تازيون خبرون

Daily Archives: January 26, 2018

سول ۽ ملٽري لاڳاپا بهتر بڻائڻ جي ڪوشش ڪري رهيا آهيون: وزيراعظم

ڊيووس (اين اين آءِ/ ويب ڊيسڪ ) وزيراعظم شاهد خاقان عباسي چيو آهي ته سول ملٽري لاڳاپن کي بهتر بڻائڻ جي ڪوشش ڪري رهيا آهيون. ڊيووس ۾ پاڪستاني ڪميونٽي کي خطاب ڪندي وزيراعظم شاهد خاقان عباسي چيو ته پاڪستان ۾ جمهوريت مضبوط ٿي رهي آهي ۽ اسان جمهوريت مان سک رهيا آهيون. هن چيو ته سول ملٽري لاڳاپا بهتر بڻائڻ جي ڪوشش ڪري رهيا آهيون حڪومت پنهنجو مدو پورو ڪندي. سندس چوڻ هو ته ملڪ ۾ جيڪو ڪجهه ٿي رهيو آهي اهو آئين ۽ قانون جي دائري ۾ ٿي رهيو آهي۽ سمورا ادارا آئين ۽ قانون جي دائري ۾ رهي ڪم ڪري رهيا آهن. وزيراعظم شاهد خاقان عباسي چيو ته پاڪستان لائن آف ڪنٽرول جي ڀڃڪڙين جو ڀرپور جواب ڏيڻ جي صلاحيت رکي ٿو. وزيراعظم شاهد خاقان عباسي چيو آهي ته پاڪستان هڪ ڊگهي عرصي کان 30 لک کان وڌيڪ افغان پناهگيرن جي ميزباني ڪري رهيو آهي عالمي برادري کي پاڪستان جي قربانين جو اعتراف ڪرڻ گهرجي. پاڪستان کي چين جي قيادت جي ون بيلٽ ون روڊ قدم جو حصو بنجڻ جو اعزاز حاصل آهي. پاڪ  چين اقتصادي راهداري سان ڪيترن ئي ملڪن کي روزگار جا موقعا، صنعتي ترقي ۽ رابطن ۾ بهتري جي صورت ۾ وڏا فائدا پهچندا. هو خميس تي سوئزرلينڊ جي شهر ڊيووس ۾ عالمي اقتصادي فورم جي موقعي تي پاٿ فائنڊر گروپ پاران ناشتي تي ميٽنگ ۾ ڳالهه ٻولهه ڪري رهيو هو. ان موقعي تي پاڪستاني واپاري، ميڊيا جا نمائندا ۽ ڪيترن ئي ملڪن مان پاڪستان جا دوست به موجود هئا. وزيراعظم چيني قيادت کي ون بيلٽ ون روڊ قدم جي ويزن جي واکاڻ ڪندي چيو ته اسان کي چيني قيادت جي ون بيلٽ ون روِڊ قدم جو حصو بنجڻ جو اعزاز حاصل آهي هن چيو ته پاڪستان ۾ جمهوريت جي مضبوطي ۽ هڪ مثبت ۽ خوش آئيند موقعو آهي ۽ سمورن ادارن کي گڏجي ۽ هٿ ۾ هٿ ڏئي ملڪ جي ترقي لاءِ ڪم ڪرڻ گهرجي. هن چيو ته 2013 ۾ اقتدار سنڀالڻ کانپوءِ پاڪستان مسلم ليگ (ن) جي حڪموت کي امن امان، دهشتگردي، بجلي جي کوٽ ۽ خراب معيشت جهڙا وڏا چئلينج سامهون هئا موجوده حڪومت جي سخت محنت ۽ پڪي پهه سبب امن امان جي صورتحال ۾ وڏي تبديلي آئي ۽ ملڪ تي سيڙپڪارن جي اعتماد کي بهال ڪيو ويو وزيراعظم چيو ته ڊيووس ۾ سندس ڪيترن ئي عالمي بزنس اڳواڻن سان ملاقاتون ٿيون آحن ۽ انهن پاڪستان ۾ سيڙپڪاري ۽ واپاري سرگرمين کي وڌائڻ جي خواهش ظاهر ڪئي آهي.

 

شاهراهه فيصل پوليس مقابلو به ڪوڙو قرار، ڪنهن کي رعايت نه ڏبي: سهيل انور سيال

ڪراچي (ويب ڊيسڪ) صوبائي گهرو وزير سهيل انور سيال چيو آهي ته شاهراهه فيصل تي پوليس جي فائرنگ ۾ مارجي ويل شخص مقصود بي ڏوهه هو، وارث جي مرضي موجب جاچ ڪرائينداسين. گهرو وزير شاهراهه تي فيصل تي پوليس جي فائرنگ ۾ مارجي ويل نوجوان مقصود جي گهر پهچي سندس وارثن سان تعزيت ڪئي، جنهن کانپوءِ صحافين سان ڳالهائيندي سهيل انور سيال چيو ته مقصود بي ڏوهه هو، تنهن ڪري ان کي شهيد سمجهان ٿو، مقصود جا وارث جهڙي طريقي سان چاهيندا جاچ ڪنداسين، انهن سي سي ٽي وي فوٽيج سامهون آڻڻ جو مطالبو ڪيو هو، جيڪي جلد منظر تي آڻينداسين. هن چيو ته تسلسل سان اهڙا واقعا سامهون اچي رهيا آهن، جيڪي افسوس جوڳا آهن پر پوليس ڄاڻي واڻي ڪنهن کي قتل ناهي ڪندي، جاچ آفيسر جڏهن مناسب سمجهندو واقعي جي ويڊيو رليز ڪندو. سهيل انور سيال چيو ته عام طور تي اهو تاثر ڏنو پيو وڃي ته سنڌ حڪومت رائو انوار يا ڪنهن به پوليس آفيسر کي بچائڻ جي ڪوشش ڪري رهي آهي پر ائين ناهي، اسان هر ڪنهن خلاف سخت قانوني ڪارروائي عمل ۾ آڻينداسين.27

 

سپريم ڪورٽ 24 منرل واٽر ڪمپنين کي پاڻي جي وڪري کان روڪي ڇڏيو

اسلام آباد (اين اين آءِ) سپريم ڪورٽ سڄي ملڪ جي 24 منرل واٽر ڪمپنين جي پاڻي جي وڪرو تي پابندي هڻي ڇڏي چيف جسٽس آف پاڪستان ثاقب نثار جي سربراهي ۾ سپريم ڪورٽ جي ٻن ميمبرن تي ٻڌل بئنچ پيئڻ جي صاف پاڻي جي فراهمي بابت ڪيس جي ٻڌڻي ڪئي، ٻڌڻي دوران منرل واٽر ڪمپني جي وڪيل جو موقف هو ته ان جي موڪل اداري پاران فراهم ڪيل پاڻي صحيح آهي عدالت پي سي ايس ڪيو اي جي رپورٽ گهرائي، چيف جسٽس ريمارڪس ڏنا ته اسان رپورٽ گهرائينداسين ڪمپني ان وهم ۾ نه رهي ته وڏو وڪيل ڪرڻ سان رليف ملندو، ڪمپني جو وڪيل ڳري فيس وٺي ٿو جڏهن ته ڳري فيس وٺي رليف وٺڻ ان جو حق ناهي، ڪمپنين کي اها ڳالهه سمجهڻ گهرجي ته خراب پاڻي وڪرو ناهي ڪرڻو اسان کي قوم ۽ ٻارڙن جي مفاد کي ڏسڻو آهي جيستائين صاف پاڻي جي پڪ نه ڏني ويندي وڪري جي اجازت نه ڏينداسين. سپريم ڪورٽ ملڪ جي 24 منرل واٽر ڪمپنين کي پاڻي جي وڪرو کان روڪيندي ٻڌڻي اڻڄاتل مدي تائين ملتوي ڪري ڇڏي.

 

قومي مسئلي تي پاڪستاني ٿي سوچڻ گهرجي: چوڌري نثار

اسلام آباد ( ويب ڊيسڪ ) اڳوڻي گهرو وزير چوڌري نثار علي چيو آهي ته  قومي مسئلي تي حڪومت کي مخالف ڌر کي ورهائڻ کان هٽي ڪري پاڪستاني طور سوچڻ گهرجي. قومي اسيمبليءَ جي اجلاس ۾ ڳالهائيندي وفاقي گهرو وزير چوڌري نثار علي چيو ته منهنجي بيان کي ٽوڙي مروڙي پيش ڪيو ويو، حڪومت کي ڇڏي مخالف ڌر جو ساٿ ڏنو، ڪجهه معاملن تي پارٽي کي ڇڏي قومي سوچ اختيار ڪرڻ گهرجي. هن چيو ته لعنت جهڙا لفظ هتي استعمال ٿين ٿا ڇا انهن جي مشهوري ضروري آهي، يا سنجيده معاملن تي ڳالهائڻ گهرجي. سندس چوڻ هو ته ڇا رڳو حڪومت ۽ مخالف ڌر جي نظر سان هر معاملي کي ماپيو ويندو، هر شيءَ ۾ ناڪاري رخ کي نه ڏسڻ گهرجي. چوڌري نثار علي چيو ته شيري مزاري سٺي ڳالهه ڪئي، حمايت ڪري ڪو گناهه نه ڪيو آهي، منهنجو ڪنهن سان ذاتي جهيڙو ناهي، هميشه سٺين ڳالهين سان اتفاق ڪيو. هن چيو ته  ويزا آن آرائيول حڪومت جو مسئلو آهي، معاملي تي بحث ٿيڻ گهرجي، مون کي 6 مهينا لڳا ويا ويزا آن آرائيول ختم ڪرڻ  لاءِ. سندس چوڻ هو ته آءِ اين جي اوز جي جان ڪيري سميت اهم طاقت حمايت ڪئي، مان چيو هو ته اهي طاقتون ڇو آئي اين جي اوز جي حمايت ڪن ٿيون، سندن امداد جو گهڻي قدر حصو انهن تنظيمن کي ويندو آهي.

 

پاڪ فوج هر جارحيت جو مقابلو ڪرڻ لاءِ تيار آهي: صدر ممنون حسين

اسلام آباد (ويب ڊيسڪ) صدر ممنون حسين چيو آهي ته پاڪستان جو بچاءُ مضبوط هٿن ۾ آهي ۽ هٿياربند فوج ڪنهن به جارحيت جو مقابلو ڪرڻ لاءِ مڪمل طور تيار آهي. صدر ممنون حسين سان جوائنٽ چيفس آف اسٽاف ڪميٽي جي چيئرمين جنرل زبير محمود حيات ايوان صدر ۾ ملاقات ڪئي، جنهن دوران هن صدر کي ملڪ جي بچاءَ ۽ سيڪيورٽي معاملن بابت آگاهي ڏني. جنرل زبير محمود حيات صدر کي ٻڌايو ته هٿياربند فوج ملڪ جي بچاءَ لاءِ چوڪس آهي ۽ پنهنجي سرحدن جي حفاظت ڪرڻ ڄاڻي ٿي. ان موقعي تي صدر ممنون حسين هٿياربند فوج جي آپريشنل تيارين تي اطمينان جو اظهار ڪيو.27

 

معاشي طور تي اڀرندڙ پاڪستان دنيا لاءِ مثال آهي: مريم اورنگزيب

ڊيووس (اين اين آءِ) سڌ سماءَ جي مملڪتي وزير مريم اورنگزيب چيو آهي ته معاشي طور تي اڀرندڙ پاڪستان دنيا لاءِ هڪ وڏو مثال آهي جڏهن ته ورلڊ اڪنامڪ فورم ۾ ترقي پسند ۽ اڀرندڙ پاڪستان کي ڀرپور نموني اجاگر ڪيو ويو آهي.ڊيوس ۾ هڪ خانگي ٽي وي چينل سان سان ڳالهائيندي هن چيو ته دنيا جي ملڪن کي ون بيلٽ ون روڊ ۽ اقتصادي راهداري منصوبن مان فائدو حاصل ڪندي ترقي جون گڏيل منزلون حاصل ڪرڻ گهرجن.مملڪتي وزير چيو ته وزيراعظم شاهد خاقان عباسي مختلف ادارن جي سربراهن سان گڏ ملاقاتن ۾ پاڪستان ۾ اقتصادي ترقي ۽ سيڙپ کي هٿي وٺرائڻ تي ڳالهيون ٿيون.هن چيو ته پاڪستاني وفد ۾ عورتن جي ڀرپور شرڪت سان پاڪستان جو روشن چهرو دنيا جي اڳيان آيو آهي. هن جو وڌيڪ چوڻ هو ته وزيراعظم ڊيوس ۾ اهم عالمي تجارتي ادارن جي سربراهن سان ملاقاتون ڪيون جنهن ۾ پاڪستان اندر سيڙپڪاري تي نتيجا ڏيندڙ ڳالهه ٻولهه ڪئي وئي. هن چيو ته سي پيڪ جي صورت ۾ پاڪستان ۾ سيڙپڪاري اچي رهي آهي خطي جا ملڪ سي پيڪ مان فائدو حاصل ڪرڻ چاهين ٿا. معاشي طور اڀرندڙ پاڪستان دنيا لاءِ هڪ مثال آهي. هن چيو ته ڊيووس ۾ پاڪستاني عورتن ڀرپور نمائندگي ڪئي آهي مملڪتي وزير چيو ته عالمي اقتصادي فورم ۾ پاڪستان جي تاريخي نمائندگي آهي دنيا پاڪستان کي هڪ اڀرندڙ مارڪيٽ طور مڃي رهي آهي. هن چيو ته سي پيڪ سڄي خطي لاءِ گڏيل خوشحالي جو منصوبو آهي.

 

چونڊون سڀاڻي ٿين پوءِ به تيار آهيون پر اسيمبلين جو مدو پورو ڪرڻ جمهوريت لاءِ بهتر آهي: بلاول ڀٽو زرداري

ڊيووس (ويب ڊيسڪ) پ پ چيئرمين بلاول ڀٽو زرداري چيو آهي ته عوام گار گند نه پر اشوز جي سياست چاهي ٿو، اسان کي رڳو عسڪريت پسندي تي ڌيان نه ڏيڻ گهرجي، انتهاپسندي ۽ دهشتگردي خلاف وڏي پئماني تي بحث ٿيڻ گهرجي. ڊيووس ۾ ڊي ڊبليو کي انٽرويو ڏيندي بلاول ڀٽو زرداري چيو ته شايد وڏيون طاقتون انتهاپسندي ۽ دهشتگردي خلاف وڙهڻ نه ٿيون چاهين، وڏين طاقتن جون ترجيحون پنهنجي اسٽريٽجڪ مفاد آهن، اسان کي مودي يا ٽرمپ نه پر پاڪستان لاءِ دهشتگردن خلاف وڙهڻو آهي، چار سال پرڏيهي وزير نه هجڻ سبب پاڪستان جو موقف دنيا اڳيان نه آيو. هن چيو ته ملٽري آپشنز تي ته ڪم ٿيو پر نيب تي عمل ناهي ٿيو، سڀ پارٽيون ماڊل ٽائون سانحي جي شهيدن کي انصاف ڏيارڻ چاهين ٿيون. سندس چوڻ هو ته جيڪڏهن چونڊون سڀاڻي ٿين پوءِ به اسان تيار آهيون پر اسيمبيلن جو مدو پورو ڪرڻ جمهوريت لاءِ بهتر آهي. شادي بابت سوال تي بلاول ڀٽو زرداري چيو ته مان نٿو چاهيان ته ڪجهه سياستدانن جيان گهڻيون شاديون ڪيان، سوچي سمجهي رڳو هڪ ئي شادي ڪرڻ چاهيان ٿو.27

 

نقيب ڪيس ۾ انصاف جا تقاضا پورا ڪيا ويندا، جاچ شفاف ۽ غير جابندار ڪئي ويندي: اي ڊي خواجا

ڪراچي (ويب ڊيسڪ) آءِ جي سنڌ اي ڊي خواجا چيو آهي ته نقيب الله ڪيس ۾ انصاف جا تقاضا پورا ڪيا ويندا. اهڙن خيالن جو اظهار هن محسود قبيلن جي اڳواڻن سان ملاقات دوران ڪيو. سندس چوڻ هو ته ڪيس جي جاچ شفاف ۽ غير جابندار ڪئي ويندي، پوليس عوام جي تحفظ لاءِ ڏينهن رات مصروف آهي، قانون جو احترام نه رڳو عوام پر پوليس تي به لازمي آهي. اي ڊي خواجا چيو ته قانون جي ڀڃڪڙي ڪندڙن جو حساب قانون موجب ٿيندو. وفد سان ملاقات ۾ ڊي آءِ جي ڏکڻ آزاد خان ۽ ٻين آفيسر به موجود هئا، جڏهن ته وفد جاچ ڪميٽي ۽ ان جي ميمبرن تي مڪمل اعتماد جو اظهار ڪيو.27

 

انتظار قتل ڪيس ۾ اڳڀرائي: نوجوان پوليس جي فائرنگ ۾ قتل ٿيو، سي ٽي ڊي، معاملي جي حل لاءِ جي آءِ ٽي قائم

ڪراچي ( ويب ڊيسڪ ) ڪراچي ۾ پوليس اهلڪارن فائرنگ دوران مارجي ويل نوجوان انتظار احمد جو معاملو حل ڪرڻ لاءِ سي ٽي ڊي پوليس ۽ حساس ادارن جي نمائندن تي ٻڌل جي آءِ ٽي جوڙي ڇڏي آهي. ڊي آءِ جي سي ٽي ڊي عامر فاروقي موجب گڏيل جاچ ۾ اهو پتو لڳايو ويندو ته انتظار جي قتل ۾ ايس ايس پي مقدس حيدر جو ڇا ڪردار آهي؟ فائرنگ ۾ ملوث ايس ايس پي جا ٻه گارڊ اتي ڇا ڪري رهيا هئا؟ انتظار جي گاڏي کي ڇو روڪڻ جي ڪوشش ڪئي وئي؟ روڪيندڙ پوليس پارٽي ۾ ڪو به اهلڪار وردي ۾ ڇو نه هو؟ فائرنگ ۾ ملوث اهلڪار ذاتي گاڏين ۾ سوار ڇو هئا؟ ۽ ڪار ۾ ويٺل ڇوڪريءَ جو ڇا ڪردار آهي؟. ڪيس جي جاچ آفيسر عامر فاروقي جو وڌيڪ چوڻ هو ته جنهن انداز سان انتظار احمد جي گاڏي کي روڪيو ويو اهو ڏاڍو شڪي آهي، ائين لڳي رهيو آهي ته ڄڻ انتظار کي اغوا ڪرڻ جي ڪوشش ڪئي پئي وئي. هن چيو ته انتظار کي روڪيندڙ پوليس پارٽي ۾ ڪو به اهلڪار وردي ۾ نه هو، فائرنگ ۾ ملوث اهلڪارن جي استعمال هيٺ گاڏيون سرڪاري نه هيون، پوليس پارٽي قاعدن ۽ تحريري حڪم نامن جي کليل ڀڃڪڙي ڪئي، معاملي کي سمجهڻ لاءِ جي آءِ ٽي جوڙي وئي آهي، اهڙو فيصلو مقتول جي پيءُ سان صلاح مشوري کانپوءِ ڪيو ويو. هن ٻڌايو ته جي آءِ ٽي ۾ پوليس، سي ٽي ڊي ۽ حساس ادارن جا نمائندا شامل هوندا.  سي ٽي ڊي اختيارين انتظار قتل ڪيس ۾ اهم اڳڀرائيءَ جي دعويٰ ڪندي ٻڌايو آيه ته انتظار تي پوليس اهلڪارن فائرنگ ڪئي. انتظار قتل ڪيس جي جاچ سي ٽي ڊي ڪري رهي آهي، جڏهن ته ايس ايس پي مقدس حيدر کي عهدي تان هٽايو ويو آهي. سي ٽي ڊي اختيارين ڪيس ۾ اهم اڳڀرائي بابت ٻڌائيندي چيو ته انتظار تي فائرنگ پوليس اهلڪار بلال ۽ دانيال ڪئي، هڪ اهلڪار ايس ايس پي جو پرسنل اسٽاف آفيسر ۽ ٻيو گن مين آهي، جڏهن ته موقعي تي ٻنهي جي موجودگي به قانون جي ڀڃڪڙي آهي. سي ٽي ڊي جي اختيارين موجب انتظار سان گڏ موجود ناريءَ جو پڻ بيان قلمبند ڪيو ويو آهي،  قتل جو ڪهڙو مقصد هو، واقعي جي جاچ ڪئي پئي وڃي، جڏهن ته جاچ ۾ اڃا تائين ڪنهن نئين ڪردار جو نالو سامهون نه آيو آهي. ڊي آءِ جي سي ٽي ڊي عامر فاروقي موجب مقدس حيدر ۽ مديحا ڪياني بيانن ۾ چيو ته هو هڪ ٻي کي نه ٿا سڃاڻين. هن چيو ته ڪيس ۾ ڪنهن ٻي ڇوڪريءَ جو نالو نه آيو آهي، اهڙين اڳڪٿين کان پاسو ڪيو وڃي، جاچ 100 سيڪڙو ميرٽ تي ٿيندي. ذريعن موجب سي ٽي ڊي اختيارين موقعي تي موجود ماڻهن جا بيان قلمبند ڪري ورتا آهن، جڏهن ته 19 ورهين جي انتظارجي گاڏيءَ ۾ موجود مديحا ڪيانيءَ جو بيان ٻيهر قلمبند ڪيو ويو آهي. ذريعن موجب ايس ايڇ او اي سي ايل سي سميت سمورن پوليس اهلڪارن جا بيان قلمبند ڪيا ويا آهن. انتظار جي والد جو چوڻ آهي ته اڳوڻو ايس ايس پي ۽ مديحا ڪياني جي بيان بعد پوليس نئين ڪهاڻي بڻائي رهي آهي.

 

جاچ ڪميٽي ۾شامل آفيسر منهنجا دشمن آهن، حساس ادارن جي جي آءِ ٽي جوڙي وڃي: رائو انوار

ڪراچي( ويب ڊيسڪ ) نقيب الله قتل ڪيس ۾ نامزد معطل ايس ايس پي رائو انوار جاچ ٽيم تي الزام مڙهيندي کين پنهنجو دشمن قرار ڏئي ڇڏيو آهي. هڪ بيان ۾ رائو انوار چيو ته جاچ ٽيم جي سربراهي ڪندڙ ثناءَ الله عباسي ۽ سندس مخالف ڪندڙ سي ٽي ڊي آفيسرن جا پنهنجا هٿ صاف نه آهن، سندن خلاف پڪيون شاهديون موجود آهن جيڪي جلد منظر تي آڻيندس. هن چيو ته جاچ ٽيم تي کيس خدشا آهن،  ڪيس بي بنياد آهي، حساس ادارن تي ٻڌل جي ءِ ٽي جوڙي وڃي. سندس چوڻ هو ته ڪجهه پوليس آفيسرن جي ساڻس دشمني آهي ۽ ذاتي بغض رکن ٿا، اهو ئي آفيسر نقيب الله جي وارثن کي گمراهه ڪري رهيا آهن. رائو انوار جو چوڻ هو ته ثناءَ الله عباسي ٻڌائي ته هن وقت تائين ڪيترا ڪامياب آپريشن ڪيا آهن، اڄ تائين سي ٽي ڊي جيڪي مقابلا ڪيا تنهن ۾ ڪيترائي اهلڪار مارجي ويا ۽ زخمي ٿيا آهن.هن چيو ته اهو تاثر درست ناهي ته مان ذاتي حيثيت ۾ ڪو مقابلو ڪيو آهي، مان هڪ پروفيشنل آفيسر آهيان.