تازيون خبرون
ڪاري ناڻي کي اڇو ڪرڻ جو موقعو، وفاقي ڪابينا ايمنسٽي اسڪيم جي منظوري ڏئي ڇڏي - ڪشمور: مسافر وين کي باهه،3 عورتن ۽ ٻارڙي سميت 5 ڄڻا سڙي فوت، 6 زخمي - حڪومتي ادارا سياسي انتقام لاءِ استعمال ٿي رهيا آهن: ن ليگ - سنڌ اسيمبلي ۾ رڳو هڪٻئي جا پٽڪا لاهڻ لاءِ بحث ٿيندو آهي: سنڌ هاءِ ڪورٽ - سڌ سماءِ صلاحڪار جي صدر سان ملاقات، صدر ميڊيا جا مسئلا حل ڪرڻ بابت ذميواري ڏني آهي: فردوس عاشق اعواڻ - آمريڪا پاڪستان تي ڪا ويزا پابندي نه لڳائي آهي، ميڊيا ۾ ڪوڙيون خبرون آيون هيون: شاهه محمود قريشي - حڪومت شهرين جي حفاظت بدران سياسي انتقام ۾ رُڌل آهي: آصف زرداري - پاڪستان پن بجلي جي پيداوار صلاحيت ۾ تازي واڌ جي حوالي سان سڄي دنيا ۾ ٽئين نمبر تي رهيو: رپورٽ جاري - انجينئر امير مقام جي پٽ ۽ سئوٽ جي گرفتاري جي مذمت، ٻه نمبري نئون پاڪستان نه کپي : شهباز شريف - ڪراچي مان ٻه مهينا اڳ پراسرار نموني گم ٿي ويل ايم بي بي ايس جي شاگردياڻي عروج صديقي جي ڊرامائي انداز ۾ گهر واپسي

Daily Archives: May 14, 2019

ڪاري ناڻي کي اڇو ڪرڻ جو موقعو، وفاقي ڪابينا ايمنسٽي اسڪيم جي منظوري ڏئي ڇڏي

اسلام آباد (اين اين آءِ) حڪومت ڊگهي صلاح مشوري کانپوءِ پنهنجي پهرين ٽيڪس ايمنسٽي ۽ اثاثا ظاهر ڪرڻ جي اسڪيم متعارف ڪرائي ڇڏي، جنهن کي صدارتي آرڊيننس ذريعي لاڳو ڪيو ويندو، ناڻي صلاحڪار عبدالحفيظ شيخ چيو آهي ته ڪابينا اثاثا ظاهر ڪرڻ جي منظوري ڏئي ڇڏي جنهن موجب بنا نالي اثاثا پنهنجي نالي ڪرائي سگهجن ٿا، اسڪيم سادي رکي وئي آهي، ماڻهن کي ڊيڄارڻ مقصد نه آهي، اسڪيم جو مقصد ٽيڪس حاصل ڪرڻ نه آهي، ٻاهرين ملڪ بينڪ اڪائونٽس کي واپس آڻڻو پوندو، ملڪيت تي ايف بي آر ريٽ کان هڪ سيڪڙو وڌيڪ لاڳو ٿيندو، بنا نالي ملڪيت ضبط ۽ سزا به ٿي سگهي ٿي، اسان وٽ 28 ملڪن ۾ پاڪستانين جي ڏيڍ لک اڪائونٽس جو تفيصل آهي، ايمنسٽي اسڪيم سان ڪارو ناڻو رکندڙن کي آخري موقعو ڏنو ويو آهي، آءِ ايم ايف سان ڳالهيون 8 مهينا جاري رهيون، اسٽاف ليول معاهدي جي بورڊ منظوري ڏيندو، اڱاري تي ڪابينا جي اجلاس کانپوءِ چيئرمين ايف بي آر شبر زيدي ۽ مملڪتي وزير حماد اظهر سان گڏ پريس ڪانفرنس ڪندي هن چيو ته وفاقي ڪابينا مختلف نقطن جي منظوري ڏني آهي، ماڻهو 31 جون تائين هن اسڪيم ۾ شامل ٿيندا، ڪابينا ڪافي فيصلا ڪيا، جڏهن ته اهم فيصلو اثاثا ظاهر ڪرڻ جي اسيڪم آهي، حفيظ شيخ چيو ته ماڻهن کي سهولت ڏني وئي آهي ته 4 سيڪڙو ٽيڪس ڏئي اثاثا پنهنجي نالي ڪرائين، هن چيو ته ٻاهرين ملڪن مان بينڪ اڪائونٽس واپس آڻڻا پوندا، هن چيو ته جيڪي تنقيد ڪري رهيا اهن اهي به ماضي ۾ آءِ ايم ايف وٽ ويا، هن چيو ته آءِ ايم ايف ٺهيو ئي ان ڪري آهي ته معاشي گهوٽالي جي ماريل ملڪن جي مدد ڪري، هن چيو ته بجلي لاءِ 216 ارب سبسڊي رکي رهيا آهيون، انڪم سپورٽ پروگرام کي هڪ سئو ارب رپين مان وڌائي 180 ارب رپيا ڪيو پيو وڃي، هن چيو ته ترقياتي بجيٽ جو حجم 650 ارب رپين مان وڌائي 8 سئو ارب ڪيو پيو وڃي، هن چيو ته اسان وٽ 28 ملڪن ۾ پاڪستانين جي ڏيڍ لک اڪائونٽن جو تفيصل آهي، هن چيو ته ٽيڪس اڳاڙي لاءِ وڌيڪ قدم کڻڻا آهن، شبير زيدي چيو ته ملڪيت تي ٽيڪس لاءِ 3 ريٽ آهن ۽ ظاهر ڪرڻ لاءِ اصل ريٽ تي ٽيڪس ورتو ويندو، سرڪاري عهدو رکندڙ هن اسڪيم ۾ شامل نٿا ٿي سگهن، هن چيو ته مختلف ادارين جي ڊيٽا گڏي ڪيو پيو وڃي جنهن سان بنا نالي اثاثا رکڻ ممڪن ٿي ويندو، شبر زيدي چيو ته ڪنهن ٽيڪس ادا ڪندڙ ماڻهو کي ڊي ٽيڪس نه ڪيو ويندو، ٽيڪس ادا ڪندڙ ماڻهو يا اداري تي ريڊ نه ڪيو ويندو، هن چيو ته ايف بي  آر ٽيڪس ادا ڪندڙن کي سهولت ڏيندو، ناڻي صلاحڪار ٻڌايو ته گيس جي قيمت وڌي ته 40 سيڪڙو گهٽتائي وارن صارفين کي اثرن کان بچائڻ جا فيصلا ڪيا ويا آهن، هن چيو ته سال 2000کانپوءِ سرڪاري عهدو رکندڙ ٽيڪس ايمنسٽي اسڪيم مان فائدو حاصل نه ڪري سگهندا، هي اسڪيم سمورن مانهن ۽ ڪمپنين تي لاڳو ٿيندي، هن چيو ته ڪوشش ڪئي آهي ته هي اسڪيم سمجهڻ ۽ عملدرآمد ڪرڻ ۾ آسان ٿئي، هن کي حقيقت پسداڻو رکيو آهي، هن چيو ته 30 جون تائين اسڪيم ۾ شامل ٿيڻ جو موقعو ڏنو ويو آهي، اسڪيم ۾ هر پاڪستاني شهري حصو وٺي سگهندو، جڏهن ته اهي ماڻهو جيڪي حڪومت ۾ عهدن تي رها چڪا آهن يا جيڪي انهن تي دارومدار رکن ٿا اهي هن اسڪيم مان فائدو حاصل نٿا ڪري سگهن، هن مثال ڏيندي چيو ته جيڪڏهن ايف بي آر موجب ڪنهن پراپرٽي جي قيمت 10 لک رپيا آهي ته ان کي 15 لکن تي اڇو ڪيو ويندو ۽ ان کي ڏيڍ سيڪڙو ادا ڪرڻو پوندو.

 

ڪشمور: مسافر وين کي باهه،3 عورتن ۽ ٻارڙي سميت 5 ڄڻا سڙي فوت، 6 زخمي

ڪشمور/ ڪنڌڪوٽ ( ويب ڊيسڪ ) ڪشمور ۾ جيءٌ جهوڙيندڙ واقعو  پيش آيو آهي، ٽول پلازا وٽ ڪنڌڪوٽ کان ڪشمور طرف ايندڙ مسافر وين جو گئس سلينڊر ڦاٽڻ سبب وين کي باهه لڳي وئي، جنهن جي نتيجي ۾ 3 عورتن ۽ ٻارڙي سميت 5 ڄڻا ٿڏي تي سڙي فوت ٿي ويا ۽  6 ڄڻا زخمي ٿي پيا. اطلاع تي ڪشمور پوليس ۽ فائر برگيڊ گاڏي واقعي واري هنڌ پهچي مسافر وين جي باھ تي ضابطو آندو. گئس سلينڊر ڦاٽڻ سبب وين کي باهه لڳي وئي، جنهن ڪري ھزار خان چاچڙ، مسمات منظوران چاچڙ، لعل خاتون بھلڪاڻي مسمات مرادان بھلڪاڻي ۽ 3 سالن جي ٻارڙي ڪائنات چاچڙ فوت ٿي ويا،  فوتين جو تعلق ڪنڌڪوٽ تعلقي سان آهي، جڏهن تھ فوتي ھڪ ئي ڪٽنب جا ٻڌايا پيا وڃن. حادثي جي زخمين کي  سول اسپتال ڪشمور منتقل ڪيو ويو  جتان  عبدالمجيد چاچڙ ۽ زاھد عارباڻي کي ڳڻتي جوڳي حالت ۾ رحيميار خان اسپتال منتقل ڪيو ويو. فائر برگيڊ عملي واقعي واري هنڌ پهچي وين کي لڳل باهه تي ضابطو آندو جڏهن تھ  وين ڊرائيور فرار ٿي ويو. واقعي جو اطلاع ملندي ئي فوتين جي گهرن ۾ روڄ راڙو مچي ويو،  افسوسناڪ واقعي تي ڪشمور ۾ سوڳ وارو ماحول ڇائنجي ويو آهي.

 

حڪومتي ادارا سياسي انتقام لاءِ استعمال ٿي رهيا آهن: ن ليگ

اسلام آباد (اين اين آءِ) اڳوڻي وزيراعظم شاهد خاقان عباسي امير مقام جي پٽ جي گرفتاري جي مذمت ڪندي چيو آهي ته ان کي سياسي انتقام نه چئون ته ٻيو ڪا چئون، حڪومت ناڪام ٿي وئي آهي ته اسان جو ڪهڙو ڏوهه آهي، نيب کانپوءِ ايف آءِ اي ۽ گهرو وزارت به سياسي انتقام جي ميدان ۾ لٿل آهي، جيتري ڪرپشن پشاور ميٽرو ۾ آهي ڪنهن منصوبي ۾ نه آهي، عمران خان جي ڪرپشن هلال ۽ ٻئي جي غلطي معاف نه آهي، اسان به ڪرپشن يج خلاف آهيون پارليامينٽ ۾ اسان کي مڪمل خاموش ڪرايو ويو آهي، قومي اسيمبلي جي اجلاس لاءِ رڪيوويزشن جمع ڪرائي آهي، ملڪ ۾ دهشتگرد جي لهر ۽ آءِ ايم ايف سان معاهدي تي بحث ڪرايو وڃي، اڱاري تي پريس ڪانفرنس ڪندي شاهد خاقان عباسي چيو ته امير مقام کي هڪ ڪيس ۾ ملوث ڪرڻ جي ڪوشش ڪئي وئي، سندس پٽ کي گرفتار ڪيو ويو، هن چيو ته نه ڪنهن شڪايت ڪئي جنهن اداري گرفتار ڪرايو نه ان ڪا شڪايت ڪئي، اڳوڻي وزيراعظم چيو ته اين ايڇ اي به ڪم معياري نه هئڻ جي ڪا شڪايت نه ڪئي آهي، ايف آءِ آر ۾ جيڪو الزام لڳو اهو 3 ڪروڙ کان گهٽ آهي، هن چيو ته امير مقام جي پٽ جي ڪمپني جون 35 ڪروڙ بينڪ گارنٽيون اين ايڇ کي ڏنيون ويون آهن، هن چيو ته اهي غلط ڪم ٿيو هو ته ان تي ڪڏهن به ڪا شڪايت نه ٿي، هن چيو ته 30 نومبر 2018 تي مواصلات وزارت جي جوائنٽ سيڪريٽري ايف آءِ اي کي خط لکيو، خط وزير جي حڪم تي لکيو ويو، هن منصوبي ۾ ڪرپشن آهي، هي حالت آهي هن ڪيس، هاڻ ڪيس کي سياسي انتقام نه چئون ته ٻيو ڇا چئون، جيڪڏهن حڪومت ناڪام ٿي وئي آهي ته ان ۾ اسان جو ڪو به ڏوهه نه آهي.

 

سنڌ اسيمبلي ۾ رڳو هڪٻئي جا پٽڪا لاهڻ لاءِ بحث ٿيندو آهي: سنڌ هاءِ ڪورٽ

ڪراچي ( ويب ڊيسڪ ) سنڌ هاءِ ڪورٽ پوليس سُڌارن واري ڪيس ۾ ريمارڪس ڏيندي چيو آهي ته سنڌ اسيمبلي ۾ رڳو هڪٻئي جا پٽڪا لاهڻ لاءِ بحث ٿيندو آهي، اخبارن ۾ اچي پيو ته حڪومت ۽ اپوزيشن متفق نه آهن. سنڌ هاءِ ڪورٽ ۾ سنڌ پوليس ۾ سُڌارن واري معاملي تي وزيرن ۽ چيف سيڪريٽري سنڌ خلاف توهين عدالت جي درخواست تي ٻڌڻي ٿي. اي جي سنڌ عدالت کي آگاهي ڏني ته پوليس آرڊر 2002ع جي بحاليءَ لاءِ بل سنڌ اسيمبلي ۾ پيش ڪيو ويو آهي. جسٽس حسن اظهر ريمارڪس ڏيندي چيو ته اسيمبلي ۾ ڇا ٿي رهيو آهي، رڳو هڪٻئي جا پٽڪا لاهڻ لاءِ بحٿ ٿيندو آهي. جسٽس حسن اظهر رمارڪس ڏنا تھ 3 مهينا ٿي ويا آهن، عدالتي حڪم تي عمل نه پيو ٿئي، ڪير آهي جيڪو رڪاوٽ بڻجي رهيو آهي؟ ايڊووڪيٽ جنرل عدالت کي درخواست ڪئي ته ٿورو وقت ڏنو وڃي، اُميد آهي ته بل اسيمبلي مان جلد پاس ٿي ويندو. عدالت ريمارڪس ڏيندي چيو ته اخبارن ۾ اچي رهيو آهي ته پوليس ۾ سُڌارن واري معاملي تي حڪومت ۽ اپوزيشن ۾ اتفاق ناهي، اي جي سنڌ ٻيهر درخواست ڪئي ته توهان موقعو ڏيو، بل پاس ٿي ويندو.  عدالت ، سنڌ پوليس ۾ سُڌارن جي حوالي سان قانون سازي لاءِ حڪومت کي 21 مئي تائين مهلت ڏئي ڇڏي.

 

سڌ سماءِ صلاحڪار جي صدر سان ملاقات، صدر ميڊيا جا مسئلا حل ڪرڻ بابت ذميواري ڏني آهي: فردوس عاشق اعواڻ

اسلام آباد (اين اين آءِ) صدر عارف علوي سان فردوس عاشق اعواڻ ملاقات ڪئي جنهن ۾ پاڪستان جي مثبت تشخص جي حوالي سان ميڊيا جي ڪردار تي ڳالهه ٻولهه ڪئي، اڱاري تي صدر عارف علوي سان ڊاڪٽر فردوس عاشق اعواڻ ملاقات ڪئي، وزيراعظم جي مددگار چيو ته صدر ميڊيا جا مسئلا حل ڪرڻ بابت ذميواري ڏني آهي، هن چيو ته صدر سان سماجي مسئلن جي مختلف معاملن تي ڳالهه ٻولهه ٿي آهي، هن چيو ته صدر پاڪستان جي ترقي ۽ خوشحالي بابت هڪ ويزن رکي ٿو، هن چيو ته ملاقات ۾ پٺ تي پيل طبقي جا مسئلا ۽ ڏکيائيون حل ڪرڻ جي حوالي سان ڳالهه ٻولهه ٿي، هن چيو ته ڪنهن به معاشري ۾ چئلينجز کي منهن ڏيڻ لاءِ سوشل ميڊيا جو اهم ڪردار آهي، اختيار هيٺين سطح منتقل ڪرڻ تي ڳالهه ٻولهه ٿي، هن چيو ته ميڊيا مالڪن ۽ ورڪز وچ ۾ تعلق تي به ڳالهه ٻولهه ٿي.

 

آمريڪا پاڪستان تي ڪا ويزا پابندي نه لڳائي آهي، ميڊيا ۾ ڪوڙيون خبرون آيون هيون: شاهه محمود قريشي

اسلام آباد (اين اين آءِ) پرڏيهي وزير شاهه محمود قريشي چيو آهي ته آمريڪا پاڪستان تي ڪا ويزا پابندي نه لڳائي آهي، ميڊيا ۾ غلط خبرون آيون هيون، 70 غير قانوني پاڪستاني آمريڪا مان واپس ايندا،. آمريڪي ويزا جي حوالي سان آمريڪا سان گڌيل تعاون چاهيون ٿا، افغان امن عمل ۾ پاڪستان جو اهم ڪردار آهي، جڏهن ڳالهيون ناڪام ٿينديون آهن ته اسان کي قرباني جو ٻڪر بڻايو وڃي ٿو، طالبان آمريڪا سان سڌيون ڳالهيون ڪرڻ چاهي ٿو، افغانستان کي آمريڪا هلائي رهيو آهي، اڄ پيسا بند ڪري ته افغان حڪومت نٿي هلي سگهي، افغان ۽ ڀارتي بارڊر تي حالتون ٺيڪ نه آهن، اڱاري تي قائمه ڪميٽي کي ڄاڻ ڏيندي شاهه محمود قريشي چيو ته ويزا پابندي پاڪستاني شهرين تي نه لڳي آهي، 3 آفيسرن تي لڳي آهي، هن چيو ته پابندي گهرو وزارت جي جوائنٽ سيڪريٽري سميت 3 آفيسرن تي لڳي آهي، هن چيو ته آمريڪا ملٽي پل ويزا جي حوالي سان ڪجهه تبديليون ڪيون آهن ان تي ڳالهيون جاري آهن، هن چيو ته اسان انٽرا افغان ڳالهيون چاهيون ٿا، ڪوشش ڪري رهيا آهيون، هن چيو ته ڪوئيٽا ڌماڪو داتا درٻار ڌماڪو اهي طاقتون ڪرائي رهيون آهن جيڪي پاڪستان جو مخالف آهن، هن چيو ته جڏهن به امن قائم ٿئي ٿو ته اهڙي طاقتون متحرڪ ٿي وڃن ٿيون، وفاقي وزير چيو ته ڪويت ۽ پاڪستان جا لاڳاپا بهتر رهيا آهن، 2005 جي زلزلي ۽ ايٽمي ڌماڪن کانپوءِ جي پريشر ۽ پلواما تي ڪويت پاڪستان جو ساٿ ڏنو، جڏهن ته ڪويت سان لاڳاپن ۾ ڪجهه  عرصي تائين گيپ رهيو، هن چيو ته 18 ۽ 19 مئي تي ڪويت جو دورو ڪندس.

 

حڪومت شهرين جي حفاظت بدران سياسي انتقام ۾ رُڌل آهي: آصف زرداري

ڪراچي (ويب ڊيسڪ) پ پ جي شريڪ چيئرمين آصف علي زرداري چيو آهي ته بدقسمتي سان حڪومت جو سڄو ڌيان سياسي انتقام تي آهي.اڳوڻي صدر آصف علي زرداري دهشتگردي سبب متاثر خاندانن سان همدردي جو اظهار ڪندي چيو ته بلوچستان ۾ دهشتگردي جي لهر ڳڻتي جوڳي آهي، معصوم ۽ بيگناهه ماڻهن جو قتل وحشياڻو فعل آهي. سندس چوڻ هو ته بدقسمتي سان حڪومت جو سڄو ڌيان سياسي انتقام تي آهي، رياست جي ذميواري آهي ته اها شهرين جي حفاظت يقيني بڻائي.

 

 

پاڪستان پن بجلي جي پيداوار صلاحيت ۾ تازي واڌ جي حوالي سان سڄي دنيا ۾ ٽئين نمبر تي رهيو: رپورٽ جاري

لاهور (اين اين آءِ) انٽرنيشنل هائڊرو پاور ايسوسئيشن عالمي سطح تي پن بجلي جي حوالي سان تازي رپورٽ جاري ڪئي آهي، رپورٽ ۾ چيو ويو آهي ته پن بجلي پيدا ڪرڻ واري صلاحيت ۾ تازي واڌ سان پاڪستان سڄي دنيا ۾ ٽئين نمبر تي رهيو، ڄاڻايل رپورٽ 2019 هائڊرو پاور اسٽيٽس رپورٽ، سيڪٽر ٽرينڊز اينڊ انسٽائيم جي عنوان سان جاري ڪئي وئي آهي، يونيسڪو جي احتمام هيٺ 1995 ۾ انٽرنيشنل هاءِ ڊرو پاور اسيوسئيشن جي نالي سان قائم ٿيل هي فورم سڄي دنيا پن بجلي جي حوالي سان بهترين تجربا ڪري رهيو آهي، انٽر نيشنل هائڊور پاور ايسوسئيشن جي رپورٽ ۾ پن بجلي جي تازي واڌ جي حوالي سان ٽاپ 20 ملڪن جي لسٽ ۾ ٻڌايو ويو آهي ته 2018 ۾ پاڪستان مختلف منصوبن جي مڪمل ٿيڻ سان قومي نظام ۾ 2487 ميگاواٽ پن بجلي ۾ واڌ ڪئي، چين سڄي دنيا ۾ پهرين نمبر تي رهيو، جنهن پنهنجي نظام ۾ 8540 ميگاواٽ پن بجلي ۾ واڌ ڪئي، جڏهن ته 3866 ميگاواٽ پن بجلي واڌ سان برازيل لسٽ ۾ ٻئي نمبر تي آهي، هڪ هزار 5 سئو ميگاواٽ پن بجلي واڌ سان ترڪي چوٿين، جڏهن ته 688 ميگاواٽ پن بجلي واڌ سان انگولا 5 نمبر تي رهيو، ڀارت لسٽ ۾ 8 نمبر تي آهي.

 

انجينئر امير مقام جي پٽ ۽ سئوٽ جي گرفتاري جي مذمت، ٻه نمبري نئون پاڪستان نه کپي : شهباز شريف

لنڊن ( ويب ڊيسڪ ) قومي اسيمبلي ۾ مخالف ڌر اڳواڻ شهباز شريف پارٽي اڳواڻ انجينئر امير مقام جي پٽ ۽ سئوٽ جي گرفتاري جي مذمت ڪئي آهي. پنهنجي هڪ بيان ۾ شهباز شريف وزيراعظم کي مخاطب ڪندي چيو آهي ته نيازي صاحب! وڏن سان سياسي مخالفت جو انتقام ٻارن کان وٺڻ ڪم ظرفي جي انتها هوندي آهي، حڪومت انتقام ۾ انڌي، گونگي ۽ ٻوڙي ٿي وئي آهي، نيب کانپوءِ  هاڻ ايف آءِ اي کي سياسي انتقام جو ذريعو بڻايو پيو وڃي. هن چيو ته امير مقام کي نواز شريف، شهباز شريف ۽ ن ليگ ساٿ ڏيڻ جي سزا ڏني پئي وڃي پر امير مقام ۽ سندس پٽ ببر شينهن آهن، سياسي لومڙيون مقابلو نٿيون ڪري سگهن، سياسي انتقام جو نشانو بڻجندڙ شينهن جو وقت اچي رهيو آهي، مخالفن ميدان مان ڀڄي رهيا آهن. شهباز شريف جو چوڻ آهي ته اذيت پسند حڪمرانن کي شايد رڳو عوام جون ررڙيون پسند آهن، مهانگائي تي ظابطو نه ڪري سگهندڙ مخالف ڌر جي ٻارن کي گرفتار ڪرڻ ۾ مصروف آهن، اسان ڄمي حڪومت ڪئي ملڪ ۽ قوم خلاف ظلم جي ترجماني ڪندا رهنداسين، منافقت ۽ ٻه نمبري پاڪستان نه کپي. مخالف ڌر اڳواڻ چيو ته اوهان ته مهانگائي، بيروزگاري ۽ ٻين شين تي ظابطو ڪرڻ آيا هئا، اوهان ماڻهن کي گهر، روزگار ۽ ماني ڏيڻ جا واعدا ڪيا هئا.

 

ڪراچي مان ٻه مهينا اڳ پراسرار نموني گم ٿي ويل ايم بي بي ايس جي شاگردياڻي عروج صديقي جي ڊرامائي انداز ۾ گهر واپسي

حيدرآباد (بيورو رپورٽ) ڪراچي مان ٻه مهينا اڳ پراسرار نموني گم ٿي ويل ايم بي بي ايس جي ٽيئن سال جي شاگردياڻي عروج صديقي ڊرامائي انداز ۾ واپس گهر پهچي وئي. عروج پنهنجي مائٽن کي ٻڌايو آهي ته هو ماءُ جي دڙڪن سبب گهران نڪري وئي هئي ۽ سندن پريشانين جي حوالي سان اخبارن ۾ خبرون پڙهي هو پاڻمرادو واپس موٽي آئي آهي. عروج جا مائٽ وڌيڪ ڪجهه به ٻڌائڻ لاءِ تيار نه آهن. عروج صديقي ڪراچي جي گلستان جوهر واري علائقي لانگ لائيف اسڪيم مان 8 مارچ 2019ع تي گهران بيوٽي پارلر تي وڃڻ جو چئي پراسرار طور گم ٿي وئي هئي. هو همدرد يونيورسٽي ۾ ايم بي بي ايس جي ٽيئن سال جي شاگردياڻي آهي. عروج صديقي بنت مقبول احمد صديقي جي گمشدگي ۽ اغوا جو ڪيس 9 مارچ 2019ع تي شاهراهه فيصل ٿاڻي تي داخل ڪرايو ويو هو. ذريعن موجب عروج پنهنجي مائٽن کي اها ڪهاڻي به ٺاهي ٻڌائي آهي ته هو گهران نڪرڻ کانپوءِ هڪ بس ۾ سوار ٿي وئي هئي جنهن کانپوءِ سندس دماغ ڪم ڪرڻ ڇڏي ڏنو ۽ هو ڀٽڪي هڪ ڳوٺ ۾ هلي وئي هئي جتي رهڻ کانپوءِ کيس مائٽن جي پريشاني جو خيال آيو تنهن ڪري هو واپس موٽي آئي آهي. ان سلسلي ۾ لاڳاپيل پوليس سان رابطو ڪرڻ جي ڪوشش ڪئي وئي پر ايس ايس پي انويسٽيگيشن به ڪال اٽينڊ نه ڪئي، جڏهن ته عروج جا والدين وڌيڪ ڪجهه به ٻڌائڻ لاءِ تيار نه آهن.