تازيون خبرون

Daily Archives: August 9, 2018

حسن ۽ حسين نواز جا نالا بليڪ لسٽ ۾ شامل، پاسپورٽ بلاڪ

اسلام آباد (اين اين آءِ) اڳوڻي وزيراعظم نوازشريف جي پٽن حسن ۽ حسين نواز جا نالا بليڪ لسٽ ۾ وجهي پاسپورٽ بلاڪ ڪيا ويا اسلام آباد جي احتساب عدالت نيب ريفرنسز ۾ مسلسل طلب ڪرڻ جي باوجود حاضري تي نه اچڻ تي حسن ۽ حسين نواز کي اشتهاري قرار ڏيئي ان جا ضمانت نه ٿيڻ جوڳا گرفتاري وارنٽ جاري ڪري ڇڏيا آهن جڏهن ته نيب ٻنهي کي انٽرپول ذريعي وطن آڻڻ جو فيصلو ڪيو آهي رپورٽ موجب نيب حسن ۽ حسين نواز جا نالا اي سي ايل ۾ وجهڻ لاءِ درخواست ڏني آهي جنهن تي نگران ڪابينا في الحال ڪوئي فيصلو نه ڪرڻ جو فيصلو ڪيو آهي ذريعن موجب نيب پاسپورٽ اينڊ اميگريشن ڊائريڪٽوريٽ کي درخواست ڏني هئي جنهن ۾ حسن ۽ حسين نواز جا نالا بليڪ لسٽ ۾ شامل ڪري انهن جو پاسپورٽ بلاڪ ڪرڻ لاءِ چيو ويو آهي.

 

نئين پاڪستان جي شروعات پنجاب کان ڪرڻ جو اعلان، وڏو وزير نوجوان هوندو: عمران خان

اسلام آباد(ويب ڊيسڪ) پاڪستان تحريڪ انصاف جي چيئرمين عمران خان پنجاب جي وڏ وزارت نوجوان جي حوالي ڪرڻ جو اعلان ڪندي چيو آهي ته اهو نوجوان ڪلين هوندو ۽ ان تي ڪو به سوليا نشان نه هوندو. اسلام آباد جي مقامي هوٽل تحريڪ انصاف جي پنجاب پارلياماني پارٽي جي اجلاس کي خطاب ڪندي عمران خان چيو ته مشڪل چونڊ وڙهڻ تي سڀني کي واڌايو پيش ڪيان ٿو ڇاڪاڻ ته سڀني کي خبر هئي ته اصل پاڻي پت جي جنگ پنجاب ۾ وڙهي ويندي. هن چيو ته منهنجي لاءِ وڏو عذاب ٽڪيٽ ڏيڻ هو ۽ اسان کي ٽڪيٽ ڏيڻ واري عمل کي وڌيڪ بهتر ڪرڻو آهي، جتي اسان جي ڪمزوري آهي ان تڪ ۾ به ڪم شروع ڪرڻو آهي. پي ٽي آءِ چيئرمين چيو ته اسان کي پارٽي کي هڪ ادارو بڻائڻو آهي، هي ڪا عام پارٽي ناهي جتي سفارش هلي، سڀ کان وڌيڪ ذميداري پنجاب وارن تي آهي. هن چيو ته ٻن قسمن جي سياست آهي، هڪ اها ذاتي سياست جنهن ۾سياستدان پيسو ٺاهڻ ايندا آهن ۽ ذاتي سياست سياستدانن کي ذلت ۽ خواري ڏني آهي ڇاڪاڻ ته ذاتي سياست ۾سياستدان عوام جو نالو وٺي اقتدار ۾ اچي پنهنجي ذات جو سوچيندا آهن، ٻئي سياست اها آهي جيڪا پيغمبرن جي آهي ۽ پيغمبر انسانيت لاءِ بهيندا آهن جڏهن ته مان ماڻهن سان واعدو ڪري آيو آهيان ته ملڪ کي مديني جهڙي رياست بڻائيندس.  پي ٽي آءِ چيئرمين جو چوڻ آهي ته انصاف ميرٽ تي ڪرڻو آهي، مان فيصلا ميرٽ تي ۽ قوم جي مفاد لاءِ ڪندس، توهان عوام جي پيسي کي الله جي امانت سمهجڻو آهي ۽ قوم جو پيسو بچائڻو آهي ته جيئن عوام جي فلاح تي خرچ ڪري سگهجي. عمران خان چيو ته پنجاب ۾ اسان کي ڪيترن ئي چيلنجن کي منهن ڏيڻو آهي انڪري سڀ تيار رهو،  نئين پاڪستان جي شروعات پنجاب کان ئي ٿيندي، پنجاب جي ماڻهن کي ڪيترن ئي ڏهاڪن کان مفلسي واري زندگي گذاري آهي، اسان کي پنجاب جي ماڻهن کي ريليف ڏيڻو آهي جڏهن ته پنجاب پوليس ۾ ڪي پي پوليس وانگر بهتري آندي ويندي ۽ پنجاب پوليس کي غير سياسي ۽ خود مختيار بڻائينداسين. تحريڪ انصاف جي چيئرمين ٻڌايو ته پنجاب جي وڏوزارت لاءِ نئون نوجوان اڳتي آڻي رهي آهيان هي نوجوان ڪلين هوندو جنهن ڪنهن قسم جو ڪو به سوليان نشان نه هوندو توهان سڀ ان نوجوان کي سپورٽ ڪيو،  مان نوجوان کي تجربيڪار ڪابينا جي ٽيم ۾ آڻي رهيو آهيان.

 

چونڊن ۾ ڌانڌلين جو الزام، مخالف ڌر پارٽين جو اليڪشن ڪميشن ٻاهران احتجاج

اسلام آباد(ويب ڊيسڪ) مسلم ليگ ن، پيپلز پارٽي ۽ ايم ايم اي سميت ٻيون مخالف ڌر  پارٽيون اسلام آباد ۾ اليڪشن ڪميشن جي آفيس ٻاهران احتجاج ڪري رهيون آهن. چونڊن ۾ مبينا ڌانڌلين خلاف اليڪشن ڪميشن جي ٻاهران احتجاج ۾ مخالف ڌر جي پارٽين جا اڳواڻ شريڪ آهن جن ۾ راجا ظفر الحق، مشاهد الله خان، نهال هاشمي، مشاهد حسين سيد ، يوسف رضا گيلاني، شيري رحمان، نويد قمر، فرحت الله بابر، محمود اچڪزئي، مولانا عبدالغفور  حيدري ۽ زاهد خان سميت ٻيا موجود آهن. جڏهن ته مسلم ليگ ن جو صدر شهباز شريف پڻ  ان احتجاج ۾ شريڪ ٿيندو. سياسي پارٽين جي ڪارڪنن جو وڏو انگ پڻ احتجاج ۾ شريڪ آهي، جيڪي جعلي چونڊن جا نعرا لڳائي رهيا آهن. سياسي اڳواڻن جو چوڻ آهي ته اڄ جو احتجاج ۾ ڪارڪنن کي شرڪت جي دعوت نه ڏني وئي هئي، احتجاج پُرامن هوندو جنهن ۾ چونڊن خلاف چارج شيٽ جاري ڪئي ويندي. ان موقعي تي مسلم ليگ ن جي اڳواڻ راجا ظفر الحق  ميڊيا سان ڳالهائيندي چيو ته هي چونڊون قبول ناهن. جيڪڏهن چونڊن جا نتيجا اهڙي طرح آندا ويا ته هي قوم ۽ ملڪ جو نقصان هوندو جنهن سان سڄي قوم متاثر ٿيندي. هن چيو ته اسان دنيا کي ٻڌائڻ چاهيون ٿا ته عوام هن چونڊن کي رد ڪري ٿو، اسان ان خلاف هڪ آهيون ۽ هڪ ٻئي جي هٿ پڪڙي بيٺل آهيون، اسان ان معاملي ۾ ڪي به ٻه رايا ناهن، اسان قوم سان گڏ بيٺا آهيون، جن ووٽ کي عزت نه ڏني انهن قوم جو نقصان ڪيو. پاڪستان پيپلز پارٽي جي اڳوڻ شري رحمان چيف الڪيشن ڪميشن کان استعفيٰ جو مطالبو ڪندي چيو آهي ته اسمبلي پارليامنٽ ۾ گڏ ٿي ڪري احتجاج ڪنداسين. ٻئي پاسي اسلام آباد ۾ انتظاميا احتجاج کي نظر ۾ رکندي حڪمت عملي پڻ تيار ڪري ورتي آهي جنهن تحت اليڪشن ڪميشن تائين رڳو پارليامنٽ ميمبرن کي وڃڻ جي اجازت هوندي ۽ ڪارڪنن کي ريڊ زون ۾ داخل نه ٿي سگهندا. هوڏانهن جي يو آءِ (ف) چونڊن ۾ مبينا ڌانڌلي خلاف احتجاج ڪيو جتي ڪارڪنن بنون ۾ لنڪ روڊ تي مظاهرو ڪندي انڊس هاءِ وي ٽريفڪ جي لاءِ  بند ڪري ڇڏيو. جي يو آءِ جي ڪارڪنن ڪوئيٽا، زيارت، چمن، لورالائي ۽ زوب شاهراهه ڪچلاڪ وٽ بند ڪري ڇڏي جڏهن ته ڪوئيٽا، تفتان، مستونگ، قلات، خضدار ۽ ڪراچي شاهراهه لڪ  واري هنڌ تي بند ڪئي وئي. ان کانسواءِ ڪوئيٽا، نوشڪي، خاران ۽ دالبندين آر سي ڊي شاهراهه پڻ مختلف هنڌن تي بند ڪئي وئي.

 

بينظير انڪم سپورٽ پروگرام ۾ 33 ارب جي گهوٻين جو انڪشاف

اسلام آباد(ويب ڊيسڪ) سينيٽ گهٽ ترقي يافته علائقن ۾ بينظير انڪم سپورٽ پروگرام ۾ 33 ارب جي گهوٻين جو انڪشاف ٿيو آهي، سيڪريٽري بي آءِ ايس پي ڪميٽي جي ميمبرن کي مطمئن نه ڪري سگهيو. اجلاس چيئرمين ڪميٽي عثمان ڪاڪڙ جي سربراهي ۾ ٿيو، ڪميٽي کي بينظير انڪم سپورٽ پروگرام تي ڪميٽي کي بريفنگ ڏني وئي. سينيٽي فدا خان چيو ته سيڪريٽري بينظير انڪم سپورٽ پروگرام ٻڌائين ته ورهايل 66 اربن مان 33 ارب ڪيڏانهن ويا، هن چيو ته رات دير تائين انهن فائلن جو تفصيلي جائزو ورتو، مون کي فائلن ۾ گهوٻيون محسوس ٿيون، اصل ذميوارن بابت ٻڌايو وڃي. ڪميٽي جي پڇاڻي تي بي آءِ ايس پي جي سيڪريٽري جواب ڏيڻ کان معذور نظر آيو جنهن تي ڪميٽي جي چيئرمين چيو ته اِها رقم غريب عوام جي آهي ان کي ائين ئي بسن ۽ ڪنهن جي چونڊ تي خرچ ڪرڻ جي اجازت نه ڏني ويندي، معاملي کي سينيٽ ۾ اٿاريو ويندو ۽ ذميوارن کي جواب ڏيڻو پوندو، بي آءِ ايس پي بابت ڪميٽي کي ٻڌايو ويو ته 2008 ۾ هر ايم اين اي ۽ سينيٽر کي ورڇ لاءِ في ڪس هڪ هزار رپيا ڏنا ويا جڏهن ته چئني صوبن جي ايم پي ايز کي 800 رپيا ادا ڪيا ويا. اختيارين موجب بي آءِ ايس پي جي سالياني بجيٽ 2008 جي 70 ارب رپين کان وڌائي 19-2018 جي لاءِ 124 ارب رپيا ڪئي وئي آهي.

 

نگران وزير اعظم جي سوات دوري تي ڪروڙين رپيا خرچ، وفاقي حڪومت نوٽيس جاري

لاهور(ويب ڊيسڪ) پنجاب صوبي جي راڄڌاني ۾ لاهور هاءِ ڪورٽ نگران وزير اعظم ناصر الملڪ جي سوات جي دوري تي ڪروڙين رپين جي خرچن جي واپسي لاءِ داخل درخواست تي وفاقي حڪومت کي ٻيهر نوٽيس جاري ڪري ڇڏيا. تفصيل موجب نگران وزير اعظم ناصر الملڪ جي سوات جي دوري تي ڪروڙين رپين جي خرچ بابت ڪيس تي جسٽس مامون الرشيد شيخ بيرسٽر جاويد اقبال جعفري جي درخواست تي ٻڌڻي ڪئي.  عدالتي حڪم جي باوجود وفاقي حڪومت جواب داخل داخل ناهي ڪرايو جنهن تي عدالت ٻيهر نوٽيس جاري ڪري ڇڏيا. درخواست گذار عدالت کي ٻڌايو ته نگران وزير اعظم پنهنجي اباڻي گهر سوات وڃڻ لاءِ 22 گاڏين کي استعمال ڪيو. درخواستگذار جو چوڻ هو ته نگران وزير اعظم رياستي ذميواري بدران ذاتي معاملن لاءِ پروٽوڪول استعمال ڪيو جنهن سبب قومي ناڻي کي ڪروڙين رپين جو نقصان رسيو. درخواست ۾ چيو ويو ته عدالت ان معاملي تي ڪارراوائي ڪري ۽ پروٽوڪول تي ٿيل خرچ واپس سرڪاري ناڻي ۾ جمع ڪرائڻ جو حڪم ڏئي.

 

توهين عدالت ڪيس: عامر لياقت جي خطاب جون ڪلپون طلب، ڇو نه سندس جا گرفتاري وارنٽ جاري ڪيا وڃن: چيف جسٽس

اسلام آباد (اين اين آءِ/ويب ڊيسڪ) توهين عدالت ڪيس ۾ چيف جسٽس عامر لياقت جي خطاب جون ڪلپون طلب ڪري ورتيون ۽ چيو ته هر ڪو پاڻ کي عالم، ڊاڪٽر ۽ فلاسافر سمجهي ٿو. تفصيل موجب سپريم ڪورٽ ۾ چيف جسٽس ثاقب نثار جي سربراهي ۾ ڊاڪٽر عامر لياقت جي خلاف توهين عدالت ڪيس جي ٻڌڻي ٿي. ٻڌڻي جي شروعات ۾ چيف جسٽس چيو ته ڊاڪٽر عامر لياقت کي گهرايو، هو ڇو ناهي آيو، هي توهين عدالت جو ڪيس آهي، ڇو نه سندس گرفتاري وارنٽ جاري ڪيا وڃن. درخواستگذار جي وڪيل چيو ته اِهو هڪ اهم مسئلو آهي ميڊيا تي نفرت جوڳي ڳالهه ٻولهه ٿي، غداري ۽ ڀارتي ايجنٽ جي فتويٰ لڳائي ويندي آهي. جنهن تي چيف جسٽس ريمارڪس ۾ چيو ته ايتري ذميواراڻي ڳالهه ٻولهه ڏاڍي گهٽ نظر ايندي آهي، هر ڪو پاڻ کي عالم، ڊاڪٽر ۽ فلاسفار سمجهي ٿو. عامر لياقت جي وڪيل جو چوڻ هو ته ڪيس سڀاڻي تائين ملتوي ڪيو، عامر لياقت سڀاڻي اچي ويندو، جنهن تي چيف جسٽس چيو ته عامر لياقت کي اڄ چار وڳي تائين گهرايو. ڪيس جي ٻڌڻي ۾ چيف جسٽس عامر لياقت جي خطاب جون ڪلپون طلب ڪري ورتيون ۽ چيو ته توهان عامر لياقت جي تقرير جون سائيٽون ڪڍي اچو، عامر لياقت حڪم جي ڀڃڪڙي ڪئي آهي ته توهين عدالت جو نوٽيس ڏينداسين. چيف جسٽس پڇاڻو ڪيو ته پارليامينٽ ۾ حلف برداري ڪڏهن آهي؟ وڪيل ٻڌايو ته شايد 13 آگسٽ تي. بعد ۾ سپريم ڪورٽ ڪيس جي وڌيڪ ٻڌڻي جمعي تائين ملتوي ڪري ڇڏي.

سپريم ڪورٽ آف پاڪستان توهين عدالت ڪيس ۾ عامر لياقت حسين کي 20 هزار رپيا ڏنڊ ڊيم فنڊز ۾ جمع ڪرائڻ جو حڪم ڏنو آهي اربع تي سپريم ڪورٽ ۾ عامر لياقت جي خلاف توهين عدالت ڪيس جي ٻڌڻي ٿي چيف جسٽس ثاقب نثار پڇاڻو ڪيو ته عامر لياقت پروگرام ۾ ڪٿي عدالتي حڪم جي خلاف ورزي ڪئي چيف جسٽس وڪيل کي هدايت ڪندي چيو ته سي ڊي ۾ عدالت کي مواد فراهم ڪريو وڪيل ٻڌايو ته عامر لياقت نفرت ڏياريندڙ مواد نشر ڪيو چيف جسٽس چيو ته عدالتي حڪم جي خلاف ورزي ڪئي ويئي آهي ته پروگرام بند ڪري ڇڏيو جسٽس اعجازالحسن چيو ته راءِ جي آزادي جون ڪجهه حدون آهن چيف جسٽس چيو ته مادر پدر آزادي قبول نه آهي عامر لياقت چوندو هو ته ايسي نهين چلي گا مان چيو توهان جو رويو به نه هلندو سپريم ڪورٽ عامر لياقت کي 20 هزار رپيا ڏنڊ ڊيم فنڊ ۾ جمع ڪرائڻ جو حڪم ڏيندي ڪيس جي ٻڌڻي جمعي تائين ملتوي ڪري ڇڏي.

 

زلفي بخاري ۽ فواد حسن جا نالا اي اسي ايل ۾ شامل، پرڏيهه وڃڻ کان روڪڻ جي سفارش

اسلام آباد(ويب ڊيسڪ) نيب جي درخواست تي زلفي بخاري ۽ فواد حسن جا نالا اي سي ايل ۾ شامل ڪيا  ويا. قومي احتساب بيورو(نيب) تحريڪ انصاف جي چيئرمين عمران خان جي ويجهي ساٿي زلفي بخاري  جي آف شور ڪمپنين جي جاچ ڪري رهي آهي ۽ ان لاءِ  سندس نالو ايگزٽ ڪنٽرول لسٽ(اي سي ايل) ۾ وڌو ويو آهي ۽ پرڏيهي ملڪ وڃڻ کان روڪڻ جي سفارش ڪئي وئي آهي. نجي ٽي وي چينل موجب گهرو وزارت زلفي بخاري جو نالو اي سي ايل ۾ وڌو ويو آهي، زلفي بخاري جو نالو نيب جي درخواست تي ڪابينا جي سب ڪميٽي جي منظوري بعد اي سي ايل ۾ وجهي ڇڏيو آهي. ٻئي پاسي اڳوڻي وزيراعظم نواز شريف ۽ شاهد خان عباسي جي اڳوڻي پرنسپل سيڪريٽري فواد حسن جو نالو پڻ اي سي ايل ۾ وڌو ويو آهي. ذريعن موجب فواد حسن جو نالو نيب جي درخواست تي اي سي ايل ۾ وڌو ويو آهي جنهن جي ڪابينا جي سب ڪميٽي منظوري ڏني هئي. واضح رهي ته نيب فواد حسن خلاف آشيانا اقبال هائوسنگ اسڪيم ۾ اختيارين جو ناجائز استعمال ۽ ڪرپشن جي جاچ ڪري رهي آهي جڏهن ته فواد حسن کي 5 جولائي تي نيب لاهور ۾ بيان ريڪارڊ ڪرائڻ بعد گرفتار ڪيو ويو هو.

 

بلوچستان ۾ ايف سي اهلڪارن جي ڪار حادثي جو شڪار، 4 اهلڪار شهيد

خضدار(ويب ڊيسڪ) بلوچستان جي ضلعي واشڪ ويجهو سڪيورٽي فورسز جي ڪار حادثي جو شڪار ٿي وئي جنهن جي نتيجي ۾ 4 اهلڪار شهيد ۽ 6 زخمي ٿي پيا. سيڪيورٽي ذريعن موجب پاڪ ايران سرحد ويجهو بلوچستان جي علائقي واشڪ ۾ سيڪيورٽي فورسز جي ڪار حادثي جو شڪار ٿي وئي جنهن جي نتيجي ۾ 4 اهلڪار ٿڏي تي ئي شهيد جڏهن ته 6 ڄڻا زخمي پڻ ٿيا. سيڪيورٽي اهلڪارن فوري امدادي ڪاروائي ڪندي زخمين ۽ لاشن کي سي ايم ايڇ خضدار منتقل ڪري ڇڏيو. زخمين کي طبي امداد ڏني پئي وڃي، جڏهن ته ڪجهه زخمين جي حالت ڳڻتي جوڳي ٻڌائي پئي وڃي. اطلاع موجب ايف سي اهلڪارن  جو ٻن گاڏين تي ٻڌل قافلو وڃي رهيو هوته انهن مان هڪ ڪار ڊرائيور جي ظابطي کان ٻاهر نڪري ڪلٽي ٿي وئي جنهن جي نتيجي ۾ حادثو پيش آيو.

 

عمران طرفان ٻيهر ڳڻپ روڪرائڻ واري ڊوڙ ٿُڪَ چِٽڻ جي برابر آهي: سعد رفيق

لاهور (اين اين آءِ) مسلم ليگ (ن) جي اڳواڻ ۽ اڳوڻي وزير خواجه سعد رفيق يو آهي ته عمران خان جي ٻيهر ڳڻپ روڪرائڻ لاءِ ڊڪ ڊوڙ ٿڪ اڇلي پوءِ چٽڻ برابر آهي مون کي نئين قانون مطابق ٻيهر ڳڻپ جي بنيادي حق کان محروم ڪيو ويو آهي واضح ٿي ويو ته داخل ۾ ڪارو نه آهي پر سڄي دال ئي ڪاري آهي هن سماجي رابطي جي ويب سائيٽ ٽوئٽر تي جاري پنهنجي بيان ۾ چيو ته تڪ اين اي 131 تان عمران خان کي 680 ووٽن تان ڪامياب ٻڌايو ويو هو 2835 رد ٿيل ووٽن ۽ صرف پنج پولنگ اسٽيشن جي ٻيهر ڳڻپ ۾ عمران خان جا 78+39=117 ووٽ گهٽ ٿي چڪا آهن خواجه سعد رفيق چيو ته اليڪشن ايڪٽ 2017 کي مڪمل نظرانداز ڪيو ويو مون کي نئين قانون مطابق ٻيهر ڳڻپ جي بينادي حق کان محروم ڪيو ويو آهي ۽ هڪ ڏينهن جي ٻيهر ڳڻپ ۾ عمران خان جا بوگز ووٽ نڪتا ته ڳڻپ روڪرائڻ سپريم ڪورٽ پهچي ويو خواجه سعد رفيق چيو ته عمران پنهنجي بوگز ڪاميابي جي اصليت پاڻ ئي ٻڌائي ڇڏي هن چيو ته عمران جي ٻيهر ڳڻپ روڪرائڻ لاءِ ڊڪ ڊوڙ ٿڪ اڇلائي وري چٽڻ برابر آهي.

 

ڪيترن ئي ڏهاڪن کان پرڏيهه ۾ رهندڙ عمران خان جي مداح جي خاص گاڏي ۾ واپسي

ڪراچي(ويب ڊيسڪ) پاڪستان ۾ تحريڪ انصاف جي حڪومت ٺهڻ جي چٽن امڪانن سان گڏ ڪيترن ئي ڏهاڪن کان پرڏيهه ۾ رهندڙ  عمران خان جو مداح واپس وطن موٽي آيو. گذريل ڪيترن ئي ڏهاڪن کان اسپين ۾ رهندڙ پاڪستاني ڄائو انور خان پنهنجي سڀ ڪجهه وڪرو ڪري روڊ رستي ڪيترن هزار ڪلوميٽر جو سفر طئي ڪري واپس وطن پهتو آهي، جنهن کي اميد آهي ته عمران خان جي قيادت ۾ حقيقي تبديلي ايندي. 64 ورهين جي انور خان 80 جي ڏهاڪي ۾ روزگار جي ڳولا ۾ پرڏيهه ويو هو. هن ٻڌايو ته هو پهريان سعودي عرب ۽ پوءِ اسپين منتقل ٿيو. پر جيئن کيس پي ٽي آءِ جي حڪومت جي ڪاميابي جي خبر ملي، هن پنهنجو سڀ ڪجهه وڪرو ڪري پاڪستان اچڻ جو فيصلو ڪيو ۽ خاص گاڏي ۾ روڊ رستي وطن واپس پهتو. بقول انور خان جي پاڪستان تبديلي اچي رهي آهي ۽ جيڪي پاڪستان جي ٻاهر هوندا آهن، اهي ان حوالي سان وڌيڪ محسوس ڪندا آهن. انور خان جي خاص گاڏي ۾ بستر، رڌڻي ۽ سٽنگ ايريا پڻ موجود آهي. هن جو چوڻ آهي ته پاڪستان ۾ سياحت جي هٿي وٺرائڻ لاءِ اهو طريقو اختيار ڪيو پر ان جو مقصد پاڪستان ۾ امن آڻڻ ۽ ايندڙ خوشحالي جي  خوشخبري ڏيڻي آهي. انور خان موجب هن 9 هزار ڪلوميٽرن کان وڌيڪ جو سفر ڪيو، هن پنهنجو گهر وڪرو ڪري ڇڏيو، اهو عارضي نه پر مستقل آهي. آخر ۾ هن مخالف ڌر پارٽين کي پڻ اپيل ڪئي ته هو عمران خان کي ڪم ڪرڻ ڏين، جيڪڏهن عمران خان ڊليور نه ڪيو ته اسان سڀ مخالف ڌر پارٽين سان هونداسين پر مخالف رڳو مخالفت واري سياست نه ڪن.