تازيون خبرون

Daily Archives: January 22, 2018

سياستدانن کي عدالتن ۾ گهليو پيو وڃي، آمرن کان ڪير به پڇڻ وارو ناهي: وزيراعظم پاڪ

اسلام آباد (اين اين آءِ)  وزيراعظم شاهد خاقان عباسي چيو آهي ته ججز جو چهرو عوام اڳيان اچڻ گهرجي، ڇو ته کين تاريخي فيصلا ڪرڻا آهن ان لاءِ ڪمزور شخص کي جج لڳائينداسين ته ڀوڳڻو پوي ٿو، ججن جي پارلياماني نگراني سڄي دنيا ۾ هوندي آهي، آمريڪا سميت سچي دنيا ۾ جج جي مقرري وقت ان جي سڄي ڄمار کي ڏٺو ويندو آهي ان لاءِ اهو ئي معيار رکڻ گهرجي، پارليامينٽ کي ڪو به خطرو نه آهي، چونڊون جولاءِ ۾ ٿينديون، سينيٽ چونڊن کان اڳ حڪومت جي وڃڻ ۽ اسيمبلي ٽوڙڻ جون ڳالهيون اڳ به ٿينديون رهيون، اسيمبلي ٽوڙڻ جا 2 طريقا آهن، نواز شريف ۽ پارٽي فيصلو ڪري ۽ مونکي ٻڌائين ته مان اسيمبلي ٽوڙيندس، جيڪڏهن اپوزيشن ۾ همت آهي ته بي اعتمادي واري رٿ پيش ڪري، اسيمبلي ٽوڙڻ جو ٽيون ڪو به طريقو نه آهي، نگران وزيراعظم جو فيصلو ماضي وانگر نه ٿيندو، نگران وزيراعظم جو فيصلو آئين موجب ڪنداسين، منهنجي خلاف ڪا به سازش نه پئي ٿئي، سازش تي ڪڏهن به يقين ناهي ڪيو، جيڪي مظاهرا ڪن ٿا سندن عقل کي داد ڏيان ٿو، جيڪي لعنتي آهي اهي پاڻي ئي سمجهي ويندا، حيران آهيان ته اسيمبلي ميمبر ۽ پارٽي سربراهه اسيمبلي کي گهٽ وڌ ڳالهائين ٿا، جيتري شفاف هيءَ حڪومت آهي ملڪ جي تاريخ ۾ ڪڏهن ناهي آئي، هتي وزيراعظم جي آفيس ۾ روڪ رشوت ورتي ويندي هئي، هتي گيس جا ڪنيڪشن ۽ 45 هزار ڪلاشنڪوف جا لائسنس وڪرو ڪيا ويا، اين آر او چور ڪندا آهن اسان چور نه آهيون، آمرن کان ڪير پڇڻ وارو نه آهي، سياستدانن کي عدالت ۾ گهليو وڃي ٿو، سياستدانن کي ڪڏهن هائيجر ۽ ڪڏهن سسلين مافيا چيو وڃي ٿو، مشرف غلط فيصلو ڪيو ان کان ڪير به پڇڻ وارو نه آهي، هو لنڊن ۽ دبئي ۾ مزا ماڻي رهيو آهي، جمهوريت کي هلڻ ڏيو، هر ادارو جڳهه بڻائڻ جي ڪوشش ڪري رهيو آهي پر عوام ان کي قبول ڪري ٿو جيڪو فطرت موجب هجي، ايسٽ انڊيا ڪمپني ۽ پاڪستان ۾ چيني سيڙپ جي ڀيٽ درست نه آهي، ايسٽ انڊيا ڪمپني جهاز ۽ فوجي لاڪر پهريان فتح ڪيو پوءِ واپار ڪيو، پر هتي چيني سيڙپ آڻي پاڪستان جي مدد ڪري رهيا آهيون، 20 هزار چيني رهواسي پاڪستان ۾ آهن، چيني حڪومت پاڪستان ۾ پنهنجن شهرين جي ڏوهن ۾ ملوث هئڻ جو سخت نوٽيس ورتو آهي، ڊو مور تي آمريڪا کي چئي چڪا آهيون ته پهريائين گهڻو ڪجهه ڪري چڪاسين، دهشتگردي خلاف پاڪستان پنهنجي ۽ دنيا جي جنگ وڙهي رهيو آهي، ختم نبوت جو بل منظور ڪرڻ ۾ سڀ جماعتون شامل هيون، حافظ حمد الله جي ترميم منظور ڪئي وڃي ها ته اهو معاملو نه اٿئي ها، ان حوالي سان راجا ظفر الحق رپورٽ عوام ڏانهن وڃڻي آهي جنهن جو تفصيلي جائزو ورتو پيو وڃي، ٻارڙن جي ڏوهن بابت قانون ۾ ڪمي نه آهي، سومر تي وزيراعظم آفيس ۾ پارلياماني رپورٽرز ايسوسيئيشن جي وفد سان ڳالهائيندي وزيراعظم چيو ته سڄي دنيا ۾ اهو نظام هوندو آهي ته قورم پورو هجي يا نه هجي ايوان جو اجلاس جاري رهندو آهي پوءِ ڇو نه ايوان ۾ هڪ ميمبر موجود هجي، پارلياماني ۾ ٿيندڙ بحث رڪارڊ جو حصو هوندو آهي، پارلياماني رپورٽز جو ڪافي اهم ڪردار آهي، ان ذريعي تڪ جي عوام کي خبر پوي ٿي ته ان جو نمائندو اسيمبلي ۾ ڇا ڪري رهيو آهي، اليڪٽرانڪ ميڊيا جي اهميت پنهنجي جاءِ تي پر پرنٽ ميڊيا جي تڪ جي عوام ۾ وڏي اهميت هوندي آهي، اهي پنهنجي نمائندي جي تفصيلي خبر پڙهندا آهن، هن چيو ته آمريڪا پاران پاڪستان کي ڪنهن قسم جو فوجي ٿريٽ ڪڏهن به نه هو، اسان جي فوج جيڪو ڪم ڪيو آهي، سڄي دنيا گڏجي به افغانستان ۾ اهو ڪم ناهي ڪيو، افغانستان ۾ جيڪي بجيٽ خرچ ڪئي پئي وڃي، اها اسان جي دفاعي بجيٽ کان وڌيڪ آهي، افغان پاڻ ۾ ويهندا ته مسئلو حل ٿيندو، هن چيو ته ملڪ ۾ سيڙپ اچي رهي آهي جيڪو ڪم نواز شريف جي حڪومت 5 سالن ۾ ڪيو آهي اهو ڪم 65 سالن ۾ ناهي ٿي سگهيو، ان تي اسيمبلي سميت هر هنڌ بحث ڪرايو اسان ان لاءِ تيار آهيون، وزيراعظم چيو ته جيڪي مظاهرا ڪري رهيا آهن اهو پنهنجو پاڻ چڱي طرح سڃاڻين ٿا، عمران خان، آصف علي زرداري طاهر قادري جي قيادت ۾ مظاهرو ڪري رهيا آهن مان سندن عقل کي داد ڏيان ٿو، وزيراعظم چيو ته پارليامينٽ کي ڪو به خطرو نه آهي، اپوزيشن جو ڪم احتجاج ڪرڻ هوندو آهي، جيڪڏهن اپوزيشن ايوان ۾ ايجنڊا ڦاڙڻ بدران ان تي بحث ڪري ۽ مسئلا اڳيان آڻي ته بهتر ٿيندو، وزيراعظم چيو ته ختم نبوت جي معاملي تي ن ليگ ڏوهي نه آهي، حقيقتون موجود آهن، حڪومت ان معاملي تي بيڪ فوٽ تي ناهي وئي، هي حڪومت جو بل نه هو، پارلياماني ڪميٽي جوو بل هو جيڪو اسميبلي منظور ڪيو، سينيٽ ۾ ويو ۽ پوءِ سينيٽ ڪميٽي ۾ به ان تي بحث ٿيو، سينيٽ ۾ سينيٽر حافظ حمد الله ان جي نشاندهي ڪئي، ن ليگ حافظ حمد الله جي حق ۾ ووٽ ڏنو جڏهن ته پ پ ان جي مخالفت ڪئي، اسان جو موقف صاف آهي، شاهد خاقان عباسي چيو ته ايندڙ عام چونڊن ۾ ن ليگ جي چونڊ مهم جي قيادت نواز شريف ڪندو، ووٽ بينڪ ميان نواز شريف جو آهي، جهڙي طرح پ پ کي بينظير کانسواءِ ووٽ نٿو ملي سگهي اهڙي طرح ن ليگ کي به نواز شريف کانسواءِ ووٽ نٿو ملي سگهي، راجا ظفر الحق جي رپورٽ عام ڪرڻ بابت هن چيو ته پارلياماني ڪميٽي جا هڪ سئو 4 اجلاس ٿيا آهن، ان سموري رڪارڊ کي ڏسي رهيا آهيون هر شيءِ جو جائزو وٺي اها رپورٽ پڌري ڪئي ويندي. هڪ سوال جي جواب ۾ هن چيو ته تجارتي خسارو گهٽائڻ لاءِ قدم کڻي رهيا آهيون ان ۾ سمنڊ پار پاڪستانين جو وڏو ڪردار آهي، معاشي ايجندا هاڻ سياسي تبديلي کان ڌار ٿي ويو آهي، 1990 ۾ جيڪو معاشي ايجنڊا ن ليگ ڏنو هو سڀ حڪومت ان کي نظر ۾ رکي هلي رهيون آهن، پي آءِ اي کي اسان نه خانگائينداسين ته ايندڙ حڪومت خانگائيندي.

 

انڪائونٽر اسپيشلسٽ روپوش ٿي ويو، گهر تي ڇاپو، 2 اهلڪار گرفتار، آءِ جي سنڌ ترديد ڪري ڇڏي

ڪراچي  (اين اين آءِ) نقيب محسود قتل ڪيس ۾ اڳوڻي ايس ايس پي ملير رائو انوار جي گهر تي ڇاپو هنيو، گهر ۾ ٻن پوليس اهلڪارن کانسواءِ ٻيو ڪير به نه هو، پوليس ذريعن ٻڌايو ته رائوا انوار جي گهر تي موجود ٻن پوليس اهلڪارن کي حراست ۾ ورتو ويو جن کان جاچ ڪئي پئي وڃي، واضح رهي انڪائونٽر اسپيشلسٽ جاچ ڪميٽي پاران گهرائڻ جي باوجود گذريل ڏينهن پيش نه ٿيو هو، ڪميٽي کيس منجهند هڪ وڳي طلب ڪيو آهي، ڪميٽي جي سربراهه سلطان خواجه چيو ته رائو انوار سان لاڳيتو رابطو ڪرڻ جي ڪوشش ڪري رهيا آهيون پر سندس فون بند آهي، هن چيو ته مارجي ويل نقيب الله جو مختلف ٿاڻن تان ڪو به ڪرمنل رڪارڊ نه مليو آهي.  نقيب الله جي عدالت کان مٿانهين قتل ۾ ملوث پوليس آفيسر رائو انوار پنهنجو موبائيل فون نمبر بند ڪري ڇڏيو آهي، جڏهن ته رائو انوار سميت انڪائونٽر ٽيم جا سمورا ميمبر روپوش ٿي ويا آهن، رائو انوار ۽ ملوث اهلڪارن کي گرفتار ڪرڻ جو فيصلو ڪيو ويو آهي، ڊسٽرڪٽ ملير ۾ مقرر رائو انوار جي 16 اهم ماڻهن کي عهدن تان هٽايو ويو، تفصيل موجب رائو انوار پنهنجي ئي کاتي خلاف ڄمي بيٺو ۽ روپوش ٿي ويو، جڙتو مقابلي جي جاچ ٽيم رابطي جي ڪافي ڪوشش ڪئي پر رائو انوار هٿ نه آيو، ڊي آءِ جي ايسٽ ماڻهو موڪليو پر رائو انوار جواب ڏيڻ جي به زهمت نه ڪئي، جاچ ڪندڙ انڪوائري ٽيم هڪ ڀيرو ٻيهر رائو انوار کي سومر تي طلب ڪيو هو پر هو ڪميٽي اڳيان پيش نه ٿيو، جاچ ڪميٽي جو آچر جي رات 11 وڳي ڊي آءِ جي ايسٽ جي آفيس ۾ اجلاس ٿيو جنهن ۾ سومر جي صبح ساڍي 10 وڳي سينيٽرل پوليس آفيس ۾ رائو انوار کي پنهنجي ٽيم سميت پيش ٿيڻ جو حڪم ڏنو ويو هو پر رائو انوار آءِ جي سنڌ جي حڪمن کي ٿڏي ڇڏيو ۽ پيش نه ٿيو، جڏهن ته هيومن رائيٽس ٽيم ۽ اعليٰ پوليس آفيسر سي پي او ۾ ان جو انتطار ڪندا رهيا، ڪميٽي موجب رائو انوار کي ثابت ڪرڻو پوندو ته نقيب الله دهشتگرد هو،ڪيس ۾ رائو انوار کي جوابدار طور نامزد ڪرڻ جو فيصلو نقيب الله جي گهرڀاتين کي ڪرڻو آهي، سلطان خواجه موجب رائو انوار ڪميٽي اڳيان پيش ٿيڻ کان پاسو ڪري رهيو آهي، ٻئي پاسي جاچ ڪميٽي جڙتو مقابلي جا ثبوت ملڻ تي رائو انوار ۽ مقابلي ۾ ملوث سمورن پوليس اهلڪارن کي گرفتار ڪري ورتو آهي.

 

ڪنهن به ڀارتي جارحيت جو منهن ٽوڙ جواب ڏنو ويندو: آرمي چيف

راولپنڊي(ويب ڊيسڪ) آرمي چيف جنرل قمر جاويد باجوه چيو آهي ته 2003ع واري سيز فائر معاهدي جي پاسداري کي ڪمزوري نه سمجهيو وڃي ڪنهن به ڀارتي جارحيت جو منهن ٽوڙ جواب ڏنو ويندو. پاڪ فوج جي شعبي آءِ ايس پي آر موجب آرمي چيف جنرل قمر جاويد باجوه لائن آف ڪنٽرول ۽ ورڪنگ بائونڊري تي کوئي رٽ ۽ اريان سيڪٽرن جو دورو ڪيو جتي مقامي ڪمانڊرن آرمي چيف کي ڀارت طرفان جنگبندي جي ڀڃڪڙين تي بريفنگ ڏني. آفيسرن کيس ڀارتي فوج طرفان شهري آبادي کي نشانو بڻائڻ بابت ٻڌايو جواب ۾ آرمي چيف پاڪ فوج طرفان ڀارت کو موثر ۽ ذميواراڻو جواب ڏيڻ واري عمل کي ساراهيو. ڊي جي آءِ ايس پي آر ميجر جنرل آصف غفور موجب آرمي چيف لائن آف ڪنٽرول تي حفاظتي قدمن کي وڌيڪ بهتر ڪرڻ جي هدايت ڏيندي چيو ته 2003ع جي سيز فائر معاهدي جي پاسداري کي ڪمزور نه سمجهيو وڃي ڪنهن به ڀارتي جارحيت جو منهن ٽوڙ جواب ڏنو ويندو.  بعد ۾ آرمي چيف سي ايم ايڇ ڪمبائنڊ ملٽري هوسپٽل سيالڪوٽ جو دورو ڪيو جتي هن تازي ئي ڀارت طرفان ٿيل شيلنگ سبب زخمي ٿيلن جي عيادت ڪئي.

 

چيف جسٽس ٻين بدران پنهجي اداري کي ٺيڪ ڪري: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ خورشيد شاهه چيو آهي ته چيف جسٽس ٻين کي بهتر ڪرڻ بدران پنهنجي اداري کي ٺيڪ ڪري، عدالتون انصاف نه هونديون آهن، حڪمراني لاءِ ناهن هونديون، عدالتن ۾ 8 لک ڪيس التوا هيٺ آهن، ان کي به گورننس چيو وڃي ٿو، عمران خان پاران استعيفائن جي اعلان کانپوءِ پي ٽي آءِ جي اسيمبلي ميمبرن جون فوري استعيفيائون اچڻ گهرجن ها، رائو انوار قبائيلي نوجوان نقيب الله جي قتل جي جاچ ڪندڙ ڪميٽي اڳيان پيش نه ٿيندو ته ان جي خلاف جوڊيشل انڪوائري ٿيندي، سومر تي ميڊيا سان ڳالهائيندي خورشيد شاهه چيو ته چيف جسٽس ٻين کي بهتر ڪرڻ بدران پنهنجي اداري کي ٺيڪ ڪري، پوءِ ٻين کي به ٺيڪ ڪرڻ جي اجازت آهي، سپريم ڪورٽ ۾ ججن جو انگ وڌائي 35 ڪرڻ گهرجي، پنجاب هاءِ ڪورٽ ۾ ججن جو انگ 60 کان 80، جڏهن ته سنڌ ۾ 45 هئڻ گهرجي، سيد خورشيد شاهه پي ٽي آءِ تي تنقيد ڪندي چيو ته عمران خان پاران استعيفيٰ جي اعلان کانپوءِ پي ٽي آءِ جا اسيمبلي ميمبر جلد استعيفائون ڏين ها، انهن استعيفائن جي ڳالهه سسٽم کي غير مستحڪم ڪرڻ لاءِ ڪئي پر اسان جمهوري پارٽي آهيون ان لاءِ سسٽم کي ڊي ريل ٿيڻ نه ڏينداسين. پي ٽي آءِ پارليامينٽ مان 11 ڪروڙ رپين کان وڌيڪ پگهارون ۽ مراعتون ورتيون، عمران خان به 70 کان 80 لک رپيا ورتا آهن، هو واپس ڪري، استعيفائن تي پي ٽي آءِ جو ٻٽو معيار آهي، شهباز شريف پاران نيب اڳيان پيش نه ٿيڻ جي سوال تي هن چيو ته شهباز شريف پيش نه ٿيو ته نيب جو ادارو نه هلي سگهندو، قانون سڀني لاءِ هڪجهڙو هئڻ گهرجي، ٻٽو معيار نه هئڻ گهرجي، قانون جا بکيا اڊيڙيا پيا وڃن، ادارا خاموشي سان ڏسي رهيا آهن، اهڙي طرح ته ادارا ختم ٿي ويندا، خورشيد شاهه رائو انوار کي پ پ جي پٺ ڀرائي هجڻ جي سختي سان ترديد ڪندي چيو ته آصف زرداري رائو انوار جي پٺ ڀرائي نه پيو ڪري، جيڪڏهن رائو انوار نقيب الله جي قتل جي جاچ ڪميٽي اڳيان پيش نه ٿيندو ته ان جي خلاف جوڊيشل انڪوائري ٿيندي، رائو انوار کي ڀڃڻ نه پر ڪيس کي منهن ڏيڻ گهرجي، بي گناهه ماڻهو شهيد ٿيو، انصاف ملڻ گهرجي، هن چيو ته رياست جي ڪمزوري سان افراتفري پکڙجي ٿي، پوءِ ته جيڪو ڏاڍو هوندو ان جو ئي راڄ هوندو.

 

پاڪستان ۾ جمهوريت وڌي ويجهي رهي آهي: مريم اورنگزيب

اسلام آباد (اين اين آءِ) سڌ سماءَ جي ملڪتي وزير مريم اورنگزيب چيو آهي ته پاڪستان ۾ جمهوريت وڌي ويجهي رهي آهي، پارلياماني نظام وڌيڪ مضبوط ٿي رهيو آهي، هلندڙ سال مئي جون جمهوريت جي ڏهه سال مڪمل ٿيڻ جي خوشخبري سان اڀرندو، 2018 ۾ عوام ووٽ جي حق سان اقتدار منتقل ڪرڻ جو ٻيو جمهوري روشن باب لکندو، پاڪستاني ميڊيا کي حاصل آزادي جا ڪٿي ٻيا مثال نٿا ملن، پاڪستان ۾ اقلتيون محفوظ ۽ عورتون بااختيار آهن، قومي ڌاري ۾ انهن جو ڪردار وڌي رهيو آهي، ماضي کان موجوده پاڪستان وڌيڪ روشن آهي، انشاالله جلد دنيا خوشحال پاڪستان جي تصوير ڏسندي، سومر تي ورلڊ اڪنامڪ فورم ۾ شرڪت لاءِ ڊيوس روانگي کان اڳ ڳالهائيندي هن چيو ته ڪا به ڏکيائي مسلم ليگ ن جي حڪومت کي قومي ترقياتي حدف حاصل ڪرڻ کان نه روڪي سگهجي، قائد اعظم جي نظريي سان جديد ۽ روشن پاڪستان جي معمار مسلم ليگ ن آهي، مملڪتي وزير چيو ته ڪروڙين شهرين جو سوشل ميڊيا جو ڀرپور استعمال ثبوت آهي ته پاڪستان جديد ٽيڪنالاجي جي استعمال ۾ ترقي يافته دنيا کان پوئتي نه آهي، هن چيو ته پارليامان اطلاعن تائين پهچ جو حڪومت جو پيش ڪيل بل پيش ڪري جمهوريت کي طاقت ڏني، مريم اورنگزيب چيو ته ان بل جي منظوري ۾ سمورين سياسي پارٽين جو ڪردار واکاڻ جوڳو آهي، هن چيو ته دنيا جو پاڪستان کي اڀرندڙ معيشت طور تسليم ڪرڻ حڪومتي ڪارڪردگي جو چٽو ثبوت آهي، مريم اورنگزيب چيو ته پاڪستان راندين، ثقافت ۾ خاص دلچسپي رکندڙ زنده دل قوم آهي، هن چيو ته موجوده حڪومت علم ۽ ادب ۽ فلم جي شعبن کي فعال ڪري رهي آهي، مريم اورنگزيب چيو ته سڌ سماءَ، قومي صحت، وزيراعظم يوٿ پروگرام، انفارميشن ٽيڪنالاجي جي وزارتن جي قيادت عورت ڏئي پاڪستان جي عورتن کي بااختيار بڻايو ويو، مملڪتي وزير چيو ته ماضي کان موجوده پاڪستان وڌيڪ روشن آهي، لوڊشيڊنگ ختم ۽ توانائي جي بحران تي ضابطو آندو ويو آهي، هن چيو ته انشاالله جلد دنيا خوشحال پاڪستان جي تصوير ڏسندي.

 

ٻارن جي ڏاڍائي وارن ڪيسن لاءِ ڊجيٽل ايف آءِ آر داخل ڪرڻ وارو سسٽم متعارف ڪرايو وڃي: وڏو وزير

ڪراچي (اين اين آءِ) سنڌ جي وڏي وزير سيد مراد علي شاهه چيو آهي ته وومين پوليس اسٽيسشن ضلعي سطح تي قائم آهن اتي چائلڊ پروٽيڪشن يونٽ بڻايا ويا آهن جن کي پوليس ۽ سول سوسائيٽي جي مدد سان فعال ڪرڻو آهي. هن چيو ته مان انهن يونٽس کي آئوٽ سورس ڪرڻ جو پڻ خواهشمند آهيان. هن چيو ته ڊويزنل هيڊ ڪوارٽرن ۾ پوليس ۾ فيسليٽيشن سينٽرن اندر ٻارن جي حفاظت جو يونٽ به قائم ڪيو وڃي، ڇاڪاڻ ته اسانکي پنهنجن ٻارن جو تحفظ فراهم ڪرڻو آهي ۽ کين حفاظت ڪرڻي آهي ۽ معاشري جي به ان حوالي سان تربيت ڪرڻي آهي. هن اها ڳالهه اڄ وزيراعليٰ هائوس ۾ چائلڊ پروٽيڪشن ڪميٽيءَ بابت هڪ اهم اجلاس جي صدارت ڪندي ڪئي. اجلاس ۾ صوبائي وزير تعليم ۽ قانون، اڳوڻو چيف جسٽس سنڌ هاءِ ڪورٽ جسٽس (ر) ناصر اسلم زاهد، وڏي وزير جو سوشل ويلفيئر وارو صلاحڪار، وڏي وزير جو هيومن رائيٽس بابت اسپيشل اسسٽنٽ، چيف سيڪريٽري سنڌ، وڏي وزير جو پرنسپل سيڪريٽري، سيڪريٽري اسڪول ايجوڪيشن، صوبائي گهرو سيڪريٽري، سيڪريٽري سوشل ويلفيئر، سيڪريٽري هيومن رائيٽس، آءِ جي پوليس سنڌ، زندگي ٽرسٽ جو شهزاد راءِ، ايڊووڪيٽ ضياءَ احمد اعواڻ، ايگزيڪيوٽو ڊائريڪٽر انڊس رسورس سينٽر صديقه صلاح الدين، چيف ايگزيڪيوٽو انڊس اسپتال عبدالباري خان، مئنيجر آهنگ ڪراچي عائشه اعجاز ۽ چيئرمين پيس اين آءِ سي ايڇ اِي خالد محمود شرڪت ڪئي. وڏي وزير سيد مراد علي شاهه چيو ته ٻارن لاءِ هڪ ڊيٽا مئنيجمينٽ سسٽم قائم ڪيو وڃي. هن چيو ته ٻارن جي ڏاڍائي وارن ڪيسن لاءِ ڊجيٽل ايف آءِ آر داخل ڪرڻ وارو سسٽم متعارف ڪرايو وڃي. هن چيو ته جنهن ٻار سان ڏاڍائي ٿئي ان کي پوليس اسٽيشن وڃن نه گهرجي، ٻارن جي والدين ۽ وارثن کي ڄاڻ هئڻ گهرجي ته ڏاڍائيءَ جي صورت ۾ ڇا ڪرڻ گهرجي. هن چيو ته اسانکي ٻارن سان گڏوگڏ سندن والدين کي به ان حوالي سان ضروري سکيا ۽ آگاهي ڏيڻ گهرجي. ان ڳالهه جو پڪو پهه ڪندي وڏي وزير چيو ته مان هر مهيني هڪ ڀيرو چائلڊ پروٽيڪشن ڪميٽيءَ جو اجلاس باقائدگيءَ سان منعقد ڪندس. آءِ جي پوليس اي ڊي خواجا ٻارن جي پروٽيڪشن بابت ڊويزنل هيڊڪوارٽرز ۾ قائم فيسليٽيشن سينٽر ۾ هڪ ڊيسڪ قائم ڪرڻ جي پڻ تجويز ڏني.

 

سپريم ڪورٽ جو فوجي عدالتن مان سزا مليل 3 جوابدارن جي ڦاهي تي عمل روڪڻ جو حڪم

اسلام آباد (اين اين آءِ) سپريم ڪورٽ فوجي عدالتن مان موت جي سزا مليل 3 ڏوهارين جي سزا تي عمل روڪڻ جو حڪم ڏئي ڇڏيو، سومر تي جسٽس عظمت سعيد جي سربراهي ۾ سپريم ڪورٽ ڪيس جي ٻڌڻي ڪئي. جوابدار شفقات، صابر شاهه ۽ محمد لياقت جي درخواستن تي ٻڌڻي ڪئي، ڌرين جا دليل ٻڌڻ کانپوءِ سپريم ڪورٽ ٽنهي جوابدارن جي سزا تي عمل ايندڙ حڪم تائين متلوي ڪري ڇڏيو.

 

شريف فيملي نيب ۽ اعليٰ عدليه کي ڌمڪيون ڏيڻ شروع ڪري ڇڏيون آهن: عمران خان

اسلام آباد(ويب ڊيسڪ) تحريڪ انصاف جي چيئرمين عمران خان چيو آهي ته شريف ڪٽنب نيب اعليٰ عدليه کي ڌمڪيون ڏيڻ شروع ڪري ڇڏيون آهن، عوام هاڻ سندن ڊڪٽيٽرشپ ۽ فرعونيت کي قبول نه ڪندو. سماجي رابطن واري ويب سائيٽ ٽوئيٽر تي ٽوئٽ ڪندي تحريڪ انصاف جي چيئرمين عمران خان جو چوڻ هو ته اربين رپين جي ڪرپشن ظاهر ٿيڻ کان پوءِ شريف خاندان نيب ۽ اعليٰ عدليه کي ڌمڪيون ڏيڻ شروع ڪري ڇڏيون آهن اهو عمل انتهائي شرم جوڳو ۽ قبول نه ڪرڻ جوڳو آهي. هن وڌيڪ چيو ته عوام شريف فيملي جي ڊڪٽيٽرشپ ۽ فرعونيت کي هاڻ وڌيڪ قبول نه ڪندو جيڪا گذريل 30 سالن کان جاري آهي.

 

ڦليلي واهه ۾ گندگي وڏو مسئلو آهي جنهن کي هنگامي بنيادن تي حل ڪيو وڃي: سربراهه واٽر ڪميشن

حيدر آباد (اين اين آءِ) سنڌ ۾ پيئڻ جي صاف پاڻي جي چڪاس لاءِ سپريم ڪورٽ جي حڪم تي ٺاهيل واٽر ڪميشن جي اڳواڻ ريٽائرڊ جسٽس امير هاني مسلم حيدرآباد جي ميئر ۽ ضلعي انتظاميه سان گڏ ڦليلي واهه جو دورو ڪيو. ريٽائرڊ جسٽس امير هاني مسلم واهه جي صورتحال جو جائزو وٺندي چيو ته واهه ۾ گندگي هڪ وڏو مسئلو آهي جنهن کي هنگامي بنيادن تي حل ڪيو وڃي. هن حيدرآباد ميونسپل ڪمشنر کي هدايت ڪئي ته واهه کي ستن ڏينهن ۾ گندگي کان پاڪ ڪيو وڃي ته جيئن ماڻهن کي پيئڻ جي صاف پاڻي جي سهولت ملي سگهي.

 

زينب قتل ڪيس: 6 ٻارڙين جي قتل جو جوابدار هڪ ئي آهي: پنجاب پوليس

اسلام آباد (اين اين آءِ) پ پ اڳواڻ سينيٽر رحمان ملڪ چيو آهي ته سڄي قوم ڄاڻن گهري ٿي ته زينب جا قاتل ڪير آهن، تجويز ڏينداسين ته اهڙا ڏوهه ڪندڙن کي ڦاهي ڏني وڃي، جيڪڏهن اسان معصوم ٻارڙن جي ڪوڪن، دانهن جو جواب نٿا ڏئي سگهون ته اسان ناڪام آهيون، سومر تي رحمان ملڪ جي صدارت هيٺ سينيٽ جي گهرو قائمه ڪميٽي جو اجلاس ٿيو جنهن ۾ قصور ۾ جنسي ڏاڍائي کانپوءِ قتل ڪيل معصوم زينب جي والد محمد امين ۽ پنجاب پوليس جي عملدارن اجلاس ۾ شرڪت ڪئي، اجلاس ۾ مقتول زينب ۽ مردان ۾ مقتول عاصمه لاءِ دعا ڪئي وئي، اجلاس ۾ قصور ۽ مردان ۾ نينگرين جي مارجڻ جي خلاف مذمتي ٺهراءُ به منظور ڪيو ويو، ٺهراءَ جي متن موجب ٻارڙن کي اغوا ۽ جنسي ڏاڍائي ڪندڙ جوابدارن کي ڦاهي تي چاڙهيو وڃي، ٻارڙن سان جنسي ڏاڍائي ۽ ٻين ڏوهن لاءِ ڪميشن جوڙيو وڃي، ٻارڙن بابت ڏوهه روڪڻ لاءِ پوليس واٽس اپ نمبر متعارف ڪرايو وڃي، اجلاس ۾ بلوچستان ۾ پوليو ورڪز ۽ سيڪيورٽي اهلڪارن جي شهادت تي به فاتح خواني ڪئي وئي، اجلاس ۾ زينب جي والد محمد امين چيو ته ان ڏينهن منهنجو ڀائٽيو عثمان نياڻي سان سپارو پڙهڻ ويو هو، منهنجو ڀائٽيو سپارو پڙهڻ هليو ويو پر زينب سپارو پڙهڻ نه پهتي، منهنجي نياڻي کي ان ڏينهن پيسا به هئا، اسان پنهنجي مدد پاڻ تحت نياڻي کي ڳولڻ جي گهڻي ڪوشش ڪئي، هن چيو ته جنهن ڏينهن زينب اغوا ٿي ان رات اسان 15 تي ڪال ڪئي هئي، پوليس وارا ايندا هئا، ڪنو کائيندا ۽ چانهن پئيندا هئا، جڏهن لاش مليو هو ان وقت کوجي ڪتن جي مدد سان جوابدار جي سڃاڻپ ڪري سگهجي پئي، اسان پنهنجي فيملي جا سڀ کان پهريان ڊي اين اي ڪرايا، هن چيو ته علائقي جي ماڻهن جا ڊي اين اي ورتا پيا وڃن، پوليس پاران ڪافي ماڻهن کي تنگ ڪرڻ جي شڪايت اچي رهي، ٻه 3 شڪي ماڻهن عمر، آصف ۽ رانجها کي پولس پڪڙيو آهي، پوليس ٻڌايو آهي ته گرفتار ڪيل جوابدارن جو زينب معاملي سان ڪو به تعلق نه آهي، مون پوليس کي چيو آهي ته انهن کان وڌيڪ جاچ ڪيو، ڏک ٿو ٿئي ته 12 کان 13 ڏينهن گذري ويا جوابدار گرفتار نه ڪيو ويو آهي، اسان ٻارڙن کي سمجهايو هو ته ڪنهن کان ڪا به شيءِ وٺي نه کائڻ گهرجي، اسان کي جلد کان جلد انصاف ملي، هن چيو ته جيئن جوابدار پڪڙيو وڃي، هڪ هفتي ۾ ڪيس هلائي سرعام ڦاهي ڏني وڃي، جنهن جو قانون ٺاهيو وڃي ان جو نالو زينب شهيد جي نالي تي رکيو وڃي، سينيٽر رحمان ملڪ چيو ته اوهان جي نياڻي ته نٿا آڻي سگهون پر اوهان جي زخمن تي مرحم ضرور رکنداسين، انچارج انويسٽيگيشن ٽيم ڊي آءِ جي ابوبر خدا بخش بريفنگ ۾ ٻڌايو ته جولاءِ کان هن وقت تائين جاچ موجب زينب سميت ٻين نينگرين عاصمه،لائبا، تهمينا، نور فاطمه، ايمان فاطم، ثنا سان جنسي ڏاڍائي ٿي، 31 آڪٽومبر 2017 کان هن وقت تائين 696 ڊي اين اي ڪيا ويا ۽ 692 ماڻهن کان جاچ ڪئي وئي، 125 ڊي اين اي جو رلزٽ اڃاتائين ناهي آيو، زينب جو قاتل سڀاڻي به پڪڙجي به سگهجي ٿو ۽ ڪافي مهينا به لڳي سگهن ٿا، پر يقين سان ڪجهه نٿا چئي سگهون، اسان هڪ اهڙو جوابدار به پڪڙيو جنهن هڪ سال ۾ 25 فون جون سمون تبديل ڪيون، ان جوابدار جو به ڊي اين اي ڪرايو آهي، ڊي آءِ جي مردان عاصمه قتل بابت ڪيمٽي کي ٻڌايو ته 13 جنوري تي عاصمه اغوا ٿي، پوسٽ مارٽم ڪرايو ويو جنهن مان خبر پئي ته کيس گهٽو ڏئي قتل ڪيو ويو، ريپ، قتل ۽ انتقام کي مٿي رکندي جاچ ڪئي پئي وڃي، جيو فينسنگ به ڪئي پئي وڃي، اجلاس ۾ زينب ۽ عاصمه لاءِ دعا گهري وئي ۽ واقعن جي خلاف مذمتي ٺهراءُ منظور ڪيو ويو.