تازيون خبرون

Monthly Archives: February 2019

ڀارت کي سرپرائز، پاڪ هوائي فوج انڊيا جا 2 جنگي جهاز تباهه ڪري ڇڏيا، 2 پائليٽ گرفتار

راولپنڊي ( ويب ڊيسڪ ) پاڪستاني هوائي فوج جي جنگي جهازن ڀارت کي ڀرپور جواب ڏيندي ٻه جهازن کي تباهه ڪري ڇڏيو جڏهن ته ٻن پائليٽ کي به گرفتار ڪيو ويو آهي. پرڏيهي آفيس ۽ پاڪ فوج جي ترجمان ڀارت کي جواب ڏيڻ جي تصديق ڪري ڇڏي آهي. ڊي جي آءِ ايس پي آر ميجر جنرل آصف غفور سماجي رابطن واري ويب سائيٽ ٽوئيٽر تي جاري ڪيل پنهنجي پيغام ۾ چيو ته ڀارتي جهازن اڄ صبح ڪنٽرول لائن جي ڀڃڪڙي ڪئي جنهن تي پاڪ هوائي فوج  جوابي ڪارروائي ڪندي ٻن ڀارتي جنگي جهازن کي تباهه ڪري ڇڏيو. پاڪ فوج جي ترجمان موجب ٻنهي ڀارتي جهازن کي پاڪستاني هوائي حدن ۾ نشانو بڻايو ويو، هڪ ڀارتي جهاز آزاد ڪشمير ۽ ٻيو والاريل ڪشمير جي حدن ۾ ڪريو.  پاڪ فوج جي ترجمان ميجر جنرل آصف غفور ٻڌايو ته زمين تي موجود اهلڪارن ٻن ڀارتي پائليٽ کي گرفتار ڪري ورتو آهي جڏهن ته ٻه علائقي ۾ ئي موجود آهن.  ڀارتي ميڊيا دعويٰ ڪئي آهي ته پاڪستاني جنگي جهازن ڄمون ڪشمير جي ضلعي راجوڙي ۾ نوشهرا سيڪٽر ويجهو ٻه ڀارتي جنگي جهاز تباهه ڪيا آهن جنهن جي نتيجي ۾ جنگي جهازن ۾ سوار ٻه پائيلٽ مارجي ويا آهن. ڀارتي ميڊيا طرفان پاڪستاني جهازن تي هوائي حدن جي ڀڃڪڙي جو الزام مڙهيو پيو وڃي. پاڪستان جي جوابي ڪارروائي بعد، سرينگر، ڄمون ۽ لها هوائي اڏن تي ايمرجنسي لاڳو ڪندي سويلين ايئر ٽريفڪ معطل ڪري ڇڏي آهي. پرڏيهي خابرو اداري موجب ڀارتي عملدارن تصديق ڪئي آهي ته ٽي پاڪستاني جنگي جهاز والاريل ڪشمير ۾ داخل ٿيا. پاڪ فوج جي ترجمان ميجر جنرل آصف غفور چيو آهي ته پاڪستان وٽ جواب ڏيڻ کانسواءِ ٻيو رستو نه هو. پاڪ فوج جي ترجمان ميجر جنرل آصف غفور پريس ڪانفرنس ڪندي چيو آهي ته پاڪ هوائي فوج ڀارت جي 6 هدفن کي نشانو بڻايو ڇاڪاڻ ته پاڪستاني هٿياربند فوج وٽ جواب ڏيڻ کانسواءِ ٻيو ڪو به رستو نه هو . ڊي جي آءِ ايس پي آر چيو ته ڀارت اڳرائي کانپوءِ فيصلو ڪيو هو ته فوجي هدف کي نشانو نه بڻائينداسين ۽ نه ئي ڪو جاني نقصان ٿيڻ گهرجي، پاڪ هوائي فوج پنهنجي حدن ۾ رهندي 6 هدفن جي چونڊ ڪري انهن کي نشانو بڻايو، اسان سڀ ڪجهه ڪري سگهون ٿا پر خطي ۾ امن جي قيمت تي نٿا ڪرڻ چاهيون ۽ جنگ ڏانهن نٿا وڃڻ چاهيون. آصف غفور ٻڌايو ته پاڪ هوائي فوج ڀارت جي ٻن جهازن کي تباهه ڪري ڇڏيو، ڀارت ۾ هڪ ٻئي جهاز جي ڪرڻ جا اطلاع آهن پر ان سان اسان جو ڪو به تعلق ناهي، پاڪستان سڀ صلاحيتون رکڻ باوجود امن جو پيغام ڏئي ٿو، جنگ پاليسي جي ناڪامي آهي، جنگ شروع ڪرڻ آسان آهي، پر ڪنهن به اها خبر ناهي هوندي ته اها ختم ڪيئن ٿيندي. جنگ ۾ ڪنهن جي ناڪامي ۽ ڪاميابي ناهي ٿيندي، انسانيت هارائيندي آهي. پاڪ فوج جي ترجمان ڀارتي ميڊيا جي پاڪستاني ايف 16 کي تباهه ڪرڻ جي ترديد ڪندي چيو ته اهو ڀارت جي گذريل ڏينهن واري ڪارروائي جو پلاند نه پر پنهنجي بچاءُ جي صلاحيت جو مظاهرو آهي، اسان ڇڪتاڻ کي وڌائڻ نٿا چاهيون.

 

ڀارت کي ڳالهين جي آڇ، جواب ڏيڻ مجبوري هئي، مودي امن کي موقعو ڏئي: عمران خان

اسلام آباد(ويب ڊيسڪ) وزير اعظم عمران خان نيشنل ڪمانڊ اٿارٽي جي اجلاس ۾ هڪ ڀيرو ٻيهر آرمڊ فورسز جي فوري ايڪشن جي تعريف ڪندي حالتون وڌيڪ خراب ٿيڻ تي ڳڻتي جو اظهار ڪيو جڏهن ته ڀارت کي دراندازي جو جواب ڏيڻ جي لاءِ اهم فيصلا ڪيا ويا. تفصيل موجب وزير اعظم عمران خان جي صدارت هيٺ نيشڻل ڪمانڊ اٿارٽي جو اجلاس وزير اعظم آفيس ۾ ٿيو، اجلاس ۾ ٽنهي هٿياربند فوجن جي سربراهن، چيئرمين جوائنٽ چيفس آف اسٽاف ڪميٽي، سروسز چيفس ۽ ٻيون اختياريون شريڪ ٿيون جڏهن ته پرڏيهي وزير شاهه محمود قريشي، بچاءَ وراي وزير پرويز خٽڪ، ناڻي واري وزير اسد عمر ۽ دفاعي پيداوارا جون اختياريون به شريڪ ٿيون. اجلاس ۾ ڪمانڊ اٿارٽي جي ميمبرن، وزيرن، ڊي جي آءِ ايس پي آر ميجر جنرل آصف غفور، ڊي جي ايس پي ڊي به شرڪت ڪئي. اجلاس ۾ ملڪي سلامتي ۽ جوهري صلاحيت بابت خيالن جي ڏي وٺ ڪئي وئي ۽ ڀارت طرفان هوائي دراندازي سان پيدا ٿيل صورتحال غور هيٺ آئي. نيشنل ڪمانڊ اٿارٽي جي اجلاس ۾ وزير اعظم کي بروقت ري ايڪشن تي بريفنگ ڏني وئي ۽ ڀارتي جهاز جي دراندازي بابت ڪيترين ئي ڪوششن کان آگاهه ڪيو ويو. ذريعن موجب وزير اعظم هڪ ڀيرو ٻيهر آرمڊ فورسز جي فوري ايڪشن جي تعريف ڪئي ۽ حالتون وڌيڪ خراب ٿيڻ تي ڳڻتي جو اظهار ڪيو. ذريعن جو چوڻ آهي ته اجلاس ۾ ڀارت کي دراندازي جو جواب ڏيڻ جي لاءِ اهم فيصلا ڪيا ويا پر فيصلن تي عملدرآمد کان پهرين وزير اعظم قوم کي اعتماد ۾ وٺڻ جو فيصلو ڪيو. ذريعن موجب امن جي ڪري ڳالهين جو آپشن آخري وارننٽ طور استعمال ڪرڻ جا امڪان آهن جڏهن ته ڀارتي هٽ ڌرمي جي نتيجي ۾ غير معمولي فيصلن تي عملدرآمد ٿيندو.ٻئِ طرف  وزيراعظم عمران خان هڪ ڀيرو ٻيهر ڀارت کي ڳالهين جي آڇ ڪري ڇڏي. قوم کي خطاب ڪندي وزيراعظم عمران خان چيو ته ڪالهه کان جيڪا صورتحال هئي ان تي قوم کي اعتماد ۾ وٺڻ چاهيان پيو. وزيراعظم چيو ته پلوامه حملي کانپوءِ ڀارت کي هر قسم جاچ ڪرڻ جي آڇ ڪئي، عمران خان چيو ته سڌي ريت آڇ ڪئي ته پاڪستان ڪنهن به طرح جي جاچ ۾ سهڪار ڪرڻ لاءِ تيار آهي، اهو پاڪستان جي مفاد ۾ ناهي ته اسان جي زمين استعمال ڪئي وڃي، اسان کي جاچ ۾ ڪو به مسئلو نه هو، اسان تيار هئاسين پر مونکي خدشو هو ته ان باوجود ڀارت ڪو نه ڪو ايڪشن کڻندو، تنهنڪري چيو هو ته جواب ڏيڻ اسان جي مجبوري هوندي ڇاڪاڻ ته ڪو به خودمخيار ملڪ ڪنهن کي پنهنجي ملڪ ۾ اچي ڪارروائي جي اجازت نٿو ڏئي ۽ پاڻ ئي منصب بڻجي فيصلو به ڪندو. هن وڌيڪ چيو ته مونکي خدشو انڪري هو ته ڀارت ۾ چونڊون آهن، انڪري کين چيو ته جواب ڏيڻو پوندو.  وزيراعظم ٻڌايو ته منهنجي ٽنهي هٿياربند فوج جي سربراهن سان ڳالهه ٻولهه ٿي آهي ڪالهه انڪري ايڪشن نه کنيو ته گذريل صبح جڏهن ايڪشن ٿيو هو ته اسان پوري طرح نقصان بابت آگاهه نه هئاسين. تنهنڪري جيستائين خبر پئي ها ته ڪو به ايڪشن کڻڻ غير ذميواري هجي ها، ان لاءِ اسان انتظار ڪيو ۽ فوج اڄ ايڪشن ڪيو، اسان جو اڳواٽ منصوبو هو ته ان ايڪشن ۾ ڪو به جاني نقصان نه ٿئي رڳو ڀارت کي اهو ٻڌايون ته اسان ۾ به صلاحيت آهي، جيڪڏهن اوهان اچي سگهو ٿا ته اسان به اوهان ڏانهن اچي ڪارروائي ڪري سگهون ٿا.  عمران خان به ڀارت جي 2 مِگ جهان جي بارڊر تي انگيجمنٽ ۽ انهن جي تباهه ٿيڻ جي تصديق ڪئي ۽ ٻڌايو ته ڀارت جن ٻن پائليٽن کي گرفتار ڪيو ويو آهي.  هن چيو ته اسان هٿان کان ڪاڏي وينداسين، تنهنڪري ڀارت کي چوان ٿو ته هتي عقل ۽ حڪمت عملي تمام گهڻو ضروري آهي، دنيا ۾ جيتريون به جنگيون ٿيون سڀني جنگن ۾ غلط اندازا لڳا، ڪنهن به نه سوچو ته جنگ شروع ڪري ڪاڏي وينداسين، پهرين عالمي جنگ مهينن بدران سالن ۾ ختم ٿي، ٻي عالمي جنگ ۾ به ائين ٿيو ۽ دهشتگردي خلاف جنگ ۾ آمريڪا سوچو به نه هو ته هن کي 17 سال افغانستان ۾ ڦاٿل رهڻو پوندو.

 

 

پاڪستان ڏينهن جي روشني ۾ ڪارروائي ڪئي، هر صورتحال لاءِ تيار آهيون: پرڏيهي آفيس

اسلام آباد ( ويب ڊيسڪ ) پرڏيهي آفيس جي ترجمان چيو آهي ته اسان واصح وارننگ سان گڏ ڏينهن جي روشني ۾ ڪارروائي ڪئي آهي ۽ پاڪستان کي مجبور ڪيو ويو ته هر صورتحال جو مقابلو ڪرڻ لاءِ تيار آهيون.  پرڏيهي آفيس جي ترجمان طرفان جاري ڪيل بيان ۾ پاڪ هوائي فوج جي ڪارروائي جي تصديق ڪندي چيو ويو آهي ته پاڪ هوائي فوج پاڪستاني حدن ۾ رهندي ايل او سي جي پريان ڪارروائي ڪئي، پاڪ هوائي فوج جو اهو قدم ڀارت جي جاري جنگي جنون جي جواب ۾ نه هيو، ڪارروائي جو مطلب پنهنجي بچاءُ جو حق آهي.  پرڏيهي آفيس جي ترجمان موجب پاڪستان شهري آبادي کي نشانو ناهي بڻايو، پاڪ هوائي فوج جي ڪارروائي ۾ انساني جانين جي تحفظ جو خيال رکيو ويو آهي، ڪارروائي جو مقصد بچاءُ جي حق جي صلاحيت ۽ عزم جو اظهار هو، پاڪستان صورتحال کي بگارڻ نٿو چاهي، جيڪڏهن پاڪستان کي مجبور ڪيو ويو ته پاڪستان هر صورتحال لاءِ تيار آهي. پرڏيهي آفيس جي ترجمان ٻڌايو ته اسان نه رڳو دفاع جو حق رکون ٿا پر ڀرپور جوابي ڪارروائي جي صلاحيت به رکون ٿا، ڪارروائي جو واحد مقصد اسان جي ان حق جو مظاهرو هو جيڪو پنهنجي دفاع لاءِ حاصل آهي، اسان جو ڇڪتاڻ ۾ واڌ جو ڪو به ارادو ناهي پر ڪجهه به ڪيو ويو ته اسان تيار آهيون.  ترجمان جو چوڻ هو ته انڪري اسان واضح وارننگ سان گڏ ڏينهن جي روشني ۾ ڪارروائي ڪئي، اسان ان رستي تي نٿا هلڻ چاهيون ۽ اسان چاهيون ٿا ته ڀارت امن کي موقعو ڏي، ڀارت بالغ جمهوريت جيان مسئلا حل ڪري.

 

 

ڀارت جهاز ڪرڻ ۽ پائليٽ جي پاڪستان ۾ گرفتاري جي تصديق ڪري ڇڏي

نئين دهلي ( ويب ڊيسڪ ) ڀارتي پرڏيهي وزارت پنهنجي ونگ ڪمانڊر اڀي نندن جي مگ 21 اڏائڻ ۽ اڃا تائين موٽي نه اچڻ جي تصديق ڪري ڇڏي آهي. ڀارتي ميڊيا موجب ونگ ڪمانڊر اڀي نندن مگ 21 تي اڏام ڀري پر هو اڃا تائين ناهي موٽيو. اڀي نندن ڀارت جي هڪ ريٽائرڊ ايئرمارشل جو پٽ آهي. ڀارتي ميڊيا بعد ڀارتي پرڏيهي وزارت به چيو آهي ته سندن مگ 21 جهاز ڪريو آهي ۽ ان جو پائليٽ گم آهي.  ڀارتي پرڏيهي وزارت موجب پاڪستان دعويٰ ڪري رهيو آهي ته ڄاڻايل پائليٽ کي گرفتار ڪيو ويو آهي. ياد رهي ته ڀارتي هوائي فوج جي جنگي جهازن اڄ صبح لائن آف ڪنٽرول جي ڀڃڪڙي ڪئي جنهن تي پاڪ هوائي فوج فوري طور تي ڪارروائي ڪندي ٻن ڀارتي جهازن کي تباهه ڪري ڇڏيو ۽ ٻن پائليٽن کي گرفتار ڪيو هو.

 

ڀارت کي بنا سبب طاقت جي استعمال کان روڪيو وڃي: او آءِ سي اجلاس جو پڌرنامو جاري

جده ( ويب ڊيسڪ ) اسلامي سهڪاري تنظيم ( او آءِ سي ) رابطا گروپ والاريل ڪشمير ۾ ڀارتي ظلمن ۽ ايل او سي تي ڀارتي جنگي جهازن جي اڳرائي جي سخت مذمت ڪندي ڀارت کان بنا سبب طاقت جي استعمال کي روڪڻ جو مطالبو ڪيو آهي. او آءِ سي جو اجلاس اسسٽنٽ سيڪريٽري جنرل او آءِ سي امب حميد جي صدارت هيٺ ٿيو جنهن پڌرنامو جاري ڪيو ويو آهي.  پڌرنامي موجب او آءِ سي وزيراعظم عمران خان جي ڀارت کي ڳالهين جي آڇ کي ساراهيو جڏهن ته ڪشمير جي حق خود اراديت جي ڀرپور حمايت ۽ ان بابت اصولي موقف جو اظهار ڪيو.  پڌرنامي ۾ ڄاڻايو ويو آهي ته او آءِ سي ڀارت طرفان پاڪستاني هوائي حدن جي ڀڃڪڙي ۽ بم ڪيرائڻ جي سخت مذمت ڪندي چيو ويو آهي ٻئي ملڪ صبر جو مظاهرو ڪن ۽ ڪنهن به اهڙي قدم کڻڻ کان پاسو ڪن جيڪو خطي جي امن ۽ سلامتي لاءِ خطرو بڻجي. او آءِ سي ٻنهي ملڪن تي ذميواري جو مظاهرو ڪرڻ تي زور ڏيندي چيو آهي ته طاقت جي استعمال کان پاسو ڪن ۽ ڇڪتاڻ گهٽ ڪرڻ لاءِ ڳالهين جو رستو اختيار ڪن. پڌرنامي موجب سيڪريٽري جنرل امب حميد چيو ته والاريل ڪشمير ۾ تڪرار کي ڪشميرين جي خواهش، او آءِ سي ۽ گڏيل قومن جي ٺهرائن موجب حل ڪيو وڃي. او آءِ سي رابطا گروپ گڏيل قومن ۽ سلامتي ڪونسل کان فعال ڪردار ادا ڪرڻ جي درخواست ڪندي چيو ته ڪشمير تي خاص نمائندا مقرر ڪري ۽ ڀارت کي بنا سبب طاقت جو استعمال ڪرڻ کان روڪي. پڌرنامي موجب اجلاس ۾ وڌيڪ چيو ويو آهي ته انساني حقن جي هاءِ ڪمشنر جي رپورٽ جي سفارشن جي حمايت ڪئي وڃي ۽ ان تي عملدرآمد ڪيو وڃي جڏهن ته برطانوي آل پارٽي پارلياماني گروپ جي مطالبي جي به حمايت ڪئي وڃي.  او آءِ سي رابطا گروپ ڀارت کان والاريل ڪشمير ۾ قابض فوجين کي واپس گهرائڻ، ڪشميري اڳواڻن جي آزادي ۽ او آءِ سي جي فيڪٽ فائنڊنگ مشن کي پهچ ڏيڻ جو به مطالبو ڪيو. پڌرنامي موجب رابطا گروپ جو چوڻ هو ته ڀارت ڪشميرين خلاف ظالماڻا سيڪيورٽي آپريشن بند ڪري ۽ تڪرار کي او آءِ سي ۽ سلامتي ڪونسل جي قراردادن موجب ڏسي.  پڌرنامي موجب ڀارتي اڳرائي خطي جي امن ۽ سيڪيورٽي خلاف خطرو آهي پر ان صورتحال ۾ امن ۽ ڳالهين کي ترجيح ڏيڻ تي زور ڏنو ويو.

 

 

 

چاهيان ٿو اسان جي آرمي به اسان سان پاڪستان جهڙو ئي ورتاءُ ڪري: اڀي نندا

اسلام آباد (ويب ڊيسڪ) پاڪستاني فضائي حدن جي ڀڃڪڙي ڪندڙ ڀارتي فورسز جي گرفتار پائلٽ اڀي نندن مڇريل ماڻهن کان بچائڻ تي پاڪ فوج جي ڪيپٽن ۽ جوانن جا ٿورا مڃيندي سندن رويي جي واکاڻ ڪئي آهي. گرفتار ڀارتي پائلٽ جي ميڊيا تي جاري ٿيل ويڊيو ۾ سندس هٿ ۾ چانهه جو ڪوپ آهي ۽ هو ڏاڍو مطمئن نظر اچي رهيو آهي. اڀي نندن چيو آهي ته مڇريل ماڻهن کان بچائڻ تي پاڪ فوج جي ڪيپٽن ۽ جوانن جا ٿورا مڃان ٿو. هن پاڪ فوج جي رويي جي واکاڻ ڪندي چيو ته پاڪ فوج جي جوانن ۽ آفيسرن جو رويو متاثر ڪندڙ آهي، جن جهاز تباهه ٿيڻ کانپوءِ مون کي مڇريل ماڻهن جي تشدد کان بچايو ۽ منهنجو خيال رکيو. سندس چوڻ هو ته ڀارت وڃي پنهنجو بيان تبديل نه ڪندس، چاهيان ٿو اسان جي آرمي به اسان سان اهڙو ئي ورتاءُ ڪري. ڀارتي پائلٽ مشن بابت سوالن جو جواب ڏيڻ کان معذرت ڪئي.

 

 

هر اڳرائي تي دشمنن کي اهڙو ئي منهن ٽوڙ جواب ملندو، مودي دانشمندي جو رستو اختيار ڪري: شهباز شريف

اسلام آباد ( ويب ڊيسڪ ) ڀارتي جارحيت ۽ ان تي پاڪ هوائي فوج جي ڀرپور جواب تي پاڪستاني سياستدانن شاهينن کي سلام پيش ڪيو آهي. قومي اسمبلي ۾ مخالف ڌر اڳواڻ شهباز شريف جو پنهنجي بيان ۾ چيو آهي ته پاڪ هوائي پنهنجي بلند حوصلي ۽ جذبي واري روايتن ۾ اڄ وڌيڪ هڪ روشن بابت جو اضافو ڪري ڇڏيو آهي، الله تعاليٰ جو شڪر آهي هن اسان کي دشمن تي فتح ۽ نصرت عطا فرمائي، هر اڳرائي تي دشمنن کي اهڙو ئي منهن ٽوڙ جواب ملندو. شهباز شريف چيو ته ڀارت کي ان اڳرائي جو جواب ملي ويو، اڃا به وقت آهي ته نريندر مودي دانشمندي جو رستو اختيار ڪري، پاڪستان جي هٿياربند فوج ثابت ڪري ڇڏيو ته مادر وطن جي هڪ هڪ انچ جو دفاع ڪرڻ جي صلاحيت رکي ٿي. شهباز شريف وڌيڪ چيو ته پاڪستان پنهنجي خودمختياري، سالميت ۽ عزت توڙي وقار تي ڪو به سمجهوتو نه ڪندو، ڀارت لاءِ پيغام آهي ته هو جنگي جنون ۽ ڏکڻ ايشيا ۾ بدامني جي منفي سوچ ترڪ ڪري، جنگ مسئلن جو حل ناهي، اڃا به وقت آهي ته ڀارتي قيادت هوش کان ڪم وٺي. اڳوڻي صدر آصف علي زرداري چيو آهي ته ڀارت هڪ ڀيرو وري ڪنٽرول لائن جي ڀڃڪڙي ڪئي، پاڪستان فوج پنهنجو دفاعي حق استعمال ڪيو، ڀارت کي گهرجي تي سرحدن جي تقدس جو احترام ڪري.  سنڌ جي وڏي وزير مراد علي شاهه چيو آهي ته سنڌ حڪومت ۽ سنڌ جو عوام پنهنجي فوج سان گڏ بيٺل آهي، پاڪ هوائي فوج اڄ دشمن کي منهن ٽوڙ جواب ڏنو آهي، اسان جي فوج جڏهن جڏهن به مدد جي ضرورت هوندي سنڌ حڪومت پنهنجو ڪردار ادا ڪندي. جماعت اسلامي جي امير سراج الحق پنهنجي بيان ۾ چيو ته ڀارت جي جنگي جنون جو منهن ٽوڙ جواب قوم جي خواهشن ۽ اميدن موجب آهي.  هن چيو ته پاڪ هوائي فوج فخر جوڳو ڪارنامو انجام ڏنو آهي، قوم جو ٻچو ٻچو پرعزم ۽ پاڪستان فوج سان گڏ بيٺل آهي. انساني حقن واري وزير شيري مزاري پنهنجي بيان ۾ چيو ته وزيراعظم عمران خان ڀارت کي خبردار ڪيو آهي ته جيڪڏهن هو حملو ڪندو ته اسان سوچينداسين نه پر ان جو جواب ڏينداسين. شيري مزاري جو وڌيڪ چوڻ آهي ته اسان پنهنجي دفاع جو حق محفوظ رکون ٿا ۽ اسان ائين ئي ڪيو آهي. ناڻي واري وفاقي وزير اسد عمر پنهنجي بيان ۾ چيو آهي ته پاڪستان جي صلاحيت بابت هاڻ ڪو به سوال باقي ناهي رهيو هوندو اسان پنهنجو دفاع ڪنداسين. اسد عمر چيو ته اميد آهي ته ڀارت جا ذميوار ماڻهو نريندر مودي کي ٻن ايٽمي طاقتن کي ورهائڻ واري ڪوشش کان روڪيندا، ڪو به سمجهه وارو ماڻهون ائين نه چاهيندو ته جنگ ٿئي.

 

 

ڀارتي جنگي جنون جي هوا نڪر وئي، وڌيڪ ڇڪتاڻ نٿا چاهيون، جنگ سان ڪنهن جو به فائدو نه ٿيندو: سشما سوراج

بيجنگ ( ويب ڊيسڪ ) ڀارتي پرڏيهي وزير سشما سوراج چيو آهي ته ڀارت وڌيڪ ڇڪتاڻ نٿو چاهي، جنگ سان ڪنهن جو به فائدو نه ٿيندو، ٻنهي ملڪن جي سرحدن وچ ۾ ڇڪتاڻ سان سڄي خطي تي منفي اثر پوندا .  پرڏيهي خابرو اداري موجب ڀارتي پرڏيهي وزير سشما سوراج چيو آهي ته ڀارت صبر ۽ ذميواري جو مظاهرو ڪندي وڌيڪ ڇڪتاڻ نٿو چاهي، ڇاڪاڻ ته جنگ ۾ ڪنهن جو به فائدو نه ٿيندو، ٻنهي ملڪن جي سرحدن وچ ۾ ڇڪتاڻ سان سڄي خطي ۾ منفي اثر پوندا.  ڀارتي پرڏيهي وزير سشما سوراج ڇڪتاڻ جي خاتمي جي خواهش جو اظهار چين ۾ آر آءِ سي ( روس، انڊيا، چين ) پرڏيهي وزيرن جي اهم اجلاس ۾ شرڪت دوران ڪيو.  ان اجلاس ۾ سشما سوراج کي ڀارتي اڳرائي تي ڇتي تنقيد جو نشانو بڻايو ويو.

 

 

مودي کي جواب ملي ويو، پاڪستان دراندازي يا جارحيت برداشت ڪندڙ ملڪ ناهي: هوائي فوج جو سربراهه

اسلام آباد(ويب ڊيسڪ) اڳوڻي ايئر چيف مارشل سهيل امان جو چوڻ آهي ته منهنجي خيال ۾ ڀارت کي جواب ملي چڪو آهي، ڀارت جي سوچ هئي ته دراندازي کي پاڪستان برداشت ڪري ويندو، پاڪستان دراندازي يا جارحيت برداشت ڪندڙ ملڪ ناهي. تفصيل موجب اڳوڻي ايئر چيف مارشل سهيل امان ميڊيا سان ڳالهائيندي چيو ته پاڪ هوائي فوج پيشيوراڻي انداز ۾ رسپانس ڏنو آهي، پاڪ هوائي فوج ڪالهه به ڪارروائي لاءِ تيار هئي، ڀارت پروپيگنڊه ڪري رهيو آهي، اڄ ڪلهه شيون جلدي ئي ڪليئر ٿي وينديون آهن. اڳوڻي ايئر چيف مارشل جو چوڻ هو ته ڀارت اهڙي پروپيگنڊه نه ڪري، جنهن سان هن کي شرمندگي ٿئي، ايئر ڪامبيٽ منٽن ته پري سيڪنڊ ۾ مڪمل ٿي ويندو آهي، پاڪ هوائي فوج بهترين انداز ۾ ايئر ڪامبيٽ کي انجام ڏنو، ان قسم جي ڪارروائين ۾ سيڪنڊ لڳندا آهن.

 

 

پاڪستان جي ڪري ڀارت ۾ به امن جو آواز اٿي رهيو آهي: فواد چوڌري

اسلام آباد (ويب ڊيسڪ) سڌ سماءَ واري وفاقي وزير فواد چوڌري چيو آهي ته پاڪستان ۾ هر سطح تي ماڻهو امن جا خواهشمند آهن ۽ ڀارت ۾ به امن جا آواز اٿي رهيا آهن، وزيراعظم عمران خان اڄ وري ڀارت کي امن جي دعوت ڏني آهي. اسلام آباد ۾ تقريب کي خطاب ڪندي فواد چوڌري چيو ته ڀارت کي سياسي مقصدن لاءِ خطي جو امن خطري ۾ وجهڻ جي اجازت نٿي ڏئي سگهجي. سندس چوڻ هو ته پاڪستان جي سوچ سبب ڀارت ۾ به امن جا آواز اُٿي رهيا آهن، پاڪستان ۾ هر سطح تي ماڻهو امن جا خواهشمند آهن، جنگ مسئلي جو حل ناهي، خطي ۾ امن ضروري آهي.