تازيون خبرون
ملڪ ڇڏڻ تي پابندي، آصف، بلاول، فريال، مراد ، رياض، سيال، چاولا جا نالا اي سي ايم ۾ شامل - ڳالهه نڪتي ته پري تائين ويندي، ڪو ڊيڄاري ۽ جهڪائي نٿو سگهي ٿو: آصف زرداري - پي ٽي آءِ وڏي وزير کان استعيفيٰ جو مطالبو ڪري ڇڏيو - پاڻي ۽ صحت جي معاملن ۾ دير برداشت نه ڪنداسين: سپريم ڪورٽ - مني لانڊرنگ خلاف ملڪي تاريخ جي سڀ کان وڏي آپريشن جو اعلان، غربت جو خاتمو حڪومت جي پهرين ترجيح آهي: عمران خان - اي سي ايل ۽ نوٽيس کان ناهيون ڊڄندا، اسان سرڏيڻ وارا آهيون، ڀڄڻ وارا ناهيون، بزدل خان ڀڄي ويندو: بلاول ڀٽو زرداري - عمران خان کي زال ياد ڏياريندي آهي ته هو وزيراعظم آهي، مڙهڻو هو ته حڪومت ڪرڻ سيکاريو وڃي ها: مراد علي شاهه - مارچ کان اڳ سمورا گندا آنا گڏ ٿي ويندا، ڪرپٽ ماڻهن کي سزائن تائين ملڪ ۾ استحڪام نه ايندو: شيخ رشيد - سانگهڙ لڳ زير تعمير گهر جي ڇت جو ڀيم ڪري پيو، هڪ عورت سميت 2 معصوم ٻارڙين سميت فوت، هڪ ٻارڙو زخمي - مخالف ڌر ۽ حڪومت جو انگ برابر آهي، مخالف ڌر 6 مهينن کانپوءِ حڪومت ڪيرائي سگهي ٿي: راڻا ثناءَ الله

Category Archives: ايڊيٽوريل

عوام تحريڪ جي اي پي سي….!

لاهور ۾ پاڪستان عوامي تحريڪ جي سربراهه طاهر القادري جي صدارت هيٺ مرڪز منهاج القرآن ۾ ماڊل ٽائون سانحي تي آل پارٽيز ڪانفرنس ٿي جنهن ۾ پيپلز پارٽي، تحريڪ انصاف، ايم ڪيو ايم پاڪستان، جماعت اسلامي، پي ايس پي، جماعت اسلامي، ايم ڊبليو ايم سميت 40 کان وڌيڪ سياسي پارٽين شرڪت ڪئي. اي پي سي جي 10 نقطن واري گڏيل پڌرائي ۾ چيو ويو آهي ته اي پي سي ماڊل ٽائون سانحي ۽ ختم نبوت ترميم جي سخت مذمت ڪري ٿي. ماڊل ٽائون سانحو رياستي دهشتگردي جو بدترين واقعو هو جنهن ۾ نواز شريف، شهباز شريف ۽ راڻا ثناءُ الله سميت پنجاب حڪومت ملوث آهي جن حددخليون هٽائڻ جي آڙ ۾ سياسي مقصدن کي حاصل ڪرڻ لاءِ معصوم ماڻهن تي گوليون وسايون. ختم نبوت جي قانون ۾ تبديلي ڪروڙين مسلمانن جي ايمان ۽ پاڪستان جي آئين تي حملو آهي، نواز شريف ۽ ن ليگ ان قانوني دهشتگردي ۾ سڌا سنوان ملوث آهن جڏهن ته ايماني اساس تي حملي جي ماسٽر مائنڊن جا نالا هن وقت تائين سامهون ناهن آندا ويا، ن ليگ جي اقتدار ۾ رهڻ جو جواز ختم ٿي ويو آهي، ختم نبوت ترميم جي ذميوارن کي سزا ملڻ تائين تڪرار برقرار رهندو، اي پي سي ذميوارن ماڻهن کي سخت سزا ڏيڻ جو مطالبو ڪري ٿي. ماڊل ٽائون سانحي ۾ مارجي ويلن ۽ زخمين کي انصاف ڏيارڻ لاءِ سموريون مخالف ڌر پارٽيون گڏ ٿي جدوجهد ڪنديون، باقر نجفي ڪميشن شهباز شريف ۽ راڻا ثناءُ الله کي سانحي جو ذميوار قرار ڏنو، ان ڪري هو ۽ سندن سمورا ساٿي 7 جنوري 2018ع تائين استعيفيٰ ڏين، سپريم ڪورٽ جي چيف جسٽس کان جي آءِ ٽي جوڙڻ جو مطالبو ڪيو ويو. 8 جنوري تي اسٽيئرنگ ڪميٽي جو اجلاس ٿيندو، جيڪا اڳتي جي حڪمت عملي جو اعلان ڪندي ۽ تحريڪ قصاص جو فيصلو ڪندڙ مرحلو شروع ڪيو ويندو. ماڊل ٽائون ۾ پنجاب حڪومت جي درندگي سياسي پارٽين کي گڏ ڪيو آهي، سياسي پارٽيون عدالتن، فوج ۽ ٻين ادارن سان گڏ آهن، نواز شريف ملڪي تاريخ ۾ ڪرپشن جو آغاز ڪيو، هن اسيمبلي ميمبرن کي پيسا ڏئي رشوت جو آغاز ڪيو، اڄ نواز شريف چوي ٿو ته هو نظرياتي ۽ جمهوريت جي جنگ وڙهي رهيو آهي.متحده پڌرنامي تي اعتراض ڪندي چيو ته شهباز ۽ راڻا ثناءُالله کي ذميوار سڏڻ تي اعتراض آهن. جي آءِ ٽي رپورٽ بعد ڪنهن جو نالو کنيو وڃي، اي پي سي ۾ شيخ رشيد جي اسيمبلين تان استعيفيٰ جي تجويز رد ڪئي وئي. اسيمبلين تان استعيفيٰ جي پ پ سان گڏ تحريڪ انصاف به مخالفت ڪئي.

 

بي بي سي جي بينظير ڀٽو قتل جي جاچ بابت سنگين لاپرواهين جي نشاندهي..!

بي بي سي بينظير ڀٽو بابت تفصيلي رپورٽ شايع ڪئي آهي جنهن ۾ ڪيس جي جاچ دستاويزن جو حوالو ڏيندي چيو ويو آهي ته پوليس ڪيس جي جاچ انتهائي بي دلي سان ۽ گرفتار ڪيل حملي آورن ۽ سهولتن جي اصل ڏوهارين تائين پهچڻ جي ڪوشش ئي نه ڪئي وئي. رپورٽ مطابق جاچ آفيسر سعود مرزا هڪ بمبار جو حليو ٻڌايو جيڪو ڪراچي جي هڪ مخصوص علائقي جو لڳي پيو جڏهن ته اها انتهائي اهم ڄاڻ ڪڏهن سامهون نه آندي وئي. گڏيل قومن واري ڪميشن جي سربراهه چيو ته جاچ ۾ اسٽيبلشمينٽ ۽ ڪجهه حڪومتي وزيرن به تعاون نه ڪيو. هن اسٽيبلشمينٽ ۾ ڪجهه ماڻهن جو بيان وٺڻ چاهيو پر ايئن نه ڪرڻ ڏنو ويو ۽ ان کانپوءِ ان جي آفيس ۽ سيڪيورٽي به واپس ورتي وئي. ٻن سهولتڪارن کي 15 جنوري 2008ع جي هڪ چيڪ پوسٽ تي مبينا مقابلي ۾ ماريو ويو. ان کانپوءِ ڪيترن ئي شڪي ماڻهن کي به ماريو ويو جن ۾ بينظير ڀٽو جي سيڪيورٽي تي مقرر خالد شهنشاهه به شامل آهي ان واقعي جو هڪ جوابدار اڪرم الله اڃان زندا آهي ۽ ڪيس ۾ سزا صرف ٻن آفيسرن کي ٻڌائي وئي جن حادثي واري جاءِ ڌورائي. بينظير ڀٽو قتل کان اڳ حياتي کي خطرن بابت آئي ايس آئي ۽ فوج جا گھرو وزارت کي لکيل خط به سامهون اچي ويا آهن. اڳوڻي وزيراعظم محترمه بينظير ڀٽو جي قتل جي 10 ورهين بعد انٽر سروسز (آئي ايس آئي) ۽ پاڪ فوج جا گھرو وزارت کي لکيل خط بينظير ڀٽو جي حياتي کي خطري بابت آهن. هڪ رپورٽ موجب 19 ڊسمبر 2007ع تي لکيل خط ۾ اڳوڻي صدر (ر) جنرل پرويز مشرف، بينظير ڀٽو ۽ مولانا فضل رحمان جي قتل جو ذڪر آهي.آئي اسي آئي جي خط بعد ملٽري آپريشنز ڊائريڪٽوريٽ به گھرو وزارت کي خط لکي خطري بابت آگاهه ڪيو. جڏهن ته القاعده جي اڳوڻي سربراهه اسامه بن لادن جي ڪمپائونڊ مان مليل دستاويزن مان به ان حوالي سان ڄاڻ ملي، رپورٽن ۾ چيو ويو ته ڳجھن ذريعن وٽان ڄاڻ ملي آهي ته اسامه بن لادن پرويز مشرف، بينظير ڀٽو ۽ مولانا فضل رحمان جي قتل جا حڪم جاري ڪري ڇڏيا آهن. اڳوڻي وفاقي گهرو وزير ۽ پيپلزپارٽي جي مرڪزي اڳواڻ رحمان ملڪ انڪشاف ڪيو آهي ته  بينظير ڀٽو تي آپگهاتي حملو ڪرڻ وارا  2 دهشتگرد هئا، جنهن مان اڪرام الله نالي آپگھاتي  بمبار اڄ به زنده آهي جنهن بيت الله محسود کي وڃي حملي بابت آگاهي ڏني، حملي آور اڪرام الله هن وقت افغانستان جي قنڌار ۾ موجود آهي، جنهن بينظير ڀٽو تي گولي هلائي، افغان صدر اشرف غني بمبار کي گرفتار ڪري پاڪستان حوالي ڪري، آمريڪي صدر ڊونلڊ ٽرمپ جيڪو دهشتگردي خلاف ڳالهائي ٿو اهو ٻڌائي ته بينظير ڀٽو تي حملي جي سهولتڪار عبيدالرحمان کي سي آءِ اي ڊرون حملي ذريعي ڇو مارايو، پيپلزپارٽي شهيد بينظير ڀٽو جي قاتلن جو پيڇو ڪندي ۽ ان کي ڪنهن به صورت ۾ بخش نه ڪندي. مشرف جيڪڏهن سچو هجي ها ته پاڪستان اچي پنهنجي ڪيسن کي منهن ڏي ها، پرويز مشرف بينظير ڀٽو کي سيڪيورٽي ذاتي رنجشن سبب نه ڏني.

 

ڪمند جي آبادگارن جو شهيدن جي مزار تي احتجاج رنگ لائيندو..؟

سنڌ ۾ سوين ايڪڙن تي پوکيل ڪمند جو فصل شگرملن جي بند ٿيڻ ڪري سڪڻ لڳو، آبادگار ڪمند جو اگهه 182 رپيا نه ملڻ سبب پريشان ٿي ٻيهر احتجاجي تحريڪ هلائڻ لاءِ تياري ڪرڻ لڳا، 28 ڊسمبر تي لاڙڪاڻي۽ خيرپور سان لاڳاپيل آبادگار شهيد محترمه بينظير ڀٽو جي مزار تي پهچي حڪومت کي اپيل ڪندا ته ڪمند جو اگهه 182 رپيا ڏياريو وڃي، 22 شگرملن ۾ پيڙائي لاءِ ڪمند موجود هو، جنهن جي مل مالڪن پيڙائي مڪمل ڪري ٻيهر ملن کي بند ڪري ڇڏيو ۽ وڌيڪ ڪمند وٺڻ کان انڪار ڪري ڇڏيو آهي.

خيرپور ۽ لاڙڪاڻي سان واسطو رکندڙ آبادگارن جو چوڻ آهي ته شگرملن جي بند ٿيڻ ڪري سڄي سنڌ ۾ سوين ايڪڙن تي ڪمند سڪي رهيو آهي، 28 ڊسمبر تي ميڙ منٿ قافلو شهيد محترمه بينظير ڀٽو جي مزار تي وٺي وينداسين. سنڌ ۾ پ پ جي حڪومت آهي، اسان انهن کي اپيل ڪنداسين ته شگرملن کي پابند بڻايو وڃي ته انڊينٽ جاري ڪيو وڃي ته جيئن ڪمند شگرملن تائين پهچي سگهي، ٽنڊومحمد خان، ٽنڊوالهيار، ميرپورخاص، حيدرآباد، مٽياري، نوابشاهه، سانگهڙ، سکر، خيرپور ۽ نوشهروفيروز ضلعن سان لاڳاپيل علائقن ۾ ڪمند جي واڍي نه ٿيڻ ڪري متاثر آبادگار ڪڻڪ جي به پوکائي نه ڪري سگهيا آهن، جنهن جي ڪري آبادگار سخت پريشاني واري صورتحال کي منهن ڏئي رهيا آهن، آبادگارن تنظيمن سول سوسائٽي ۽ سياسي تنظيمن طرفان احتجاجن ۽ سنڌ هاءِ ڪورٽ جي حڪم باوجود آبادگارن جي کي ڪمند جو اگهه في مڻ 182 رپيا نه ملي سگهيو،

ايوان زراعت سنڌ جي اڳواڻ محمد خان ساريجو  موجب ته هاڻ ته ڊسمبر جو مهينو به ختم ٿيڻ وارو آهي ۽ ڪڻڪ جي پوکائي واري موسم به ختم ٿي چڪي آهي، پر آبادگارن کان شگرملن وارن ڪمند نه وٺي وڏي ناانصافي ڪئي آهي. آبادگارن پوکائي کان وٺي ڪمند جي تيار ٿيڻ تائين ڀاڻ کان وٺي ٻين خرچن جي مد ۾ لکين رپيا خرچ ڪيا آهن ۽ ڪمند جي وقت تي ڪٽائي نه ٿيڻ ڪري ڪمند سڪي رهيو آهي، آبادگار قرضي بڻجي رهيا آهن،

 

دهشتگردي جو سبب بڻيل آمريڪا…!!

گذريل آچر ڏينهن اسلام آباد ۾ منعقد ٿيندڙ پهرين اسپيڪرز ڪانفرنس جي پڄاڻي تي جاري ڪيل 29 نقاطي گڏيل پڌرنامي ۾ چيو ويو آهي ته اسان ون بيلٽ ۽ ون روٽ جي منصوبي جي سپورٽ ۽ آجيان ڪريون ٿا ۽ عالمي تعاون جي لاءِ مئي 2017ع ۾ چين ۾ منعقد ٿيندڙ ون بيلٽ ۽ ون روٽ فورم جي ڪاميابي کي ساراهيون ٿا.پاڪستان، چين، روس، ترڪيءَ،ايران ۽ افغانستان علائقائي سلامتي، خودمختياري ۽ آزادي جي تحفظ جي عزم کي ورجائيندي چيو آهي ته دهشتگردي جو تعلق ڪنهن به مذهب، قوميت، تهذيب، ثقافت يا نسلي گروپ سان نه ڳنڍڻ گهرجي، دهشتگردي اسان جي ملڪن سميت پوري دنيا جي لاءِ گڏيل خطرو آهي، اسان ان جي ڪنهن به قسم جي مذمت ڪريون ٿا، اسان جي حڪومتن کي گهرجي ته اهي دهشتگردي جي خاتمي لاءِ ٺوس حڪمت عملي ۽ گڏيل قدمن ذريعي عملي  ۽ ٺوس قدم کڻن، پاڪستان ۽ ڀارت گڏيل قومن جي سلامتي ڪائونسل جي قراردادن جي روشني ۾ عالمي ۽ علائقائي امن کي يقيني بڻائڻ جي لاءِ ڄمون ۽ ڪشمير جي تڪرار جو پرامن حل ڪڍن، دهشتگردي جي نظرين جي پکيڙ ۽ پروپئگنڊه جي روڪٿام جو موثر تعاون ضروري آهي.  پڌرنامي ۾ دهشتگردن پاران پارليامينٽ تي حملي جي مذمت ڪندي اهڙن ملڪن جي حڪومتن ۽ عوام سان يڪجهتي جو اظهار ڪيو ويو آهي جڏهن ته 15 جولاءِ تي ترڪيءَ ۾ فوج پاران اقتدار تي قبضي جي ڪوشش جي مذمت ڪندي شرپسندن کي قانون جي ڪٽهڙي ۾ آڻڻ جي لاءِ ترڪيءَ سان ڀرپور تعاون جي خاطري ڪرائي. گڏيل پڌرنامي ۾ القدس جي جاگرافيائي حيثيت تبديل ڪرڻ جي قدمن ۽ فيصلن جي مذمت ڪندي ان عزم کي ورجايو ويو ته وچ اوڀر جي مسئلي جو حل عالمي قانون موجب هجڻ گهرجي. پڌرنامي ۾ عراق ۽ شام ۾ داعش جي شڪست جي ڏس ۾ حاصل ڪيل ڪاميابين جي آجيان ڪندي چيو ويو آهي ته خطي جي ملڪن جي سلامتي ۽ استحڪام جي لاءِ داعش هڪ سنجيده خطرو آهي ۽ ان خطري کي منهن ڏيڻ جي لاءِ گڏيل ڪوششون ڪيون وڃن. گڏيل پڌرنامي ۾ تشدد جي خاتمي ۽ شامي بحران جي سياسي حل لاءِ آستانه فريم ورڪ جي آجيان ڪئي وئي آهي. هڪ ملڪ کي ٻين رياستن پاران هڪ طرفي يا اضافي علائقائي قانون جيڪي عالمي قانونن، گڏيل قومن جي چارٽر جي نفي هجن ۽ خودمختياري ۽ آزادي جي خلاف ورزي هجن، انهن جي استعمال کي رد ڪريون ٿا. پڌرنامي ۾ ان ڳالهه تي رضامندي ظاهر ڪئي وئي آهي ته ڳالهين، اعتماد سان دهشتگردي جي گڏيل چئلينج کي منهن ڏيڻ جي لاءِ مدد ڪئي وڃي. پڌرنامي ۾ ڊگهي مدي واري سفارتڪاري، بشمول پارلياماني سفارتڪاري جي حوصلا افزائي جو عزم ڪيو ويو آهي. پڌرنامي ۾ ملڪن معاشرن ۽ عوام جي سطح تي اقتصادي ترقي جي لاءِ رابطا وڌائڻ جي لاءِ ڪوششن تي رضامندي جو اظهار ڪيو ويو. گڏيل پڌرنامي ۾ اسپيڪرز ۽ وفدن جي سربراهن پاڪستان پاران اسپيڪرز ڪانفرنس جي ڀرپور ۽ گرمجوش ميزباني تي قومي اسيمبلي جي اسپيڪر جا ٿورا مڃيا. وفدن جي سربراهن ۽ اسپيڪرز ايندڙ سال ٻي اسپيڪرز ڪانفرنس تهران ۾ منعقد ڪرائڻ تي رضامندي ظاهر ڪئي.

 

عدلتي فيصلي تي به شگر ملن عمل نه ڪيو…

عدالتي فيصلي کانپوءِ سنڌ ۾ 34 شگرملن مان ڪيترن ئي ملن جي انتظاميا طرفان انڊينٽ ڏيڻ جو سلسلو بند ڪيو ويو آهي، جڏهن ته سنڌ ۾ آبادگارن کان شگر مل انتظاميا ڪمند وٺڻ لاءِ جاري ٿيندڙ انڊينٽ ڏيڻ بند ڪرڻ سبب آبادگار ڪمند جي ڪٽائي ڪرڻ لاءِ پريشان ٿي ويا. شگرملن جي انتظاميا خساري واري سلسلي کي ڏسندي شگرملن ۾ پهتل ڪمند جي پيڙائي مڪمل ڪرڻ کانپوءِ ٻيو ڪمند وٺڻ بند ڪري ڇڏيو آهي، جنهن سبب آبادگار سخت پريشان ٿي ويا آهن، شگرملن جي انتظاميا کنڊ جو ذخيرو هجڻ جواز ڄاڻائي وفاق طرفان کنڊ ايڪسپورٽ نه ڪرڻ ڪري شگرمل انتظاميا ڪمند جو اگهه 172 روپيا عدالتي حڪم تي ڏيڻ واري حڪم کانپوءِ ڳڻتي ۾ وٺجي ويا، شگرملن جي مالڪن طرفان عدالتي فيصلي تي نظرثاني ڪرڻ لاءِ عدالت ۾ درخواست داخل ڪرڻ لاءِ صلاح مشورا ڪيا پيا وڃن، جڏهن ته آبادگارن سڄي سنڌ جي آبادگارن کي اپيل ڪري ڇڏي آهي ته ڪمند جي ڪٽائي ڪنهن به صورت ۾ بند نه ڪن، ڪمند شگرملن تائين پهچائين ڀلي شگرملون انڊيڊ جاري ڪن يا نه ڪن. عدالتي حڪم تحت ڪمند شگرملن جي دروازن تائين پهچايو ويندو.

ايوان زراعت سنڌ جو چوڻ آهي ته سنڌ هاءِ ڪورٽ جي فيصلي سان آبادگارن کي انصاف مليو آهي، پر شگرمل انتظاميا آبادگارن کي انڊينٽ ڏيڻ بند ڪري ڇڏيا آهن ۽ شگرملون بند ڪرڻ جون ڳالهيون پڻ ڪري رهيا آهن، جنهن سان آبادگارن ۾ سخت ڳڻتي آهي، سنڌ ۾ ساڍا 7 لک ايڪڙن تي ڪمند پوکيل آهي، اسان آبادگار ڪمند جي ڪٽائي جاري رکنداسين، ڀلي شگرملون گيٽ بند ڪن، پر اسان ڪمند سان ڀريل ٽرڪون ۽ ٽراليون شگرملن جي گيٽ تائين پهچائينداسين ۽ اسان عدالت کان اميد رکون ٿا ته اها اسان سان انصاف ڪندي، جيڪي شگرملون انڊينٽ جاري نٿيون ڪن، انهن سان پڇاڻو ڪرڻ لاءِ عدالت ڪين ڪمشنر کي حڪم جاري ڪري ته جيئن اهو معاملو حل ٿي سگهي، ڪين ڪمشنر سان لاڳاپيل عملدار موجب عدالت جي حڪم تي سمورين شگرملن کي پابندي سان ڪمند وٺڻ گهرجي انڊينٽ جاري ڪرڻ گهرجن، جيڪڏهن ڪنهن به شگر مل خلاف ورزي ڪئي ته ان جي ڄاڻ عدالت تائين پهچائي ويندي.

 

گڏيل قومن ۾ آمريڪي فيصلي خلاف ٺهراءُ منظور

گڏيل قومن جي جنرل اسيمبلي ٽرمپ جون ڌمڪيون نظرانداز ڪندي يروشلم کي اسرائيلي گادي مڃڻ ۽ سفارتخانو کولڻ جي فيصلي خلاف ٺهراءُ منظور ڪري ورتو آهي. پاڪستان چيو آهي ته ڌمڪين کان ڊڄي فلسطينين جو ساٿ نه ڇڏينداسين. جنرل اسيمبلي ۾ ڊونلڊ ٽرمپ جي فيصلي خلاف 128 ۽ مخالفت ۾ 9 ووٽ پيا، جڏهن ته 35 ميمبر ايوان مان غير حاضر رهيا. جنرل اسيمبلي کي خطاب ڪندي آمريڪي سفير چيو ته بيت المقدس فيصلي خلاف ٺهراءُ سان ڪو فرق نه ٿو پوي. جنرل اسيمبلي ۾ گڏيل قومن جي ميمبر ملڪن ٽرمپ جون ڌمڪيون رد ڪري ڇڏيون. گڏيل قومن ۾ پاڪستاني نمائندي  کرو جواب ڏيندي آمريڪا تي واضح ڪري ڇڏيو ته پاڪستان نه پئسن جو بکيو آهي نه آمريڪي ڌمڪين کان ڊڄي ٿو، القدس جي حيثيت ۾ تبديلي برداشت نه ڪنداسين. آمريڪا مفت ۾ امداد نه ٿو ڏئي. سندس مفاد هوندا آهن. واضح رهي ته ڊونلڊ ٽرمپ ڌمڪي ڏني هئي ته جنرل اسيمبلي ۾ آمريڪي فيصلي خلاف ووٽنگ ڪندڙن جي امداد ۾ ڪٽوتي ڪئي ويندي.ٽرمپ گڏيل قومن ۾ مقرر پنهنجي سفير نڪي هيلي کي هدايت ڪئي هئي ته اها کيس اهڙن ملڪن جا نالا فراهم ڪري، جيڪي مخالفت ۾ ووٽ ڏين.

 

احتجاج ڪندڙ 40 ماسترياڻين سميت 150 استادن جي لٺبازي بعد گرفتاري

2014ع جي ڊسمبر مهيني ۾ اين ٽي ايس پاس ڪندڙ ڪراچي سميت مختلف ضلعن گھوٽڪي، سکر، لاڙڪاڻو، جيڪب آباد، ڪنڌڪوٽ_ڪشمور، بدين، دادو ۽ ٻين سمورن ضلعن جي 15 هزار استادن جو 3 سال ڪانٽريڪٽ وارو مُدو مڪمل ٿيڻ باوجود کين پڪو نه ڪرڻ خلاف ڪالهه استادن پاران ايم اي جناح روڊ کان سنڌ سيڪريٽريٽ ڏانهن علي حسن، عمران وحيد، محمد عظيم ۽ ٻين جي اڳواڻي ۾ مارچ ڪيو ويو. جن کي پوليس سنڌ سيڪريٽريٽ ويجھو برنس روڊ تي روڪي ورتو. جتي استاد ڌرڻو هڻي ويهي رهيا. استادن جي احتجاج کان پوءِ سنڌ سيڪريٽريٽ ڏانهن ايندڙ ويندڙ رستا بلاڪ ٿي ويا ۽ سوين گاڏيون بيهجي ويون. جنهن بعد پوليس جي اٽالن ڌرڻي واري پهچي استادن مٿان بدترين تشدد ڪندي مٿن لٺبازي شروع ڪري ڏني ۽ 40 ماسترياڻين سميت 150 کان وڌيڪ استادن کي گرفتار ڪري آرٽلري، صدر ۽ ٻين ٿاڻن تي لاڪپ حوالي ڪيو ويو. پر ان باوجود به احتجاج ختم نه ٿيو. جنهن بعد ڊپٽي ڪمشنر ڏکڻ استادن جي وفد سان ملاقات ڪري تعليم کاتي جي اختيارين سان ڳالهه ٻولهه ڪرائي. تعليم کاتي جي اختيارين استادن جي مستقلي لاءِ 29 ڊسمبر تي کاتي جي ڪامورن جي گڏجاڻي پڻ گھرائي وئي آهي.

استاد اڳواڻن صحافين سان ڳالهائيندي چيو آهي ته 3 سالن جو ڪانٽريڪٽ وارو مدو مڪمل ٿيڻ باوجود اسان کي پڪو ڪرڻ لاءِ سنڌ سرڪار تيار ناهي. جنهن ڪري 15 هزار استاد پريشان آهن. اسان جي پرامن ۽ حقن جي حاصلات لاءِ ڪيل احتجاج تي پوليس ذريعي تشدد ڪرائي پڙهيل لکيل نوجوانن کي آخر سنڌ سرڪار ڪهڙو پيغام ڏيڻ چاهي ٿي؟ اسان اين ٽي ايس جهڙي ساک رکندڙ اداري جي ٽيسٽ بعد جي ايس ٽي، ايڇ ايس ٽي ۽ پي ايس ٽي جا آرڊر ورتا هئا. ڪراچي ڊويزن جي استادن جو ڪانٽريڪٽ پورو ٿيڻ بعد پگھارون به بند ڪيون ويون آهن. جيڪا ناانصافي آهي. اسان کي جلد معاملو حل ڪرڻ جي خاطري ڪرائيندي ٻڌايو ويو آهي ته اسان جي مستقلي واري سمري وڏي وزير ڏانهن اماڻيل آهي. لٺبازي سان سنڌ حڪومت اسان جي حقن تي ڌاڙو نه ٿي هڻي سگھي. اسان کي پڪو نه ڪيو ويو ته سخت احتجاج ڪنداسين.

پوليس پاران گرفتار ڪيل استادن کي ڊپٽي ڪمشنر سائوٿ جي مداخلت بعد آزاد ڪيو ويو.استادن تي تشدد بعد تعليم کاتي پاران رڳو 6 مهينن جي مُدي ۾ واڌ، صوبائي وزير تشدد جو نشانو بڻيل استادن کي مطمئن رهڻ جو مشورو پڻ ڏنو  ۽ استادن تي تشدد واري عمل بعد چيو آهي ته پيپلز پارٽي جي حڪومت ڪنهن کي به بي روزگار ڪرڻ جي حق ۾ ناهي. استادن جي ڪانٽريڪٽ واري مُدي ۾ 6 مهينن جي واڌ ڪري رهيا آهيون. ان 6 مهينن جي وڌندڙ مُدي دوران استادن جون پگھارون به جاري رهنديون.

 

سپهه سالار جي سينيٽ کي ملڪي ۽ خطي جي صورتحال تي بريفنگ

سينيٽ جي سڄي ايوان جي ڪميٽي جو خاص بند ڪمري وارو اجلاس ٿيو. جيڪو 5 ڪلاڪن تائين جاري رهيو. جنهن دوران آرمي چيف جنرل قمر جاويد باجوه پارليامينٽ جي ميمبرن کي قومي سلامتي ۽ خطي جي صورتحال تي بريفنگ ڏني. اهو اجلاس ان حوالي سان به اهميت تي ٻڌل هو ته پاڪستان جي پارلياماني تاريخ ۾ پهريون ڀيرو پاڪ فوج جي سربراهه ۽ ڊي جي ملٽري آپريشنز سينيٽ کي بريفنگ ڏني. ان موقعي تي ڊي جي آءِ ايس آءِ ليفٽيننٽ جنرل نويد مختار، ڊي جي ايم او جنرل ساحر شمشاد مرزا، ڊي جي آءِ ايس پي آر ميجر جنرل آصف غفور ۽ ڊي جي ايم آءِ به موجود هئا. رپورٽن مطابق پاڪ فوج جي سربراهه سينيٽرن کي علائقائي ۽ قومي سلامتي جي صورتحال خاص ڪري سعودي اسلامي فوجي اتحاد ۾ پاڪستان جي شموليت تي اعتماد ۾ ورتو. بريفنگ کان پوءِ سوالن ۽ جوابن جو سيشن به ٿيو جنهن ۾ پارليامينٽ جي ميمبرن جي سوالن جا جواب عسڪري اختيارين ڏنا. ڪميٽي جو اجلاس آمريڪي صدر ڊونلڊ ٽرمپ جي بيان جي ڪري گهرايو ويو هو. جنهن دوران اڳتي لاءِ حڪمت عملي به ڪئي وئي آهي. اجلاس ۾ گم ٿيل ماڻهن، فيض آباد ڌرڻي ۽ طالبان ۽ داعش بابت به سوال پڇيا ويا. سينيٽرن جي سوالن جا جواب ڏيندي آرمي چيف چيو ته جيڪڏهن ثابت ٿي ويو ته ڌرڻي جي پٺيان فوج هئي ته آئون استعيفيٰ ڏئي ڇڏيندس. جڏهن ڌرڻو هنيو ويو ته منهنجي ذهن ۾ لال مسجد وارو واقعو به آيو، مون ڊي جي آءِ ايس آءِ کي چيو ته ڌرڻي وارن سان ڳالهيون ڪيو، ڳالهيون ته خبر پئي ته انهن جا چار مطالبا آهن پوءِ وري هڪ ئي مطالبي تي اچي ويا، سعودي عرب ويندي به ڌرڻي بابت ڄاڻ وٺندو رهيس.  گم ٿيل ماڻهن جا مختلف سبب آهن، ڪجهه ماڻهو پاڻ غائب ٿي گم ظاهر ڪرائيندا آهن، ايجنسيون رڳو انهن ماڻهن کي جاچ لاءِ تحويل ۾ رکندي آهي جيڪي ملڪ دشمن سرگرمين ۾ ملوث آهن. آرمي چيف هر هر زور ڏيندي چيو ته پارليامينٽ ئي سڀ ڪجهه آهي. توهان پاليسي بڻايو، اسان عمل ڪنداسين، اسان کي ڏسڻو آهي، اڄ ڇا ٿي رهيو آهي، اڄ ڇا ڪرڻ جي ضرورت آهي، ماضي ۾ وڃڻ جو ڪو به فائدو ناهي. آرمي چيف جي ڳالهين کان پوءِ ڪجهه وقت تائين ڊي جي آءِ ايس آءِ وضاحت ڏيندو رهيو.  ڊي جي ايم او جنرل ساحر شمشاد مرزا طرفان سينيٽ کي بريفنگ ڏيندي ٻڌايو ويو ته فوجي عدالتن ۾ هن وقت تائين 274 ڪيسن جا فيصلا ٿيا، 161 ڏوهارين کي موت جي سزا ٻڌائي وئي جن مان 56 ڏوهارين کي ڦاهي ڏني وئي. 13 ڏوهارين کي آپريشن رد الفساد کان پهرين ڦاهي ڏني وئي ۽ 43 کي آپريشن کان پوءِ ڦاهي ڏني وئي.  سينيٽ جي سڄي ايوان تي ٻڌل ڪميٽي جي ان اهم اجلاس جي موقعي تي پارليامينٽ جون سموريون گيلريون بند ڪيون ويون ۽ پريس لائونچ کي به تالا لڳايا ويا جڏهن ته ميڊيا کي ڪيميرائون اندر آڻڻ کان به منع ڪيو ويو. پارليامينٽ پهچڻ تي آرمي چيف جو استقبال سينيٽ جي ڊپٽي چيئرمين عبدالغفور حيدري ڪيو. آرمي چيف سڌو سينيٽ چيئرمين جي چيمبر ۾ ويو ۽ رضا رباني سان ملاقات ڪئي. جنهن بعد ايوان ڏانهن ويندي سينيٽ جي چيئرمين جمهوري گهٽي ڏانهن اشارو ڪندي آرمي چيف چيو ته اها جمهوري گهٽي آهي. آرمي چيف ان تي سرسري نظر وجهي اڳتي هليو ويو. آرمي چيف جنرل قمر جاويد باجوه طرفان سينيٽ کي ملڪي ۽ خطي جي صورتحال تي بريفنگ ڏئي خدشا ختم ڪري ڇڏيا،

قومي سلامتي جو اجلاس…!

وزيراعظم جي صدارت هيٺ قومي سلامتي ڪميٽي جي اجلاس ۾ وفاقي گهرو وزير احسن اقبال، آرمي چيف جنرل قمر جاويد باجوه، قومي سلامتي جو صلاحڪار ناصر جنجوعه، چيئرمين جوائنٽ اسٽاف ڪميٽي جنرل زبير محمود حيات سميت ٽنهي فوجن جي سربراهن شرڪت ڪئي، اجلاس ۾ پرڏيهي سيڪريٽري تهمينه جنجوعه استنبول ۾ ٿيل او آءِ سي سربراهي ڪانفرنس تي بريفنگ ڏني، ڪميٽي چيو ته دهشتگردن جا حملا اسلام جي امن ۽ رواداري جي تعليم خلاف آهن، ڪوئيٽا جي گرجا گهر تي حملي جي ڀرپور مذمت ڪريون ٿا، آمريڪي صدر پاران والاريل بيت المقدس کي اسرائيلي گادي وارو هنڌ تسليم ڪرڻ تي مسلم دنيا کي ڳڻتي آهي، ٽرمپ انتظاما اهڙو فيصلو واپس وٺي، آمريڪي انتظاميا جي اها ذميواري آهي ته اها مسئلي جي منصفاڻي حل لاءِ قدم کڻي، ان موقعي تي نيشنل ايڪشن پلان تي گهرو سيڪريٽري بريفنگ ڏني، جنهن دوران سندس چوڻ هو ته نيشنل ايڪشن پلان تي عملدرآمد ۾ موثر اڳڀرائي ٿي آهي، پاليسي ۽ اداره جاتي سڌارن تي وڌيڪ ڌيان ڏيڻ جي ضرورت آهي، پاڪستان فنانشل ايڪشن ٽاسڪ فورس جي ذميوارين کي پورو ڪرڻ لاءِ پرعزم آهي، پاڪستان عالمي برادري جو هڪ ذميوار ملڪ آهي، ڪميٽي هدايت ڪئي ته نيشنل سيڪيورٽي پاليسي کي سمورن اسٽيڪ هولڊرز جي مدد سان جلد کان جلد حتمي شڪل ڏني وڃي.اجلاس م چيو ويو آهي ته آمريڪي صدر ڊونلڊ ٽرمپ جي والاريل بيت المقدس کي اسرائيلي گادي واري هنڌ تسلم ڪرڻ تي ڳڻتي آهي، ٽرمپ انتظاميا جو هڪ طرفي فيصلو پاڪستان کي قابل قبول ناهي، آمريڪا اهڙي قسم جي کنيل قدمن کي واپس وٺي،

 

ڊار جي واپسي انٽرپول ذريعي ڪرڻ جو فيصلو..!!

نئب جي ايگزيڪيوٽو بورڊ جو اجلاس چيئرمين جاويد اقبال جي صدارت هيٺ ٿيو. اجلاس بعد پڌرنامو جاري ڪندي چيو ويو آهي ته ايگزيڪيوٽو بورڊ اجلاس ۾ 8 انڪوائرين ۽ ٻين انويسٽيگيشن جي منظوري ڏني وئي. ملتان ميٽرو بس پراجيڪٽ ۾ سرڪاري فنڊن ۾ ناجائز استعمال ڪيو ويو. پراجيڪٽ ۾ پيپرا قاعدن ۽ قانون جي ڀڃڪڙي جو الزام آهي. بدعنواني جي جاچ جي به منظوري ڏني وئي آهي. اڳوڻي ناڻي واري وزير اسحاق ڊار کي انٽر پول ذريعي ڏيهه آڻڻ جو فيصلو ڪيو ويو آهي.

نئب ترجمان موجب نئب ڪراچي جي ڊپٽي ڊائريڪٽر سرويچ شيخ کي معطل ڪيو ويو آهي. انڪوائري ڪميٽي روزاني جي بنياد تي الزامن جي جاچ ڪندي. هن تي ڪرپشن جو الزام آهي. جاچ مڪمل ٿيڻ تائين معطل رهندو. پاڪ ڊبليو ڊي لاڙڪاڻي جي آفيسرن خلاف جاچ، اڳوڻي ايم پي اي نصرالله بلوچ خلاف اختيارين جي ناجائز ااستعمال، نارٿ سنڌ اربن سروسز ڪارپوريشن جي آفيسرن خلاف ڪرپشن جي جاچ جي به منظوري ڏني وئي آهي. شاهه عبداللطيف يونيورسٽي خيرپور جي پروين نعيم، چيف انجنيئر سکر ارشاد ميمڻ جي ڪرپشن جي جاچ جي منظوري ڏني وئي. نئب پي آءِ اي جي جهاز اي 310 غير قانوني جرمني موڪلڻ ۽ بعد ۾ ڀڳڙن مٺ تي وڪرو، پنجاب ۾ مبينا طور 56 غير قانوني پبلڪ ڪمپنين ۾ بدعنوانين، نيو اسلام آباد ايئرپورٽ جي تعمير ۾ مبينا بدعنوانين تي سي اي اي آفيسرن خلاف انڪوائري جي به منظوري ڏني وئي.