تازيون خبرون
آخري دم تائين وڙهنداسين، مودي ياد رک سر جو جواب پٿر سان ڏينداسين: عمران خان - “آرٽيڪل 149” جو پڙاڏو: پ پ جو وفاقي سرڪار کان استعيفيٰ ۽ نئين سر چونڊن جو مطالبو - سنڌو ديش ڳالهه مناسب ناهي، صوبائي خودمختياري تي يقين رکون ٿا: شاهه محمود - آفيسر شاهي هلڻ نه ڏبي، عهدن تي ويٺل ماڻهن جي اڪثيريت عوام جي خدمت نٿي ڪري: سپريم ڪورٽ - اسان کي هر محاذ تي سفارتي ڪاميابي ۽ ڀارت کي شڪست ٿي رهي آهي: فردوس عاشق اعواڻ - مهاجرن جو قرض اسان کي نه وسارڻ گهرجي (اسد عمر) سڀ کان پهرين بنگال ۽ سنڌ ٺهراءُ پاس ڪيا: خورشيد شاهه - ڪشمير جو مسئلو حل ڪرڻ کان سواءِ ڳالهيون نٿيون ٿي سگهن، ٽيبل هيٺان ڪشميرين جو سمجهوتو ناهي ٿيڻ وارو: شيخ رشيد - بلاول ڀٽو زرداري جي بيان مان ملڪ دشمني ڪڍي ڏيکاريو: پيپلز پارٽي جو حڪومتي ميمبرن کي چئلينج - ڪراچي ۾ ٻوريون وجهي سيوريج لائيون ۽ گٽر بند ڪندڙن جي ڳولا جي ذميواري رينجرز حوالي - آزاد ڪشمير تي قبضي لاءِ مڪمل تيار آهيون، آخري فيصلو حڪومت ڪندي: ڀارتي آرمي چيف پاران ڌمڪي

Daily Archives: July 6, 2019

آصف زرداري ۽ نواز شريف قوم کي قرضي ڪيو، شهباز شريف کي موت جي ڳڻتي آهي: عمران خان

اسلام آباد (اين اين آءِ) وزيراعظم عمران خان بنا نالي پراپرٽي جي سڃاڻپ ڪرڻ تي انعام جي رقم 3 سيڪڙو مان وڌائي 10 سيڪڙو جو اعلان ڪندي چيو آهي ته شهباز شريف چوي ٿو ته ايتري سزا ڏيجو جيتري سڀاڻي برداشت ڪري سگهو، مان ته موت کان به نٿو ڊڄان، پاڪستان جي تاريخ ۾ پهريون ڀيرو غربت گهٽائڻ جو پروگرام آڻي رهيا آهيون ان ۾ هر هڪ وزارت جو ڪو نه ڪو ڪردار هوندو، ڪمزور طبقي کي مٿي اچڻ جو موقعو ڏنو ويندو، 60 سيڪڙو پاڪستاني 30 سالن جي عمر کان گهٽ آهن، نوجوانن کي هنر سيکاريو وڃي ته نوجوان اسان جي طاقت بڻجندا، سرڪاري اسپتالن ۾ صحت ۽ صفائي جو ڪو انتظام نه آهي، جمعي تي هتي غربت ختم ڪريو پروگرام جي افتتاح واري تقريب کي خطاب ڪندي وزيراعظم چيو ته پاڪستان جي تاريخ ۾ پهريون ڀيرو غربت ختم ڪرڻ جو پروگرام آڻي رهيا آهيون، ان ۾ هر هڪ وزارت جو ڪو نه ڪو ڪردار هوندو، ڪمزور طبقي کي مٿي اچڻ جو موقعو ڏنو ويندو، 60 سيڪڙو پاڪستاني 30 سالن جي عمر کان گهٽ آهن، نوجوانن کي هنر سيکاريو وڃي ته نوجوان اسان جي طاقت بڻجندا، سرڪاري اسپتالن ۾ صحت ۽ صفائي جو ڪو انتظام نه آهي، هن چيو ته مان 18 سالن جو هيس جڏهن برطانيا ويس، جيڪڏهن مان اتي نه وڃي ها ته مون کي اها خبر ئي نه پوي ها ته فلاحي رياست ڇا کي چيو وڃي ٿو، انسانيت ڇا هوندي آهي، وزيراعظم عمران خان چيو ته واحد ملڪ جيڪو اسلام جي نالي تي ٺهيو هو ۽ ملڪ ۾ مون کي انسانيت نظر نه آهي، عمران خان چيو ته جڏهن مان پنهنجي تاريخ پڙهي ته احساس ٿيو ته هي رياست مديني جون خوبيون هيون جيڪا دنيا جي پهرين فلاحي رياست هئي، اسان کي ڪٿي به اهو نه پڙهايو ويو ته رياست مدينو ماڊل اسٽيٽ هئي، وزيراعظم چيو ته رياست مديني ۾ غريبن جو احساس هو، وسيلا نه هئا پر ڪمزور طبقي جو احساس هو، ڪجهه ماڻهو دين کي سياسي مقصدن لاءِ استعمال ڪن ٿا، وزيراعظم چيو ته اڳوڻن حڪمرانن علاج لاءِ هڪ سٺي اسپتال نه ٺاهي، اڳوڻا حڪمران رڳو ترقي جي دعويٰ ڪندا هئا، هن چيو ته ترقي تڏهن ٿيندي جڏهن اسان ۾ احساس هوندو، هيٺين طبقي تي ظلم ٿي رهيو آهي، هر هنڌ ناانصافي آهي، خانگي اسپتالن ۾ امير ۽ سرڪاري اسپتالن ۾ غريب آهن، هن چيو ته اڄ ڳڻتي جوڳا انگ اکر آيا آهن ته پاڪستان ۾ 5 سيڪڙو هيپاٽائيٽس سي جي مرض ۾ وڪوريل آهن جيڪا دنيا ۾ في ماڻهو جي حوالي سان تمام گهڻي آهي، هن چيو ته اسپتالن ۾ استعمال ٿيل سرجن استعمال ڪئي وڃي ٿي ڇو ته غريب ماڻهو جو ڪو هال نه آهي، عمران خان چيو ته غريب طبقو جيل ۾ وڃي ٿو ته کيس ٻاهران علاج ڪرائڻو پوي ٿو، 30 سالن کان اقتدار ۾ رهيا هڪ اهڙي اسپتال نه ٺهرائي جنهن ۾ پنهنجو علاج ڪرائي سگهن، عمران خان چيو ته شهباز شريف چوي ٿو ته ايتري سزا ڏجو جيتري برداشت ڪري سگهو، مان ته موت برداشت ڪري سگهان پر توهان موت برداشت نٿا ڪري سگهو ڇو ته توهان جي دولت ٻاهر پيل آهي توهان ان کي انجواءِ ڪرڻ چاهيو ٿا تنهنڪري توهان کي ڳڻتي آهي ته ڪٿي موت نه اچي وڃي، هن چيو ته آصف زرداري ۽ نواز شريف اقتدار ۾ رهندي دبئي ۽ لنڊن جا 40-40 دورا ڪيا هي سڀ دورا قوم جي پيسن سان ڪيا ويا، انهن قوم کي قرضي ڪري ڇڏيو ۽ قوم جي دولت پاڻ تي خرچ ڪندا رهيا.

 

سليڪٽڊ وزيراعظم ملڪي معيشت، قدرن ۽ طاقت کي تباهه ڪرڻ چاهي ٿو: پيپلز پارٽي

اسلام آباد ( ويب ڊيسڪ ) پ پ چيئرمين بلاول ڀٽو زرداري چيو آهي ته سليڪٽڊ وزيراعظم ملڪي معيشت، قدرن ۽ طاقت کي تباهه ڪرڻ چاهي ٿو. ڪاري ڏينهن تي هڪ بيان ۾ بلاول ڀٽو زرداري چيو ته آمرن ۽ سندن گڏن معاشري، معيشت ۽ جاگرافي کي شديد نقصان پهچايو آهي، ضياءَ منشيات ۽ غير قانوني هٿيارن جي لعنت سان ملڪ ۾ نفرت، لسانيت ۽ مذهبي نفرت جا ٻج پوکيا،  اهو سڀ ڪجهه تنهن ڪري ڪيو ويو ته جيئن معاشرو پنهنجي جمهوري ۽ معاشي طاقت کان محروم ٿي وڃي.  هن چيو ته پ پ ملڪ ۾ جمهوريت جي مڪمل بحالي تائين سک جو ساهه نه کڻندي، جمهوريت بهترين انتقام جي نالي هيٺ آمريتي عنصر ۽ سندن سليڪٽڊ وزيراعظم خلاف جدوجهد جاري رکي ويندي، سليڪٽڊ وزيراعظم ملڪ جي هر اداري کي پاڻ وانگر سليڪٽڊ بڻائڻ چاهي ٿو، سليڪٽڊ وزيراعظم ملڪي معيشت، قدرن ۽ طاقت کي تباهه ڪرڻ لاءِ بضد آهي.  بلاول ڀٽو زرداري چيو ته اڳوڻي صدر آصف علي زرداري خلاف انتقامي ڪارروايون 5 جولاءِ 1977ع جو تسلسل آهن، آمريتي عنصر ۽ جمهوريت پسندن وچ ۾ اڃا جنگ جاري آهي، ڪجهه به ڪيو آخري فتح پاڪستاني عوام جي هوندي، اسان ملڪ مان غربت، بدحالي ۽ معاشي تباهي آڻيندڙن کي شڪست ڏئي پاڪستان کي بچائينداسين. ٻئي طرف  اڳوڻي صدر آصف علي زرداري چيو آهي ته ڪجهه عنصر ارڙهين ترميم کي ختم ڪرڻ چاهين ٿا.  پنج جولاءِ بابت هڪ بيان ۾ اڳوڻي صدر آصف علي زرداري چيو ته پنج جولاءِ تاريخ جو هڪ ڪارو ڏينهن آهي، دنيا جي ڪابه طاقت اسان کي آئين جي حڪمراني ۽ پارليامانيٽ جي بالادستي جي اصول تان هٽائي نه ٿي سگهي، پنج جولاءِ معاشري ۾ بگاڙ پيدا ڪيو، ان ڏينهن جمهوريت تي راتاهو هڻي فرقيوار تعصب، ڪلاشنڪوف ڪلچر ۽ هيروئن جي لعنت کي هٿي ڏني وئي. هن چيو ته عدم برداشت ۽ انتها پسندي کي جنم ڏيندڙ سوچ کي شڪست ڏيڻ جي ضرورت آهي. هن چيو ته غير جمهوري عنصرن وٽ رڳو الزام هڻڻ هٿيار هوندو آهي ته جيئن جمهوري سوچ کي دٻايو وڃي. سندس چوڻ هو ته ڪجهه عنصر ارڙهين ترميم کي ختم ڪرڻ چاهين ٿا جنهن سان صوبن کي خودمختياري ملي آهي. آصف علي زرداري چيو ته آئين کان منهن موڙڻ جا خراب نتيجا نڪرندا، جيڪي ملڪ برداشت نه ٿو ڪري سگهي، مضبوط ۽ مستحڪم جمهوريت ۾ ئي ملڪ جي بقا ۽ سلامتي آهي.

 

ڪراچي جي اسٽيڪ هولڊرن جو اجلاس، پاڻي مسئلي جي حل لاءِ ڪميٽي قائم

ڪراچي( اسٽاف رپورٽر ) ڪراچيءَ ۾ پاڻي جي مسئلي تي غور لاءِ سنڌ جي وڏي وزير مراد علي شاهه جي صدارت هيٺ اسٽيڪ هولڊرن جي ڊگهي ڪانفرنس ٿي جنهن ۾ مسئلن جي حل لاءِ هڪ ڪميٽي قائم ڪئي وئي آهي.  ڪانفرنس ۾ ڪراچي جي ميئر وسيم اختر، ڪمشنر ڪراچي، سياسي پارٽين جي اڳواڻن، واپاري اڳواڻن کانسواءِ زندگي جي مختلف شعبن سان تعلق رکندڙ شخصيتن شرڪت ڪئي.  اجلاس کانپوءِ وڏي وزير مراد علي شاهه چيو ته ڪميٽي جوڙي آهي جنهن ۾ سمورن اسٽيڪ هولڊرن جا نمائندا شامل هوندا ۽ ڪميٽي هر 15 ڏينهن کانپوءِ ملاقات ڪندي جيڪا پاڻي جي ليڪيج، پاڻي چوري ۽ ورهاست کي مانيٽر ڪندي.  هن چيو ته 250 بلين رپيه گهرجن جنهن لاءِ ورلڊ بئنڪ سان ڳالهائي رهيا آهيون ۽ جڏهن ورلڊ بئنڪ سان ڳالهايون ٿا ته هو چون ٿا ته پهريون ڪي ڊبليو ايس بي کي پهريون ٺيڪ ڪيو، ڪي ڊبليو ايس بي کي ٻيهر تيار ڪيو ته جيئن جيڪو اسان قرض ڏيون اهو واپس به ٿي سگهي.  مخالف ڌر جي اڳواڻ فردوس شميم چيو ته واٽر بورڊ کي مسئلن جو حل ٻڌائڻ گهرجي، اهي مسئلا رات وچ ۾ پيدا نه ٿيا آهن، جيئن آبادي وڌي پاڻي جي کوٽ پيدا ٿيندي وئي.  ايم ڪيو ايم اڳواڻ خواجه اظهار الحسن چيو ته ڪراچي جي مسئلن جو حل وڏي وزير ۽ مڪاني ادارن جي کاتي وٽ آهي، پاڻي جي چوري اهم مسئلو آهي، جنهن کي روڪڻي پوندو. ڪي فور منصوبي جي پراجيڪٽ ڊائريڪٽر اسد ضامن چيو ته  ڪي فور جو روٽ 2007ع ۾ تيار ڪيو ويو، ان روٽ جي سليڪشن جي بنيادن تي فزيبلٽي تيار ڪئي وئي. هاڻي 25 بلين رپين ۾ اها رٿ تيار ڪرڻ ممڪن ناهي.  تحريڪ انصاف اڳواڻ حليم عادل شيخ چيو ته واٽر بورڊ کي ٺيڪ ڪرڻ جي ضرورت آهي، پاڻي چوري خلاف سخت قدم کڻڻ جي ضرورت آهي، اسان ڪي فور فنڊن لاءِ وفاق وٽ وڃڻ لاءِ تيار آهيون.  جي ڊي اي اڳواڻ نصرت سحر عباسي چيو ته گرينڊ ڊيمو ڪريٽڪ الائنس کي اڄ طلب ئي نه ڪيو ويو، ڪنهن اسان کي دعوت ئي نه ڏني.اطلاعات، قانون ۽ اينٽي ڪرپشن کاتن بابت وزيراعليٰ سنڌ جي صلاحڪار بئريسٽر  مرتضيٰ وهاب چيو آهي ته سنڌ جي وزيراعليٰ سيد مراد علي شاهه ڪراچي ۾ پاڻي جي مسئلي جي حل لاءِ اڄ اسٽيڪ هولڊر ڪانفرنس ڪوٺائي اسٽيڪ هولڊر ڪانفرنس جو مقصد پاڻي جي مسئلي جو پائيدار حل تلاش ڪرڻ هو ان لاءِ اسان کي مقامي حڪومت سان گڏو گڏ وفاق جو تعاون به گهرجي ڪانفرنس ۾ سياسي جماعتن سان گڏوگڏ تاجر برادري جي نمائندا به شريڪ هئا. جنهن ۾ واٽر بورڊ ۽ ڪي فور جي نمائندن بريفنگ ڏني. اها ڳالهه هن پاڻي جي مسئلي جي حل لاءِ ڪوٺايل اسٽيڪ هولڊر ڪانفرنس کانپوءِ صحافين کي پريس بريفنگ ڏيندي ڪئي. ان موقعي تي هن سان گڏ بلديات وارو صوبائي وزير سعيد غني پڻ موجود هو صلاحڪار اطلاعات ٻڌايو ته وزيراعليٰ سنڌ سيد مراد علي شاهه تاريخ ۾ پهريون ڀيرو واٽر بورڊ جي عملي سمورين سياسي جماعتن صحافين ۽ تاجرن کي گڏ ويهاريو ۽ ايم ڊي واٽر بورڊ موجود پاڻي ۽ گهربل پاڻي جي تفصيل ٻڌائي آهي پي ڊي ڪي فور به بريفنگ ڏني آهي هن ٻڌايو ته اجلاس ۾ سنڌ جي وزيراعلي بريف ڪيو ته منصوبي جي لاڳت ۾ جيڪا واڌ ٿي آهي ان جو ڪهڙو ڪارڻ آهي جڏهن ته نيسپاڪ جي ذريعي ٿرڊ پارٽي کي آڊٽ به ڪيو پيو وڃي سنڌ جي وزيراعلي واضح ڪيو ته 30 ڏينهن اندر هڪ ميٽنگ ٻيهر گهرائي ويندي جڏهن ته بلديات واري وزير جي سربراهي ۾ ڪميٽي به جوڙي وئي جيڪا 15 ڏينهن جي اندر صورتحال جو جائزو وٺندي ۽ سڀن سان مشورو ڪري پاڻي ورهائڻ کي بهتر ڪيو وڃي هن چيو ته اجلاس ۾ سمورين سياسي پارٽين ان ڳالهه تي اتفاق ڪيو ته واٽر بورڊ جي بل جي ادائيگي وقت تي ڪرڻ لاءِ عوام ۾ شعور اڄاگر ڪيو وڃي سنڌ جي وزيراعلي خوشخبري ڏني ته ڌاٻيجي پمپنگ اسٽيشن تي ڪم جاري آهي جنهن کانپوءِ وڌيڪ 8 ايم جي ڊي پاڻي ملندو ڪراچي لاءِ واڌارو پاڻي وٺڻ لاءِ سمورا اسٽيڪ هولڊر ڪوشش ڪندا ڪراچي کي 650 ايم جي ڊي وڌيڪ پاڻي جي ضرورت آهي هن چيو ته اسان سڀني جي سامهون حقيتون رکڻ چاهيون پيا 44 سيڪڙو پاڻي جي انصاف سان ورهاست ڪميٽي جي مشوري سان ٿيندي هن چيو ته اسان جي وفاق کي گذارش آهي ته پاڻي جي اسڪيم جيڪا ورلڊ بئنڪ جي تعاون سان بڻائي وئي آهي وفاق ان ايڪنڪ اجلاس ۾ منظوري ۾ تعاون ڪري مرتضيٰ وهاب ٻڌايو ته اڄ جي اجلاس ۾ هر ڪنهن بهتر رويو رکيو گورنر سنڌ جو آئيني رول آهي انتظامي ڪو رول نه آهي هن جي ڪانفرنس ۾ شرڪت ضروري ڪون هئي پر پي ٽي آئي جي فردوس شميم وفد سان گڏ موجود مرتضيٰ وهاب چيو ته ايم ڪيو ايم ٻاهر نڪري ڪري ڪانفرنس کي ناڪام چئي رهي آهي ته اها سٺي ڳالهه ناهي ايم ڪيو ايم اهو چئي رهي آهي ته ڪانفرنس هنن جي زور تي ڪئي وئي آهي ته هنن کي چوڻ ڏيو اگر انهن جي چوڻ يا زور تي ڪانفرنس ڪئي وئي آهي ته اها به هڪ ذميداري آهي اجلاس ۾ ايم ڪيو ايم پاڪستان جي دوستن احتجاج جي ڪا ڳالهه ناهي ڪئي هنن چيو ته اسان سمورن اسٽيڪ هولڊرن جي ڳالهه ٻڌڻ لاءِ تيار آهيون پر ان معاملي تي سياست نه ڪئي وڃي مرتضيٰ وهاب وڌيڪ چيو ته ڪانفرنس ۾ شرڪت ڪندڙن کي ٻڌايو ويو ته ڪراچي 406 ايم جي ڊي ضرورت کان اڌ 44 سيڪڙو پاڻي ملي رهيو آهي ۽ ڪراچي جي ضرورت جو اڌ پاڻي دستياب آهي ڪانفرنس ۾ پاڻي جي ورهاست انفرااسٽرڪچر کي ٻيهر بڻائڻ جي تجويز ڏني آهي هڪ سوال جي جواب ۾ مرتضيٰ وهاب چيو ته اهو پهريون ۽ آخري اجلاس نه هو مهيني ۾ ٻه ڀيرا اجلاس گهرايو ويندو حن وڌيڪ ٻڌايو ته اجلاس ۾ شرڪٽ ڪندڙن اتفاق ڪيو ته وفاق کان حب پاور پلانٽ مان 20 ميگاواٽ اضافي بجلي گهري ويندي ۽ ڪراچي ۾ پاڻي جي مسئلي کي حل ڪرڻ لاءِ سمورا شريڪ سنجيده اهن ڇو ته پاڻي جو مسئلو سياسي نه پر انساني آهي ان لاءِ سڀ ڪردار ادا ڪندا هن چيو ته وزيراعلي وفاق ۾ حڪرانن کي تجويز ڏني آهي ته حب کي ڪي 1320 ميگاواٽ بجلي ڄامشورو پاور پلانت ويندي آهي اها ڪراچي کي ڏني وڃي صلاحڪار اطلاعات چيو ته ڪي فور جي باري ۾ هڪ منفي تاثر ڏنو ويندو هو اهو اڄ ختم ٿي ويو نيسپاڪ جي رپورٽ ۽ تجويز تي عمل ڪيو ويندو 100 ايم جي ڊي تي ڪم تڪميل جي مرحلي ۾ آهي ڪي فور مڪمل ٿيڻ تائين ننڍا ننڍا منصوبا آڻي رهيا آهيون جنهن سان پاڻي جي گهٽتائي کي پورو ڪرڻ ۾ مدد ملندي وفاق کي ڪي فور لاءِ 650 ايمجھي ڊي پاڻي جي فراهمي يقيني بڻائي هوندي واٽر بورڊ جي بهتري لاءِ هڪ ارب ڊالر جي رقم گهربل اهي ايتري رقم ملي وڃي ته اداري جي ري هيبليشن ٿي سگهي ٿي سنڌ حڪومت واٽر بورد جي لاءِ 28 نئين اسڪيمن لاءِ پئسا رکيا آهن اسان وٽ جيترا وسيلا آهن انهن کي استعمال ڪيو پيو وڃي

 

صادق سنجراڻي خلاف فوري ٺهراءُ آڻڻ تي اتفاق، 25 جولائي تي ڪارو ڏينهن ملهائڻ جو اعلان

اسلام آباد(ويب ڊيسڪ) مخالف ڌر جي رهبر ڪميٽي 9 جولاءِ تي سينيٽ چيئرمين جي خلاف ٺهراءُ آڻڻ ۽ 11 جولاءِ تي نئين چيئرمين جي گڏيل اميدوار جي نالي جي اعلان جو فيصلو ڪيو آهي. تفصيل موجب حڪومت مخالف احتجاجي تحريڪ هلائڻ جي حوالي سان مخالف ڌر جي 9 سياسي پارٽين جي  ميمبرن تي ٻڌل رهبر ڪميٽي جو پهريون اجلاس ٿيو. رهبر ڪميٽي جي سمورن ميمبرن اجلاس ۾ شرڪت ڪئي. اجلاس ۾ ن ليگ مان شاهد خاقان عباسي، احسن اقبال، پيپلز پارٽي مان فرحت الله بابر، نيئر بخاري، جمعيت علماءِ اسلام (ف) مان اڪرم خان دراني، نيشنل پارٽي مان مير حاصل بزنجو، اي اين پي مان ميان افتخار، پشتونخواهه ملي عوامي پارٽي مان عثمان ڪاڪڙ، قومي وطن پارٽي مان هاشر بابر، جمعيت علماءِ اسلام مان اويس نوراني ۽ مرڪزي جمعيت الحديث مان شيفق پسروري شرڪت ڪئي. رهبر ڪميٽي اجلاس کان پوءِ مخالف ڌر اڳواڻن ميڊيا سان ڳالهيون ڪيون، جي يو آءِ (ف) جي اڳواڻ اڪرم دراني چيو ته رهبر ڪميٽي هر 2 مهينن جي لاءِ الڳ ڪنوينر مقرر ڪرڻ جو فيصلو ڪيو آهي ۽ پهرين ٻن مهينن جي لاءِ مون کي ڪنوينر مقرر ڪيو ويو آهي جڏهن ته رهبر ڪميٽي جو ايندڙ اجلاس 11 جولاءِ تي ٿيندو ۽ 25 جولاءِ تي ڪارو ڏينهن ملهايو ويندو. اڪرم دراني چيو ته 9 جولاءِ تي سينيٽ چيئرمين جي خلاف ٺهراءُ جمع ڪرايو ويندو، 11 جولاءِ تي سينيٽ چيئرمين جي لاءِ گڏيل اميدوار جي نالي جو اعلان ڪيو ويندو، 25 جولاءِ تي صوبائي سطح تي جلسا ڪيا ويندا. اڪرم دراني جو چوڻ هو ته ملڪ ۾ نئون سياسي ڍانچو جوڙڻ تي ڪميٽي ڳڻتي جو اظهار ڪيو، جمهوري ماڻهن کي سياست کان رکڻ جي مذمت ڪيون ٿا، اڳوڻي فاٽا ۾ پولنگ اسٽيشن جي اندر فوجي بيهارڻ جي فيصلي کي رد ڪيون ٿا، قبيلائي علائقن ۾ فوج جي  مقرري جو نوٽيفڪيشن رد ڪيو وڃي، اڳوڻي فاٽا جي ٻن ميمبرن جا پروڊڪشن آرڊر جاري ڪيا وڃن جڏهن ته سموريون سياسي پارٽيون گهوٽڪي جي ننڍي چونڊ ۾ پيپلز پارٽي جي حمايت جو اعلان ڪن ٿيون. مسلم ليگ ن جي اڳواڻ شاهد خاقان عباسي چيو ته رهبر ڪميٽي اي پي سي جي فيصلن تي عملدرآمد ڪري رهي آهي، سينيٽ، قومي اسيمبلي نه هلندي ته حق آهي ته عوام کي تبديلي ڏيکاريون ۽ حق کان عمران خان يا ڪو به اسپيڪر محروم نٿو ڪري سگهي، سينيٽ چيئرمين جي تبديلي احتجاج جو هڪ طريقو آهي. ٻئي پاسي مخالف ڌر جي رهبر ڪميٽي فاٽا ۾ 20 جولاءِ تي ٿيندڙ چونڊون آرمي جي نگراني هيٺ ڪرائڻ جي خلاف چيف اليڪشن ڪميشن جي نالي تي خط لکي ڇڏيو جنهن ۾ مطالبو ڪيو ويو ته اليڪشن ڪميشن پولنگ اسٽيشنز جي اندر فوج جي مقرري جو نوٽيفڪيشن واپس وٺي.

 

سياست جا گلو بٽ ڪهڙي منهن سان ليڪچر ڏئي رهيا آهن، قانون کان ڪو مٿڀرو ناهي، رڙيون ته ٻڌڻ ۾ اينديون: فردوس عاشق

 

اسلام آباد ( ويب ڊيسڪ ) وزيراعظم جي سڌ سماءَ بابت خاص مددگار فردوس عاشق اعواڻ چيو آهي ته قانون کي پنهنجي ماتحت ڪندڙن کي پهريون ڀيرو آزاد قانون کي منهن ڏيڻو پئجي رهيو آهي، رڙيون ته ٻڌڻ ۾ اينديون، ن ليگي قيادت فسطائي ذهنيت جي ڳالهه ڪري ته ماڊل ٽائون ۾ معصوم ماڻهن تي وسندڙ گوليون ياد اينديون آهن. سماجي رابطن جي ويب سائيٽ ٽويٽر تي بيان جاري ڪندي فردوس عاشق اعواڻ چيو ته ن ليگي قيادت فسطائي ذهنيت جي ڳالهه ڪري ته مون کي ماڊل ٽائون ۾ معصوم ماڻهن تي وسندڙ  گوليون ياد اينديون آهن، عورتن ۽ ضعيفن تي وحشياڻي تشدد فسطائي رويو هو، سياست جا گلو بٽ ڪهڙي منهن سان ليڪچر ڏئي رهيا آهن.  هن چيو ته نئون پاڪستان آئين ۽ قانون جي حڪمراني جو نالو آهي، قانون پنهنجي ماتحت ڪندڙن کي پهريون ڀيرو آزاد قانون کي منهن ڏيڻو پئجي رهيو آهي، قانون کان ڪو مٿڀرو ناهي، رڙيون ته ضرور ٻڌڻ ۾ اينديون.

 

 

سنڌ ۾ ضبط اثاثا آصف زرداري جا ۽ مبينا طور تي اومني گروپ جي بنا نالي آهن: نعيم الحق

اسلام آباد(ويب ڊيسڪ) وزير اعظم جي خاص مددگار نعيم الحق تصديق ڪئي آهي ته سنڌ ۾ ضبط اثاثا آصف زرداري جا آهن، مني لاندرنگ ڪيس جي جي آءِ ٽي رپورٽ ۾ اهي ڪمپنيون اومني گروپ جو ٻڌايون ويون آهن، نديم خان جو نالو آصف زرداري جي فرنٽ مين جي طور تي جي آءِ ٽي ۾ به شامل آهي. تفصيل موجب وزير اعظم جي خاص مددگار نعيم الحق سماجي رابطن واري ويب سائيٽ ٽوئيٽر تي تصديق ڪئي ته سنڌ ۾ ضبط اثاثا آصف زرداري جا آهن. نعيم الحق ٻڌايو ته بنا نالي ملڪيت ۾ مارشل هومز اينڊ بلڊرز جي سول لائنز ڪراچي ۾ پراپرٽي 126 اي ون ۽ نديم احمد خان جو پلاٽ نمبر 122 بلاڪ 5 ڪلفٽن شامل آهي. وزير اعظم جي خاص مددگار جو چوڻ هو ته جي آءِ ٽي رپورٽ موجب نديم احمد خان آصف زرداري جو فرنٽ مين آهي، جنهن 6 ڪمپنين جون ملڪيتون، اثاثا ضبط ڪيا، انهن جو تعلق اومني گروپ سان آهي، اومني گروپ جي ڪراچي جي 6 ڪمپنين جو ذڪر جي آءِ ٽي رپورٽ ۾ به موجود آهي. هن چيو ته بنا نالي ملڪيتن ۾ڪراچي سول لائنز ۾ پلاٽ نمبر 2/18، پلازه انٽر پرائزز پرائيويٽ لميٽڊ، المفتاح هولڊنگ پرائيويٽ جي ٺٽي واري فيڪٽري ۾ 22 ڪروڙ رپين جا شيئرز، اسڪائي پاڪ هولڊنگ جي ٺٽي واري سيمنٽ فيڪٽري ۾ 22 ڪروڙ کان وڌيڪ شيئرز شامل آهن. نعيم الحق موجب اثاثن ۾ رائزنگ اسٽار هولڊنگ جي ٺٽي واري سيمنٽ فيڪٽري ۾ 70 لک کان وڌيڪ جا شيئرز، سيراڪوم اسٽاڪ جي خانگي بينڪ ۾ 30 ملين جا شيئرز ۽ پارڪ ويو اسٽاڪ جي 30 ملين جي خانگي بينڪ ۾ شيئرز به شامل آهن. سنڌ ۾ ضبط ٿيل ملڪيتون مبينا طور تي اومني گروپ جي بنا نالي آهن، سنڌ ۾ ضابطگي جي لاءِ جاري حڪمن ۾ 2 ارب کان وڌيڪ شيئرز به شامل آهن.

 

نيب ڪوڙو ڪيس بڻائي تذليل ڪري رهيو آهي، ڪوڙ ڳالهايان ته الله تعاليٰ سخت ترين سزا ڏئي: شهباز شريف

لاهور(ويب ڊيسڪ) پنجاب جي اڳوڻي وڏي وزير شهباز شريف جو چوڻ آهي ته نيب ڪوڙو ڪيس بڻائي منهنجي تذليل ڪري رهيو آهي. احتساب عدالت لاهور ۾ رمضان شگر مل ڪيس جي ٻڌڻي ٿي ته شهباز شريف ۽ حمزه شهباز عدالت ۾ پيش ٿيا، ان موقعي تي شهباز شريف چيو ته مون کي 5 منٽ ڏنا وڃن آئون ڪيس جي فيڪٽ تي ڳالهائيندس، آئون عدالت ۾ پاڻ ڪجهه حقيقتون رکڻ چاهيان ٿو. قومي اسيمبلي ۾ مخالف ڌر اڳواڻ شهباز شريف چيو ته خطاڪار ترين انسان آهيان پر مون پبلڪ سروس ۾ ڏينهن رات هڪ ڪيو پر نيب ڪوڙو ۽ بي بنياد ڪيس بڻائي منهنجي تذليل ڪري رهيو آهي،  اسان سڀني کي هڪ ڏينهن قبر ۾ وڃڻو آهي، الله مون سخت ترين سزا ڏئي جيڪڏهن آئون ڪوڙ ڳالهايان ته. شهباز شريف جو چوڻ هو ته 2015ع ۾ سنڌ حڪومت ڪمند جو اگهه 181 رپيا في مڻ مقرر ڪيو اسان 180 رپيا في مڻ مقرر ڪيو پر سنڌ حڪومت اگهه 181 کان گهٽ ڪري 165 رپيا في مڻ ڪري ڇڏيو.

 

نواز شريف کان ڪوٽ لکپت جيل ۾ نيب جي هڪ ڪلاڪ آڏي پڇا، سوال نامون سندس حوالي

لاهور ( ويب ڊيسڪ ) توشا خانه ڪيس ۾ نيب اسلام آباد جي ٽه رڪني ٽيم  اڳوڻي وزيراعظم  نواز شريف کان ڪوٽ لکپت جيل ۾ هڪ ڪلاڪ تائين آڏي پڇا ڪئي ۽ هڪ سوالنامو سندس حوالي ڪيو.  اڳوڻو وزيراعظم نواز شريف پنهنجي قانوني ٽيم سان مشوري کانپوءِ نيب کي سوالنامو موڪليندو. نواز شريف خلاف ڪيس ۾ سرڪاري گاڏين ۽ مختلف ملڪن کان ملندڙ قيمتي تحفا غير قانوني ۽ ذاتي استعمال ڪرڻ جو الزام آهي. نيب اسلام آباد جي ٽه رڪني ٽيم ڪوٽ لکپت جيل لاهور پهتي ته نواز شريف کي سڪيورٽي سيل مان جيل سپرنٽنڊنٽ جي ڪمري ۾ سخت سڪيورٽي ۾ آندو ويو. نيب جي ٽن آفيسرن تي ٻڌل جاچ ٽيم  نواز شريف کان هڪ ڪلاڪ تائين آڏي پڇا ڪئي. نيب طرفان نواز شريف کي سوالنامو ڏنو ويو جنهن ۾ ڪجهه سولان جا جواب نواز شريف ڏنا ۽ ڪجهه بابت اڻڄاڻائي جو اظهار ڪيو ۽ چيو ته مون کي خبر ناهي ته ۽ وزيراعظم طور سندس اها ڊيوٽي ناهي ته ڪهڙا تحفا مليا، کين جيڪو مليو اهو سرڪاري ناڻي ۾ جمع ڪرايو ويو، رهي ڳالهه گاڏين جي استعمال جي ته وزيراعظم طور مون کي گاڏين جي استعمال جو آئيني ۽ قانوني حق حاصل آهي جنهن جو رڪارڊ به چيڪ ڪري سگهجي ٿو.  نواز شريف چيو ته ڪجهه سوالن جا جواب مون وٽ نه آهن ۽ قانوني ٽيم سان مشوري کانپوءِ جواب ڏيندس. نيب ٽيم نواز شريف کان هڪ ڪلاڪ جاچ مڪمل ڪرڻ کانپوءِ اسلام آباد رواني ٿي وئي. نواز شريف کان جاچ دوران جيل آفيسرن کي  ڪمري ۾ داخل ٿيڻ جي اجازت نه هئي. سپرنٽينڊنٽ جيل سميت ٻيا آفيسر ۽ اهلڪار ڪمري ۾ ئي موجود رهيا. سپرنٽينڊنٽ جيل سميت ٻيا آفيسر ۽ اهلڪار ٻاهر ئي موجود  رهيا. نيب جي ٽيم جي واپس ويندي ئي نواز شريف کي سندس ڪمري ۾ پهچايو ويو.

 

اومني گروپ سميت ڪراچي ۾ 30 ڪمپنين جون بي نامي ملڪيتون ظاهر، ايف بي آر ضبط ڪرڻ جي منظوري ڏئي ڇڏي

ڪراچي(م.ڊ) ايف بي آر پاران قائم ڪيل بي نامي زون ٿري پاران ڪراچي ۾ ڪاررواين لاءِ لسٽون تيار، 8 جولاءِ کان اومني گروپ سميت 30 ڪمپنين ۽ عام ماڻهن جي نالي سان موجود /ملڪيتون بي نامي ڄاڻائي ضبط جي منظوري ان ڏس ۾ ذريعن کان معلوم ٿيو آهي ته وفاقي حڪومت پاران شروع ڪيل ايمنسٽي اسڪيم جي مقرر ڪيل تاريخ 3 جولاءِ تي ختم ٿيڻ بعد ڪراچي ۾ بي نامي زون ٿري باضابطه طور ڪم شروع ڪري ڇڏيو آهي، بي نامي زون ٿري جي ڪمشنر سيد شڪيل احمد پنهنجي ٽيم سان ايف بي آر بلڊنگ جي فرسٽ فلور تي قائم ٿيل بي نامي زون ۾ گڏجاڻي ڪئي، جنهن ۾ ايف بي آر جي ڊپٽي ڪمشنر سيد بلال محمود جعفري ۽ سيد مشڪور علي توڙي اسٽنٽ ڪمشنر رضي الحق قريشي پنهنجي رپورٽ پيش ڪئي، ذريعن موجب ڪمشنر کي سندس ماتحت عملدارن ٻڌايو ته ڪراچي جي مختلف علائقن ۾ ڪجهه بااثر ماڻهن جون ملڪيتون عام ماڻهن جي نالن تي آهن، جڏهن ته اومني گروپ جا مختلف ڪمپنين ۾ شيئر، ڊفينس ۾ پلاٽ ۽ ڪجهه گاڏيون پڻ آهن، جن کي شروعاتي طور نوٽيس جاري ڪيا ويا آهن، جڏهن ته ڪمشنر پاران ايندڙ هفتي کان نوٽيس جاري ڪيل 30 ڪمپنين سميت اومني گروپ جي شيئر هولڊر ڪمپنين جي ڊائريڪٽرز کان جواب نه ملڻ جي صورت ۾ سندن ملڪيتون ضبط ڪرڻ جي منظوري ڏني آهي، اهڙي منظوري بعد 8 جولاءِ کان ايف بي آر بي نامي زون ٿري پاران بي نامي ملڪيتون ضبط ڪرڻ جو سلسلو شروع ڪيو ويندو.

 

رمضان شگر ملز ڪيس ۾ رمانڊ جي درخواست رد، عمران خان جي حالت رحم جوڳي ٿي وئي آهي: حمزا شهباز

لاهور (اين اين آءِ) لاهور (اين اين آءِ) لاهور جي احتساب عدالت رمضان شوگر ملز ڪيس ۾ حمزه شهباز جي ريمانڊ ۾ واڌ جي اپيل رد ڪندي جوڊيشل ريمانڊ تي جيل موڪلي ڇڏيو، جج نعيم ارشد ملڪ ريفرنس جي ٻڌڻي ڪئي جنهن ۾ شهباز شريف پيش ٿيو، جڏهن ته جسماني ريمانڊ ۾ واڌ لاءِ ليگي اسيمبلي ميمبر حمزه شهباز کي پيش ڪيو ويو، جاچ آفيسر کان جج پڇاڻو ڪيو ته توهان کي وڌيڪ جسماني ريمانڊ ڇو گهرجي، نيب پراسيڪيوٽر ٻڌايو ته رمضان شوگر ملز ڪيس ۾ ٻين ملازمن کي گهرايو پر ملازم پيش نه ٿيا، حمزه شهباز جاچ ۾ تعاون نه ڪيو، نيب وڪيل جي دليلن تي حمزه شهباز جي وڪيل چيو ته نيب جسماني ريمانڊ جي جيڪا درخواست گذريل ٻڌڻي تي ڏني هئي اڄ به اها ئي درخواست آهي، هن چيو ته جنهن ايم پي اي نالو ندي ٺاهڻ جي درخواست ڏني اهو ڪڏهن حمزه شهباز سان مليو ئي ناهي، جاويد اقبال رمضان شوگر ملز جو ملازم آهي اهو نيب سان تعاون ڪري رهيو آهي، نيب وٽ پيش ٿيو آهي، هن چيو ته رمضان شوگر ملز جو ريفرسن داخل ٿي چڪو آهي، جسماني ريمانڊ جي ڪهڙي ضرورت آهي، ان دوران شهباز شريف چيو ته سندس چيلهه جو مسئلو آهي، جيڪڏهن عدالت جي اجازت هجي ته هو ويهي رهي، جج کيس ويهڻ جي اجازت ڏني، شهباز شريف چيو ته مان عدالت ۾ پاڻ ڪجهه حقيقتون ٻڌائڻ چاهيان ٿو، منهنجي اها ڊيوٽي آهي ته مان توهان جي اڳيان پيش ٿيا، ڳالهه سچي ڪندس، نيب ڪوڙو ڪيس ڪيو آهي، مان گناهگار ماڻهو آهيان پر پبلڪ سروس ۾ ڏينهن رات ڪم ڪيو آهي، هن چيو ته خدا شاهد آهي ته نيب ڪوڙا ڪيس ڪري مون کي زليل ڪري رهيو آهي، عدالت محفوظ فيصلو ٻڌائيندي وڌيڪ جسماني ريمانڊ جي اپيل رد ڪندي حمزه شهباز کي جوڊيشل ريمانڊ تي جيل موڪلي ڇڏيو ۽ 20 جولاءِ تي حمزه شهباز کي ٻيهر پيش ڪرڻ جي هدايت ڪري ڇڏي.  پنجاب اسيمبلي ۾ مخالف ڌر اڳواڻ حمزه شهباز چيو آهي ته راڻا ثناءُ الله جي گرفتاري هڪ ڊرامو آهي، سڀ ان تي کلي رهيا آهن، ملڪ ۾ ڳاٽي ٽوڙ مهانگائي آهي، حڪومت کي سياسي انتقام کان مٿانهون ٿي سامهون اچڻ گهرجي، عمران خان پنهنجو خير گهري ۽ حڪومت اهڙو ٻچ نه ڇٽي جو سڀاڻي لڻي به نه سگهي، لاهور جي احتساب عدالت ۾ حاضري جي موقعي تي ميڊيا سان غير رسمي ڳالهه ٻولهه ڪندي هن چيو ته قوم ڄاڻي ٿي ته راڻا ثناءُ الله تي ڪهڙو ڪيس ڪيو ويو، هن چيو ته 72 سالن کانپوءِ به مينهن جي چوري ۽ منشيات جي ڪيسن جو سلسلو بند نه ٿي سگهيو آهي، راڻا ثناءُ الله جي خلاف ڪجهه نه مليو ته منشيات جو ڪيس وجهي ڇڏيو، منشيات جي الزام کانپوءِ ڪا ڪثر نه رهجي وئي آهي، هن چيو ته هي حاضرين جو سيزن آهي، حاضريون مذاق بڻيل آهن، قوم ڏسي رهي آهي، اپوزيشن عوام سان گڏ آهي پر حڪومت عوام جي زندگي عذاب بڻائي ڇڏي آهي، هن وڌيڪ چيو ته عمران خان جي حالت رحم جوڳي آهي، هو ساڙ ۾ ورتل آهي، هي ڏکيا ڏينهن به گذري ويندا.