تازيون خبرون
هڪ سال ۾ پيٽروليم شين جي مد ۾ 206 ارب 28 ڪروڙ ٽئڪس اوڳاڙيو ويو: وفاقي سرڪار جو اعتراف - وزيراعظم چيف سيڪريٽري ۽ آئي جي سنڌ ذريعي متبادل نظام هلائڻ چاهي ٿو، ائين ٿيڻ نه ڏينداسين: سنڌ سرڪار - جسٽس (ر) الطاف ابراهيم قريشي وقتي چيف اليڪشن ڪمشنر ٿي ويو - ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو - حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي: عمران خان - وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي: فردوس عاشق - ملڪ رياض جي وارثن ۽ برطانوي حڪومت وچ ۾ نبيري مان مليل رقم سماجي بهبود لاءِ استعمال ڪئي ويندي: شهزاد اڪبر - وڏي وزير جي صدارت ۾ پبلڪ سيفٽي ڪميشن جو اجلاس، آءِ جي سنڌ جي عدم شرڪت تي ڪاوڙ جو اظهار، ٺهراءُ منظور - ڪراچي مان اغوا ٿيل دعا منگي بازياب نه ٿي، سنڌ جي مختلف شهرن ۾ احتجاجي مظاهرا، ريليون - اسلام ڪوٽ: مسافر ڪوچ موٽر سائيڪل کي بچائيندي ڪلٽي، واٽھڙو فوت، 3 عورتن سميت 7 ڄڻا زخمي

Daily Archives: October 5, 2019

مدرسن جي اصلاحات تي پريشان مولانا فضل الرحمان پنهنجي ٻڏندڙ سياست پيو بچائي: عمران خان

اسلام آباد(بيورو) وزيراعظم عمران خان جي صدارت هيٺ ٿيندڙ اجلاس ۾ چيو ويو ته قوم تي مولانا فضل الرحمان جي سياسي مقصد وڌيڪ عيان ٿيڻ گهرجن، هو پنهنجي احتجاج لاءِ هاڻ 27 آڪٽوبر جي تاريخ نه بدلائي. تفصيل موجب وزيراعظم عمران خان جي صدارت هيٺ حڪومتي ۽ پارٽي ترجمانن جي اجلاس جي اندروني ڪهاڻي سامهو اچي وئي آهي. هن اهم اجلاس ۾ مولانا فضل الرحمان ۽ مخالف ڌر جي احتجاج تي به ڳالهه ٻولهه ڪئي وئي. ذريعن موجب اجلاس ۾ وزيراعظم عمران خان جو چوڻ هو ته مولانا فضل الرحمان پنهنجي ٻڏندڙ سياست کي بچائي رهيو آهي. حڪومت مدرسن ۾ ريفارمز آڻي رهي آهي جنهن جي مولانا کي فڪر آهي. وزيراعظم عمران خان جو چوڻ هو ته مدرسن جي اصلاحات تي مولانا وڌيڪ پريشان آهي. مدرسن ۾اصلاحات سان طالب اهڙن سياسي مقصدن جي لاءِ استعمال نه ٿي سگهندا. ذريعن موجب اجلاس ۾ شريڪ ٿيندڙ جو چوڻ هو ته مولانا فضل الرحمان هاڻ 27 آڪٽوبر جي تاريخ نه بدلائي ۽ اسلام آباد اچي وڃي. قوم تي به مولانا جا سياسي مقصد واضح ٿيڻ گهرجن.

 

ڌرڻي کان سواءِ مولانا سان گڏ آهيون، سنڌ حڪومت تي حملي جو ڪوشش ناڪام ويندي: بلاول

اسلام آباد (اين اين آءِ) پ پ چيئرمين بلاول ڀٽو هڪ ڀيرو ٻيهر واضح ڪيو ته ملڪ کي نقصان پهچائيندڙ ڪنهن غير جمهوري احتجاج جو حصو نه ٿينداسين، پ پ پنهنجي جمهوري جدوجهد نه ڇڏيندي، ڪنهن به صورت ۾ سوديبازي لاءِ تيار نه آهيون، مولانا فضل رحمان جي ڪيئن ۽ ڪيتري حد تائين مدد ڪري سگهون ٿا پيپلز پارٽي اجلاس ۾ فيصلو ڪندي، مولانا فضل رحمان 27 آڪٽومبر تي اسلام آباد اچي رهيو آهي اسان جلد ڏکڻ پنجاب ڏانهن رخ ڪنداسين، اسان جمهوري احتجاج ۾ مولانا سان گڏ هونداسين، رڳو ڌرڻي جي معاملي تي اختلاف آهي، هر هڪ ادارو پنهنجي حد ۾ رهي ۽ ڪنهن کي ٻين جي حدن ۾ مداخلت نه ڪرڻ گهرجي، جمعي تي احتساب عدالت ٻاهران صحافين سان ڳالهائيندي هن چيو ته اسان جي بزنس ڪميونٽي ايترو ته پريشان ٿي چڪي آهي جو اها آرمي چيف وٽ هلي وئي، هن چيو ته عمران خان پارليامان کي غير فعال ڪري ڇڏيو آهي، هن چيو ته پ پ اها اڪيلي پارٽي آهي جيڪا سليڪٽرز خلاف جنگ وڙهي رهي آهي، هڪ سال ۾ تبديلي سرڪار ۽ سليڪٽيڊ وزيراعظم ناڪام ٿي چڪو آهي، هن چيو ته عمران خان پنهنجن سياسي مخالفن ايتري قدر جو انهن جي عورتن کي جيلن ۾ موڪلي ڇڏيو آهي، هن چيو ته هڪ ڪروڙ نوڪريون ڏيڻ جو واعدو ڪيو هو پر لکين نوجوانن کي بيروزگار ڪري ڇڏيو آهي، هن چيو ته 50 لک گهر ٺاهي ڏيڻ جو واعدو ڪيو پر لکين گهر ڊاهي پٽ ڪيا ويا آهن، هن چيو ته عوام تي ڏينهون ڏينهن ٽيڪسز جو بار وڌندي رهيو آهي، هن چيو ته سموري اپوزيشن کي خبر آهي ته هي ڌانڌلي واري حڪومت آهي، پ پ پنهنجو اجلاس سڏايو آهي جنهن ۾ فيصلو ڪرڻو آهي ته اسان ڪيئن ۽ ڪيتري حد تائين مولانا صاحب جي مدد ڪري سگهون ٿا، هن چيو ته جيڪڏهن اسان کي مهانگائي کان نجات گهرجي ته عوام کي پ پ جو ساٿ ڏيڻو پوندو، پ پ هميشه مزدور طبقي جو آواز بڻي آهي، مولانا صاحب آزادي مارچ جو فيصلو پنهنجي پارٽي سان صلاح مشورا ڪري ڪيو آهي، هن چيو ته پ پ ۽ ن ليگ جي خواهش آهي ته اسان مخالف پارٽيون گڏجي هڪ جلسو ڪريون، پ پ فيصلو اجلاس کانپوءِ ڪندي، هن چيو ته اسان جي ملڪ ۾ قانون کان هٽي پ پ جي قيادت جا ڪيس راولپنڊي موڪليا وڃن ٿا، هرپاڪستاني شهري جو حق آهي ته جتي ان تي الزام لڳي ان جو ٽرائيل اتي ئي ٿيندو، هن چيو ته حڪومت پاڻ پارليامينٽ کي بند ڪري رهي آهي، اهڙو اسپيڪر آهي جيڪو ٻين ڳالهائڻ نٿو ڏئي، هن چيو ته آءِ ايس آءِ کي اسان جي ڪيس ۾ ملوث نه ڪرڻ گهرجي ها، اسان جو  پهريون جج اهو آهي ن ليگ وارو جج آهي جيڪو پاڻ وڊيو ڪيس ۾ ملوث آهي، هن چيو ته پنڊي ۾ اهڙو ڇا آهي ذوالفقار ڀٽو کي ڦاهي پنڊي ۾ ڏني وئي آهي، آصف زرداري تي به پنڊي ۾ ڪيس ڪيا ويا، بلاول ڀٽو چيو ته گذريل سال کان جيڪو تماشو لڳل آهي اهو توهان جي سامهون آهي، اربين رپين جا قصا ٻڌائڻ کانپوءِ هڪ ريفرنس داخل ٿيو نه ڪو ثبوت آهي نه ئي ڪو ڪيس، رڳو ڏيڍ ڪروڙ رپين جو الزام آهي، بلاول ڀٽو چيو ته آصف زرداري اڳ به بنا ڪنهن ڏوهه جي 11 سال جيل جون سختيون برداشت ڪيون اسان هن جو ظلم به برداشت ڪرڻ لاءِ تيار آهيون پر ڪڏهن به سوديبازي نه ڪنداسين، هڪ سوال جي جواب ۾ هن چيو ته پ پ ڌرڻي کانسواءِ هر سطح تي مولانا سان گڏ هوندي، مولانا جي مارچ جي حمايت بابت فيصلو پارٽي ڪندي، جڏهن ته جيڪڏهن شڪ ٿيو ته مولانا ڪنهن طاقت جي اشاري تي آهي ته پنهنجي حمايت واپس وٺنداسين، هن چيو ته ڪارڪنن چون ٿا ته حڪومت مان اسان جي جند ڪڏهن ڇڏائيندا، هر جمهوري احتجاج جو ساٿ ڏينداسين پر اهڙي قدم جي حمايت نه ڪنداسين جنهن سان ملڪ کي نقصان ٿئي، احتجاجي تحريڪ ۾ سنڌ حڪومت کي خطري بابت سوال تي بلاول ڀٽو چيو ته هي سنڌ حڪومت تي حملو ڪرڻ جي ڪوشش ڪندا پر ڪامياب نٿا ٿي سگهن. اڳوڻو صدر آصف زرداري مولانا فضل رحمان جي آزادي مارچ جو حامي نڪري پيو، آصف زرداري دعائون به ڪيون، جمعي تي اسلام آباد جي احتساب عدالت ٻاهران ميڊيا سان ڳالهائيندي آصف زرداري کان صحافي سوال ڪيو ته مولانا فضل رحمان آزادي مارچ جو اعلان ڪيو آهي توهان ڇا چوندا،اڳوڻي صدر چيو ته اسان جون دعائون مولانا فضل رحمان سان گڏ آهن.

 

 

اويس مظفر، ثاقب سومرو ۽ بابر غوري جو رڪارڊ برطانيه حوالي

ڪراچي (م.ڊ) نيب اختيارين ڪرپشن جي ڪيس ۾ گهربل لنڊن ۾ موجود پيپلز پارٽي جي اڳوڻن وزيرن اويس مظفر ۽ ايم ڪيو ايم جي اڳوڻي ايم اين اي بابر غوري جو رڪارڊ برطانوي اختيارين جي حوالي ڪري ڇڏيو آهي. رپورٽ موجب برطانوي حڪومت گذريل هفتي نيب اختيارين کان عمران فاروق قتل ڪيس، ٽڊاپ ڪيس ۽ ايم ڪيو ايم مني لانڊرنگ ڪيس جي حوالي سان ملاقات ڪري رڪارڊ ڏيڻ جي درخواست ڪئي هئي ۽ لنڊن ۾ موجود جوابدارن جو رڪارڊ به گهريو هو. ان لاءِ نيب اختيارين ڪرپشن جي ڪيس ۾ گهربل جوابدارن جو رڪارڊ برطانوي اختيارين حوالي ڪري ڇڏيو. ذريعن جو چوڻ آهي ته اڳوڻي مڪاني کاتن واري وزير اويس مظفر ٽپي،  ۽ اڳوڻي ايڊمنسٽريٽرثاقب سومرو جي ڪيس جو رڪارڊ فراهم ڪيو ويو آهي جڏهن ته نيب اختيارين برطانوي اختيارين کي اڳوڻي ايم ڪيو ايم سينيٽر بابر غوري جي جاچ کان به آگاهه ڪيو.

 

بدقسمتي سان ايڪسپورٽرز جي ڪم ۾ رنڊڪ وڌي پئي وڃي: سپريم ڪورٽ

اسلام آباد (اين اين آءِ) پنجاب حڪومت کي اٽو ايسڪپورٽ ڪندڙ فلور ملز کي بينڪ گارنٽي واپس ڪرڻ جو حڪم ڪري، بدقسمتي سان ايڪسپورٽرز جي ڪم ۾ رنڊڪ وڌي پئي وڃي، ايڪسپورٽ متاثر ٿيڻ سان ملڪ جو واپاري حجم گهٽ ٿيندو، واپاري حجم گهٽ ٿيڻ ملڪ جي معيشت لاءِ نقصان ڏيندڙ آهي، ڪاروباري طبقي کي سهولتون ڏنيون وڃن ته جيئن ڏکيائيون پيدا نه ٿي سگهن، سپريم ڪورٽ فلور ملز کي بينڪ گارنٽي واپس ڪرڻ جي حڪم خلاف پنجاب حڪومت جي اپيل رد ڪري ڇڏي، جمعي تي جسٽس مشير عالم جي سربراهي ۾ بينچ ڪيس جي ٻڌڻي ڪئي، فلور ملز جي وڪيل چيو ته بينڪ گارنٽي ڊالر ۾ جمع ڪرائي وئي هئي، بينڪ گارنٽي جي مقامي ڪرنسي ۾ تبديلي جي تصديق اسٽيٽ بينڪ به ڪئي، پنجاب جي ڊائريڪٽر فوڊ چيو ته فلور ملز خوراڪ کاتي کي مطمئن نه ڪري سگهيون، جسٽس قاضي فائز عيسيٰ چيو ته توهان پنهنجي مطمئن ٿيڻ لاءِ ڪهڙا دستاويز گهريا جيڪي ناهن مليا، خبر ناهي توهان ڪهڙي قسم جو اطمينان چاهيو ٿا، جسٽس مشير عالم چيو ته هڪ پاسي چئو ٿا ته ڪاروباري طبقي کي سهولتون ڏنيون وينديون، ٻئي پاسي ڪاروباري ماڻهن لاءِ ڏکيائيون پيدا ڪيون پيون وڃن.

 

مولانا کي چڙهائي ڪرڻي آهي ته ايل او سي ۽ ڀارت تي ڪري، بلاول ٻڌندڙ سياست جي زميواري پنهنجي والد ۽ پڦي جي ڪرپشن تي وجهي : فردوس عاشق

اسلام آباد (اين اين آءِ)فردوس عاشق اعواڻ چيو آهي ته بلاول ڀٽو جي ادارن بابت غير ذميواراڻي ڳالهه ٻولهه جي مزمت ڪريون ٿا، بلاول صاحب پنهنجي ٻڏندڙ سياست جو زميواري پنهنجي والد ۽ پڦي جي ڪرپشن کي قرار ڏئي، فردوس عاشق اعواڻ اها ڳالهه ٽوئيٽر تي جاري ڪيل بيان ۾ ڪئي، بلاول جا غير زميواراڻا بيان ثبوت آهي ته ڪرپشن ڪيسن ۾ ان وٽ ڪو ئي قانوني دفاع موجود نه آهي، هن پ پ چيئرمين بلاول ڀٽو کي مخاطب ٿيندي چيو ته ادارن کي تڪراري نه بڻايو، اسان جا قومي سلامتي جا ادارا ملڪي دفاع جا ضامن آهن، دهشتگردي خلاف جنگ ۽ امن قائم ڪرڻ لاءِ انهن قربانيون ڏنيون، توهان کي عوام جو نه پر لٽليل دولت هٿن مان نڪرڻ جو ڏک آهي  وزيراعظم جي سڌ سماءِ بابت مددگار فردوس عاشق اعواڻ چيو آهي ته مولانا صاحب کي ملڪ، عوام جو نه پر پنهنجي ذات جو فڪر آهي، کيس چڙهائي ڪرڻي آهي ته ايل او سي ۽ ڀارتي ڪري پر هو اسلام آباد تي چڙهائي تي ضد ڪري رهيو آهي، هڪ انٽريو ۾ هن چيو ته سڄي قوم ڪشميرين جو آواز بڻيل آهي، فردوس عاشق اعواڻ چيو ته مولانا صاحب کي جن پارٽِين تي يقين هو اهي منافقت ڪري رهيون آهن، اهي سياسي پارٽيون ان جي ڪلهن تي چڙهي اڳتي وڌن ٿيون، هن چيو ته مدرسي جي معصوم ٻارن کي مولانا صاحب جي سياست جي ور چڙهڻ نه ڏينداسين، هي منافقت جي سياست ۾ هڪٻئي کي دوکو ڏئي رهيا آهن، هڪٻئي کي دوکو ڏئي ذاتي مفادن جو تحفظ چاهين ٿا، اميد آهي ته مولانا صاحب ٻنهي پارٽين جي ارادن کي سمجهي ويندو، ٻئي سياسي پارٽيون پنهنجا مقصد حاصل ڪرڻ چاهيون ٿا، مولانا صاحب جنهن ايجنڊا تي هلي رهيو آهي عوام ساڻس گڏ نه آهي.

 

ڌرڻي جي اعلانيل تاريخ تي نظرثاني ۽ ڪنهن ٻئي ڏينهن احتجاج جو حق استعمال ڪريو: شاهه محمود قريشي جي مولانا کي اپيل

اسلام آباد (اين اين آءِ) پرڏيهي وزير شاهه محمود قريشي مولانا فضل رحمان کي درخواست ڪئي آهي ته هو ڌرڻي جي تاريخ 27 آڪٽومبر تي نظرثاني ڪري ۽ ڪنهن ٻئي ڏينهن احتجاج جو حق استعمال ڪري، شاهه محمود قريشي فيس بڪ تي مختلف خانگي نشرياتي ادارن سان ڳالهه ٻولهه جي وڊيوز شيئر ڪئي جنهن ۾ هن مولانا فضل رحمان کي ان معاملي تي نظرثاني لاءِ ڪيو، پرڏيهي وزير چيو ته 27 آڪٽومبر 1947 تي ڀارتي فورسز سرينگر تي چڙهائي ڪئي ۽ والاريل ڪشمير تي ناجائز قبضو ڪيو، هر سال ڪشميري قوم هي ڏينهن ڪاري ڏينهن طور ملهائي ٿي، هن چيو ته 2 ڏينهن  اڳ ڪشمير سيل ۾ اجلاس ٿيو جنهن ۾ آزاد ڪشمير جي وزيراعظم سميت اهم اڳواڻ موجود هئا ۽ فيصلو ڪيو ويو هو ته وزيراعظم عمران خان کي گذارش ڪنداسين ته هن سال 27 آڪٽومبر کي ڪاري ڏينهن طور ملهايو وڃي، هن چيو ته مولانا فضل رحمان ڪشمير ڪميٽي جو چيئرمين رهيو آهي، هو ڳالهين کي سمجهي ٿو، احتجاج سندس جمهوري حق آهي ۽ هو فيصلن ۾ آزاد آهي پر منهنجي کيس درخواست آهي ته 27 آڪٽومبر جو ڏينهن احتجاج لاءِ مناسب نه آهي ان تي نظرثاني ڪري، پرڏيهي وزير چيو ته هي ڏينهن ڪشميرين ۽ ڪشمير ڪاز سان منسوب آهي جيڪڏهن ان سان ڪجهه ٻيو منسوب ڪنداسين ته ڀارت جي موقف کي هٿي ملندي ۽ اهو پاڪستان خلاف طاقتن جي هٿن ۾ کيڏڻ جي برابر ٿيندو، مولانا فضل رحمان سان مخاطب ٿيندي هن چيو ته توهان پنهنجو ڌرڻو به چاهيو ٿا ته ان جي تاريخ تي نظرٿاني ڪريو ۽ اها ڳالهه به حقيقت تي ٻڌل آهي ته ان جي ساٿين ۾ مڪمل طور تي اتفاق نه آهي، هڪ پاڪستاني طور منهنجي کيس گذارش آهي ته احتجاج تي نظرثاني ڪري، ڇو ته ان سان ڪشمير ڪاز کي هٿي نه ملندي پر نقصان ٿيندو، هن چيو ته ڪشمير سيل جي گڏيل فيصلي سان وزيراعظم عمران خان کي سفارش موڪلي رهيا آهيون ۽ تجويز ڏئي رهيا آهيون ته 27 آڪٽومبر تي سڄي پاڪستان ۾ ڪارو ڏينهن ملهايو وڃي ۽ ڀارت پاران ناجائز قبضي جي خلاف آواز اٿاريو وڃي.

 

واپاري برادري وزير اعظم جي شڪايت انهن سان ڪري رهيو آهي جن پاڻ هن کي وزير اعظم بڻايو: آصف علي زرداري

اسلام آباد (اين اين آءِ) اڳوڻي صدر آصف زرداري چيو آهي ته ڪاروباري طبقو عمران خان جي شڪايت انهن سان ڪري رهيو جن کيس وزيراعظم بڻايو، جمعي تي احتساب عدالت ۾ پيش ٿيڻ جي موقعي تي آصف زرداري صحافين سان غير رسمي ڳالهه ٻولهه ڪئي ۽ مولانا فضل رحمان جي آزادي مارچ ۽ تاجرن جي آرمي چيف سان ملاقات بابت ڳالهه ڪئي، ان دوران صحافي سوال ڪيو ته مولانا فضل رحمان آزادي مارچ ۾ ڪامياب ٿيندو ان تي آصف زرداري جواب ڏنو ته اسان جون دعائون ان سان گڏ آهن، اسان ان جي حمايت ڪري رهيا آهيون، تاجر برادري جي آرمي چيف سان ملاقات تي ڳالهائيندي چيو ته ڪاروباري طبقو آرمي چيف سان ملاقات ۾ روئي رهيو آهي، آصف زرداري چيو ته ڪاروباري برادري وزيراعظم جي شڪايت ان سان ڪري رهي آهي جن کيس وزيراعظم بڻايو، جڏهن ان کان سوال ڪيو ويو ته نيب جي چيئرمين جي مقرري تي پڇتاءُ ٿي رهيو آهي ان تي اڳوڻي صدر جواب ڏنو ته شاهد خاقان عباسي نيب چيئرمين جي مقرري تي معافي وٺي چڪو آهي، ڳالهه ٻولهه دوران آصف زرداري کان صحافي سوال ڪيو ته ٻڌو آهي ته اسٽبلشمينٽ سان ڳالهه ٻولهه ٿي آهي ته معافي تلافي ڪئي وڃي جنهن تي اڳوڻي صدر چيو ته معافي اهي گهرندا، هن چيو ته مولانا منهنجو دوست آهي پر سياست چيئرمين بلاول ڀٽو کي ڪرڻي آهي، مولانا فضل رحمان جي پنهنجي پارٽي ۽ سياست آهي، اسان جي دوستي هميشه رهندي.

 

 

مولانا ڊگهي عرصي لاءِ اسلام آباد ۾ ويهڻ پيو اچي، کيس اهڙو ويهاربو جو هو ڪڏهن اُٿي ڪو نه سگهندوۡ شيخ رشيد/فيصل واوڊا

ڪراچي(ويب ڊيسڪ) پاڪستان تحريڪ انصاف جي اڳواڻ ۽ آبي وسيلن واري وفاقي وزير فيصل واوڊا جو چوڻ آهي ته مولانا صاحب چوي ٿو ته هو ڊگهي عرصي لاءِ اسلام آباد ۾ ويهڻ پيو اچي، اسان هن کي اهڙو ويهارينداسين جو هو ٻيهي اُٿي ئي ڪو نه سگهندو. ڪراچي ۾ ريلوي واري وفاقي وزير شيخ رشيد جي سان گڏ پريس ڪانفرنس ڪندي فيصل واوڊا جو چوڻ هو ته حڪومت کي مولانا فضل الرحمان جو بي صبري سان انتظار آهي. سندس چوڻ هو ته ڌرڻي وارن جي لاءِ کاڌو ۽ ڪنٽينر جو بندوبست ڪرڻ کان پهرين مولانا صاحب جي لاءِ باٿ روم جو انتظام ضروري آهي، حڪومت اڊيالا جيل ۽ اٽڪ جيل ۾ ايڪسرسائز مشين رکي رهي آهي جيئن وزن گهٽ ڪرڻ جو به ڪو بندوبست ٿي وڃي. ان موقعي تي شيخ رشيد جو چوڻ هو ته اسلام آباد مان هليس ته خبرون مليون هيون ته مولانا صاحب راضي ٿي ويو آهي، خبر ناهي ته 24 ڪلاڪن ۾ اهڙو ڇا ٿيندو پر اِهو واضح ٿيو ڪيان ته 27 آڪٽوبر خوش اسلوبي سان گذرندو. هن چيو ته 5 ڄڻن کي وزير اعظم ٻاهر ڪري ڇڏي ته سڄو ڌرڻو ختم ٿي ويندو پر عمران خان ڌرڻو برداشت ڪندو پر هن کي ڇڏيندو نه. ريلوي واري وفاقي وزير جو چوڻ هو ته اڄ زرداري ۽ بلاول جي سياست مختلف آهي ۽ شهباز شريف ۽ نواز شريف جي سياست مختلف آهي، مون کي پورو يقين آهي ته شهباز شريف ان لانگ مارچ جو حصو نه بڻجندو. شيخ رشيخ جو وڌيڪ چوڻ هو ته ملڪ جي معيشت هلي پئي آهي مهانگائي، بلنگ ۽ جيڪو واپاري طبقو ڳالهائي رهيو آهي ان جي عمران خان کي خبر آهي ۽ ان جو نقصان به هن سياست کي ٿي رهيو آهي.

ريلوي واري وفاقي وزير شيخ رشيد احمد دعويٰ ڪئي آهي ته لاهور ۾ جيل مان هڪ صاحبزادي وٽان پڪڙيل موبائل مان زبردست معلومات حاصل ٿي آهي، ڪراچي ۾ ميڊيا سان ڳالهائيندي شيخ رشيد چيو ته مون کي اطلاع هئا ته مولانا فضل الرحمان احتجاج نه ڪرڻ تي راضي هو، 24 ڪلاڪن ۾ ڇا ٿيو سمجهه ۾ نه ٿو اچي، هن چيو ته ڪرپٽ سياستدانن ملڪ کي ڦريو ۽ لٽيو، عمران خان هن ملڪ کي ٻڏڻ کان بچايو آهي، شيخ رشيد چيو ته مون کي پوري اميد آهي ته عمران خان 5 سال پورا ڪندو، عمران خان جي قيادت ۾ حالتون ۽ معيشت بهتر ٿيندي، هن چيو ته صرف 5 ماڻهن کي اين آر او ڏيڻ جو معاملو آهي، جهڙي ڏينهن اين آر او مليو ته سڀ تحريڪون ختم ٿي وينديون، هُن انڪشاف ڪيو ته لاهور جيل ۾ هڪ صاحبزادي وٽان موبائل پڪڙي وئي آهي، عورت وٽان پڪڙيل موبائل مان زبردست انفارميشن حاصل ٿي آهي، جيڪي ماڻهو رابطي ۾ هئا سڀني ماڻهن متعلق موبائل فون رڪارڊ موجود آهي، شيخ رشيد پنهنجي دعويٰ ۾ ڪنهن جو نالو ناهي ورتو پر هن وقت مسلم ليگ ن جي نائب صدر ۽ اڳوڻي وزيراعظم نواز شريف جي صاحبزادي لاهور جي ڪوٽ لکپت جيل ۾ قيد آهي. وفاقي وزير چيو ته اڄ بلاول ۽ زرداري جي سياست مختلف ۽ نواز شريف و شهباز جي سياست مختلف آهي، ن ليگ جا ٻه ٽڪرا ٿي چڪا آهن.

 

پرڏيهي فنڊنگ ڪيس جي ٻڌڻي روزاني جي بنياد تي هلائي وڃي: مريم اورنگزيب

اسلام آباد (اين اين آءِ) ن ليگ جي ترجمان مريم اورنگزيب چيو آهي ته ن ليگ چيف اليڪشن ڪمشنر کي خط لکي ڇڏيو آهي، فارين فنڊنگ ڪيس جي روزانو ٻڌڻي ڪئي وڃي، هڪ بيان ۾ مريم اورنگزيب اسٽيٽ بينڪ جو ڊيٽا، ڳجها اڪائونٽ، ٻاهرين ملڪن مان اربين رپين جي غير قانوني رقم جو تفصيل جاري ڪرڻ جو مطالبو ڪيو، هن چيو ته ڪيس جي ٻڌڻي اوپن ٿيڻ گهرجي، قوم جو حق آهي ته حقيقتون ڄاڻي، هن چيو ته عمران صاحب پاران سموريون حقيقتن ۽ اليڪشن ڪميشن جي ڪارروائي کي ڳجهو رکڻ جي درخواست ڏني وئي آهي، جيڪڏهن چوري نه ڪئي ته تلاشي ڏيو، هن چيو ته 23 پارٽي جا اڪائونٽ ڳجها ڇو رکيا ويا، هن چيو ته ٻين جو 1970 کان ٽن نسلن ۽ ذاتي ڪاروباري جو حساب ۽ توهان بابت سوال نه ٿئي، جيڪڏهن چوري ناهي ڪئي ته تلاشي ڏيو، هن چيو ته وزيراعظم نواز شريف جي جي آءِ ٽي اڳيان پيش ٿي سگهي ٿو، عمران خان اليڪشن ڪميشن ۾ ڇو نه، هن چيو ته پيسا ڪٿان آيا ۽ ڇو لڪايا ويا تلاشي ڏيو، هن چيو ته ڪنهن پيسا ورتا ۽ ڪنهن جي اڪائونٽ ۾ آيا جيڪڏهن چوري ناهي ڪئي ته تلاشي ڏئي، جعلي ۽ ڳجهي اڪائونٽ مان پيسا ڪٿي استعمال ٿيا، جيڪڏهن چوري ناهي ڪئي ته تلاشي ڏيو، هن چيو ته ان ئي اڪائونٽ مان بني گالا جو محل ٺهيو، عليمه ڀيڻ جي اربين رپين جي ملڪ کان ٻاهر ملڪيت انهن ڳجهن اڪائونٽن مان ٺهي، جيڪڏهن چوري ناهي ڪئي ته تلاشي ڏيو.

 

 

سوشل ميڊيا تي تنقيد ۽ سخت ردعمل، وڏي وزير نوٽيس ورتو، ڊائو يونيورسٽي انتظاميا ڪراچي ۽ سنڌ کي ڌار ڄاڻائڻ وارو تڪراري فارم ويبسائيٽ تائين هٽائي ڇڏيو

 

ڪراچي (اسٽاف رپورٽر) سوشل ميڊيا تي تنقيد توڙي سخت ردعمل ۽ وڏي وزير جي نوٽيس کانپوءِ ڊائو يونيورسٽي انتظاميا ڪراچي ۽ سنڌ کي ڌار ڄاڻائڻ وارو تڪراري فارم ويبسائيٽ تائين هٽائي ڇڏيو. جڏهن ته رجسٽرار پنهنجي ليٽر ۾ نه غلطي جو اعتراف ڪيو ۽ نه ئي معذرت ڪئي. ڊائو يونيورسٽي انتظاميا داخلا جي حوالي سان پنهنجي ويبسائيٽ تي جاري ڪيو هو، جنهن ۾ ڪراچي ۽ سنڌ کي ڌار ڪري الڳ الڳ ڊوميسائيل جا شرط ڄاڻايا ويا. ڊائو يونيورسٽي انتظاميا جي اهڙي عمل تي سوشل ميڊيا تي ڇتي تنقيد ڪئي وئي. وڏي وزير مراد علي شاهه به معاملي جو نوٽيس ورتو، جنهن کانپوءِ يونيورسٽي انتظاميا ڪراچي ۽ سنڌ کي ڌار ڄاڻائڻ وارو داخلا فارم ويبسائيٽ تان هٽائي ڇڏيو. ڊائو يونيورسٽي آف هيلٿ سائنسز جي رجسٽرار پروفيسر امان الله انتظاميا طرفان اهڙي عمل تي معافي يا معذرت نه ڪئي، واڳيل اختيارين کي جاري ڪيل ليٽر ۾ به غلطي جو اعتراف ڪرڻ بدران ڊپلوميٽڪ انداز ۾ فارم هٽائڻ جي ڳالهه ڪئي وئي آهي. ليٽر جي متن ۾ لکيل آهي ته ڄاڻ ۾ آيو آهي ته ويبسائيٽ تي جاري ٿيل داخلا فارم ۾ غيرمناسب ٻولي لکيل آهي، تنهن ڪري اُن داخلا فارم کي ويبسائيٽ تان هٽائي فوري طور رپورٽ ڏني وڃي.