تازيون خبرون
آخري دم تائين وڙهنداسين، مودي ياد رک سر جو جواب پٿر سان ڏينداسين: عمران خان - “آرٽيڪل 149” جو پڙاڏو: پ پ جو وفاقي سرڪار کان استعيفيٰ ۽ نئين سر چونڊن جو مطالبو - سنڌو ديش ڳالهه مناسب ناهي، صوبائي خودمختياري تي يقين رکون ٿا: شاهه محمود - آفيسر شاهي هلڻ نه ڏبي، عهدن تي ويٺل ماڻهن جي اڪثيريت عوام جي خدمت نٿي ڪري: سپريم ڪورٽ - اسان کي هر محاذ تي سفارتي ڪاميابي ۽ ڀارت کي شڪست ٿي رهي آهي: فردوس عاشق اعواڻ - مهاجرن جو قرض اسان کي نه وسارڻ گهرجي (اسد عمر) سڀ کان پهرين بنگال ۽ سنڌ ٺهراءُ پاس ڪيا: خورشيد شاهه - ڪشمير جو مسئلو حل ڪرڻ کان سواءِ ڳالهيون نٿيون ٿي سگهن، ٽيبل هيٺان ڪشميرين جو سمجهوتو ناهي ٿيڻ وارو: شيخ رشيد - بلاول ڀٽو زرداري جي بيان مان ملڪ دشمني ڪڍي ڏيکاريو: پيپلز پارٽي جو حڪومتي ميمبرن کي چئلينج - ڪراچي ۾ ٻوريون وجهي سيوريج لائيون ۽ گٽر بند ڪندڙن جي ڳولا جي ذميواري رينجرز حوالي - آزاد ڪشمير تي قبضي لاءِ مڪمل تيار آهيون، آخري فيصلو حڪومت ڪندي: ڀارتي آرمي چيف پاران ڌمڪي

Daily Archives: July 13, 2019

حڪومت جج ارشد ملڪ کي ڪم کان روڪي ڇڏيو، هٽائڻ جو فيصلو، سمري صدر ڏانهن رواني

اسلام آباد (اين اين آءِ) اسلام آباد هاءِ ڪورٽ جي وقتي چيف جسٽس مسلم ليگ (ن) پاران جاري وڊيو ۽ الزامن تي احتساب عدالت جي جج ارشد ملڪ کي عهدي تان هٽائڻ جو فيصلو ڪري ورتو تفصيل موجب اسلام آباد هاءِ ڪورٽ جي وقتي چيف جسٽس جسٽس عامر فاروق رجسٽرار آفيس کي هدايت ڪئي ته هو جج ارشد ملڪ کي سندس عهدي تان هٽائڻ ۽ کيس لاهور هاءِ ڪورٽ جي پيرنٽ ڊپارٽمينٽ ۾ واپس موڪلڻ لءِ قانون واري وزارت کي خط لکي اسلام آباد هاءِ ڪورٽ جي عهديدار ٻڌايو ته قومي احتساب آرڊيننس (اين اي او) جي سيڪشن 5 اي مطابق قانون واري وزارت هاءِ ڪورٽ جي چيف جسٽس جي راضپي سان خاص عدالتن سميت احتساب عدالتن لاءِ جج مقرر ڪري ٿي جڏهن ته انهيءَ سيڪشن جي روشني ۾ جج ارشد ملڪ کي هٽائڻ جو فيصلو ڪيو ويو ان کان اڳ اسلام آباد جي احتساب عدالت جج ارشد ملڪ اسلام آباد هاءِ ڪورٽ جي وقتي چيف جسٽس کي پنهنجي صفائي ۾ هڪ خط لکيو جيڪو هن هاءِ ڪورٽ جي رجسٽرار جي حوالي ڪيو احتساب عدالت جي جج ارشد ملڪ خط سان گڏ هڪ حلفي بيان 7 ان حوالي سان جاري ڪيل پنهنجي ترديدي پريس رليز کي به ڳنڊيو ذريعن ٻڌايو ته جج ارشد ملڪ پنهنجي خط ۽ حلفي بيان ۾ مسلم ليگ (ن) پاران جاري ڪيل وڊيو ۽ الزامن کي رد ڪري ڇڏيو آهي ذريعن موب جج احتساب عدالت جج ارشد ملڪ پنهجي خط ۾ چيو ته کيس اجايو بدنام ڪيو پيو وڃي اسلام آباد هاءِ ڪورٽ جي ترجمان مطابق وقتي چيف جسٽس، جسٽس عامر فاروق ارشد ملڪ جي خط جو جائزو وٺڻ کان پوءِ کيس عهدي تان هٽائڻ جو فيصلو ڪيو آهي ۽ ان حوالي سان انصاف ۽ قانون واري وزارت کي خط به لکي ڇڏيو آهي ترجمان ٻڌايو ته وقتي چيف جسٽس اسلام آباد هاءِ ڪورٽ جي حڪم تي جج ارشد ملڪ جو خط ۽ حلفي بيان نوازشريف جي بريت جي درخواست جي رڪارڊ جو حصو بڻايو ويو ذريعن موجب ارشد ملڪ کي چيف جسٽس اسلام آباد هاءِ ڪورٽ ٻه کان 3 ڀيرا طلب به ڪيو هو ۽ ان کان ان حوالي سان پڇا ڳاڇا ڪئي ويئي خانگي ٽي وي ذريعن جي حوالي سان ٻڌايو ته جج ارشد ملڪ سان ناصر بٽ کان سواءِ مسلم ليگ (ن) جي ٻين ماڻهن سان ملاقات جي حوالي سان پڇا ڳاڇا ڪئي ويئي جڏهن ته هو وقتي چيف جسٽس عامر فارمق کي پنهنجي جواب سان مطمئن نه ڪري سگهيو. ٻئي طرف قانون واري وزير فروغ نسم چيو آهي ته اسلام آباد هاءِ ڪورٽ جي خط جي حوالي سان احتساب عدالت نمبر 2 جي جج ارشد ملڪ کي وڌيڪ ڪم کان روڪيندي کيس لا ڊويزن کي رپورٽ ڪرڻ جو چيو آهي ان وقت تائين ڪا سزا معطل نٿي ٿي سگهي جيستائين اسلام آباد هاءِ ڪورٽ فيصلو نٿي ڪري ته جج ارشد ملڪ دٻاءَ ۾ فيصلو ڏنو يا نه، پاڪستان ۽ نيب جي قانون تحت ڪو به شخص ڪنهن فيصلي تي اثر انداز ٿيڻ جي ڪوشش ڪري ته ان جي سزا ڌار آهي، جمعي تي فروغ نسيم شهزاد اڪبر سان گڏ پريس ڪانفرنس ڪندي چيو ته هاءِ ڪورٽ پاران مليل خط ۾ چيو ويو آهي ته حلفي بيان ۽ پريس رليز کي اڳيان رکي جج ارشد ملڪ کي احتساب عدالت نمبر 2 جي جج جي عهدي تان هٽايو وڃي ۽ پئرينٽ ڊپارٽمينٽ لاهور هاءِ ڪورٽ کي رپورٽ ڪري، هن چيو ته هي معاملو ڏٺو ويو ۽ ترت جج ارشد ملڪ کي وڌيڪ ڪم ڪرڻ کان روڪيو آهي ۽ کيس قانون واري کاتي کي رپورٽ ڪرڻ لاءِ چيو ويو آهي، پريس رليز ۽ حلفي بيان ڏسڻ کانپوءِ اها ڳالهه اڳيان آئي آهي ته ارشد ملڪ چوي ٿو ته کيس ڪهڙي اڇي ڪاري کي ڏسڻ کانسواءِ فيصلو ڪيو، رشوت ڏيڻ ۽ ڌمڪيون ڏنيون ويون، جيڪڏهن هن بيان کي ڏٺو وڃي ته جج ارشد ملڪ ميرٽ تي فيصلو ڪيو آهي، حلفي بيان بابت هن ٻڌايو ته هن بابت ارشد ملڪ تي هر قسم جو دٻاءُ هو، جڏهن ته پاڪستان نيب جي قانون تحت ڪو به شخص ڪنهن فيصلي تي اثرانداز ٿيڻ جي ڪوشش ڪري ته ان جي سزا ڌار آهي، هن ٻڌايو ته نيب آرڊيننس 1999 جي سيڪشن 31 اي چوي ٿو ته ڪو به شخص انصاف جو رستو، جاچ، عدالتي فيصلي ۾ رنڊڪ بڻجي ٿو ته ان کي 10 سالن جي سزا ٿي سگهي ٿي، هن  چيو ته هي ڪيس هن حڪومت ته ناهي ٺاهيو ۽ نه ئي ان جي جاچ هن حڪومت ڪئي، نواز شريف جي ڪيس ۾ ايترو دٻاءُ هو ته پوءِ ته کيس ٻنهي ڪيسن ۾ سزا ٿئي ها پر جج کيس هڪ ڪيس ۾ آزاد ڪيو، هڪ ۾ سزا ٻڌائي، فروغ نسيم چيو ته العزيزيا اسٽيل ملز جي فيصلي خلاف اپيل هاءِ ڪورٽ ٻڌي رهي آهي، جيستائين ان تي ڪو به فيصلو نٿو ٿئي ان وقت تائين قانون واري وزارت، نيب يا ڪير به ڪيس بابت وڌيڪ ڪارروائي نٿو ڪري سگهي، هن ڪيس جو فيصلو اسلام آباد هاءِ ڪورٽ کي ڪرڻو آهي، ان دوران ڪا سزا وڌائي يا گهٽائي نٿي سگهجي، هي هڪ قانوني معاملو آهي ان کي ان پس منظر ۾ ڏسڻو آهي ته ڇا جج فيصلو دٻاءَ ۾ ڏنو، هن چيو ته جج ارشد ملڪ موجب هن ڪو به فيصلو دٻاءَ ۾ ناهي ڏنو پر وڊيوز کي ان پس منظر ۾ ڏٺو ويندو، ڪنهن کي عدالت تي دٻاءُ وجهڻ جي اجازت نه ڏني ويندي، هڪ سوال جي جواب ۾ هن چيو ته جج ارشد ملڪ حلفي بيان ۾ واضح چيو آهي ته مون کي خبر نه هئي ته منهنجي مقرري ڇو ڪئي پئي وڃي، نواز شريف جي خلاف ڪيس جي ميرٽ تي ڳالهائيندي هن چيو ته ان ۾ لنڊن جي فليٽن جي مني ٽريل گهري وئي آهي، جج جي قدمن سان لنڊن فليٽ ختم نٿا ٿي وڃن، هي ڪيس اهڙو نه آهي ته جج جي وڊيو بيان تي منهسر هجي، شهزاد اڪبر چيو ته جج ارشد جو حلفي بيان هڪ ئي پاسي اشارو ڪري ٿو هن ۾ اهو ئي لفظ لکيل آهي جيڪو پاناما جي فيصلي ۾ هو اهو لفظ مافيا جو آهي، هن چيو ته حلفي بيان موجب جج ارشد ملڪ سان ٻن موقعن تي رابطا ڪيا وڃن ٿا، هڪ ان وقت جڏهن نواز شريف جي خلاف ڪيس هلي رهيو هو ته ناصر جنجوعا، ماهر جيلاني ۽ ناصر بٽ رابطن ڪن ٿا، هي ماڻهو لالچ ۽ ڌمڪيون ڏين ٿا، جڏهن ته ٻيو موقعو فيصلي کانپوءِ جو آهي، هن چيو ته حلفي بيان ۾ چيو ويو آهي ته جج جي مقرري به پنهنجن مقصدن لاءِ ڪرائي وڃي ٿي تنهنڪري اسان کي اهو ڏسڻو پوندو ته هي مقرري ڪئين ٿي ان ۾ ڪير ملوث هو، ڇو ته هن مقرري ۾ قانون وارو وزير، قانون وارو سيڪريٽري ۽ وزيراعظم آفيس به ملوث هوندي آهي، هن چيو ته جج چئي رهيو آهي ته ان جي مقرري ڪرائي وڃي، جنهن کانپوءِ کيس 10 ڪروڙ رپين جي رشوت جي آڇ ڪئي وئي، هن چيو ته العزيزيا ريفرنس ٻئي جج کي منتقل ان جي درخواست تي ٿيو هو ڇو ته هي ڪيس پهريان جج بشير جي عدالت ۾ هو پر ان تي عدم اعتماد جو اظهار ڪيو ويو هو جنهنب کانپوءِ هي ڪيس جج ارشد ملڪ جي عدالت ۾ ويو هو.

 

فارغ ڪيل جج جو فيصلو معطل ڪري نواز شريف کي آزاد ڪيو وڃي: ن ليگ جو مطالبو

اسلام آباد/لاهور ( ويب ڊيسڪ ) مسلم ليگ ن جي صدر شهباز شريف چيو آهي ته احتساب عدالت جي جج کي هٽائڻ کانپوءِ نواز شريف خلاف فيصلو ڪالعدم ٿي چڪو آهي. مسلم ليگ جي صدر شهباز شريف احتساب عدالت جي جج کي هٽائڻ تي رد عمل ۾ چيو ته سچائي ثابت ٿيڻ تي اسان الله تعاليٰ جو شڪر ادا ڪريون ٿا. هن چيو ته وڊيو ۽ ان سان جڙيل سموريون حقيقتون سچ ثابت ٿيون آهن. سندس چوڻ هو ته احتساب عدالت جي جج کي هٽائڻ کانپوءِ نواز شريف خلاف فيصلو ڪالعدم ٿي چڪو آهي. شهباز شريف چيو ته نواز شريف کي جيل ۾ هڪ منٽ به رکڻ هاڻي غير قانوني آهي تنهن ڪري جج کي عهدي تان هٽائڻ کانپوءِ نواز شريف کي فوري طور آزاد ڪيو وڃي جڏهن ته نواز شريف خلاف دٻاءَ تحت فيصلي کي ڪالعدم قرار ڏنو وڃي. هن چيو ته جج هٽائڻ کانپوءِ نواز شريف کي جيل ۾ رکڻ جو جواز ختم ٿي ويو آهي، جڏهن ته انصاف جون گهرجون پوريون ڪندي نواز شريف کي فور طور آزاد ڪيو وڃي. مسلم ليگ ن جي نائب صدر مريم نواز چيو آهي ته جج کي فارغ ڪرڻ جو مطلب آهي ته اعليٰ عدليه حقيقتن کي قبول ڪري ورتو آهي. ٽويٽر تي بيان جاري ڪندي مريم نواز چيو ته الله جو شڪر آهي پر معاملو جج کي معطل ڪرڻ جو ناهي پر ان فيصلي کي معطل ڪرڻ جو آهي جيڪو هن جج ڏنو. هن چيو ته معاملو ڪنهن جج کي ڪڍڻ جو ناهي پر ان فيصلي کي عدالت رڪارڊ مان ڪڍڻ آهي جيڪو جج دٻاءَ ۾ ڏنو. سندس چوڻ هو ته معاملو ڪنهن جج کي فارغ ڪرڻ جو ناهي پر ان فيصلي کي فارغ ڪرڻ جو آهي. مريم نواز چيو ته جج کي فارغ ڪرڻ جو مطلب آهي ته اعليٰ عدليه حقيقتن کي قبوليو آهي، ايئن آهي ته فيصلو ڪيئن برقرار رکيو پيو وڃي جيڪو جج ڏنو، فيصلو ڏيندڙ جج کي سزا ٻڌائي وئي ته بيگناهه نواز شريف کي آزاد ڇو نه پيو ڪيو وڃي. مريم نواز چيو ته جيڪڏهن هڪ جج مس ڪنڊڪٽ جو ذميوار ٿيو آهي ۽ کيس عهدي تان هٽايو ويو آهي ته ان مس ڪنڊڪٽ جو نشانو ٿيندڙ کي ڪيئن سزا ڏئي سگهجي ٿي.مسلم ليگ ن اڳوڻي وزيراعظم نواز شريف کي مليل سزا ختم ڪري کيس آزاد ڪرڻ جو مطالبو ڪيو آهي.  مسلم ليگ ن جي ترجمان مريم اورنگزيب جج ارشد ملڪ کي هٽائڻ تي هڪ بيان ۾ چيو ته ثابت ٿي ويو ته مريم نواز جيڪي حقيقتون عوام سامهون آنديون اهي درست آهن. هن چيو ته نواز شريف خلاف فيصلي جي قانوني حيثيت پاڻمرادو ختم ٿي ويو آهي. مريم نواز چيو ته نواز شريف جي سزا ڪالعدم قرار ڏئي کيس فوري طور آزاد ڪيو وڃي. ن ليگ اڳواڻ شاهد خاقان عباسي چيو آهي ته اڄ ثابت ٿي ويو عدالتن تي حڪومت اثرانداز ٿي رهي آهي، هي ته هڪ جج پڪڙيو ويو آهي ڪهڙي خبر هر جج بليڪ ميل ٿي رهيو هجي. لاهور ۾ پريس ڪانفرنس ڪندي اڳوڻي وزيراعظم شاهد خاقان عباسي چيو ته احتساب عدالت جي جج ارشد ملڪ جي برطرفي سان ثابت ٿي ويو ته عدليا تي عمران خان دٻاءُ وڌو ۽ جج کي بليڪ ميل ڪيو، ٻه ڏينهن اڳ عمران خان چيو هو ته ارشد ملڪ جي معاملي سان حڪومت جو ڪو واسطو ناهي، اهو عدليا جو ڪم آهي ۽ اهي ئي ڏسندا پر اڄ حڪومتي ترجمانن برطرف جج ارشد ملڪ جي حلفي بيان جو بچاءُ ڪيو، جنهن سان ثابت ٿيو ته حڪومت عدليا تي اثرانداز ٿي رهي آهي. هن چيو ته نواز شريف جي جج ارشد ملڪ سان ڪا ملاقات نه ٿي، ڇو ته نواز شريف ته جيل ۾ هو، هو ڪيئن ٿو ملاقات ڪري سگهي؟ جج ارشد ملڪ ڪوڙ ڳالهائي رهيو آهي ته هن نواز شريف سان ملاقات ڪئي، هاڻ اعليٰ عدليا جو امتحان آهي، اسان احتساب چاهيون ٿا پر اهو احتساب نه جيڪو نيب ۽ عدالت ۾ ٿي رهيو آهي. سندس چوڻ هو ته راڻا ثناءُ الله تي هيروئن رکڻ جو ڪوڙو ڪيس ٺاهيو ويو، ٻار ٻار کي خبر آهي ته اهو ڪيس ٺاهڻ جو ڪو منطق ناهي ۽ نه ئي عقل ان ڳالهه کي تسليم ڪري ٿو، راڻا ثناءُ الله کي 12 ڏينهن اڳ گرفتار ڪيو ويو، اي اين ايف سندس هڪ ڏينهن به رمانڊ حاصل نه ڪيو، انهن کي رمانڊ وٺي جاچ ڪرڻ گهرجي ها، اهو رڳو راڻا ثناءُ الله جو آواز دٻائڻ جو ڪيس آهي ۽ اهو ڪيس عوام سامهون رکيو وڃي ته حقيقتون سامهون اچي وينديون.

 

ماضي جي ڪرپشن ڪاروباري طبقن لاءِ مسئلا پيدا ڪيا آهن: عمران خان

اسلام آباد (ويب ڊيسڪ) وزيراعظم عمران خان چيو آهي ته ماضي جي ڪرپشن ڪاروباري طبقن لاءِ مسئلا پيدا ڪيا آهن، سيڙپڪارن جي حوصلا افزائي ۽ هر ممڪن سهولت فراهم ڪرڻ حڪومت جي پهرين ترجيح آهي. وزيراعظم جي صدارت هيٺ بورڊ آف انويسٽمينٽ جي بورڊ آف ڊائريڪٽرز جو اجلاس ٿيو، جنهن ۾ توانائي واري وزير عمر ايوب، ناڻي بابت صلاحڪار عبدالحفيظ شيخ، واپار بابت صلاحڪار رزاق دائود، بورڊ آف انويسٽمينٽ چيئرمين زبير گيلاني، ڊاڪٽر سلمان شاهه، ڊاڪٽر شمشاد اختر، احمر بلال صوفي ۽ ٻين شرڪت ڪئي. اجلاس ۾ مختلف شعبن ۾ سيڙپڪاري کي هٿي ڏيڻ ۽ ڪاروبار جي رستي ۾ رنڊڪون ختم ڪرڻ تي غور ڪيو ويو، جڏهن ته اسپيشل اڪنامڪ زونز قائم ڪرڻ ۽ صنعت سان لاڳاپيل ماڻهن کي سهولتون ڏيڻ بابت به ڳالهه ٻولهه ڪئي وئي. ان موقعي تي وفاقي توڙي صوبائي سطح تي بورڊ آف انويسٽمينٽ جي قدمن ۽ مستقبل جي حڪمت عملي تي به ڳالهايو ويو، جڏهن ته 2024-2020 لاءِ نئين اسٽريٽجي جو پهريون تجويز ڪيل مسودو به وزيراعظم کي پيش ڪيو ويو، بورڊ ميمبرن جي تجويزن موجب مسودي کي حتمي شڪل ڏني ويندي. اجلاس ۾ وزيراعظم عمران خان کي بريفنگ ڏني وئي ته اسپيشل اقتصادي رونز قانونن کي ڪاروبار دوست بڻائڻ جو جائزو ورتو پيو وڃي، ڪاروبار جي حوالي سان وفاقي ۽ صوبائي قانونن کي هم آهنگ ۽ هڪ جهڙو ڪرڻ جو عمل شروع ڪيو ويو آهي. وزيراعظم سيڙپڪاري بورڊ چيئرمين کي وفاقي ۽ صوبائي قانون هڪ جهڙا ڪرڻ ۽ قانونن کي هم آهنگ ڪرڻ لاءِ عمل هڪ مهيني ۾ مڪمل ڪرڻ جي هدايت ڪئي. عمران خان چيو ته لاڳاپيل قانونن کي صوبن سان سهڪار سان وڌيڪ آسان بڻايو ويندو، سيڙپڪاري بورڊ جي سفارشن جي روشني ۾ غير ضروري شرطن کي ختم ڪيو وڃي.

 

ويڊيو اسڪينڊل، شفاف جاچ جو مطالبو، ادارن کي تڪراري نه بڻجڻ گهرجي: بلاول زرداري

سکر (اين اين آءِ) پ پ چيئرمين بلاول ڀٽو چيو آهي ته پي ٽي آءِ جي اپوزيشن جي خلاف هر هڪ سازش ناڪام ٿيندي، سينيٽ چيئرمين ۽ ڊپٽي چيئرمين اپوزيشن مان ئي هوندو، گهوٽڪي ۾ اليڪشن کي سليڪشن بڻائڻ جي ڪوشش ڪئي پئي وڃي، گهوٽڪي جي عوام کان جمهوري حق کسيو پيو وڃي، گهوٽڪي ۾ پ پ جي ڪاميابي يقيني آهي، پي ٽي آءِ اليڪشن نه پر سليڪشن تي يقين رکي ٿي، اسان جا ادارا ڪنهن به اليڪشن لاءِ تڪراري ٿيڻ نه گهرجن، ادارا جيترا عمران خان آهن ايترا منهنجا به آهن، سنڌ جو مقابلو ٻين صوبن سان نه آهي ٻاهرين ملڪ سان ٿي رهيو آهي، پ پ عوام جي خدمت تي يقين رکي ٿي، اقلتين کي تحفظ ڏيڻ پ پ جو منشور آهي، سنڌ حڪومت ذريعي بنا وياج قرض ڏنا پيا وڃن، مفت علاج ۽ صحت اسان جي اوليت رهي آهي، مهانگائي، عوام دشمن بجيٽ جي خلاف احتجاج ڪري رهيا آهيون، ادارن کي غير تڪراري ٿيڻو پوندو، وڊيو اسڪينڊل سواليا نشان آهي، عدالت ان جي جاچ ڪري، ڪنهن به جج تي دٻاءَ وجهڻ جي جرئت نه هئڻ گهرجي، جمعي تي سکر ۾ پريس ڪانفرنس ڪندي هن چيو ته اڄ سنڌ جي هر ضلعي ۾ دل جو مفت علاج ٿي رهيو آهي، سڀ کان مهانگو علاج غريب عوام کي مفت فراهم ڪري رهيا آهيون، معياري انفرا اسٽريڪچر تحت سنڌ ۾ دل جون اسپتالون هلائي رهيا آهيون، هن چيو ته گمبٽ ۾ اسپتال ٺاهي آهي، ڪوشش آهي ته سکر ۾ به ٺهي، اسپتالن ۾ ڊاڪٽرن ۽ نسرن جي گهوٽ مڪمل ڪرڻ چاهيون ٿا، اسان چاهيون ته ايندڙ نسلن کي روزگار ۽ تعليم ملي، بلاول ڀٽو چيو ته ڪوشش آهي ته گهٽ پيسن ۽ گهڻي محنت سان منصوبا مڪمل ڪريون، ڪم ٿيندا رهيا ته عوام جا مسئلا حل ٿيندا رهندا، پبلڪ پرائيويٽ پارٽنرشپ تحت چائلڊ ايمرجنسي سينٽر کولينداسين، ڪورنگي ڪراچي ۾ چلڊرين ايمرجنسي سينٽر ٺاهيو آهي، پبلڪ پرائيويٽ پارٽنرشپ تحت ڪارڪردگي سڀني جي اڳيان آهي، هن چيو ته وفاقي حڪومت معيشت جو ٻيڙو ٻوڙي ڇڏيو آهي، وفاق صوبن جو معاشِ قتل ڪري رهيو آهي، هن چيو ته غير مسلم پاڪستان به منهنجا ڀائرن آهن، اقلتين جو تحفظ ڪرڻ پ پ  جو منشور آهي، جڏهن ته اقلتين جي تحفظ جي بل تي اڃاتائين ڪو عمل ناهي ٿي سگهيو، بلاول ڀٽو جج ارشد ملڪ جي مبينا وڊيو جي حوالي سان ڳالهائيندي چيو ته مون کي خبر نه آهي ته هن وڊيو ۾ ڪيتري سچائي آهي، اڄ هڪ جج کي هٽآيو ويو آهي، اميد ته شفاف جاچ ٿيندي، هن چيو ته ڇا اهو اتفاق آهي ته جو ساڳيو جج نواز شريف ۽ زرداري جا ڪيس ٻڌي رهيو آهي، اميد آهي ته ان الزام کي سنجيندگي سان ورتو ويندو، هن چيو ته گهوٽڪي جي عوام فيصلو ڏئي ڇڏيو، جيڪو سليڪٽيڊ کي پسند نه آيو، عام چونڊن ۾ به سليڪشن ٿي، ڀل دٻاءُ وجهو فتح پ  پ جي ٿيندي ۽ گهوٽڪي ۾ اليڪشن کي سليڪشن بڻائڻ جي ڪوشش ڪئي پئي وڃي. هن چيو ته هر سنڌي ۽ هر پاڪستاني اسان کي ووٽ ڏيندو.

 

مسلم ليگ ن من پسند فيصلي لاءِ بليڪ ميل ڪيو، چيو ويو ته استعيفيٰ ڏئي چوان ته فيصلو دٻاءُ ۾ ڪيو ويو : جج ارشد ملڪ

اسلام آباد (اين اين آءِ) احتساب عدالت جي جج ارشد ملڪ دعويٰ ڪئي آهي ته اڳوڻي وزيراعظم نواز شريف جي پٽ حسين نواز العزيزيه ريفرنس جي فيصلي کانپوءِ کيس 50 ڪروڙ رپيا رشوت ڏيڻ جي آڇ ڪئي هئي ۽ استعيفيٰ جي گهر ڪئي هئي، اسلام آباد هاءِ ڪورٽ ۾ جمع ڪرايل حلفي بيان ۾ جج ارشد ملڪ دعويٰ ڪئي ته کيس چيو ويو ته نواز شريف وڌ کان وڌ رقم ڏيڻ لاءِ تيار آهي، چيو ويو ته ڪنهن به ملڪ ۾ رقم ڏيڻ لاءِ تيار آهيون، ناصر جنجوعا ۽ مهر جيلاني چيو ته کيس ن ليگ جي بااثر شخصيتن جي سفارشن تي جج لڳايو، حلفي بيان ۾ ڏنل بيان ۾ آڇ تي ارشد ملڪ چيو ته هو 6 ويسن جي گهر ۾ رهي ٿو، آئين ۽ قانون موجب فيصلو ڏيندو، بيان ۾ چيو ويو ته ٻڌڻي دوران ٻنهي شخصيتن رابطو ڪيو ۽ ناصر جنجوعا 20 ملين يورو رشوت جي آڇ ڪئي، جنهن تي هن چيو ته هو پنهنجي حلف سان غداري نه ڪندو، رشوت جي آڇ نه مڃڻ تي ناصر بٽ ڌمڪي ڏني، ناصر بٽ چيو ته نواز شريف جا مون تي وڏا احسان آهن، نواز شريف قتل جي 5 ڪيسن مان بچايو، نواز شريف لاءِ سڀ ڪجهه ڪرڻ لاءِ تيار آهيان، ارشد ملڪ چيو ته ناصر بٽ ان جي ملتان جي وڊيو ڏيکاري بليڪ ميل ڪرڻ جي ڪوشش ڪئي، وڊيو ڏيکاري چيو ويو ته نواز شريف جي دلجاءِ لاءِ بيان رڪارڊ ڪرايو، جنهن تي بيان رڪارڊ ڪرڻ کان انڪار ڪيو، کيس هر هر هي جملو ورجائڻ تي مجبور ڪيو ته فيصلو دٻاءَ تي ڏنو، هن اهو جملو ورجائڻ کان انڪار ڪري ڇڏيو، جج جي حلفي بيان موجب ناصر جنجوعا ان جي مرضي کانسواءِ ان جي آڊيو رڪارڊ ڪري نواز شريف کي ٻڌائي، ناصر بٽ چيو ته نواز شريف هن آڊيو مان مطمئن نه آهي، ناصر بٽ چيو ته توهان کي نواز شريف سان ملڻُو پوندو، 6 اپريل 2019 تي جاتي امره ۾ نواز شريف سان ملاقات ٿي، ناصر بٽ نواز شريف جي موجودگي ۾ چيو ته فيصلو دٻاءَ ۾ ڏنو، ارشد ملڪ موجب ان نواز شريف جي منهن تي چيو ته مان ميرٽ تي فيصلو ڏنو، نواز شريف کي سندس ڳالهه  نه وڻي، ان جي بيان کانپوءِ نواز شريف سان ملاقات ختم ٿي وئي، ناصر بٽ چيو ته فيصلو ٻڌائي چڪا، هاڻ نواز شريف لاءِ ڪجهه ڪرڻو پوندو، ناصر بٽ بليڪ ميل ڪري آڊيو رڪارڊ ڪرڻ جي ڪوشش ڪئي، ناصر بٽ چيو ته نواز شريف جي سامهون منهنجي مرضي جو بيان ناهي ڏنو، هڪ ٻيو ڪم ڪريو، نواز شريف جي اپيل جو جائزو وٺو ۽ تجويز ڏيو، حلفي بيان ۾ هن چيو ته ناصر بٽ اپيل جو مسودو کڻي ان جي گهر آيو، نه چاهيندي نواز شريف جي اپيل جو مسودو پڙهيو، نواز شريف جي پريس ڪانفرنس مان خبر پئي ته اپيل پڙهڻ وقت وڊيو رڪارڊ ڪئي وئي، جج ارشد ملڪ حلفي بيان ۾ ٻڌايو ته هو مئي 2019 تي خاندان سان گڏ عمري ويو، پهرين جون تي ناصر بٽ سان مسجد نبي جي ٻاهران ملاقات ٿي، ناصر بٽ وڊيو جو حوالو ڏئي بليڪ ميل ڪيو، حلفي بيان موجب ارشد ملڪ کي حسين نواز سان ملاقات ڪرڻ تي ضد ڪيو ويو جنهن تي هن لنوائڻ جو مظاهرو ڪيو، حسين نواز 50 ڪروڙ رپيا رشوت جي آڇ ڪئي، سڄي خاندان کي يو ڪي، ڪينڊا يا مرضي ۽ خواهش موجب ڪنهن به ملڪ ۾ سيٽل ڪرائڻ جو چيو ويو، اولاد لاءِ نوڪري ۽ کين نفعو ڏيندڙ ڪاروبار ڪرائڻ جي آڇ ڪئي وئي، جج ارشد ملڪ چيو ته هن رشوت وٺڻ کان انڪار ڪيو ته کيس ڌمڪي طور تڪراري وڊيو ڏيکاري وئي.

 

پاڪستان هائوسنگ منصوبو نئين روشن پاڪستان ۽ فلاحي رياست جي قيام ڏانهن اهم قدم آهيۡ: فردوس عاشق

اسلام آباد (اين اين آءِ) وزيراعظم جي سڌسماءِ جي خاص مددگار فردود عاشق اعواڻ چيو آهي ته عمران خان اهڙي رياست اڏڻ جو بنياد وجهڻ چاهي ٿو جيڪا شهرين جي تحفظ ۽ ترقي جي ذميواري کڻي اهڙي رياست جيڪا حڪمرانن جي مفاد بدران عوام جي حقن جي نگهبان هجي ٽيوٽر تي پنهنجي هڪ بيان ۾ هن چيو ته پاڪستان هائوسنگ منصوبو عوام کي پنهنجي ڇت ڏيارڻ جو خواب پورو ڪرڻ لاءِ وزيراعظم عمران خان جو عملي قدم آهي هن چيو ته ڪمزور ۽ پگهاردار طبقي لاءِ هي اسڪيم کين نئون اعتماد ڏيئي رهي آهي سندن اميدون پوريون ٿيڻ جو ذريعو بڻجي رهي آهي هن چيو ته هي اسڪيم اڏاوت بابت ڪيترن ئي ٻين صنعتن کي هٿي ڏيڻ جو به ذريعو بڻجندي هن چيو ته هي نئون روشن پاڪستان ۽ فلاحي رياست جي اڏجڻ ڏانهن هڪ اهم قدم آهي.

 

پاڪستان خطي ۾ امن ۽ ترقي جو حامي آهي، افغان امن عمل ۾ پنهنجو مصالحت وارو ڪردار نيت سان ادا ڪري رهيو آهي: شاهه محمود

اسلام آباد (اين اين آءِ) پرڏيهي وزير شاهه محمود قريشي چيو آهي ته پاڪستان خطي ۾ امن ۽ ترقي جو حامي آهي، ان موقف تحت پاڪستان افغان امن عمل ۾ پنهنجو مصالحت وارو ڪردار خلوص ۽ نيت سان ادا ڪري رهيو آهي، هي پاڪستان جي انهن ڪوششن کي هٿي ملي رهي آهي، پاڪستان اڳيان معاشي چئلينجز کي منهن ڏيڻ لاءِ معاشي سفارتڪاري کي ڪتب آڻي ٻاهرين سيڙپڪاري کي هٿي وٺرائڻ جي حوالي سان صلاح مشورا ڪيا ويا، جمعي تي پرڏيهي معاملن بابت مشاورتي ڪونسل جو اجلاس پرڏيهي وزارت ۾ شاهه محمود قريشي جي صدارت ۾ ٿيو، جنهن ۾ پرڏيهي سيڪريٽري سهيل محمود، اڳوڻا سفير، اڳوڻا پرڏيهي سيڪريٽري، بين الاقوامي معاملن جا ماهر ۽ ٻين شرڪت ڪئي، اجلاس ۾ وزيراعظم عمران خان جي امڪاني آمريڪا جي دوري، افغان امن عمل سميت اهم علائقائي ۽ عالمي معاملن تي بحث ڪيو ويو، پرڏيهي وزير مشاورتي ڪونسل جي ميمبرن کي پنهنجي تازي برطانيا جي دوري، دولت مشترڪه جي اجلاس ۽ اتي ٻين ملڪن جي پرڏيهي وزيرن سان ٿيندڙ ٻه طرفي ملاقاتن جي تفصيل کان آگاهه ڪيو، پرڏيهي وزير چيو ته سيڪريٽري جنرل ڪامن ويلٿ دولت مشترڪه جي فعال ميمبر طور پاڪستان جي ڪردار کي ساراهيو، اجلاس ۾ وزيراعظم عمران خان جي امڪاني آمريڪا جي دوري ۽ ان دوري جي ٻه طرفي پاڪ آمريڪا لاڳاپن تي اثرن جي حُوالي سان تفصيلي ڳالهه ٻولهه ٿي.

 

هتي نوڪريون ۽ الائونس ڏيڻ لاءِ ناهيون ويٺا، قانون رستو نٿو ڏئي ته ڪا همدردي نٿا ڪري سگهون: چيف جسٽس

اسلام آباد (ويب ڊيسڪ) سپريم ڪورٽ پرڏيهي وزارت جي ملازم ممتاز احمد جي فارين الائونس جي درخواست رد ڪندي ريمارڪس ڏنا آهن ته اسان هتي نوڪريون ۽ الائونس ڏيڻ لاءِ ناهيون ويٺا، اسان کي پنهنجو ڪم قانون تحت ڪرڻو آهي. سپريم ڪورٽ ۾ چيف جسٽس آصف کوسا جي سربراهي ۾ بئنج پرڏيهي وزارت جي ملازم ممتاز احمد کي فارين الائونس جي درخواست تي ٻڌڻي ڪئي. ٻڌڻي دوران وڪيل ممتاز احمد چيو ته عدالت معاملي جو ٻيهر جائزي لاءِ حڪم ڏنو، عدالتي حڪم باوجود وزارت معاملي جو جائزو نه ورتو. چيف جسٽس جو چوڻ هو ته کاتو پنهنجي قانونن ۾ ترميم ڪرڻ جو اختيار رکي ٿو، جنهن تي وڪيل جو چوڻ هو ته عدالت ٿورو دروازو کولي ته جيئن هوا اچي. چيف جسٽس چيو ته اسان هتي همدردي لاءِ ناهيون ويٺا، رستو قانون مان نڪرندو، جيڪڏهن قانون رستو نٿو ڏئي ته همدردي به نٿا ڪري سگهون، هتي نوڪريون ۽ الائونس ڏيڻ لاءِ ناهيون ويٺا، اسان کي پنهنجو ڪم قانون تحت ڪرڻو آهي. پوءِ سپريم ڪورٽ پرڏيهي وزارت جي ملازم ممتاز احمد جي فارين الائونس جي درخواست رد ڪري ڇڏي.

 

وفاقي سرڪار پنجن ريگوليٽري ادارن جو ڪنٽرول وزارت کان وٺي ڪابينا ڊويزن کي ڏيڻ جي تجويز ڏئي ڇڏي

اسلام آباد ( ويب ڊيسڪ ) وفاقي سرڪار پنجن ريگوليٽري ادارن جو ڪنٽرول وزارت کان وٺي ڪابينا ڊويزن کي ڏيڻ جي تجويز ڏئي ڇڏي. وفاقي سرڪار پنجن ريگوليٽري ادارن بابت ليگي حڪومت جو فيصلو واپس وٺڻ جي تياري ڪري ورتي آهي. نيپرا، اوگرا، پيپرا، پي ٽي اي ۽ فريڪوئنسي ايلو ڪيشن بورڊ جو انتظامي ڪنٽرول وزارت کان واپس وٺڻ جي تجويز سامهون آئي آهي. نيپرا جو انتظامي ڪنٽرول پاور ڊويزن کان ۽ اوگرا جو انتظامي ڪنٽرول پئٽروليم ڊويزن کان ۽ پيپرا جو انتظامي ڪنٽرول ناڻي واري وزارت کان واپس وٺڻ جي تجويز ڏني وئي آهي.  پي ٽي اي، فريڪونسي ايلوڪيشن بورڊ جو انتظامي ڪنٽرول آءِ ٽي وزارت کان واپس وٺڻ جي تجويز ڏني وئي آهي.  ذريعن موجب ادارن کي ٻيهر ڪابينا ڊويزن جي ماتحت ڪرڻ لاءِ رولز آف بزنس ۾ ترميم ڪئي ويندي، جڏهن ته قانون واري وزارت پنجن ادارن کي ڪابينا ڊويزن جي ماتحت ڪرڻ جي تجويز سان اختلاف ڪيو آهي.

 

2030ع تائين ھر چئن مان هڪ پاڪستاني ٻار پرائمري اسڪول جي تعليم مڪمل نه ڪري سگھندو : يونيسيف

نيو يارڪ (ويب ڊيسڪ) يونيسڪو چيو آهي ته 2030ع تائين ھر چئن مان هڪ پاڪستاني ٻار پرائمري اسڪول جي تعليم مڪمل نه ڪري سگھندو، 12 ورهين جي تعليم لاءِ هدف جو اڌ حصو ئي حاصل ٿي سگھندو. گڏيل قومن جي ايجوڪيشن، سائنٽفڪ ۽ ڪلچرل آرگنائيزيشن (يونيسڪو) موجوده شرح ۾ هاڻ به 50 سيڪڙو ٻار سيڪنڊري کان اڳتي تعليم حاصل نٿا ڪري سگھن. مستحڪم ترقي جي هدفن (ايس ڊي جي) جي 2030ع جي ڊيڊ لائين جي حوالي سان يونيسڪو نيويارڪ ۾ گڏيل قومن جي اعليٰ سطحي سياسي فورم ۾ ٻڌايو ته دنيا پنهنجي ڪاڪردگي کي تيز ڪرڻ بنا تعليم جي حوالي سان ڪيل پنهنجا واعدا پورا ڪرڻ ۾ ناڪام ٿيندي، سال 2030ع ۾ جتي سڀني ٻارن کي اسڪول ۾ هجڻ گھرجي ها، اتي 6 کان 17 ورهين جي عمر جي هر ڇهن مان هڪ ٻار اسڪول ۾ موجود نه هوندو. ڪارڪردگي جي حساب سان 40 سيڪڙو ٻار 2030ع تائين سيڪنڊري تعليم مڪمل نه ڪري سگهندا، جڏهن ته نوان تعليمي هدف، ايس ڊي جي- 4 سڀني ملڪن کي ٻارن جي اسڪول وڃڻ ۽ تعليم حاصل ڪرڻ جي خاطري تي زور ڏنو آهي موجوده شرح جي حساب سان تعليم حاصل ڪرڻ جي شرح لاطيني آمريڪا ۽ وچين آمدني وارن ملڪن ۾ ناهي وڌي رهي، جڏهن ته آفريقي ملڪن ۾ ان ۾ گھٽتائي آئي آهي، عالمي سطح تي ڪارڪردگي ۾ تيزي بنا 20 سيڪڙو نوجوان ۽ 30 سيڪڙو بالغ مقرر مدو پورو ٿيڻ تائين به پڙهڻ جي قابل نه هوندا. مضبوط ترقي جي 2030ع جي ايجنڊا موجب ڪنهن به ٻار کي تعليم کان محروم ٿيڻ کان بچائڻ آهي پر غريب ملڪن جي 20 سيڪڙو غريب ماڻهن مان رڳو 4 سيڪڙو ٻار ئي اپر سيڪنڊري تعليم مڪمل ڪري سگھندا آهن، جڏهن ته امير ماڻهن ۾ ان جي شرح 36 سيڪڙو آهي، تعليمي ترقي ۾ تيزي لاءِ مالي امداد جي به کوٽ آهي. رپورٽ موجب ان هدف کي حاصل ڪرڻ لاءِ هر سال 39 ارب ڊالر جو خال پيدا ٿيندو آهي ۽ 2010ع کان تعليمي امداد ۾ به ڪا واڌ سامهون ناهي آئي، ان کانسواءِ اڌ کان به گھٽ ملڪ ڪارڪردگي تي نظر رکڻ لاءِ ڄاڻ ئي فراهم ناهن ڪري رهيا. سموري صورتحال تي يونيسڪو جي شماريات کاتي جي ڊائريڪٽر سلويا مونٽويا جو چوڻ هو ته ملڪن کي پنهنجا واعدا پورا ڪرڻا پوندا، هدف رکڻ جو مقصد ڇا جيڪڏهن اسان کي ڄاڻ ئي فراهم نه ڪئي وڃي؟ تنهنڪري بهتر فنانس ۽ رابطن جي ڊيڊ لائين جي ويجهو پهچڻ کان اڳ ڄاڻ جي خال کي ڀرڻ جي سخت ضرورت آهي.