تازيون خبرون

Daily Archives: January 22, 2018

ايشوريا راءِ بچن فرسٽ ليڊيز جو ايوارڊ ماڻي ورتو

نئين دهلي(شوبز نيوز) بالي ووڊ جي اڳوڻي سونهن راڻي ايشوريا راءِ بچن کي فرسٽ ليڊيز جي ايوارڊ سان نوازيو ويو آهي.ڀارتي ميڊيا مطابق 44 سالن جي خوبصورت اداڪارا ايشوريا راءِ بچن کي صدر رامناٿ ڪووند ايوان صدر ۾ ايوارڊ ڏنو. رپورٽ مطابق ايشوريا راءِ بچن ڪينز فلم فيسٽيول جي پهرين ڀارتي ميمبر هئي، جنهن ڪري کيس مڃتا طور تي ايوارڊ سان نوازيو ويو آهي.ياد رهي ته ايشوريا راءِ بچن جي فلم ديوداس کي به ڪينز فلم فيسٽيول ۾ شامل ڪيو ويو هو، جڏهن ته ايشوريا راءِ بچن گذريل 15 سالن کان ڪينز فلم فيسٽيول ۾ شرڪت ڪري رهي آهي.

 

پاڪستان جي معياري فلمن لاءِ پرڏيهي مارڪيٽون ڳولڻيون پونديون: ماهرا خان

لاهور(شوبز نيوز) مشهور اداڪارا ماهرا خان چيو آهي ته پاڪستان ۾ معياري فلمون ٺهي رهيون آهن، انهن جي نمائش لاءِ اسان کي غير ملڪي مارڪيٽون ڳولڻيون پونديون.هڪ ٽي وي پروگرام ۾ ڳالهائيندي ماهرا خان چيو ته جيڪڏهن پاڪستاني فلمن کي مقامي ٻولين ۾ پيش ڪيو ويو ته سون تي سهاڳي وارو ڪم ٿي ويندو.هن اهو به چيو ته اسان کي پنهنجي فلم انڊسٽري جي ترقي ۽ ان کي هٿي ڏيارڻ توڙي مارڪيٽنگ لاءِ ٻاهرين ملڪن جي سفارتخانن جي مدد وٺڻ گهرجي ۽ ان لاءِ هڪ ڪاميٽي ٺاهي ان کي اهو ٽاسڪ ڏنو وڃي

 

زندگي سٺي پئي گذري، ڪوچنگ ڪرڻ جو ارادو ناهي: شعيب اختر

ڪراچي(اسپورٽس نيوز) اڳوڻي فاسٽ بالر شعيب اختر واضح ڪيو آهي ته هو پنهنجي ٻين هم عصر رانديگرن جيان پاڪستاني ٽيم جي ڪوچنگ ۾ ڪا به دلچسپي نٿو رکي.هن چيو ته آئون آسان زندگي گذاري رهيو آهيان، جنهن ۾ منهنجون گهڻيون خواهشون ناهن ۽ ضرورت وقت مان پاڪستاني ٽيم کي پنهنجا مفيد مشورا ڏئي ته سگهان ٿو پر ڪل وقتي ڪوچنگ هڪ اهڙو ڪم آهي جنهن جي باري ۾ مون ڪڏهن به سوچڻ جي ڪوشش ڪئي ناهي ڪئي.ميڊيا انڊسٽري سان لاڳاپيل شعيب اختر جو چوڻ هو ته آئون في الوقت هڪ والد جي حيثيت سان پنهنجا فرض نڀائي رهيو آهيان ۽ پنهنجي گهر ويهي پٽ جي پرورش جو عمل ڏسڻ مون لاءِ اطمينان ڏيندڙ آهي، منهنجي خيال ۾ پٽ وڏو ٿي ڪرڪيٽر نه پر اداڪار ٿيندو

 

عامر خان پاران ايندڙ سال پاڪستان ۾ باڪسنگ جي سپر ليگ ڪرائڻ جو اعلان

لنڊن(اسپورٽس نيوز) پاڪستاني نزاد برطانوي باڪسر عامر خان ايندڙ سال پاڪستان ۾ باڪسنگ جي سپر ليگ ڪرائڻ جو اعلان ڪيو آهي، جنهن ۾ عورت باڪسر به ايڪشن ۾ نظر اينديون. عامر خان جو گذريل سال ڊسمبر ۾ باڪسنگ ليگ ڪرائڻ جو ارادو هو، پر هاڻي 2019ع ۾ ايونٽ جو باضابطا اعلان ڪيو ويو آهي. عامر خان جو مقصد پاڪستان ۾ باڪسنگ جو ٽئلينٽ ڳولڻ آهي.هن ٻڌايو ته باڪسنگ سپر ليگ ۾ اسلام آباد ڪنگز، لاهور جائلز، ڪراچي ڊيولز، فيصل آباد فيلڪنز، ملتان ٿنڊرز، پشاور واريئرز، ڪوئيٽا اسٽارز ۽ سيالڪوٽ يونائيٽيڊ جي نالي سان 6 ٽيمون شامل هونديون ۽ وومين باڪسر به حصو وٺنديون.

 

جيڪب آباد ۾ امن امان جي صورتحال: عامر علي ڀٽي/ٺل

چائنا ۽ ايران جا ماڻهو به هن ئي رستي کان سنڌ ۾ داخل ٿيندا آهن ۽ هي ضلعو تمام حساس حيثيت رکي ٿو ۽ اهو ئي سبب آهي جو افغانستان جا دهشتگرد به هن ئي رستي ذريعي سنڌ ۾ داخل ٿي پنهنجو ڪهري ڪاروايون ڪري ويندا آهن، ان کان علاوه هن ضلعي ۾ توهان کي هر قوم ۽ هر ذات جا ماڻهو ڏسڻ ۾ ايندا ۽ هر ماڻهو پنهنجن مختلف ڪمن ۾ مصروف ڏسڻ ۾ ايندا، پر هتي آيل ڌاريا ماڻهو جن سنڌ صوبي جي عوام جو سڪون ڦٽائي ڇڏيو آهي اهڙين ڏوهاري ماڻهن کي پڪڙڻ لاءِ دلير پوليس آفيسرن جي ضرورت هوندي آهي سو گذريل ڪجھ مهينن کان ضلعي جيڪب آباد جي چارج ايس ايس پي سرفرازنواز شيخ جي حوالي ڪئي ويئي آهي جنهن پنهنجي قابليت ۽ صلاحيتن کي استعمال ڪندي هتي امن امان بحال ڪرائڻ ۾ ڪامياب ٿي ويو آهي.

گذيل ڏينهن ضلعي جيڪب آباد ۾ ايس ايس پي سرفراز نواز شيخ پنهنجي سالانه رپورٽ پيش ڪندي ٻڌايو ته ضلعي جيڪب آباد ۾ 2016ع جي ڀيٽ ۾ 2017ع ۾ قتل، اغواءَ، ڪارنهن ۽ زناءَ جا ڏوه گھٽ ٿيا آهن، جڏهن ته 2016ع ڌاري ضلعي جيڪب آباد ۾ ڪارنهن، زناءَ اغواءَ ۽ قتل جون  569 واداتون ٿيون هيون ۽ 2017ع ۾ نمايان ڪمي واقع ٿي آهي.

ايس ايس پي صاحب ٻڌايو ته 2017ع ۾ جيڪب آباد پوليس پاران 80 ڦريل موبائلز،  31 موٽرسائيڪلز ۽ 167 مختلف جانور برآمد ڪيا آهن جڏهن ته 80 عورتن کي تحفظ فراهم ڪيو ويو آهي، ان کان علاوه 65 گم ٿيل ٻارڙن کي بازياب ڪرائي گھر پهچايو ويو آهي، قومي ايڪشن پلان مطابق لائوڊ اسپيڪرن جي غلط استعمال تي 15 ڪيس داخل ڪيا ويا ۽ 9 ماڻهن کي گرفتار ڪيو ويو، ان کان علاوه 22 افغانين کي به گرفتار ڪيو ويو جيڪي  غير قانوني طرح سان هتي ترسيل هئا، جڏهن ته هٿيار ايڪٽ موجب 162 ماڻهن کي گرفتار ڪيو ويو، ايس ايس پي جيڪب آباد جناب سرفراز نواز شيخ صاحب پنهنجي تفصيلي بريفنگ ڏيندي ٻڌايو ته ڪومبنگ آپريشن ذريعي 290 ريڊ هنيا ويا جنهن دوران 146 ڄڻن کان تحقيقات ڪئي ويئي جنهن ۾ 40 ڏوهاري  ۽ 4 ويڙهاڪ پڪڙِيا ويا، آپريشن دوران 383 روپوش ۽ 203 اشتهاري ڏوهاري گرفتار ڪيا ويا، هن وڌيڪ ٻڌايو ته جيڪب آباد ضلعي ۾ ريل جي پٽڙين تي بم رکي ريل کي نقصان پهچائڻ جي ڪوشش ڪندڙ چئن دهشتگردن جنهن ۾ مور بنگلاڻي، هنگو بگٽي، بالڪ ۽ ڪريم ڏنو بنگلاڻي کي گرفتار ڪري سندن قبضي مان 6 ڪلو بارودي مواد پڻ هٿ ڪيو ويو، جڏهن ته 2 انعام رکيل ڏوهاري جنهن ۾ سائين بخش تيغاڻي ۽ سردار ڏاهاڻي کي پڻ گرفتار ڪيو ويو.

ايس ايس پي جيڪب آباد سرفراز نواز شيخ ٻڌايو ته 2017ع ڌاري ڏوهارين سان 60 پوليس مقابلا ٿيا جنهن ۾ 7 ڏوهاري زخمي ۽ 116 ڏوهارين کي گرفتار ڪيو ويو، جيڪب آباد ضلعي اندر جوئا جي اڏن تي ڇاپا هڻي 262 ڄڻن کي گرفتار ڪري 2 لک 65 هزار 525 روپيه برآمد ڪيا، ان کان علاوه منشيات جي ڪيسن ۾ 117 ڄڻن کي گرفتار ڪري 539 ڪلو 689 گرام چرس، 13 ڪلو ڀنگ، 40 ڪلو ڏوڏي ۽ هزارين ليٽر ديسي شراب برآمد ڪيو ويو، ضلعي جيڪب آباد اندر غيرقانوني هٿيارن جي ڏوه ۾ 3 عدد ڪلاشنڪوف،  2 عدد رائفلز، 110 پسٽل، 43 بندوقون، 4 عدد ريوالور ۽ 735 گوليون پڻ هٿ ڪيون ويون.

ايس ايس پي صاحب ٻڌايو ته سن 2017ع ڌاري جيڪب آباد ۾ 207 جوابدارن کي گرفتار ڪري جيل اماڻي ڇڏيو، جن ۾ 4 پاٿاريدار، 83 چور، 33 اسٽريٽ ڪرمنل ۽ 85 مختلف ڪيسن ۾ گھربل جوابدار شامل آهن.

سرفراز نواز شيخ صاحب ٻڌايو ته امن امان جي قيام لاءِ پوليس هر وقت تيار آهي ۽ عوام کي تحفظ فراهم ڪرڻ اسان جي ذميواري آهي، اها به هڪ حقيقت آهي ته پوليس ۾ڪجھ اهڙا ماڻهو به شامل آهن جيڪي پوليس جي نالي کي بدنام ڪرڻ جي ڪوشش ڪندا رهندا آهن پر اسين عوام کي اهو پيغام ڏينداسين ته ڪنهن به شخص کي جيڪڏهن ڪو به پوليس اهلڪار بنا ڪنهن عضر جي تنگ ڪري ته ان جي رپورٽ اسان کي ڏني وڃي ته جيئن ان جي خلاف بروقت ڪاروائي ڪري سگھجي، سو اسين پوليس ۽ عوام جو رابطو باهمي بنيادن تي قائم ڪرڻ چاهيون ٿا ته جيئن عوام جي دلين ۾ پوليس لاءِ پيدا ٿيل نفرتون ختم ٿي وڃن ۽ هڪ سٺي شهري جيان عوام جي عزت ٿي سگھي.

سو سائين اها هڪ حقيقت آهي ته ضلعي جيڪب آباد ۾ اڳ ۾ ڏينهن ڏٺي جو هتي چوريون، ڌاڙا، ڦرون، اغواءَ براءِ تاوان سرعام ٿيندا هئا پر جڏهن کان ايس ايس پي جيڪب آباد جناب سرفراز نواز شيخ هتان جي چارج ورتي آهي تڏهن کان پوري ضلعي اندر امن امان جي صوت بهتر ٿي آهي، سرفراز نواز شِيخ صاحب جو اهو به چوڻ درست آهي ته هتي عوام جي دلين ۾ پوليس لاءِ غلط راءِ قائم آهي جنهن جي ڪري ڪوبه شريف ماڻهو ٿاڻي تي وڃڻ کي بهتر نه سمجھندو آهي سو سرفراز نواز شِخ صاحب جون اهي ڪوششون جس لهڻيون آهن ته پوليس ۽ عوام ۾ پيدا ٿيل وڇوٽيون ختم ٿيڻ گھرجن ته جيئن ڪوبه مظلوم شخص بنا ڪنهن ڊپ جي ٿاڻي تي وڃي پنهنجي ايف آءِ آر داخل ڪرائي سگھي، سو اسين اڳتي به سرفراز نواز شيخ صاحب سان گڏ پوري سنڌ جي پوليس آفيسرن مان اها اميد رکنداسين ته هو به پوليس کاتي ۾ اهڙو هڪ سٺو نظام قائم ڪن جيئن انصاف هر امير توڙي غريب کي پلئه پئجي سگھي.

 

سياسي مخالفت کي خونريزي ۾ تبديل نه ڪيو.!: ڪامريڊ منان چانڊيو

ڪجهه ڏينهن اڳ ميهڙ شھر ۾ ميرراڻي برادري جي پڳدار ۽ چانڊيا تمندار جي ڪنوينر رئيس مختيار احمد چانڊيو، ڪرم الله ۽ ڀاءُ قابل کي سندس ئي برادري جي ماڻھن حملو ڪري قتل ڪري ڇڏيو. جڏھن ته جوابي ڪاروائي ۾ ھڪ جوابدار قادن نالي پڻ مارجي ويو. ٽن مقتولن جي وارثن چانڊيا قبيلي جي سردار ايم پي اي سردار خان چانڊيو ۽ برهان خان چانڊيو مٿان الزام هڻي قتل جي ايف آءِ آر داخل ڪرائي ڇڏي آھي. ٻئي طرف وري جوابدار مقتول قادن جي قتل جي ايف آءِ آر سندس گهرواري ٻئي ڌر تي داخل ڪرائي ڇڏي آھي مٿي ڄاڻايل خوني وارڌات ۾ ملوث ڄاڻايل هڪ جوابدار به هن وقت تائين گرفتار ڪونه ٿي سگهيو آھي.

اسان جي نظر ۾ ٻن پٽن ۽ پيءُ جو قتل ڪو معمولي واقعو ڪونه آھي. ڇو ته هڪ ته هڪ گهر جا ٽي فرد هڪ وقت ئي بيدرديءَ سان قتل ڪيا وڃن. ٻيو ته مقتول پ پ جي ٽڪيٽ تي مڪاني ادارن جا چونڊيل عيوضي هجن. ٽيون ته اهي علائقي جا وڏا زميندار، ڪاروباري ۽ لکيا پڙھيا هجن، ۽ سڀ کان وڏي ۽ اهم ڳالجه ته رئيس مختيار چانڊيا قبيلي جي، جن جا نواب سردار خان سان ڪن معاملن تي اختلاف هيا. انهن برادرين تي ٻڌل تمندار ڪائونسل جو ڪنوينر هيو. چوڻ جو مطلب ته مارجي ويل ماڻھو گهڻ رخي فيملي جا فرد ائين اوچتو ۽ بنا ڪنهن خاص تڪرار ۽ سبب جي ماريا وڃن. ان جي پويان ضرور ڪا نه ڪا سازش يا سگهاري ڌر هوندي، جنهن جو اظهار مختيار چانڊيو جي وڏي پٽ صدام چانڊيو ڪري چڪو آھي.

جيئن ته پاڻ چئي چڪا آھيون ته ٽن معزز ماڻھن جو قتل عام رواجي ڪونهي ۽ ان جي اهميت اڃا ان ڪري وڌي وئي آھي ته اهڙي سانحي جي متاثرين چانڊيا نواب ڀائرن تي قتل جو ڪيس داخل ڪرائي ڇڏيو آھي. هنن سنڌ سرڪار ۽ چيف جسٽس آف پاڪستان کان مطالبو ڪيو آھي ته سمورن قاتلن کي بنادير گرفتار ڪيو وڃي. جتي نوابن سميت جوبدارن جي گرفتاري لاءِ تمندار ڪائونسل ۽ ميرراڻي برادري جي گهڻائي ۽ احتجاجي تحريڪ شروع ڪئي آھي. اتي وري نوابن تي قتل جو ڪيس داخل ٿيڻ خلاف ڪيترين ئي شھرن ۾ احتجاج جو جو سلسلو شروع ٿيڻ کان پوءِ ھڪ طرف سردار خان چانڊيو ۽ برهان خان کي پڻ ان گناهه ۾ بيڏوهي ثابت ڪرڻ لاءِ ڪيترائي دليل ڏئي رهيا آھن. ته ٻئي پاسي ميرراڻي برادري جا پڳدار ۽ تمندار ڪائونسل جا ميمبر نواب گهراڻي کي ان قتلن ۾ سڌا سنوان ملوث ڄاڻاين ٿا. اهي ڌرين جون ڳالھيون پنهنجي جڳهه تي اهميت رکن ٿيون. پر ايڏي وڏي خونريزي ڪندڙن کي ڪنهن جي پشت پناهي حاصل ٿيل آھي؟ انهن جا سهولتڪار ڪير آھن؟ جيستائين اهي پيچيده مامرا ظاهر ۽ حل نه ٿيندا اوستائين افواهن ۽ نفرتن جا طوفان برپا ٿيندا رهندا. خدا نه ڪري اهي طوفان برادرين وچ ۾ وڏي خونريزي جا ڪارڻ بنجي سرداري ۽ تمنداريءَ تي ماڻھو مارائڻ جا نه مٽجندڙ گناهه ۽ داغ بنجن.

اسان ميهڙ سانحي ۽ ان کان پوءِ امڪاني خطرناڪ صورتحال تي لکڻ کان پهريون چانڊيا قبيلي ۽ ان جي سرسدارن تمندارن بابت مختصر لکندي اهو ٻڌائيندا هلون ته سنڌ ۾ جڏھن ڄام نظام الدين عرف ندو خان جي حڪومت هئي ۽ سندس وطن ۽ عوام دوست گورنر دولهه دريا خان هو ان وقت اتر سنڌ ۾ چانڊيا قبيلي جي گهڻائي رهندي هئي. جن جو سردار سريمڻ خان هيو. هي اهو دور هيو جڏھن قابل ۽ قنڌار کان پٺاڻ ارغون لشڪر ڪشي ڪري سنڌي ماڻھن جو مال متاع ۽ عورتون به کڻي ويندا هئا. ڌارين جي اهڙن ظلمن جو شڪار چانڊيا قبيلي وار پڻ ٿيندا هئا. جڏھن پٺاڻن جا ظلم وڌي ويا ته دولهه دريا خان سوين سپاهي ساڻ ڪري ڳوٺ مرزا پور ۾ اچي ڪئيمپ هنئين. ان وقت اتر سنڌ جي ڪجهه ماڻھن کي اها به شڪايت هئي، ته چانڊيا به ساڻن ڏاڍايون ڪن ٿا. انڪر دولهه دريا خان پنهنجا خاص ماڻھو چانڊين سردار ڏانهن موڪليا ته هو اچي پنهنجي صفائي پيش ڪن. اهڙي نياپي کان پوءِ سريمڻ خان اچي دولهه دريا خان سان مليو ۽ اهو ثابت ڪيو ته هنن جو ڪنهن به مڪامي ماڻهن نيزاءُ ڪونهي. هو ته خود ارغونن جا ستايل آھن. جڏھن دولهه دريا خان انهن ڳالهين مان مطمعين ٿيو ته سريمڻ خان ۽ سمي سومري جي ڪمان ۾ سوين سپاهي ارغونن سان هڪ هڪاڻي ڪرڻ لاءِ قنڌار روانا ٿي ويا، ۽ اتي زنوبيگ جي لشڪر ۽ قلعي کي فتح ڪيو. اهڙي ڪاميابي تي دولهه دريا خان تمام گهڻو خوش ٿيو ۽ چانڊيا قبيلي جي سردار کي پنهنجي برادري سميت لکين ايڪڙن تي مشتمل چانڊڪا انعام طور ڏني. اها جاگير ڪيترين پيڙھين تائين چانڊيا برادري جا ماڻھو آباد ڪندا رهيا. جن مان ست حصا آبادگار ۽ اٺو حصو چانڊيا سردار جي پڳ جو هيو. مگر افسوس ته جڏھن سنڌ کي انگريزن فتح پئي ڪيو، تڏھن ان وقت جي چانڊيا سردار کي پاڻ سان ملائي پنهنجو تعبيدار مقرر ڪري سر نوابي جو لقب عطا ڪرڻ سان گڏوگڏ سموري چانڊڪا جاگير به هن جي حوالي ڪري ڇڏي. بس پوءِ ان ڏينهن کان وٺي چانڊيا قبيلي جي سردار کي پنهنجي ماتر ڀومي ۽ سنڌي قوم سان غداري عيوض جاگير ملي. جيستائين چانڊيا قيبلي جي تمندارن جي ڳالهه آھي، ته ان قبيلي جون ڪيتريون ئي برادريون آھن. جھڙوڪ، معرفاڻي، چولياڻي، سوماراڻي، غيبياڻي، ميرراڻي، ساکاڻي، ميروواڻي، حسناڻي، بجيراڻي وغيره انهن برادرين ۾ وري ڪيترائي پاڙا اچي وچن ٿا. جنهن ڪري ان برادري جي هڪ ئي پڳدار کي تمندار چيو ويندو آھي. ان کان علاوه وري هر هڪ پاڙي جو رئيس يا چڱو مڙس ٿيندو آھي.

بهر حال، پاڻ ڳالهه پئي ڪئي، ميهڙ سانحي ۾ چانڊيا نوابن کي ملوث ڄاڻائڻ جي. ته اها به حقيقت آھي ته انگريز سامراج کان وٺي ملڪ تي جيڪي به مارشل لائون جڪي ملڪ تي نافز ٿيون آھن. انهن سمورين غير جمهوري قوتن جي چانڊيا قبيلي جي سردارن سلامي ۽ غلامي وارو ڪردار ادا ڪندا پيا اچن. هنن ڪڏھن به سنڌي قوم، عوام ۽ پنهنجي قبيلي وارن سان سٺو ورتاءُ ڪونه ڪيو آھي. هو صرف ۽ صرف پنهنجي ذاتي، انا ۽ مالي فائدن لاءِ خاص ڪري پنهنجي قبيلي وارن کي قربان ڪندا رهن پيا. اهو ئي سبب آھي، ته ماضي ۾ پڻ چانڊيا قبيلي جي ڪيترين ئي برادرين چانڊيا نوابن سان سياسي ۽ سماجي تعلقات ٺوڙي پنهنجي اڀري سڀري لڏي مان ڪم پئي ورتو آھي. هاڻي تازوئي جڏھن چانڊيا قبيلي جي ڪيترين ئي برادرين جي تمندارن ۽ چڱن مڙسن سمجهو ته کين سردار نظر انداز ڪري/ڏسو صفحو 3 بقايا نمبر 01

رهيا آھن. تڏھن هنن گڏجي هڪ تمندار ڪائونسل قائم ڪئي. ان ڪائونسل جا مقصد ڇا هئا؟ ۽ هو ڪرڻ ڇا پيا ڇاهين؟ اڃا ان قسم جي ڪا واضح ڳالهه سامهون ڪونه آئي هئي، ته ان ڪائونسل جي ڪنوينر مختيار چانڊيو کي پيءُ پٽ سميت قتل ڪيو ويو. هتي اهو به ٻڌائيندا هلون ته مختيار سميت معرفاڻي برادري جو تمندار رئيس ٺارو خان ۽ ٻيا سردار خان ۽ سندس ڀاءُ جا خاص ماڻھو رهيا آھن. جنهن جو مثال ان مان لڳائي سگهجي ٿو، ته گذريل مڪامي اليڪشن ۾ جتي ٺارو خان معرفاڻي پنهنجي سڳن ڀائرن جي مخالفت ڪندي ڀوتارن جي ڀر ۾ بيٺو. اتي مختيار به  پنهنجي گهراڻي سميت ڀوتار جي شفقت ھيٺ رهيو. ته پوءِ آخرڪار اهي ڪهڙا ڪارڻ آھن؟ جو تمندار ڪائونسل ٺهي ۽ ان جي پليٽ فارم تان پنهنجي سردار خلاف ڪا وڏي بغاوت ڪرڻ کان اڳ ئي مختيار پيءُ پٽ سميت مارجي ويو؟ واضح رهي ته مختيار ۽ سندس گهر ڀاتين جي قتل کي جنهن پراڻي تڪرار جو پلاند يا نتيجو سڏيو پيو وڃي. ان تڪرار ۾ چار ماڻهو اڳ ۾ ئي مختيار جي ڌر جا قتل ٿي چڪا آھن، ۽ انهن جو ڏنڍ ڏوهه به ٻي ڌر ڀري ڏنو. ته پوءِ ھاڻي ظاهري طور تي ڪوبه ان قسم جو جواز ڪونهي. ٻئي ڳالهه ته هن وقت تمندار ڪائونسل ۽ نوابن وچ ۾ سياسي اختلاف وڌي جهيڙي واري صورتحال اختيار ڪئي آھي. ان ڪري ڌرين کي ئي صبر تحمل کان ڪم وٺڻ کپي، ۽ اهڙو قدم نه کئڻ گهرجي، جنهن سان چانڊيا قبيلي جي مختلف برادرين ۾ خونريزي جو انديشو هجي. آخر ۾ سردار خان کي گهرجي ته هو پنهنجي مٿان لڳل سنگين تهمت مان پاڻ کي آجو ڪرائڻ لاءِ ڪنهن مناسب ۽ غير جانبدار ڌر يا فورم وٽ پنهنجو پاڻ کي پيش ڪري. اسين آخر ۾ چانڊيا قبيلي جي انهن ماڻھن جي ڀوتار جي خوشامند حاصل ڪرڻ لاءِ آپي کان نڪري احتجاج ڪري رهيا آھن. انهن کي گهرجي ته هو ميھڙ سانحي جي متاثرين سان همدردي ڪندي قاتلن جي گرفتاري لاءِ آواز بلند ڪن، ۽ ان اکان سواءِ سنڌ سرڪار ۽ آءِ جي سنڌ کي به غير جانبداري جو مظاهرو ڪندي مقتولن جي قاتلن، انهن جي پشتپناهي ڪندڙن ۽ سهولتڪارن خلاف بنا دير خاص ۽ عام جي قدم کڻي ڪيفر ڪردار تائين پهچائين. ته جيئن چانڊيا قبيلو ۽ ان جون برادريون هڪ وڏي خونريزي کان بچي سگهن.

 

پاڻي جي کوٽ ۽ پاڪستان جي معيشت تي پوندڙ اثر..!!!: غلام مصطفي جمالي 

اسٽيٽ بئينڪ آف پاڪستان  پنهنجي بيان ۾ چيو آهي ته ايندڙ تورڙي وقت اندر پاڪستان اندر پاڻي جي شديد کوٽ پيدا ويندي جنهن پاڻي جي کوٽ سبب ملڪ جي معيشت تي اهڙا اثر پوندا جو ملڪ جي معيشت پاڪستان واسين لاءِ هڪ وڏو چئلنج هوندو.بدلجندڙ موسمون ۽ شهرين جي وڌندڙ آبادي ۽ پاڻي جي قلت شهرين توڙي ٻهڙارين واري علائقن ۾ پاڻي جي کوٽ انساني زندگي توڙي جنگي جيوت ۽ جانورن لاءِ تمام گهڻي خطرناڪ ثابت ٿيندي.سٽينٽ بئينڪ آف پاڪستان پنهنجي سال 2016ع ۽ 2017ع جي هڪ جائزي رپورٽ اندر اهڙو انڪشاف ڪيو ويندو آهي جنهن اندر سٽينٽ بيننڪ آف پاڪستان اهو به چيو آهي ته پاڻي جي مسلسل وڌندڙ کوٽ خلاف حڪومت موثر حڪمت عملي جوڙي ڪري پاڻي جي معاملي تي غور ويچار ڪري.جڏهن ته پاڻي بابت ماهرين ڪيتري عرصي کان وٺي خبردار ڪندا پيا اچن.

هر سال جيان هن ٻن سالن اندر به  پاڪستان جي وڏي ۾ وڏي تربيلا ڊيم ۾ مسلسل پاڻي کي کوٽ ٿي رهي آهي، جڏهن ته هن وقت پاڻي گهڻي سنگين صورتحال اختيار ڪري ويو آهي جنهن مان بجلي جي پيداوا ۾ مسلسل کوٽ ٿي رهي آهي ۽ اهو عام ڏسڻ ۾ اچي رهيو آهي ته پاڻي جي کوٽ بجلي جي بحران جو اهم سبب بڻبي ۽ ملڪ ۾ هن وقت جيتري بجلي جي لوڊشِينگ هلي رهي آهي انهي لوڊ شِيٽگ ۾ پڻ واڌ جو انديشو آهي جنهن سان ملڪ جي معيشت تي وڏي اثر پوندو،۽ حڪمرانن جون ملڪ مان بجلي جي بحران کي ختم ڪرڻ واريون ڳاليهون صرف هڪ ڳالهين تائين محدود ٿي وينديون.جڏهن ته هن وقت سموري ملڪ اندر بجلي جو سنگين بحران هلي رهيو آهي ۽ بجلي ۾ پيدوار ۾ 40کان 50فيصد کوٽ ٿي وئي آهي،هن وقت تربيلا اندر پاڻي جي کوٽ ٻڌائي پئي وڃي ٻئي پاسي منگلا ڊيم اندر صرف پاڻي  فٽن تي  وڃي بچيو آهي،ٻنهي ڊيمن ۾ مسلسل پاڻي جي کوٽ ذرعي ضرورتن لاءِ پڻ هڪ وڏو سواليه نشان بڻيل آهي،خاص طور صوبي سنڌ اندر جتي سال جا ٻارهن مهينا پاڻي جي کوٽ رهندي آهي، حڪومت تربيلا ڊيم جي واڌاري واري منصوبي لاءِ عالمي بينڪ کان وڌيڪ قرض حاصل ڪري ورتو آهي. ان سلسلي ۾ ناڻي واري وزير اسحاق ڊار جي صدارت هيٺ تربيلا ڊيم جي واڌاري واري منصوبي جي حوالي سان اجلاس پڻ  ٿيو هو. جنهن اجلاس ۾ انٽرنيشنل بئنڪ جي نمائندن به شرڪت ڪئي هئي . اجلاس ۾ ورلڊ بئنڪ جي اختيارين ٻڌايو ته تربيلا ڊيم جي واڌاري واري منصوبي لاءِ قرض جو انتظام ٿي ويو آهي. ته انٽرنيشنل بئنڪ 39 ڪروڙ ڊالر ڏيندي. هنن چيو هو ته ايشين بئنڪ منصوبي جي انفراسٽڪچر انسويسٽ مينٽ لاءِ 30 ڪروڙ ڊالر جڏهن ته داسوڊيم لاءِ ٻه ارب ڊالر به ڏيندي..   تربيلا ڊيم پاڪستان لاءِ اهم تاريخي ڊيم آهي. حڪومت لوڊشيڊنگ جي خاتمي لاءِ ڪم ڪري رهي آهي. توانائي شعبي ۾ سڌارا حڪومتي ترجيحن ۾ شامل آهن.پر وري ٻئي پاسي ڪالهه حڪومت پاران اهو به اعلان ڪيو ويو آهي ته تربيلا ڊيم اندر پاڻي جي کوٽ شدت اختيار ڪري وئي آهي انڪري ملڪ مان لوڊشينگ ختم ڪرڻ نه پري جي ڳالهه آهي پر وڌيڪ لوڊشِيٽنگ ٿيڻ جا امڪان آهن،پاڪستان واپڊا پاران جيڪا لسٽ جاري ڪئي وئي آهي ان اندر ٻڌايو ويو آهي تربيلا ڊيم اندر پاڻي جو ذخيرو1380ڊيڊ لائين تي اچي پهتو آهي،جڏهن ته ڊِيم جو استعمال لاءِ قابل پاڻي صرف ۽ صرف 60هزار ڪيوسڪ وڃي بچيو آهي، تربيلا ڊيم اندر پاڻي جي آمد16هزار800ڪيوسڪ آهي ۽ پاڻي جو نيڪال 60هزار ڪيوسڪ آهي،انڪري ايندڙ هفتي تائين تربيلا ڊيم مان ايترو پاڻي خارج ڪري سگهجي ٿي جيترو پاڻي تربيلا اندر داخل ڪيو ويندو.

اختارين پاران اهڙو به بيان ڏنو ويو آهي ته جيڪڏهن تربيلا مان پاڻي جو نيڪال وڌيڪ ڪيو ويو ته ان سان هائيڊل پاور سسٽم کي پاڻي جي موجود کان وڌيڪ نقصان پهچائي سگهي ٿي،هڪ طرف تربيلا ڊيم جي صورتحال ڪجهه اهڙي آهي ته ٻئي پاسي ٻيو پاڻي جي ذخيرو جو وڏي ۾ وڏو ڊيم منگلا ڊيم جنهن اندر پاڻي جو ذخيرو ڊِيڊ ليول14فٽ کان مٿي جي آهي،جتي هن وقت پاڻي جو ذخيرو1050فٽ جي سطح تي آهي،جڏهن ته ڊِيڊ ليول1040فٽ آهي،جنهن ڪري اهو خدشو آهي ته انهي ڊيم اندر به ٻن ڏينهن ۾ پاڻي ڊيڊ لائين تي پهچي ويندو. هن وقت منگلا ڊيم ۾ پاڻي جي آمد 2600هزار700ڪيوسڪ آهي ۽ نيڪال 20 ڪيوسڪ آهي،جڏهن ته قابل استعمال پاڻي جو ذخيرو1لک2هزار ڪيوسڪ آهي، ۽ ٻئي پاسي اهو به ٻڌايو پيو وڃي ته پاڪستان جي هڪ ٻئي وڏي ڊيم ريزروائر ۾ به پاڻي جي مسلسل کوٽ ٿي رهي آهي،جنهن اندر به پاڻي جو گڏ ڪيل ذخيرو تقريبن ختم ٿيڻ وارو آهي،جتي پاڻي جي ڊِيڊ لائين 637فٽ آهي ۽ هن وقت اتي پاڻي جي سطح 639فٽ آهي،

اختيارين پاران ٻڌايو ويو آهي ته ٻنهي ڊيمن اندر پاڻي جي مسلسل کوٽ انتهائي سنگين صورتحال اختيار ڪري وئي آهي،۽ بجلي جي پيدوار صرف هڪ هزار ميگا واٽ وڃي رهي آهي،جيڪا پاڻي جي پوري دستيابي وقت 5هزار ميگا واٽ بجلي پيدا ڪندي هئي،جنهن ڪري ڊيمن ۾ پ/ڏسو صفحو 3 بقايا نمبر 02
اڻي جي مسلسل کوٽ سبب بجلي جي/ڏسو صفحو 3 بقايا نمبر 01
پيداور ۾ پريشانيون پيش اچي رهيون آهن ۽ ملڪ کي بجلي جي فراهمي لاءِ سمورو بار ٿرمل پاور هائوس ۽ گئس پارو پلانٽن کي برداشت ڪرڻو پوندو،جنهن مان اهو واضع آهي ته پوري ملڪ اندر بجلي جي بحران جو انڊيشو آهي،۽ ،ملڪ ۾ بجلي جي قلت 4هزار ميگا وارٽ تائين پهچي سگهي ٿي،انڪري شهري آبادي گهٽ ۾ گهٽ 6 ۽ ٻهراڙين واري علائقن ۾ بجلي جي لوڊشيٽنگ 9کان 10 ڪلاڪ ڪئي ويندي،۽ اها بجلي جي لوڊشِينگ گليشيئر تان جيستائين برف نه ٿي ڳري ان وقت تائين بجلي جو بحران برقرار رهندو،۽ جڏهن جبلن تان برفف ڳڙي پاڻي جي صورتحال اختيار ڪري ڊيمن ۾ داخل ٿيندي ان وقت ٻئي ڊيم پاڻي جي بحران کان بچي ويندا.

پاڻي جي مسلسل کوٽ جتي پاڪستان اندر وڏا بحران پيدا ڪيا آهن اتي پاڪستان جي صوبي سنڌ ۾ به وڏيون تباهيون آنديون آهن، اسان جي سنڌ ۾ سڀئي پڇڙين واريون آباديون پاڻي جي هڪ ڦڙي لاءِ  تڙپي رهيون آهن ۽ هر طرف ڪربلا جا منظر آهن هن زرعي ملڪ ۾ ماڻهن جو 100 سيڪڙو گذارو ٻني ٻاري تي آهي ۽ پاڻي نه هجڻ سبب زمينون ڀڙڀانگ بڻجي ويون آهن جنهن سبب ماڻهو لڳ ڀڳ چئن سالن کان بلڪل بيروزگار بڻجي ويا آهن جنهن سبب هڪ پاسي ته ماڻهن وڏي پيماني تي لڏپلاڻ ڪئي آهي ته ٻئي طرف شهر ويران بڻجي ويا آهن. اها صورتحال صرف ۽ صرف پاڻي جي کوٽ جي ڪري پيدا ٿي آهي،

 

قرآن جي حافظ هٿان کٿاڀي جو قتل ۽ وارثن جي بيحس خاموشي…!

معصوم گلن جهڙن ٻارڙن تي تشدد توڙي قتل جا واقعا هاڻي ته روز جو معمول بڻجي چڪا آهن، هر روز اخبارن ۾ معصوم ٻارڙن سان ٿيندڙ ظلمن جا قصا پڙهڻ ڪاڻ ملن پيا، ڪجهه ڏينهن پهرين معصوم ٻارڙي زينب جو واقعو پيش آيو جيڪا پاڪ ڪتاب پڙهڻ وئي پر واپس سندس جو لاش مليو ۽ قانون جا رکوالا اڳ جيان پنهنجي خانه پوري ۾ لڳل آهن توڙي جو سپريم ڪورٽ توڙي پاڪ آرمي به نوٽيس ورتو تنهن هوندي به قاتل پڪڙ کان آجا آهن. اهي قصا اڃان ذهن تان لٿائي نه هئا جو وري ملير جي علائي پپري ۾ 9 ورهين جي معصوم ٻارڙي جي قتل جو واقعو اخبارن جي زينت بڻيو آهي، رپورٽن موجب ته پپري جي عيدو ڳوٺ ۾ ٻارڙن کي ٽيوشن پڙهائيندڙ مولوي قاري نجم الدين اسلامي منزل ۾ قرآن جا 10 سيپارا ياد ڪري يارنهين سيپاري کي ياد ڪندڙ کٿابي 9 ورهين جي محمد حسين  سبق ٻڌائيندي چڪون ڪيون جنهن تي مولوي آپي مان نڪري ويو ٻارڙي کي مولوي ڏنڊن، لتن ۽ مڪن سان ايترو تشدد ڪيو جو ٻارڙو تشدد برداشت نه ڪندي موقعي تي ئي فوت ٿي ويو.  اطلاع ملندي ئي علائقي جا سوين رهواسي مدرسي پهچي ويا، جن مدرسي کي گهيرو ڪري ورتو ۽ مولوي کي مدرسي مان فرار ٿيڻ جو موقعو نه ملي سگهيو. پولس پهچي مولوي کي گرفتار ڪيو ۽ ٻارڙي جو لاش کي وارثن حوالي ڪيو. ٻارڙي جو لاش کڻڻ باوجود ان جي وارثن مولوي خلاف ڪا به ڪارروائي ڪرڻ کان نابري واري ڇڏي آهي، وارثن جي ان بيحسي کي ڪهڙو نالو ڏجي جن پنهنجي جگر جي ٽڪر مٿان ٿيندڙ ظلم باوجود خاموش بڻيل آهن،  ايس ايڇ او بن قاسم موجب مولوي نجم شاگرد تي تشدد ڪيو، اسان پهتاسين ته وارثن لاش کڻي پنهنجي حوالي ڪيو. هنن نه رڳو اسپتال نيڻ کان انڪار ڪيو، پر مولوي خلاف ڪيس داخل ڪرڻ کان به انڪار ڪري ڇڏيو، وارثن به ڪيس داخل نه ڪرايو پر  مولوي جي گرفتاري بعد پوليس جي مدعيت ۾ ڪيس داخل ڪيو آهي جنهن ۾ صاف ظاهر آهي ته پوليس پنهنجا کيسا ڀريندي ۽ هي ڪيس به اڳتي هلي عوام جي ذهن تان مٽجي ويندي،