تازيون خبرون

Daily Archives: January 26, 2018

فلم پدماوت کي پاڪستان ۾ رليز ڪرڻ جي اجازت ملي وئي

لاهور(شوبز نيوز) بالي ووڊ جي تڪراري فلم پدماوت کي پاڪستان ۾ رليز ڪرڻ جي اجازت ملي وئي آهي جنهن کانپوءِ ان کي سينيما گهرن ۾ رليز ڪيو ويو آهي.تفصيل مطابق سينٽرل بورڊ آف سينسرز پاڪستان بالي ووڊ فلم کي پاس ڪري ڇڏيو آهي جنهن کانپوءِ ان کي ملڪ جي سينيما گهرن ۾ نمائش جي اجازت ملي وئي، فلم کي بغير ڪنهن منظر کي سينسر ڪندي پاس ڪيو ويو آهي.پاڪستان سينسر بورڊ جي چيئرمين مبشر حسن سماجي رابطن واري ويب سائيٽ ٽوئيٽر تي ان ڳالهه جي تصديق به ڪري ڇڏي آهي. سنجي ليلا ڀنسالي جي فلم پدماوت ۾ دپيڪا پڊوڪون، رنوير سنگهه ۽ شاهد ڪپور مرڪزي  ڪردار ادا ڪيو آهي.فلم جي رليز جي موقعي تي ڀارت جي مختلف رياستن ۾ مظاهرا ڪيا ويا. ڀارتي انتهاپسندن جي ڌمڪين سبب ڀارتي فلم سينسر بورڊ ان جو نالو تبديل ڪري پدماوت ڪري ڇڏيو جڏهن ته ڪجهه منظر به ڪڍڻ جو چيو ويو ان کان فلم جو نالو پدماوتي هو

 

”اسٽوڊنٽ آف دي ايئر 2“ جو هدايتڪار تبديل

ممبئي (شوبز نيوز) ڌرما پروڊڪشن جي بينر هيٺ تيار ٿيندڙ فلم ”اسٽوڊنٽ آف دي ايئر 2“ جون هدايتون هاڻي ڪرن جوهر بدران پنيت ملهوترا ڏيندو. فلم ”اسٽوڊنٽ آف دي ايئر 2“ ڪرن جوهر جي 2012ع جي فلم جو سيڪوئل آهي جنهن ۾ عاليا ڀٽ، ورون ڌون ۽ سڌارٿ ملهوترا ڊيبيو ڪيو هو. هن ڀيري فلم جي سيڪوئل ۾ مرڪزي ڪردار ۾ جيڪي شروف جو پُٽ ٽائگر شروف جلوا ڏيکاريندو جنهن سان گڏ ٻه اداڪارائون هونديون، جڏهن ته 2012ع جي فلم ۾ ٻه اداڪار ۽ هڪ اداڪارا هئي. گذريل رات فلمساز ڪرن جوهر پنهنجي هڪ ٽوئٽ ۾ فلم ”اسٽوڊنٽ آف دي ايئر 2“ جو نئون پوسٽر مداحن سان شيئر ڪيو ۽ فلم جي نمائش جي تاريخ جو اعلان ڪيو. هن ٻُڌايو ته فلم ”اسٽوڊنٽ آف دي ايئر 2“ هلندڙ سال 23 نومبر تي ريليز ٿيندي جڏهن ته ٻه مرڪزي ڪردار ادا ڪندڙ اداڪارائن جي نالن جو اعلان ايندڙ مهيني ڪيو ويندو. گڏ ئي ڪرن جوهر ٻُڌايو ته هن ڀيري فلم جون هدايتون پنيت ملهوترا ڏيندو، جنهن سان خبر پئي ٿي ته ڪرن جوهر هن ڀيري رڳو پروڊيوسر طور فلم سان ڳنڍيل رهندو.

 

پاڪستان جي پهرين ڪاميابي، نيوزيلينڊ کي ٻي ٽي 20 ۾ 48 رنسن تان شڪست

آڪلينڊ ( اسپورٽس نيوز ) پاڪستان ٻي ٽي 20 ميچ ۾ نيوزيليند کي 48 رنسن تان شڪست ڏئي ڇڏي. پاڪستان ڪرڪيٽ ٽيم پهريون بيٽنگ شروع ڪئي ته اوپنر فخر زمان ۽ سيلفي ڪنگ احمد شهزاد زبردست بيٽنگ جو مظاهرو ڪندي ڪيوي بالرن تي چوڪن ۽ ڇڪن جي برسات ڪري ڏني. اوپنرن 94 رنسن جي ڀائيواري ڪئي جنهن بعد احمد شهزاد 34 بالن تي 44 رنسون ٺاهي آئوٽ ٿي ويو. فخر زمان 28 بالن تي ففٽي مڪمل ڪري پويلين موٽي ويو. بابر اعظم ۽ ڪپتان سرفراز احمد پڻ تيز رفتاريءَ سان بيٽنگ جو سلسلو جاري رکيو. ڪپتان سرفراز احمد 24 بالن تي ٽن ڇڪن ۽ ٻن چوڪن جي مدد سان 41 رنسون ٺاهي موٽيو، جڏهن ته بابر اعظم  29 بالن تي 50 مڪمل ڪئي ۽ ناٽ آئوٽ رهيو. اهڙي نموني 202 رنسن جو ٽارگيٽ حاصل ڪرڻ جي ڪوششن ۾ نيوزيليند جي سموري ٽيم 153 رنسن تي آل آئوٽ ٿي وئي.  پاڪستان طرفان فهيم اشرف 3، محمد عامر ۽ شاداب خان 2، 2 جڏهن ته رومان رئيس هڪ وڪيٽ حاصل ڪئي. پاڪستان ميچ ۾ ڪاميابي حاصل ڪرڻ سان گڏ ٽن ميچن جي سيريز هڪ هڪ تان برابر ڪري ڇڏي آهي.

 

افغانستان نيوزيلنڊ کي هارائي انڊر نائنٽين ورلڊ ڪپ جي سيمي فائنل ۾ پهچي ويو

ڪرائسٽ چرچ(اسپورٽس نيوز) آءِ سي سي انڊر 19 ورلڊ ڪرڪيٽ ڪپ جي ڪوارٽر فائنل ۾ افغانستان ميزبان نيوزيلينڊ کي 202 رنسن تان شڪست ڏئي سيمي فائنل لاءِ ڪواليفاءِ ڪري ورتو آهي.هيگلي اوول ڪرڪيٽ گرائونڊ ۾ افغانستان ٽاس کٽي پهريان بئٽنگ ڪرڻ جو فيصلو ڪيو ۽ مقرر 50 اوورن ۾ 6 وڪيٽن جي نقصان تي 309 رنسون ٺاهيون افغانستان جي 4 بئٽسمينن ففٽيون اسڪور ڪيون، رحمت الله گورباز 69، ابراهيم زردان 68، عظمت الله عمرزئي 23 بالن تي 66 رنسون ٺاهي آئوٽ ٿيا، جڏهن ته بهير شاهه 67 رنسون ٺاهيون ۽ آئوٽ نه ٿيو. بعد ۾ جوابي اننگز ۾ نيوزيلينڊ جي پوري ٽيم 29 هين اوور ۾ 107 رنسن تي آئوٽ ٿي وئي.سيمي فائنل ۾ سومر 29 جنوري تي افغانستان جو مقابلو آسٽريليا سان ٿيندو. پاڪستان پهريان ئي سيمي فائنل لاءِ ڪواليفاءِ ڪري چڪو آهي، جتي ان جو مقابلو اڱاري 30 جنوري تي ڀارت يا بنگلاديش سان ٿيندو.

 

ٽرمپ ، ٽيسٽ ۽ “فائر اينڊ فيوري ” : شفيق الرحمان شاڪر

آمريڪي صدر ڊونالڊ ٽرمپ جي مقبوليت ۾ وڌيڪ گھٽتائي اچي ويئي آهي.تازي سروي مطابق هن جي مقبوليت گھٽجي صرف 37 سيڪڙو رهجي ويئي آهي. ٽرمپ جي مقبوليت متعلق اها تازي سروي ٽيليفون ذريعي ڪئي ويئي آهي جنهن ۾ پندرهن سو ماڻهن جي راء معلوم ڪئي ويئي. امريڪي ميگزين “نيوز ويڪ” مطابق عهدي جي مدي جي ٻئي سال ٽرمپ کي هن وقت تائين جو سڀني کان گھٽ مقبوليت ماڻيندڙ صدر قرار ڏنو ويو آهي.

ان کانسواء وائيٽ هائوس جي نائب پريس سيڪريٽري هوگن گڊلي چيو آهي ته امريڪي صدرٽرمپ جي طبي معائني ڪرائڻ جي خبر درست آهي پر ان ۾ دماغي معائنو شامل ناهي. غيرملڪي اخباري اطلاع مطابق  وائيٽ هائوس ۾ هڪ امريڪي اخبار سان ڳالهائيندي هن جو چوڻ هو ته ميڊيا ۾ صدر ٽرمپ جي دماغي توازن خراب هئڻ بابت پروپيگنڊا ڪئي پيئي وڃي جڏهن ته صدر ذهين ۽ فوري فيصلي جي صلاحيت جو مالڪ آهي. هوگن گڊلي نفسيات جي ماهرن تي تنقيد ڪندي چيو ته  جيڪي ڊاڪٽر ٽرمپ جي ذهني ڪيفيت کان واقف ئي ڪونهن ۽ نه ئي ڪڏهن هن سان مليا آهن انهن کي اهڙن بيانن کان پاسو ڪرڻ گھرجي. وائيٽ هائوس جو چوڻ آهي ته صدر ٽرمپ کي ذهني بيماري “ڊيمينشيا” لڳل ناهي ۽ هو ثابت ڪندا ته سندن صدر ذهني مريض ناهي.

واضح رهي ته والاريل بيت المقدس جي باري ۾ 6 ڊسمبر 2017ع تي ڪيل پنهنجي تقرير ۾ ٽرمپ لفظن جي صحيح ادائيگي نه ڪري سگھيو هو ۽ تقرير جي آخر ۾ هو  “ يونائيٽيد اسٽيٽس” کي       “ يونائيٽيڊ اشٽيٽس” چئي ويو هو.لفظن جي مناسب نموني ادائيگي نه ڪري سگھڻ سبب ٽرمپ کي ذهني بيماري “ڊيميشيا ” يا “الزائيمر” ۾ مبتلا هئڻ جا شڪ ظاهر ڪيا ويا هئا.ان حوالي سان وائيٽ هائوس جو چوڻ آهي ته ٽرمپ جلد ئي طبي معائنو ڪرائيندو ۽ ثابت ڪندو ته هو چريو ناهي. “ڊيلي ميل” مطابق وائيٽ هائوس جي پريس سيڪريٽري سارا سينڊرز صحافين کي ٻڌايو ته صدر ٽرمپ جي ذهني صحت جي باري ۾ عجيب قسم جا سوال اٿاريا ويا پر حقيقت اها آهي جو صدر جي نڙي سڪل هئي  ۽ ٻيو ڪجھه به نه هو.هن وڌيڪ ٻڌايو ته ٽرمپ جو طبي معائنو والٽر ريڊ نيشنل ملٽري ميڊيڪل سينٽر ۾ ٿيندو جنهن جي رپورٽ ڊاڪٽر جاري ڪندا.

واضح رهي ته ان کان اڳ ويجھڙائيء ۾ ئي ٽرمپ برطانوي وزيراعظم ٿريسا مي سمجھندي ان جي ئي هم نالي عورت کي ٽئيٽ ڪري پنهن جو پاڻ کي مصيبت ۾ وجھي چڪو آهي. هر وقت پنهنجو پاڻ کي اجاين تڪرارن ۽ فسادن ۾ ڦاسائيندڙ هن مسخري يا چريي امريڪي صدر لاء هڪ وڏي مصيبت تڏهن نازل ٿي پيئي جڏهن هن جو صرف صدارت جو هڪ سال مڪمل ٿيڻ تي صحافي مائيڪل وولف جي ڪتاب “ فائر اينڊ فيوري” جا ٽرمپ جي شخصيت ۽ صدارت جي باري ۾ خوفناڪ راز کولي وڌا.ٽرمپ صحافيء جي انهن سمورن انڪشافن کي ڪوڙ جو ڍير قرار ڏنو آهي.پنهن جي هڪ ٽويٽ ۾ ٽرمپ فرمائي ٿو ته “هن (صحافي) کي ڪڏهن به وائيٽ هائوس تائين پهچ ئي نه رهي آهي بلڪه هن کي ڪيترائي دفعا ڌڪا ڏيئي وائيٽ هائوس مان ٻاهر ڪڍيو ويو.مون هن سان ان ڪتاب جي باري ۾ ڪڏهن ڳالهايو ئي ناهي.جيڪو ڪتاب ڪوڙن ۽غلط ترجمانين  سان ٽمٽار  آهي ۽ جنهن جي ڏنل حوالن جو وجود ئي ڪونهي.ان ڇوري جي ماضيء ڏانهن نهاريو ۽ ڏسجو ته ان سان ڪهڙو سلوڪ ٿئي ٿو!“

هيء ڪتاب هن مهيني کان وڪري هيٺ اچي رهيو آهي ۽ ايمازون جي ويب سائيٽ تي ان جي وڪري لاء اڳواٽ آرڊر بڪ ڪيا پيا وڃن جنهن جي بنياد تي هن ڪتاب کي “بيسٽ سيلر” ڪتاب قرار ڏنو پيو وڃي.ٻئي طرف ٽرمپ انتظاميا ان ڪتاب تي بندش لڳائڻ تي غور ڪري رهي آهي ۽ ٽرمپ ڪتاب جي مصنف خلاف هتڪ عزت جي دعويٰ داخل ڪرڻ لاء صلاح مشورا شروع ڪري ڏنا آهن.تنقيد ڪندڙن ڪتاب ۾ بيان ڪيل انڪشافن کي صدر ٽرمپ لاء ڌماڪاخيز قرار ڏنو آهي. مائيڪل وولف امريڪي صدر جي باري ۾ پنهنجن انڪشافن ۾ چيو آهي ته ٽرمپ پنهنجن ملازمن سان رڙيون ۽ گوڙ ڪندو آهي.هڪ ئي وقت ٽي ٽي ٽي وي ڏسندو آهي ۽ پنهنجي ذاتي شين تي ٻئي ڪنهن کي هث به لائڻ نه ڏيندو آهي.جڏهن ته هن کي خوف آهي ته ڪو هن جي ٽوٿ برش کي زهر لڳائي ڇڏيندو.  ٽرمپ جي اسٽريٽجيڪ ايڊوائيزر اسٽينو بينن چيو هو ته صدر ٽرمپ جي پٽ ٽرمپ ٽاور ۾ روسي آفيسرن سان ملاقات ڪئي هئي جنهن کي بينن غداري ۽ بيوفائيء سان ڀيٽيو هو. ڪتاب ۾ اهو به چيو ويو آهي ته ٽرمپ جو پٽ ڊون جونيئر روسين آڏو هڪ بيضي وانگر ڦاٽي پيو ۽ انهن کي ڪيترائي راز ٻڌائي ويٺو.ٽرمپ کي امريڪي آئين متعلق تمام ٿوري ڄاڻ هئي ۽ ڪيترن ئي ٻين ماڻهن هن کي امريڪي آئين جي بنيادي ڳالهين جي باري ۾ معلومات ڏني. ڊونلڊ ٽرمپ صدر بنجڻ جي اميد نه رکندو هو ۽ هن جي فتح تي سندس ٻي زال ميلانيا رني هئي پر اهي خوشيء جا لڙڪ نه هئا.ٽرمپ ۽ ميلانيا پنهنجي بيڊروم ۾ جدا جدا سمهندا آهن ٽرمپ ڳجھن ادارن جي مشورن جي ابتڙ پنهنجي سمهڻ واري ڪمري جو دروازو اندران لاڪ ڪري سمهندو آهي.هو روزانو شام جو ساڍي ڇهين وڳين پنهنجي بستري تي ئي ويهي پنير برگر کائيندو آهي. ارب پتي ٽام پيريگ صدر ٽرمپ کي پاڳل ۽ بيوقوف چئي سڏيندو آهي جڏهن ته رابرٽ مرڊوخ ٽرمپ کي جاهل سڏيندو آهي. ٽرمپ پنهنجن دوستن جي زالن تي نظر رکندو آهي ۽ انهن جي باري ۾ سندن مڙسن سامهون گندا لفظ چوندو آهي.ٽرمپ جي هڪ معاون چيو ته هو ضروري ڪاغذ به نه پڙهندو آهي. ٽرمپ ضد ۾ اچي ترت ٽويٽ جو جواب ڏيندو آهي.پنهنجا ٽويٽ پاڻ لکندو آهي.ٽرمپ پنهنجن ملازمن ۽ نوڪرن سان اڪثر جھيڙو جھڳڙو ۽ رڙيون ڪندو رهندو آهي ۽ انهن کي گندا لفظ به چوندو آهي.

تازو ئي ڪنهن شاندار دعوت ۾ ٽرمپ پنهنجن پراڻن دوستن کي سڃاڻن کان انڪار ڪري ڇڏيو هو ۽ ڪڏهن ڪڏهن هو ڏهن منٽن ۾ ساڳي ڳالهه ٽي ٽي ڀيرا ورجائيندو آهي . پنهنجي اسٽاف جي باري ۾ امريڪي صدر جا تاثرات ڪجھه هن طرح جا آهن. بينن ڪنهن ڪم جو ناهي،پريبيسٽن  بونو آهي ۽ ڪيليان سارو ڏينهن منهن سڄايو روئندي وتي. ان کان سواء هي رنگيلو صدر پنهن جي عملي کي غائب دماغ، بي وقوف، جاهل، نااهل، مايوس ڪندڙ، بيڪار، سست، ڪاهل جي عظيم لقبن کانسواء هن وقت تائين بيشمار گارين سان به نوازي چڪو آهي.ٻئي طرف ٽرمپ جي ڌيء ايوانڪا پنهن جي پيء جي وارن جي اسٽائيل جو مذاق اڏائيندي رهندي آهي.

 

 

سنڌ تي حڪمراني ڪندڙن وٽ ڌرتي ڌڻين جو قدر ڪونهي: درياءُ خان جهتيال / دادو

سنڌ ۾ ڏينهون ڏينهن غربت ۽ بدامني جو راڄ قائم ٿيندو پيو وڃي، سنڌ جي هر ننڍي وڏي شهر ۾ قتل جو وارڌاتون، تشدد جا واقعا، اغوا انڊسٽري جو بحال هجڻ ۽ پوليس جي وردي اندر لڪيل قاتل ماڻهو بدامني جو وڏي ۾ وڏ سبب بڻيل آهن، سنڌ ۾ جتي پوليس کي ڏوهہ روڪڻ جا اختيار آهن اتي پوليس عام ماڻهو کي زبردستي ڏوهاري ڪري ماري ڇڏي ٿي، سنڌ جي عورت کي جتي مان ڏيڻو آهي اتي ان عورت کي تشدد جو نشانو بڻايو وڃي ٿو، ان عورت کي گوليون هڻي ماريو وڃي ٿو،. سنڌ ۾ جتي سچ چيو وڃي ٿو يا سچ جو ساٿ ڏيڻو پوي ٿو اتي ان ماڻهو کي قتل ڪرڻ بہ آسان بڻجي ويو آهي ۽ وري ان باثر لاءِ قانون خاموش تماشائي بڻيل آهن، سنڌ جا پڙهيل لکيل بيروزگار پاڻ ساڙڻ ۽ پاڻ مارڻ تي مجبور ٿي ويا آهن، ڇو جو هنن لاءِ سنڌ حڪومت وٽ روزگار ناهي، ٻيو تہ جتي اغوا وڏو واقعو سڏيو ويندو هو پر اڄ اِتي هر آءِ ڏينهن ٻار، نوجوانن، مصومن جي اغوا ٿيڻ جون خبرون اخبارن ۾ پڙهون ٿا، ان جو وڏي ۾ وڏو سبب ڪمزو قانون ۽ سنڌ جي دردن کان لا تعلق بڻيل سنڌ جا حڪمران آهن، اهي سمورا واقعا، اهو سڀ ڪجهہ سنڌ ۾ ٿي رهيو آهي، سنڌ جو نالو روايتن کان امن، پيار ۽ ڀائيڇاري جي نالي سان سڃاتو وڃي ٿو، پر هن ڌرتي جي اڀاڳ کي ڪنهن نڀاڳي جي نظر لڳي وئي آهي، جنهن جا پيرا سنڌ حڪومت ڏانهن وڃن ٿا، ان ڳالهہ کي رد نٿو ڪري سگهجي تہ ڪنهن بہ صوبي، ملڪ جي امن امان جي ذميوار اتان جي حڪومت هوندي آهي، پر سنڌ جا حڪمران سنڌ جي دردن، سورن، امن امان جي معاملن، وڏي ۾ وڏي ڏوهن جهڙوڪ قتل، اغوا، عورتن تي تشدد وارن واقعن کان تمام گهڻو پري بيٺل آهن، ان جو سبب ڇا آهي؟

اهو تہ حڪومت اهي پڪو پهہ ڪري ڇڏيو آهي تہ اسانکي صرف حڪومت ڪرڻي آهي جيڪا اسيمبلين تائين محدود هوندي، جيڪا صرف اعلانن تائين محدود هوندي، جنهن ۾ صرف پنهنجا نوازي وارا بل اسيمبلين مان پاس ڪرايا ويندا!، ها ايئن بلڪل ٿي رهيو آهي، امن جي هن ڌرتي تي حڪمراني ڪندڙ سنڌ جا حڪمران ڌرتي ڌڻين جي دردن کي پرکڻ نٿا چاهن، انهن جي دردن کي مرهم نٿا هڻڻ چاهن، انهن جي آهہ نٿا ٻڌن، جيڪي هن ڌرتي تي نڌڻڪا بڻجي مارجي رهيا آهن، جيڪا انصاف لاءِ دانهون ڪري رهيا آهن، ڌرتي جون ناريون تشدد جو شڪار ٿي رهيون آهن، ايئن لڳي رهيو آهي تہ ڄڻ هن ڌرتي تي ڏاڍ ۽ ڏمر جا حڪمران ويٺل هجن، جيڪي امن امان کي بحال تہ نٿا ڪن پر امن جي پکين جا دشمن هجن، جيڪي سنڌ ڌرتي جي ماڻهن جي انهجن کان واقف ئي نہ هجن، هنن ڏينهن ۾ سنڌ کي ڏسجي تہ سنڌ اهڙن عذابن مان گذري رهي آهي جنهن سان آسمان ۾ بہ جهير پئجي رهيا آهن، تازو سجاول ڀرسان ٻيلو ٿاڻي جي حد ۾ ڳوٺ گل محمد سوڍو جي رهواسڻ شهناز سوڍو کي سندس ئي مڙس ماني دير پچائڻ تان گوليون هڻي قتل ڪري ڇڏيو، ان شادي شده عورت جو پيءُ انصاف لاءِ دانهون ڪري رهيو آهي، پر ان کي انصاف نٿو ملي، انصاف ملي بہ تہ ڪيئن، پوليس جا هٿ تہ قاتل کي پڪڙڻن لاءِ وڌن ئي نٿا، جڏهن وڌندا تڏهن تہ قاتل گرفتار ٿيندو، عورت تي تشدد جو هڪ ٻيو واقعو صالح پٽ ۾ پيش آيو، اهو واقعو انساني سوز واقعو هو، صالح پٽ شهر ۾ هڪ وحشي درندي جوابدار هڪ گهر ۾ گهڙي چئن ٻچڙن جي جيجل ماءُ نظيران ڀٽي سان ڏاڍاي جي ڪوشش ڪئي ۽ بعد ۾ ان مٿان پيٽرول هاري ان کي باهہ ڏئي ڇڏي، اها عورت ڪجهہ ڏينهن بعد تڙپي تڙپي فوت ٿي وئي، ان واقعي ۾ هڪ وحشي جوابدار معصومن کان جيجل امڙ کسي ڇڏي، جوابدار گرفتار تہ پهرين ڏينهن ٿيو پر قانون 20 ڏينهن ۾ هن کي ڪا بہ سزا ناهي ڏئي سگهيو، ان عورت جو ڪهڙو ڏوهہ هو جو هن کي ساڙي ماريو ويو پر وحشي جوابدار کي نرم قانون ڪا سزا ڏئي ناهي سگهيو،

هڪ واقعو سانگهڙ ضلعي جي شهر پيرو مل ۾ پيش آيو، پيرو مل ۾ غريب عورت شريمتي گلي ڊاٽسن واري کي گهر ٻاهران ڊاٽسن نہ بيهارڻ جو چيو جنهن تان انسانيت جا ليڪا لتاڙيندي جوابدار ان عورت مٿان ڊاٽس چاڙهي ان کي چيڀاٽي ماري ڇڏيو، اهو بہ قاتل گرفتار ٿيو پر ان کي سزا اڃا نہ ملي سگهي آهي، پر اڃا بہ وارثن تي ٺاهہ لاءِ دٻاءُ وڌو پيو وڃي، جنهن جي پوليس کي بہ ڄاڻ آهي، پوليس ان ڳالهہ تي بہ خاموش آهي، سنڌ ۾ عورتن سان ٿيل هي ظلم جا تازا واقعا آهن،بدامني جا بہ مثال سنڌ ۾ قائم ٿيا آهن،سنڌ ۾ تازو قتل جا واقعا ٿيا آهن، مٺي جي ٻن هندو واپاري ڀائرن دليپ ۽ چندر مهيشوري کي ڦر دوران قتل ڪيو ويو، ايڏي وڏي ڪيس ۾ گرفتار ٿيل جوابدارن کي نہ ظاهر ڪيو ويو، نہ عدالت ۾ پيش ڪيو ويو، صرف گرفتاري جي ڪوڙي دعوا ڪري شهرين کي چپ ڪرايو ويو، انهن جا وارثن اڃا انصاف جا منتظر آهن، ميهڙ شهر ۾ ڏينهن ڏٺي جو مختيار چانڊيو، ڪرم الله چانڊيو، قابل چانڊيو کي پنهنجي ئي اوطاق ٻاهران قاتلن گوليون هڻي ماري ڇڏيو،ان وقعي جو ڪيس داخل ٿي ويو پر 12 ڏينهن کان قاتل آزاد آهن، اهڙي واقعي خلاف سڄي سنڌ ۾ احتجاج جاري آهن پر جوابدارن خلاف قانون ڪاروائي نٿو ڪري، بهانو”جاچ”جو ڪيو ويو آهي، وارهہ شهر ۾ بہ ڦر دوران سفير چنا ۽ شبير چنا کي هٿياربندن گولين جي بک بڻايو، انهن جا قاتل اڃا گرفتار نہ ٿيا، انهن جا وارث ۽ شهري قاتلن جي گرفتاري لاءِ روڊن تي انصاف جون دانهون ڪري رهيا آهن، ميهڙ شهر ۾ هڪ وقت ٽن قتلن ٿيڻ بعد چوٿون قتل آرا مشين جي مالڪ جو ٿيو،آرا مشين جو مالڪ عطا الله تيوڻو پنهنجي مشين تي ستل هو تہ هٿياربند کيس قتل ڪري ويا، انهن جا وراث بہ احتجاج ڪري انصاف لاءِ دانهون ڪري رهيا آهن،

پوليس جي ڪوڙن مقابلن بہ انسانن کي بيدردي سان مارڻ ۾ پاڻ مڃايو آهي، حيدرآباد پوليس هڪ پورهيت ڌرمون ڪولهي کي تشدد ڪري ماريو، ان کي ان ڏوهہ ۾ گرفتار ڪيو ويو جو هڻ تي موبائيل چوري جو الزام هو، گهوٽڪي پوليس رزاق لاڙڪ کي قتل ڪري ڇڏيو، ان کي چوري جي شڪ ۾ گرفتار ڪيو ويو هو، ملير پوليس هڪ پٺاڻ نوجوان کي دهشتگرد ڄاڻائي قتل ڪري ڇڏيو، اهي سنڌ پوليس جا تازا ڪلور آهن،ٺل مان 10 سال اڳ اغوا ٿيل فضيلا سرڪي، ميهڙ مان 5 سال اڳ  اغوا ٿيل ڪاشف ۽ سندس سوٽ ڪامران پنهور، نئون ديرو مان 2 سال اڳ اغوا ٿيل ساحل ڪوريجو، ڦل مان 7 سال اڳ پوليس هٿان کنڀيل عمران جوکيو، ڄامشورو مان 5 سال اڳ اغوا ٿيل موهن ميگهواڙ اڃا بازياب نہ ٿيا، سنڌ جا نوجوان بيروزگاري سبب پاڻ ساڙي ماري رهيا آهن، تازو لاڙڪاڻو ۾ 2 واعا پيش آيا، /ڏسو صفحو 3 بقايا نمبر 02

هڪ نوجوان پگهارون  نہ ملڻ ڪري پڻ ساڙيو، ٻئي نوجوان ٻڄن جي بُک کي برداشت نہ ڪندي بيروزگاري کان تنگ اچي پاڻ ساڙيو، دادو شگر ملز پيارو ڳوٺ جا برطرف ملازم مسلسل غربت سبب ڪمزور جسم هئڻ باوجود انصاف لاءِ دانهون ڪري رهيا آهن، امن جي ڌرتي ڀيانڪ ماڻهن کي ڊڄڻ لڳي آهي، ان جو سبب اهو ناهي تہ اهي ماڻهو ڪي ٻاهران آيل آهن جيڪي سنڌ جي ماڻهن جا دشمن آهن پر اهي ماڻهو سنڌ جا آهن جيڪي قانون کان ڊڄن نٿا، جيڪي هن ڌرتي ناسور آهن، جن کي روڪڻ، پڪڙڻ شايد پوليس ۽ سنڌ حڪومت جي وس ۾ ناهي!هن ڌرتي کي نڀاڳي حڪومت نڌڻڪو ڪري ڇڏيو آهي،حڪومت ڪنهن جا بہ سور،دانهون ڪندڙن جا درد نٿي ڏسي، بس ڏسي ٿي پاڻ پڏائڻ، پنهنجي لاءِ هر حوالي سان سهولتون ڪرڻ!هن ڌرتي کي امن جي ڌرتي ڪرڻ لاءِ سڀ سنڌي گڏ ٿين،جدوجهد ڪري پنهنجا حق وٺن جنهن جو اهم ذريعو سنڌ جي ماڻهن جو ووٽ آهي.

 

ڀارت جون جاسوسي ڪارروائيون ۽ ڪلڀوشن يادوڪيس : ليکڪ: صدام شاهه

جاسوسي فوجي تاريخ ۾ هميشھ جنگ جو هڪ لازمي ۽ غير اخلاقي حصو رهيو آهي، جڏهن ته ان جو طريقيڪار سڪيورٽي جنگ ۽ سياست جي متحرڪ نوعيت سان گڏوگڏ پکڙجي رهيو آهي. دنيا انسانيت جي لاءِ اٿندڙ آوازن سان ڀريل آهي،ان ۾ جاسوسي جو نظام جيڪو عام ماڻهن جو قتل عام جي پٺڀرائي ڪري ٿو ته اهو گهڻو تڪراري ۽ ضدي لڳندو آهي.

جڏهن ته پاڪستان ڀارت جي خلاف اسٽرٽيجڪ مزاحمت  طور تي ڪامياب ايٽمي تجربا ڪري طاقت جو توازن برقرار رکڻ ۾ ڪامياب ٿي ويو ته ڀارت جي لاءِ پنهنجي برتري برقرار رکڻ جو واحد رستو هي بچيو آهي ته هو عسڪري طاقت جي علاوه تمام شعبن ۾ پنهنجي مخالف جي اسٽرٽيجڪ استحڪام جو مقابلو ڪرڻ لاءِ عدم استحڪام جي حوصلا افزائي سان هڪ هائبرڊ جنگ جاري رکي ۽ روايتي جنگ يا پيش بندي جوهري حملن جي بغير دشمن کي شڪست ڏيڻ جي ڪوشش ڪري.

غير ملڪي حمايت يافته غير رياستي ۽ رياستي عنصرن جي نتيجي ۾ هزارين پاڪستاني شهرين ۽ فوجين جون جانيون ضايع ٿي چڪيون آهن. جنهن ۾ ڪيترائي سياستدان ۽ حڪمران پڻ شامل آهن، ڪراچي جيڪو  سڀ کان وڌيڪ آبادي وارو شهر ۽ قومي اقتصادي مرڪز آهي، بدترين ڇڪتاڻ جو شڪار آهي، جڏهن ته بلوچستان جي مسئلن کي حل ڪرڻ لاءِ سياسي بي اعتباري جي ڪري صرف ماڻهن ۾ احساس محرومي پيدا ٿي آهي ۽ انهن ۾ ڪاوڙ جي لهر جو سبب به بڻيو ۽ ان سان گڏوگڏ کليل غير محفوظ سرحد آهي. جيڪا ان جي مفيد جاگرافيائي حيثيت جي ڪري ان کي پراڪسڪي زمين جي طور تي استعمال ڪئي وڃي ٿي. جيڪڏهن  پاڪستان جو هر شهري ان صورتحال کان اڻڄاڻ رهيو آهي. پر ڪراچي ۽ بلوچستان هڪ ٻئي سان شڪايتون ۽ نمايان نسلي، فرقيواراڻين ۽ سياسي ڇڪتاڻ جي وجهه سان سڀ کان وڌيڪ ڪمزور حدف رهيا آهن.

دهشتگردي جا سياسي مقصد مختلف ٿي سگهن ٿا پر ان جو مقصد عوام کي دهشت زده ڪرڻ آهي. مسلسل بم ڌماڪن سان ماڻهن ۾ سلامتي ادارن جي نااهلي جي باري ۾ وڌيڪ خدشن کي واضع طور تي هٿي ملي ٿي ۽ ان سان گڏوگڏ رياستي نظمي خاميون جي وجهه سان پيل عدم اطمينان جي کوٽ جي سبب ڪري بي يقيني جي شدت ۾ تيزي سان اضافو ٿيندو آهي. ان جي باوجود هن وقت تائين مختلف آپريشن ۾ زبردست ڪاميابيون مليون آهن. پراڃا تائين خطري کي ختم ڪرڻ ۾ ڪاميابي حاصل نه ٿي سگهي آهي جڏهن ته پاڪستان ان نوعيت جو واحد ڪيس ناهي.

پاڪستان جي طرفان هڪ سزا يافته هندوستاني بحريه جي حاضر سروس آفيسر جي انساني بنياد تي پنهنجي گهرواري ۽ امڙ سان ڪرايل ملاقات هندستاني ذريعن موجب ڳڻتي جوڳي ڪيفيت پيدا ڪرڻ ۽ ان جي پروپيگنڊا جو مقابلو ڪرڻ جو هڪ موقعو هيو ته پاڪستاني ميڊيا طرفان ان جو جواب ڏنو ويو آهي، جيڪو عسڪري ۽ سفارتي محاذ تي هڪ ٻئي کي گهٽ ڪرڻ جو اعتراف معلوم ٿيندو آهي.

پاڪستان ۽ هندوستان جي وچ ۾ جاري ٻٽي ڪارپوريٽ ميڊيا جي جنگ جنهن ۾ سياستدانن جي بيان بازي سان گڏ سياسي مفادن جو به ٽهڪڙو آهي. پرتازن ويڊيو بيانن ۾ جنهن طرح سزا يافته ايجنٽ ڀارت ۽ پاڪستان جي حڪومت جو شڪرگذار ادا ڪندي ان ملاقات جي باري ۾ ڳالهه ٻول ڪئي اهو ڪهاڻي جو هڪ الڳ رخ بيان ڪري ٿو. جيڪو پاڪستان جي موقف جي واضع حمايت ڪري ٿو پر پاڙيسري ملڪن جي وچ ۾ لاڳاپن ۾ خرابي به ظاهر ڪري ٿو، جيڪا ڳالهه يا بيڪ چينل سفارتڪاري جي لاٰءِ اشارو ٿي سگهي ٿو.

2013ع ۾ پاڪ چين اقتصادي راهداري جي شروعات ٿي ۽ ان سال ئي يادو کي هڪ ڳجهي مشن لاءِ چونڊيو ويو، ان کي چابهار جي ايراني سامونڊي شهر ۾ مقرر ڪيوويو. جتي هو اصل پاسپورٽ تي جعلي مسلم نالي سان رهي رهيو هو ۽ گذريل هڪ ڏهاڪي کان پنهنجو نام نهاد ڪاروبار هلائي رهيو هو جهڙي ريت اسلام آباد مان هڪ جاري ڪيل ويڊيو بيان ۾ هن اعتراف ڪيو.. جنهن کي عوامي سطح تي نشر ڪيوويو. جڏهن ته ڀارت چابهار بندرگاهه ۾ 20 ارب ڊالر سرماياڪاري ڪئي آهي. هن سال ڀارتي وزيراعظم نريندر مودي تقرير ۾ زباني طور تي بلوچستان ۾ بغاوت جي حمايت ڪئي ۽ هن ئي سال ڀارت سيپيڪ بابت خدشن جو اظهار ڪيو . هي تمام واقعا هڪ ٻئي سان جڙيل آهن، جن جو گهرو تجزيو ڪري سگهجي ٿو ۽ ممڪن طور تي اميد ڪئي ويندي هئي ته سي پيڪ جي اهڙي اهم قدم مان پهرين ان کي مدنظر رکيووڃي.

جتي جمهوري اقتدار ۾انساني حقن تي ٻڌل آزاداڻو ٽرائل ۽ ٻيا فائدا شامل هجن، جتي ميڊيا جي به آزادي هجي جنهن تي عوامي هنڌن تي حفاظتي ادارن طرفان ڪا پابندي لاڳو نه هجي ۽ پوءِ ان تي ٿيندڙ ڀارتي تنقيد بنا جواز آهي . ايتري حد تائين جو پاڪستان طرفان يادو جي خاندان لاءِ قومي ڀارتي ۽ عالمي ميڊيا جي موجودگي ۾ پريس ڪانفرنس جي تجويز آڇي وئي جنهن کي هندستاني هاءِ ڪميشن طرفان نامنظور ڪيوويو يقينن اهو دنيا جي سڀ کان وڏي جمهوريت جي جمهوري قدم تي سوال پيدا ڪري ٿو. ايران مان جادو جي اغوا جي ڀارتي/ڏسو صفحو 3 بقايا نمبر 01

دعويٰ ٻن دوست ملڪن وچ ۾ لاڳاپن کي نشانو بڻائڻ جي ڪوشش لڳي رهيو هو جهڙي ريت ايراني سفارتخاني اظهار ڪيو ۽ جڏهن ايراني صدر روحاني اسلام آباد جو دورو ڪيو ۽ ان کانپوءِ ايران به ان معاملي جي جاچ ڪئي ۽ پاڪستان جي درخواست تي ان کي سهڪار ڏنو جنهن سان پاڪستان کي شاهديون آڻڻ ۾ مدد ملي. ٻئي ڳالهه ته جيڪڏهن اهو اغوا ٿئي ها ته ايران طرفان سخت ردعمل جي اميد ڪئي وئي پر ائين نه ٿيو.  ائين لڳي ٿو ته پاڪستان خلاف سرجيڪل اسٽرائيڪ جي ڪوڙي ڀارتي دعويٰ کي هتي پاڪستان طرفان ايران جي خلاف منسوب ڪرڻ جي ڪوشش هئي جيڪو نه مالديپ آهي ۽ نه ئي نيپال يا افغانستان ان لاءِ جڏهن ڀارت کي پنهنجي بيان جي اثر جو اندازو ٿيو ته ان کي جيش العدل سان جوڙي ڇڏيو. نئي دهلي جي الزام موجب ان تنظيم اغوا ٿيل ڀارتي شهري کي پاڪستان کي وڪرو ڪري ڏنو.

پاڪستان طرفان ملاقات جي آڇ انساني همدردي جي بنياد تي هئي يا نه ، پر اها ڳالهه قابل بحث آهي ته پر هي ڪيس  کٽڻ ٻنهي ملڪن لاءِ هڪجهڙي اهميت رکي ٿو. پاڪستان کي دنيا ۾ اها ڳالهه ثابت ڪرڻ لاءِ قانوني طور تي جواب ڏيڻ گهرجي ته ڀارت ان جي خودمختياري ۽ سرزمين تي منظم دهشتگردي جي سرگرمين جي وسيع سلسلي ۾ ملوث آهي. ٻئي پاسي ڀارت پاڪستان ۾ واضع طور تي اسپانسپرڊ دهشتگردي جي ڪارروائين خلاف تنقيد ڪنهن به قسم جي آوازن کي روڪڻ جي لاءِ پاڙيسري ملڪن کي متوجهه ڪرڻ جي ڪوشش ڪري رهيو آهي.

هندستان طرفان اهو ڪيس عالمي انصاف جي عدالت ۾ داخل ڪيو ويو. ان جي ابتڙ ڀارت ٻين جاسوسن جي معاملن کان مسلسل انڪار ڪندو رهيو آهي. پر ڪلڀوشن جي معاملي ۾ هندستان اهو اعتراف ڪيو ته هو ڀارتي بحريا فوج جو اڳوڻو آفيسر آهي جڏهن ته سندس چوڻ آهي ته ان جو ايران ۾ قانوني ڪاروبار آهي. ميڊيڪل رپورٽ موجب هڪ صحت مند عسڪري پروفيشنل طرفان ان ملاقات بعد جاري ڪيل اعترافي ويڊيو ڪا معمولي ڳالهه ناهي ۽ ڀارتي حڪومت وٽ دنيا کي ان معاملي جي شفافيت ثابت ڪرڻ جي لاءِ ٻيو ڪو به رستو نه هيو ته هو گڏيل قومن جي عدالتي اداري ۾ پنهنجي قانوني بازي کيڏي پر ان کي ڪلڀوشن ڪيس ۾ شڪست کائڻ گهڻو مهانگو پئجي سگهي ٿو. عالمي انصاف جي عدالت ۾ وڃڻ بعد ڀارت پاڻ هڪ اهڙي مسئلي ۾ ڦاسي ويو آهي جنهن مان کيس ڪنهن به قيمت ۾ ٻاهر اچڻ گهرجي. جڏهن ته پاڪستان لاءِ هي هندستاني ڳجهين پاليسين کي قانوني طور تي شڪست ڏيڻ جو هڪ موقعو آهي جيڪو پاڪستان جي اندر دهشتگردي  کي واڌارو ڏيڻ جي ڀارتي ڪوششن کي گهٽ ۾ گهٽ ڪجهه سالن تائين ڏکيو بڻائي ڇڏيندو. سڀ  کان اهم ڳالهه اها آهي ته پاڪستاني شهرين کي ڪنهن به حد تائين انهن جي رياستي ادارن تي اعتماد ۽ سڪيورٽي تي اطمينان جو سبب بڻجندو.

جهڙي ريت پاڪستان جي پرڏيهي  وزارت پريس ڪانفرنس ۾ تصديق ڪئي آهي ته اها سندس خاندان سان آخري ملاقات نه هئي ۽ قونصل خاني واري پهچ جيڪا اڃا تائين ناهي ڏني وئي ان جي ڏيڻ جو به امڪان ناهي ۽ نه ئي هو قانوني طور تي ان ڳالهه لاءِ پابند آهن جهڙي ريت پاڪستان طرفان عالمي انصاف جي عدالت ۾ چيو ويو. پر اهڙو ان صورت ۾ ممڪن آهي جڏهن هندستان ڪيس جي جاچ ۾ تعاون جي  لاءِ اتفاق ڪري جنهن تي انهن ڪيس جي ٻڌڻي ۾ اتفاق نه ڪيو. جڏهن ته ڪجهه شرطن تي رحمدلي جو حل به موجود آهي . ان سان اهو اشارو ملي ٿو ته پاڪستان ۽ ڀارت وٽ اڃا تائين ٻيا اختيار موجود آهن پر اهم اختيار اهو بچي ٿو ته ٻئي ملڪ انصاف جي عالمي عدالت ۾ قانوني طور تي اهو ڪيس وڙهن ۽ اهو پاڪستان جي حق ۾ وڃي سگهي ٿو. جيڪڏهن هو اطمينان بخش دليلن سان گڏ ٺوس ثبوت فراهم ڪري جيڪي پاڪستان کي لازمي ڪرڻ گهرجن.

اهو معاملو هڪ رياست جي اندر ڳجهين ڪارروائين  ۾ ملوث هڪ شخص کي ڦاهي ڏيڻ جوناهي جهڙي ريت اعتراف ڪيو ويو آهي ته اهو ثابت ڪرڻ جي باري ۾ آهن ته ڀارت نه صرف پاڪستان ۾ مالي طور تي منظم دهشتگردن حملن جي حمايت ڪرڻ بلڪه ان لاءِ بنيادي افرادي وسيلا پڻ فراهم ڪري ٿو.

 

سنڌ ڪابينا به ڪمند جي اگهه جومسئلو نبيري نه سگهي…!

گذريل ڏينهن وزير اعليٰ هائوس ۾  وڏي وزير سيد مراد علي شاهه جي صدارت هيٺ  سنڌ ڪابينا جو اجلاس  ٿيو جنهن ۾ ڪمند جي اگهه ۽ آبادگارن ۽ شگرمل مالڪن وچ ۾ اگهه واري مسئلي تي غور ويچار ڪيو ويو ۽ فيصلو ڪيو ويو ته زراعت کاتي کي اجازت ڏني وڃي ته اهي اسٽيڪ هولڊرز لاءِ قابل عمل حل جي ڳولا لاءِ وڌيڪ ڪوششون ورتيون وڃن. ڪابينا کي بريفنگ ڏيندي زراعت ۽ صوبائي گهرو وزير سهيل انور سيال چيو ته شگرڪين ڪنٽرول بورڊ جي روشنيءَ ۾ ڪمند جو اگھه 182 رپيا في چاليهه ڪلوگرام مقرر ڪيو ويو هو جنهن کي مل مالڪن هاءِ ڪورٽ ۾ چيلنج ڪيو ويو. عدالت زراعت کاتي کي هدايت ڪئي آهي ته اهي آبادگارن ۽ مل مالڪن وچ ۾ مامري جي نبيري لاءِ ڪوششون وٺي ۽ ان مامري کي ڪنهن ريت حل ڏانهن آندو وڃي. آبادگارن ۽ مل مالڪن سان ڪيترائي اجلاس رٿيا ويا آهن، آبادگارن جو مطالبو 216 رپيا في چاليهه ڪلوگرام هو جڏهن ته مل مالڪ 132 رپيا في چاليهه ڪلوگرام تي اڙيل رهيا. زراعت کاتي گهٽ ۾ گهٽ اگهه 142 رپيا في چاليهه ڪلوگرام تجويز ڪيو پر ٻنهي ڌرين اتفاق نه ڪيو. ٻيهر هڪ اجلاس منعقد ٿيو جنهن ۾ پاسما (پي اي ايس ايم اي) 153 رپيا في چاليهه ڪلوگرام اگهه جي تجويزڏني، ان مرحلي تي آبادگارن چيو ته گهٽ ۾ گهٽ اگهه 160 رپيا في چاليهه ڪلوگرام مقرر ڪيو وڃي ۽ سنڌ حڪومت 12 رپيا في چاليهه ڪلوگرام سبسڊي ڏئي ۽ اهڙي ريت قيمت 172 رپيا في چاليهه ڪلوگرام ٿي ويندي، جهڙيءَ ريت 15-2014ع ۾ هئي.ڪابينا ان مامري جو غور سان جائزو ورتو ۽ آخرڪار چيو ته صوبائي حڪومت سبسڊي جي اجازت نه ٿي ڏئي سگهي. زراعت کاتي کي هدايت ڪئي وئي ته اسٽيڪ هولڊرن سان هڪ ٻيو اجلاس معنقد ڪري ۽ عدالت جي صلاح تحت مامري جو قابل عمل حل ڳولڻ جي ڪوشش ڪئي وڃي. ڪابينا جي ٻئي ايجنڊا سنڌ پبلڪ پرائيوٽ ايڪٽ 2010 جنهن تي غور ڪيو ويو ۽ سنڌ پبلڪ پرائيويٽ ايڪٽ 2010 ۾ ترميم جي منظوري ڏني وئي. آبادگار اڳواڻن زاهد ڀرڳڙي ۽ قبول کٽياڻ  جو چوڻ آهي ته حڪومت ۽ پاسما سان ڳالهيون ڪيون پر ڪو به نتيجو نه نڪتو، هاڻي معاملي اڄ عدالت ۾ کڻنداسين ۽ اسان کي عدالت مان ئي انصاف جي اميد آهي، عدالت جيڪو به فيصلو ڪيو اهو قبول هوندو،