تازيون خبرون

Daily Archives: January 2, 2018

پاڪستان کي 33 ارب ڊالر امداد ڏئي بيوقوفي ڪئي: (ٽرمپ)، ٽرمپ افغانستان ۾ ناڪامي تي مايوس آهي: خواجه آصف

واشنگٽن/اسلام آباد/لاهور(م.ڊ) آمريڪي صدر ڊونلڊ ٽرمپ هڪ ڀيرو ٻيهر پاڪستان تي تنقيد ڪندي چيو آهي ته آمريڪا گذريل 15 سالن دوران اسلام آباد کي 33 ارب ڊالرز امداد ڏئي چريائپ ڪئي. ڊونلڊ ٽرمپ 2018ع جو پهريون ٽوئيٽ ئي پاڪستان بابت ڪيو، جنهن ۾ هن هڪ ڀيرو ٻيهر پاڪستان تي ڇتي تنقيد ڪئي. هن چيو ته پاڪستان اسان کي ڪوڙ ۽ دوکي کانسواءِ ٻيو ڪجهه به ناهي ڏنو ۽ اسان جي اڳواڻن کي پاڪستان بيوقوف سمجهيو. پرڏيهي وزير خواجا آصف چيو آهي ته جلد ٽرمپ جي ٽوئيٽ جو جواب ڏئي دنيا کي سچائي ٻڌائينداسين ته حقيقت ۽ افساني ۾ فرق آهي. پرڏيهي وزير خواجا آصف سماجي رابطي جي ويب سائيٽ ٽوئيٽر  ۽ ڪيپٽل ٽاڪ شو ۾ آمريڪي صدر جي بيان تي رد عمل ڏيندي چيو ته انشاءَ الله جلد ڊونلڊ ٽرمپ جي ٽوئيٽ جو جواب ڏينداسين ۽ دنيا کي سچائي ٻڌائينداسين. هن چيو ته ٽرمپ افغانستان ۾ آمريڪا جي ناڪامي تي مايوسي جو شڪار آهي، هن چيو ته اسان آمريڪا کي پهرين ئي نو مور چئي چڪا آهيون، ٽرمپ جي نو مور جي ڪا به اهميت ناهي، آمريڪا کي گهرجي ته افغانستان ۾ فوجي طاقت بجاءِ ڳالهين جو رستو اختيار ڪري، امريڪا کي هڪ هڪ پائي جو سرعا حساب ڏيڻ لاءِ تيار آهيون، پرڏيهي وزير چيو ته صدر ٽرمپ جي بيان تي غُور جي لاءِ وفاقي ڪابينا جو اجلاس طلب ڪيو اهي، هوڏانهن آمريڪي صدر ڊونلڊ ٽرمپ جي پاڪستان خلاف بيان کانپوءِ وفاقي ڪابينا جو اجلاس اڄ طلب ڪيو ويو آهي خانگي ٽي وي ذريعن جي حوالي سان ٻڌايو آهي ته اجلاس وزيراعظم شاهد خاقان عباسي جي صدارت هيٺ ٿيندو جنهن ۾ آمريڪي صدر جي نئين بيان سميت ڏکڻ ايشيا پاليسي جا معاملا به غور هيٺ آندا ويندا. وفاقي ڪابينا اجلاس ۾ ملڪ جي سلامتي صورتحال سميت اهم قومي معاملن تي ويچار ڪيو ويندو.

 

مشرف بهادر آهي ته ڏيهه واپس اچي، سعودي عرب ۾ پچندڙ کچڙي جي خبر ناهي: آصف زرداري

لاهور (اين اين آءِ) پاڪستان جي اڳوڻي صدر آصف علي زرداري چيو آهي ته اين آر او ٿي رهيو آهي يا ڪفيل کي بچائڻ ويا ميان ڀائرن جي سعودي عرب موجودگي بابت ڪيترائي افواهه آهن جڏهن ته پرويز مشرف ۾ ايترو ڌم آهي ته هو پاڪستان اچي پنهنجي خلاف ڪيسن کي منهن ڏي نيب سنڌ ۾ هميشه ظلم ڪيو ڊاڪٽر طاهرالقادري جي شڪل ۾ نوابزاده نصرالله جي ڪمي پوري ٿي رهي آهي اهڙن خيالن جو اظهار هن ڊفينس ۾ پارٽي جي پراڻي ڪارڪن جاويد اختر سان ماءُ جي لاڏاڻي تي تعزيت جو اظهار ۽ فاتحه خواني کان پوءِ صحافين سان ڳالهائيندي ڪيو آصف علي زرداري نوازشريف جي سعودي عرب ۾ موجودگي جي حوالي سان سوال جي جواب ۾ چيو ته اتي ڪرپشن جيخلاف مهم به هلي رهي آهي سعودي شهزادي ڪرپشن الزامن تي ڪيترائي ماڻهو پڪڙيا اهن ميان ڀائرن جي حوالي سان به ٽن چئن قسمن جون ڳالهيون ٿي رهيون آهن جن مان هڪ ته اين آر او آهي ۽ اهو به چيو پيو وڃي ته شريف خاندان ڪنهن ڪفيل وٽ سيڙپ ڪئي آهي جنهن کي بچائڻ وڃي رهيا آهن ٿي سگهي ٿو ته شريف ڀائرن جا سعودي عرب ۾ ڪي اشو هجن سعودي عرب اسان جو پراڻو دوست ملڪ آهي ۽ جڏهن ته پ پ پ حڪومت ۾ سعودي عرب جو پاڪستان تي ايترو وڌيڪ اثر رسوخ نه هو هڪ سوال جي جواب ۾ هن چيو ته جڏهن اين آر او ٿيو ته هو ان وقت جيل ۾ بند هو ۽ ڪوشش ڪئي ويئي ته هو به هڪ جهاز ۾ سوار ٿئي پر الله کيس حوصلو ڏنو ۽ هن هي ڪم نه ڪيو جيڪڏهن پرويز مشرف ۾ ايتري جرئت آهي ته ٻاهرين ملڪ رقص بدران پاڪستان ۾ اچي ۽ ڪيسن کي منهن ڏي. جڏهن انکان سوال ڪيو ويو ته پاڪستان عوامي تحريڪ ماڊل ٽائون سانهي تي جيڪو احتجاج ڪرڻ جي تياري ڪري رهي ته ڇا ان پ پ پ به شامل ٿيندي ته ان جو چوڻ هو ته ان حوالي سان فيصلو پارٽي اڳواڻن جي مشاورت سان ڪيو ويندو پ پ پ جي ڪو چيئرمين چيو ته الله تعاليٰ جو شڪر آهي جو نوابزاده نصرالله خان بابر جي جيڪا ڪمي اسان کي محسوس ٿي رهي هئي اها ڊاڪٽر طاهرالقادري جي صورت ۾ پوري ٿيندي نظر اچي رهي آهي آصف زرداري کان نيب جي حوالي سان سوال ڪيو ويو ته هن چيو ته نيب سنڌ ۾ هميشه پ پ پ تي ظلم ڪيو ۽ صوبي ۾ هڪ اهڙو ڪئنال بند ڪرائي ڇڏيو جيڪو 26 لک ايڪڙ زرعي ايراضي کي آباد ڪندو آهي نيب وٽ ڪهڙو اوزار آهي جو پاڻي جي لائيننگ کي چيڪ ڪري.

 

نئين سال جو پهريون ڏينهن، لاڙڪاڻي ۾ جهيڙو، 3 قتل، حادثي ۾ 2 اجل جو شڪار

لاڙڪاڻو (اين اين آءِ) لاڙڪاڻو ويجهو زمين جي تڪرار تي کهڙا ۽ ڀٽو برادري جي ٻن ڌرين وچ ۾ ٿيل جهيڙي سبب 3 ڄڻا مارجي ويا ۽ 2 زخمي ٿي پيا آهن. لاڙڪاڻي ويجهو نئون ديرو جي ڪچي واري علائقي ڳوٺ ٻرڙا ۾ زمين جي تڪرار تي کهڙا ۽ ڀٽو برادري جي هٿياربندن پاران هڪ ٻئي مٿان فائرنگ ڪئي وئي، جنهن سبب ڀٽا برادري جا 3 ڄڻا مومن ڪڙيو، ناهيد ناريجو ۽ صدورو ڪڙيو مارجي ويا ۽ 2 زخمي ٿي پيا آهن واقعي کانپوءِ ڪيترائي ڪلاڪ لاش واقعي واري هنڌ پيل رهيا جڏهن ته فائرنگ بند ٿيڻ کانپوءِ ڪي ٽي ممتاز ٿاڻي جي پوليس لاش ۽ زخمين کي نئون ديرو اسپتال پهچايو، ٻنهي ڌرين ۾ زمين جو پراڻو تڪرار هلندڙ آهي جنهن سبب اهو واقعو پيش آيو. ٻئي پاسي آخري اطلاع ملڻ تائين واقعي جو ڪيس داخل نه ٿي سگهيو هو.  لاڙڪاڻو ۽ ڀرپاسي ۾ مختلف حادثن ۽ واقعن ۾ هڪ ٻارڙي سميت 2 ڄڻا فوت، 2 عورتون ۽ ٻار زخمي جڏهن ته هڪ ڇوڪرو بيهوش ٿي ويو. تفصيل موجب قمبر وڳڻ لنڪ روڊ وٽ تيز رفتار ڪار ۽ موٽر سائيڪل وچ ۾ ٽڪر ٿيو جنهن سبب ميهڙ تعلقي جي ڳوٺ سان تعلق رکندڙ عورت مسرت ٽن ورهين جو معصوم پٽ سس ليلا ۽ سهرو جان محمد مارفاڻي سخت زخمي ٿي پيا جن کي ڳڻتي جوڳي حالت ۾ چانڊڪا اسپتال نيو ويو جتي زخمن جا سور نه سهندي جان محمد مارفاڻي فوت ٿي ويو جنهن جو لاش وارث کڻائي ويا، ٻئي پاسي لاڙڪاڻي شهر جي ڀينس ڪالوني جي علائقي ۾ گهر جي ڀت ڪرڻ سبب چئن ورهين جو عرفان ۽ سندس سڳو ڀاءُ ولي زمان سخت زخمي ٿي پيا جن کي وارث زخمي حالت ۾ چانڊڪا اسپتال کڻائي ويا جتي چئن ورهين جو ٻار عرفان حليو فوت ٿي ويو. جنهن جو لاش وارث کڻائي ويا جڏهن ته زخمي ولي زمان جي حالت خطري کان ٻاهر ٻڌائي پئي وڃي. ماهوٽا ويجهو ڳوٺ قاداڻي ۾ زرعي زمين جي زهريلي دوا سنگهڻ سبب 14 ورهين جو عبدالخالق گاداڻي بيهوش ٿي ويو جنهن کي چانڊڪا اسپتال نيو ويو ڊاڪٽرن موجب بيهوش ڇوڪري جي حالت ڳڻتي کان ٻاهر آهي.

 

پئٽروليم شين جي اگهن ۾ اضافو حڪومتي پاليسين جي ناڪامي آهي: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد احمد شاهه نئين سال جي آغاز تي پيٽرول ڊيزل گاسليٽ ۽ لائيٽ ڊويزن جي قيمتن ۾ واڌ تي افسوس جو اظهار ڪيو اهي ۽ ان کي حڪومت جي پاليسين جي ناڪامي ڪوٺيو آهي هن چيو ته مهانگائي ۽ بيروزگاري جي موجوده فضا ۾ تيل جي قيمتن ۾ واڌ ظلم آهي اسان ڪنهن به صورت عوام هي ظلم نه ٿيڻ ڏينداسين مخالف ڌر اڳواڻ چيو ته حڪومت ملڪ ۽ قوم تي اندروني ۽ بيروني قرضن جو بار رکي ڇڏيو آهي جنهن جو نتيجو عوام کي ڀوڳڻو پئجي رهيو آهي هن چيو ته حڪومت جي اها دعويٰ ڪٿي آهي ته مالياتي ريزرو ملڪي تاريخ جي بلند سطح تي اهي اپوزيشن ليڊر چيو ته حڪومت پهريان پيٽرول تي ناجائز ٽيڪس مڙهي عوام جي کيسن مان اربين رپيا ڪڍي رهي آهي ۽ هاڻي پيٽرول ڊيزل ۽ گاسليٽ جون قيمتون وڌائي عوام لاءِ مهانگائي جو نئون طوفان آندو آهي هن چيو ته پيپلزپارٽي عوام تي هي ٻٽو عذاب نازل ٿيڻ نه ڏيندي ۽ حڪومت جي صحت تعليم ترقي ۽ خوشحالي جي ڪوڙين دعوائن کي بي نقاب ڪندي. هن چيو ته حڪومت پيٽرو ڊيزل ۽ تيل جي قيمتن ۾ واڌ جلد کان جلد واپس وٺي.

 

نئين سال جي خوشين ۾ شهيدن جي قربانين کي ياد رکڻ گهرجي: پاڪ فوج جو ترجمان

راولپنڊي( ويب ڊيسڪ ) پاڪ فوج جي ترجمان ميجر جنرل آصف غفور  شهرين کي نئين سال 2018ع جون واڌايون پيش ڪندي چيو آهي ته خوشيءَ جي موقعي تي شهيدن جي قربانين کي به ياد رکڻ گهرجي. پاڪ فوج جي ترجمان ميجر جنرل آصف غفور سماجي رابطن جي ويب سائيٽ ٽوئٽر تي جاري ڪيل بيان ۾ چيو ته سڄي ملڪ ۾ نئين سال جو جشن قوم جي حيثيت ۾ اسان جي ڪاميابين ۽ عزم جو عڪاس آهي. ڊي جي آءِ ايس پي آر  ميجر جنرل آصف غفور چيو ته اسان کي خوشيون شهيدن جي قربانين سبب مليون آهن، اسان کي نئين سال جي موقعي تي شهيدن جي قربانين کي نه وسارڻ گهرجي ۽ سندن ٿورا مڃڻ جي ضرورت آهي. ان کان اڳ آرمي چيف جنرل قمر جاويد باجوه پنهنجي پيغام ۾ چيو هو ته 2018ع غير معمولي چئلينجن سان گڏ نهايت اهميت وارو آهي، جڏهن ته پاڪستان جي عزم کي ڪو به شڪست نه ٿو ڏئي سگهي.

 

پارليامينٽ قانون سازي جو سڀ کان وڏو ادارو آهي: سپريم ڪورٽ

اسلام آباد (اين اين آءِ)  سپريم ڪورٽ چونڊ سڌارا ايڪٽ جي خلاف درخواستون ٻڌڻي جوڳيون قرار ڏيندي پاڪستان مسلم ليگ (ن) جي صدر اڳوڻي وزيراعظم محمد نوازشريف ۽ اليڪشن ڪميشن سميت سمورين ڌرين کي نوٽيس جاري ڪري ڇڏيا آهن جڏهن ته چيف جسٽس، جسٽس ثاقب نثار اڳوڻي وزيراعظم نوازشريف جي پارٽي صدر بڻجڻ جي خلاف درخواستن جي ٻڌڻي دوران ريمارڪس ڏنا آهن ته پارليامينٽ قانون سازي جو سڀ کان وڏو ادارو آهي سومر تي چيف جسٽس ميان ثاقب نثار جي سربراهي ۾ سپريم ڪورٽ جو ٽن ميمبرن تي ٻڌل بئنچ نوازشريف جي پارٽي صدر بڻجڻ جي خلاف داخل عمران خان، سيخ رشيد سميت 13 درخواستن جي ٻڌڻي ڪئي، ٻڌني شروع ٿي ته عوامي مسلم ليگ جي سربراهه شيخ رشيد جي وڪيل بئريسٽر فروغ نسيم اپيل ڪئي ته عدالت ڌرين کي نوٽيس جاري ڪري جنهن تي چيف جسٽس ريمارڪس ڏنا ته پارليامينٽ قانونسازي جو سڀ کان وڏو ادارو آهي ۽ اوهان ان جي جوڙيل قانون کي ڪالعدم قرار ڏيڻ جي اپيل ڪري رهيا آيو اسان کي قانون مطابق هلڻو آهي عدالتن کي ايترو سولو نه وٺو نوٽيس جو ڪيس بڻائينداسين ته نوٽيس به ڪنداسين ٻڌايو ته اهڙن ڪيسن ۾ اڄ تائين عدالتن پارليامينٽ جي جوڙيل قانون کي ڪالعدم ڪيو وڪيل عدالتي فيصلن جا مثال پيش ڪن چيف جسٽس ريمارڪس ڏنا ته قانون ٺاهڻ لاءِ پارليامان سپريم ادارو آهي اسان پارليمان جي قانون بنائڻ جي اختيار ۾ مداخلت نٿا ڪري سگهون بنيادي حق ۽ عوامي مفاد هڪٻئي سان جڙيل آهن پارليمان جي قانون جو جائزو انهيءَ وقت وٺي سگهجي ٿو جڏهن هو بنيادي حقن سان ٽڪراءُ هجي اسان کي ڪيس ۾ آئيني شڪن سان ٽڪراءُ وارن معاملن کي ڏسڻو آهي شيخ رشيد جي وڪيل فروغ نسيم دليلن ۾ پانامه فيصلي ۾ جسٽس اعجازالحسن جي آبزرويشن جو حوالي ڏيندي چيو ته ايماندار ماڻهن جي مون تي حڪومت منهنجو بنيادي حق آهي آئين جي آرٽيڪل 63-اي ۾ واضح آهي ته ڀارتي سربراهه پارليماني ميمبرن کي ٽڪيٽ جاري ڪندو ان مان اها ڳالهه ظاهر ٿئي ٿي ته پارٽي سربراهه ئي پارليمان ۾ موجود ميمبرن کي ڪنٽرول ڪري ٿو ۽ پارٽي سربراهه جو صادق ۽ امين هجڻ ضروري اهي چيف جسٽس بئريسٽر فروغ نسيم کان پچاڻو ڪيو ته اسان نااهلي جو لفظ استعمال ڪرڻ ۾ احتياط کان ڪم وٺي رهيا آهيون ته ڇا اوهان اهو چوڻ چاهيو ٿا جيڪڏهن ڪنهن شخص جي پارليمينٽ مان ميمبرسپ ختم ٿي وڃي ته گورننس جو حقدار نه آهي اوهان اهو ڪيئن چئي سگهون ٿا ته نااهل شخص جو پارٽي سربراهه بڻجڻ آرٽيڪل 9 جي خلاف ورزي آهي جسٽس اعجازالحسن بئريسٽر فروغ نسيم کان پڇا ڪيو ته پارٽي سربراهه جي سرٽيفڪيٽ تي اسيمبلي ميمبر ڪڍي سگهجي ٿو پارٽي سرباهه جي ئي تحت حاصل اختيارن بابت وڌيڪ ٻڌايو جنهن تي بئريسٽر فروغ نسيم چيو ته نوازشريف جو پارٽي سربراهه بڻجڻ ان جو ذتي ڪيس آهي پر جيڪو شخص اسيمبلي ميمبر نه بڻجي سگهي پر هو پارٽي ڪنٽرول ڪري ته ايئن اصولن جي خلاف هوندو نوازشريف جو پارٽي سربراهه بڻجڻ باز محمد ڪاڪڙ ڪيس ۾ عدالتي حڪم جي خلاف ورزي آهي باز محمد ڪاڪڙ ڪيس ۾ عدالتي حڪم کي ختم ڪرڻ لاءِ قانون سازي ڪئي ويئي ٻڌڻي دوران نيشنل پارٽي پاران چونڊ سڌارا ايڪٽ کي ڪالعدم قرار ڏيڻ جي اپيل ڪئي ويئي جنهن تي چيف جسٽس چيو ته پارليمينٽ قانونسازي جي سپريم باڊي آهي ۽ اوهان چئو ٿا ته پارليمينٽ جي بڻايل قانون کي ڪالعدم قرار ڏيئي ڇڏيون چيف جسٽس ريمارڪس ڏنا ته اڄ تائين سپريم ڪورٽ ڪيترن ئي قانونن کي ڪالعدم قرار ڏنو قانون ڪالعدم قرار ڏيندڙ عدالتي فيصلن جا مثال ٻڌايا جنهن تي ايڊووڪيٽ هشمت حبيب چيو ته عدالتي مثال پيش ڪرڻ لاءِ وقت ڏنو وڃي وڪيل عدالت کي ٻڌايو ته گذريل رات شهر کان ٻاهر هيس انهي ڪري تياري لاءِ وقت ڏنو وڃي جنهن تي جسٽس ثاقب نثار ريمارڪس ڏنا ته عدالت کي آسان نه وٺو ڪيس مقرر هو اوهان کي تياري ڪري اچڻ گهرجي ها بنا تياري جي ڪيس ۾ دليل ڏيڻ وڪيل جو شان نه آهي اسان سختي سان قانون تي عمل ڪرڻو آهي ۽ ڪيس کي اڄ ئي ٻيهر ان جي نمبر تي ٻڌنداسين ٻڌني دوران فروغ نسيم عدالت ۾ موقف اختيار ڪيو ته سينيٽ ان قانون جي خلاف 52 ووٽن سان قرارداد منطور ڪيو جنهن تي چيف جسٽس ريمارڪس ڏنا جيڪڏهن ايئن آهي ته پارليامينٽ خود هن قانون کي ڪالعدم قرار نٿي ڏي چيف جسٽس پڇاڻو ڪيو ته فروغ نسيم صاحب هن قانون جو تاريخي پسمنظر ٻڌايو 2017 ۾ هي قانون سمورين جماعتن جي ووٽن سان پاس ٿيو بئريسٽر فروغ نسيم جي دليل کان پوءِ چيف جسٽس مختصر حڪم لکرائيندي درخواستون ٻڌني جوڳيون قرار ڏئي ٻڌڻي لاءِ منطور ڪري ورتيون ۽ مسلم ليگ جي صدر نوازشريف ۽ اليڪشن ڪميشن سميت ٻين ڌرين کي 23 جنوري لاءِ نوٽيس جاري ڪري ڇڏيا.

 

نواز شريف شهباز شريف جي خوف سبب سعودي عرب ويو آهي: چوڌري اعتزاز احسن

لاهور (اين اين آءِ) پ پ پ جو مرڪزي اڳواڻ اعتزازاحسن چيو آهي ته نوازشريف کي سعودي عرب ناهي گهرايو پر هو شهبازشريف جي خوف سان ويو آهي طاهرالقادري سان سياسي اتحاد ناهي ڪيو قيادت شهيدن سان ايڪي اتحاد جي اظهار لاءِ ملاقات ڪئي لاهور صحافين سان ڳالهائيندي هن چيو ته شريف ڀائرن پاڻ ۾ ڏند چڪ هلي رهي آهي شهبازشريف چوي ٿو ته مون کي وزيراعطم بڻايو وڇي جڏهن ته ووٽ نوازشريف ۽ مريم نواز سان آهي ۽ شهبازشريف سان نهآهي شهباز شريف هٿ پير هڻي رهيو آهي ته ڪو ان کي وزيراعظم بڻائي هن چيو ته نوازشريف کي سعودي عرب ناهي گهرايو سعودي جيڪڏهن گهرائيندو آهي ته جهاز اماڻيندو آهي نواز ڪمرشل فلائٽ ۾ ويو جڏهن ته شهبازشريف خاص جهاز تي ويو آهي انهن ڪوشش ڪئي ته اهو تاثر ڏنو وڃي ته مان سعودي عرب وارن جو منظور نظر آهيان پر شهبازشريف اتان ٽيليفون ڪيو ته مان اعليٰ شخصيتن سان ملاقات ڪري رهيو آهيان هن چيو ته هاڻي سعودي عرب وارا شريف خاندان لاءِ ڪجهه نه ڪري سگهندا ڏڻو هي آهي ته شريف ڀائر سعودي عرب ۾ ڇا ڪري رهيا آهن پ پ پ جي مستقبل جي حوالي سان هن چيو ته هو پ پ پ مستقبل بهتر ڏسي رهيو آهي سمورين پارٽين ۾ ڏڦيڙ آهي پ پ پ ۾ ڪوبه ڏڦيڙ نه آهي پ پ پ بلاول ڀٽو جي قيادت ۾ بهتر ڪم ڪندي.

 

 

اقامي شريف خاندان جي مني ٽريل کي وائکو ڪيو آهي: عمران خان

اسلام آباد( ويب ڊيسڪ )  تحريڪ انصاف سربراهه عمران خان چيو آهي ته اقامي وائکو ڪيو ته نواز شريف ۽ سندس خاندان ڦريل دولت جي ڪهڙي نموني مني لانڊرنگ ڪئي. سماجي رابطن جي ويب سائيٽ ٽوئٽر تي پنهنجي پيغام ۾ عمران خان چيو ته اقامي پويان سندس مني لانڊرنگ جي سموري ٽريل  موجود آهي ته ڪيپٽل ايف زيڊ اي ڪمپني ذريعي پئسو يو ڪي ۽ سعودي عرب موڪليو ويو. عمران خان چيو ته پئسو شريف خاندان جي ذاتي اڪائونٽس ۽ ڪمپنين ۾ منتقل ٿيو.

 

2013 ۾ دهشتگردي جي نامعلوم واقعي تي بلوچستان جو وڏو وزير هٽائي سگهجي ٿو ته شهبازشريف ڇو نه: ڊاڪٽر طاهرالقادري

لاهور (اين اين آءِ) پاڪستان عوامي تحريڪ جي سربراهه ڊاڪٽر طاهرالقادري چيو آهي ته جنوري 2013 ۾ بلوچستان ۾ دهشتگردن هٿان شهري شهيد ٿيا ته وارثن ۽ زخمين نامعلوم دهشتگردن جي گرفتاري لاءِ احتجاجي ڌرڻو هنيو جنهن تي بلوچستان جي وڏي وزير اسلم رئيساڻي حڪومت کي هٽائي سڄي صوبي ۾ ايمرجنسي لڳائي ويئي هئي بلوچستان ۾ رتوڇاڻ ڪندڙ ڪالعدم تنظيمن جا نامعلوم دهشتگرد هئا پر 17 جون 2014 جي ڏينهن لاهور ۾ رت جي راند کيڏندڙ نه ته ڪالعدم تنظيمن جا نامعلوم ماڻهو هئا ۽ نه ئي پنجاب پوليس ڪائي ڪالعدم تنظيم آهي انصاف جي رستي جو پٿر شهبازشريف عهدي تان ڇو نٿو هٽائي سگهجي شريف ڀائرن بيگناهن کي قتل ڪن ملڪي خزانو لٽن سپريم ڪورٽ کي ڌمڪيون ڏين قومي سلامتي سان کيڏن ۽ ڪوبه کين ڪجهه به نه چوي وڏي ڳالهه آهي هو گذريل ڏينهن عوامي تحريڪ جي سينٽرل ڪور ڪميٽي جي ميمبرن جي اجلاس سان ڳالهه ٻولهه ڪري رهيو هو هن ايم پي سي ۾ شريڪ جماعتن جي قيادت جي شرڪت تي ٿورا مڃيندي چيو ته هي پاڪستان جي تاريخ جي پهرين اي پي سي آهي جيڪا صرف ۽ صرف مظلومن کي انصاف ڏيارڻ لاءِ ويٺي ۽ انصاف حاصل ڪرڻ جي جدوجهد جو اعلان ڪيو ۽ اهو به ملڪي تاريخ جو هڪ فخر لائق باب آهي ته سموريون جماعتون پنهنجا سياسي اختلاف پاسي تي رکي مظلومن سان گڏ بيٺيون هن چيو ته ساڍن ٽن سالن کان پوءِ به انصاف ناهي مليو. استعيفا ته پري جي ڳالهه آهي پاڪستان جي تاريخ جي هن خوفناڪ سانحي ۾ ڪنهن جي گرفتاري جو حڪمنامو به جاري ناهي ٿيو قاتل حڪمرانن رتوڇاڻ کان پوءِ جي آءِ ٽي جي نالي تي پنهنجون عدالتون لڳائي ڪلين چٽ ورتيون ۽ ابتو ماڊل ٽائون شهيدن جي وارثن کي رتوڇاڻ جو ذميوار ڄاڻايو هن چيو ته جسٽس باقر نجفي ڪميشن جي رپورٽ اچڻ کان پوءِ شهبازشريف ۽ رانا ثناءُالله ڪنهن حيثيت ۽ ڪهڙي منهن سان ڪرسي تي چنڀڙيا پيا آهن اجلاس ۾ سياسي جماعتن سان مسلسل رابطا ۽ مشاورت لاءِ هڪ ڪميٽي به جوڙي ويئي جيڪا اي پي سي ۾ شريڪ جماعت جي اڳواڻن کي ماڊل ٽائون سانحي جي عدالتن ۾ ٻڌڻي هيٺ ڪيسن کان آگاهه ڪندي ۽ مشاورت ڪندي ڪميٽي خرم نواز گنڊاپور جي سربراهي ۾ قائم ڪئي ويئي آهي جيڪا ٻين سياسي جماعتن سان لاڳاپا ۽ مشاورت بابت عوامي تحريڪ جي سربراهه کي روزانو جي بنياد تي بريف ڪندي اجلاس ۾ تيل جي وڌايل قيمتن جي سخت مذمت ڪندي واڌ واپس وٺڻ جو مطالبو ڪيو ويو ڊاڪٽر طاهرالقادري چيو ته تيل جي قيمتن ۾ اضافي سان عام شهري متاثر ٿيندو تيل جون قيمتون وڌائڻ جو اعلان ٿيندي ئي ٽرانسپورٽ جون قيمتون وڌي ويون.

 

مرڻ کانپوءِ ٻيهر زندگي ملي ته وري به اداڪارا ٿيڻ چاهينديس: صوفيه مرزا

لاهور(شوبز نيوز) اداڪارا صوفيه مرزا چيو آهي ته جيڪڏهن مونکي فلمن ۾ ڪم ڪرڻ جو موقعو مليو ته آئون اداڪار شان جي هيروئن بڻجڻ پسند ڪنديس.هڪ انٽرويو ۾ ڳالهائيندي اداڪارا صوفيه مرزا چيو ته موت برحق

آهي پر جيڪڏهن مونکي مرڻ کانپوءِ به هڪ ڀيرو ٻيهر زندگي ملي ته آئون اداڪارا ئي بڻجنديس.هن چيو ته موجوده دور مقابلي جو آهي، آئون ڪنهن سان به ذاتي طور تي حسد ناهيان ڪندي، باقي ڪم دوران پنهنجي ڪردار کي خوبصورت بڻائڻ لاءِ ساٿي اداڪارن سان جيلسي ضرور ڪندي آهيان، اها به صرف ڪردار جي حد تائين هوندي آهي