تازيون خبرون

Monthly Archives: December 2017

غير قانوني روڊ جي تعمير: شريف ڀائرن خلاف ريفرنس داخل ڪرڻ جي منظوري

اسلام آباد (ويب ڊيسڪ) قومي احتساب بيورو (نيب) اڳوڻي وزيراعظم نواز شريف ۽ پنجاب جي وڏي وزير شهباز شريف خلاف ريفرنس داخل ڪرڻ جي منظوري ڏئي ڇڏي آهي. نيب ايگزيڪيوٽو بورڊ جو اجلاس نيب چيئرمين جاويد اقبال جي صدارت هيٺ ٿيو، جنهن ۾ اهڙو فيصلو ڪيو ويو. نيب جي بيان ۾ ٻڌايو ويو ته اجلاس ۾ 6 ريفرنس داخل ڪرڻ، چار انڪوائرين ۽ 11 انويسٽيگيشن جي منظوري ڏني وئي. نواز شريف ۽ شهباز شريف مبينا طور رائيونڊ کان شريف فيملي جي گهر تائين سال 2000ع ۾ غير قانوني ٻنهي پاسن کان روڊ تعمير ڪرائي قومي ناڻي کي لڳ ڀڳ ساڍن 12 ڪروڙ رپين جو نقصان پهچايو. نيب بيان ۾ ٻڌايو ته ايگزيڪيوٽو بورڊ نندي پور اليڪٽرڪ پراجيڪٽ ۾ اڳوڻي وفاقي وزير ڊاڪٽر بابر اعواڻ، پاڻي ۽ بجلي واري اڳوڻي وفاقي وزير راجا پرويز اشرف، قانون ۽ انصاف واري اڳوڻي سيڪريٽري مسعود چشتي سميت ٻين خلاف جاچ جي منظوري ڏني وئي آهي، مٿن الزام آهي ته انهن نندي پور پن بجلي منصوبي ۾ دير ڪئي، جنهن سبب قومي ناڻي کي 113 ارب رپين جو نقصان ٿيو. ان کانسواءِ سنڌ ليبر جي اڳوڻي سيڪريٽري نصر حيات، بلوچستان جي اڳوڻي وڏي وزير اسلم رئيساڻي ۽ ٻين خلاف پڻ ريفرنس داخل ڪرڻ جي منظوري ڏني وئي.27

 

تحريڪ عدل ڪنهن جي خلاف نه پر انصاف حاصل ڪرڻ لاءِ آهي: نواز شريف

لاهور (اين اين آءِ) مسلم ليگ (ن) جي صدر ۽ اڳوڻي وزيراعظم محمد نوازشريف جي صدارت هيٺ پارٽي اڳواڻن جي غير رسمي مشاورتي اجلاس ۾ ملڪ جي جملي سياسي صورتحال ايندڙ عام چونڊون ۽ عوامي رابطا مهم جي سلسلي ۾ تفصيلي خيالن جي ڏي وٺ ڪئي ويئي نوازشريف جي رهائشگاهه جاتي امره رائونڊ ۾ ٿيل هن اجلاس ۾ اسپيڪر قومي اسيمبلي سردار اياز صادق مريم نواز طلال چوڌري دانيال عزيز سينيٽر پرويز رشيد عرفان صديقي مريم اورنگزيب مصدق ملڪ سميت ٻيا شامل ٿيا ذريعن مطابق اجلاس ۾ جملي صورتحال تي خيالن جي ڏي وٺ دوران اڳواڻن کلي پنهنجي خيالن جو اظهار ڪيو ۽ آئينده جي حوالي سان تجويزون به ڏنيون ان موقعي تي اهو طئي ڪيو ويو ته عوامي رابطا مهم ۾ تيزي آڻڻ جي ضرورت آهي ۽ ان حوالي سان اهم فيصلا به ڪيا ويا غير رسمي مشاورتي اجلاس ۾ نوازشريف جي سرگودا ضلعي جي تعلقي ڪوٽ مومن ۾ 31 ڊسمبر تي جلسي جي حوالي سان به خيالن جو اظهار ڪيو.

 

بينظير ڀٽو پاڪستان ۾ جمهوريت جي بحالي آئين ۽ قانون جي حڪمراني ۽ عوام جي حقن لاءِ بي مثال جدوجهد ڪئي: مريم اورنگزيب

اسلام آباد (اين اين آءِ) مملڪتي وزير مريم اورنگزيب چيو آهي ته بينظير ڀٽو پاڪستان ۾ جمهوريت جي بهالي آئين ۽ قانون جي حڪمراني ۽ عوام جي حقن لاءِ بيمثال جدوجهد ڪئي اربع تي جاري ڪيل پيغام ۾ مملڪتي وزير چيو ته آئين کان پوءِ ميساڪ جمهوريت جي تاريخي دستاويز محترمه بينظير ڀٽو شهيد ۽ محمد نوازشريف جي گڏيل ڪوششن جو ثمر اهي پاڪستان جي سياسي ۽ جمهوري تاريخ ۾ ان جو نالو هميشه زنده رهندو ان ملڪ ۾ جمهوريت جي بحالي ۽ عوام جي حق حڪمراني لاءِ پنهنجي آخري گهڙي تائين جدوجهد ڪئي ان جي شهادت سان پاڪستان جي سياست ۾ پيدا ٿيل خال ڪڏهن به ڀرجي نه سگهندو.

 

ڏھ سال گذرڻ باوجود عوام محترما جي شهادت کي ناهي وساريو: مراد علي شاهه

سکر(بيورو)  سنڌ جي وڏي وزير سيد مراد علي شاهه چيو آهي ته پي ايس پي الزام هڻڻ وارو ڌنڌو ڇڏي پنهنجي سڃاڻپ ٺاهي ڪا ايجنڊا جوڙي، پي ايس ايل جي فائنل لاءِ حفاظتي قدمن جي ڪا ڳڻني ڪونهي ۽ ڪانٽريڪٽي استادن جو مدو وڌايو آهي، سندن امتحان وٺي پوءِ کين پڪو ڪبو. پاڪستان پيپلز پارٽي جي ضلعي صدر سيد جاويد شاهه جي رهائشگاهه تي ميڊيا سان ڳالهيون ڪندي سيد مراد علي شاھ چيو ته شهيد راڻي بينظير ڀٽو جمهوري نظام کي اڳتي وڌائڻ لاءِ وڏيون قربانيون ڏنيون، 10 سال گذرڻ باوجود عوام محترما جي شهادت کي ناهي وساريو ۽ نه ئي قبول ڪيو آهي ۽ واقعو ائين محسوس ٿيندو آهي ته ڄڻ اڄ ئي ٿيو هجي. هن چيو ته پاڪ سرزمين پارٽي الزام تراشي ڇڏي پنهنجي سڃاڻپ ۽ ايجنڊا حاصل ڪري ڏيکاري، ان کانپوءِ ڪنهن جي خلاف ڳالهائي، تنهن هوندي به سياست ۾ سڀني کي ڳالهائڻ جو حق آهي ۽ آئين سڀني کي اجازت ڏئي ٿو. هن چيو ته هر اليڪشن کان اڳ پارٽين جو اتحاد ٺهندو آهي، گذريل اليڪشن ۾ به 10 جماعتي اتحاد ٺهيو هو جيڪو به پيپلزپارٽي کي ڪجهه نه ڪري سگهيو، اهي جماعتون اليڪشن جي وقت ئي نظر اينديون آهن پر سنڌ جي عوام هميشه پ پ کي ووٽ ڏئي ڪامياب ڪيو آهي. سيد مراد علي شاھ چيو ته پي ايس ايل ميچون ڪراچيءَ ۾ ڪرائڻ لاءِ گذريل سال به چيو هو پر ان وقت شايد ممڪن نه هو، پي ايس ايل جي سيڪيورٽي جي حوالي سان بلڪل پريشان نه آهيون، ڇو ته اڌ کان وڌيڪ ڪرڪيٽر پاڪستاني ئي هوندا، پي ايس ايل لاءِ پريشاني نه آهي، وڌ کان وڌ 50 کان 100 پرڏيهي هوندا. ٿريٽ تمام گهڻا آهن، سيڪيورٽي جي حوالي سان بلڪل تيار آهيون. هن چيو ته اين ٽي ايس پاس استادن تي لاٺي چارج بلڪل غلط ٿيو، اهي استاد ڪانٽريڪٽ تي ڀرتي ڪيا ويا هئا، سندن ڪانٽريڪٽ وڌايو ويو آهي، جلد کانئن امتحان وٺي پوءِ جيڪو به قانوني طريقو هوندو اهو اختيار ڪيو ويندو. ن چيو ته سڀني تنظيمن سان به ڳالهه ٻولهه ٿي آهي ۽ سڀ ان ڳالهه تي متفق آهن ته استادن کي پورو پورو حق ڏنو وڃي، استادن کي به گهرجي ته ٻارن جي تعليم تي ڌيان ڏين، باقي سندن جائز مسئلا جلد حل ڪيا ويندا.

 

 

اليڪشن ۾ بلاول ڀٽو زرداري جو مقابلو ٻن لاڏلن سان هوندو: اعتزاز احسن

نئون ديرو(رپورٽر) اعتزاز احسن چيو ته ملڪ ۾ ڊرامو لڳايو ويو آهي ته هڪ ماڻهو جيڪو پارٽيءَ جو صدر آهي ان پارٽي جو صدر هجڻ جي ناتي ان جي ماتحت 2 صدر، هڪ آزاد ڪشمير ۽ ٻيو پاڪستان جو صدر ممنون حسين آهن، جيڪو اڳ ئي ممنون آهي، ٻه وزيراعظم هڪ وزيراعظم آزاد ڪشمير ۽ وزيراعظم پاڪستان، پنج گورنر پنجاب، بلوچستان ۽ گلگت بلتستان جا وڏا وزير ان جا آهن ۽ ٻيا وفاقي توڙي صوبائي وزير به ان جا آهن پر ان باوجود هو چوي ٿو ته مون کي ڇو ڪڍيو ويو؟ ان کي اقاما جي ڪري ڪڍيو ويو، جيڪو سنگين ڏوهه آهي. ڪنهن وزيراعظم يا پرڏيهي وزير خلاف اقامو نڪري ته هو وزيراعظم يا وزير ڪيئن ٿو رهي سگهي ۽ پرڏيهي ڪمپني جو ملازم ڪيئن ٿي سگهي ٿو؟ ڪڏهن اوهان سوچيو ته وزيراعظم برطانيا جي ڪوهه نور ٽيڪسٽائل جو ملازم هجي جيڪڏهن مودي وزيراعظم هندوستان جو هجي. هن چيو ته حديبا جو ڪيس عدالت ۾ ان بنياد تي خارج ڪيو ويو ته هو مدي خارج ٿي ويو آهي، فوجداري ڪيس ڪڏهن به مدي خارج نه ٿو ٿي سگهي، قتل جو ڏوهاري جيڪڏهن قتل ڪري ٿو اهو ڀلي ڪيترائي سال اڳ قتل ڪري پر اهو ڏوهاري تصور ڪيو ويندو آهي. هن چيو ته آف شور ڪمپنيون نواز شريف جون آهن پر ان باوجود هو عدالتن جي خلاف واويلا مچائي رهيو آهي. هن چيو ته اڄ نواز شريف عمران کي ۽ عمران نواز شريف کي لاڏلو چئي رهيا آهن، اسان مطابق ٻئي لاڏلا آهن. هن چيو ته نواز شريف مٿان هر وقت نرم رويو اختيار ڪيو آهي. اڄ اسان کي سوچڻو آهي ته اليڪشن اچڻ واري آهي، اسان جي پارٽي جو موقف آهي ته چونڊون وقت تي ٿيڻ گهرجن. هن چيو ته تڪبدين بابت اسان جا جيڪي خدشا هئا جڏهن انهن کي ختم ڪيو ويو ته بعد ۾ اسان ان بل جي حمايت ۾ ووٽ ڏنو ته جيئن اليڪشن وقت تي ٿي سگهن. هن چيو ته اليڪشن ٿيندي ۽ بلاول ڀٽو زرداري جو مقابلو ٻن لاڏلن سان هوندو، ڇا اوهان لاڏلن کي ووٽ ڏيندئو؟ يا بلاول ڀٽو زرداري کي ووٽ ڏيندئو؟

 

ايندڙ چونڊن ۾ پي ٽي آءِ سان اتحاد نه ڪرڻ جو اعلان، مذهبي ۽ نظرياتي پارٽين جي اتحاد سان گڏ چونڊون ۾ حصو وٺنداسين: سراج الحق

لنڊن(ويب ڊيسڪ) جماعت اسلامي جي امير سراج الحق چيو آهي ته ايندڙ چونڊن ۾ تحريڪ انصاف سان اتحاد نه ڪنداسين، مذهبي ۽ نظرياتي پارٽين جي اتحاد سان گڏوگڏ ايندڙ چونڊون ۾ حصو وٺنداسين. لنڊن ايئرپورٽ تي ميڊيا سان ڳالهائيندي سراج الحق چيو ته ايم ايم اي  کي ٻيهر فعال ڪرڻ ۾ ڪي ڳجهن هٿن جو عمل ناهي، ملڪ ۾ قيادت جو فقدار آهي ۽ حقيقي جمهوري پسند حڪومت جي ضرورت آهي، ماڻهن جي تبديلي جو تماشو گهڻو ٿيو، هاڻ نظام جي تبديلي جي ضرورت آهي. سراج الحق چيو ته ماڊل ٽائون انسانيت سوز واقعو هو،  طاهر القادري سان گڏ آهيون، هن چيو ته بروقت چونڊون ۽ احتساب جا حامي آهيون، احتساب کان سواءِ نظام جي تبديلي ممڪن ناهي. سندس وڌيڪ چوڻ هو ته 31 ڊسمبر تائين فاٽا ڪي پي ۾ ضم نه ٿيو ته پوءِ اڳتي لاءِ حڪمت عملي اختيار ڪنداسين، ڌرڻي کان سواءِ حڪومت جي ڪن جوئن ئي نٿي چري.

 

هر وقت مقابلي لاءِ تيار آهيون ، ڄاڻو ٿا ته محترما جي عزت ڪيئن ٿا وڌائي سگهون؟ مخالفن جا نالا کڻڻ جي ضرورت ناهي: نثار کهڙو

نئون ديرو(رپورٽر)  پاڪستان پيپلز پارٽي سنڌ جي صدر ۽ سينيئر صوبائي وزير نثار احمد کهڙي چيو ته اسان هر وقت مقابلي لاءِ تيار آهيون ۽ ڄاڻو ٿا ته محترما جي عزت ڪيئن ٿا وڌائي سگهون؟ مخالفن جا نالا کڻڻ جي ضرورت نه آهي جيڪي آمرن جي بغلن جا ٻار هئا، اهي ملڪ ڇڏي ڀڄي ويا پر نالو صرف بلاول ۽ آصف علي زرداري جو رهندو. هن چيو ته اڄ اسين شهيدن کي ڀيٽا پيش ڪرڻ لاءِ آيا آهيون، ڇاڪاڻ جو اسان وانگر اوهان کي به شهيد محترما بينظير ياد اچي رهي آهي، هن پنهنجي جان عوام لاءِ قربان ڪئي، اهڙي بينظير جو دنيا ۾ ڪٿي به مثال نه ٿو ملي. اسان هر دفعي ڳڙهي خدابخش ڀٽو اينداسين جيسيتائين شهيدن کي انصاف نه ملندو ۽ بلاول ڀٽو زرداري کي وزيراعظم نه بڻائينداسين، تيسيتائين سُک سان نه ويهنداسين. هن چيو ته اسان اڃا وڌيڪ رڪارڊ رکنداسين، الله سائين پاڪستان ۽ سنڌ کي خوشحال رکي.

 

ناليواري راڳي سرمد سنڌي جي 21 هين ورسي ملهائي وئي

ڪراچي(شوبز نيوز) سنڌ جي قومي راڳي سرمدي سنڌي کي وڇڙندي اڄ 21 ورهيه گذري ويا آهن پر هو چاهيندڙن جي دلين مان وسري نه سگهيو آهي، اڄ سندس 21 ورسي سنڌ سميت پوري دنيا ۾ سندس چاهيندڙن طرفان ملهائي ويندي ۽ کيس ڀيٽا پيش ڪئي ويندي. جڏهن ته سندس گهرڀاتين ۽ مختلف ڌرين طرفان مزار تي حاضري ڀري گلن جون چادرون پڻ چاڙهيون وينديون. سرمد سنڌي 21 ورهيه اڳ روڊ حادثي ۾ فوت ٿي ويو هو.سرمد سنڌي جو اصل نالو عبدالرحمان مغل هو، پاڻ خيرپور ميرس جي هڪ ننڍڙي شهر پريالو ۾ جنم ورتو. ننڍي پڻ کان ئي کيس ڳائڻ جو شوق هو، پاڻ پيشي جي لحاظ کان هڪ انجنيئر هو، سرمد سنڌيءَ جي پهرين آڊيو ڪيسٽ ريليز ٿي ته ان جو هڪ گيت ”سورن سندي سڪرات آ“ جيڪو استاد بخاريءَ جو لکيل هو تمام گهڻو مشهور ٿيو.سرمد سنڌي حضرت شاهه عبداللطيف ڀٽائي، شيخ اياز، استاد بخاري، سچل سرمت، زخمي چانڊيو، زاهد شيخ ۽ آڪاش انصاري سميت ٻين مشهور شاعرن جي شاعري ڳائي، هن جا سنڌي سان گڏ سرائيڪي زبان ۾ ڳايل گيت به ڏاڍا مقبول ٿيا. پاڻ سنڌ کانسواءِ ڪيترن ئي پرڏيهي ملڪن ۾ پنهنجي فن جو مظاهرو ڪيو. سرمد سنڌي هڪ ڪار روڊ حادثي ۾ 27 ڊسمبر 1996ع ۾ لاڏاڻو ڪري ويو هو ناليواري راڳي سرمد سنڌ جي اڄ21 هين ورسي ملهائي پئي وڃي ، سندس مداحن پاران کيس ڀيٽا پيش ڪرڻ جوسلسلو جاري آهي.سرمد سرن ذريعي مسڪين ماڻهن جي اهنجن کي نروار ڪيو ۽ غريب ماڻهن جي ترجماني ڪئيجيتوڻيڪ سرمد سنڌي کي سنڌ واسن کان وڇڙئي 21 ورهيه وهامي ويا آهن پر ان باوجود سندس ڳايل گيت وڏي چاهه سان ٻڌا وڃن ٿا

 

ممڪن آهي ته 2018ع منهنجي شادي جو سال به هجي: ميرا

لاهور (شوبز نيوز) فلم اسٽار ميرا چيو آهي ته ٿي سگھي ٿو ته 2018ع منهنجي شادي جو سال به هجي. اداڪارا ميرا چيو آهي ته مون کي خبر آهي ته ڪجهه ماڻهو منهنجي خلاف سازشون ڪري رهيا آهن پر مون کي سندن ڪا به پرواهه ناهي. هن چيو ته 2018ع ۾ ٺهندڙ فلمن ۾ ٻيهر ڪم ڪندي نظر اينديس جڏهن ته ممڪن آهي ته 2018ع منهنجي شادي جو سال به هجي. اداڪارا چيو ته هن وقت ٻن ڊراما سيريلز ۾ ڪم ڪري رهي آهيان جڏهن ته مون کي هڪ خانگي ٽي وي چينل طرفان ميزبان طور شو ڪرڻ جي آڇ ٿي آهي جنهن ته اڃان تائين ڪو به فيصلو نه ڪيو آهي. هن چيو ته فلم منهنجي سڃاڻپ آهي ۽ ان کي آئون ڪڏهن به نه ڇڏينديس.

 

لاهور قلندرز: عاقب جاويد هيڊ ڪوچ ۽ فخر زمان نائب ڪپتان مقرر

لاهور(اسپورٽس نيوز) لاهور قلندر جي چيئرمين راڻا فواد عاقب جاويد کي ٽيم جو هيڊ ڪوچ ۽ فخر زمان کي نائب ڪپتان مقرر ڪري ڇڏيو. لاهور ۾ پريس ڪانفرنس ڪندي راڻا فواد چيو ته لاهور قلندر جو ڪوچ عاقب جاويد هوندو، هو ڊائريڪٽر ڪرڪيٽ آپريشنز به رهندو. راڻا فواد چيو ته لاهور قلندرز ۾ نون ماڻهن کي آڻڻ جو فيصلو ڪيو آهي، قلندرز جي نائب ڪپتان فخر زمان هوندو ۽ برينڊن ميڪولم جي ڪپتاني ۾ ٽيم اڳتي ويندي. ان موقعي تي فخر زمان چيو ته عاقب جاويد کان ٽريننگ لاءِ رابطو ڪيو، نيشنل ڪرڪيٽ اڪيڊمي ۾ ٽريننگ به ڪافي صلاحيتيون اڀاريون جڏهن ته منهنجي ڪاميابي ۾  لاهور قلندر جو گهڻو هٿ آهي.