائم ڪرڻ بابت ڇنڊ ڇاڻ ڪرائي پر ڪجهه به نه مليو هو. امجد پرويز بٽ جو چوڻ هو ته 1991ع ۾ نواز شريف ڪنهن به ڪمپني جو سپانسر يا مالڪ ناهي رهيو ۽ نه ئي سندس چوڌري شگر ملز جي قيام ۾ ڪو ڪردار هو پر شريف خاندان  جا اولاد ڊائريڪٽر ۽ حصيوار هئا. سندس وڌيڪ چوڻ هو ته سپريم ڪورٽ جي حڪم تي بڻايل گڏيل جاچ ٽيم انهن سمورن معاملن جي تفصيلي جاچ پهرين ئي ڪري چڪي آهي جنهن کان پوءِ نيب  ريفرنس داخل ڪيو هو ۽ هاڻ ٻيهر جاچ جو ڪو جواز ئي نٿو بڻجي. نواز شريف جي وڪيل ريمانڊ جي مخالفت ڪندي چيو ته نيب جي ڪيس ۾ بدديانتي نظر اچي رهي آهي جنهن ۾ جسماني ريمانڊ جي ضرورت ناهي جڏهن ته گرفتاري به غلط ڪئي وئي ڇو ته اِهو سياسي بنيادن تي بنيادن تي  بڻايل ڪيس آهي. هن چيو ته جي آءِ ٽي  ۽ نيب وٽ چوڌري شگر  ملز جو سمورو ريڪارڊ پهرين  کان ئي موجود آهي ۽ پاناما جي آءِ ٽي جاچ کان پوءِ ئي نواز شريف کي سزا ٿي هئي ان ڪري چوڌري شگر ملز ڪيس ۾ گرفتار جو جواز ناهي. ايڊووڪيٽ امجد پرويز ٻڌايو ته پاناما جي آءِ ٽي ۾ وفاقي جاچ اداري، سيڪيورٽي ايڪسچينج  ڪميشڻ، نيب ۽ ٻين ايجنسين جا ميمبر شامل هئا، جن کي نواز شريف جي سمورن اثاثن جي جاچ جو اختيار ڏنو ويو هو. سندس وڌيڪ چوڻ هو ته پاڪستان جي تاريخ جي سڀ کان وڏي جي آءِ ٽي ۾ انٽر سروسز انٽيليجنس ايجنسي  ۽ ملٽري انٽيلي جنس جا ميمبر به موجود هئا ۽ ان جي آءِ ٽي کي پاڪستان جا سمورا قانون استعمال ڪرڻ جو اختيار ڏنو ويو هو. امجد پرويز بٽ جو چوڻ هو ته هاڻ نيب جو چوڌري شگر ملز بابت پاڻمرادو انڪشاف ڪرڻ بنا جواز آهي جڏهن ته نيب لاڳاپيل ادارن کان پهرين ئي سمورو ريڪارڊ ڪيل آهي. ٻڌڻي دوران نواز شريف به روسٽرم تي اچي بيان ڏنو، سندس چوڻ هو ته  نيب وارا مون سان جيل ۾ ملاقات لاءِ آيا هئا پر هڪ ئي ڀيرو آيا ان کان پوءِ ڪڏهن به نه آيا. نواز شريف جو چوڻ هو ته نيب  جيڪو پڇيو مون ان جو  جواب ڏنو جيڪا مون کي خبر نه هئي اُهو نه ٻڌايو. هن چيو ته مون  سان منهنجي وڪيل جي ملاقات ناهي ڪرائي وئي آئون لکي ٿو ڏيان ته منهنجي ملاقات منهنجي وڪيل سان ڪرائي وڃي. مسلم  ليگ ن جي سربراهه جو چوڻ هو ته مون تي جيڪي الزام لڳايا ويا آهن اُهي سڀ ڪوڙا آهن نيب پهرين ئي ظاهر ڪيل اثاثن جي جاچ ڪري رهيو آهي. سندس وڌيڪ چوڻ هو ته نيب اهلڪارن گرفتاري لاءِ جيڪي به الزام هنيا آهن اُهي بي بنياد آهن، 32 انڊسٽرين جي حوالي سان اسان جو نالو هو، ٻڌايو ڪرپشن ڪٿي ٿي آهي . نواز شريف جو چوڻ هو ته آئون وزير به رهيو آهيان وڏو وزير به رهيو آهيان ۽ 3 ڀيرا وزير اعظم به رهيو آهيان، انهن پنجن دورن ۾ هڪ ٿيلهي  جي به ڪرپشن ثابت ڪيو ته ڪيس ته ڇا پر سياست تان ئي دستبردار ٿي ويندس. ان کان پوءِ هن پنهنجي واپار جي باري ۾ ڳالهائيندي چيو ته نيب جو ادارو پرويز مشرف منهنجي لاءِ قائم ڪيو هو. هن چيو ته پرويز مشرف جو هڪ ئي ٽارگيٽ هو اُهو هو نواز شريف، نيب جو ادارو رڳو مسلم ليگ ن ۽ مخالف ڌر جي خلاف استعمال ٿي رهيو آهي. سندس وڌيڪ چوڻ هو ته آئون ته پهرين ئي جيل ۾ آهيان جيڪڏهن ايتري دشمني آهي ته ٻڌايو ته هي مون کي ڪيڏانهن ٿا وٺي وڃڻ چاهن. هن چيو ته ڪنهن کي منشيات جي خاتمي واري ڪيس ۾ پڪڙيو پيو وڃي اِهو ڪهڙو طريقو آهي جيڪڏهن هي سمجهن ٿا ته مسلم ليگ ن ڊپ ۾ جهڪي ويندي ته ائين ڪڏهن به نه ٿيندو. نواز شريف جي بيان تي عدالت جي ڪمري ۾ نعريبازي ٿي وئي جنهن تي احتساب عدالت جي جج کيس رڳو موجود ڪيس تي ڳالهه ڪرڻ جي هدايت ڪئي.ٻِئي طرف نواز شريف مولانا فضل الرحمان جي آزادي مارچ جي مڪمل حمايت جو اعلان ڪندي چيو آهي ته اُن حوالي سان شهباز شريف کي لکت ۾ هدايتون ڏئي ڇڏيون آهن، فضل الرحمان جي اسيمبليز تان استعيفيٰ ڏيڻ واري مطالبي ۾ به وزن هو. لاهور جي احتساب عدالت ۾ پيشيءِ جي موقعي تي ميڊيا جي سوالن جا جواب ڏيندي نواز شريف چيو ته هو مولانا فضل الرحمان جي احتجاج جي مڪمل حمايت ڪن ٿا ۽ سندس موقف کي پنهنجو موقف سمجهي رهيا آهن. هُن چيو ته چونڊن کانپوءِ مولانا فضل الرحمان اسيمبليز مان استعيفيٰ ڏيڻ جي ڳالهه ڪئي هئي، اُن وقت کيس استعيفيٰ نه ڏيڻ تي قائل ڪيو پر هاڻي هو سمجهي ٿو ته مولانا فضل الرحمان جي استعيفيٰ واري مطالبي ۾ وزن هو. آزادي مارچ جي حوالي سان پُڇيل سوال جي جواب ۾ اڳوڻي وزيراعظم چيو ته مولانا فضل الرحمان جي ڳالهه کي هن وقت رد ڪرڻ غلط هوندو، هُو سندس ڀرپور حمايت ڪن ٿا ۽ اُن حوالي سان شهباز شريف کي لکت ۾ هدايتون ڏئي ڇڏيون آهن. حڪومت مخالف احتجاج جي حوالي سان مولانا فضل الرحمان جو جذبو ساراهه جوڳو آهي.

 

ڌرين وچ ۾ دهشتگردي جي ڪيس ۾ ٺاهه سان ڏوهاري آزاد نٿو ٿي سگهي: سپريم ڪورٽ

اسلام آباد (اين اين آءِ) دهشتگردي جي ڪيس ۾ ٺاهه جي بنياد تي ڏوهاري آزاد ٿي سگهي ٿو يا نه ان بابت سپريم ڪورٽ تاريخي فيصلو ٻڌائي ڇڏيو، سپريم ڪورٽ پاران جاري ڪيل چيف جسٽس پاڪستان جي لکيل فيصلي ۾ چيو ويو ته دهشتگردي جي ڪيس ۾ ٺاهه جي بنياد تي جوابدار آزاد نٿو ٿي سگهي، دهشتگردي جو ڏوهه ٺاهه جوڳو نه آهي، سپريم ڪورٽ چيو ته رڳو ڌرين وچ ۾ دهشتگردي جي ڪيس ۾ ٺاهه سان ڏوهاري آزاد نٿو ٿي سگهي، فيصلي ۾ چيو ويو ته ڪنهن مناسب ڪيس ۾ مخصوص حالتن ۾ ڌرين وچ ۾ ٺاهه تي جوابدار جي سزا گهٽائڻ تي غور ٿي سگهي ٿو، عدالت لکيو ته دهشتگردي جي ڪيس ۾ ڌرين وچ ۾ ٺاهه تي سزا پاڻمرادو گهٽ نه ٿيندي، جوابدار جي سزا گهٽائڻ تي غور ڪرڻ عدالت جي اختيار ۾ هوندو، اهڙي طرح فيصلي ۾ چيو ويو ته دهشتگردي جو ڏوهه ٻين ڏوهن کان مختلف آهي، دهشتگردي جي ڪيس ۾ ٺاهه کانپوءِ سزا گهٽائڻ تي ٽرائيل ڪورٽ فيصلو ٻڌائڻ دوران غور ڪندي، سپريم ڪورٽ موجب سمورن عدالتي فورمز مان جوابدار جي سزا برقرار رکڻ تي سزا گهٽائڻ لاءِ رحم جي اپيل تي پاڪستان جو صدر غور ڪندو، رحم جي اپيل رد ٿيڻ کانپوءِ ٺاهه ٿيڻ تي جيل سپرينٽنڊنٽ نئين رحم جي اپيل پاڪستان جي صدر ڏانهن موڪليندو.

 

وزيراعظم ۽ آرمي چيف جو چين جو دورو ڪامياب، جڏهن ته پاڪستان کي ضرورت پئي ته چين خاموش نه ويهندو: ڊي جي آءِ ايس پي آر

راولپنڊي (اين اين آءِ) ڊي جي آءِ ايس پي آر ميجر جنرل آصف غفور ڪشمير جي معاملي تي وزيراعظم ۽ آرمي چيف جي چين جي دور کي ڪامياب قرار ڏيندي چيو آهي ته چيني صدر يقين ڏياريو ته پاڪستان کي ضرورت پئي ته چين خاموش نه ويهندو، پاڪستان تي حملو چين تي حملو سمجهيو ويندو، چيني صدر ايندڙ سال پاڪستان جو دورو ڪندو، چين هر شعبي ۾ پاڪستان جي مدد ڪندي، جمعي تي سينيئر صحافين کي بريفنگ ڏيندي هن چيو ته چين جو دورو اڳواٽ رٿيل نه هو، چيني قيادت پاڪستان جي قيادت کي ڀارت جي دوري کان اڳ دعوت ڏني، هن چيو ته چين جي دوري ۾ سي پيڪ، ڪشمير ۽ دفاعي تعاون تي ڳالهه ٿي آهي، پاڪستان 70 سيڪڙو ڪشمير تي ڳالهايو، هن چيو ته چيني صدر ايندڙ سال پاڪستان جو دورو ڪندو، چيني قيادت خاطري ڪرائي ته ان جا ڀارت سان لاڳاپا پاڪستان جي قيمت تي نه هوندا، هن چيو ته چيني صدر هر سطح تي پاڪستان جي حمايت ڪئي، چين هر شعبي ۾ پاڪستان جي مدد ڪندو، هن چيو ته وزيراعظم عمران خان چيو ته پاڪستان چين جي ترقي جي ماڊل کي اختيار ڪري رهيو آهي، صدر چيو ته پاڪستان ۽ چين جي دوستي رياست جي سطح تي آهي، چيني صدر چيو ته سول ۽ فوجي قيادت گڏجي ڪم ڪري رهيون آهن جيڪا سٺي ڳالهه آهي، اسان پاڪستان جي معيشت کي وڌندي ڏسڻ چاهيون ٿا، پاڪستان سان لاڳاپا ڪڏهن به گهٽ نه ٿيندا.

 

ن ليگ ۾ ڌڙا ٿي ويا آهن، شهباز شريف حڪومت ڏانهن دوستي جو هٿ وڌائڻ چاهي ٿو: فردوس عاشق اعواڻ

اسلام آباد (اين اين آءِ) وزيراعظم جي سڌ سماءَ بابت خاص مددگار فردوس عاشق اعواڻ چيو آهي ته ن ليگ ۾ ڌڙا ٿي ويا آهن، شهباز شريف حڪومت ڏانهن دوستي جو هٿ وڌائڻ چاهي ٿو، هڪ انٽرويو ۾ هن چيو ته 2014 ۾ تحريڪ انصاف جي ڌرڻي ۾ به جڏهن قانون جي ڀڃڪڙي ٿي ته قانون حرڪت ۾ آيو هو، هاڻ به قانون حرڪت ۾ ايندو، هن چيو ته حڪومت ڪنهن به ڪرپشن واري ماڻهو کي سهارو نه ڏيندي، فردوس عاشق اعواڻ چيو ته 27 آڪٽومبر ڀارت جي والاريل ڪشمير ۾ ستحصال جي خلاف هڪ ٿيڻ جو ڏينهن آهي، جڏهن ته مولانا ان ڏينهن تي قوم کي ڪٺو ڪرڻ بدران ڏڦيڙ ڦهلائڻ چاهي ٿو.

 

شهباز شريف ٻه ڪلاڪ  قيادت سان ملاقات ۾ اقرار ڪيو ته مولانا فضل الرحمان جو ڌرڻو غلط آهي ، سهڪار نه ڪجي: شاهه محمود

ملتان (اين اين آءِ) پرڏيهي وزير شاهه محمود قريشي چيو آهي ته ن ليگ جو قانوني صدر شهباز شريف چوي ٿو ته سندس راءِ ۾ ڌرڻو غلط آهي، هي ڌرڻو نه هڻڻ گهرجي، ڌرڻي جي سياست جي پويان جا مقصد اڃا ٻيا آهن، شهباز شريف محمد صفدر جي بيان تي به ڪاوڙ ڪئي، بلاول ڀٽو زرداري کي اڄ ڇو ڌرڻي جي ضرورت پئجي وئي، توهان ڪنهن جي اشاري تي ڌرڻي جي حمايت ڪري رهيا آهيو، 2014 جي ڌرڻي ۾ توهان کي جمهوريت خطري ۾ نظر اچي رهي هئي، هاڻ ڇو نٿي نظر اچي، 27 آڪٽومبر تي ڀارتي ناپاڪ ارادن کي سڄي دنيا اڳيان بي نقاب ڪنداسين، جمعي تي ميڊيا سان ڳالهائيندي هن چيو ته ن ليگ جو هڪ ڌڙو چاهي ٿو ته مولانا فضل رحمان جي ڌرڻي ۾ شامل ٿيجي، شاهه محمود قريشي چيو ته ميڊيا سميت هر ماڻهو ڄاڻو ٿو ته مولانا جي ڌرڻي جي پويان ڪجهه ٻيا مقصد آهن، هن چيو ته مولانا فضل رحمان ڪشمير سان ٻڌي جي اظهار لاءِ 27 آڪٽومبر جي چونڊ ڪئي، جڏهن ته ان ڏينهن کي ڪارو ڏينهن طور ملهائڻ گهرجي ڇو ته ان ڏينهن تي ڀارتي فورسز والاريل ڪشمير تي چڙهائي ڪئي، پرڏيهي وزير چيو ته برطانوي شاهي جوڙو خيرسگالي دوري تي 14 آڪٽومبر تي پاڪستان اچي رهيو آهي.

 

 

پاڪستان سخت ترين معاشي حالتن مان نڪري آيو آهي چين جا ٿورائتا آهيون: عمران خان

بيجنگ (اين اين آءِ) وزيراعظم عمران خان چيو ته پاڪستان مشڪل اقتصادي حالتن مان نڪري چڪو آهي ان حوالي سان چين جي مالي تعاون کي به فراموش نه ڪنداسين پاڪستان ۽ چين هر قسم جي موسمن جا دوست آهن اربع تي وزيراعطم عمرانخ ان چين جي صدر شي جن پنگ سان ملاقات ڪئي جنهن ۾ پاڪ چين لاڳاپا خطي جي صورتحال ۽ گڏيل دلچسپي جي معاملن تي خيالن جي ڏي وٺ ڪئي ويئي ملاقات ۾ وزيراعظم ڪشمير جي معاملي تي اصولي موقف اختيار ڪرڻ تي چين جي صدر ۽ ان جي حڪومت جا ٿورا مڃيا وزيرياعظم چيو ته مشڪل حالتن ۾ چين هر سطح تي سدائين پاڪستان جي حمايت ڪئي آهي هن چين جي صدر کي ملڪ جي موجوده اقتصادي صورتحال بابت ٻڌايو ۽ چيو ته پاڪستان مشڪل اقتصادي حالتن مان نڪري چڪو اهي. وزيراعظم چيو ته چين اسان جي قومي مفادن جي مدد ڪرڻ تي اسان کان ڪڏهن به ڪوئي مطالبو ناهي ڪيو ۽ پاڪستان جي غير مشروط مدد ڪئي آهي عمران خان چيو ته چين پاڪستان کي مشڪل اقتصادي صورتحال مان ڪڍڻ لاءِ هڪ موقعو فراهم ڪيو آهي هن چين پاڪستان اقتصادي راهداري فريم ورق تحت چين جي تعاون ڪرڻ تي ٿورا مڃيا وزيراعظم عمران خان چين جي صدر شي جن پنگ کي عوامي جمهوريه چين جي 70هين قومي ڏينهن تي مبارڪون ڏنيون هن پنهنجي ۽ وفد جي شاندار استقبال تي چيني صدر جا ٿورا مڃيا ملاقات ۾ چين جي صدر گڏيل قومن جي جنرل اسيمبلي جي اجلاس دوران چين پاڪستان گڏيل لاڳاپن تي وزراعظم عمران خان جي خطاب کي ساراهيو هن چيو ته ٻئي ملڪ ويجها دوستاڻا لاڳاپا رکن ٿا ۽ مختلف شعبن ۾ هڪٻئي سان تعاون ڪن ٿا هن کان اڳ وزيراعظم عمران خان جي آمد تي چين جي صدر وزيراعظم ۽ ان جي وفد جي شاندار آجيان ڪئي گذريل ڏينهن چيني وزيراعظم سان ملاقات ۾ پاڪستاني وزيراعظم چيو ته سي پيڪ جي منصوبن کي تيزي سان مڪمل ڪرڻ ان جي حڪومت جي پهرين ترجيحي آهي ڇو ته هي منصوبو پاڪستان جي اقصادي ترقي ۽ علائقائي خوشحالي جي رفتار تيز ڪرڻ لاءِ اهميت وارو آهي. هن وزيراعظم لي ڪي کي سي پيڪ جي منصوبن کي تيزي سان عمل ۽ گوادر ۾ ترقي لاءِ کنيل قدمن کان آگاهه ڪيو.