تازيون خبرون

Monthly Archives: December 2017

انڊر نائنٽين ون ڊي ميچ ۾ پاڪستان هٿان آسٽريليا کي شڪست

سڊني(اسپورٽس نيوز) پاڪستان ۽ آسٽريليا انڊر نائنٽين ٽيم وچ ۾ پهرين ون ڊيم يچ ۾ ميزبان ٽيم کي 6 وڪيٽن تان شڪست ڏئي ڇڏي.ان فتح سان پاڪستان جونيئر ٽيم 3 ميچن جي سيريز ۾ 0-1 جي برتري حاصل ڪري ورتي آهي. ميلبورن ۾ آسٽريليا انڊر 19 ٽيم پاڪستان انڊر 19 خلاف پهرين ميچ ۾ ٽاس کٽي پهريان بيٽنگ جو فيصلو ڪيو.ميزبان ٽيم جي هاروي 136، هارڊي 46 رنسون اسڪور ڪيون.جڏهن ته ڪو ٻيو بيٽسمين پاڪستان جونيئر بالرن جو اعتماد سان مهاڏو نه اٽڪائي سگهيو ۽ پوري ٽيم 241 رنسن تي آئوٽ ٿي وئي.محمد موسيٰ 4، ارشد اقبال 3، سليمان شفقت 2 رانديگرن کي پويلين جي راهه ڏيکاري.جڏهن ته پاڪستاني اوپنرن زيد عالم ۽ عمران شاهه 35، 35 ٺاهي پنهنجي ٽيم کي 52 رنسن جي عمده شروعات فراهم ڪئي، وڪيٽ ڪيپر روحيل نذير 34 رنسون ٺاهيون جڏهن ته طٰحهٰ صرف 6 رنسون ٺاهيون.پاڪستان انڊر 19 3 ميچن واري سيريز ۾ 0-1 جي برتري حاصل ڪري ورتي جڏهن ته ٻئين ميچ جمعي تي کيڏي ويندي

 

رنگ رعنايون چند ڏهاڙا،انت سڀ جو ماٺ آ…..: پروفيسر منير ڊومڪي

پاڪ _چين اقتصادي لنگهه روڪڻ لاءِ آمريڪا افغان طالبان کي استعمال ڪندو..??: غلام مصطفيٰ جمالي

عام طور تي اهو سوال گهڻو پرِيشان ڪندڙ آهي ته طالبان جهڙا انسان هڪ فرقي جي انسان جا ۽ انساني نسل کان تمام گهڻي نفرت ڪندا آهن.. هنن جو ايمان آهي ته هر سڃاڻ رڳو اسلامي سُڃاڻ جي تحت آهي. هن کانپوءِ به پوئين مهيني طالبان ۽ سندن حمايتي ترجمان چئي رهيا آهن ته هو غير ملڪي قوتن کان ڇوٽڪارو حاصل ڪرڻ لاءِ جدوجهد ڪري رهيا آهن.جڏهن ته اها به هڪ واضع حقيقت آهي ته طالبان جنهن غيرملڪي قوتن جي خاتمي جو مشن کڻي نڪتا آهن.جيڪڏهن انهن کان ئي پڇجي ته اوهانجي هٿن ۾ اهي هٿيار ڪنهن ڏنا ته انهن وٽ انهي سوال جو ڪوبه جواب نه هوندو.ڇو ته اهي خد غيرملڪي قوتن جي پيدائش آهن.جيڪي غيرملڪي قوتن پاڻ ۾ نفرتن جو هڪ وڏو آڙاهه کڻي پيون هلن.جيڪي هن ايٽمي طور اندر هڪ ٻئي سان سڌي سنئي جنگ ته ڪري نه ٿيون سگهن.پوءِ انهن قوتن طالبانن جهڙا گروپ ٺاهي ڪري پنهنجي مخالف قوتن کي ڪمزور ڪرڻ جي ڪوشش ڪئي.

طالبان کي تاريخ ايتري پراڻي ناهي جو ڪنهن کان وسري سگهي هجي.ڪالهه جڏهن روس دنيا کي حڪومت ڪرڻ جا خواب ڏسي رهيو هو ته انهن خوابن کي ختم ڪرڻ لاءِ آمريڪا جيڪو هن وقت روس جو وڏي ۾ وڏو دشمن هو انهي طالبان ناهي هڪ تنظيم ٺاهي ڪري روس جي نه رڳو ڪمزور ڪيو پر انهن طالبانن جي صورت ۾ دنيا اندر وڏيون تباهيون آنديون.جيڪي هن وقت پوري دنيا لاءِ خطرو آهن.هڪ اخبار کي انٽريو ڏيندي نيشنل پارٽي خيبرپختونخواهه جي صدر مختيار باچا چيو آهي ته پاڪ- چين اقتصادي راهداري کي روڪڻ لاءِ آمريڪا طالبان کي استعمال ڪري سگهي ٿو. پاڪ-چين اقتصادي راهداري منصوبي تائين رسائي جو هڪ لنگهه گوادر کان زوب آهي جنهن سان بلوچستان جي پٺتي پيل علائقن ۾ ترقي ۽ خوشحالي ايندي. پاڪ چين اقتصادي راهداري وارو منصوبو جيڪو 2015ع کان 2030ع تائين جاري رهندو تنهن ۾ 36 ارب ڊالرن جي لاڳت سان توانائي جي پيداوار جا ڪيترائي منصوبا شامل آهن. ان منصوبي ۾ ڪيئي صنعتي منصوبا پڻ شامل آهن.

پاڪ-چين اقتصادي راهداري منصوبي جي اوڀرندي لنگهه وٽ به سموريون اهي سهولتون فراهم ڪيون وينديون جيڪي منصوبي جي الهندي لنگهه تي هونديون. بلوچستان جي ترقي لاءِ وفاقي ترقياتي فنڊ ۾ ڪنهن به قسم جي ڪٽوتي نه ڪئي ويندي. .اقتصادي لنگهه تحت ترجيحي توانائي منصوبن ۾ پورٽ قاسم اليڪٽرڪ ڪمپني، ڪوئلي سان هلندڙ پلانٽ (1320 ميگاواٽ)، ساهيوال ۾ ڪوئلي سان هلندڙ بجلي گهر (1320 ميگاواٽ)، اينگرو ٿر ڪوئلي سان هلندڙ پاور پلانٽ (1320 ميگاواٽ)، ٿر ڪول فيلڊ ٿري جي بلاڪ ٽو ۾ سرفيس مائن، گوادر ڪول پاور پراجيڪٽ (300 ميگاواٽ)، حبڪو ڪول پاور پلانٽ (660 ميگاواٽ)، رحيم يار خان ڪول پاور پراجيڪٽ (1320 ميگاواٽ)، ايس ايس آر ايل ٿرڪول بلاڪ ۽ سي پي آءِ ايڇ مائن مائوٿ پاور پلانٽ، ٿر جي ڪوئلي سان هلندڙ پاور پلانٽ ٿر بلاڪ ون (1320 ميگاواٽ)، قائداعظم سولر پارڪ بهاولپور (1000 ميگاواٽ)، دائود ونڊ فارم ڀنڀور سنڌ (50 ميگاواٽ)، يو اي پي (100 ميگاواٽ)، ونڊ فارم جهمپير سچل (50 فارم جهمپير سنڌ سونڪ  ميگاواٽ)، نوري آباد ٺٽو سنڌ شامل آهن.

پاڪ چين اقتصادي لنگهه جو فري زون، گوادر ۾ سمارٽ سٽي جي ترقي گوادر جي ترقياتي منصوبن جو حصو آهن. پاڪ چين اقتصادي لنگهه ۾ ڪيترائي منصوبا شامل آهن جن ۾ 350 ملين ڊالر ماليت جو سوات موٽروي پراجيڪٽ (81 ڪلوميٽر) سميت ريل ۽ روڊ نيٽ ورڪس، تيل ۽ گئس جا شعبا، صنعتي ۽ اقتصادي زونز، معدنياتي پراسيسنگ ۽ ڊولپمينٽ زونز، ٽيلي مواصلات جو شعبو، زرعي ترقي جو شعبو ۽ انساني وسيلن جي ترقي سميت ٻيا منصوبا شامل آهن. اهو به ٻڌايوويو ته سي پي اي سي انرجي ايڪٽيوٽي پروموٽيڊ پراجيڪٽ ۾ گڏاڻي پاور پراجيڪٽ، حب ڪول پاور پلانٽ، حب بلوچستان (660 ميگاواٽ)، سالٽ رينج، مائن مائوٿ پاور پراجيڪٽ، ڪوهالا هائيڊرو پراجيڪٽ، اي جي ڪي (1100 ميگاواٽ)، پاڪستان ونڊ فارم جهمپير ٺٽو سنڌ (100 ميگاواٽ)، ٿر مائوٿ اوريڪل ٿر سنڌ، مظفر ڳڙهه ڪول پاور پراجيڪٽ (1320 ميگاواٽ)، سالٽ رينج مائوٿ پاور پراجيڪٽ سميت چائنا مشينري انجنيئرنگ ڪمپني ڪوهالا هائيڊل پاور پراجيڪٽ اي جي ڪي ۽ پاڪستان ونڊ فارم ٽو جهمپير ٺٽو جي تعاون سان مائيننگ شامل آهن. هن ڪري پاڪستان جي ترقي جي ايڏي وڏي منصوبي ڪهڙِي نموني سان سندس نگراني ڪئي وڃي،جڏهن ته پاڪ فوج اقتصادي لنگهه رٿا جي مڪمل ٿيڻ لاءِ هر قرباني ڏيڻ لاءِ تيار آهي..جڏهن ته پاڪ چين اقتصادي لنگهه رٿا عوام جي زندگيءَ تبديل ڪري ڇڏيندي.آرمي چيف جو چوڻ هو ته پاڪ فوج اقتصادي لنگهه رٿا جي مڪمل ٿيڻ لاءِ هر قرباني ڏيڻ لاءِ تيار آهي..جڏهن ته انهي پاڪ چين اقصادي راءِ ڌاري جي حساب سان اسانجي پاڙيسري ملڪ ڀارت کي وڌيڪ تڪيلف آهي.ان ڪري ڀارت پاران اهڙا خطرناڪ منصوبا ضرور جوڙيا هوندا جن کي وسيلي انهي منصوبي کي ناڪام ڪري سگهجي. ڀارت پاڪ – چين اقتصادي لنگهه رٿا کي تباهه ڪرڻ لاءِ خوفناڪ منصوبو جوڙي ڇڏيو آهي، ڀارت جي ڳجهي ايجنسي ”را“پاڪ – چين اقتصادي لنگهه رٿا کي تڪراري بڻائڻ لاءِ 4 رڪني ٽيم تي ٻڌل نئون سيٽ اپ جوڙي ڇڏيو آهي، ميڊيا رپورٽن مطابق ڀارت پاڪ – چين اقتصادي لنگهه رٿا جي مخالفت ۽ دشمني جو ثبوت ڏيندي ان منصوبي کي تباهه ڪرڻ جو منصوبو جوڙي ورتو آهي، جنهن جي سموري ذميواري ڀارتي ڳجهي ايجنسي را کي سونپي وئي آهي.

ڀارتي ڳجهي ايجنسي انيل دشمنا جي سربراهي ۾ 4 رڪني ڪميٽي جوڙي ڇڏي آهي، ۽ جنهن کي پاڪ – چين اقتصادي لنگهه رٿا کي تڪراري بڻائڻ لاءِ مختلف ٽاسڪ ڏنا ويا آهن، چار رڪني ڪميٽي/ڏسو صفحو 3 بقايا نمبر 34

ميجر جنرل راجيشو سنگهه، جي ايس رميش ۽ ويوڪ جوهري تي ٻڌل هوندي، ميجر جنرل راجيشو سگنهه سان 2 جوائنٽ سيڪريٽري به گڏ هوندا، جيڪي سڀني معاملن جي نگراني ڪندا، جڏهن ته ميجر جنرل راجيشو سنگهه کي پاڪ – چين اقتصادي لنگهه رٿا کي تباهه ڪرڻ لاءِ گوادر ايڪسپريس وي تي دهشتگرد ڪارروائي جو ٽاسڪ ڏنو ويو آهي،اهڙي ريت جي ايس رميش کي بلوچستان ۾ رٿا کي تڪراري بڻائڻ جي لاءِ ٽاسڪ ڏنو ويو آهي، اهڙي ريت ويوڪ جوهري سنڌ ۽ پنجاب ۾ رٿا کي ناڪام بنائڻ لاءِ پنهنجا حربا استعمال ڪندو، انيل ڌشمنا کي 4 رڪني ٽيم جو سربراهه مقرر ڪيو ويو آهي، جيڪو سموري ڪارروائي جي هڪ جامع رپورٽ ڀارتي ڳجهي ايجنسي را کي پيش ڪندو.جڏهن ته ٻئي پاسي اقتصادي لنگهه جو مين مرڪز بلوچستان آهي.جٿان سڌي سئني افغانستان ۽ پاڪستان جي سرحد قائم آهي.افغانستان جنهن اندر هن وقت آمريڪا جي فوج انهن طالبانن خلاف وڙهي رهي آهي پر ڏنو وڃي ته آمرڪي فوج هوندي ته طالبان افغانستان اندر زرو وٺي رهيا آهن.

افغانستان ۾ آمريڪي فوج جي هوندي به طالبان هلمند صوبي جي اهم دفاعي ضلعي هيڊڪواٽر موسيٰ قلعي تي قبضو ڪري ورتو آهي، گذريل ٽن هفتن ۾ هلمند جو هي ٻيو شهر آهي، جنهن تي طالبان قبضو ڪري ورتو آهي، ان کان اڳ هنن نواز دا شهر تي ڪيترا ئي حملا ڪري ان تي قبضو ڪري ورتو هو.جڏهن ته دنيا اڃان به طالبانن جي خوف ۾ ورتل آهي.انهي ڪري اهي سوال اهم آهي ته آمريڪا پاڪ اقتصادي لنگهه روڪڻ لاءِ طالبانن جو استعمال ڪندو.پر پاڪ آرمي جهڙي نموني پنهنجا ڪم سرانجام ڏئي رهي آهي.انهي کي ڏسي ڪري اهو يقين آهي ته پاڪستان جي انهي منصوبي کي عالمي دشمن قوتن ڪيتريون به روز لڳائين.پر ڪمزور نه ٿيون ڪري سگهن.

 

ڪمند جي آبادگارن جو شهيدن جي مزار تي احتجاج رنگ لائيندو..؟

سنڌ ۾ سوين ايڪڙن تي پوکيل ڪمند جو فصل شگرملن جي بند ٿيڻ ڪري سڪڻ لڳو، آبادگار ڪمند جو اگهه 182 رپيا نه ملڻ سبب پريشان ٿي ٻيهر احتجاجي تحريڪ هلائڻ لاءِ تياري ڪرڻ لڳا، 28 ڊسمبر تي لاڙڪاڻي۽ خيرپور سان لاڳاپيل آبادگار شهيد محترمه بينظير ڀٽو جي مزار تي پهچي حڪومت کي اپيل ڪندا ته ڪمند جو اگهه 182 رپيا ڏياريو وڃي، 22 شگرملن ۾ پيڙائي لاءِ ڪمند موجود هو، جنهن جي مل مالڪن پيڙائي مڪمل ڪري ٻيهر ملن کي بند ڪري ڇڏيو ۽ وڌيڪ ڪمند وٺڻ کان انڪار ڪري ڇڏيو آهي.

خيرپور ۽ لاڙڪاڻي سان واسطو رکندڙ آبادگارن جو چوڻ آهي ته شگرملن جي بند ٿيڻ ڪري سڄي سنڌ ۾ سوين ايڪڙن تي ڪمند سڪي رهيو آهي، 28 ڊسمبر تي ميڙ منٿ قافلو شهيد محترمه بينظير ڀٽو جي مزار تي وٺي وينداسين. سنڌ ۾ پ پ جي حڪومت آهي، اسان انهن کي اپيل ڪنداسين ته شگرملن کي پابند بڻايو وڃي ته انڊينٽ جاري ڪيو وڃي ته جيئن ڪمند شگرملن تائين پهچي سگهي، ٽنڊومحمد خان، ٽنڊوالهيار، ميرپورخاص، حيدرآباد، مٽياري، نوابشاهه، سانگهڙ، سکر، خيرپور ۽ نوشهروفيروز ضلعن سان لاڳاپيل علائقن ۾ ڪمند جي واڍي نه ٿيڻ ڪري متاثر آبادگار ڪڻڪ جي به پوکائي نه ڪري سگهيا آهن، جنهن جي ڪري آبادگار سخت پريشاني واري صورتحال کي منهن ڏئي رهيا آهن، آبادگارن تنظيمن سول سوسائٽي ۽ سياسي تنظيمن طرفان احتجاجن ۽ سنڌ هاءِ ڪورٽ جي حڪم باوجود آبادگارن جي کي ڪمند جو اگهه في مڻ 182 رپيا نه ملي سگهيو،

ايوان زراعت سنڌ جي اڳواڻ محمد خان ساريجو  موجب ته هاڻ ته ڊسمبر جو مهينو به ختم ٿيڻ وارو آهي ۽ ڪڻڪ جي پوکائي واري موسم به ختم ٿي چڪي آهي، پر آبادگارن کان شگرملن وارن ڪمند نه وٺي وڏي ناانصافي ڪئي آهي. آبادگارن پوکائي کان وٺي ڪمند جي تيار ٿيڻ تائين ڀاڻ کان وٺي ٻين خرچن جي مد ۾ لکين رپيا خرچ ڪيا آهن ۽ ڪمند جي وقت تي ڪٽائي نه ٿيڻ ڪري ڪمند سڪي رهيو آهي، آبادگار قرضي بڻجي رهيا آهن،

 

پوري ملڪ ۾ قائد اعظم محمد علي جناح رحه جو 142 هون جنم ڏينهن جوش ۽ جذبي سان ملهايو ويو، باني پاڪستان کي شاندار ڀيٽا پيش،قائد اعظم جي اصولن تحت ملڪ کي مضبوط بڻائي سگهجي ٿو: سياسي/ عسڪري قيادت

اسلام آباد/ڪراچي( ويب ڊيسڪ ) سنڌ سميت سڄي ملڪ ۾ باني قائد اعظم محمد علي جناح جو 142 هون جنم ڏهاڙو جوش ۽ جذبي سان ملهايو ويو، ڏينهن جي شروعات فجر جي نماز بعد خاص دعائن سان ٿي، اسلام آباد ۾ 31 ۽ صوبائي گادي واري هنڌن تي 21،21 توبن جي سلامي ڏني وئي، قائد اعظم محمد علي جناح جي 142 هين جنم ڏهاڙي تي سڄي ملڪ ۾ عام موڪل رهي،  پاڪستان ملٽري اڪيڊمي ڪيڊٽس جي دستي قائد اعظم محمد علي جناح جي مزار تي گارڊز جا فرض سنڀاليا. ان موقعي تي خاص مهمان ميجر جنرل اختر نواز ستي پاڪستان ملٽري اڪيڊمي گارڊ جو معائنو ڪيو. مزار قائد تي گلن جي چادر چاڙهي ۽ فاتحه خواني ڪئي، جڏهن ته شهرين جي وڏي انگ به تقريب ۾ شرڪت ڪئي. سنڌ جي وڏي وزير مراد علي شاهه ۽ گورنر سنڌ محمد زبير پڻ قائد اعظم محمد علي جناح جي مزار تي حاضري. صدر ممنون حسين پنهنجي پيغام ۾ چيو ته مختلف شعبن ۾ پيش ڏکيائين کي قائد اعظم جي اصولن جي روشني ۾ قانون ۽ آئين تي عملدرآمد ڪري ئي ضابطو آڻي سگهي ٿو. ٻيئ طرف وزيراعظم شاهد خاقان عباسي چيو ته قائد اعظم سڄي عمر مضبوط دليلن ۽ جمهوري اصولن جي بنياد تي هندستان جي مسلمانن جي مذهبي، سماجي ۽ اقتصادي حقن توڙي سڃاڻپ لاءِ ڪيس وڙهيو، قائد جي فڪر ۽ خيالن جي روشني ۾ هڪ مضبوط ۽ ترقي ڪندڙ ملڪ لاءِ جدوجهد ڪرڻ گهرجي..وزيراعظم شاهد خاقان عباسي چيو آهي ته ملڪي ترقي لاءِ تعصبن کان هٽي ڪري ٻڌيءَ جو مظاهرو ڪرڻو پوندو، قائد اعظم جي اصولن کي زندگيءَ جو مقصد بڻائڻو آهي. پشاور جي اسلاميه ڪاليج ۾  تقريب کي خطاب ڪندي وزيراعظم شاهد خاقان عباسي چيو ته ڊسپلين جي اصولن تي عمل ڪندي شاگردن شاندار ڪاميابيون حاصل ڪيون آهن. هن چيو ته قائد اعظم کي ڀارت جي تاحيات گورنر جي آڇ ٿي پر هن انڪار ڪيو. سندس چوڻ هو ته قائد اعظم محمد علي جناح وٽ ڪوبه هٿيار نه پر تعليم جي طاقت هئي. وزيراعظم شاهد خاقان عباسي چيو ته قائد اعظم جي اصولن کي اختيار ڪيو وڃي ته پاڪستان ڪنهن ملڪ کان پوئتي نه هوندو. هن چيو ته پاڪستان جي هر ضلعي ۾ يونيورسٽي ٺاهڻ جو پڪو پهه ڪيو آهي. سندس چوڻ هو ته تعليم کي هٿي ڏيڻ ۾ اعليٰ تعليمي ڪميشن جو ڪردار تمام گهڻو اهم آهي. وزيراعظم شاهد خاقان عباسي چيو ته حقيقي ترقي تعليم جي ترقي کانسواءِ ممڪن ئي ناهي. هن چيو ته تعليم کان وڌيڪ ٻي ڪابه سيڙپڪاري ناهي، ٻئي طرف  آرمي چيف جنرل قمر جاويد باجوه قائد اعظم محمد علي جناح جي 142 هين پيدائش جي ڏهاڙي تي کيس ڀيٽا پيش ڪئي آهي. آءِ ايس پي آر جي ڊائريڪٽر جنرل آصف غفور ٽوئيٽر تي پيغام ۾ چيو ته پاڪستان جي هٿياربند فوج قائد اعظم محمد علي جناح کي ڀيٽا پيش ڪري ٿي. آرمي چيف جنرل قمر جاويد باجوه چيو ته قائد اعظم محمد علي جناح انساني قدرن ۽ سماجي انصاف جو موقف پاڪستان قائم ٿيڻ جو بنياد بڻيو ۽ اهڙي ويزن تي عمل ڪندي پاڪستان کي محفوظ ۽ مضبوط بڻائي سگهون ٿا.

 

ڪلڀوشن يادو سان گهر ڀاتين جي ملاقات، پاڪستان واعدو پورو ڪري ڇڏيو

اسلام آباد/راولپنڊي( ويب ڊيسڪ ) ڀارتي جاسوس ڪلڀوشن ياديو جي سندس امڙ ۽ گهر واريءَ سان ملاقات ڪرائي وئي. ڪلڀوشن ياديو جي امڙ آونتي سوڌي ياديو ۽ گهر واري چينتڪاوي ياديو دبئي کان خانگي اڏام اي ڪي 612 ذريعي بينظير ايئرپورٽ پهتيون. خاص سڪيورٽي پلان  اوچتو تبديل ڪري ڪلڀوشن جي گهر وارن کي اسلام آباد  ۾ ڀارتي هاءِ ڪميشن پهچايو ويو.ڪجهه دير کانپوءِ  ڪلڀوشن ياديو جي گهر وارن کي پرڏيهي آفيس ۾ آندو ويو جتي سندن ملاقات ڪرائي وئي. ملاقات دوران ڀارتي ڊپٽي هاءِ ڪمشنر جي پي سنگهه به ساڻن گڏ آهي. ملاقات 2 وڳي 18 منٽن تي شروع ٿي جيڪا 40 منٽن تائين جاري رهي. ڪلڀوشن ياديو جي گهر وارن سان ملاقات لاءِ خاص ڪمرو تيار ڪيو ويو جنهن ۾ شيشو لڳايو ويو. شيشي جي هڪ پاسي ڪلڀوشن ياديو ويٺل رهيو جڏهن ته ٻي پاسي سندس امڙ، گهر واري ۽ ڀارٽي ڊپٽي هاءِ ڪمشنر ۽ پرڏيهي آفيس انڊيا ڊيسڪ جي ڊائريڪٽر ڊاڪٽر فريحا موجود رهي. ملاقات جي وڊيو رڪارڊ به ڪئي وئي، جاسوس پنهنجي ڪٽنب سان انٽر ڪام ذريعي ڳالهايو. ٻئي طرف پرڏيهي آفيس ٻاهر سڪيورٽي انتظام سخت ڪيا ويا آهن جڏهن ته واڪ ٿرو گيٽس به لڳايا ويا ، ملاقات کانپوءِ ٻئي عورتون ساڳي ڏينهن واپس روانيون ٿي وينديون. ٻئي طرف پرڏيهي آفيس جي ترجمان ڊاڪٽر فيصل ڪلڀوشن ياديو کي قونصلر تائين پهچ ڏيڻ جي ترديد ڪئي آهي. هن چيو ته ملاقات ۾ ڀارتي سفارتخاني جي آفيس جي موجودگي قونصلر تائين پهچ ناهي. سندس چوڻ هو ته ڪلڀوشن ياديو جي ملاقات انساني همدردي جي بنياد تي ڪرائي پئي وڃي. پرڏيهي آفيس جي ترجمان چيو ته ڪلڀوشن جي گهر ڀاتين سان ملاقات آخري ناهي. ڊاڪٽر فيصل چيو ته  پاڪستان پنهنجو واعدو پورو ڪيو آهي.پرڏيهي کاتي جي ترجمان ڊاڪٽر محمد فيصل چيو آهي ته اسلام اسان کي رحمدلي جو درس ڏئي ٿو، ڀارتي جاسوس ڪلڀوشن ياديو کي انساني همدردي جي بنياد تي ملاقات جي اجازت ڏني وئي آهي. ڀارتي درخواست تي زال سان گڏ سندس ماءُ کي به ملاقات جي اجازت ڏني ۽ بعد ۾ درخواست تي ملاقات جو وقت به وڌايو ويو جڏهن ته قونصل تائين پهچ ناهي ڏني وئي ڇو ته قونصل کي ڪجهه به ٻڌڻ ۾ نه آيو ۽ نه ئي هن کي ڳالهائڻ جو موقعو ڏنو ويو. هو رڳو تبصرو ڪندڙ جي حيثيت سان موجود رهيو. ميڊيا کي بريفنگ ڏيندي هن چيو ته ڀارتي جاسوس ڪلڀوشن ياديو فرنٽيئر ورڪس آرگنائيزيشن جي ڪيترن ئي اهلڪارن تي ڪوئيٽا ۽ تربت ۾ حملن جو اعتراف ڪيو، ان کان سواءِ ڪلڀوشن مهراڻ بيس تي حملي ۾ پابندي مڙهيل تنظيم تحريڪ طالبان جي مدد جو اعتراف ڪيو. پرڏيهي کاتي جي ترجمان چيو ته ڀارتي جاسوس ڪلڀوشن ياديو 17 ڀيرا پاڪستان ۽ ڀارت آيو ويو، ڀارتي جاسوس ڪلڀوشن پاڪستان ۾ دهشتگردي جو چهرو آهي، ڪلڀوشن پاڪستان ۾ دهشتگرد ڪارروائين جو اعتراف ڪيو. ڊاڪٽر محمد فيصل چيو ته دهشتگرد ڪلڀوشن کي ڪيس ۾ صفائي جو موقعو ڏنو ويو، ميڊيڪل رپورٽ موجب ڀارتي جاسوس ڪلڀوشن ياديو مڪمل صحتمند آهي. هن ٻڌيو ته ملاقات جو وقت 30 منٽ هو پر ڪلڀوشن جي ماءُ جي درخواست تي وقت وڌائي 40 منٽ ڪيو ويو.

 

ٻئي طرف  ڀارتي جاسوس ڪلڀوشن ياديو ۽ ان جي والده ملاقات ڪرائڻ تي پاڪستاني اختيارين جو شڪريو ادا ڪيو. گرفتار ڀارتي جاسوس ڪلڀوشن ياديو پنهنجي وڊيو پيغام ۾ چيو آهي ته 2 سال اڳ بارڊر پار ڪري ايران کان پاڪستان داخل ٿيس.مان ڀارتي خفيه ايجنسي را لاءِ ڪم ڪري رهيو هوس ۽ پاڪستاني سيڪيورٽي ادارن جي هٿان بلوچستان مان گرفتار ٿيس.ڀارتي جاسوس چيو ته گرفتاري کانپوءِ پاڪستاني اختيارين مون سان عزت سان پيش آيا ۽ مون تي ڪوبه تشدد نه ڪيو.ڪلڀوشن ياديو چيو ته مون پاڪستاني اختيارين کان انساني همدردي جي بنياد تي ملاقات جي درخواست ڪئي هئي.مان پاڪستاني اختيارين جو شڪرگذار آهيان جو انهن منهنجي درخواست کي قبول ڪيو ۽ گهروارن سان ملاقات ڪري.ٻئي طرف ڪلڀوشن ياديو جي والده به پٽ سان ملاقات ڪرائڻ تي پاڪستاني اختيارين جو شڪريو ادا ڪيو

 

فاٽا تي فيصلا اتفاق راءِ سان ٿيندا، واعدو آهي فاٽا کي قومي ڌاري ۾ شامل ڪبو: وزير اعظم

خيبرايجنسي(ويب ڊيسڪ) وزير اعظم شاهد خاقان عباسي چيو آهي ته فاٽا بابت سمورا فيصلا اتفاق راءِ سان ڪيا ويا. شاهد خاقان عباسي خيبر ايجنسي جي جمرود اسٽيڊيم ۾ اسپورٽس فيسٽيول جي تقريب ۾ شرڪت ڪئي، ان موقعي تي خيبرپختونخواهه جو گورنر اقبال ظفر جهڳڙا به ساڻس گڏ هو. قبائلين وزير اعظم جو شاندار استقبال ڪيو، قبائلي سردار ملڪ فيض الله جان وزير اعظم کي روايتي پڳ پارائي. تقريب کي خطاب ۾ وزير اعظم چيو ته قائد اعظم قبائلين سان جيڪي واعدا اهي پورا ڪنداسين. منهنجو واعدو آهي ته فاٽا کي ضرور قومي سٿ ۾ شامل ڪيو ويندو، فاٽا جي هر ايجنسي جي اندر هڪ هڪ يونيورسٽي قائم ڪئي ويندي. هن چيو ته فاٽا جي نوجوانن دهشتگردي خلاف جنگ ۾ بي پناهه قربانيون ڏنيون، فاٽا کي سهولتون نه ملڻ تي افسوس آهي، فاٽا جي عوام جي حمايت سان پاڪستان وڌيڪ ترقي ڪندو.

 

قائد اعظم جي ويزن کي آمريتن، ڪلاشنڪوف ڪلچر ۽ انتهاپسندي نقصان پهچايو: بلاول ڀٽو

ڪراچي( ويب ڊيسڪ ) پ پ چيئرمين بلاول ڀٽو زرداري چيو آهي ته پ پ قائد اعظم محمد علي جناح جي اصولن جي پيروي ڪندي رهندي. هڪ بيان قائد اعظم محمد علي جناح کي ڀيٽا پيش ڪندي بلاول ڀٽو زرداري چيو ته شهيد ذوالفقار علي ڀٽو پهريون متفقه آئين ڏئي شهيد ذوالفقار علي ڀٽو جو خواب پورو ڪيو. هن چيو ته  جمهوري نظام ۽ ناقابل شخص دفاع جو بنياد رکي قائد اعظم محمد علي جناح جو خواب پورو ڪيو ويو. سندس چوڻ هو ته قائد اعظم جي ويزن کي آمريتن، ڪلاشنڪوف ڪلچر ۽ انتهاپسندي نقصان پهچايو آهي. بلاول ڀٽو زرداري چيو ته پ پ قائد اعظم محمد علي جناح جي مشن ويزن جي علمبردار رهندي. هن چيو ته پاڪستان کي قائد اعظم جي اصولن تحت جمهوري ۽ ترقي پسند بڻايو ويندو. سندس چوڻ هو ته پاڪستان کي هڪ رول ماڊل جمهوري مسلم رياست بڻايو ويندو. بلاول ڀٽو زرداري چيو ته ملڪ ۾جمهوريت مضبوط ڪري ترقي پسند رواداري تي ٻڌل معاشرو قائم ڪيو ويندو.

 

تاريخ ۾ ٻيو ڀيرو پرامن نموني اقتدار منتقل ڪيو ويندو: مريم اورنگزيب

اسلام آباد( ويب ڊيسڪ ) سڌ سماءَ واري ممڪلتي وزير مريم اورنگزيب چيو آهي ته ملڪي تاريخ ۾ ٻيو ڀيرو پرامن نموني اقتدار جي منتقلي ٿيندي. قائداعظم  جي جنم ڏهاڙي تي پنهنجي پيغام ۾ مريم اورنگزيب چيو ته ايندڙ وقت جمهوري نظام کي وڌيڪ هٿي ڏيندو. هن چيو ته سموريون وفاقي اڪائيون ملڪي ترقي ۾ پنهنجو حصو وجهي رهيون آهن، حڪومت جي ڪوششن سان پاڪستان کي دنيا ۾ اڀرندڙ معيشت قبول ڪيو پيو وڃي. سندس چوڻ هو ته پاڪستان جي ڏيوالي ٿيڻ جون ڳالهيون ڪوڙيون ثابت ٿيون آهن، تعليم ۽ صحت جي سڌارن واري پروگرام تحت نمايان اڳڀرائي ٿي رهي آهي، لوڊشيڊنگ جي خاتمي جو واعدو به پورو ڪيوويو آهي. مريم اورنگزيب چيو ته ملڪ ۾ طلب کان وڌيڪ بجلي پيدا ٿي رهي آهي، اڳوڻي وزيراعظم نواز شريف جو دهشتگردي خلاف ويزن مڪمل ٿي رهيو آهي. هن چيو ته سڀني کي گڏجي پاڪستان کي جمهوري طاقت بڻائڻو آهي، اڄ سموري قوم عظيم اڳواڻ کي ڀيٽا پيش ڪري رهي آهي. سندس چوڻ هو ته قائد اعظم جي شخصيت سمورن پاڪستانين لاءِ مشعل راهه آهي. مريم اورنگزيب چيو ته قائد اعظم مسلمانن کي ننڍي کنڊ ۾ انگريز سامراج کان ڇوٽڪاريو ڏياريو.

 

مريم نواز ڪڏهن به پنجاب جي وزير اعليٰ نٿي بڻجي سگهي: خورشيد شاهه

خيرپور(ويب ڊيسڪ) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته مريم نواز ڪڏهن به پنجاب جي وزير اعليٰ نٿي بڻجي سگهي. خيرپور ۾ ميڊيا سان ڳالهائيندي سيد خورشيد شاهه چيو ته مريم نواز ڪڏهن به پنجاب جي وزير اعليٰ نٿي بڻجي سگهي. هن چيو ته ن ليگ تي پارليامينٽ ميمبرن جي استعيفيٰ سان ڪو به فرق نٿو پوي، چونڊون وقت تي ئي ٿينديون. هن چيو ته جڏهن طاهر القادري اسان جي خلاف هئو ته نواز شريف سندس ساٿ ڏئي رهيو هو، هاڻ جڏهن اسان طاهر القادري سان گڏ آهيون ته نواز شريف ان جي مخالفت ڪري رهيو آهي. سندس وڌيڪ چوڻ هو ته نيب سنڌ سان زيادتي ڪري رهي آهي، جڏهن ته نيب کي چئني صوبن ۾ بلا امتياز ڪارروائي ڪرڻ گهرجي.