تازيون خبرون

Daily Archives: April 12, 2019

ڀارت ڪشمير ۾ انساني حقن جي ڀڃڪڙي پيو ڪري، خطي جو امن خطري ۾ آهي: آصف غفور

راولپنڊي ( ويب ڊيسڪ ) پاڪ فوج عالمي ميڊيا جي نمائندن، مختلف ملڪن جي دفاعي اتاشين ۽ سفيرن کي ڀارتي فوج جي حملي واري هنڌ بالاڪوٽ جي علائقي جبه جو دورو ڪرايو. آءِ ايس پي آر موجب انٽرنيشنل ميڊيا  جي پرڏيهي صحافين، مختلف ملڪن جي دفاعي اتاشين ۽ سفيرن تي ٻڌل گروپ کي جابه جي انهن علائقن جو دورو ڪرايو ويو جن کي نشانو بڻائي 26 فيبروري تي ڀارت پابندي مڙهيل تنظيمن جي تربيتي ڪيمپ تباهه ڪرڻ جي ڪوڙي دعويٰ ڪئي. گرپ کي ارت جي بار بار ڪوڙ ۽ ان جي ابتڙ زميني حقيقتن کان آگاهه ڪيو ويو جڏهن ته ڊي جي آءِ ايس پي آر ميجر جنرل آصف غفور ڀارتي دعويٰ ۽ زميني حقيقتن تي بريفنگ ڏني. گروپ واقعي واري هنڌ قائم مدرسي جو به دورو ڪيو جنهن کي ڀارت تباهه ڪرڻ ۽ دهشتگرد مارڻ جي دعويٰ ڪئي. دوري ۾ شامل ماڻهن آزاد طور مدرسي جي طالبن ۽ استادن سان ڳالهيون ڪيون ۽ سوال ڪيا. ان موقعي تي ڊي جي آءِ ايس پي آر ميجر جنرل آصف غفور چيو ته ڀارت ڪشمير ۾ انساني حقن جي ڀڃڪڙي ڪري رهيو آهي، ڀارت جي اهڙي قدم سان خطي جي امن کي خطرو آهي.

 

سي پيڪ سان سڄي خطي ۾ موقعن جا نوان رستا کلندا: عمران خان

اسلام آباد(ويب ڊيسڪ) وزير اعظم عمران خان چيو آهي ته سي پيڪ سان سڄي خطي ۾ موقعن جا نوان رستا کلندا. وزير اعظم عمران خان سان سي پيڪ تي ڪم ڪندڙ چيني ڪمپنين جي نمائندن ملاقات ڪئي. ملاقات دوران چيني سفير وزير اعظم پاڪستنا کي چيني صدر جي نيڪ خواهشن وارو پيغام پهچايو. سفير چيو ته چين جو صدر وزير اعظم عمران خان جي چين جي دوري جو منتظر آهي. چيني سفير چيني سيڙپڪاري کي سهولتن جي فراهمي تي وزير اعظم جي ذاتي دلچسپي وٺڻ جا ٿورا مڃيا. چيني سفير جو چوڻ هو ته چيني ڪمپنيون پاڪستان جي سماجي ۽ اقتصادي ترقي جي لاءِ حصو وجهنديون رهنديون. ان موقعي تي وزير اعظم جو چوڻ هو ته حڪومت سي پيڪ منصوبي کي پهرين ترجيح ڏيندي آهي، حڪومت چيني ڪمپنين کي منافعي بخش واپار لاءِ هر ممڪن سهولت ڏيندي آهي. وزير اعظم عمران خان جو چوڻ هو ته سي پيڪ سان سڄي خطي ۾ موقعن جا نوان رستا کلندا. ٻئي طرف وزير اعظم عمران خان جي صدارت هيٺ سياحت کي هٿي ۽ ترقي تي اجلاس دوران وزير اعظم چيو ته حڪومت سياحت کي هٿي لاءِ هر ممڪن سهولت فراهم ڪندي. تفصيل موجب وزير اعظم عمران خان جي صدارت هيٺ سياحت کي هٿي ۽ ترقي تي اجلاس رٿيو ويو. اجلاس ۾ وزير اعظم کي سياحت کي هٿي وارن بندوبستن تي بريفنگ ڏني وئي. وزير اعظم کي پختونخواهه ٽورازم ايڪٽ جي مسودي تي بريفنگ ڏيندي ٻڌايو ويو ته صوبي ۾ سياحتي زون قائم ڪيا پيا وڃن، پنجاب ۾ سياحت کي هٿي لاءِ 8 زون قائم ڪيا پيا وڃن. وزير اعظم عمران خان جو چوڻ هو ته خانگي شعبا سياحت کي هٿي لاءِ ڪردار ادا ڪن. سياحتي زون جي قيام ۾ ماحول ۽ قدرتي حسن کي نظر ۾ رکيو وڃي. ويب سائيٽ تي مقامي ۽ پرڏيهي سياحن  جي لاءِ تفصيل ڏني وڃي. هن چيو ته حڪومت سياحت کي هٿي لاءِ هر ممڪن سهولت فراهم ڪندي.

 

بدقسمتي سان بي سمجهه سياستدان سياست ۾ اچي ويا: خورشيد شاهه

سکر (ويب ڊيسڪ) پ پ اڳواڻ خورشيد شاهه چيو آهي اسان جي بدقسمتي آهي ته بي سمجهه سياستدان سياست ۾ اچي ويا آهن، هڪ چوي ٿو مودي کٽي ويندو ۽ ٻيو چئي ٿو مودي حملو ڪندو، انهن بي سمجهه سياستدانن جي وات ۾ جيڪا ڳالهه اچي ٿي چئي ٿا ڏين. سکر پريس ڪلب ۾ ميڊيا سان ڳالهائيندي خورشيد شاهه چيو ته مودي مسلمانن جو سڀ کان وڏو دشمن آهي، اپوزيشن جماعتون مودي جي پويان پئجي ويون آهن، جڏهن ته اسان جو وزيراعظم مودي جي ڪاميابي لاءِ دعاڳو آهي، اڄ جڏهن مودي هارائي رهيو آهي ته اسان جي پوزيشن ڇا هوندي؟ ڪنهن به وزيراعظم کي ائين نه چوڻ گهرجي ته ڪير کٽي يا هاري. هن چيو ته ڪجهه ڏينهن اڳ عمران خان هڪ اجلاس ۾ پنهنجي وزيرن کي چيو ته وڃو ۽ ڪرپشن جو پتو لڳايو، عمران خان سان گڏ ويٺل ماڻهو چوندا هئا ته اسان ملڪ ۾ کير جو نديون وهائي ڇڏينداسين، جڏهن اسان حڪومت ڇڏي ته جي ڊي پي گروٿ 3.8 هئي، موجود حڪومت ۾ جي ڊي پي گروٿ 3.4 آهي. سندس چوڻ هو ته اسان جي حڪومتي دور ۾ ٻوڏ آئي، موجوده حڪومت ۾ اهڙي ڪا قدرتي آفت ناهي آئي، جڏهن حڪومت پاڻ چئي ته ايندڙ ٻه سال عوام جون رڙيون رڪنديون، حڪومت اميد سان هلندي آهي ۽ هي ماڻهن کي ڊيڄارين پيا.

 

عالمي بئنڪ پاران پاڪستان ۾ هلندڙ سڌارا عمل جي واکاڻ، مدد جاري رکڻ جي خاطري

واشنگٽن ( ويب ڊيسڪ ) عالمي بئنڪ جي صدر ڊيوڊ مالپاس پاڪستان ۾ هلندڙ سڌارن جي عمل کي واکاڻيندي پاڪستان جي مدد جاري رکڻ جي خاطري ڪرائي آهي. ناڻي وارو وزير اسد عمر عالمي مالياتي اداري آءِ ايم ايف ۽ عالمي بئنڪ جي بهار جي موسم جي اجلاس ۾ شرڪت لاءِ واشنگٽن ۾ موجود آهي ۽ جتي هن اختيارين سان ملاقاتون ڪيون آهن. ناڻي واري وزير اسد عمر عالمي بئنڪ جي صدر ڊيوڊ مالپاس سان ملاقات ڪئي جنهن دوران کيس پاڪستان جي ميڪرو اڪنامڪ صورتحال کان آگاهه ڪيو ويو ۽ ان موقعي تي پاڪستان ۽ عالمي بئنڪ وچ ۾ منصوبن تي ڳالهيون ڪيون ويون.  ناڻي واري وزير آءِ ايم ايف جي ڊپٽي مئنيجمينٽ ڊائريڪٽر ڊيوڊ لپٽن سان به ملاقات ڪئي. ان موقعي تي پاڪستان ۽ آءِ ايم ايف وچ ۾ هلندڙ ڳالهين تي به غور ويچار ڪيو ويو. اسد عمر آمريڪا پاڪستان بزنس ڪائونسل جي ميمبرن سان به ملاقات ڪئي جنهن ۾ ملٽي نيشنل ڪمپنيز جي اختيارين به شرڪت ڪئي جڏهن ته اختيارين پاڪستان ۾ پنهنجي مستقبل جي منصبن ۽ پاڪستان جي مدد تي به ڳالهيون ڪيون جڏهن ته ڪيترين ئي ملٽي نيسنل ڪمپنين پاڪستان ۾ ڪم ڪرڻ لاءِ دلچسپي جو به اظهار ڪيو. ان موقعي تي ناڻي واري وزير اسد عمر چيو ته پاڪستان ڪاروبار ڪندڙن لاءِ آسانيون پيدا ڪري رهيو آهي، وزيراعظم عمران خان سڌارن واري عمل جي پاڻ نگراني ڪري رهيو آهي.

 

 

تاجڪستان پاڪستان جو دوست ملڪ آهي، گڏيل سهڪار سان خطي ۾ امن ۽ استحڪام کي هٿي ملندي : آرمي چيف

راولپنڊي (اين اين آءِ) آرمي چيف جنرل قمر جاويد باجوه تاجڪستان جي بچاءَ واري وزير سان ملاقات ڪئي. آءِ ايس پي آر موجب آرمي چيف جنرل قمر جاويد باجوه تاجڪستان جي بچاءَ واري وزير سراج الدين ايسلوف سان ملاقات ڪئي. ملاقات ۾ علائقائي سڪيورٽي، ٻطرفي دفاعي سهڪار کي هٿي ڏيڻ سميت گڏيل دلچسپي جي معاملن تي ڳالهيون ڪيون ويون. آرمي چيف جنرل قمر جاويد باجوه چيو ته تاجڪستان پاڪستان جو دوست ملڪ آهي، گڏيل سهڪار سان خطي ۾ امن ۽ استحڪام کي هٿي ملندي. تاجڪ دفاع واري وزير سراج الدين ايسلوف چيو ته خطي ۾ امن ۽ استحڪام لاءِ پاڪستان جو ڪردار ساراهه جوڳو آهي.

 

وڏو ميان صاحب جيل مان نڪرندي ئي صحيح ٿي ويو، مولانا فضل الرحمان جي فلم هاڻي وڌيڪ نه هلندي: فواد چوڌري

اسلام آباد (اين اين آءِ) سڌسماءِ جي وفاقي وزير فواد چوڌري چيو آهي ته مولانا فضل الرحمان جي فلم هاڻي وڌيڪ هلڻ واري نه آهي ۽ نه هلي رهي آهي ۽ نه ئي اسان کي ڳتي هلندي نطر اچي رهي آهي هڪ انٽرويو ۾ فواد حسين مولانا فضل الرحمان ۽ آصف علي زرداري جي ملاقات تي ڳالاهئيندي چيو ته مولانا فضل الرحمان جي فلم هاڻي وڌيڪ نه هلندي هن چيو ته مخالف ڌر چوي ٿي ته انهن جا سمورا ڪيس ڇڏيا وڃن انهن اهو چيو ته اسان جو ڪهڙو ذاتي پئسو آهي ڇڏي ڏيون ٿا جڏهن ته عوام تحريڪ انصاف کي ان لاءِ ووٽ وڌنو آهي ته ملڪ جو لٽيل پئسو واپس آڻي. سڌ سماءَ جي وفاقي وزير چوڌري فواد چيو آهي ته شريف خاندان جا ماڻهو جيل ويندي ئي بيمار ۽ ٻاهر ايندي ئي لنڊن روانا ٿي وڃن ٿا، وڏي ميان صاحب جو لڳي ٿو ته جيل مان نڪرندي ئي انجائنا جو سور به ختم ٿي ويو آهي، خميس تي هڪ بيان ۾ هن چيو ته عام قيدي سوچيندا آهن ته جيڪڏهن اهي به مخالف ڌر اڳواڻ هجن ها ته جيل ۾ نه هجن ها، هن چيو ته عام قيدي کان هڪ کان ٻي بيرڪ وڃڻ جي اجازت نه آهي ۽ هي لنڊن جا سير ڪري رهيا آهن، هن چيو ته هاڻ قوم ۽ قانون مخالف ڌر اڳواڻ جي واپس اچڻ جو انتظار ڪري رهيا آهن، دعا آهي هو ته لنڊن ۾ بيمار نه ٿئي. هن چيو ته ڪرپشن جي نشي جا عادي مريض اقتدار کان ٻاهر هجن ته سندن لڱن ۾ ڀڃ ڊاهه شروع ٿي وڃي ٿي.

 

توانائي بحران جو خاتمو، امن امان جي بحالي ۽ شھرين جي تحفظ کي يقيني بڻائڻ سنڌ حڪومت جي اولين ترجيح آھي: مراد علي شاهه

ڪراچي (اسٽاف رپورٽر)سنڌ جي وڏي وزير سيد مراد علي شاھھ چيو آھي تھ سنڌ حڪومت ملڪ خاص طور تي سنڌ صوبي کي پيش ايندڙ توانائي جي بحران جي خاتمي لاءِ جامع ۽ ٺوس حڪمت عمليءَ تي عمل ڪري رھي آھي ۽ گذريل ڏينھن ٿر جي ڪوئلي مان ھلندڙ 660 ميگاواٽ جي ٻن پاور پلانٽن جو افتتاح ڪيو آھي جيڪو سنڌ حڪومت جي ھڪ وڏي ڪاميابي آھي. ھن اھا ڳالھھ اڄ وزيراعليٰ ھائوس ۾ فرانس جي ڪاروباري وفد جنھن جي اڳواڻي فرانس جي پاڪستان ۾ سفير ڊاڪٽر مارڪ باريتي ڪري رھيو ھو سان ملاقات جي موقعي تي ڪئي.  وفد ۾ فرانس – پاڪستان بزنس ڪونسل جي چيئرمين مسٽر ٿيري، ڪراچي ۾ مقرر فرانس جي قونصل جنرل دائدير تالپين، پاڪستان ۾ فرانسيسي سفارتخاني مان اقتصادي قونصلر  مسٽر فلپ فيوٽ پڻ موجود ھئا، جڏھن تھ وڏي وزير سان صوبائي وزير اسماعيل راھو، امتياز شيخ، چيف سيڪريٽري ممتاز شاھھ، چيئرمين پي اينڊ ڊي محمد وسيم ۽ مختلف کاتن جا سيڪريٽري شامل ھئا. اجلاس ۾ سنڌ جي مختلف شعبن ۾ سيڙپڪاري، توانائي، رينيوئيبل توانائي، ڪولڊ چين، زراعت، ڊيري اينڊ ميٽ، انفراسٽريڪچر جي ترقي، تعليم ۽ صحت وارن شعبن ۾ سيڙپڪاري ڪرڻ لاءِ خيالن جي ڏي وٺ ڪئي وئي. وڏي وزير فرانس جي وفد کي ٻڌايو تھ سنڌ ۾ ٿر ڪول جي حوالي سان وڏي پئماني تي سيڙپڪاري ۽ ڪم ٿي رھيو آھي. ھن وفد کي ٻڌايو تھ پاور پلانٽ سان پيدا ٿيندڙ بجليءَ جي ترسيل ۽ مين گرڊ ۾ شامل ڪرڻ لاءِ سندس سنڌ ٽرانسميشن اينڊ ڊسپيچ ڪمپني (ايس ٽي ڊي سي) قائم ڪئي آھي ۽ ان حوالي سان ان شعبي کي ھٿي وٺرائڻ لاءِ وڏي پئماني تي گنجائش ۽ موقعا موجود آھن. ھن فرانس جي وفد کي ٻڌايو تھ اھي ان شعبي ۾ سيڙپڪاريءَ لاءِ فرانس جي سيڙپڪارن کي قائل ڪري ۽ سنڌ حڪومت انھن کي سموريون سھوليون ۽ مراعتون فراھم ڪندي. صوبائي توانائي واري وزير امتياز شيخ وفد کي بريفنگ ڏني ۽ ٻڌايو تھ صوبائي توانائي ۽ سيڙپڪاري کاتا انھن کي ھر قسم جون سھولتون فراھم ڪندا. ھن چيو تھ سنڌ حڪومت ھر طرح سان سيڙپڪارن سان سھڪار ڪندي ۽ سنڌ حڪومت جو پي پي پي موڊ تحت ڪاميابيءَ سان ڪم ٿي رھيو آھي. ھن وڌيڪ چيو تھ سنڌ جي سامونڊي پاڻيءَ جي ڊيسيلينيشن ۽ منڇر ڍنڍ جي صفائي جي حوالي سان سيڙپڪاري جي بھ ھمت افزائي ڪئي ويندي. ھن چيو تھ مان چاھيان ٿو تھ منڇر  ڍنڍ جيڪا ايشيا جي سڀ کا وڏي ڍنڍ آھي جنھن جو پاڻي گدلو ۽ زھريلو ٿي ويو آھي ان جي مڪمل صفائي ٿئي ۽ ان ڍنڍ جي صفائيءَ جي حوالي سان ڪو جامع پلان جوڙيو وڃي ڇاڪاڻ تھ سنڌ حڪومت منڇر ڍنڍ کي بحال ڪرڻ چاھي ٿي. ھن فرانس جي وفد کي سنڌ حڪومت سان پي پي پي موڊ تحت ان حوالي سان سيڙپڪاري ڪرڻ جي پڻ آڇ ڪئي. فرانس جي وفد فيصلو ڪيو تھ اھي پي اينڊ ڊي ۽ سيڙپڪاري کاتي ۽ پي پي پي يونٽ سان وڌيڪ اجلاس منعقد ڪندا، ان بعد سمنڊ ۽ منڇر ڍنڍ جي سائيٽ جو دورو ڪري سنڌ حڪومت سان گڏجي ڪم ڪيو ويندو. فرانس جي زرعي سيڙپڪارن وڏي وزير کي ٻڌايو تھ اھي سنڌ حڪومت سان ڪينال لائننگ، ميٽ اينڊ ڊيري ڪارپوريٽ فارمنگ، شرمپ فارمنگ ۽ لائيو اسٽاڪ واري شعبي ۾ پڻ ڪم ڪرڻ جا خواھشمند آھن. اجلاس ۾ فيصلو ڪيو ويو تھ وڌيڪ ڪارروائيءَ لاءِ پي اينڊ ڊي، زراعي ۽ سيڙپڪاري کاتن سان الڳ الڳ اجلاس منعقد ڪيا ويندا.  ٻئي طرف  سنڌ جي وڏي وزير سيد مراد علي شاھھ چيو آھي تھ امن امان جي بحالي ۽ شھرين جي تحفظ کي يقيني بڻائڻ سندس حڪومت جي اولين ترجيح آھي. ھن چيو تھ اھا ترجيح ان وقت حاصل ٿي سگھندي جڏھن پوليس مختلف اسٽيڪ ھولڊرز سان صلاح مشوري بعد ڊگھي ۽ ننڍي مدي وارن مقصدن کي واضح ڪري ان تي صحيح ريت عمل ڪيو وڃي ۽ ان کي ويچار لاءِ حڪومت ڏانھن موڪليو وڃي. ھن اھا ڳالھھ اڄ خميس ڏينھن ھڪ مقامي ھوٽل ۾ سنڌ پوليس پاران رٿيل نمائش ۽ ريٽريٽ اسٽريٽجڪ ورڪشاپ کي خطاب ڪندي ڪئي. سيمينار ۾ وڏي وزير جو قانون وارو صلاحڪار مرتضيٰ وھاب، حاضر ۽ رٽائرڊ سينئر آفيسرن خاص طور تي آءِ جي پوليس، سول سوسائٽي جي ميمبرن وڏي انگ ۾ شرڪت ڪئي. وڏي وزير مراد علي شاھھ چيو تھ صوبائي حڪومت جي اھا ذميواري بڻجي ٿي تھ اھا امن امان کي بحال ڪري ۽ شھرين جي تحفظ کي يقيني بڻايو وڃي. ھن چيو تھ ان مقصد کي حاصل ڪرڻ لاءِ پوليس جي اداري کي ننڍن ۽ ڊگھي مدي وارن مقصدن کي حاصل ڪرڻ لاءِ مختلف اسٽيڪ ھولڊرز سان واضح ڪرڻ آھي ۽ ان کي ويچار ڪرڻ لاءِ حڪومت کي پيش ڪرڻ آھي. مراد علي شاھھ چيو تھ اھو سيمينار پوليس لاءِ تمام اھم آھي ۽ ان سان پوليس پنھنجي طاقت، ڪمزورين ۽ قابليت جو اندازو لڳائي سگھي ٿي. ھن چيو تھ سڄي دنيا ۾ پوليسنگ ھڪ چيلنجنگ پروفيشن آھي. ھن چيو تھ پوليس ھڪ پرائمري ايجنسي آھي جيڪا پبلڪ سيفٽي کي يقيني بڻائڻ ۽ ڏوھن تي ضابطو آڻڻ جي ذميوار ٿيندي آھي. مراد علي شاھھ چيو تھ اھڙي قسم جي اسٽريٽجڪ ورڪشاپ پوليسنگ جي مقصدن کي حاصل ڪرڻ ۾ مددگار ۽ حڪمت عملي جي جوڙجڪ ۾ سھڪاري ثابت ٿيندي. ھن چيو تھ مونکي پڪ آھي تھ ان ورڪشاپ جو جيڪو ايجنڊا آھي ان سان شرڪت ڪندڙن کي غور ۽ فڪر جي حوالي سان مدد حاصل ٿيندي. ھن چيو تھ ان ورڪشاپ سان تجربن ۽ مشاھدن جي مٽاسٽا ٿيندي. وڏي وزير خوشگوار انداز ۾ چيو تھ ان سيمينار ۾ سموري پوليس فورس کي گھرايو ويو آھي ۽ ان وقت گھٽين ۾ پوليسنگ لاءِ ڪوبھ پوليس اھلڪار نھ آھي. ھن وڌيڪ چيو تھ اڄ خميس واري ڏينھن سڄي صوبي ۾ رڳو ھڪ قتل رپورٽ ٿيو آھي ۽ ھاڻوڪي ڏينھن ۾ سڀ کان گھٽ شرح آھي ۽ مونکي پڪ آھي تھ امن امان اھڙي ريت برقرار رھندو. مراد علي شاھھ آءِ جي پوليس کي صلاح ڏني تھ ھُو تمام پوليس ريجن جا دورا ڪري ۽ سندن جونيئرن سان ملاقات ڪئي وڃي ۽ انھن جي بھتر پوليسنگ لاءِ ھمت افزائي ڪئي وڃي ۽ ڪميونٽي پوليس جي ترقيءَ لاءِ سول سوسائٽيءَ کي شامل ڪيو وڃي. وڏي وزير چيو تھ انسپيڪٽر جنرل پوليس سنڌ ۽ سندس ٽيم ان ٻن ڏينھن وارين مشقن مان تمام گھڻو فائدو حاصل ڪندا.

 

يو اي اي سان قيدين جي آزادي تي ڳالهيون جاري آهن: شاهه محمود قريشي

اسلام آباد ( ويب ڊيسڪ ) پرڏيهي وزير شاهه محمود قريشي چيو آهي ته گڏيل عرب امارات سان قيدين جي آزادي بابت ڳالهيون جاري آهن ۽ رمضان المبارڪ ۾ خوشخبري ملندي. سينيٽر مشاهد حسين سيد جي صدارت هيٺ پرڏيهي معاملن بابت اسٽينڊنگ ڪميٽي جو اجلاس ٿيو. اجلاس ۾ ڳالهائيندي شيري رحمان چيو ته  گڏيل عرب امارات جي جيل ۾ پاڪستاني سزا پوري ٿيڻ باوجود آزاد نه ٿي رهيا آهن. شاهه محمود قريشي چيو ته سزا پوري ڪندڙ قيدين جي واپسي لاءِ ڪوششون ڪري رهيا آهيون، سعودي عرب سان ڳالهيون ٿي چڪيون آهن، 2017ع تائين قيدي آزاد ٿيندا، جڏهن ته يو اي اي سان قيدين جي آزادي تي ڳالهيون جاري آهن، رمضان ۾ گڏيل عرب امارات کان خوشخبري ملندي.  هن چيو ته پلواما واقعي دوران مان گڏيل قومن جي سڪيورٽي ڪائونسل جي اجلاس ۾ هيس، اسان سڀ کان پهريون پلواما واقعي جي مذمت ڪئي پر ڀارت 10 منٽن ۾ پاڪستان تي الزام هنيو، دنيا کي ٻڌايو ته ڀارت بنا جاچ پاڪستان تي الزام هنيو، سرحدن جي ڀڃڪڙي تي آفريدي يورپي سفيرن کي بريفنگ ڏني، يو اين سيڪريٽري جنرل کي ڀارتي رد عمل تي خط لکيو ۽ دنيا کي ٻڌايو ته ڀارت معاملي کي غلط رنگ ڏئي رهيو آهي. سندس چوڻ هو ته وزيراعظم پلواما واقعي بعد ڀارت کي سهڪار جي آڇ ڪئي، نيپال، ترڪي، چين سميت ڪيترن ئي ملڪن جي پرڏيهي وزيرن رابطو ڪيو، او آءِ سي پرڏيهي وزيرن جو اجلاس پاڪستان جي چوڻ تي طلب ڪيو ويو، ڀارتي پرڏيهي وزير کي گهرائڻ جي فيصلي تي پارليامينٽ جي فيصلي تحت او آءِ سي جي اجلاس ۾ شرڪت نه ڪئي جڏهن ته او آءِ سي ڪشمير ۾ ڀارتي رياستي دهشتگردي خلاف ٺهراءَ به منظور ڪيو.

 

تبديلي جي دعويدارن غريب عوام کان ماني به ڦري ورتي: مرتضيٰ وهاب

ڪراچي( اسٽآف رپورٽر) اطلاعات، قانون ۽ اينٽي ڪرپشن کاتن بابت وزيراعليٰ سنڌ جي صلاحڪار بئريسٽر مرتضيٰ وهاب چيو آهي ته ملڪ جي معيشيت تباهي جي ڪناري تي پهچي چڪي آهي غريب عوام جو برو حال آهي تبديلي جي دعويدارن غريب عوام کان ماني جو گروهه به ڦري ڇڏيو آهي ملڪي معيشيت جو سڌارو اسد عمر جي وس جي ڳالهه ناهي اهي ماڻهو صرف ڳالهيون ڪرڻ ۽ دعوا ڪرڻ ڄاڻن ٿا مهانگائي عوام جي چيلهه چٻي ڪري چڏي آهي دوائن جا اگهه آسمان سان ڳالهائي رهيا آهن مهانگائي ۽ بيروزگاري عوام جو تيل ڪڍي چڏيو آهي. اهڙن خيالن جو اظهار هن پنهنجي هڪ بيان ۾ ڪيو. هن وڌيڪ چيو ته تحريڪ انصاف جا سمورا وڏا واعدا ڌري جا ڌرا رهجي ويا آهن ٻئي پاسي شيخ رشيد پنهنجي بيانن سان عوام جي زخمن تي لوڻ ٻرڪي رهيو آهي هو عوام جا مسئلا حل ڪرڻ ۽ ريلوي جي بهتري ڪرڻ بدران پنهنجي غلط زبان سان عجيب جوهر ڏيکاري رهيو آهي. هن کي غريب عوام جي ڏکن جو اندازو ئي ناهي تحريڪ انصاف جي حڪومت عوام کان جيئن جو حق کسي رهي آهي عالمي بينڪ جي اڳڪٿي معيشيت لاءِ خطري جي گهنٽي آهي . اقصادي ترقي جي شرح ۾ اضافو سست روي جو شڪار آهي. نا اهل اڳواڻن ميشيت کي تباهي جي ڪناري تي پهچايو آهي. اسان جي درخواست آهي ته وزيراعظم صاحب پاڪستان جي مظلوم عوام تي رحم ڪري ڇو ته ان جي ٽيم ڳالهيون ڪرڻ کانسواءِ ڪجهه نٿي ڄاڻي ڪراچي کان خيبر تائين عوام ان جي ظلم جو شڪار آهن پر پيپلزپارٽي سليڪٽيڊ اڳواڻن جي وائٽ ڪالر جرم کي وائکو ڪري ڇڏيندي جنهن ملڪ کي اقصادي تباهي جي ڪناري تي پهچايو آهي. بئريسٽر مرتضيٰ وهاب چيو ته ملڪ ۾ مهانگائي گذريل 6 سالن جي بلند ترين سطح تائي پهچي وئي آهي مديني جي رياست جو خواب ڏيکارڻ وارا خاموش ڇو آهن 9 مهينن ۾ مسئلن جي گهٽتائي بدران اضافو ٿيو آهي بجلي گئيس، دوائن، ٽرانسپورٽ جي اگهن ۾ اضافي سان عوام جي مشڪلون وڌيون آهن. توهان ماڻهن ملڪ جي معيشيت ۽ عوام جو تيل ڪڍي ڇڏيو آهي.

 

جاچ رپورٽ عدالت ۾ پيش، اسلام آباد هاءِ ڪورٽ ڏهرڪي جي نارين کي مڙسن سان گڏ رهڻ جي اجازت ڏئي ڇڏي

اسلام آباد (اين اين آءِ) اسلام آباد هاءِ ڪورٽ اسلام قبول ڪندڙ گهوٽڪي جي ٻن ڀينرن جي مذهب مٽائڻ کي درست قرار ڏيندي پنهنجي مڙسن سان وڃڻ جي اجازت ڏئي ڇڏي، جڏهن ته گهرو سيڪريٽري ٻڌايو ته ميڊيڪل رپورٽ موجب ڇوڪريون بالغ آهن جن جون عمريون 19 ۽ 20 سال آهن، ظاهر ۾ هي ڏاڍ ذريعي مذهب تبديل ڪرائڻ جو ڪيس نٿو لڳي، خميس تي اسلام آباد هاءِ ڪورٽ جي چيف جسٽس اطهر من الله گهوٽڪي جي ٻن ڀينرن رينا ۽ وينا جي تحفظ جي درخواست تي ٻڌڻي ڪئي، گهرو سيڪريٽري ذاتي حيثيت ۾ عدالت ۾ پيش ٿيو، چيف جسٽس چيو ته ٻڌايو هن وقت تائين ڇا ڪيو آهي، گهرو سيڪريٽري چيو ته عدالتي حڪم تي ڇوڪرين جو تحفظ ڪيو آهي، هن چيو ته عدالت اسان کي ڪميشن ميمبرن کي گڏ ڪرڻ جو چيو هو، گهرو سيڪريٽري چيو ته مان ۽ آءِ اي رحمان صاحب ٻئي ڇوڪرن سان ملي انهن کان راءِ وٺنداسين، گهرو سيڪريٽري چيو ته شيرين مزاري ٻي عورت ميمبر سميت ڇوڪرين سان ملي، هن چيو ته ظاهر ۾ هي ڏاڍ ذريعي مذهب مٽائڻ جو ڪيس نٿو لڳي، هن چيو ته ڪميشن جا 2 ميمبر ملڪ ۾ نه هئا، ٻين سڀني سان رابطو ٿي ويو، هن چيو ته ميڊيڪل بورڊ موجب آسيا جي عمر 19 ۽ ناديا جي 18 سال آهي، گهرو سيڪريٽري ميڊيڪل بورڊ جي رپورٽ به پيش ڪري ڇڏي، پمز جي ميڊيڪل بورڊ رپورٽ موجب آسيا جي عمر 19 ۽ ناديا جي عمر 18 سال آهي، عدالت چيو ته واضح ٿي ويو ته ڇوڪرين خوشي سان اسلام قبول ڪيو آهي، ڪميشن جا ميمبر احترام جوڳا آهن، عدالت ڇوڪرين کي پنهنجن مڙسن سان وڃڻ جي اجازت ڏيندي گهرو سيڪريٽري کي ڇوڪرين ۽ سندن مڙسن جي حفاظت جو پابند بڻائي ڇڏيو، عدالت انڪوائري ڪميشن کان 14 مئي تائين آخري سفارشن تي رپورٽ طلب ڪندي ڪيس جي ٻڌڻي ملتوي ڪري ڇڏي.