تازيون خبرون

Daily Archives: February 24, 2018

سلمان خان ۽ ڪترينا ڪيف خلاف عدالت ۾ پٽيشن داخل

 

نئين دهلي(شوبز نيوز) بالي ووڊ جي سلطان سلمان خان ۽ بار بي ڊول ڪترينا ڪيف خلاف نئين دهلي جي هڪ عدالت ۾ پٽيشن داخل ڪئي وئي آهي جنهن ۾ موقف اختيار ڪيو ويو آهي ته سلمان خان، ڪترينا ڪيف ۽ ٻين فلم ٽائيگر زنده جي مشهوري واري مهم دوران هڪ برادري خلاف توهين جوڳا رمارڪس ڏنا هئا ان ڪري انهن خلاف ايف آءِ آر داخل ڪرڻ جو حڪم جاري ڪيو وڃي.عدالت درخواست جي ٻڌڻي 27 فيبروري تي مقرر ڪندي ان سلسلي ۾ دهلي پوليس کان جواب پڻ طلب ڪري ورتو آهي. اها پٽيشن  ملازمن جي دهلي ڪميشن جي اڳوڻي چيئرمين هرنام سنگهه داخل ڪئي آهي جنهن ۾ هن دعويٰ ڪئي آهي ته اداڪارن سماج جي فردن خلاف رمارڪس ڏئي انهن سان زيادتي ڪئي آهي

 

رجني ڪانت جي فلم ”2.0“ هڪ ڀيرو ٻيهر دير جو شڪار

 

ممبئي(شوبز نيوز) بالي ووڊ اداڪار رجني ڪانت جي نئين فلم ”2.0“ هڪ ڀيرو ٻيهر دير جو شڪار ٿي وئي آهي، اميد ڪئي پئي وڃي ته فلم ڏياري يا ڀارتي آزادي ڏهاڙي جي موقعي تي رليز ڪئي ويندي.ڀارتي ميڊيا موجب رجني ڪانت جي فلم ”2.0“ 24 اپريل تي نمائش لاءِ پيش ڪرڻي هئي جيڪا دير جو شڪار ٿي وئي آهي. ميڪرز اڃا فلم جي ريليز جي تاريخ جو ڪو قطعي فيصلو ناهي ڪيو ۽ اهي ڄاڻايل ٻن تاريخن تي غور ڪري رهيا آهن.فلم ۾ رجني ڪانت، اڪشي ڪمار ۽ ايمي جيڪسن اداڪاري ڪندا.

 

مڇن جو نئون اسٽائل، ”اهو ماڻهن کي پنهنجو حوصلو ڏيکارڻ جو طريقو آهي“: وهاب رياض

 

دبئي(اسپورٽس نيوز) هڪ طرف ڪرڪيٽ جا شوقين پاڪستان سپر ليگ شروع ٿيڻ تي پرجوش آهن ته ٻئي طرف افتتاحي ميچ ۾ پشاور زلمي جي فاسٽ بالر وهاب رياض جي مڇن جي نئين اسٽائل به گهڻن ماڻهن کي حيران ڪري ڇڏيو آهي ۽ سوشل ميڊيا تي تبصرن جو هڪ طوفان اچي ويو آهي پر وهاب رياض جو ان حوالي سان چوڻ آهي ته ”اهو ماڻهن کي پنهنجو حوصلو ڏيکارڻ جو سندس هڪ طريقو آهي.“وهاب رياض پنهنجي نئين لڪ جي حوالي سان چيو ته اهو اسٽائل مون کي اهو ياد ڏياريندو رهندو ته مان ڪير آهيان، مون کي هن ٽورنامينٽ ۾ ڇا ڪرڻو آهي ۽ ڪيئن پرفارم ڪرڻو آهي. جڏهن کائنس پڇيو ويو ته هن اهو اسٽائل آسٽريلوي رانديگر مچل جانسن کان متاثر ٿي ڪري اختيار ڪيو آهي ته وهاب رياض پنهنجي جواب ۾ چيو ته ”ڏسو، ڪنهن کان به ڪنهن اهڙي شيءِ لاءِ متاثر ٿيڻ جيڪا اوهان لاءِ فائديمند هجي، هڪ سٺي ڳالهه آهي ۽ جيڪڏهن مچل جانسن کان متاثر آهيان ته مان کيس مهرباني چوانٿو.“

 

ونٽر اولمپڪس جي پڄاڻيءَ واري تقريب آچر تي ٿيندي، ايوانڪا ٽرمپ خاص مهمان هوندي

 

سيئول(اسپورٽس نيوز) اتر ڪوريا جو وفد ونٽر اولمپڪس جي پڄاڻيءَ واري تقريب پنهنجو اعليٰ سطحي وفد موڪليندو.ڏکڻ ڪوريا جي وزارت موجب اتر ڪوريا طرفان اطلاع ڏنو ويو آهي ته هو ونٽر اولمپڪس جي پڄاڻيءَ واري تقريب ۾ پنهنجو اعليٰ سطحي وفد موڪليندو. ڪورين ورڪرز پارٽي جي نائب چيئرمين ڪم يونگ چول جي قيادت ۾ 8 ميمبرن وارو وفد آچر تائين 3 ڏينهن جي دؤري لاءِ زميني رستي ڏکڻ ڪوريا پهچندو. واضح رهي ته ڪم يونگ چونگ ڏکڻ ڪوريا سان بين الڪوريائي معاملن بابت شعبي جو سربراهه پڻ آهي.ونٽر اولمپڪس جي پڄاڻي واري تقريب ۾ آمريڪي صدر ڊونلڊ ٽرمپ جي ڌيءَ ايوانڪا ٽرمپ خاص مهمان طور شريڪ ٿيندي

 

نوجوان جو معاشري ۾  ڪردار…! : فرزانه چانڊيو/لاڙڪاڻو

اسان جڏهن به سنڌ ڌرتي جو ذڪر ڪندا آهيون ته هميشه ان جي تاريخ کي ورجائيندا آهيون جنهن ۾ صوفين جي تاريخ، مهمان نوازي، رهڻي ڪهڻي، رسم رواج جو ذڪر ضرور ڪندا آهيون ڇو ته اسان جي سنڌ هميشه پيار، محبت ۽ مهمانوازي طور ڏيهه توڙي پرڏيهه ۾ تمام گھڻي مقبول رهي چڪي آهي ۽ آهي، الله پاڪ اسان جي صوفين جي سرزمين معدني وسيلن توڙي زراعت سان مالا مال ڪيو آهي، صوفين جي سرزمين سونهاري سنڌ ۾ هميشه صرف پيار ملندو ۽ جتي ڪٿي صرف امن ۽ محبت جون ڳالهيون هلنديون هيون ڪو دور هو جو سنڌ ۾ ڪنهن وٽ ڪو مهمان ايندو هو ته ساڻس دل سان احترام ڪيو ويندو ۽ تحفن طور اجرڪ، ٽوپي، پنڊي، پنکو، ٽڪ جي رلي ۽ ٻيا تحفا ڏنا ويندا هئا ته جيئن هن جي دل ۾ به محبت پيدا ٿئي ۽ ويڇا نه ٿين، پر افسوس اڄ صوفين جي سرزمين کي الائي ڪنهن جي نظر لڳي وئي آهي جو جتي پيار ۽ محبت جون ڳالهيون هلنديون هيون اتي اڄ رت جا رشتا به جان جا ويري بڻجي ويا آهن، آخر ڇاجي ڪري..؟؟ ڪهڙا سبب آهن جو سنڌ ۾ اهي ڏينهن ئي نه رهيا آهن جڏهن صرف امن جون ڳالهيون هلنديون هيون.! ان جو مک سبب نوجوانن جو بيروزگار هجڻ آهي اڄ سنڌ جا الائي ڪيترائي پڙهيل لکيل نوجوان بيروزگاري ۽ مفلسي واري زندگي گذارڻ تي مجبور آهن…!

جيڪڏهن ڏسجي ته نوجوان اسان جي معاشري ۾ روشن ڏيئي جيئا آهي  ۔ ان جو ڪردار تمام ڱھڻي اھميت رکي ٿو  ۔ اھيو ئي نوجوان معاشري جو سڌار ۽ بگاڙ  به پڻ آهي  ، ھڪ نوجوان جي سڌاري ۽ بگاڙ جو تعلق ان جي تربيت ۽ عمل سان لاڳاپيل آه ۽ نوجوان پڻ معاشري مان سکي پيو  ۔ جيڪڏهن ٻار جي تربيت سٺي ۽ مضبوط ھوندي ته اھو ئي ٻار اڱتي ھلي ھڪ سٺو ڊاڪٽر  ، استاد  ، انجنيئر ، ۽ ھڪ سٺو سياستدان ٿي ملڪ تي حڪمراني ڪري ٿو سگهي پو۽ ان تربيت ۾ والدين کان پو۽  استاد ۽ استاد کان بعد ِ وڌ کان وڌيڪ اثر ٻار تي معاشري جو ئي آهي جنهن ۾ دوستي جو اثر يا ته سڌاري يا ته بگاڙي ٿو  ۔ منهنجي نظريي مطابق ڪڏهن به والدين يا استاد پنهنجي ٻار جو بگاڙ ڪونه چاھيندا اھي ھميشہ چاھيندا ته ان جو ٻار ڪتابن ۽ قلمن ۽ سٺي دوستي ھيٺ ھجن ڇو ته پنهنجي اصل منزل حاصل ڪرڻ لاءِ هميشه ڪتابن ۽ قلمن سان ماڻبي آهي.!

اڄ جيڪر نوجوان ئي معاشري ۾ بگاڙ جو سبب بڻيو آهي ته ان جو ذميدار ڪير آهي  ؟ اڄ جيڪڏهن ڏٺو وڃي ته نوجوان جو رجھان ڪتاب ۽ قلم ڏانهن گھٽ ۽ ٻين غير معياري ڪمن ڏانهن تمام گھڻو آهي آخر ڇاجي ڪري..؟

آئون مڃان ٿي ته سنڌ ۾ ميرٽ لتاڙ آهي سنڌ جا هزارن جي تعداد ۾ اهڙا نوجوان آهن جيڪي پنهنجي محنت سان رات ڏينهن هڪ ڪري پڙهائي مڪمل ڪري ورتي آهي ۽ هن وقت نوڪرين جي تلاش ۾ آهن جيڪڏهن ڪنهن به اخبار ۾ نوڪرين جي ڪٽنگ ايندي آهي ته هميشه غريب ۽ بي پهچ نوجوان صرف ان ڪٽنگ جي ذريعي نوڪري لاءِ فارم ڀرائيندو آهي ۽ نتيجي ۾ ان غريب ۽ بي پهچ نوجوان بجاءِ هڪ سرندي واري ماڻهو پٽ يا ان جي ڪنهن ويجھي عزيز کي نوڪري ملندي آهي جنهن کي پنهنجي صحيح به نه ڪرڻ ايندي آهي.! افسوس..! ڇا اڄ هميشه سنڌ ائين ئي ٿيندو رهندو! جيڪڏهن ائين ٿيندو رهيو ته سنڌ جا هزارين لکين پڙهيل لکيل محنتي نوجوان پڙهائي تان هٿ ئي کڻي ويندا..! ڇو ته هڪ غريب پورهيت پنهنجي اولاد کي پورهيو ڪري پڙهائي ۽ ان نتيجي ۾ ان جي نوجوان پٽ کي ميرٽ تي نوڪري نه ملي ته ان پيءُ جي اڳيان ڇا هوندو..؟ اهو منظر ڪهڙو هوندو اهو صرف هڪ غريب ڄاڻي سگھي ٿو.. امير ماڻهو کي ڪهڙي خبر ته پڙهائي ڇا هوندي آهي ان ته هميشه پئسن عيوض ڊگريون حاصل ڪيون..! پڙهائي جو قدر صرف هڪ غريب ۽ مسڪين کي هوندو آهي.

اڄ سنڌ ۾ غريب نوجوان کي معاشري جو هر فرد نفرت سان ڏسي ٿو چاهي اهو پڙهيل ڇو نه هجي ڇو ته اڄ صرف هتي امير ماڻهو کي عزت ڏني ويندي آهي چاهي اهو پڙهيل ئي نه هجي ان جي معاشري جو هر فرد ان جي دل سان عزت ڪندو آهي…!

پوءِ نتيجي ۾ سنڌ جو پڙهيل لکيل نوجوان غلط ڪمن تي لهي پوندو آهي اهو به صدمو ان جي والدين کي جن پنهنجي پگھر مان رات ڏينهن هڪ ڪري پنهنجي نوجوان پٽ کي پڙهايو.! اڄ سنڌ جا ڪيترائي پڙهيل نوجوان روڊن رستن تي ڀٽڪندي ڏسان ٿي، ڪي هوٽلن تي ڪم ڪندي، ڪي سر تغاري جو ڪم ڪندي ته ڪي وري گدا گري (پنڻ) تي مجبور آهن، انهن نوجوان کي جڏهن آئون ڏسندي ته اکين ۾ لڙڪن جو سمنڊ تري ايندو آهي ڇو ته آئون به غريب ۽ مسڪين پيءُ جي نياڻي آهيان جنهن مونکي محنت سان مونکي پڙهايو آهي ۽ آئون به بيروزگار ئي آهيان.! ۽ هر وقت صرف ان ۾ ئي گذرندو آهي ته ميرٽ تي نوڪري ملندي به الائي نه..!؟

سنڌ ۾ ميرٽ جي لتاڙ ڪري سنڌ جا ڪيترائي نوجوان خودڪشيون ڪرڻ تي مجبور آهن سنڌ ۾ روزانه ڪيترائي خودڪشين جا واقعا رپورٽ ٿين ٿا اهي واقعا گھٽجڻ بجاء ڏينهون ڏينهن وڌي رهيا آهن ۽ بيروزگاري سبب نوجوان پنهنجا فرض وساري ويهندا آهن نه ته نوجوان سنڌ ۾ اهڙو ڪردار ادا ڪري سگھن ٿا جن سان هڪ تاريخ ٺهي سگھي ٿي.

 

 

 

 

 

ن ليگ جون واڳون ڪير سنڀاليندو….؟

مسلم ليگ ن نواز شريف جي نااهلي بعد شهباز شريف کي نئون سربراهه چونڊڻ جو فيصلو ڪيو آهي، سردار يعقوب خان ناصر کي وقتي صدر بڻائڻ جو فيصلو ڪيو ويو آهي. مسلم ليگ ن جي اهم اجلاس ۾ پارٽي اڳواڻن جي اڪثريت شهباز شريف کي پارٽي صدر بڻائڻ جي تجويز ڏئي ڇڏي. سپريم ڪورٽ گذريل ڏينهن چونڊ سڌارا ڪيس جو فيصلو ٻڌائيندي ميان نواز شريف کي پارٽي صدارت لاءِ به نااهل قرار ڏئي ڇڏيو جڏهن ته عدالتي فيصلن کي نواز شريف ڪاوڙ ۽ بغض جو نتيجو قرار ڏئي ڇڏيو آهي. گذريل ڏهاڙي ميان نواز شريف جي صدارت هيٺ پنجاب هائوس اسلام آباد ۾ پارٽي اڳواڻن جو اهم اجلاس ٿيو جنهن ۾ وزير اعظم شاهد خاقان عباسي کان سواءِ مريم نواز، پرويز رشيد، مريم اورنگزيب، عابد شير علي، دانيال عزيز، مصدق ملڪ، تهمينه دولتاڻا ۽ آصف ڪرماڻي سميت ٻيا شريڪ ٿيا جڏهن ته ڪارڪنن جو وڏو انگ به پنجاب هائوس ۾ موجود هو. اطلاعن موجب اجلاس ۾ مسلم ليگ ن جي اڳواڻن ۽ ڪارڪنن ميان نواز شريف جي حق ۾ نعريبازي ڪئي ۽ وزير اعظم نواز شريف جا نعرا هنيا. اجلاس ۾ چونڊ سڌارا ڪيس جي عدالتي فيصلي، پارٽي صدارت، سينيٽ اليڪشن ۽ اڳتي لاءِ حڪمت عملي تي غور ڪيو ويو. مسلم ليگ ن جي اڳواڻن ميان نواز شريف تي پنهنجي ڀرپور اعتماد جو اظهار ڪندي ساڻس گڏ رهڻ جو يقين ڏياريو آهي. ن ليگ جي اجلاس ۾ اڳواڻن جي اڪثريت شهباز شريف کي پارٽي صدر بڻائڻ جي تجويز ڏني جنهن کان پوءِ پنجاب جي وڏي وزير کي پارٽي جو صدر بڻائڻ جا امڪان آهن. اجلاس ۾ ليگي اڳواڻن جي اڪثريت تجويز ڏني ته شهباز شريف بااثر ۽ غير تڪراري آهي، شهباز کي صدر بڻائڻ سان ادارن ۾ ڇڪتاڻ ۾ به گهٽتائي ايندي. پارٽي صدارت جو حتمي فيصلو نواز شريف ڪندو ۽ فيصلي جي مرڪزي مجلس کان منظوري ورتي ويندي. وزيراعظم راجا ظفرالحق کي صدر بڻائڻ جي تجويز ڏني، ڪلثوم نواز ۽ مريم کي صدر بڻائڻ بابت خاص ذڪر نه ٿيو. نواز شريف جي نااهلي بعد سندس امڪاني جانشين مريم نواز جي لڳل پوسٽرن تي به راتو رات حمزه شهباز جا نالا لڳجي ويا آهن جنهن مان ظاهر آهي ته هاڻي ن ليگ جون واڳون نواز شريف خاندان جي هٿن مان نڪري شهباز شريف جي خاندان ڏانهن وڃي رهيون آهن ۽ شهباز شريف جو جانشين حمزا شهباز ئي آهي.