تازيون خبرون

Daily Archives: February 13, 2018

پنهنجي سرزمين ڪنهن جي به خلاف استعمال ٿيڻ نه ڏينداسين ۽ ٻين ملڪن مان به اها ئي اميد رکون ٿا: آرمي چيف

ڪابل (ويب ڊيسڪ) آرمي چيف جنرل قمر جاويد باجوا چيو آهي ته علائقائي امن ۽ استحڪام جو رستو افغانستان مان ٿي گذرندو آهي، پاڪستان پنهنجي سرزمين ڪنهن به ٻئي ملڪ خلاف استعمال ٿيڻ نه ڏيندو ۽ اسان ٻين ملڪن مان به اها ئي اميد رکون ٿا. افغانستان ۾ ڊفينس ڪانفرنس کي خطاب ڪندي جنرل قمر جاويد باجوا چيو ته پاڪستان پنهنجي سرزمين تان دهشتگردن جا سڀ ٺڪاڻا ختم ڪري ڇڏيا آهن، دهشتگرد 27 لک افغان پناهگيرن جي موجودگي جو فائدو کڻندا آهن، اهي پاڪ – افغان سرحد تي اثرائتي سيڪيورٽي جي عدم موجودگي جو به فائدو کڻن ٿا. سندس چوڻ هو ته افغان پناهگيرن جي آڙ ۾ دهشتگردي ڪندڙن جي به نشاندهي ڪئي پئي وڃي. ان کان اڳ آءِ ايس پي آر ڊفينس ڪانفرنس ۾ شرڪت لاءِ آرمي چيف جي افغانستان پهچڻ جو اطلاع ڏيندي ٻڌايو هو ته ڪانفرنس ۾ ڪمانڊر سينٽ ڪام، ڪمانڊر ريزولوٽ سپورٽ مشن ۽ افغان آرمي چيف به شريڪ ٿيندا.27

 

شڪر آهي عوامي عدالت ۾ سرخرو ٿيس، احتساب جي نالي انتقام جو جواب عوام ڏئي ڇڏيو: نواز شريف

اسلام آباد ( ويب ڊيسڪ ) اڳوڻي وزيراعظم نواز شريف چيو آهي ته الله جو شڪر گذار آهيان جنهن عوامي عدالت ۾ سرخرو ڪيو آهي. اڳوڻي وزيراعظم نواز شريف جي صدارت هيٺ پنجاب هائوس اسلام آباد ۾ اجلاس ٿيو. اجلاس ۾ مريم نواز، طلال چوڌري، طارق فضل چوڌري، امير مقام، پرويز رشيد، مريم اورنگزيب، طارق فاطمي، مصدق ملڪ، آصف ڪرماني، بليخ الرحمان ۽ ٻين اڳواڻن شرڪت ڪئي. اجلاس ۾ ملڪ جي سياسي صورتحال ۽ سينيٽ جي چونڊن تي ڳالهيون ڪيون ويون. اجلاس ۾ مسلم ليگ ن اڳواڻن لوڌران ۾ ڪاميابي تي نواز شريف کي مبارڪباد پيش ڪئي. نواز شريف ڳالهائيندي چيو ته عوامي عدالت فيصلو ڏنو آهي ته ڪير اهل آهي ڪير نااهل آهي. هن چيو ته منهنجو خلاف فيصلو ڏيندڙن کي عوامي عدالت جا فيصلا ڏسڻ گهرجن. سندس چوڻ هو ته عوام هاڻي پاڻ انصاف ڪري رهيو آهي، سڀني سازشن جو جواب عوامي عدالت مان اچي رهيو آهي، نوازشن عوام لاڏلي کي شڪست ڏني. نواز شريف چيو ته ليگي ڪارڪن ۽ اڳواڻ چونڊن جي ڀرپور تياري ڪن.

 

پارٽي سربراهه سينيٽ ٽڪيٽ پيو ڏئي، قانون ڪالعدم ٿيو ته ٽيڪٽ جو ڇا ٿيندو؟ چيف جسٽس

اسلام آباد(ويب ڊيسڪ) اليڪشن ايڪٽ 2017ع خلاف داخل درخواستن تي ٻڌڻي دوران چيف جسٽس ثاقب نثار ريمارڪس ڏيندي چيو ته پارٽي سربراهه سينيٽ جي ٽڪيٽ ڏئي رهيو آهي، جيڪڏهن قانون ڪالعدم ٿي ويو ته ٽيڪٽ جو ڇا ٿيندو؟ تفصيل موجب سپريم ڪورٽ اليڪشن ايڪٽ 2017ع خلاف داخل درخواستن تي ٻڌڻي ٿي، چيف جسٽس ثاقب نثار جي سربراهي ۾ بينچ ٻڌڻي ڪئي.  ٻڌڻي دوران مسلم ليگ ني جي وڪيل سلمان اڪرم راجا دير  لاءِ درخواست ڪئي، چيف جسٽس آف پاڪستان ٻڌڻي سڀاڻي تائين ملتوي ڪندي چيو ته ايندڙ  ٻڌڻي تي تياري ڪري اچو، پارٽي سربراهه سينيٽ جي ٽيڪٽ ڏئي رهيو آهي، جيڪڏهن قانون ڪالعدم قرار ٿي ويو ته ٽڪيٽ جو ڇا ٿيندو؟

 

پاڪستان ۾ اڍائي ڪروڙ ٻار اسڪول ناهن ويندا: تعليم واري وزارت

اسلام آباد(ويب ڊيسڪ)قومي اسيمبلي ۾ مخالف ڌر جي اڳواڻ خورشيد شاهه جي صدارت هيٺ پبلڪ اڪائونٽ ڪميٽي جو اجلاس ٿيو. اجلاس دوران تعليم واري وفاقي وزارت ٻڌايو ته پاڪستان ۾ اڍائي ڪروڙ ٻار اسڪول ناهن ويند . تفصيل موجب قومي اسيمبلي ۾ مخالف ڌر اڳواڻ خورشيد جي صدارت هيٺ پبلڪ اڪائونٽ ڪميٽي جو اجلاس ٿيو. اجلا ۾ تعليم واري وفاقي وزارت تعليم ۽ تربيت جي مالي سال 17-2016 جي آڊٽ اعتراضن جو جائزو ورتو. آڊٽ رپورٽ ۾ ٻڌايو ويو ته گلگت ۾ 540 اسڪولن جي فنڊن جي بروقت سيڙپڪاري نه ڪئي وئي. بروقت سيڙپڪاري نه ڪرڻ سان 5 ڪروڙ 70 لکن جو نقصان ٿيو. اجلاس ۾ تعليم واري وفاقي وزارت بنيادي تعليم ڪميونٽي اسڪول پروگرام تي بريفنگ به ڏني. بريفنگ موجب پاڪستان ۾ اڍائي ڪروڙ ٻار اسڪول ناهن ويندا جڏهن ته مڊل اسڪول ۾ 50 سيڪڙو ٻار اسڪول ناهن ويندا. تعليم واري وزارت ٻڌايو ته هاءِ ۽ هائر سيڪنڊري ۾ رڳو 12 سيڪڙو ٻار اسڪول ويندا آهن. بنيادي اسڪول ۾ سالياني 15 ڪلاڪ تعليم آهي. ڪيمبرج ۾ 850 ڪلاڪ سالياني تعليم ڏني ويندي آهي. تعليم واري وزارت موجب بنيادي اسڪولن ۾ ٻارن تي سالياني خرچ اڍائي هزار رپيا آهي. سرڪاري اسڪول ۾ هڪ ٻار جي تعليم تي سالياني 13 هزار خرچ ٿيندا آهن،. 50 لک ٻار پرائمري اسڪول وڃڻ جي عمر جا آهن. ملڪ ۾ هڪ لک 45 هزار 829 رسمي پرائمري اسڪول آهن.

 

لوڌران ۾ کٽڻ نوازشريف جي ووٽ جي تقدس ۽ تحريڪ جي فتح آهي: مريم اورنگزيب

اسلام آباد (اين اين آءِ)  سڌسماءِ جي مملڪتي وزير اطلاعات مريم اورنگزيب چيو آهي ته  لوڌران ۾ کٽڻ نوازشريف جي ووٽ جي تقدس ۽ تحريڪ جي فتح آهي، ووٽ جي تقدس ۽ عدل جي تحريڪ کي بحالي جو نوازشريف جيڪو واعدو ڪيو آهي اهو به انشاءالله پورو ڪيو ويو ويندو. اڱاري تي احتساب عدالت جي ٻاهران ميڊيا سان ڳالهه ٻولهه ڪندي  هن چيو ته الله جي فضل سان 2018 جي اليڪشن جي چونڊ لوڌران مان نڪتو آهي. وفاقي وزير چيو ته لوڌران جي عوام انهن الزامن، ڪوڙ ۽ فساد جي سياست رد ڪري ورتي. هن چيو ته لوڌران جي چونڊ کٽڻ نوازشريف جي ووٽ جي تقدس تحريڪ جي فتح مملڪتي وزير چيو ته عوام ڏسي رهيو آهي ته نوازشريف جي نااهليت اهليت ۾ تبديل ٿي ويئي آهي هن چيو ته پاڪتان جو باشعور عوام ڪوڙي ۽ ڏڦيڙ واري سياست کي رد ڪندي لوڌران جي ننڍي اليڪشن ۾ پنهنجو فيصلو ٻڌائي ڇڏيو.

 

عاصمه جهانگير کي مٽيءَ ماءُ حوالي ڪيو ويو، جنازي جي نماز ۾ ججن، سياسي ۽ سماجي شخصيتن ۽ وڪيلن جي وڏي انگ شرڪت ڪئي.

لاهور (اين اين آءِ) مشهور قانوندان ۽ انساني حقن جي رکوالي عاصمه جانگير کي جنازي جي نماز کان پوءِ مٽي ماءُ حوالي ڪيو ويو جنازي نماز ۾ جج، سياسي ۽ سماجي شخصيتون ۽ وڪيل برادري وڏي انگ ۾ شرڪت ڪئي مرحومه جو ٽيجهو اڄ اربع سندس رهائشگاهه تي ٿيندو عاصمه جهانگير جيڪا آچر جي ڏينهن دل جو دورو پوڻ سان لاڏاڻو ڪري ويئي هئي سندس ميت سردخاني مان رهائشگاهه تي آندي ويئي جنازي نماز لاءِ ميت کي سندس رهائشگاهه کان قذافي اسٽيڊيم جي لڳ کليل ميدان تي آندو ويو جتي سيڪيورٽي جا سخت انتظام ڪيا ويا هئا جنازي نماز ۾ ايندڙن کي واڪ ٿرو گيٽ مان گذاريو ويو سي سي پي او لاهور ڪ.ئپٽن رٽائرڊ امين وينس ۽ ڊي آءِ جي آپريشن ڊاڪٽر حيدر اشرف سميت پوليس جا ٻيا اعليٰ عملدار سيڪيورٽِ انتظامن جو جائزو وٺڻ لاءِ موجود رهيا جنازي نماز حيدر فاروق مودودي پڙهائي جنهن ۾ چيف جسٽس لاهور هاءِ ڪورٽ مسٽر جسٽس محمد ياور علي جسٽس انوارالحق، جسٽس شهرام سرور چوڌري جسٽس شاهد بلال حسن، جسٽس صداقت علي خان، جسٽس ساجد محمود، جسٽس شاهد جميل خان، جسٽس فيصل زمان خان، سيشن جج لاهور عابد حسين قريشي، سينيٽ چيئرمين رضا رباني، اشتر اوصاف ايڊووڪيٽ جنرل پنجاب شڪيل الرحمان اڳوڻو وفاقي وزير پرويز رشيد اڳوڻو پنجاب جو گورنر شاهد حامد پ پ پ جا اڳواڻ اعتزازاحسن منظور احمد وٽو، فيصل مير، نجم سيٺي، سينيئر صحافي حامد مير ۽ ٻين سميت سياسي ۽ سماجي شخصيتن ۽ وڪلين سميت زندگي جي مختلف شعبن سان لاڳاپيل ماڻهن شرڪت ڪئي. جنازي جي نماز کان پوءِ مرحومه کي بيديان روڊ تي سندس فارم هائوس ۾ مٽيءَ ماءُ حوالي ڪيو جتي مختلف شخصيتن پاران سندس قبر کي گلن جون چادرون چاڙهيون ويون مرحومه جو ٽِجهو اڄ اربع 3 وڳي 121 اي هالي روڊ تي سندس رهائشگاهه تي ٿيندو.

 

فروغ نسيم پارٽي اڳواڻن کي چيو ته پرويز مشرف ئي اصل ليڊر آهي: فاروق ستار

ڪراچي(ويب ڊيسڪ) متحده قومي موومينٽ (ايم ڪيو ايم) پاڪستان جي اڳواڻ فاروق ستار جو چوڻ آهي ته ايم ڪيو ايم ۾ مائنس ٽو فارمولي تي عمل ٿي رهيو آهي. ميڊيا سان ڳالهائيندي فاروق ستار چيو ته مائنس ون کي به ڪارڪنن وڏي ڏکيائي سان قبول ڪيو هو، نالي ماتر رابطا ڪميٽي ڪنهن جي هٿن ۾ استعمال ٿي رهي آهي. فاروق ستار دعويٰ ڪئي ته هن وٽ ان ڳالهه جو ثبوت موجود اهي ته اهو اڳوڻي صدر پرويز مشرف جو فارمولو آهي، فروغ نسيم پارٽي اڳواڻن کي چيو ته فاروق ستار ۾ دم ناهي پرويز مشرف ئي اصل ليڊر آهي. هن چيو ته فروغ نسيم جيڪي تجويزون رابطا ڪميٽي کي ڏئي رهيو آهي مهرباني ڪري اهي نه ڏئي ۽ قوم کي وڌيڪ ورهائجڻ کان بچائي. فاروق ستار چيو ته 25 صوبائي ميمبر مون سان گڏ آهن جڏهن ته 12 ميمبر بهادر آباد وارن سان گڏ آهن، مون سان گڏ ماڻهن کي فون پيا اچن ته ٻڌايو ته ڪهڙو عهدو کپي. هوڏانهن خالد مقبول صديقي چيو ته ڪيترائي ڀيرا فاروق ستار کان ڪامران ٽيسوري بابت پڇاڻو ڪيو، هن کان پڇيو هو ته آخر ڪامران ٽيسوري کي گڏ کڻي واري ڪهڙي مجبوري آهي؟ هن چيو ته سينيٽ جي ٽڪيٽ جو مسئلو نه هو، ڪامران ٽيسوري کي فاروق ستار ڊپٽي ڪنوينر بڻايو، پارٽي جي اڪثريت ڪامران ٽيسوري کي ڊپٽي ڪنوينر بڻائڻ جي مخالفت ڪئي هئي، فاروق ستار چيو ته ٽيسوري کي ڊپٽي ڪنوير نه بڻايو ويو ته آئون پارٽي ڇڏي ڏيندس. خالد مقبول صديقي ٻڌايو ته هن فاروق ستار کي چيو ته ٽڪيٽ جنهن کي ڏيڻي آهي ڏيو پر پارٽي کي ائين نه هلايو. هن اهو به چيو ته فاروق ستار ڪامران ٽيسوري کي ڊپٽي ڪنوينر نه پر ڪنوينر بڻايو هو، پارٽي جي ماڻهن جو چوڻ آهي ته فاروق ستار جا اختيار ٽيسوري جي کيسي ۾ آهن. خالد مقبول صديقي چيو ته فاروق ستار پارٽي جو ڪارڪن آهي ۽ هو ٻيهر ايندو ته شايد سربراهه به بڻجي، جيڪڏهن فاروق ستار کي لڳي ٿو ته ڪنوينر جا اختيار گهٽ ته هو پارٽي جو ڊپٽي ڪنوينر بڻجي.

 

جيڪو هارجڻ کان ڊڄي اهو نواز شريف بڻجي ويندو آهي: عمران خان

اسلام آباد (ويب ڊيسڪ) تحريڪ انصاف جي چيئرمين عمران خان چيو آهي ته جيڪو هارجڻ کان ڊڄي ويندو آهي اهو نواز شريف بڻجي ويندو آهي، مان جيترا ڀيرا هارايو آهيان پاڪستان جي تاريخ ۾ ايترا ڀيرا ڪير به ناهي هارايو. اسلام آباد ۾ سرگوڌا ورڪرز ڪنوينشن کي خطاب ڪندي عمران خان چيو ته جيڪو هارجڻ کانپوءِ پاڻ کي سنڀالي نه سگهي ان کي کٽڻ ناهي ايندو، هڪ ٻار پهريون ڀيرو چونڊ وڙهي ۽ 91 هزار ووٽ کنيا، جڏهن ته مان سوچي رهيو هيس ته ڇا اسان ڪنهن ٻئي ملڪ ۾ چونڊ هارائي آهي؟ لوڌران چونڊ جي شڪست تي ڪارڪنن روئڻ شروع ڪري ڏنو. هن چيو ته مان لوڌران ۾ شڪست کانپوءِ سوچي ورتو آهي ته اڳتي ڇا ڪرڻو آهي، پنهنجي ايندڙ منصوبي لاءِ مون کي 350 نوجوان گهربل آهن، جن کي پي پي 30 تي ننڍي چونڊ لاءِ تياري ڪرائيندس، اڳواڻ لاءِ لازمي آهي ته هو پنهنجي خوف تي قابو ڪري ۽ ڪوڙو ماڻهو ڪڏهن به اڳواڻ نٿو بڻجي سگهي. سندس چوڻ هو ته ميرٽ نه هجي ته بلاول ڀٽو زرداري به پارٽي جو سربراهه بڻجي ويندو آهي، جتي ميرٽ نه هجي اتي نواز شريف جي جاءِ تي مريم نواز ۽ حمزا اچي ويندا آهن، پيءُ اڳواڻ هجي، ان جو مطلب اهو ناهي ته پٽ يا ڌيءُ به اڳواڻ بڻجي وڃي.27

 

متحده قومي موومنٽ جي قومي اسيمبلي ميمبر سلمان مجاهد بلوچ تي جنسي زيادتي جو الزام

ڪراچي(ويب ڊيسڪ) متحده قومي موومنٽ جي قومي اسيمبلي ميمبر سلمان مجاهد بلوچ تي جنسي زيادتي جو الزام لڳي ويو. ميڊيا جي رپورٽ موجب ڪراچي جي هڪ ڇوڪري سماجي ڪارڪن صارم برني سان رابطو ڪيو ۽ کيس ثبوت پيش ڪندي چيو ته مجاهد بلوچ کيس مسلسل زيادتي جو نشانو بڻايو آهي ان ڪري قومي اسيمبلي جي ميمبر خلاف ڪارروائي ۾ مدد ڪئي وڃي. ڇوڪري چيو ته سلمان مجاهد نوڪري جو آسرو ڏئي آفيس گهرايو ۽ مون کي زيادتي جو نشانو بڻايو، ان کان پوءِ منهنجون غير اخلاقي تصويرون ڪڍيون ۽ ويڊيو بڻائي بليڪ ميلنگ شروع ڪئي ۽ ڪافي عرصي تائين مسلسل زيادتي جو نشانو بڻائيندو رهيو. هن چيو ته جڏهن مون شادي ڪئي ته سلمان مجاهد ناراض ٿي منهنجي خلاف ڪوڙو ڪيس داخل ڪرايو. سماجي ڪارڪن صارم برني متاثر ڇوڪري جي مدد ڪندي ايف آءِ آر داخل ڪرائي ڇڏي.

 

 

حافظ آباد ۾ وڌيڪ 16 عورتن جو بون ميرو ڪڍڻ جو انڪشاف

حافظ آباد ( ويب ڊيسڪ ) پنجاب جي شهر حافظ آباد ۾ وڌيڪ 16 عورتن جو بون ميرو ڪڍڻ جو انڪشاف ٿيو آهي. ڪرنگهه جي هڏي مان پاڻي ڪڍڻ جي متاثر عورتن کي ميڊيڪل ٽيسٽ لاءِ ڊسٽرڪٽ اسپتال منتقل ڪيو ويو آهي. ايم ايس جو چوڻ آهي ته متاثر عورتن جي ڪرنگهي جي هڏي ويجهو سرنجهه جا نشان ڏٺا ويا آهن. ٻئي طرف ڊي پي او حافظ آباد غياث گل جو چوڻ آهي ته مبينا طور عورتن جي ڪرنگهي جي هڏي مان پاڻي ڪڍڻ جو مقصد ڇا هو ان بابت جلد اڳڀرائي ٿيندي جڏهن ته سمورن جوابدارن کي گرفتار ڪيو ويو آهي. ڊي پي او چيو ته خاص ڪميٽي ٽن ڏينهن ۾ جاچ مڪمل ڪري رپورٽ پيش ڪندي جڏهن ته متاثر عورتن جا نمونا ٽيسٽ لاءِ موڪليا ويا آهن ۽ رپورٽ اچڻ تي ئي ڪجهه چئي سگهجي ٿو. صحت واري وفاقي وزير سائره تارڙ جو چوڻ آهي ته شروعاتي طورمعاملو سمجهه کان ٻاهر آهي، بون ميرو ڪڍڻ ايترو سولو ناهي، جيڪڏهن گرفتار جوابدار ملوث آهن ته کين انجام تائين پهچايو ويندو.