تازيون خبرون

Monthly Archives: January 2018

وزيراعظم يا وڏي وزير جي ڪميشن يا عدالتي ڪميشن جوڙڻ تي پابندي لاڳو

لاهور (اين اين آءِ) زينب قتل ڪيس جي پاڻمرادو نوٽيس جي ٻڌڻي دوران چيف جسٽس ثاقب نثار گرفتار جوابدار عمران جي 37 بئنڪ اڪائونٽس واري دعوا ڪندڙ اينڪر پرسن پاران ثبوت پيش ڪرڻ ۾ ناڪامي تي ڪاوڙ جو اظهار ڪندي ڊي جي ايف آءِ اي بشير ميمڻ جي اڳواڻي ۾ نئين جي آءِ ٽي جوڙي ڇڏي آهي جيڪا رڳو اينڪر پاران لڳايل الزامن جي جاچ ڪندي جڏهن ته چيف جسٽس آئنده ڪنهن به معاملي ۾ ڪميشن يا جڊيشل ڪميشن بنائڻ تي پابندي لاڳو ڪندي چيو آهي ته وزيراعظم ۽ وڏا وزير ان لاءِ درخواست نه ڪن، چيف جسٽس زينب جي والد ۽ وڪيل تي ميڊيا ۾ بيان ڏيڻ يا پريس ڪانفرنس تي پابندي مڙهيندي جي آءِ ٽي جي جاچ عمل ۾ اڳڀرائي جي هدايت به ڪئي. چيف جسٽس آءِ جي پنجاب کي زينب جي گهرڀاتين کي سيڪيورٽي فراهم ڪرڻ جو حڪم ڏيندي چيو آهي ته زينب اسان جي به نياڻي آهي ڪيس کي خراب ٿيڻ نه ڏينداسين گذريل ڏينهن چيف جسٽس ميان ثاقب نثار جي سربراهي ۾ جسٽس منظور اي ملڪ ۽ جسٽس اعجاز الحسن تي ٻڌل ٽن ميمبرن واري بئنچ زنيب قتل ڪيس جي پاڻمرادو نوٽيس ڪيس جي ٻڌڻي ڪئي، آءِ جي پنجاب عارف نواز، جي آءِ ٽي سربراهه محمد ادريس، چيف سيڪريٽري پنجاب زاهد سعيد، اٽارني جنرل اشتر اوصاف ايڊووڪيٽ جنرل پنجاب شڪيل الرحمان، ڊي جي فرانزڪ سائنس ايجنسي ڊاڪٽر اشرف طاهر سميت ٻيا به عدالت ۾ موجود هئا. زينب جو والد امين انصاري ۽ ٻين ٻارڙن جا وارث به سپريم ڪورٽ ۾ لاهور رجسٽري ۾ پهتا، فاضل عدالت جي حڪم تي معاوت لاءِ پاڪستان براڊ ڪاسٽرز ايسوسيئيشن، آل پيپر نيوز پيپر ايسوسيئيشن جا عهديدار، ميڊيا جا مالڪ ۽ سينئر صحافي به عدالت جي ڪمري ۾ موجود هئا. فاضل عدالت جي گهرائڻ تي گرفتار جوابدار عمران جي 37 بئنڪ اڪائونٽس جي دعويٰ ڪندڙ خانگي ٽي وي جو اينڪر پرسن شاهد مسعود عدالت ۾ پيش ٿيو چيف جسٽس جوابدار جي بئنڪ اڪائونٽس جي دعويٰ ڪندر اينڪر کي چيو ته جوابدار جا بئنڪ اڪائونٽس ثابت ڪريو جڏهن ته هو عدالت ۾ ثبوت پيش نه ڪري سگهيو جنهن تي چيف جسٽس ڪاوڙ ڪندي ريمارڪس ڏنا ته ڪيس جي جاچ کان پاسو ڪريو چيف جسٽس اينڪر پرسن کي چيو ته جيڪو ڪجهه اوهان چيو اهو ثابت به ڪرڻو آهي، رات جو اوهان جو پروگرام ڏٺو ته فوري نوٽس ورتو ته جيئن ايترن الزامن کانپُوءِ جوابدار کي قتل نه ڪيو وڃي. پنهنجي دعوائن جا ثبوت پيش ڪيو جڏهن ته ڊاڪٽر شاهد مسعود زينب ڪيس جي جاچ تي ڳالهائڻ شروع ڪيو هن چيو ته اوهان جي آءِ ٽي کان پڇا ڪيو ته جوابدار ٻارڙي کي ڪٿي رهايو، قصور مان پورنو گرافي جون ٽي سئو ويڊيوز منظر عام  تي اچي چڪيون آهن ٻارڙي تي تشدد ڪيو ويو، اجتماعي زيادتي ڪئي وئي پر هڪ ئي جوابدار کي شامل ڪيو ويو، هي ان گينگ کي بچائڻ چاهين ٿا جنهن کي هنن پاليو آهي جيڪڏهن منهنجي ڳالهه تي يقين نه آهي ته مان هليو وڃان ٿو چيف جسٽس اڻ لاڳاپيل ڳالهيون ڪرڻ تي اينڪر تي ڪاوڙ جو اظهار ڪيو ته اوهان مفروضن تي ڳالهائي رهيو آهي هي جاچ ۽ پراسيڪيوشن جو معاملو آهي اوهان جن اڪائونٽن جي ڳالهه ڪئي انهن جو ڪو به وجود ناهي اوهان شهادت تي اعتراض ڪري رهيا آهيو پنهنجي الزامن تي رهو ۽ پنهنجي موقف تي حد تائين ڳالهايو ۽ اهڙي ڳالهه نه ڪريو جنهن سان جاچ تي اثر پوي اوهان کي اندازو ناهي ته اوهان جا اهڙا الزام جاچ جو رخ تبديل ڪري سگهن ٿا اسان اوهان کي وڃڻ نه ڏينداسين هاڻي اسان پنهنجي جي آءِ ٽِي بڻائي رهيا آهيون جيڪو ڪجهه اوهان ٻڌايو اهو توهان ثابت نه ڪري سگهيا هاڻي اوهان نئين جي آءِ ٽي آڏو پيش ٿيو شاهد مسعود چيو ته مون کي ڳالهائڻ نه ڏيندو ته مان هليو وڃان ٿو چيف جسٽس چيو ته ائين نه هلندو، اسان اوهان کي وڃڻ نه ڏينداسين ثبوت پيش ڪرڻ تائين اوهان هتان نه ٿا وڃي سگهو شاهد مسعود چيو ته مان رائو انوار وانگر خانگي جهاز تي فرار ٿي ويندس. چيف جسٽس چيو ته ڀڄڻ جي ڪوشش ڪئي ته اوهان جو نالو اي سي ايل ۾ وجهڻ جو حڪم ڏينداسين. جيڪڏهن الزام ثابت ٿيو ته اوهان کي بهترين صحافي جو اعزاز ملندو شان سان سرٽيفڪيٽ ڏينداسين، الزام ثابت نه ڪيو ته اوهان جي خلاف سخت قانوني ڪارروائي ٿيندي، ڪيس جي جاچ ڪرڻ اوهان جو ڪم ناهي جاچ ٽيم جو ڪم آهي. شاهد مسعود چيو ته مون کي ڪجهه وقت گهرجي ته چيف جسٽس چيو ته رات 8 وڳي تائين ڪيس جي ٻڌڻي جاري آهي اوهان تيستائين ثبوت پيش ڪيو اوهان جي ڳالهه غلط ثابت ٿي ته توهين عدالت جي سزا ڀوڳڻي پوندي اوهان جي خلاف دهشتگردي روڪٿام جا قلم شامل ٿيندا ۽ تعزيرات پاڪستان تحت ڪارروائي ٿيندي. جسٽس چيو ته جيڪڏهن اوهان جا الزام ثابت ٿيا ته اوهان ٽاپ جا صحافي هوندا جيڪڏهن غلط الزام ثابت ٿيا ته اوهان سان اهو ڪجهه به ٿي سگهي ٿو جيڪو اوهان سوچي به نه ٿا سگهو فاضل عدالت شاهد مسعود جي الزامن تي جاچ لاءِ ڊي جي ايف آءِ بشير ميمڻ جي سربراهي ۾ نئين جي آءِ ٽي قائم ڪئي جڏهن ته پهرين جي آءِ ٽي جاچ بابت پنهنجو الڳ ڪم ڪندي رهندي. چيف جسٽس چيو ته جي آءِ ٽي لاءِ ٻيا نالا به ڏينداسين ٻڌڻي دوران ڊاڪٽر شاهد مسعود جي آءِ ٽي عدم اعتماد ڪندي چيو ته جوڊيشل ڪميشن جوڙيو وڃي چيف جسٽس جو چوڻ هو ته جي آءِ ٽي سپريم ڪورٽ بڻائي اوهان ان تي اعتراض نه ڪيو ڪو به جوڊيشل ڪميشن نه بڻبو پر جاچ ٿيندي جوڊيشل ڪميشن بڻائي معاملو لئي مٽي ڪيو وڃي ٿو هاڻي اهو نه ٿيندو چيف جسٽس ڊاڪٽر شاهد مسعود کي نئين جي آءِ ٽي آڏو پيش ٿيڻ جو حڪم ڏئي ڇڏيو ٻڌڻي دوران سرڪاري وڪيل ڊاڪٽر شاهد مسعود جي دعوا کي غلط قرار ڏيندي عدالت کي ڄاڻ ڏني ته اسٽيٽ بئنڪ به پنهنجي رپورٽ ۾ جوابدار جي اڪائونٽن بابت دعوا کي ڪوڙو قرار ڏنو آهي جي آءِ ٽي اينڪر پرسن کي طلب ڪيو پر هو بار بار نوٽيس جي باوجود پيش نه ٿيو چيف جسٽس وزيراعظم ۽ وڏن وزيرن جي درخواست تي ڪميشن يا جڊيشل ڪميشن بنائڻ تي پابندي لاڳو ڪندي چيو ته اصل طريقو جاچ آهي جڊيشل ڪميشن بڻائي معاملن کي لئي مٽي ڪيو وڃي ٿو سليم شهزاد ڪيس ۾ جڊيشل ڪميشن ٺهيو اڄ تائين ڪجهه نه نڪري سگهيو.

 

 

 

عالمي برادري والاريل ڪشمير ۾ ڀارتي ظلمن جو نوٽيس وٺي: پاڪستان

سرينگر/اسلام آباد (اين اين آءِ/ ويب ڊيسڪ ) ڀارتي فوج پرتشدد ڪاررواين ۾ وڌيڪ ٽن ڪشميرين کي شهيد ڪري ڇڏيو. ڀارتي فوج شوپيان ضلعي جي علائقي گنو پوره ۾ مظاهرين تي سڌي فائرنگ ڪئي جنهن جي نتيجي ۾ 3 ڄڻا شهيد ٿي ويا جڏهن ته ڪيترائي زخمي ٿي پيا.  والاريل ڪشمير ۾ بي گناهه ڪشميرين جي قتل عام جي 24 هين ورسي تي علائقي ۾ مڪمل طور هڙتال آهي، جنهن دوران ڪاروبار ۽ دڪان مڪمل طور بند پيل آهن، جڏهن ته روڊن تي ٽريفڪ مڪمل طور بند آهي. ضلعي پلواما جي علائقي ترال ۾ به نوجوان عابد خان جي شهادت خلاف هڙتال آهي. حريت ڪانفرنس جي چيئرمين سيد علي گيلاني جو چوڻ آهي ته ڪشمير ۾ بدامني جو سڀ کان وڏو سبب ڀارت جو غير قانوني قبضو آهي، جيستائين اهو ختم نه ٿيندو تيستائين ڪڏهن به جٽادار امن قائم نه ٿي سگهندو. هن چيو ته سوپور يونيورسٽي ۾ ڀارتي فوج جي ڇاپن ۽ ڀڃڊاهه جي مذمت ڪريون ٿا.پاڪستان والاريل ڪشمير ۾ ڀارتي فوج جي اڳرائي جي سخت مذمت ڪندي چيو آهي ته ڪشميري نوجوانن کي سندن آزادي واري جذبي کي دٻائڻ لاءِ منظم انداز ۾ نشانو بڻايو پيو وڃي. آچر تي هڪ بيان ۾ پرڏيهي آفيس جي ترجمان ڊاڪٽر محمد فيصل والاريل ڪشمير ۾ ڀارتي فوج پاران طاقت جي وحشياڻي استعمال جي سخت مذمت ڪئي آهي ترجمان چيو ته ڀارتي فوج پاران پرامن ۽ هٿين خالي مظاهرو ڪندڙن تي فائرنگ ۽ خطرناڪ هٿيارن جو استعمال ڪشميرين جي خلاف ان جي جاري دهشتگردي جو ثبوت آهي. ترجمان چيو ته بهادر ڪشميري عوام هميشه ثابت ڪيو آهي ته ڪنهن به قسم جو ڪو ئي ڏاڍ، تشدد ۽ شهادتن جا واقعا حق حاصل ڪرڻ واري راهه تان هٽائي نه ٿا سگهن.

 

رائو انوار جي گرفتاري، آءِ جي سنڌ ڳجهن ادارن کان مدد گهري ورتي

ڪراچي (ويب ڊيسڪ) نقيب الله قتل ڪيس ۾ ملير جي اڳوڻي ايس ايس پي رائو انوار جي گرفتاري لاءِ آءِ جي سنڌ اي ڊي خواجا انٽيليجنس ايجنسين کان مدد گهري ورتي آهي. اي ڊي خواجا ڳجهن ادارن کي خط لکيو آهي، جنهن ۾ هن درخواست ڪئي آهي ته رائو انوار جي نشاندهي، ڳولا ۽ گرفتاري ۾ مدد ڪئي وڃي. آءِ جي سنڌ چيو آهي ته رائو انوار جي گرفتاري لاءِ ٽيڪنيڪل ۽ انٽيليجنس بنياد تي هر ممڪن مدد ڪئي وڃي. ملير جو اڳوڻو ايس ايس پي 20 جنوري جي صبح پي آءِ اي اڏام ذريعي اسلام آباد ويو، 23 جنوري تي هن اسلام آباد ايئرپورٽ کان دبئي فرار ٿيڻ جي ڪوشش ڪئي پر ايف آءِ اي اميگريشن کيس ٻاهر وڃڻ کان روڪي ورتو. اي ڊي خواجا خط ۾ لکيو آهي ته رائو انوار ملڪ کان ٻاهر وڃڻ لاءِ ننهن چوٽيءَ جو زور ڏئي رهيو آهي، ڏوهاري کي جلد سپريم ڪورٽ ۾ پيش ڪرڻو آهي، تنهن ڪري گرفتاري ۾ مدد ڪئي وڃي. واضح رهي ته جاچ ڪميٽي نقيب الله محسود کي بي ڏوهه ۽ پوليس مقابلي کي ڪوڙو قرار ڏنو آهي، جڏهن ته رائو انوار جاچ ڪميٽي اڳيان پيش نه ٿي رهيو آهي ۽ هو روپوش ٿي ويو آهي. سپريم ڪورٽ ڪالهه رائو انوار جي گرفتاريءَ لاءِ پوليس کي 72 ڪلاڪن جو وقت ڏنو هو.27

 

سياست کان مٿانهون عوام جو مفاد سڀ کان اهم آهي: مريم اورنگزيب

ڪراچي (اين اين آءِ) سڌ سماءَ جي مملڪتي وزير مريم اورنگزيب چيو آهي ته سياست کان مٿانهون عوام جو مفاد سڀ کان اهم آهي 2013 جي وقت مسئلن ۾ ڦاٿل عوام کي 2018 ۾ حڪومت امن، امان، بجلي ۽ مضبوط معيشت جا خوبصورت تحفا ڏنا آهن صوبي جي ترقي ۽ خوشحالي وفاق جي سوچ جو چٽو مثال آهي سنڌ جي گورنر سان گورنر هائوس ۾ مريم اورنگزيب ۽ مصدق ملڪ آچر تي ملاقات ڪئي، ترجمان گورنر هائوس موجب ملاقات ۾ راءِ جو اظهار، صحافت جي آزادي، عوامي ڀلائي جي منصوبن جي مشهوري ، معاشي خوشحالي ۾ ميڊيا جي ڪردار سميت اهميت جي ٻين معاملن تي تفصيل سان خيالن جي ڏي وٺ ڪئي وئي. ان موقعي تي گورنر چيو ته صوبي ۾ وفاق جي سهڪار سان جوڙيل ترقياتي منصوبا اهم ثابت ٿيندا امن امان قائم ڪرڻ ۾ ميڊيا جو ڪردار اهم آهي معاشرتي براين جي نشاندهي ۾ ميڊيا اهم خدمت ڪري رهيو آهي گورنر چيو ته وفاقي حڪومت صوبي جي ترقي ۽ خوشحالي لاءِ خاص سهڪار ڪري رهي آهي، وفاق جي سهڪار سان 75 ارب رپين جي ڳچ رقم سان ترقياتي منصوبا ڪراچي ۾ مڪمل ٿي رهيا آهن. ڀرپور تعاون فراهم ڪرڻ تي صوبي جا رهواسي وفاق کي قدر جي نگاهه سان ڏسن ٿا. مريم اورنگزيب چيو ته جمهوريت جا ثمر عوام تائين پهچڻ شروع ٿي ويا آهن امن امان ۽ بجلي بحران جي خاتمي کانپوءِ معيشت به مضبوط ٿي چڪي آهي. بنا فرق خدمت ۽ عوام جي ڀلائي حڪومت جي پهرين ترجيح آهي.

ڀارت سي پيڪ خلاف آهي، پاڪستان ڪنهن به مهم کي برداشت نه ٿو ڪري سگهي: سعد رفيق

لاهور (اين اين آءِ) ريلوي جي وفاقي وزير خواجا سعد رفيق چيو آهي ته ڪنهن به سياسي قيادت کي ڏاڍ سان ۽ الزام هڻي سياست مان ٻاهر نه ٿو ڪڍي سگهجي پاڪستان موجوده وقت ۾ ڪنهن به مهم جي سٽ نه ٿو صحيح سگهي ملڪ خطري ۾ آهي آمريڪا ۽ ڀارت اسان جي خلاف آهن ڀارت سي پيڪ کي برداشت نه ٿو ڪري سگهي ۽ افغانستان به ٻريو پيو آهي. اسان هڪ ٻئي کي معاف ڪري ملڪ لاءِ سوچڻو پوندو، عقل مند ماڻهن کي گهرجي ته اهي هوش سان معاملا ٺيڪ ڪن، احڙن خيالن جو اظهار هن پنهنجي تڪ چونڊ ۾ گوهاوا اسڪول جي افتتاحي تقريب ۾ خطاب ڪندي ڪيو. هن چيو ته اسان پنهنجي حڪومت ۾ تعليم تي خاص ڌيان ڏنو، اسان سمجهون ٿا ته تعليم ۽ شعور کانسواءِ ڪا به قوم ترقي نه ٿي ڪري سگهي. ڪجهه سال پهريان هنن گهرن تائين پهچڻ لاءِ رستو نه هيو پر اڄ ماڻهو خوش آهن مخالف چون ٿا ته ميٽرو نه ٺاهيو پل نه ٺاهيو ۽ ترقياتي ڪم نه ڪرايو اسان سمجهون ٿا ته بنيادي ڍانچي کان سواءِ ملڪ ترقي نه ٿو ڪري سگهي. هن چيو ته هڪ ماڻهو روزانو ٽي وي تي اچي ڪوڙ ڳالهائيندو هو آخر پنهنجي ڄار ۾ ڦاسي پيو، خيبرپختونخواهه ۾ عاصمه جا قاتل نه پڪڙجي سگهيا ته پوءِ ڪهڙي سبب سٺي پوليس جي دعويٰ ڪئي وڃي ٿي، ڪراچي وارو ڪراچي ۾ ڪم ڪريو ۽ ڪراچي کي ٺاهيو جيئن لاهور کي ٺاهيو ويو آهي. هڪ وقت هيو جڏهن ڪراچي لاهور کان ترقي ۾ اڳتي هئي اڄ ڀيٽ ئي نه ٿي ڪري سگهجي اڄ ڪراچي ڪٻاڙي ۽ لاهور مثالي شهر بڻجي چڪو آهي. هن چيو ته اسان گذريل ساڍا چار سال محنت ۽ ديانتداري سان ملڪ جي خدمت ڪئي بنا فرق ترقياتي منصوبا مڪمل ڪيا، ڪراچي جو امن بحال ڪيو، بلوچستان جي ماڻهن کي جبلن تان لاهي قومي سوچ ۾ شامل ڪرڻ تي مجبور ڪيو پر ڪجهه مفاد پرست ٽولا پاڪستان خاص ڪري مسلم ليگ (ن) جون ڪاميابيون پسند نه آيون گذريل ساڍن چئن سالن ۾ مسلم ليگ (ن) تي هر قسم جا حملا ڪيا ويا ڪڏهن ڌرڻا هنيا ويا ته ڪڏهن ڪئناڊا جي مولوي کي گهرايو ويو اسان ڪنهن اداري يا شخصيت جا مخالف ناهيون جج بحالي تحريڪ ۾ نواز شريف ئي سڀ کان اڳيان هو پر عوام جي چونڊيل وزيراعظم کي نااهل ڪيو ويو.

 

انتظار قتل ڪيس ۾ اڳڀرائي، واقعي جا نوان سي سي ٽي وي فوٽيج هٿ

ڪراچي (اين اين آءِ)شڪي پوليس مقابلي ۾ مارجي ويل نوجوان انتظار احمد جي قتل جي سي سي ٽي وي فوٽيج منظر عام تي اچي وئي، آچر تي ميڊيا شڪي پوليس مقابلي ۾ مارجي ويل انتظار احمد جي مارجڻ جي سي سي ٽي وي فوٽيج حاصل ڪري ورتي آهي جنهن ۾ واضح طور تي ڏٺو ويو آهي ته انتظار پنهنجي اڇي رنگ جي گاڏي ۾ ويٺل آهي، موٽر سائيڪل تي سوار سادا ڪپڙا پاتل بلال ۽ دانيال نالي اي سي ايل جا اهلڪار مقتول انتظار جي گاڏي کي روڪين ٿا ۽ پوءِ هڪ ڪاري رنگ جي ٻي گاڏي سامهون اچي بيهي ٿي، جيڪي موٽر سائيڪل تي سوار پوليس اهلڪارن سان ئي گڏ هئا فوٽيج ۾ صاف نظر اچي رهيو آهي ته جڏهن انتظار آهستي آهستي پنهنجي گاڏي اڳيان وڌائي ٿو ته موٽر سائيڪل تي سوار پوليس اهلڪار سندس گاڏي مٿان فائرنگ ڪن ٿا پوليس اهلڪارن پاران ڪيل فائرنگ ۾ هڪ گولي گاڏي جي پوئين شيشي کي چيريندي انتظار جي مٿي ۾ لڳي ٿي جنهن سبب انتظار جو موت ٿئي ٿو.

 

رائو انوار جي پٺڀرائي ڪندڙ هٿ وائکا ڪيا وڃن: عمران خان

ڪراچي (اين اين آءِ)پاڪستان تحريڪ انصاف جي چيئرمين عمران خان سهراب ڳوٺ ۾ نقيب محسود جي قتل خلاف ٿيندڙ جرڳي کي خطاب ڪندي چيو ته مان جرڳي جي سردارن کي زبردست ڀيٽا پيش ڪيان ٿو اسان جي جنگ ان نظام خلاف آهي جنهن سبب نقيب محسود قتل ٿيو اسان جي جنگ رائو انوار جهڙن پوليس جي ڪپڙن ۾ قاتلن جي خلاف آهي. اوهان کي خيبرپختونخواهه جي پوليس تي فخر هوندو ڇو ته اتي ڪو به پوليس وارو ڪنهن کي قتل نه ٿو ڪري سگهي. رائو انوار پويان اهي سياستدان آهن جيڪي ڏوهه ۽ قتل ڪرائين ٿا جڏهن سياستدان پوليس کان قتل ڪرائين ٿا ته پوليس وارا قبضا گروپ سان به ملي وڃن ٿا ۽ پيسا وٺڻ لاءِ به قتل ڪن ٿا. اسان اڄ اهو فخر سان ٻڌائي سگهون ٿا ته پختونخواهه ۾ اسان پوليس ايڪٽ بڻايو آهي ان تحت پوليس ۾ سياسي مداخلت نه ٿي ٿي سگهي اڄ اسان هتان جي پوليس کي به غير سياسي بڻائڻ چاهيون ٿا منهنجي سڀ کان وڌيڪ ڪوشش هوندي ته ڪڏهن به ڪنهن پيءُ کي اهڙي تڪليف مان نه گذرڻو پوي جنهن سان نقيب محسود جي والد کي گذرڻو پيو. جيڪي 440 ماڻهو عدالت کان مٿانهان قتل ڪرايا ويا انهن جي جاچ ٿيڻ گهرجي رائو انوار جهڙن ڏوهارين کي سزا ملڻ گهرجي پوليس وارو جيڪو قتل ڪري رهيو هو ان جي پٺ تي ڪير آهي ان تائين پهچڻ گهرجي اسان جي ڪوشش آهي ته ڪراچي ۾ جيڪي مختلف قومون آباد آهن انهن کي گڏ ڪريون امن قائم ڪريون ته جيئن ماڻهن کي نوڪريون ملن ۽ پاڪستان خوشحال ٿئي. جيڪو به انسانن کي ورهائي ٿو ۽ نفرت پکيڙي ووٽ حاصل ڪري ٿو اهو ليڊر نه پر فسادي آهي.

 

لاهور ۾ به رائو انوار آهن، انهن ۾ ڪڏهن هٿ وڌو ويندو: طاهر القادري

لاهور (اين اين آءِ) پاڪستان عوامي تحريڪ جي سربراهه ڊاڪٽر طاهرالقادري چيو آهي ته ملڪي سياست ۽ گهرو حالتن کي نظر ۾ رکي احتجاج جي حڪمت عملي کي پنهنجي حق لاءِ محفوظ ڪري ورتو آهي جنهن وقت ضرورت پوندي اسان پنهنجو حق استعمال ڪري سگهون ٿا ۽ ان لاءِ اسان کي ڪنهن کان اجازت وٺڻ جي ضرورت نه پوندي لاهور ۾ به وڏي انگ ۾ رائو انوار آهن ۽ انهن ۾ ڪڏهن هٿ وڌو ويندو. چيف جسٽس نوٽيس وٺي ۽ جي آءِ ٽي بڻائي نواز شريف چوي ٿو ته طاهرالقادري جو جلسو ناڪام ٿي ويو ۽ ان ۾ خالي ڪرسيون ئي هيون پر اصل ۾ نواز شريف خالي ڪرسين کان به ڊنل آهي. ماڊل ٽائون ۾ پريس ڪانفرنس ڪندي هن چيو ته  عوامي تحريڪ هاڻي سياسي ۽ قانوني حڪمت عملي کي ترجيح بڻايو آهي شهباز شريف سميت 14 نامزد جوابدارن کي هاڻي عدالت ۾ گهرائينداسين. هن چيو ته نواز شريف بجلي چوري ڪري جڙان واله جو جلسو ڪيو نواز شريف چوي ٿو ته طاهرالقادري جو جلسو  ناڪام ويو نواز شريف کي جلسي جون خالي ڪرسيون به ڪم ڪندي نظر اچن ٿيون ۽ ان جو خوف صحيح آهي ته هو وڃڻ وارو آهي ڪو خطرو ضرور موجود آهي جنهن ۾ نواز شريف کي طاهرالقادري نظر اچي ٿو هن چيو ته 17 جون 2014 تي رياست پاران ماڊل ٽائون ۾ شهرين جي رتوڇاڻ ڪئي وئي جڏهن ته باقر نجفي رپورٽ ۾ اها ڳالهه ثابت ٿي وئي ته پوليس پاران هڪ طرفي فائرنگ ڪئي وئي پوليس کي ماڻهو مرڻ ۽ رت وهائڻ جو ٽاسڪ ڏنو ويو هو جيڪو هن پورو ڪيو طاهرالقادري چيف جسٽس پاران مختلف واقعن تي پاڻمرادو نوٽيس وٺڻ کي سٺو قدم قرار ڏيندي چيو ته هن ملڪ جو غريب عوام ۽ ماڊل ٽائون سانحي جا متاثر چيف جسٽس ڏانهن واجهائي رهيا آهن ڪراچي وانگر لاهور ۾ به رائو انوار جو وڏو انگ موجود آهن انهن ۾ ڪڏهن هٿ وڌو ويندو چيف جسٽس کي اپيل آهي ته هو انهن رائو انوارن جي خلاف نوٽيس وٺي ۽ جي آءِ ٽي جوڙي ماڊل ٽائون سانحي ۾ 14 ماڻهن جي شهادت ۽ هڪ سئو کان وڌيڪ زخمي ڪرڻ جي واقعي جو نوتيس ورتو وڃي. سندس چوڻ هو ته قصور واقعي کانپوءِ پوليس جي سموري طاقت لڳل آهي پر پوءِ به نينگرين کي اغوا ڪيو پيو وڃي جوابدار عمران جي گرفتاري کانپوءِ به قصور ۾ هڪ ٻيو ٻارڙو اغوا ٿيو جيڪي پنجاب حڪومت جي نااهلي آهي.

 

مبينا مقابلي ۾ مارجي ويل قاري اسحاق جي وارثن طرفان به رائو انوار تي ڪيس داخل ڪرڻ جو اعلان

ڪراچي ( ويب ڊيسڪ ) شاهه لطيف ٽائون ۾ جعلي پوليس مقابلي ۾ نقيب الله محسود سان گڏ مارجي ويل قاري اسحاق جي وارثن به اڳوڻي ايس ايس پي رائو انوار خلاف عدالت ۾ وڃڻ جو اعلان ڪيو آهي. قاري اسحاق جي ڀاءُ محمد يوسف جو چوڻ آهي ته محمد اسحاق احمد پور شرقيه جي ڳوٺ حيدر پور لنگ گراوان جو رهائشي هو، ڳوٺ جي مدرسي ۾ تعليم ڏيندو هو. هن چيو ته اسحاق ميٽرڪ کانپوءِ مدنيا مدرسي بهاولپور مان حديث جي تعليم مڪمل ڪئي ۽ 1997ع کان 2000 تائين مدرسي نظاميه ۾ 10 نظامي درس پڙهايو. سندس چوڻ هو ته 11 نومبر 2016ع تي پوليس موبائيل ۽ڪارن ۾ سوار سادا ڪپڙا پهريل اهلڪارن محمد اسحاق کي مدرسي مان کڻي ويا هئا، جڏهن ته ڪجهه عرصي بعد ٻي ڀاءُ زڪريا کي به کنڀي 8 مهينن تائين قيد ڪيو ويو. ڀاءُ جو چوڻ هو ته محمد اسحاق جي گم ٿيڻ بعد امڙ به صدمي ۾ فوت ٿي چڪي آهي. هن چيو ته شاهه لطيف ٽائون پوليس جي مقابلي جي  خبر پڙهي محمد اسحاق جي سڃاڻپ ڪئي ۽ لاش وصول ڪري اباڻي ڳوٺ ۾ دفن ڪيو. اسحاق جي ڀاءُ جو چوڻ هو ته هو بيگناهه هو، رائو انوار خلاف ڪيس داخل ڪيو ويندو، جلد ڪراچي پهچي مقابلي جي انڪوائري ڪندڙ ڪميٽي ۾ بيان قلمبند ڪيو ويندو.

 

 

زندگي ۾ لڳاتار جدوجهد ڪندڙ ئي منزل ماڻيندا آهن: سعيده امتياز

لاهور(شوبز نيوز) پاڪستاني ادڪارا ۽ ماڊل سعيده امتياز چيو آهي ته ڪاميابيون ۽ ناڪاميون زندگي سان گڏ هلنديون رهنديون آهن پر زندگي ۾ اهي ئي ماڻهو منزل ماڻيندا آهن جيڪي ڏکيائين کي منهن ڏيڻ باوجود جدوجه  وسيلي اڳتي وڌندا رهندا آهن.هڪ انٽرويو ۾ ڳالهائيندي هن چيو ته مان شوبز جي دنيا ۾ آيس ته ڪيترين ئي ڏکيائين کي منهن ڏيڻو پيو پر پنهنجي جدوجهد سان اڳتي وڌندي رهيس. پاڪستاني فلمن جي حوالي سان سعيده امتياز چيو ته پاڪستان ۾ هن وقت سٺيون فلمون پروڊيوس ڪيون پيون وڃن ۽ اميد آهي ته ان جا بهتر نتيجا سامهون ايندا