تازيون خبرون

Daily Archives: March 28, 2019

ڀارت جنگي جنون ۾ ورتل آهي، پاڪستان افغانستان ۾ امن چاهي ٿو: عمران خان

اسلام آباد(ويب ڊيسڪ) وزير اعظم عمران خان جي صدارت هيٺ اعليٰ سطح جو اجلاس ٿيو جنهن ۾ ملڪ جي سيڪيورٽي صورتحال تي خيالن جي ڏي وٺ ڪئي وئي. تفصيل موجب وزير اعظم عمران خان جي صدارت هيٺ اعليٰ سطح جو اجلاس ٿيو جنهن ۾ آرمي چيف قمر جاويد باجوه، ڊي جي آءِ ايس پي آر، ناڻي واري وزير اسد عمر، تعليم واري وزير شفقت محمود، مملڪتي گهرو وزير شهريار خان آفريدي ۽ گهرو سيڪريٽري سميت ٻين اعليٰ اختيارين شرڪت ڪئي. ذريعن موجب وزير اعظم جي صدارت هيٺ اجلاس ۾ ملڪ جي اندرين ۽ ٻاهرين سيڪيورٽي واري صورتحال ۽ نيشنل ايڪشن پلان تي عملدرآمد ۾ اڳڀرائي تي خيالن جي ڏي وٺ ڪئي وئي، ذريعن جو چوڻ آهي ته اجلاس ۾ وزير اعظم کي پابدني مڙهيل تنظِمن جي خلاف جاري ڪريڪ ڊائون تي به بريفنگ ڏني وئي جڏهن ته وزير اعظم جي بيان تي افغان اختيارين جي تازي دوري تي به غور ڪيو ويو. ذريعن موجب وزير اعظم جي صدارت هيٺ اجلاس ۾ پرڏيهي سيڪريٽري افغان امن ڳالهين واري معاملي تي بريفنگ ڏني ۽ فنانشل ايڪشن ٽاسڪ فورس جي سفارشن تي به خيالن جي ڏي وٺ ڪئي وئي جڏهن ته ڀارتي جارحيت کان پوءِ واري صورتحال تي به ڳالهيون ٿيون. ذريعن جو چوڻ آهي ته اجلاس ۾ وزير اعظم عمران خان جو چوڻ هو ته پاڪستان افغانستان ۾ امن چاهي ٿو، افغانستان ۾ امن سان سڄي خطي جو امن سلهاڙيل آهي، پاڪستان افغانستان ججي امن لاءِ مخلصاڻو ڪردار ادا ڪندو رهندو. ٻئي طرف وزيراعظم عمران خان چيو آهي ته پاڪستان جو پابندي مڙهيل تنظيم جيش محمد سان ڪوبه تعلق ناهي ۽ پاڪستان ۾ دهشتگرد تنظيمن خلاف اڄ جيڪو ڪجهه ٿي رهيو آهي ان کان اڳ ڪڏهن نه ٿيو. برطانوي رسالي کي ڏنل انٽرويو ۾ وزيراعظم عمران خان چيو ته ڀارت جنگي جنون ۾ ورتل آهي، ڀارت جي عام چونڊن کان اڳ ڪجهه ٿي سگهي ٿو، ڀارتي وزيراعظم مودي هڪ جنوني شخص آهي، هو حملي سان ٻنهي ملڪن کي جنگ طرف ڌڪي ايندو. وزيراعظم چيو ته پلواما واقعو مودي حڪومت جنگي جنون پيدا ڪرڻ لاءِ استعمال ڪيو، پلواما حملو مودي جي مسلمان مخالف حڪومت ۽ والاريل ڪشمير ۾ سندس سخت پاليسين جو نتيجو آهي. عمران خان جو چوڻ هو ته پاڪستان جو پابندي مڙهيل تنظيم جيش محمد سان ڪوبه تعلق ناهي، نئين پاڪستان ۾ دهشتگردن لاءِ ڪابه جاءِ ناهي، ملڪ ۾ دهشتگردن خلاف ڪريڪ  ڊائون جاري آهي، پاڪستان ۾ دهشتگرد تنظيمن خلاف اڄ جيڪو ڪجهه ٿي رهيو آهي ان کان اڳ ڪڏهن به ناهي ٿيو. هن وڌيڪ چيو ته پاڪستان جي معيشت کي مضبوط بڻائڻ لاءِ پرعزم آهيون، چين سدائين پاڪستان سان سهڪار ڪيو آهي جنهن تي سندس ٿورائتا آهيون جڏهن ته اهو تاثر غلط آهي ته پاڪستان چين جي ڪلائنٽ رياست بڻجي چڪو آهي. وزيراعظم جو چوڻ هو ته هن دفعي پاڪستان آخري ڀيرو آءِ ايم ايف سان رابطو ڪندو.

 

 

 

احتساب جي نالي انتقام ورتو پيو وڃي، سنڌ کي پنهنجو حق نه ٿو ملي: بلاول ڀٽو زرداري

نوابشاهه ( ويب ڊيسڪ ) پاڪستان پيپلز پارٽي جي چيئرمين بلاول ڀٽو زراري جي قيادت ۾ ٽرن مارچ ” ڪاروان ڀٽو “ اڄ نوابشاهه کان لاڙڪاڻي لاءِ روانو ٿيندو.  ٽرين مارچ، محرابپور، خيرپور، روهڙي، سکر ۽ حبيب ڪوٽ کان ٿيندو لاڙڪاڻي پهچي پنهنجي پڄاڻي تي پهچندو. پيپلز پارٽي جو ٽرين مارچ پهريون مرحلو مڪمل ڪري گذريل ڏينهن نواب شاهه پهتو هو. پيپلزپارٽي جي جيالن جي وڏو انگ به بلاول سان گڏ آهي، جيالن طرفان هنڌ هنڌ سندس شاندار استقبال ڪيو ويو ويو ۽ پرجوش جيالن پارٽي قيادت جي حق نعرا پڻ هنيا. ٽرين مارچ جي آمد تي اڳواڻن ۽ ڪارڪنن بلاول تي گلن جي ورکا ڪئي، گيتن، تي رقص ڪيو، ، جڏهن ته انتظاميه پاران سيڪورٽي جا انتظام سخت ڪيا ويا هئا. پ پ چيئرمين بلاول ڀٽو زرداري اڳواڻن ۽ ڪارڪنن جي هڪ وڏي ميڙ کي خطاب ڪندي چيو 40سال گذرڻ باوجود اڄ به ماڻهو پيپلز پارٽي سان  پيار ڪن ٿا .نوابشاهه ريلوي اسٽيشن تي خطاب ڪندي بلاول ڀٽو زرداري چيو ته ان جو چٽو مثال اوھان جي سامهون آهي اڄ ھزارين ماڻهو  استقبال لا۽ ھتي پھتا آهن. ھن چيو ته مخالف ڇا ٿا سمجهن ته  بلاول ڀٽو ڊڃي ويندو پر مخالفن کي اھو ٻڌائڻ  ٿو چاھيان ته اسان ھميشا  ميدان تي رھيا آھيون .ھن چيو   ته وفاقي حڪومت انتقامي ڪاروين تي لهي آئي آهي، جنهن تي کي اعتراض آهي، اسان جا ووٽ چوري ڪري بدنام ڪيو پيو وڃي. احتساب جي نالي تي  من گهڙت ڪيس مڙهيا پيا وڃن، عوام کي بي وقوف بڻايو پيو وڃي، شهيد ڀٽو، شهيد بينظير جي ڪيسن جو ڪو به سوموٽو ايڪشن نه ورتو وڃي .هن چيو ته  سنڌ  کي پنهنجو حق  نٿو ڏنو وڃي، عوام بک، بي روزگاري مهانگائي کان تنگ اچي ويو آهي، اسين عوام سان گڏ آهيون، شهيد بينظير جي مشن کي پورو ڪرڻ لاء عوام اميدن تي پورو لهندس. پ پ چيئرمين بلاول ڀٽو ڪارڪنن کي خطاب ڪندي چيو ته هي ڇا ٿا سمجهن ته نيب گردي ذريعي اسان جو رستو روڪي وٺندا، اسان ڄاڻو ٿا ته نيب ڪارو قانون آهي، اهي سمجهن ٿا ته شهيد ڀٽو جو ڏوهٽو ۽ بي بي جو پٽ ڊڄي ويندو، اسان دهشتگردن، مشرف،  آمرن کان نه ڊناسين ته اوهان کان ڇا ڊڄنداسين. ڌانڌلي ذريعي ٺهندڙ حڪومت جو احتساب ٿيندو ۽ وزيراعظم هائوس مان هاڻي کي رڙيو اچڻ شروع ٿي ويون آهن. اڃا ته رڳو ٽرين مارچ جي شروعات ڪئي آهي، جڏهن لانگ مارچ ڪنداسين ته هنن جو ڪهڙو حشر ٿيندو. بلاول چيو ته اسان کي احتساب تي ڪو به اعتراض ناهي ڪرپٽ ماڻهن کي پڪڙيو وڃي پر احتساب جي نالي تي انتقامي ڪارروائي منظور ناهي، پنجاب ۽ ڪي پي اسان جو رستو روڪيو ويو، اليڪشن مهم هلائڻ نه ڏني وئي، حڪومت جا اهي سڀ حربا پيپلز پارٽي جو رستو روڪڻ لاءِ آهن، پ پ جي سينيئر قيادت ۽ اميدوارن کي چونڊن کان اڳ نااهل قرار ڏنو ويو، پيپلز پارٽي تي پارٽي ڇڏڻ جو دٻاءُ وڌو ويو. بلاول وڌيڪ چيو ته عوام جي حقن تي ڪو به ٺاهه نه ڪنداسين، تبديلي سرڪار معاشي دهشتگردي ڪري رهي آهي، هارين جو معاشي قتل ٿي رهيو آهي، بجلي مهانگي آهي اهو آهي نئون پاڪستان، اسان ڪٺ پتلي حڪومت کي نٿا مڃون، اهو ڪهڙي قسم جو نظام ۽ ڪهڙي قسم جو وزيراعظم آهي، جيڪو مودي خلاف دهشتگردن خلاف پابندي مڙهيل تنظيم خلاف ڪجهه نٿو ڪري ۽ سياسي انتقام وٺي رهيو آهي، منهنجي نيرن ۽ ڌوٻي جي بلن تي جي آءِ ٽي جوڙي سگهي ٿي ته پابندي مڙهيل تنظيمن ۽ ساڻن لاڳاپا رکندڙ وزيرن خلاف جي آءِ ٽي ڇو نٿي جوڙي سگهي. ان موقعي تي پ پ اڳواڻن  صوبائي وزير سيد سردار شاهه، سيد ناصر شاهه ،عاجز ڌامراھ، نثار کهڙو۽ ٻين پڻ  خطاب ڪيو،

 

 

حجم، پلمبر، ريڙهي وارو ۽ نان وارو موبائيل ٽيڪس ڇو ادا ڪري: سپريم ڪورٽ

اسلام آباد ( ويب ڊيسڪ ) سپريم ڪورٽ وفاقي ۽ صوبائي حڪومتن کان هڪ سال ۾ وصول ڪيل ٽيڪسن جا تفصيل طلب ڪري ورتا. سپريم ڪورٽ ۾ موبائيل فون ڪال جي واڌو ٽيڪسن بابت ڪيس جي ٻڌڻي ٿي. اعليٰ عدالت وفاقي ۽ صوبائي حڪومتن کان هڪ سال ۾ وصول ڪيل ٽيڪسن جا تفصيل طلب ڪري ورتا.  وفاقي ۽ صوبائي حڪومتن پنهنجي موقف ۾ چيو ته موبائيل ٽيڪس جو معاملو 4/184 ( عوامي مفاد واري معاملي تي پاڻمرادو نوٽيس ) ۾ نٿو اچي.  جنهن تي جسٽس قاضي فائز عيسيٰ پڇاڻو ڪيو ته موبائيل فون ٽيڪس جو معاملو 3/184 ۾ اچي ٿو؟ جنهن تي اٽارني جنرل جواب ڏيندي چيو ته موبائيل فون ٽيڪس وارو معاملو عوامي مفادن وارن معاملن ۾ نٿو اچي.  جسٽس قاضي فائز عيسيٰ چيو ته پارليامنٽ جو بنيادي ڪم ڇا آهي، ملڪ هلائڻ لاءِ بنهه پئسي جي ضرورت پوندي آهي. پر ڇا پارليامنٽ جو ڪم رڳو ٽيڪس گڏ ڪرڻ آهي؟  جسٽس اعجاز الحسن به چيو ته حجم، پلمبر، ريڙهي وارو ۽ نان وارو موبائيل ٽيڪس ڇو ادا ڪري، حڪومت اهو ڪيئن طئي ڪندي ته ڪير ٽئڪس ادا ڪندو ڪير نه؟ موبائيل ٽيڪس اهو ئي ڏيندو جيڪو ٽيڪس ڏيندڙ هجي، جيڪو شخص گهربل معيار تي پورو ئي نٿو لهي اهو هولڊنگ ٽئڪس ڇو ادا ڪري. جسٽس قاضي فائز عيسيٰ پڇو ته ڇا 10 سيڪڙو سروس جارچز ختم ڪرڻ تي ڪو اعتراض آهي؟ نجي موبائيل ڪمپني جي وڪيل عدالت کي ٻڌايو ته اعليٰ عدالت جي حڪم تي موبائيل ڪمپني پنهنجا ڏهه سيڪڙو سروس چارجز  ختم ڪري ڇڏيا آهن.

 

 

 

وفاقي حڪومت کي گم ٿيل ماڻهن جي بازيابي ۾ ڪا به دلچسپي ناهي: سنڌ هاءِ ڪورٽ

ڪراچي ( ويب ڊيسڪ ) سنڌ هاءِ ڪورٽ پاڪستان نيوي جي اهلڪار عمران يوسف سميت 50 کان وڌيڪ گم ٿيل ماڻهن جي بازيابي بابت درخواستن تي جي آءِ ٽي ۽ صوبائي ٽاسڪ فورس جو ٻيهر اجلاس گهرائڻ جو حڪم ڏئي ڇڏيو.  جسٽس نعمت الله ڦلپوٽو ۽ جسٽس ڪي ڪي آغا تي ٻڌل ڊويزنل بئنچ جي روبرو پاڪستان نيوي جي اهلڪار عمران يوسف سميت 50 کان وڌيڪ گم ٿيل ماڻهن جي بازيابي بابت درخواستن جي ٻڌڻي ٿي.  وفاقي حڪومت طرفان جواب جمع نه ڪرائڻ تي عدالت اسسٽنٽ اٽارني جنرل پاڪستان تي ڪاوڙ جو اظهار ڪندي رمارڪس ڏنا ته مشاهدي ۾ آيو آهي ته وفاقي حڪومت گم ٿيل ماڻهن واري معاملي تي ڪا به دلچسپي ناهي، هر هر نوٽيس ڏيڻ باوجود اٽارني جنرل جي آفيس مان جواب جمع ناهي ڪرايو ويندو.  جسٽس نعمت الله ڦلپوٽو چيو ته افسوس سان چوڻو ٿو پوي ته حڪومت کي عوام جي پرواهه ناهي، لڳي ٿو پوليس کي به شهري بازياب ڪرائڻ ۾ ڪا دلچسپي ناهي.  پاڪ سامونڊي فوج پنهنجي گم ٿيل سپاهي جي جاچ رپورٽ جمع ڪرائيندي چيو ته عمران يوسف جي گمشدگي ۾ پاڪستان نيوي جا آفيسر ملوث ناهن.  اسسٽنٽ اٽارني جنرل چيو ته پاسبان جي جنرل سيڪريٽري عثمان معظم جي پٽ سعد صديقي کي ڪنهن حراستي مرڪز ۾ رکيو ويو آهي، پر گهرو وزارت جي جنهن آفيسر اهو ڳالهه ٻڌائي ان جو نالو نٿو ڄاڻان. جاچ آفيسر بيان ڏنو ته سڄي ملڪ جي حراستي مرڪزن کي خط لکيا آهن جڏهن ته اڃان تائين ڪو به جواب ناهي مليو. جسٽس نعمت الله ڦلپٽو چيو ته 2014ع کان شهري گم آهن پر پوليس کي ڳڻتي ئي ناهي.  عدالت ايڊيشنل اٽارني جنرل کي طلب ڪندي گم ٿيل ماڻهن جي بازيابي واري معاملي تي جي آءِ ٽي ۽ صوبائي ٽاسڪ فورس جو ٻيهر اجلاس گهرائڻ جو حڪم ڏيندي سنڌ جي گهرو کاتي، آءِ جي سنڌ، ڊي جي رينجرز ۽ ٻين کان 24 اپريل تي جواب طلب ڪري ورتو.

 

 

فلسطيني مسلمانن تي اسرائيلي ظلمن جو مثال نٿو ملي، ڀارت پلواما واقعي تي عالمي اڪيلائي کي منهن ڏئي رهيو آهي: فواد چوڌري

اسلام آباد ( ويب ڊيسڪ ) سڌ سماءُ واري وفاقي وزير فواد چوڌري چيو آهي ته فلسطيني مسلمانن تي اسرائيلي ظلمن جو مثال نٿو ملي، ڀارت پلواما واقعي تي عالمي اڪيلائي کي منهن ڏئي رهيو آهي. اسلام آباد ۾ ميڊيا ورڪشاب جي تقريب ۾ خطاب فواد چوڌري چيو ته سڄي دنيا جي ميڊيا ۾ جديد ٽيڪنالوجي جو استعمال وڌي رهيو آهي جڏهن ميڊيا ٽيڪنالوجي ۾ هائبرڊ وار فيئر جو دور آهي ۽ وار پروپيگنڊا بنيادي اهميت اختيار ڪري چڪو آهي.  فلسطيني ظلمن تي ڳالهيون ڪندي فواد چوڌري چيو ته فلسطيني مسلمانن تي اسرائيلي ظلمن جو مثال نٿو ملي ۽ سموري دنيا ۾ اسرائيل واويلا ڪري رهيو آهي ته سندن امن کي خطرو آهي. هن چيو دهشتگردي خلاف اسان جو ڪيس مضبوط هو پر اهو بهتر نموني پيش نه ڪري سگهياسين. ڀارت ڪشميرين جي جدوجهد آزادي کي دهشتگردي قرار ڏيڻ جي ڪوشش ڪئي. ڀارتي دهشتگردي بابت ڳالهائيندي فواد چوڌري چيو ته ڀارت کي پلواما واقعي تي عالمي اڪيلائي کي منهن ڏئي رهيو آهي ۽ اهو ثابت ٿيو ته ڀارتي وزيراعظم نريندر مودي پلواما واقعي کي سياسي مقصدن لاءِ استعمال ڪيو.  هن چيو ته مودي چونڊن ۾ ڪاميابي لاءِ ڪروڙين ماڻهن جي زندگي داءُ تي لڳائي پر دنيا جي اڳيان ڀارتي وزيراعظم جو اصل چهرو وائکو ٿي ويو . وفاقي وزير چيو ته پاڪستان کي عالمي ميڊيا لاءِ پنهنجا دروزا کولڻ جي ضرورت آهي ۽ اسان چاهيون ٿا ته عالمي ميڊيا ۽ سياح پاڪستان جي خوبصورتي ڏسن.

 

 

 

پاڪستاني معيشت مضبوط ڪرڻ لاءِ ڪراچي جي ترقي ضروري آهي: عالمي بئينڪ

ڪراچي (ويب ڊيسڪ) ورلڊ بينڪ جي پاڪستان ڪنٽري ڊائريڪٽر پيـشا موٺو لينگوان چيو آهي ته پاڪستان جي معاشي ترقي ۽ استحڪام لاءِ ڪراچي جي ترقي اڻ ٽر آهي پر پاڪستان جي معاشي ترقي جي شرح 7 کان 8 سيڪڙو هر سال جي سطح تي آڻڻ لاءِ ڪراچي جي معيشت کي 10 سيڪڙو وڌيڪ رفتار سان ترقي ڪرڻي پوندي. ڪراچي ۾ ٿنڪ ٽينڪ C100 جي سيمينار ۾ شرڪت جي موقعي تي ميڊيا سان ڳالهائيندي ورلڊ بئينڪ جي ڪنٽري ڊائريڪٽر چيو ته پاڪستان جي معيشت ۾ ڪراچي کي بنيادي اهميت حاصل آهي پر ڪراچي جهڙي آبادي وارن شهرن جي ڀيٽ ۾ ڪراچي جي انفراسٽڪچر جو معيار ڪافي پوئتي آهي جنهن کي بهتر بڻائڻ لاءِ ورلڊ بئينڪ سنڌ حڪومت سان سهڪار ڪري رهي آهي، ورلڊ بئينڪ ڪراچي جي انفراسٽرڪچر جي بهتري، ٽرانسپورٽ،پاڻي جي فراهمي ۽ ميونسيپل ڪارپوريشن جي صلاحيت بهتر بڻائڻ لاءِ قرض فراهم ڪندي. پيشا موٺو الينگوان چيو ته وفاقي حڪومت ڪراچي جي گرين لائن بس منصوبي لاءِ بسن جي خريداري ۾ ورلڊ بئينڪ کان سهڪار جي درخواست ڪئي آهي ورلڊ بئينڪ مارڪيٽ کان بهتر ڪمرشل ڊيل جي بنياد تي بسن جي خريداري ۾ سهڪار ڪندي. هن ٻڌايو ته ورلڊ بئينڪ سنڌ حڪومت جي ريپڊ ٽرانزٽ منصوبو يلولائن جي انفراسٽرڪچر ۽ بسن لاءِ  به قرض فراهم ڪندي، گرين لائن ۽ يلو لائن ٻنهي منصوبن لاءِ ورلڊ بئينڪ 40 ڪروڙ ڊالرن جو قرض فراهم ڪندي. ورلڊ بئينڪ جي ڪنٽري ڊائريڪٽر ٻڌايو ته ڪراچي واٽر اينڊ سيوريج بورڊ جي ترقي لاءِ به ٻيا عالمي مالياتي ادارن ۽ خانگي سيڙپڪارن سان گڏجي ورلڊ بئينڪ قرض فراهم ڪندي، واٽر بورڊ جي نظام جي بهتري لاءِ 12 سالن واري منصوبي تي هڪ ارب 60 ڪروڙ ڊالر خرچ ڪيا ويندا. ان منصوبي تحت واٽر اينڊ سيوريج بورڊ لاءِ اسٽوريج جون سهولتون به تعمير ڪيون وينديون ان منصوبي جي پهرين فيز ۾ ورلڊ بئينڪ 10 ڪروڙ ڊالرن جو قرض فراهم ڪندي، منصوبي ۾ ايشيا جي ترقياتي بئينڪ، ايشيا انفراسٽڪچر انويسٽمنٽ بئينڪ ۽ خانگي سيڙپڪاري به شامل آهي. ورلڊ بئينڪ ڪراچي ۾ نيبر هوڊ امپروومنٽ پراگرام تحت ڪراچي جي انفراسٽڪچر ۽ عوامي هنڌن کي بهتر بڻائڻ ۾ سنڌ حڪومت ۽ ڪي ايم سي سان سهڪار ڪري رهي آهي پر ڪراچي ۾ جاري حددخلين جي خاتمي واري مهم سان ڪو به واسطوناهي ان حوالي سان ورلڊ بئينڪ جي پاليسي واضح آهي ۽ ورلڊ بئينڪ کي حددخلين جي خاتمي سان ڳنڍڻ غلط تصور آهي، ورلڊ بئينڪ ڪراچي ميٽروپوليٽن ڪارپوريشن ۽ ڊي ايم سيز جي صلاحيتن کي بهتر بڻائڻ خاص ڪري مالياتي صلاحيتن جي بهتري لاءِ به سهڪار ڪري رهي آهي. ورلڊ بئينڪ جي لاڳت موجب ڪراچي ۾ انفراسٽڪچر جي بهتري ۽ ان کي دنيا جي وڏن شهرن جي برابر سهولتون سان ليس ڪرڻ لاءِ 10 ارب ڊالرن جي سيڙپڪاري جي ضرورت آهي جنهن ۾ ورلڊ بئينڪ 70 کان 80 ڪروڙ ڊالرن جي فنانسنگ ڪندي.

 

بي بي جي شهزادي جي شاندار استقبال تحريڪ انصاف جون ننڊون ڦٽائي ڇڏيون، ايندڙ وقت بلاول جو آهي: مرتضيٰ وهاب

ڪراچي( اسٽاف رپورٽر ) اطلاعات، قانون ۽ اينٽي ڪرپشن بابت وزيراعليٰ سنڌ جي صلاحڪار بئريسٽر مرتضيٰ وهاب چيو آهي ته عوام پاران بلاول ڀٽو زرداري جي پر جوش استقبال ثابت ڪري ڇڏيو آهي ته ايندڙ وقت بلاول ڀٽوجو آهي عوام سنڌ جي چپي چپي تي ڪاروان ڀٽو جي انتظار ۾ بي چين آهي. شهيد ڀٽو جو ڏهٽو عوام ۽ هن ملڪ جي اميد آهي. بي بي جي شهزادي جي پر جوش استقبال تنقيد ڪندڙن جون ننڊون حرام ڪري ڇڏيون. سياسي بونا ڄاڻي وٺن بلاول ڀٽو هن ملڪ جو روشن مستقبل آهي. ملڪ جي عوام پنهنجي محبوب اڳواڻ بلاول ڀٽو سان محبت ۽ عقيدت جو رشتو رکي ٿي. هن وڌيڪ چيو ته اسان پنهنجي هر دلعزيز اڳواڻ بلاول ڀٽو زرداري جي پر جوش استقبال تي عوا جا ٿورائتا آهيون هن وڌيڪ چيو ته پاڪستاني عوام پنهنجي محبوب اڳواڻ بلاول ڀٽو سان بي پناهه محبت ۽ عقيدت رکي ٿي.  هاڻي ڪراچي کان ڪشمور تائين، لاڙڪاڻي کان لاهور تائين هر گهر ۾ ڀٽو جو نعرو لڳندو. هن چيو ته سموري سنڌ جي عوام هر اسٽيشن تي ڪاروان ڀٽو جو پر جوش ۽ شاندار استقبال ڪري ثابت ڪري ڇڏيو ته هو تبديلي واري سرڪار کي نٿا مڃن ڇو ته اها حڪومت ووٽ چوري ڪري ٺاهي وئي آهي. هن وفاقي حڪومت تي سخت تنقيد ڪندي چيو ته ڪاروان ڀٽو جمهوريت جي بقاءَ ۽ عوام جا مسئلا حل ڪرڻ لاءِ ڪيو پيو وڃي. ڇو ته جڏهن کان تحريڪ انصاف جي حڪومت آئي آهي عوام مهانگائي  هيٺيان دٻجي وئي آهي ۽ انهن جو ڪو حال پچڻ وارو ڪونهي. اسان جي صوبي جي گئس ۽ پاڻي جي حصي  ۾ زبردستي ڪٽوتي ڪئي وئي جڏهن ته مالياتي ايوارڊ جا120ارب رپيا سنڌ کي ناهن مليا. جنهن سبب صوبي ۾ ترقياتي منصوبا مڪمل ڪرڻ ۾ ڏکيائي پيش اچي رهي آهي. جيڪڏهن اهي پئسا سنڌ جي عوام کي ملي وڃن ته رڪيل ترقياتي ڪم مڪمل ٿي وڃن ۽ صوبي جي عوام خوشحالي ۽ ترقي جي راهه تي گامزن ٿي سگهي.  هينڊآئوٽ نمبر 237

 

ملڪ ۾ ڪوڙن جو ٽولو حڪومت ڪري رهيو آهي، نيب پنهنجي ٻٽي احتساب جو معيار هڪ ڪري: ن ليگ

اسلام آباد(ويب ڊيسڪ) پاڪستان مسلم ليگ ن جي ترجمان مريم اورنگزيب جو چوڻ آهي ته ملڪ ۾ ڪوڙن جو ٽولو حڪومت ڪري رهيو آهي. اسلام آباد ۾ ميڊيا سان ڳالهائيندي پاڪستان مسلم ليگ ن جي ترجمان چيو ته هو پنهنجي پارٽي ۽ ٻين سياسي پارٽين جي ڪارڪنن جي ٿورائتي آهي جن نواز شريف جي صحت لاءِ دعا ڪئي، هن وقت مسلم ليگ ن جي پهرين ترجيح نواز شريف جو علاج آهي، ڳالهين کان پُءِ نواز شريف جو علاج شروع ٿيندو. مريم اورنگزيب جو چوڻ هو ته نواز شريف جي باير ۾ چيو پيو وڃي ته هو علاج لاءِ لنڊن وڃڻ چاهي ٿو، نواز شريف ڪنهن به وقت لنڊن وڃڻ جو ناهي چيو، عدالت ۾ وزير اعظ۾ عمران خان ۽ سندس ترجمان جو سياسي نظريو ڪوڙو ثابت ٿيو، عمران خان ۽ سندس ترجمان پاڻ لنڊن وڃڻ چاهن ٿا. مسلم ليگ ن جي ترجمان جو چوڻ هو ته نيب ۽ حڪومت جي ڳٺ جوڙ تي مهر لڳي چڪي آهي، مخالف ڌر جي اڳواڻن کي گرفتار ڪيو ويندو آهي ۽ حڪومتي اڳواڻ گرفتار ناهن ٿيند ، عليمه خان، پرويز خٽڪ ۽ ڪيترن ئي ٻين ماڻهن جي خلاف نيب ڪارروائي ڇو ناهي ڪري رهي، جهانگير ترين جي مالي ۽ چوڪيدار جي نالي ڪوڙا اڪائونٽ ثابت ٿيا، جهانگير ترين کي گرفتار نه پيو ڪيو وڃي؟ نيب پنهنجي ٻٽي احتساب جو معيار هڪ ڪري. مريم اورنگزيب چيو ته فواد چوڌري پنهنجي نوڪري بچائڻ جي ڪوشش ڪري رهيو آهي، سندس چوڻ آهي ته نواز شريف نيب سان پلي بارگين ڪري ٻاهر هليو وڃي، شهباز شريف تي هڪ به الزام ثابت ناهي ٿي سگهيو، گذريل ڏينهن هن چيو ته شباز شريف جو نالو اي سي ايل مان ڪڍڻ جو فيصلو چيلينج ڪيو ويندو. هر ڪارروائي تي فواد چوڌري اثر انداز ٿيڻ جي ڪوشش ڪندو آهي، نيب چيئرمين کي وضاحت ڪرڻي پوندي ته ڇا فواد چوڌري نيب جو ترجمان آهي؟ جيڪڏهن فواد چوڌري نيب جو ترجمان آهي ته نيب چيئرمين باضابطا نوٽيفڪيشن جاري ڪري جيڪڏهن فواد چوڌري ترجمان ناهي ته نيب چيئرمين  نوٽيس وٺي.

 

 

ٽرين مارچ ۾ ڏهاڙي تي ڪم ڪندڙ ماڻهو شامل آهن، بلاول ابو بچايو نه پر ابو مارايو مارچ تي نڪتل آهي: شيخ رشيد

راولپنڊي ( ويب ڊيسڪ ) ريلوي واري وفاقي وزير شيخ رشيد جو چوڻ آهي ته بلاول ڀٽو زرداري جي ٽرن مارچ ۾ ڏهاڙي تي ڪم ڪندڙ وارا ماڻهو شامل آهن، ٽرين ۾ 714 سيٽون ڏنيون ويون اهي به پوريون ناهن.  تفصيل موجب ريلوي واري وفاقي وزير شيخ رشيد پ پ چيئرمين بلاول ڀٽو زرداري تي تنقيد ڪندي چيو ته بلاول جي اها تحريڪ ابو بچايو نه پر ابو مارايو تحريڪ آهي. شيخ رشيد جو چوڻ هو ته بلاول ڀٽو اثر مان نڪري آيو ته سياست ڪري سگهندو، اسان ريل گاڏي جي ڪرائي جي مد ۾ 10 لک 44 هزار رپيا ورتا آهن.  ريلوي واري وفاقي وزير چيو ته ريلوي اختيارين ايترا ئي پئسا ورتا آهن جيترا ٿين پيا، وڌيڪ ناهن ورتا، جيڪڏهن ٽرين کي ڪو به نقصان پهتو ته ان جي ڌار رقم وٺنداسين.

 

ٿرپارڪر: مسافر ڪوچ ۽ ڪار ۾ آمهون سامهون ٽڪر، هڪ ڄڻو فوت، زال ۽ ڌي زخمي

ٿرپارڪر(رپورٽ:سجاول بجير)اسلام ڪوٽ روڊ تي ڳوٺ ٻاراچ وٽ مسافر ڪوچ ۽ ڪار ۾ آمهون سامهون ٽڪر ٿي پيو جنهن جي نتيجيب۾ ڪار سوار ڳوٺ مصري ميمڻ جو رهواسي رفيق ميمڻ ٿڏي تي فوت ٿي ويو ۽ ۽ سندس زال شمشاد بيگم ۽ 6 سالن جي هڪ ٻارڙي شديد زخمي ٿي پيون جن کي مٺي سول اسپتال آندو ويو. زخمي شمشاد بيگم جي حالت انتهائي ڳڻتي جوڳي ٻڌائي وڃي ٿي. جنهن کي حيدرآباد ريفر ڪرڻ جو ڊاڪٽرن مشورو ڏنو آھي ۽ زخمي ٻارڙي جي طبيعت سڌندڙ آھي جنهن کي مٺي سول اسپتال جي ايمرجنسي وارڊ ۾ داخل ڪيو ويو آھي. حادثي ۾ فوت ٿيل رفيق ميمڻ صحت کاتي اسلام ڪوٽ جو ملازم ٻڌايو وڃي ٿو جيڪو پنهنجي گهر ڀاتين سان گڏ ڪار ۾ سوار ٿي ڳوٺ مصري ميمڻ کان مٺي طرف اچي رهيو هو ته ڳوٺ ٻاراچ ڀرسان سامهون ايندڙ مسافر ڪوچ سان حادثو پيش آيو. جڏھن ته مسافر ڪوچ ٽڪر بعد ڪلٽي ٿيڻ کان بچي ويئي جنهن ڪري ڪوچ سوار مسافر جاني نقصان کان محفوظ رهيا. حادثي جو سبب بڻيل مسافر ڪوچ پوليس اي ايس آءُ عرض محمد اوٺو جي ٻڌائي وڃي ٿي جنهن جو ڊرائيور قاسم چانڍيو حادثي بعد موقعي تان فرار ٿي ويو آھي جنهن کي پوليس گرفتار ڪري نه سگهي هئي. جڏھن ته فوت ٿي ويل نوجوان جو لاش پڻ مٺي سول اسپتال آندو ويو آھي. جتي ضروري ڪارروائي بعد وارثن حوالي ڪيو ويو.