تازيون خبرون

Daily Archives: October 22, 2019

ڪرپشن سڀ کان وڌو مسئلو آهي، ڪرپشن جي خاتمي تائين ٻاهرين سيڙپڪاري نه ايندي: عمران خان

حب (ويب ڊيسڪ) وزيراعظم عمران خان چيو آهي اسان جي ڪوشش آهي ته ماضي ۾ ريڪوڊڪ جي ٺيڪيدار ڪمپني ٻيهر پاڪستان ۾ اچي ڪم ڪري. بلوچستان ۾ 1320 ميگا واٽ جي چائنا حب پاور جنريشن پلانٽ جي افتتاحي تقريب کي خطاب ڪندي وزيراعظم چيو ته مان ڏاڍو خوش آهيان، ڇو ته هي سي پيڪ تحت پهريون گڏيل منصوبو آهي ۽ اهو ئي تسلسل اڳتي ڏسڻ چاهيون ٿا، ڇو ته اهڙي قسم جا گڏيل منصوبا سٺو سنئوڻ آهن ۽ حڪومت ان حوالي سان هر قسم جون سهولتون فراهم ڪندي. هن چيو ته ان منصوبي لاءِ ڪوشش ڪنداسين ته گهٽ ۾ گهٽ 20 سيڪڙو ڪوئلو ٿر کان آندو وڃي، ڇو ته ان سان پرڏيهي ناڻي جي مٽاسٽا محفوظ ٿيندي، هن وقت اسان جو سڀ کان وڏو مسئلو ڪرنٽ اڪائونٽ خسارو آهي، جڏهن اسان جي حڪومت آئي ته 20 ارب ڊالر خسارو هو، اهو ئي سبب آهي جو رپئي جي قدر تي دٻاءُ ٿيو ۽ ڊالر مهانگو ٿي ويو، ان جي ڪري مهانگائي به ٿي، ڇو ته رپئي جو قدر گهٽجڻ سان جيڪا به شئي امپورٽ ڪئي وڃي، اها مهانگي ٿي ويندي آهي، تنهن ڪري اسان چاهيون ٿا ته هاڻ اسان جا جيڪي به پاور پراجيڪٽ ٺهن، انهن ۾ مقامي فيول استعمال ٿئي. سندس چوڻ هو ته ملڪ ۾ 50 هزار ميگا واٽ هائيڊرو پيداوار جي صلاحيت آهي، اسان کي ان تي اڳ ۾ ڪم ڪرڻ گهرجي ها پر بدقسمتي سان ائين نه ڪيو ويو ۽ اسان ئي درآمدي فيول تي ئي ڀاڙڻو پئي ٿو، تنهن ڪري ڊالر مهانگو ٿئي ٿو ته بجلي مهانگي ٿي وڃي ٿي، اسان جيتري مقامي فيول تي بجلي ٺاهينداسين، ان سان ان شئي کان بچي وينداسين ته جيڪڏهن ڊالر مهانگو ٿئي ٿو ته بجلي مهانگي نه ٿيندي. عمران خان چيو ته جڏهن کان اسان جي حڪومت آئي آهي ته ڪاروبار ۾ سولائيون پيدا ڪري رهيا آهيون، ٻاهران ايندڙ سيڙپڪار لاءِ ضروري هوندو آهي ته ان لاءِ سولائيون هجن، ان حوالي سان اسان کي اڃا گهڻو ڪم ڪرڻو آهي پر عوام نتيجا ڏسندو. وزيراعظم بلوچستان جي وڏي وزير کي مخاطب ٿيندي چيو ته مون کي اندازو نه هو هي صوبو ڪيترين نعمتن سان مالا مال آهي، ريڪوڊڪ جو ڪيس ٿيو، ٻاهران وڏيون ڪمپنيون ڪم ڪرڻ آيون پر ان تي قانوني ڪارروائي ٿي، ڪمپني ٻاهر وڃي ڪيس کٽيو ۽ پاڪستان تي 6 ارب ڊالرن جو ڏنڊ لڳو، جڏهن مان آمريڪا جي دوري تي هيس ته مون کي نياپو آيو ته جنهن ڪمپني کي اهو سڌي ريت ٺيڪو ڏنو ويو، ان جو چيئرمين مون سان ڳالهائڻ چاهي ٿو ۽ جڏهن منهنجي ان سان ڳالهه ٻولهه ٿي ته هن ٻڌايو ته دنيا ۾ سڀ کان وڌيڪ سون جا ذخيرا پاڪستان وٽ آهن ۽ اهي بهتر آهن، مون کي اندازو نه هو، مان سمجهيو پئي ته ٽامي جا ذخيرا آهن پر سون جا ذخيرا به آهن، جن جي کوٽائي سولي آهي ۽ پوءِ چيئرمين چيو ته اسان ٻيهر اچڻ جو ان لاءِ سوچي رهيا آهيون، ڇو ته توهان جي حڪومت صاف آهي. هن وڌيڪ چيو ته اسان جون ڳالهيون هلي رهيون آهن ۽ ڪوشش ڪري رهيا آهيون ته ريڪوڊڪ ۾ اها ئي ڪمپني ٻيهر اچي ۽ پاڪستان ۾ ڪم ڪري. تحريڪ انصاف سربراهه چيو ته ڪرپشن پاڪستان جو سڀ کان وڏو مسئلو آهي، اسان کي ان هنڌان اربين ڊالر ملي پئي سگهيا پر رڳو ان ڪري نه مليو، ڇو ته هتي ڪرپشن هئي، ڪجهه ماڻهن پئسو ٺاهڻ لاءِ پاڪستان کي نقصان پهچايو، تنهن ڪري پاڪستان ۾ کوٽائيءَ جون وڌيڪ ڪمپنيون نه آيون. سندس چوڻ هو ته جيستائين ملڪ مان ڪرپشن جو خاتمو نٿو ٿئي، ٻاهرين سيڙپڪاري نه ايندي، اسان جي ملڪ ۾ ٿرڪول ۾ 185 ارب ٽن ڪوئلو پيو آهي، جنهن سان 100 سالن تائين پاڪستان کي بجلي فراهم ڪري سگهون ٿا، اهڙي ئي ريت اسان وٽ گئس جا ذخيرا موجود آهن پر ان لاءِ اسان کي سيڙپڪاري گهرجي. وزيراعظم چيو ته هن ملڪ کي صاف ۽ شفاف حڪومت جي ضرورت ان ڪري آهي، ڇو ته الله هن ملڪ کي سڀ ڪجهه ڏنو آهي، اڄ اسان قرضي ان ڪري آهيون، ڇو ته اسان گورننس جو اهو نظام نه ڏسي سگهياسين، جنهن سان سيڙپڪار پاڪستان اچن پر ايندڙ دور ۾ سي پيڪ اسان لاءِ هڪ بهترين موقعو آهي، اسان ان ۾ اڳتي وڌي رهيا آهيون. عمران خان موجب چين پيداوار ۾ اسان کان ٻيڻ کان ٽيڻ تي اڳتي آهي، جيڪڏهن اسان پنهنجي پيداوار کي ٻيڻو ڪري ڇڏيون ته اسان جا مسئلا حل ٿي ويندا.

 

نيب ڪميٽي رد، نيب قانون ۾ جوڊيشنري ۽ پاڪ فوج ناهي اينديۡ: سنڌ حڪومت

ڪراچي (اسٽاف رپورٽر)  سنڌ جي اطلاعات ۽ پورهئي کاتي جي صوبائي وزير سعيد غني چيو آهي ته نيب پاران تاجرن جي ايشوز جي حل لاءِ بڻايل ڪميٽي غير قانوني آهي ۽ 33 سي جي تحت چيئرمين نيب کي ان ڳالهه جو اختيار حاصل ناهي ته هو ڪنهن قسم جي ڪميٽي بڻائي هن چيو ته نيب قانون ۾ جوڊيشنري ۽ پاڪ فوج ناهي ايندي ڇو ته انهن جو پنهنجو هڪ نظام آهي بيورو ڪريٽ ۽ بزنس ڪميونٽي به ان قانون کان آجي هاڻي صرف اپوزيشن لاءِ ئي نيب قانون رهجي ويا آهن اهڙن خيالن جو اظهار هن سنڌ اسيمبلي ۾ ميڊيا ڪارنر تي صحافين سان ڳالهه ٻولهه ڪندي ڪيو هن چيو ته ڪو به تاجر حڪومت جي مرضي مطابق نه هلندو ان کي نيب ڪميٽي جي ذريعي نشانو بڻايو ويندو ۽ ڪميٽي کي سياسي مقدمن لاءِ استعمال ڪيو ويندو هن چيو ته قومي اسيمبلي جي ميمبر بابت ابتيون سبتيون خبرون هلايون ويون جڏهن ته ان جا سمورا اثاثا ظاهر آهن ان لاءِ ميڊيا ذميواري جو مظاهرو ڪري هن چيو ته سنڌ جو وڏو وزير ۽ وزيراعظم پاڪستان چاهي هڪٻئي کي پسند نه هجن پر انهن کي هڪٻئي سان ملڻ گهرجي ڇو ته ٻئي عهدا آئيني آهن ۽ هو ان ڳالهه جو تقاضو ڪندو آهي ته صوبي ۽ وفاق کي رابطي ۾ رهڻ گهرجي هن چيو ته وزيراعظم جو دورو دراصل پي ٽي آئي جي اندروني اختلافن ۽جهيڙي جو نتيجو آهي ته جيئن پي ٽي آئي تماشو نه بڻجي هڪ سوال جي جواب ۾ هن چيو ته وزيراعظم پاڪستان ٻين پارٽين کي به ملاقات لاءِ گهرايو آهي ۽ مان توقع رکندو آهيان ته جي ڊي اي جا اڳواڻ وزيراعظم کان ايم ڪيو ايم پاران آرٽيڪل 239 بابت سوال ڪندا جڏهن ته ايم ڪيو ايم وزيراعظم کان 162 ارب رپئي جي باري ۾ به پڇندي هن چيو ته اسان ورلڊ بينڪ جي تعاون سان ڪراچي کي خوبصورت بڻائينداسين ۽ صوبائي حڪومت پنهنجي آئيني اختيار ۾ رهي ڪم ڪندي ۽ وفاق کان خيرات نه گهرندي سنڌ جي وڏي وزير جي وزيراعظم سان نه ملڻ جي سوال تي هن چيو ته وڏي وزير سان ملڻ جي ذميواري وزيراعظم جي آهي سنڌ جي وڏي وزير جي نه هن چيو ته سي جي ڪينال تي پاور پلانٽ جي تعمير تي اسان کي تحفظات آهن جنهن کي پري ڪرڻ ضروري آهي سعيد غني چيو ته پي ٽي آئي اڳواڻ پنهنجي وفاقي وزير جي صفائي مهم جو به پوسٽ مارٽم ڪن اسان شهر صاف ڪري رهيا آهيون ان سلسلي ۾ چائنيز ڪمپنين جي ڪارڪردگي تي به نظر رکي وڃي هڪ ٻئي سوال جي جواب ۾ هن چيو ته جي يو سموري صوبي ۾ مارچ ڪري سگهي ٿي ۽ انهن کي هر ضلعي ۾ قانوني طور تي اجازت وٺڻي پوندي اسان به انتظاميا جي اجازت کان پوءِ جلسو ڪيو.

 

جمهوريت بچائڻ لاءِ حڪومت ۽ عمران خان کي وڃڻو پوندو: بلاول زرداري

راولپنڊي (ويب ڊيسڪ) پ پ چيئرمين بلاول ڀٽو زرداري چيو آهي ته حڪومت اپوزيشن پارٽين لاءِ روڊن تي احتجاج کانسواءِ ٻيو ڪو رستو ناهي ڇڏيو، جمهوريت بچائڻ لاءِ حڪومت ۽ عمران خان کي وڃڻو پوندو. راولپنڊي جي اڊيالا جيل ۾ پيءُ آصف علي زرداري سان ملاقات کانپوءِ صحافين سان ڳالهائيندي بلاول ڀٽو زرداري اڳوڻي صدر کي طبي سهولتون فراهم نه ڪرڻ تي هڪ ڀيرو ٻيهر حڪمرانن تي تنقيد ڪئي ۽ کين توهين عدالت جو ذميوار قرار ڏنو. هن چيو محسوس ٿي رهيو آهي ته توهين عدالت جو قانون رڳو جمهوري قوتن لاءِ آهي، غير جمهوري قوتون آئين ۽ قانون جي ڀڃڪڙي ڪنديون رهن ٿيون پر اسان جون عدالتون انهن خلاف ڪجهه نه ٿيون ڪن، عدالت جيل اختيارين کي حڪم ڏنو آهي ته آصف علي زرداري کي ڊاڪٽرن جي هدايت موجب طبي سهولتون ڏنيون وڃن پر افسوس جو ان تي عمل نه پيو ڪيو وڃي. بلاول ڀٽو زرداري الزام هڻندي چيو ته حڪومت آصف زرداري جي صحت کي استعمال ڪري پ پ تي دٻاءُ وجهڻ چاهي ٿي، آصف زرداري اڳ به ڪو الزام ثابت ٿيڻ بنا ساڍا 11 سال جيل ڪاٽيو، هاڻ به ڪاٽي رهيو آهي، پ پ اڳ به ظالمن خلاف ڪنڌ نه جهڪايو ۽ اڄ به نه جهڪائيندي. سندس چوڻ هو ته 18 آڪٽوبر تي ٿيندڙ شاندار جلسي ۾ عوام پ پ جي ڀرپور حمايت جو اعلان ڪيو ۽ ايندڙ جلسو 23 آڪٽوبر تي ٿرپارڪر ۾ ڪنداسين، پاڪستان جي عوام کي پيغام پهچائينداسين ته نالائق ۽ نااهل حڪومت کي گهر موڪلڻ چاهيون ٿا. پ پ چيئرمين وڌيڪ چيو ته بدقسمتي سان هيءَ حڪومت سياسي آهي ئي نه، هيءَ ڪٺ پتلي آهي ۽ کين اندازو ناهي ته پاڪستان جهڙي ملڪ کي هلائڻ هڪ ڪرڪيٽ ميچ ناهي، حڪومت جي ذميواري آهي ته موجوده صورتحال جو سياسي حل ڪڍي پر لڳي نٿو ته انهن وٽ ڪو حل آهي. بلاول ڀٽو زرداري چيو ته پ پ سدائين آمريت جو مقابلو ڪيو آهي ۽ اڄ به جيڪڏهن مارشل لا جي صورتحال پيدا ٿي ته اهو ئي ڪردار ادا ڪنداسين، سڀني سياسي پارٽين کي پيغام ڏنو آهي ته اسان کي اهڙي سياست ڪرڻ گهرجي، جنهن سان ٽين قوت يا آمريت کي وري ملڪ تي اچڻ جو موقعو نه ملي، جمهوريت ڀلي ڪيتري به ڀَڳل ٽُٽل هجي پر ڪمزور ترين جمهوريت به آمريت کان ڪيترائي ڀيرا بهتر آهي.

 

ن ليگ نئون آرڊيننس رد ڪري ڇڏيو، پي ايم ڊي سي ختم ڪرڻ واري قدم جي مذمت

اسلام آباد(ويب ڊيسڪ) مسلم ليگ ن جي ترجمان مريم اورنگزيب چيو آهي ته قوم مري رهي آهي ۽ حڪومت اصل مسئلن تان ڌيان هٽائڻ جي لاءِ ڊراما ڪري رهي آهي. پاڪستان مسلم ليگ ن جي ترجمان مريم اورنگزيب پي ايم ڊِ سي ختم ڪرڻ واري قدم جي مذمت ڪندي نئون آرڊيننس رد ڪري ڇڏيو،  سندس چوڻ هو ته آچر جي ڏنهن چور جيان پاڪستان ميڊيڪل اينڊ ڊينٽل ڪونسل (پي ايم ڊي سي) ختم ڪئي وئي، پارليمان جي بدران ايوان کي آرڊيننس جاري ڪرڻ لاءِ رٻڙ اسٽيمپ طور استعمال ڪرڻ مذمت جوڳو آهي، مينڊيٽ چور حڪومت فسطائي سوچ رکي ٿي، نه ته پارليمان جو رستو اختيار ڪيو وڃي ها. ن ليگ جي ترجمان چيو ته قوم مري رهي آهي ۽ حڪومت اصل مسئلن تان ڌيان هٽائڻ جي لاءِ ڊراما ڪري رهي آهي، نالائق، نااهل، چور ۽ ڪوڙي حڪومت “ ڊائيورٽ اينڊ رول“ تي هلي رهي آهي، مفت دوا، ٽيسٽ ختم، هاڻ اسپتالن کي خانگائڻ سان غريب جي زندگي سان کيڏڻ جي سازش ٿي رهي آهي، ڊينگي 70 هزار کان وڌيڪ ماڻهن تي حملو ڪري چڪو، ڪيترائي  ان مرض ۾ مري چڪا، عمران خان کي ميڊيا جو ڳلو دٻائڻ جي فڪر آهي، پوليو پروگرام ۾ تاريخي ڪرپشن تي عمران خان جون اکيون نيب جيان بند آهن. مريم اورنگزيب جو چوڻ هو ته چورن جيان آءِ ايم ايف سان عاهدو ڪري قوم تي ظالماڻو ٽيڪس لڳايو ويندو آهي، چورن جيان جي آءِ ڊي سي جي ذريعي 300 ارب معاف ڪرايا ويندا آهن، مهانگائي 3 کان 13 سيڪڙو ٿي وئي، هڪ سال ۾ تاريخي 11000 ارب کان وڌيڪ قرض، قومي ترقي جي شرح 5.8 کان 2.4 ٿي وئي.

 

سنڌ اسيمبلي۾ چشما جهلم لنڪ ڪينال تي بجلي گهر اڏڻ خلاف مزمتي ٺهراءُ اڪثريت راءِ سان منظور

ڪراچي (اين اين آءِ) سنڌ اسيمبلي، چشما جهلم لنڪ ڪينال تي بجلي گهر اڏڻ جي خلاف مزمتي ٺهراءُ اڪثريت راءِ سان منظور ڪري ورتو، پ پ جي عزيز جوڻيجو ٺهراءُ پيش ڪيو هو، ٺهراءَ ۾ چيو ويو ته سنڌ جي لکين ايڪڙ زمين سمنڊ ڳڙڪائي چڪو آهي، وڌيڪ اهڙي قسم جا منصوبا صوبي جي پاڻي جي حق تي ڌاڙي جي برابر آهن، اجلاس ۾ پي ٽِي آءِ کي ٺهراءُ پيش ڪرڻ ۽ خيالن جي اظهار جي اجازت نه ملڻ تي مخالف پارٽي سخت احتجاج ڪيو ۽ چيو ته هن اهم معاملي تي اسان جو اصولي موقف آهي، جڏهن ته اپوزيشن کي ڳالهائڻ جي اجازت ڏني وڃي، سومر تي سنڌ اسيمبلي جي اجلاس ۾ پ پ جي ميمبرن چشما جهلم لنڪ ڪينال تي بجلي گهر اڏجڻ جي خلاف احتجاج ڪيو ۽ مزمتي ٺهراءُ پيش ڪيو جيڪو اڪثريت راءِ سان منظور ڪيو ويو. سيد مراد علي شاهه چيو ته ارسا چشما جهلم لنڪ ڪينال تي هائڊرو پاور پلانٽ جي منظوري ڏني آهي، ارسا ۾ وفاقي حڪومت ۽ وفاقي ميمبر جي مقرري ڪئي پئي وڃي هي سنڌ جو سڀ کان اهم مسئلو آهي، وزيراعظم اسان جي ته نٿو ٻڌي، اميد آهي ته وزيراعظم انهن جي ٻڌندو هجي، وفاقي وزيرن کي چيو وڃي ته اهي ارسا ۾ وفاق کان ارسا جو نمائندو سنڌ مان کڻڻ، 18 آڪٽومبر تي وزيراعظم کي خط لکيو جڏهن ته وزيراعظم خط جو جواب نه ڏنو، هن چيو ته هي اسان جي زخمن تي لوڻ ٻرڪڻ جي برابر آهي، هر ڀيري رد ٿيل ڪالاباغ ڊيم منصوبو آندو ٿو وڃي، سنڌ سان ناانصافي نه ٿيڻ گهرجي، هن چيو ته ارسا ۾ وفاق جو نمائندو سنڌ مان هئڻ گهرجي، وزيراعظم مون سان ڳالهه نٿو ڪري، مان وزيراعظم کي هڪ ٻيو خط لکندس، مراد علي شاهه چيو ته ارسا ۾ وفاق جو نمائندو سنڌ مان نه هئڻ تي وفاقي وزير احتجاج ۽ واڪ آئوٽ ڪن، جيڪڏهن سنڌ جو پاڻي يا حق نه ملندو ته ڪا به ڪمپرو مائيز نه ٿيندي، ڳالهه سڌي آهي ڪو به ٺهراءَ جي حمايت نٿو ڪري نه ڪري، اڄ سڌي ڳالهه ٿيڻ گهرجي، سنڌ ڪابينا جو اڱاري تي اجلاس آهي، جيڪڏهن سنڌ جو نمائندو مقرر نه ٿيندو ته اها ذميواري ان تي لاڳو ٿيندي، فردوس شميم نقوي مزمتي ٺهراءَ تي خيالن جو اظهار ڪندي چيو ته هن معاملي تي اڄ اسان ايوان ۾ ٺهراءُ جمع ڪرائي چڪا آهيون، اڄ وزيراعظم اڳيان اها ڳالهه رکي آهي مون ٺهراءُ وقت تي ۽ مثبت رخ ۾ ڏنو آهي، ان جو مقصد سنڌ جو پاڻي گهٽ نه هئڻ گهرجي، هن چيو ته مان سنڌ جي مٽي جو پٽ آهيان، وزيراعظم به سنڌ جو پاڻي گهٽ هئڻ تي اين او اسي واپس وٺڻ لاءِ چيو آهي اسان سنڌ کي مطئمن ڪرڻ لاءِ چيو آهي، جيڪڏهن سنڌ جي حيثيت متاثر نه ٿئي جتي جتي موقعو ملي بجلي ٺاهي وڃي، هن چيو ته سنڌ جي شهرن تي ڪو فرق نه پوي پنجاب جي اسڪيم تي مخالفت نه ڪنداسين، صوبي صوبي جي ڳالهه نه ڪئي وڃي، هن چيو ته ٺٽو، بدين ۽ ڪوٽڙي ۾ پاڻي نه پهچي هي اشو آهي، هن سوال ڪيو ته ڇا سنڌ ۾ پاڻي چوري نٿو ٿئي، وفاق ۽ سنڌ ٻنهي حڪومتن کان واعدو وٺڻ چاهيان ٿو ته جيڪي ماڻهو سنئون سڌو پاڻي پين ٿا، منڇر ڌنڌ اڄ خراب ٿي چڪي آهي، پاڻي جي ورڇ کي بهتر بڻائينداسين، اسان پڇڙي وارا آهيون، وفاق جو نمائندو سنڌ جو هجي اسان کي ڪو اعتراض نه آهي، ڇو ته اسان آخر ۾ آهيون، اسان حقن جي لتاڙ قبول نه ڪنداسين، سنڌ اسيمبلي ۾ ٺهراءُ پاس ٿيڻ وقت اپوزيشن ميمبرن سخت کوڙ ۽ احتجاج ڪيو ته کين ڳالهائڻ جو موقعو ڏنو وڃي، جڏهن ته ايوان مزمتي ٺهراءُ اڪثريت سان منظور ڪري ورتو جنهن کانپوءِ ڊپٽي اسپيڪر اجلاس اڄ اڱاري منجهند 2 وڳي تائين ملتوي ڪري ڇڏيو.

 

صدر عارف علوي پي ايم ڊي سي آرڊيننس تي صحيح ڪري ڇڏي، صحت وزارت ڪائونسل تحليل ڪري ڇڏي، آفيسون بند

اسلام آباد (بيورو رپورٽ) صدر عارف علوي پاڪستان ميڊيڪل اينڊ ڊينٽل ڪميشن آرڊيننس تي صحيحون ڪري ڇڏيون آهن، آرڊيننس لاڳو ٿيڻ کان فورن پوءِ صحت واري وزارت پاڪستان ميڊيڪل اينڊ ڊينٽل ڪائونسل کي تحليل ڪندي سندس آفيس هڪ هفتي لاءِ بند ڪري ڇڏي، صحت واري وزارت جي ترجمان پاران جاري ڪيل وضاحت ۾ چيو ويو آهي ته صدر عارف علوي پاران آرڊيننس تي صحيحون ڪرڻ کان پوءِ پي ايم ڊي سي جي انتظامي مامرن جو نئين سر جائزو وٺڻ لاءِ آفيس هڪ هفتي لاءِ بند ڪئي وئي آهي، ترجمان جي پڌرائي ۾ وڌيڪ وضاحت ڪندي چيو ويو آهي ته حڪومت پاران آرڊيننس آڻڻ جو مطلب لائسنس جاري ڪرڻ ۽ رجسٽريشن متعلق اهم رڪارڊ کي محفوظ ڪرڻ آهي، جڏهن ته ميڊيڪل ۽ ڊينٽل جي شعبن ۾ داخلائن ۾ ڪا به رنڊڪ نه ايندي.

 

باب الاسلام سنڌ جي تاريخي اهميت آهي، سنڌ جو عوام چوپٽ راڄ کان بيزار آهي: فردوس عاشق اعواڻ

اسلام آباد (اين اين آءِ) وزيراعظم جي سڌ سماءَ جي خاص مددگار فردوس عاشق اعواڻ چيو آهي ته سنڌ جو عوام چوپٽ راڄ کان بيزار آهي، وزيراعظم عمران خان ڪراچي جي عوام جي ڏکن تي مرحم ۽ شهر جي روشنين کي وڌيڪ بحال ڪرڻ جو پڪو پهه ڪيو آهي، سومر تي وزيراعظم عمران خان جي ڪراچي جي دوري جي حوالي سان ٽوئيٽر تي هن چيو ته ڪراچي پاڪستان جو معاشي مرڪز آهي، هن چيو ته وزيراعظم ايم ڪيو ايم ۽  جي ڊي اي جي اڳواڻن سان ملي اصلاح احوال جي راهه هموار ڪندو، هن چيو ته باب الاسلام سنڌ جي تاريخي اهميت آهي، ان کي معاشي طور تي مستحڪم ڪرڻ اسان جي پهرين ترجيح آهي.

 

نيب معيشت ۾ بهتري ۽ واپارين جي شڪايتن جي ازالي لاءِ ڪميٽي قائم ڪري ڇڏي

اسلام آباد(ويب ڊيسڪ) نيب معيشت ۾ بهتري ۽ واپارين جي شڪايتن جي ازالي لاءِ ڪميٽي قائم ڪري ڇڏي. نيب طرفان جاري پڌرائي موجب ملڪ ۾ معيشت ۾ بهتري ۽ واپاري برادري جي شڪايتن جي ازالي جي 6 رڪني ڪميٽي قائم ڪرڻ جو فيصلو ڪيو ويو آهي، ڪميٽي ۾ افتخار علي ملڪ، دارو خان اچڪزئي، عاطف باجوه انجم نثار، سڪندر مصطفيٰ ۽ جميل يوسف شامل ٿيندا. ڪميٽي واپارين جون شڪايتون ۽ سفارشون نيب چيئرمين کي ڏيندي، ڪميٽي جون سفارشون نيب چيئرمين جي سربراهي ۾ 3 رڪني ڪميٽي کي پيش ڪئ يويندي، جتي ڪميٽي جي هر سفارش جو گهرائي سان جائزو ورتو ويندو، جيڪا ريفرنس داخل ٿي چڪي ان جي باري ۾ شڪايتون پذيرائي جوڳيون نه هونديون.

 

ميانوالي: ايمبولينس ۽ ٽرالر جي وچ ۾ ٽڪر، ٻارڙن ۽ عورتن سميت 9 ڄڻا فوت

ميانوالي(ويب ڊيسڪ) ملتان روڊ تي ايمبولينس ۽ ٽرالر جي وچ ۾ ٽڪر سبب 9 ڄڻا فوت ٿي ويا. تفصيل موجب ميانوالي جي علائقي هيڊ پڪه جي ڀرسان ملتان روڊ تي ايمبولينس ۽ ٽرالر پاڻ ۾  ٽڪرائجي پيا، ٽڪر جي فوري بعد ايمبولينس  ۾ لڳل گيس سلنڊر ڦاٽي پيو جنهن سبب باهه لڳي پئي. حادثي جو شڪار ايمبولينس مريض کي بکر کان راولپنڊي کڻي وڃي رهيا هئا ۽ ان ۾ 3 ٻار، 3 عورتون ۽ 3 مرد سوار هئا.  حادثي جي نتيجي ۾ ايمبولينس ۾ سوار ڪو به شخص نه بچي سگهيو، فوت ٿيلن جي سڃاڻپ ڊرائيور غلام حسين، محمد نديم، تاج بي بي، مريدان بيبي، صبا، جويريا، انشال ۽ ايان جي نالن سان ٿي.

 

پاڪستان ۾ هڪ ڪروڙ ماڻهو هڏا ڀرڻ واري بيماري ۾ مبتلا، 70 لک عورتون شامل

حيدرآباد (م.ڊ) پاڪستان ۾ هڪ ڪروڙ کان وڌيڪ ماڻهو هڏن جي ڀرڻ واري بيماري ۾ مبتلا آهن، عورتون هڏن جي ڀرڻ جي بيماري جو وڌيڪ شڪار آهن، 70 لک عورتن کي هڏن جي ڀرڻ واري بيماري لاحق آهي، 50 سالن کان مٿي ڄمار وارا مرد ۽ عورتون ڄاڻايل بيماري جو شڪار ٿين ٿيون. رپورٽ موجب سڄي دنيا ۾ هڏن جي ڀرڻ جو عالمي ڏينهن ملهايو پيو وڃي. عالمي ڏينهن جي موقعي تي دنيا سميت پاڪستان ۽ سنڌ ۾ به هڏن جي ڀرڻ واري بيماري بابت ماڻهن کي آگاهي ڏني ويندي. اهو ڏينهن دنيا جي 90 ملڪن ۾ ملهايو ويندو آهي. سڀ کان پهرين اهو ڏينهن 1996ع ۾ برطانيه جي اوسٽيوپروسس سوسائٽي طرفان ملهايو ويو. بعد 1997ع کان يورپي ملڪن ان تائيد ڪئي ۽ 1999ع کان ڊبليو ايڇ او پڻ ان ڏينهن کي ملهائڻ شروع ڪيو. ماهرن جو چوڻ آهي ته هن بيماري جي ڪري مرد ۽ عورت ٻئي متاثر ٿين ٿا جڏهن ته مردن جي مقابلي ۾ عورتون ان بيماري جو وڌيڪ شڪار ٿين ٿيون. هڪ اندازي موجب 50 سالن کان مٿي ڄمار وارين عورتن ۾ لڳ ڀڳ 50 سيڪڙو عورتن ۾ ڪرنگهي جي هڏين، دڏن ۽ ڪرائي ۾ فريڪچر ٿئي ٿو. آمريڪا جهڙي ملڪ ۾ به هر سال 7 لک ماڻهو ڪرنگهي جي هڏي ۾ فريڪچر، اڍائي لک ماڻهو دڏن جي فريڪچر ۽ اڍائي لک ماڻهو ڪرائي جي فريڪچر ۾ مبتلا ٿين ٿا. پاڪستان ۾ لڳ ڀڳ هڪ ڪروڙ کان وڌيڪ ماڻهو هڏن جي ڀرڻ واري بيماري ۾ مبتلا آهن جن ۾ 70 لک کان وڌيڪ عورتون ۽ اڍائي لک کان وڌيڪ مرد شامل آهن. ڊاڪٽرن جو چوڻ آهي ته اوسٽيوپروسس يعني هڏن جي ڀرڻ جي بيماري خانداني به ٿئي ٿي جيڪا پنهنجي مائرن مان ٻارن ۾ منتقل ٿيندي آهي. ڪيلشم ۽ وٽامن ڊي جي گهٽتائي هن مرض کي پکيڙي ٿي ڇاڪاڻ ته ڪيلشم هڪ اهڙو جز آهي جنهن ۾ منرل شامل هجي ٿو جيڪو هڏين کي مضبوط ڪرڻ ۾ ڪم اچي ٿو جڏهن ته جسم ۾ وٽامن ڊي جو مقرر مقدار ۾ هجڻ ضروري آهي. ڊاڪٽرن جو چوڻ آهي ته جيڪڏهن جسم ۾ ڪيلشم ۽ وٽامن ڊي جي گهٽتائي هوندي يا جسم ڪيلشم کي کاڌي مان حاصل نه ڪري سگهندو ته ان صورت ۾ هڏين جو ڀرڻ شروع ٿيندو آهي. گهڻا سگريٽ ڇڪڻ، شراب واپرائڻ، ڪينسر، ٽي بي، سنڌن جي سور جهڙيون بيماريون ۽ ڪجهه دوائن جي استعمال سان به هڏن جي ڀرڻ جو سلسلو شروع ٿئي ٿو.