تازيون خبرون
ٽرمپ جي ڪشمير مسئلي تي وري ٽياڪڙي جي آڇ، ڀارت تي ڇڪتاڻ گهٽائڻ لاءِ زور - وفاقي حڪومت جو نجي شخصيتن تائين نيب ڪارروائي جا اختيار ختم ڪرڻ جو فيصلو - سرڪاري ملازم غير قانوني حڪم مڃڻ جو پابند ناهي: سپريم ڪورٽ - ستلج ۽ سنڌو درياهه ۾ پاڻي جي وهڪري ۾ واڌ، 33 ڳوٺ پاڻي هيٺ، لڏ پلاڻ - ڪرنٽ اڪائونٽ خساري ۾ لاٿ وڏي ڪاميابي آهي: عمران خان - صادق سنجراڻي سان اسد قيصر جي ملاقات، ڪشمير مسئلي کي بين الاقوامي سطح تي اٿارڻ لاءِ پارليامينٽ جا وفد موڪلڻ جو فيصلو - شاهه محمود قريشي جو آئيوري پوسٽ، ڊينش ۽ ناروي جي پرڏيهي وزيرن سان ٽيليفون تي رابطو، والاريل ڪشمير جي صورتحال تي ڳالهيون - ڪراچي جو ڪچرو سڀني کي صاف ڪرڻ کپي پر تحريڪ انصاف ۽ ايم ڪيو ايم سياسي پوائنٽ اسڪورنگ ۾ مصروف آهن: سعيد غني - ايف بي آر ٽيڪس  نيٽ کي وسعت ڏيندي هڪ لک امير ٽيڪس نان فائلرز کي نوٽيس جاري ڪري ڇڏيا - هتي ويچارا ٿي اچن ٿا، اهو وقت پري نه آهي جڏهن ڪراچي ۾ قبرن لاءِ جاءِ نه ملندي: سنڌ هاءِ ڪورٽ

Daily Archives: August 8, 2019

ڀارت هٿان وڌيڪ 6 ڪشميري شهيد، پاڪستان جو ڀارت کي منهن ٽوڙ جواب ڏيڻ جو فيصلو

سرينگر / اسلام آباد (اين اين آءِ) پاڪستان ڀارت پاران والاريل ڪشمير جي خاص حيثيت کي ختم ڪرڻ واري فيصلي تي سخت رد عمل ڏيندي ٻه طرفي واپار کي معطل ڪرڻ ۽ سفارتي لاڳاپن کي محدود ڪرڻ جو فيصلو ڪيو آهي، اربع تي وزيراعظم عمران خان جي صدارت هيٺ قومي سلامتي ڪونسل جو اجلاس ٿيو جنهن ۾ شاهه محمود قريشي، پرويز خٽڪ، چيئرمين جوائنٽ چيفس آف اسٽاف ڪميٽي، آرمي چيف جنرل قمر جاويد، نيول چيف سميت ڊي جي آءِ ايس آءِ، ڊي جي آءِ ايس پي آر، سيڪريٽري فارين افيئرز ۽ ٻين شرڪت ڪئي، اجلاس ۾ سول ۽ عسڪري قيادت ڀارت جي حوالي سان اهم فيصلا ڪيا، وزيراعظم هائوس پاران جاري ڪيل بيان موجب قومي سلامتي جي اجلاس ۾ فيصلو ڪيو ويو ته ڀارت سان ٻه طرفي واپار کي معطل ڪيو ويندو، سفارتي لاڳاپا محدود ڪيا ويندا، پڌرائي موجب فيصلو ڪيو ويو ته پاڪ ڀارت لاڳاپن تي نظرثاني ڪئي ويندي، ڀارت سان ٻه طرفي سمورن معاهدن جو نئين سر جائزو ورتو ويندو، اجلاس ۾ فيصلو ڪيو ويو ته ڀارت جي غير قانوني قدمن کي گڏيل قومن اڳيان اٿاريو ويندو، قومي، سياسي ۽ عسڪري قيادت فيصلو ڪيو آهي ته آزادي واري ڏينهن کي ڪشميرين سان ٻڌي جي ڏهاڙي طور ملهايو ويندو ۽ ڪشمير جي مسئلي کي بهتر نموني اجاگر ڪيو ويندو، اجلاس ۾ وزيراعظم سمورن سفارتي چينلز کي ڀارتي ظالماڻو ۽ نسل پرستاڻو رويو، ان جي ارادن ۽ انساني حقن جي ڀڃڪڙين کي اجاگر ڪرڻ جي هدايت ڪئي، وزيراعظم پاڪ فوج کي تيار رهڻ جي به هدايت ڪئي.ٻئي طرف  والاريل ڪشمير ۾ ڀارتي فوجين پاران مظاهرو ڪندڙن تي فائرنگ جي نتيجي ۾ 6 ڄڻا شهيد ۽ هڪ سئو کان وڌيڪ زخمي ٿيا، اربع تي ٽئين ڏينهن به والاريل علائقي ۾ ڪرفيو ۽ ڪشمير جو ٻاهرين دنيا سان رابطو ڪٽيل رهيو، ڪشمير ميڊيا سروس موجب سخت ڪرفيو ۽ وڏي انگ ۾ فوجي لاهڻ جي باوجود ماڻهو ڀارت پاران قلم 370 ۽ 35 اي ختم ڪرڻ خلاف احتجاج ڪرڻ لاءِ سريننگر، پلواما، باره مولا ۽ ٻين علائقن ۾ ٻاهر نڪري آيا، فوجين مظاهرين تي گوليون، پيلٽ گن ۽ ڳوڙها آئيندڙ گيس جو استعمال ڪيو جنهن سبب گهٽ ۾ گهٽ 6 ڄڻا شهيد ۽ سوين زخمي ٿيا، اطلاعن موجب سومر تي خطرناڪ هٿيارن جي استعمال سبب زخمي ٿيل گهٽ ۾ گهٽ 6 ڄڻن کي سرينگر جي اسپتال ۾ آندو ويو هو، برطانوي خابرو اداري پوليس جي حوالي سان تصديق ڪئي آهي ته ڀارتي فوج سرينگر ۾ پيلٽ گن ۽ ڳوڙها آڻيندڙ گيس جو استعمال ڪيو آهي.

 

پاڪستان سنڌ ۽ بنگال ٺاهيو، ڪشمير سانحو به اوڀر پاڪستان جهڙو آهي: آصف زرداري

اسلام آباد (ويب ڊيسڪ) پ پ جي شريڪ چيئرمين آصف علي زرداري آهي چيو ته اسان جي پارٽي ڪشميرين جي قربانين سبب وجود ۾ آئي، ڪشمير سانحو به اوڀر پاڪستان سانحي جهڙو آهي. پارليامينٽ جي گڏيل اجلاس ۾ تقرير ڪندي آصف زرداري چيو ته اوڀر پاڪستان جي جنگ ۾ اسان شڪست کاڌي پر مان ان جي سببن ۾ نٿو وڃڻ چاهيان، ڪشمير سانحو به اوڀر پاڪستان سانحي جهڙو ئي آهي، اڄ قائداعظم محمد علي جناح جي ٻه قومي نظريي کي اهي ڪشميري اڳواڻ به مڃي رهيا آهن جيڪي اڳ انهن ماڻهن سان گڏ هئا، اسان کي تاريخ تي نظر رکڻ گهرجي، اسان ڄاڻون ٿا ته انهن جي سوچ ڪهڙي آهي. سندس چوڻ هو ته سنڌ ۽ بنگال پاڪستان ٺاهيو توهان ڪجهه نه ڪيو، توهان کي ڪڍيو ويو، توهان اتان ڀڄي آيا ۽ اسان پناهه ڏني ۽ توهان اسان جي اکين تي آهيو، دنيا توهان جي نه پر ڪنهن ٻئي جي پوزيشن ڏسي توهان سان ڳالهائي رهي آهي، ڇو ته انهن کي افغانستان ۾ توهان جي نه پر انهن جي ضرورت آهي. اڳوڻي صدر چيو ماڻهو چوندا آهن ته مون تي ابوظهبي ۽ چين وڃڻ جا الزام لڳايا ويندا آهن، آئون ڪشميرين سان ملاقاتون ڪيون آهن، انهن کي سڃاڻيندو آهيان، اهي ماڻهو سياسي طور جيئرا آهن. آصف زرداري پنهنجي ڳالهه جاري رکندي چيو ته ڪشمير جي خاص حيثيت ختم ڪرڻ جو معاملو جيڪڏهن منهنجي اقتدار جي دور ۾ ٿئي ها ته منهنجي پهرين اڏام ابوظهبي، بيجنگ، ماسڪو ۽ پوءِ تهران ڏانهن هجي ها، جتي آئون انهن جي صدرن سان بيهان ها ۽ اتان يڪجهتي وٺندي پاڪستان اچان ها. سندس چوڻ هو ته مون کي ڪشميرين تي فخر آهي، جيڪي پنهنجي شهيدن کي پاڪستان جي جهنڊي ۾ ويڙهي دفنائيندا آهن، ڪنهن جي به همت ناهي جو انهن کي روڪي سگھي، ڪشمير ۾ ڪو اهڙو گھر ناهي جتي شهادت نه ٿي هجي يا ان گھر جو ڪو نقصان نه ٿيو هجي. هن چيو ته هڪ ڏينهن ايندو جڏهن تاريخ لکندي ته آئون ائين چيو هو ۽ اهو ئي ٿيو.

 

انٽرنيشنل ڪميشن آف جيورسٽس ڀارتي قدمن جي مخالفت ڪري ڇڏي

جنيوا (ويب ڊيسڪ) انٽرنيشنل ڪميشن آف جيورسٽس والاريل ڪشمير جي آئيني حيثيت ختم ڪرڻ جي ڀارتي قدم کي آئين ۽ قانون جي ڀڃڪڙي قرار ڏئي ڇڏيو. آءِ سي جي طرفان جاري بيان ۾ چيو ويو آهي ته والاريل ڪشمير جي آزاد حيثيت جي خاتمي سان انساني حقن جي بحران ۾ شدت ايندي، ڀارتي قدم قانون جي بالادستي ۽ انساني حقن تي ضرب آهي. عالمي اداري جي پڌرائيءَ ۾ چيو ويو آهي ته والاريل ڪشمير ۾ احتجاج روڪڻ لاءِ ڪميونيڪيشن نظام جو بليڪ آئوٽ ڪيو ويو، فوج وڌائي وئي ۽ سياسي قيادت کي نظربند ڪيو ويو، اتان جي رهواسين لاءِ ڊريڪونين پابنديون لاڳو ڪيون ويون آهن، اهو قدم نه رڳو عالمي پر ڀارت جي اندروني اسٽينڊرڊ جي به خلاف آهي، ڀارتي عدالت کي آئيني ۽ قانوني ڀڃڪڙي جو جائزو وٺڻ گهرجي. آءِ سي جي سيڪريٽري جنرل جو چوڻ هو ته سڄو ڌيان ڀارتي سپريم ڪورٽ تي آهي، سپريم ڪورٽ ڪشميرين جي حقن جي تحفظ جي ذميواري نڀائي

 

سنڌ بئراج منصوبي جي منظوري، ڪوٽڙي ڊائون اسٽريم جو مسئلو حل ٿيڻ جي دعويٰ

ڪراچي (م.ڊ) وزيراعظم عمران خان سنڌ بئراج منصوبي جي منظوري ڏئي ڇڏي آهي. جاري ٿيل بيان موجب وزيراعظم طرفان منظوري ڏيڻ بعد سنڌ بئراج جي اڏاوت سان ڪوٽڙي ڊائون اسٽريم پاڻي جو مسئلو حل ڪرڻ ۽ ڪراچي ۾ پاڻي کوٽ ختم ڪرڻ ۾ مدد ملندي. سنڌ بئراج منصوبو سنڌو درياءَ تي سمنڊ کان 45 ڪلوميٽر مٿانهين طرف اڏيو ويندو ۽ سال 2024ع تائين پورو ٿيندو. بيان موجب وزيراعظم عمران خان طرفان سنڌ بئراج منصوبي جي منظوري سنڌ اندر پاڻي وسيلن کي هٿي ڏيارڻ جي حوالي سان هڪ تاريخي وِک آهي، جيڪو خاص ڪري ڪوٽري بئراج کان هيٺ علائقن ۾ ترقيءَ لاءِ مُک ڪردار ادا ڪندو ۽ ساحلي پٽيءَ تائين سامونڊي پاڻيءَ جي چاڙهه کي روڪڻ ۾ به مدد مهيا ڪندو. اُن کانسواءِ تمر جي ٻيلن ۽ آبي جيوت جي واڌ ويجهه توڙي ڀرپاسي جي وڏي آبادي کي مٺو پاڻي مهيا ڪرڻ ۾ به هن منصوبي ذريعي مدد ملندي. بيان ۾ چيو ويو آهي ته واپڊا ايندڙ مهيني منصوبي جي فزيبلٽي رپورٽ تي ڪم شروع ڪندي، هلندڙ سال جي ڊسمبر مهيني تائين عالمي ڪنسلٽنٽ طرفان فزيبلٽي اسٽڊي جو جائزو ورتو ويندو. فزيبلٽي اسٽڊي ۽ تفصيلي انجنيئرنگ ڊزائين مڪمل ٿيڻ بعد سنڌ بئراج تي اڏاوتي ڪم جي شروعات جنوري 2022ع ۾ ٿي ويندي، اهو ڪُم 2024ع تائين پورو ٿيڻ جي توقع آهي. بيان موجب سنڌ بئراج منصوبو ٺٽي کان 65 ڪلوميٽر ڏکڻ ۽ڪراچي کان 130 ڪلوميٽر اوڀر پاسي تعمير ڪيو ويندو.

 

خورشيد شاهه جي 500 ارب کان وڌيڪ اثاثن جو انڪشاف، نيب اڪائونٽس، بنا نالي پراپرٽيز جو تفصيل حاصل ڪري ورتا

ڪراچي (اين اين آءِ) پيپلزپارٽي جي سينيئر اڳواڻ خورشيد شاهه جي 500 ارب کان وڌيڪ اثاثن جو انڪشاف ٿيو آهي نيب خورشيد ساهه جا اڪائونٽس، بنا نالي پراپرٽيز جو تفصيل حاصل ڪري ورتو آهي تفصيل موجب نيب خورشيد شاهه جي خلاف اهم ثبوت حاصل ڪري ورتا آهن جنهن ۾ خورشيد شاهه جا 500 ارب کان وڌيڪ اثاثا هجڻ جو انڪشاف ڪيو آهي ذريعن موجب خورشيد شاهه ۽ گهرڀاتين جا ڪراچي سکر ۽ ٻين علائقن ۾ 105 بئنڪ اڪائونٽس آهن خورشيد شاهه پنهنجي فرنٽ مئن پهلاج مل جي نالي تي 83 پراپرٽيون ٺاهيون آهن دستاويز موجب پراپرٽيز سکر، روهڙي ڪراچي ۽ ٻين علائقن ۾ ٺاهيون ويون آهن پهلاج راءِ گليمر بنگلو، جوڻيجو فلور مل، مڪيش فلور مل ۽ پراپرٽيز ٺاهيون مبينه فرنٽ مين پهلاج 2015 کان اڳ ڪائي ٽيڪس ادا ناهي ڪئي نيب دستاويز ۾ ٻڌايو ويو ته خورشيد شاهه جو مبينه فرنٽ مين پهلاج معمولي دڪان هلائيندو هو فرنٽ مين لڏو مل جي نالي تي 11 ۽ آفتاب حسين سومرو جي نالي تي 10 پراپرٽيز آهن دستاويز موجب خورشيد شاهه اعجاز پلهه جي نالي تي سکر ۽ روهڙي ۾ ٻه پراپرٽيون ٺاهيون مبينه فرنٽ مين جي لاءِ ڪارڊيو اسپتال سان لڳ ڏيڍ ايڪڙ نرسري الاٽ ڪرائي نيب ذريعن موجب خورشيد شاهه جي بنا نالي پراپرٽيز ۾ عمر جان نالي شخص جو به اهم ڪردار آهي پ پ پ اڳواڻ جي استعمال هيٺ بم پروف گاڏي عمر جان جي نالي تي رجسٽرڊ آهي جڏهن ته اسلام آباد ۾ خورشيد شاهه جو استعمال هيٺ گهر عمر جان جي نالي تي آهي جڏهن ته سکر ۽ ٻين علائقن ۾ ترقياتي منصوبا عمر جان جي ڪمپني کي ڏياريا ويا.

 

ڀارت ڏاڍ ذريعي ڪشيمرين کي گهڻي وقت تائين يرغمال نٿو رکي سگهي: فردوس عاشق اعواڻ

اسلام آباد (اين اين آءِ) وزيراعظم جي سڌ سماءَ بابت خاص مددگار فردوس عاشق اعواڻ هڪ ڀيرو ٻيهر واضح ڪيو آهي ته ڀارت ڏاڍ ذريعي ڪشميرين کي گهڻو وقت يرغمال نٿو رکي سگهي، ڀارت جو ڪشمير تي قبضو ڪنهن به صورت ۾ جائز نٿو ٿي سگهي، ڪشميرين کي ڀارت جو تازو فيصلو قبول نه آهي، پاڪستاني ميڊيا جو ڪشيمر ڪاز جي معاملي تي قومي موقف اجاگر ڪرڻ ۾ اهم ڪردار آهي ۽ ميڊيا جو موثر ۽ اثرائتو ڪردار سامهون اچڻ گهرجي، هوءَ اربع تي حريت اڳواڻ عبدالحميد لون، ڪشمير ميڊيا سروس جي چيف ايگزيڪيوٽو آفيسر تجمل اسلام سان گڏ پريس انفارميشن کاتي ۾ پريس ڪانفرني کي خطاب ڪري رهي هئي، فردوس عاشق اعواڻ چيو ته ڀارت ڀل ڪجهه به ڪري پر ڪشمير تي ان جو قبضو ڪنهن به صورت ۾ جائز نٿو ٿي سگهي ۽ نه ئي وري ڪشميري عوام ان کي قبول ڪندو، هن چيو ته ڀارت پنهنجي سموري ڏاڍ جي باوجود ڪشمير ۾ پنهنجي جنگ هارائي چڪو آهي، جيڪڏهن ائين نه هجي ها ته ان کي اتي لکين فوج مقرر ڪرڻ جي ضرورت نه پوي ها، ڪشميرين کي ڀارت جي ڏاڍ جو هڪ فيصلو قبول نه هوندو، فردوس عاشق چيو ته 22 ڪروڙ عوام وزيراعظم عمران خان موجوده حڪومت پاران يقين ڏياريون ٿا ته پاڪستان جو ٻچو ٻچو ڪشمير تي قربان ٿيڻ لاءِ تيار آهي، هن چيو ته ڀارت والاريل ڪشمير ۾ 9 لک کان وڌيڪ فوج لاهي ڇڏي آهي، ڀارت جي اهڙين حرڪت مان ظاهر ٿئي ٿو ته ڪشميري ڀارت سان گڏ نه آهن. هن چيو ته پارليامينٽ جي گڏيل اجلاس ۾ وزيراعظم عمران خان صورتحال کان آگاهه ڪيو آهي ۽ آر ايس ايس جي ارادن کي وائکو ڪيو آهي، هن چيو ته انصاف جي عالمي عدالت ۾ ان معاملي کي اٿاري سگهجي ٿو، هن چيو ته اسان چئون ٿا ته والاريل ڪشمير ۾ 9 لک کان وڌيڪ ڀارتي فوج مقرر آهي پر هن وقت تائين نئين تفصيل کانپوءِ 15 لک جي لڳ ڀڳ فوجي ۽ نيم فوجي موجود آهن، هن چيو ته اهڙين حرڪتن سان آزادي جي تحريڪ کي چٿي نٿو سگهجي، هن چيو ته وزيراعظم عمران خان واعدو ڪيو ته هو ڪشمير جو مسئلو حل ڪندو.

 

بلاول ڀٽو زرداري جي شهبازشريف سان ملاقات، ڪشمير مسئلي تي بهتر نموني سان پارليمينٽ ۾ اٿارڻ تي اتفاق

اسلام آباد (اين اين آءِ) پ پ پ چيئرمين بلاول ڀٽو زرداري ۽ شهبازشريف ڪشمير جو مسئلو بهتر نموني سان پارليمينٽ ۾ اٿارڻ تي اتفاق ڪيو آهي ذريعن موجب اربع تي بلاول ڀٽو ميان شهبازشريف سان ملاقات لاءِ سندس چيمبر ۾ پهتو شيرين رحمان، خورشيد شاهه، نويد قمر به بلاول ڀٽو سان گڏ هئا (ن) ليگ پاران سردار اياز صادق ۽ احسن اقبال به ملاقات ۾ موجود هئا شهبازشريف بلاول جي آجيان لاءِ دروازي تائين آيو ذريعن موجب ملاقات ۾ پارليمينٽ جي گڏيل اجلاس بابت معاملن تي خيالن جي ڏي وٺ ڪئي ويئي سينيٽ ۾ بي اعتمادي رٿ ناڪام ٿيڻ بابت معاملن تي به ڳالهه ٻولهه ڪئي ويئي ملاقات کان پوءِ صحافين سان ڳالهائيندي شهبازشريف چيو ته ملاقات ۾ ڪشمير جي مسئلي ۽ پارليامينٽ جي گڏيل اجلاس تي ڳالهه ٿي آهي هن چيو ته مودي ڪشمير جي حوالي سان هڪ ڪريل حرڪت ڪئي آهي ان کي پارليامينٽ ۾ اٿارينداسين پارليمينٽ تي ڪشميري ڀائرن ڀينرن لاءِ ٻڌي جو اظهار ڪنداسين. هن چيو ته ڪشمير جي موجوده صورتحال سميت ٻين معاملن کي اپوزيشن جي رهبر ڪميٽي ڏسندي هن چيو ته سمورن معاملن کي اي پي سي ۾ ڊسڪس ڪنداسين هن چيو ته جلد رهبر ڪميٽي جو اجلاس ٿيندو بلاول ڀٽو زرداري چيو ته مان شهبازشريف جو ٿورائتو آهيان هن سٺي ماني کارائي هن چيو ته ملاقات ۾ عام ماڻهن تي ڳالهه ٻولهه ٿي آهي هن چيو ته اپوزيشن جماعتن جي رهبر ڪميٽي ۾ سمورا معاملا بحث هيٺ ايندا بلاول ڀٽو زرداري چيو ته آمريت جي دور ۾ جمهوريت جي سياست لاءِ غير جمهوري قوتن جو مقابلو ڪرڻو پوي ٿو هن چيو ته اپوزيشن جي قيادت سينيٽ چونڊن ۾ حڪومت کي رد ڪري ڇڏيو آهي.

 

برساتن جي اڳڪٿي، وڏي وزير پاران لوڪل گورنمينٽ کي الرٽ رهڻ جي هدايت

ڪراچي (اسٽاف رپورٽر): سنڌ جي وڏي وزير سيد مراد علي شاهه چيو آهي ته گذريل 6 سالن 14-2013 کان 19-2018 ۾ مجموعي طور ترقياتي ڪمن تي 495.04 بلين رپيا خرچ ٿيو، جنهن مان 120.30 بلين رپيا ڪراچي جي ترقياتي رٿائن تي خرچ ٿيا. هن اها ڳالهه اڄ وزيراعليٰ هائوس ۾ صوبي جي سامونڊي پٽي ۾ امڪاني تيز برساتنبابت تياري اجلاس جي صدارت ڪندي چئي. هن ٻڌايو ته هن شهر ۾ گذريل 6 سالن ۾ ترقياتي ڪمن تي مجموعي طور تي ٿيندڙ خرچ جو ڪاٿو لڳايو آهي. اجلاس ۾ مڪاني کاتن وارو صوبائي وزير سيد ناصر شاهه، وڏي وزير جو صلاحڪار مرتضيٰ وهاب، قائم مقام چيف سيڪريٽري محمد وسيم، چيئرپرسن پي اينڊ ڊي ناهيد شاهه، وڏي وزير جو پرنسپل سيڪريٽري ساجد جمال ابڙو، ڪمشنر ڪراچي افتخار شلواڻي، سيڪريٽري بلديات خالد حيدر شاهه، سيڪريٽري ٽرانسپورٽ عباس ڏيٿو ۽ ٻين لاڳاپيل عملدارن شرڪت ڪئي. مراد علي شاهه چيو ته شهر ۾ ترجيحي سيڙپڪاري بابت کيس حڪومت لاءِ پاڻي ۽ صفائي جي رٿائن تي خاص اهميت رهي آهي. هن چيو ته گذريل 6 سالن ۾ شهر ۾ پاڻي ۽ صفائي جي شعبن لاءِ 69.27 بلين رپيا رکيا ويا. هن چيوت ه شهر ۾ پاڻي ۽ صفائي جي 77 رٿائن کي مڪمل ڪرڻ لاءِ 24.65 بلين رپيا خرچ ٿيا. شهر جي ترقي لاءِ ترجيحي شعبن بابت ڳالهائيندي چيو ته هن تعمير ۽ روڊن جي ڄار جي سڌاري ۽ فلائي اوورز / پُل/ انڊرپاسز، فلٽر پلانٽن جي اپگريڊيشن، پمپنگ اسٽيشنن ۽ برساتي پاڻي جي نالن جي تعمير بابت 40 ميگا منصوبا شروع ڪيا آهن. هن چيو ته 20 ميگا اسڪيمن تي لاڳت جو ڪاٿو  15.33 بلين رپيا آهي ۽ اهي مڪمل ٿي چڪيون آهن ۽ 20 اسڪيمن جنهن جي لاڳت جو ڪاٿو 12.474 بلين رپيا آهي اهي اي ڊي پي 20-2019 ۾ شامل آهن. هن چيو ته تعليم جي شعبي لاءِ 14-2013 کان 19-2018 جي عرصي ۾ مجموعي اي ڊي پي ۾ 19.16 بلين رپيا رکيا ويا. هن چيو ته انهيءَ عرصي ۾ ڪراچي ۾ تعليم جي شعبي لاءِ 75 اسڪيمون مڪمل ڪيون ويون جنهن تي 10.27 بلين رپيا خرچ ٿيا. هن چيو ته ڪراچي جي 449 ترقياتي اسڪيمن لاءِ 20-2019 ۾ 62.034 بلين رپيا رکيا ويا جڏهن ته مجموعي لاڳت 239.158 بلين رپيا آهي.وڏي وزير مڪاني کاتن واري صوبائي وزير سيد ناصر حسين شاهه کي هدايت ڪئي ته هو ايندڙ برساتن جنهن جي موسميات کاتي اڳڪٿي ڪئي آهي بابت لوڪل باڊيز جي عملي کي الرٽ رکي، گهڻو ڪري ڪراچي، ٺٽو، بدين جي سامونڊي پٽي ۽ حيدرآباد جا ڪجهه حصا متاثر ٿي سگهن ٿا انهيءَ ڪري ڪي ايم سي، ڊي ايم سيز، واٽر بورڊ، لاڳاپيل ڊپٽي ڪمشنرن، ايڇ ڊي اي، ايڇ ايم سي ۽ واسا کي لازمي متحرڪ هجڻ گهرجي. هن مڪاني کاتي کي هدايت ڪئي ته هو ٺٽي ۽ بدين ۾ لوڪل باڊيز کي فعال ڪري جتي ڊزاسٽر مينجمنٽ اٿارٽي به کيس تيز برساتن هجڻ جي صورت ۾ مدد ڪندي. هن ڪراچي ۽ حيدرآباد جي ٻنهي ڪمشنرن کي هدايت ڪئي ته هو لاڳاپيل ڊپٽي ڪمشنرن کي به فعال ڪري ته جيئن اهي برسات جي پاڻي جي نيڪال ۽ ماڻهن جي مدد ۽ تعاون بابت الرٽ رهن. هن چيو ته منهنجي خواهش آهي ته هيٺين علائقا جتي جڏهن به تيز برسات ٿئي ٿي پاڻي گڏ ٿيڻ شروع ٿي ويندو انهن علائقن تي ڌيان ڏني وڃي ۽ اتي سڪشن پمپ به لڳايا وڃن ۽ پاڻي جي هلندڙ وهڪري لاءِ نيڪالي جو سسٽم به صاف رکيو وڃي. مراد علي شاهه چيو ته گذريل هفتي برساتن ۾ لوڪل باڊيز جي اهلڪارن، واٽر بورڊ ۽ ڊپٽي ڪمشنرن ۽ کيس لاڳاپيل عملي شهر ۾ صفائي ۽ ماڻهن جي مدد بابت رڌل رهيا، هن ڀري به ماڻهن جي مدد بابت کين محنت ۽ جذبي جي اميد ڪريان ٿو. مراد علي شاهه مڪاني کاتي جي صوبائي وزير سيد ناصر حسين شاهه کي چيو ته هو برسات جي پاڻي جي نيڪال، خاص گٽرن کي کولڻ ۽ برسات جي پاڻي جي نالن جي چوڪ ٿيڻ وارن پوانئٽن کي کولڻ لاءِ ڪنٽيجنسي رٿا جوڙي وڃي ۽ سڪشن مشينن لاءِ ڊيزل جنريٽرن بابت پڻ ضروري اُپاءُ ورتا وڃن. صوبائي وزير بلديات چيو ته لوڪل باڊيز ۽ کيس کاتي ۾ هڪ ايمرجنسي سيل بڻايو ويو آهي جيڪو سڄي صورتحال جي نگراني ڪندو. هن چيو ته  جتي تيز برسات ٿيندي اتي آئون شهرن جو دورو ڪندس. اجلاس کانپوءِ وڏو وزير حيدرآباد ۾ گذريل ڏينهن ۾ تيز برساتن جي پاڻي جي نيڪالي جو جائزو وٺڻ لاءِ دوري تي روانو ٿي ويو جنهن سان گڏ صوبائي وزير سيد ناصر حسين شاهه، شبير بجاراڻي، شرجيل انعام ميمڻ ۽ معاون خاص قاسم نويد پڻ هئا

 

سڄي قوم پاڪ فوج سان گڏ آهي پر وزيراعظم سان گڏ ناهي ، پاڪستان ڪشمير تان هٿ ڌوئي ويٺو: ن ليگ

اسلام آباد (ويب ڊيسڪ) سينيٽر مشاهدالله خان چيو آهي ته سڄي قوم پاڪ فوج سان گڏ آهي پر وزيراعظم سان گڏ ناهي. مشاهد الله خان پارليامينٽ جي گڏيل اجلاس ۾ پنهنجي خيالن جو اظهار ڪندي حڪومت کي تنقيد جو نشانو بڻايو ته حڪومتي بئنچن تان کيس روڪڻ جي ڪوشش ڪئي وئي، جنهن تي اجلاس ۾ گور ٿي ويو. مشاهد الله خان چيو ته ڪالهه وزيراعظم جي اڏام جيتري دير جو شڪار ٿي شايد ڪا به اڏام ايتري دير جو شڪار نه ٿي هجي، پهريون ڀيرو محسوس ڪيو ته اپوزيشن کان ڪجهه پڇيو پيو وڃي ته ڇا ڪجي؟ اسان کان ڇو ٿا پڇو، جن کان اڳ ۾ پڇندا هيئو انهن کان پڇو. هن چيو ته توهان پڇيو ته آئون ڇا ڪريان؟ توهان کي ٻڌايون ٿا ته ڇا ڪريو، توهان نريندر مودي کي مس ڪالون هڻندا هيئو ۽ هو اٽينڊ نه ڪندو هو، جڏهن ڪجهه بنا ڪجهه ڪرڻ جي ڪا شئي هٿ اچي وڃي ته ائين ئي ٿيندو آهي، زرداري صاحب وٽ هليا وڃو، اهو اهڙو طريقو ٻڌائيندو جو مودي توهان جي ڪال ضرور اٽينڊ ڪندو. مشاهد الله خان چيو ته وزيراعظم جي آمريڪي صدر سان وائيٽ هائوس ۾ گھمڻ دوران جيڪا ڳالهه ٻولهه ٿي سموري اتي ٿي هئي، اڄ حريت اڳواڻ يا ته تهاڙ جيل ۾ آهن يا نظر بند آهن، جڏهن ته چين جيڪو بيان ڏنو اهو لداخ لاءِ آهي. ن ليگ سينيٽر چيو ته سڄي قوم فوج سان گڏ آهي پر وزيراعظم سان گڏ ناهي، هڪ ٿيڻ لاءِ خير سگالي جو جذبو پيدا ڪرڻ گھرجي، اسان کي پنهنجي پاليسين ۾ به تبديلي آڻڻي پوندي، جيڪڏهن توهان چاهيو ٿا ته قوم کي هڪ ٿيڻو پوندو ته توهان کي سوچڻو پوندو ته نواز شريف جيل ۾ ڇو آهي  ٻئي طرف

ن ليگ اڳواڻ خواجا آصف چيو آهي ته وزيراعظم اسان کي پنهنجي خطاب دوران تاريخ ٻڌائي پر ان تاريخ جو مطلب هوندو آهي ته ان مان سبق حاصل ڪيو وڃي. پارليامينٽ جي گڏيل اجلاس ۾ خطاب ڪندي خواجا آصف چيو ته پاڪستان ڀارت سان پنهنجي امن پاليسي جاري رکي پر اها ناڪام ٿي وئي، پاڪستان والاريل ڪشمير تان هٿ ڌوئي ويٺو آهي، اسان ڀارت سان رابطو ڪرڻ جون ڪوششون ڪيون پر ڀارت طرفان ڪو به رد عمل نه ڏنو ويو. سندس چوڻ هو ته وزيراعظم عمران خان اميد لڳائي هئي ته نريندر مودي وزيراعظم چونڊجي اسان کي ڪشمير مسئلي جو حل ڏيندو پر هن جيڪو حل ڏنو آهي، اهو سڄي دنيا ڏسي ورتو آهي. خواجا آصف چيو ته ڀارت ڪشميرين کان انهن جا حق کسيندو ۽ ان معاملي ۾ ڀارت اڪيلو ناهي، ان کي اسرائيلي وزيراعظم نيتن ياهو اهو ٻڌائي ويو آهي. خواجا آصف چيو ته جيڪي ملڪ معاشي طور ڪمزور ٿي ويندا آهن، اهي اڪيلا ٿي ويندا آهن ۽ پاڪستان سان ائين ئي ٿيو آهي. ن ليگ اڳواڻ خدشو ظاهر ڪندي چيو ته اڄ ڪشميرين کي ايل او سي جي هن پاسي ڌڪيو ويندو ۽ اهو ئي ڊرامو ٿي رهيو آهي جيڪو اسرائيل فلسطين ۾ مسلمانن سان ڪيو ۽ هنن کي اردن ڏانهن ڌڪي ڇڏيو. سندس چوڻ هو ته پاڪستان نازڪ دور مان گذري رهيو آهي پر ملڪ جي سياسي صفن ۾ اتحاد نه آهي، ڪشمير جو اهو معاملو اسان سان تقاضو ڪري رهيو آهي ته اسان سفارتي سطح تي خاص ڪري اسلامي دنيا ۾ ان کي اٿاريون. هن پنهنجي ڳالهه جاري رکندي چيو ته ان مسئلي جو حڪومت حل ئي نٿي چاهي، نه ئي ان ڏس ۾ ڪجهه ڪرڻ چاهي ٿي، جيڪو ٿيڻو هو اهو ٿي ويو آهي، ڪشميري خراب حالتن ۾ آهن، 1989ع کان هن وقت تائين هڪ لک کان وڌيڪ ڪشميري شهيد ٿي چڪا آهن. خواجا آصف چيو ته ڪشمير جي معاملي تي پاڪستان جي پاليسي ناڪامي جو شڪار ٿي چڪي آهي، هاڻ اها ڳالهه رڳو ٺهراءَ تائين محدود نه رهڻ گھرجي، ان مسئلي تي اسان جون وڇوٽيون ختم ٿيڻ گهرجن، جنهن سان ڪشمير ۾ هڪ سٺو پيغام وڃي. سندس چوڻ هو ته ملڪ ۾ سياسي ۽ اخلاقي بدحالي آهي، اهڙي حالت ۾ نه  توهان ڪشمير جي مدد ڪري سگھو ٿا ۽ نه ئي دنيا توهان جي مدد ڪندي.

 

ڪشمير مسئلي تي پاڪستان حڪومت عالمي ڪانفرنس گھرائي ۽ وفد ٺاهي دنيا ۾ موڪلي: سراج الحق

اسلام آباد (ويب ڊيسڪ) جماعت اسلامي جي امير سينيٽر سراج الحق چيو آهي ته حڪومت طرفان پارليامينٽ جو گڏيل اجلاس سڏائڻ سٺي ڳالهه آهي پر بهتر اهو هجي ها ته حڪومت پنهنجي تياري سان اچي ها. پارليامينٽ جي گڏيل اجلاس ۾ خيالن جو اظهار ڪندي سراج الحق چيو ته هن وقت تائين اجلاس ۾ جيترن اڳوانن کي ٻڌو آهي، جن اهو ئي چيو ته وزيراعظم قدم وڌايو اسان اوهان سان گڏ آهيون پر قدم وڌائڻو پوندو. هن چيو ته ڪشمير اهو بدقسمت حصو آهي، جنهن کي ايسٽ انڊيا ڪمپني 1846ع ۾ سک حڪمران کي وڪرو ڪيو هو پر اها هڪ اهڙي عظيم قوم آهي، جنهن جي جدوجهد جو مثال دنيا جي تاريخ ۾ نٿو ملي. سندس چوڻ هو ته ڪشمير جي ايراضي دنيا جي 114 ملڪن کان وڌيڪ، جڏهن ته ان جي آبادي دنيا جي 112 ملڪن کان گھڻي آهي، جيڪا ڀارت، پاڪستان ۽ چين جي انتظام هيٺ آهي. سراج الحق چيو ته اهي ڪشميري آهن، جيڪي پاڪستان جي آزادي جو ڏهاڙو جوش ۽ جذبي سان ملهائيندا آهن، اهي ڀارتي غلامي کي رد ڪندا آهن، پنهنجي قبرن تي پاڪستان جو جهنڊو سجائيندا آهن ۽ ان بابت عالمي ادارا چوندا آهن ته اهو چئني پاسن کان گهيريل آهي. هن چيو ته اسان ڪشميرين جو رڳو ان ڪري ساٿ ناهيون ڏيندا ته اهو خطو پاڪستان سان گڏ آهي پر ناحق مارجندڙ مسلمانن جي حفاظت ڪرڻ بابت قرآن ۾ حڪم به آهن، ڪشمير جي خاص حيثيت ختم ڪرڻ جو اهو منصوبو اڄ جو نه آهي پر ان جي تياري اڳ کان جاري هئي، ڇو جو ڀارت ڪنٽرول لائن تي ڪنڊيدار تار لڳائي ڀت برلن تيار ڪري رهيو هو ۽ اسان جا حڪمران خاموش ويٺا هئا. جماعت اسلامي امير چيو ته ڀارتي قدم اتي ئي ختم نه ٿيندو پر اهي گلگت بلتستان جو مطالبو به ڪندا، هنن اڳ ئي پاڪستان ۾ ايندڙ درياهن جو رخ ڊيم ٺاهي تبديل ڪري ڇڏيو آهي. سراج الحق چيو ته ڪشميرين لاءِ وڙهڻ پاڪستان لاءِ وڙهڻ ۽ مرڻ آهي، ڇو جو ڀارت جو ٻيو هدف پاڪستان ئي هوندو، جيڪڏهن ڏکڻ سوڊان، يوگوسلاويا ۾ گوريلا جنگ ڪامياب ٿي، اوڀر تيمور جي تحريڪ ڪامياب ٿي ۽ هڪ نئون ملڪ ٺهيو ته ڪشمير جو مسئلو ڇو حل ناهي ٿيو. هن تجويز ڏني ته ڪشمير مسئلي تي پاڪستان حڪومت هڪ عالمي ڪانفرنس گھرائي ۽ سڀني پارليامينٽ ميمبرن تي ٻڌل 120 وفد ٺاهي دنيا ۾ موڪلي ۽ ان موقعي مان فائدو وٺي.