تازيون خبرون
اقتصادي رابطا ڪميٽي3 لک ميٽرڪ ٽن ڪڻڪ ٻاهران گهرائڻ جي منظوري ڏئي ڇڏي - سنڌ حڪومت جو پاسڪو کان اضافي ڪڻڪ خريدڻ ۽ ذخيره اندوزن خلاف آپريشن جو فيصلو - 4 ڏينهن جيل ۾ نه رهندڙن جو رڙيون ختم نه پيون ٿين: فردوس عاشق - سنڌ هاءِ ڪورٽ آءِ جي ڪليم امام جي بدلي روڪي ڇڏي، ڪم جاري رکڻ جي هدايت - صدر پاڪستان عارف علوي جو اين آئي سي وي ڊي جو دورو، معياري علاج جي تعريف، مريضن سان به ملاقات - مشهور رسالي ٽائم پاڪستاني وزيراعظم عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪري ورتو - عارف علوي جو ڪم اسپتالن جا دورا ڪرڻ ناهي. سنڌ حڪومت تي الزام هڻي وفاقي وزيرن غير ذميواري جو مظاهرو ڪيو: سعيد غني - تحريڪ انصاف ۾ ڌڙابندي، 20 ميمبرن الڳ گروپ ٺاهي ڇڏيو - مولانا فضل الرحمان هيل پنهنجي ڏڍ تي اسلام آباد آيو هو، هن ڀيري ملا ملٽري الائنس اڳ جهڙو نه هو: شيخ رشيد - 16 مهينن ۾ عوام کي نواز شريف جي ترقي ڪندي پاڪستان ۽ عمران خان جي نئين پاڪستان ۾ فرق جي خبر پئجي وئي: ن ليگ

Daily Archives: January 7, 2020

آمريڪا- ايران تڪرار، پاڪستاني سرزمين ڪنهن جي خلاف استعمال نه ٿيندي: عمران خان

اسلام آباد(ويب ڊيسڪ) وزير اعظم عمران خان جي صدارت هيٺ ٿيل اجلاس ۾ فيصلو ڪيو ويو آهي ته پاڪستان پنهنجي سر زمين ڪنهن جي خلاف استعمال ٿيڻ جي اجازت نه ڏيندو. آمريڪا ۽ ايران جي وچ ۾ وڌندڙ ڇڪتاڻ واري صورتحال کي نظر  رکندي وزير اعظم عمران خان اڄ هنگامي مشاورتي اجلاس طلب ڪيو جنهن ۾ وفاقي وزيرن ۽ پي ٽي آءِ جي سينيئر ميمبرن شرڪت ڪئي. اجلاس ۾ پرڏيهي وزير شاهه محمود قريشي وچ اوڀر جي تازي صورتحال ۽ ايراني هم منصب سان ٿيل ڳالهين بابت آگاهه ڪيو. اجلاس ۾ فيصلو ڪيو ويو ته پاڪستان خطي ۾ ڇڪتاڻ کي گهٽ ڪرڻ جي لاءِ ڪردار ادا ڪندو ۽ پنهنجي سر زمين ڪنهن جي خلاف استعمال ٿيڻ جي اجازت نه ڏيندو. مشاورتي اجلاس ۾ آرمي ايڪٽ ترميمي بل ۾ اڳڀرائي جو جائزو به ورتو ويو ۽ ملڪي سياسي ۽ معاشري صورتحال تي به ڳالهيون ڪيون ويون.

 

آرمي ترميمي ايڪٽ بِل اتفاق راءِ سان ٻيهر منظور، سمورين جماعتن ٻڌي ڏيکاري: سرڪار

اسلام آباد (ويب ڊيسڪ) قومي اسيمبلي جي بچاءَ بابت اسٽيڊنگ ڪميٽي گڏيل طور سروسز چيفس (هٿياربند فوجن جي سربراهن) ۽ جوائنٽ چيفس آف اسٽاف ڪميٽي چيئرمين جي مدي ۾ واڌ بابت ٽئي بل منظور ڪري ورتا. پارليامينٽ هائوس اسلام آباد ۾ امجد خان نيازي جي صدارت هيٺ قومي اسيمبلي جي بچاءَ بابت اسٽيڊنگ ڪميٽي جو اجلاس ٿيو، جنهن ۾ بچاءَ واري وزير پرويز خٽڪ سميت وزارت جي ٻين اختيارين پڻ شرڪت ڪئي. اجلاس دوران اڳ ۾ معمول جي ايجنڊا تي بحث ڪيو ويو، جنهن کانپوءِ ڪميٽي جو ان ڪئميرا اجلاس ٿيو، جنهن ۾ آرمي، نيوي ۽ ايئر فورس ايڪٽس ۾ ترميمن جو معاملو غور هيٺ آيو ۽ ڪميٽي هٿياربند فوجن بابت ٽنهي ايڪٽس ۾ ترميمون گڏيل طور منظور ڪري ورتيون. اجلاس کانپوءِ صحافين سان ڳالهائيندي بچاءَ واري وزير پرويز خٽڪ اسان جا نظريا مختلف ٿي سگهن ٿا پر هر معاملي تي سياست ناهي ٿيندي، سڄو پاڪستان فوج سان گڏ آهي، سڀني جماعتن غير مشروط طور بل جي حمايت ڪئي آهي. هن چيو ته اهي بل سڀاڻي قومي اسيمبلي ۾ ووٽنگ لاءِ پيش ڪيا ويندا. ڪميٽي جي چيئرمين امجد خان نيازي جو چوڻ هو ته اجلاس دوران اپوزيشن جون پيش ڪيل ترميمون ٻڌيون پر اهو مسودو قانون جو حصو نه هو، ترميمي قانون گڏيل طور منظور ڪرڻ تي سڀني جماعتن جا ٿورائتا آهيون. ٻئي پاسي قانون واري وزير فروغ نسيم صحافين سان ڳالهائيندي چيو ته مخالف ڌر سروسز چيفس جي مقرري لاءِ هڪ پارلياماني ڪميٽي جو رول ٺاهڻ پئي چاهيو، مان انهن کي قانوني طور راضي ڪيو ته جيڪا تبديلي اهي تجويز ڪري رهيا آهن، ان لاءِ آئيني ترميم ضروري آهي. هن چيو ته پارلياماني ڪميٽي جو رول ان وقت هوندو آهي، جڏهن آئيني ترميم اهو رول ٺاهي ۽ قلم 243 ۾ ڪا ترميم نه پئي ٿئي، نه ئي سپريم ڪورٽ اسان کي آئين ۾ ترميم جو چيو آهي، آئين ۾ ترميم نه ٿيندي ته پارلياماني ڪميٽي جو رول نٿو ٺهي ۽ اپوزيشن وڏي دل سان منهنجي ڳالهه کي تسليم ڪيو.

 

 

ايران-آمريڪا تڪرار، ڪنهن خلاف آهيون نه ساٿ ڏينداسين: پاڪستان

اسلام آباد (اين اين آءِ) پرڏيهي وزير شاهه محمود قريشي واضح ڪيو آهي ته پاڪستان جي سرزمين ڪنهن ٻئي ملڪ جي خلاف استعمال نه ٿيندي ۽ نه ئي پاڪستان خطي جي ڪنهن تڪرار ۾ حصيدار بڻجندو، موجوده حالتن نئين ڇڪتاڻ پيدا ڪئي، جيڪا ڇڪتاڻ اساما لادن ۽ ابوبڪر البغدادي جي واقعن کان وڌيڪ سنگين ٿي سگهي ٿي، اسان کي استحڪام کي خطرو نظر اچي رهيو آهي جنهن تي حڪومت کي سخت ڳڻتي آهي، هاڃيڪار اثر افغانستان تي ٿي سگهن ٿا، لبنان جي حزب الله اسرائيل تي حملو ڪري ان کي راڪيٽ سان نشانو بڻائي سگهي ٿي، خطي ۾ سخت رتو ڇاڻ ٿيندي، گڏيل قومون هن خطي کي باهه کان بچائڻ لاءِ پنهنجو ڪردار ادا ڪن، سومر تي سينيٽ چيئرمين صادق سنجراڻي جي صدارت هيٺ اجلاس ۾ آمريڪا، ايران ڇڪتاڻ بابت بيان ڏيندي شاهه محمود قريشي چيو ته 27 ڊسمبر تي هڪ راڪيٽ حملي ذريعي عراق ۾ هڪ آمريڪي قافلي تي حملو ٿيو ان ۾ هڪ آمريڪي مارجي ويو ۽ ٻيا زخمي ٿيا، هن چيو ته 29 ڊسمبر تي ان حملي جي رد عمل ۾ آمريڪا ڪارروائي ڪئي ۽ ان مليشيا جا 50 ماڻهو ماريا ۽ 25 زخمي ڪيا، آمريڪي حملي جي جواب ۾ احتجاج جو فيصلو ڪيو ۽ 31 ڊسمبر تي بغداد ۾ آمريڪي سفارتخاني اڳيان احتجاج ڪيو ويو، جنهن ۾ هزارين ماڻهن شرڪت ڪئي جنهن ۾ ڀڃ ڊاهه به ڪئي وئي، شاهه محمود قريشي چيو ته خوش قسمتي سان آمريڪي سفارتخاني کي ٿڏي تي خالي ڪرايو ويو هو، هن چيو ته آمريڪا پهرين جنوري 2020 تي هن احتجاج جو ذميوار ايران کي ڄاڻايو پر ايراني ميجر جنرل قاسم سليماني جنهن کي بعد ۾ نشانو بڻايو ويو کيس ان جو ماسٽر مائينڊ قرار ڏنو ويو هو، شاهه محمود قريشي چيو ته 3 جنوري تي هڪ ڊورن ذريعي قاسم سليماني کي نشانو بڻايو ويو جنهن جي نتيجي ۾ هو مارجي ويو، ان سان گڏ عراق جي مليشيا جي ڊپٽي ڪمانڊر عبدالمحدي المهندس ۽ 9 ڄڻا مارجي ويا هئا، هن واقعي تي خطي تي نظر رکندڙ ماهر نه رڳو ڳڻتي جوڳو چون ٿا پر اهميت جي لحاظ کان ان جي نظر ۾ هن واقعي جا اثر 2011 جي آپريشن ۾ اسامان بن لادن کي نشانو بڻائڻ، 2019 ۾ داعش جي اڳواڻ ابوبڪر البغدادي کان وڌيڪ، سنگين ۽ ڳڻتي جوڳا ٿي سگهن ٿا، شاهه محمود قريشي چيو ته قاسم سليماني جي مارجڻ کانپوءِ ايران ۽ عراق ۾ احتجاج جي ڪيفيت پيدا ٿيا، ماڻهو رستن تي آيا ۽ ڪاوڙ جو اظها رڪيو جيڪو اڃاتائين جاري آهي، پرڏيهي وزير احتجاج کي ڏسندي ايران جي قيادت سيڪيورٽي ڪونسل جو هنگامي اجلاس طلب ڪيو، ان سان گڏ عراق ۾ به ان جي خلاف عوامي رد عمل آيو.

 

ملڪ جي هڪ ڪروڙ 70 لک ٻارن کي پيٽ جي جيوڙن جي انفيڪشن جو خطرو

ڪراچي (اين اين آءِ) هڪ سرڪاري دستاويز ۾ اها ڳالهه اڳيان آئي آهي ته پاڪستان جي 40 ضلعن ۾ 5 کان 15 سالن جي هڪ ڪروڙ 70 لک ٻارڙن ۾ مٽي سان منتقل ٿيندڙ هيلمنٿ انفيڪشن (ايس ٽي ايڇ ) جو خطرو آهي، خيال رهي ته هيلمنٿ انفيڪشن آنڊن جي جيوڙن سان ٿيندو آهي، جيڪو مٽي ذريعو جسم ۾ داخل ٿيندو آهي، رپورٽ موجب صحت عملدارن سڄي ملڪ ۾ قائم اسڪولن جي سطح تي ڊي ورمنگ (جيوڙن جو خاتمو) جي گهر ڪئي آهي، قومي صحت جي وزارت پاران ڊبليو ايڇ او جي سهڪار سان ڪيل پهرين ايس ٽي ايڇ سروي کانپوءِ هڪ ڪروڙ 70 لک ٻارن جو انگ اڳيان آيو، سروي ۾ انڪشاف ٿيو ته هڪ ڪروڙ 70 لک ٻارن مان رڳو ڪراچي ۾ 46 لک ٻارن کي علاج جي ضرورت آهي، اهي علائقا جتي صفائي گهٽ آهي اتي انهن جيوڙن جا آنا مٽي کي گندو ڪن ٿا، ايس ٽي ايڇ انفيڪشن سان پيٽ ۾ سور، ڊائريا، رت ۽ پروٽين جي گهٽتائي، جسماني ۽ دماغي واڌ ويجهه ۾ گهٽتائي جا مسئلا ٿي سگهن ٿا.

 

 

ڪرتارپور ۾ ڏهين گرو گوبند سنگهه جي جنم ڏينهن جي مک تقريب جو شاندار احتمام، ڀارتي پروپگنڊا جي نفي آهي: فردوس عاشق اعواڻ

اسلام آباد (اين اين آءِ) سڌ سماءَ بابت خاص مددگار فردوس عاشق اعواڻ چيو آهي ته گورد واره ڪرتارپور ۾ سک مذهب جي ڏهين گرو گوبند سنگهه جي جنم ڏينهن جي مک تقريب جو شاندار احتمام، ڀارتي پروپگنڊا جي نفي آهي، هڪ بيان ۾ هن چيو ته سوين سک ياترين جي شرڪت پاڪستان جي پرامن هئڻ کي ظاهر ڪري ٿي جتي اقليتون آزادي سان مذهبي رسمون ادا ڪري سگهن ٿيون، فردوس عاشق اعواڻ چيو ته ڪرتارپور راهداري امن ۽ محبت جو لنگهه آهي، هن چيو ته تقريب ۾ مختلف مذهبن سان تعلق رکندڙ ماڻهن جي شرڪت ۽ سک برادري سان ٻڌي جو اظهار ان ڳالهه جو ثبوت آهي ته پاڪستان ۾ سڀ ڀائپي واري ماحول ۾ ملڪ جي ترقي ۽ تعمير ۾ حصيدار آهن.

 

ٿر ۾ ماڪڙ جي نئين نسل جي خاتمي لاءِ ايئرڪرافٽس هائير ڪيا وڃن، وڏي وزير پاران زراعت کاتي کي هدايت

ڪراچي (اسٽاف رپورٽر) سنڌ جي وڏي وزير سيد مراد علي شاهه زراعت کاتي کي هدايت ڪئي آهي ته هو صوبي جي ريگستاني علائقن ۾ ماڪڙ جي خاتمي بابت اسپري لاءِ ڪجهه جديد ايئرڪرافٽس هائير ڪري ته جيئن کين ٻچن جي پيدا ٿيڻ کان پهرين انهن جو خاتمو آڻي سگهجي. وڏي وزير ان سلسلي ۾ چين جي قونصل جنرل لائي بائي جان سان به مدد لاءِ چيو جنهن اڄ وزيراعليٰ هائوس ۾ ريگستاني علائقن ۾ ماڪڙ تي اسپري بابت ايئر ڪرافٽس جي هائيرنگ لاءِ ملاقات ڪئي. مراد علي شاهه چيو ته ماڪڙ صوبي جي مختلف حصن ۾ تيار فصل تي حملو ڪيو ۽ هارين سميت قومي ۽ صوبائي معيشت کي عمومي طور تي گهڻو نقصان پهچايو آهي. هن چيو ته فصلن کي پهچندڙ نقصان سان هاري گهڻو پريشان آهن. وڏي وزير چيو ته وفاقي حڪومت جي پلانٽ پروٽيڪشن کاتي وٽ ڪجهه ايئر ڪرافٽس آهن ۽ جنهن مان ڪيترائي گرائونڊ ڪيا ويا آهن ان ڪري اهي صوبائي حڪومت کي گهربل مدد نٿا ڪري سگهن. هن صوبائي زراعت واري وزير کي هدايت ڪئي هئي ته هو يو اي اي جي حڪومت سان ڳالهائي ته جيئن ان سان سنڌ حڪومت ريگستاني علائقن جتي ماڪڙ پنهنجن ٻچن کي پيدا ڪرڻ لاءِ قيام ڪيو آهي اتي فضائي اسپري ڪرايو وڃي. هن چيو ته اسان چاهيون ٿا ته انهن کي پيدا ٿيڻ کان پهرين ئي ختم ڪيو وڃي نه ته ايندڙ سال اهي ٻيهر هارين لاءِ نقصان پهچائڻ ڪو سبب ٿيندا. وڏي وزير چيو ته صوبائي حڪومت ايئر ڪرافٽس جو رينٽ ادا ڪندي ۽ انهن کي کي اسپري لاءِ سمورو ضروري سامان پڻ فراهم ڪندي. وڏي وزير ڪراچي ۾ چين جي نئين متعين قونصل جنرل سان ڳالهائيندي چيو ته هو پنهنجي حڪومت سان سنڌ حڪومت کي ريگستاني علائقن ۾ اسپري لاءِ جديد ايئرڪرافٽس جي فراهمي بابت سهڪار لاءِ ڳالهائي. قونصل جنرل وڏي وزير کي خاطري ڪرائي ته هو پنهنجي حڪومت سان ان بابت ڳالهائيندو ۽ ايندڙ ٽن ڏينهن اندر جواب پڻ ڏيندو. مراد علي شاهه چين جي حڪومت جو ٿر ۾ ڪوئلي سان هلندڙ پاور پلانٽ جي قيام تي کيس ٿورا مڃيا ۽ چيو ته چائنيز ڪمپني ٿر ۾ ڪوئلي جي کاڻ جي کوٽائي لاءِ ڪم ڪري رهي آهي. هن چيو ته چين اسان جو سڀ کان وڌيڪ ڀروسي مند دوست آهي ۽ ان دوستي جي بنياد پي پي پي جي باني شهيد ذوالفقار علي ڀٽو رکي هئي. وڏي وزير نئين قونصل جنرل کي سنڌ ٽوپي، اجرڪ ۽ مومنٽو پيش ڪندي کيس سنڌ ۾ ڀليڪار پڻ چيو. وڏي وزير قونصل جنرل کي چيو ته هو سنڌ کي پنهنجو نئون گهر سمجهي.

 

 

ايراني ڪمانڊر جي جنازي نماز ادا ڪئي وئي، لکين ماڻهو شريڪ، آمريڪا ۽ اسرائيل کي ڪارو ڏينهن ڏسڻو پوندو: قاسم سليماني جو چتاءُ

تهران (ويب ڊيسڪ) ايراني تخت گاهه تهران ۾ قدس فورس جي سربراهه جنرل قاسم سليماني جي آخري رسمن ۾ لکين ماڻهن شرڪت ڪئي، جڏهن ته جنازي جي نماز پڙهندڙن ۾ سپريم ليڊر خامنه اي به شامل هو. ايران جي پاسداران انقلاب جي سپاهه قدس جي سربراهه جنرل قاسم سليماني کي عراقي تخت گاهه بغداد ۾ هڪ آمريڪي فضائي حملي ۾ ماريو ويو هو، سندس مڙهه سان گڏ اڄ تهران ۾ لکين شهرين تعزيتي مارچ ڪيو. تهران ۾ جنرل قاسم سليماني جي جنازي نماز ۾ ايران جي سپريم ليڊر آيت الله علي خامنه اي ۽ صدر حسن روحاني پڻ شرڪت ڪئي. عالمي ميڊيا موجب سليماني جي آخري رسمن ۾ حصو وٺندڙ شهرين جو انگ لکن ۾ هو، جڏهن ته اڄ ايران ۾ عام موڪل رهي. جنرل قاسم سليماني جي جنازي نماز تهران يونيورسٽي جي حدن ۾ پڙهي وئي، جتي لکين سوڳوارن کي سندس تصويرن جا پورٽريٽ کنيل هئا ۽ انهن ڳاڙها جهنڊا به لوڏيا، جن کي ايران ۾ شهيدن جي رنگ جي علامت سمجهيو ويندو آهي، جڏهن ته حجوم ”آمريڪا مرده باد“ ۽ ”اسرائيل مرده باد“ جا نعرا پڻ هنيا. تهران يونيورسٽي ۾ اڄ قاسم سليماني جي جنازي نماز جي موقعي تي هڪ تقريب کي خطاب ڪندي شهيد جي ڌيءُ زينب به شرڪت ڪندڙن کي خطاب ڪيو. زينب سليماني سوڳوارن جي حجوم ۾ تقرير ڪندي چيو ته آمريڪا ۽ اسرائيل اڄ هڪ ڪاري ڏينهن سامهون بيٺا آهن، ڊونلڊ ٽرمپ اهو نه سمجهي ته منهنجي پيءَ جي هڪ شهيد طور موت سان سڀ ڪجهه ختم ٿي ويو آهي.

 

آمريڪي فوج کي واپس وڃڻ جو چيو ويو ته بغداد کي سخت پابندين جو منهن ڏسڻو پوندو: ٽرمپ جي ڌمڪي

واشنگٽن (ڊيسڪ رپورٽ) امريڪي صدر ٽرمپ ايران کانپوءِ عراق کي ڌمڪي ڏني وئي آهي ته سندن فوج کي واپس وڃڻ لاءِ چيو ويو ته بغداد کي سخت پابندين جو منهن ڏسڻو پوندو. امريڪي صدر عراقي پارليامينٽ ۾ امريڪا سوڌو پرڏيهي فوج جي نيڪالي لاءِ ٺهراءُ منظور ٿيڻ کانپوءِ بيان ڏنو آهي.ميڊيا سان ڳالهائيندي امريڪي صدر ٽرمپ فوج جي نيڪالي بابت چيو ته جيڪڏهن اهڙو جارحاڻو قدم کنيو ويو ۽ عراقي حڪومت ڪجهه ڪيو ته عراق تي وڏيون ۽ ڳريون پابنديون لڳايون وينديون، جنهن لاءِ هو سمجهي ٿو ته نامناسب آهي. عراقي سرڪار غير دوستاڻي طريقي سان امريڪي فوج کي واپس وڃڻ لاءِ چيو ته مٿن اهڙيون پابنديون لڳايون وينديون، جو هُنن پهرين ڪڏهن به نه ڏٺيون هونديون. امريڪي صدر چيو ته عراق ۾ سندن تمام وڏو هوائي اڏو آهي، جنهن جي اڏاوت تي اربين ڊالرز خرچ ٿيا آهن، اسان تيستائين نه ڪرنداسين، جيستائين عراقي اُن جي قيمت ادا نٿا ڪن. واضح رهي ته عراقي پارليامينٽ گذريل ڏينهن امريڪا سوڌو سموري پرڏيهي فوج کي ملڪ نيڪالي ڏيڻ جو ٺهراءُ منظور ڪندي حڪومت کان اُن حوالي سان فوري قدم کڻن جو مطالبو ڪيو هو. عراق جي نگران وزيراعظم جو چوڻ هو ته جيتوڻيڪ اهڙي قدم سان کين اندروني ۽ پرڏيهي ڏکيائين جو منهن ڏسڻو پوندو، تڏهن به اهو عراق جي مفادن وٽان هوندو.

 

اسٽينڊنگ ڪميٽي ۾ آرمي ترميمي ايڪٽ ۾ خامين کي ٺيڪ ڪرڻ جي ضرورت آهي: شاهد خاقان

اسلام آباد (بيورو رپورٽ) اڳوڻي وزيراعظم ۽ نواز ليگ اڳواڻ شاهد خاقان عباسي چيو آهي ته اسٽينڊنگ ڪميٽي ۾ آرمي ترميمي ايڪٽ ۾ خامين کي ٺيڪ ڪرڻ جي ضرورت آهي. اسلام آباد ۾ ميڊيا جي سوالن جا جواب ڏيندي اڳوڻي وزيراعظم چيو ته آرمي ترميمي ايڪٽ ۾ خاميون حڪومتون پيدا ڪيل آهن، هاڻي جڏهن بل ايوان ۾ پيش ٿيو آهي ته ڪميٽي ۾ خاميون ختم ڪري اُن کي ٺيڪ ڪرڻ جي ضرورت آهي. سندس چوڻ هو ته قانونسازي لاءِ بِلز هڪ شخصيت يا حڪومت لاءِ نه، پر سدائين لاءِ ٺهندا آهن، تنهن ڪري ڌيان سان اُن کي پاس ڪرڻ گهرجي.