تازيون خبرون

Daily Archives: December 20, 2017

41 ملڪي اتحاد ڪنهن خلاف ناهي، ڌرڻي ۾ فوج ملوث نڪتي ته عهدو ڇڏي ڏيندس: آرمي چيف

اسلام آباد(ويب ڊيسڪ) آرمي چيف جنرل قمر جاويد باجوه طرفان سينيٽ کي ملڪي ۽ خطي جي صورتحال تي بريفنگ ڏني وئي. تفصيل موجب سينيٽ جي سڄِ ايوان جي ڪميٽي جو خاص بند ڪمري وارو اجلاس ٿيو جيڪو 5 ڪلاڪن تائين جاري رهيو جنهن دوران آرمي چيف جنرل قمر جاويد باجوه پارليامينٽ جي ميمبرن کي قومي سلامتي ۽ خطي جي صورتحال تي بريفنگ ڏني. اهو اجلاس ان حوالي سان به اهميت تي ٻڌل هو ته پاڪستان جي پارلياماني تاريخ ۾ پهريون ڀيرو پاڪ فوج جي سربراهه ۽ ڊي جي ملٽري آپريشنز سينٽ کي بريفنگ ڏني. ان موقعي تي ڊي جي آءِ ايس آءِ ليفٽيننٽ جنرل نويد مختار، ڊي جي ايم او جنرل ساحر شمشاد مرزا، ڊي جي آءِ ايس پي آر ميجر جنرل آصف غفور ۽ ڊي جي ايم آءِ به موجود هئا. ذريعن موجب پاڪ فوج جي سربراهه سينيٽرن کي علائقائي ۽ قومي سلامتي جي صورتحال خاص ڪري سعودي اسلامي فوجي اتحاد ۾ پاڪستان جي شموليت تي اعتماد ۾ ورتو. بريفنگ کان پوءِ سوالن ۽ جوابن جو سيشن به ٿيو جنهن ۾ پارليامينٽ جي ميمبرن جي سوالن جا جواب عسڪري اختيارين ڏنا. ڪميٽي جو اجلاس آمريڪي صدر ڊونلڊ ٽرمپ جي بيان جي ڪري گهرايو ويو هو جنهن دوران اڳتي لاءِ حڪمت عملي به ڪئي وئي آهي. ذريعن موجب اجلاس ۾ گم ٿيل ماڻهن، فيض آباد ڌرڻي ۽ طالبان ۽ داعش بابت به سوال پڇيا ويا. مسلم ليگ ن جي سينيٽر مشاهد الله خان ڌرڻي بابت سوال ڪيو جنهن جي جواب ۾ آرمي چيف چيو ته جيڪڏهن ثابت ٿي ويو ته ڌرڻي جي پٺيان فوج هئي ته آئون استعيفيٰ ڏئي ڇڏيندس. هن چيو ته جڏهن ڌرڻو هنيو ويو ته منهنجي ذهن ۾ لال مسجد وارو واقعو به آيو، مون ڊي جي آءِ ايس آءِ کي چيو ته ڌرڻي وارن سان ڳالهيون ڪيو، ڳالهيون ته خبر پئي ته انهن جا چار مطالبا آهن پوءِ وري هڪ ئي مطالبي تي اچي ويا، سعودي عرب ويندي به ڌرڻي بابت ڄاڻ وٺندو رهيس. گم ٿيل ماڻهن جي حوالي سان سوال جي جواب ۾ آرمي چيف چيو ته گم ٿيل ماڻهن جا مختلف سبب آهن، ڪجهه ماڻهو پاڻ غائب ٿي گم ظاهر ڪرائيندا آهن، ايجنسيون رڳو انهن ماڻهن کي جاچ لاءِ تحويل ۾ رکندي آهي جيڪي ملڪ دشمن سرگرمين ۾ ملوث آهن. اجلاس ۾ آرمي چيف هر هر زور ڏيندي چيو ته پارليامينٽ ئي سڀ ڪجهه آهي. آرمي چيفچيو ته توهان پاليسي بڻايو، اسان عمل ڪنداسين، اسان کي ڏسڻو آهي، اڄ ڇا ٿي رهيو آهي، اڄ ڇا ڪرڻ جي ضرورت آهي، ماضي ۾ وڃن جو ڪو به فائدو ناهي. آرمي چيف جي ڳالهين کان پوءِ ڪجهه وقت تائين ڊي جي آءِ ايس آءِ وضاحت ڏيندو رهيو.  ذريعن موجب ڊي جي ايم او جنرل ساحد شمشاد مرزا طرفان سينيٽ کي بريفنگ ڏيندي ٻڌايو ويو ته فوجي عدالتن ۾ هن وقت تائين 274 ڪيسن جا فيصلا ٿيا، 161 ڏوهارين کي موت جي سزا ٻڌائي وئي جن مان 56 ڏوهارين کي ڦاهي ڏني وئي. 13 ڏوهارين کي آپريشن رد الفساد کان پهرين ڦاهي ڏني وئي ۽ 43 کي آپريشن کان پوءِ ڦاهي ڏني وئي. اجلاس دوران هڪ موقعي تي سينيٽر يعقوب ناصر جي شور سبب هال ۾ بدمزگي پيدا ٿي. مسلم ليگ ن جي سينيٽر يعقوب ناصر ٻيو سوال ڪرڻ جي اجازت نه ملڻ تي هنگامو ڪيو. ڊي جي آءِ ايس آءِ کيس چيو ته توهان جو ذاتي مسئلو آهي ته چيئرمين کي ٻڌايو يا اسان وٽ اچو، چيئرمين صاحب جيئن چوندو اسان ائين ڪنداسين.  سينيٽ جي سڄي ايوان تي ٻڌل ڪميٽي جي ان اهم اجلاس جي موقعي تي پارليامينٽ جون سموريون گيلريون بند ڪيون ويون ۽ پريس لائونچ کي به تالا لڳايا ويا جڏهن ته ميڊيا کي ڪيميرائون اندر آڻڻ کان به منع ڪيو ويو. پارليامينٽ پهچڻ تي آرمي چيف جو استقبال سينيٽ جي ڊپٽي چيئرمين عبدالغفور حيدري ڪيو. آرمي چيف سڌو سينيٽ چيئرمين جي چيمبر ۾ ويو ۽ رضا رباني سان ملاقات ڪئي. جنهن بعد ايوان ڏانهن ويندي سينيٽ جي چيئرمين جمهوري گهٽي ڏانهن اشارو ڪندي آرمي چيف چيو ته اها جمهوري گهٽي آهي. آرمي چيف ان تي سرسري نظر وجهي اڳتي هليو ويو. آرمي چيف جنرل قمر جاويد باجوه طفان سينيٽ کي ملڪي ۽ خطي جي صورتحال تي بريفنگ وئي خدشا ختم ڪري ڇڏيا، سندس چوڻ آهي ته اسلامي فوجي اتحاد ڪنهن ملڪ خلاف ناهي، ايران ۽ سعودي عرب ۾ ويڙهه ٿيڻ نه ڏينداسين. پ پ جي سينيٽر فاروق ايڇ نائيڪ سوال ڪيو ته فوج جي موجوده ڪردار کان توهان مطمئن  آهيو. هن چيو ته ڇا فوج کي موجوده ڪردار کان وڌيڪ ڪردار ادا ڪرڻ گهرجي. آرمي چيف جنرل قمر جاويد باجوه چيو ته فوج جو آئين ۾ جيڪو ڪردار آهي تنهن مان مطمئن آهيان. هن چيو ته 41 ملڪن جو اتحاد ڪنهن ملڪ  جي حفاظت ناهي، اڃا ٽي آر اوز طئي نه ڪيا ويا آهن. سندس چوڻ هو ته پاڪستان ايران ۽ سعودي عرب ۾ جنگ ٿيڻ نه ڏيندو. ان موقعي تي ميجر جنرل آصف غفور چيو ته جيستائين اسان هڪ آهيون ڪير به شڪست نه ٿو ڏئي سگهي. هن چيو ته سمورن سينيٽرن فوج جي ڪردار جي واکاڻ ڪئي ۽ قربانين جو اعتراف ڪيو. سندس چوڻ هو ته سڪيورٽي صورتحال تي پاڪ فوج جي ڪردار جي واکاڻ ڪئي وئي چيو ويو ته پاڪستان محفوظ ملڪ آهي.

عمران ڪيس آڏو منهنجو ڪيس ڪجهه ناهي، انصاف جي بحالي لاءِ تحريڪ هلائينداسين: نواز شريف

اسلام آباد(ويب ڊيسڪ) اڳوڻي وزير اعظم نواز شريف سان پنجاب هائوس ۾  مسلم ليگ ن جي ڪارڪنن ملاقات ڪئي، مسلم ليگ ن جي صدر پارٽي اڳواڻن ۽ ڪارڪنن کي پنهنجن علائقن ۾ متحرڪ رهڻ جي هدايت ڪري ڇڏي، ان موقعي تي عمران خان جي ڪيس تي تبصرو ڪندي نواز شريف چيو ته منهنجو ڪيس ته عمران خان جي ڪيس جي ڀيٽ ۾ ڪجهه نه هو، جمائما پيسا موڪليا هئا ته پنهنجي مڙس جي اڪائونٽ ۾ موڪلي ها، جمائما مڙس ڏانهن پيسا موڪلڻ بدران ڪنهن ٻئي ڏانهن موڪليا، ٻڌايو وڇي ته بني گالا ۾ گهر ڪيئن بڻيو؟ هن چيو ته پارٽي پرڏيهي فنڊنگ وارو معاملو به 5 سالن تائين محدود ڇو ڪيو ويو؟ پي ٽي آءِ جو چيئرمين چوندو آهي ته هو ڏوهاري آهي،  پر اعليٰ عدليه جي بينچ چئي ٿي ته نه، نواز شريف چيو ته عمران خان قبوليو آهي ته نيازي سروسز سندس اثاثو آهي، عمران خان نيازي سروسز جي اڪائونٽ ۾ لکين پائونڊ قبوليا. نواز شريف دانيال عزيز کي ميڊيا بريفنگ جي هدايت ڪندي چيو ته عمران خان ۽ پانام ڪيس کي ڀيٽي ميڊيا کي بريف ڪيو.

 

تڪ بندين بابت آئيني ترميمي بل2017ع  منظور

اسلام آباد(ويب ڊيسڪ)نئين آدمشماري تحت تڪبندين بابت آئيني ترميمي بل 2017ع سينيٽ مان منظور ٿي وئي. وزيراعظم شاهد خاقان عباسي گذريل ڏينهن اپوزيشن اڳواڻن سان ملاقات ڪئي هئي جنهن ۾ تڪبندين بابت بل تي ڊيڊ لاڪ ختم ڪري ان کي اڄ سينيٽ ۾ پيش ڪرڻ جو فيصلو ڪيو ويو هو. سينيٽ چيئرمين رضا رباني جي سربراهي ۾ سينيٽ جو اجلاس جاري آهي جنهن ۾ پارلياماني معاملن بابت وزير شيخ آفتاب تڪبندين بابت آئيني ترميم بل پيش ڪيو، ايوان ۾ تڪبندين بابت بل جي شق وار منظوري ڪئي وئي. سينيٽ ۾ پيش ٿيندڙ بل جي حق ۾ 84 ووٽ وڌا ويا جڏهن ته مخالفت ۾ صرف هڪ ووٽ پيو، پاڪستان مسلم ليگ ق جي سينيٽر ڪامل علي آغا آئيني ترميم بل جي مخالفت ۾ ووٽ وڌو. قائد ايوان راجا ظفر الحق چيو ته تڪبندين بابت بل جي منظوري تي سمورين سياسي پارٽين جو شڪرگذار آهيان، آئيني ترميمي بل جي منظوري جمهوريت جي تسلسل لاءِ اهم هئي. بل قومي اسيمبلي مان منظوري کانپوءِ گذريل مهيني سينيٽ جي اجلاس ۾ پيش ڪيو وڃڻو هو پر پاڪستان پيپلز پارٽي جي خدشن سبب پيش نه ڪيو.

 

 

 

هلندڙ سال سڄي دنيا ۾ 65 صحافي قتل ڪيا ويا

پئرس (ويب ڊيسڪ) هلندڙ سال سڄي دنيا ۾ 65 صحافين ۽ ميڊيا جي نمائندن کي قتل ڪيو ويو، جن ۾ 9 عورتون به شامل آهن. صحافين جي عالمي تنظيم رپورٽرز  وِد آئوٽ بارڊرز موجب صحافين لاءِ خطرناڪ ترين ملڪن جي فهرست ۾ شام جو پهريون نمبر برقرار آهي، جتي 12 رپورٽرن کي قتل ڪيو ويو، ان کانپوءِ ميڪسيڪو جو نمبر اچي ٿو، جتي 11 صحافي ماريا ويا. واضح رهي ته مجموعي طور گذريل 14 ورهين دوران صحافين جي قتل جي حساب سان هلندڙ سال اهو انگ سڀني کان گهٽ آهي، جڏهن ته 2017ع ۾ خطرناڪ خطن اندر صحافين جي پيشيوراڻي سرگرمين کي پڻ محدود ڪيو ويو. 2016ع ۾ 112 صحافين کي قتل ڪيو ويو هو، جن ۾ 3 عورتون شامل هيون، جڏهن ته 2015ع ۾ 10 عورتن سميت 101 صحافي ماريا ويا هئا.27

 

ادارن ۾ ويڙهه ٿي ته ملڪ کي وڏو نقصان پهچندو: خورشيد شاهه

اسلام آباد (اين اين آءِ) مخالف ڌر جي اڳواڻ سيد خورشيد شاهه چيو ته حڪومت ۽ ادارن جو ٽڪراءَ نظر اچي ٿو سمورا معاملا ويهي حل ڪرڻ جي ضرورت آهياسانجي خواهش آهي ته چوندون مقرر وقت تي ٿين آرمي چيف جو پارليمينٽ  ۾ اچڻ سنيٽ کي بريفنگ ڏيڻ معمول جي ڳالهه آهي ڪائي وڏي ڳالهه ناهي. پارليمينٽ جو گڏيل اجلاس گھرائڻ ضروري آهي صحآفين سان ڳالهائندي هن چيو ته اسان جي خواهش آهي ته چونڊون مقرر وقت تي ٿين. هن کان اڳ جنرل راحيل شريف به بريفنگ ڏئي چڪو آهي هن چيو ته عسڪري عملدارن جي بريفنگ پارليمينٽ جي بالادستي جي لاءِ فائديمند آهي، خورشيد شاهه چيو ته ڪوئيٽا جو سانحو ٿيو ۽ ڪجھه ماڻهون رستي ۾ به ويهي رهيا هئا، حڪومت ۽ ادارن  جو ٽڪراءَ نطر اچي  ٿو اهي سمورا معاملا ويهي حل ڪري سگھجن ٿا، خورشيد شاهه چيو ته اهو ته نوازشريف ئي ٻڌائي سگھي ٿو ته تحريڪ عدل شاه آهي ائين ته ناهي ته ميان صاحب تحريڪ انصاف  جي مقابلي ۾تحريڪ عدل پارٽي بڻائي رهيو آهي ، ميان صاحب کي سدائين چيو ته ادارن کي بدنام نه ڪريو پارليمينٽ هڪ وڏو ادارو آهي جنهن کان سڀ ادارا مدد وٺن ٿا. هن چيو ته جيڪڏهن ادارن جي جنگ شروع ٿي وئي ته پاڪستان کي وڏو نقصان ٿيندو.

 

اجلاس ۾ دهشتگردي خلاف گڏجي مقابلو ڪرڻ تي اتفاق ٿيو: ڊي جي آءِ ايس پي آر

اسلام آباد (اين اين آءِ) ڊِي جي آءِ ايس پي آر ميجر جنرل آصف غفور چيو آهي ته آرمي چيف جي بريفنگ ۾ اتفاق ڪيو ويو ته اسان سڀ گڏجي اڳتي وڌانداسين، سينيٽ جي ڪميٽي کي آرمي چيف جنرل قمر جاويد باجوه پاران بريفنگ کانپوءِ ميڊيا سان ڳالهائيندي هن چيو ته هڪ ڪلاڪ بريفنگ ٿي ۽ 3 ڪلاڪ سوالن ۽ جوابن جو سيشن ٿيو، اجلاس دوران دهشتگردي خلاف جنگ ۾ پاڪستان جي حڪمت عملي تي بريفنگ ڏني وئي، اجلاس ۾ ڊي جي ايم او سيڪيورٽي بابت تفصيلي بريفنگ ڏني، ميجر جنرل آصف غفور ٻڌايو ته هي هڪ زبردست سيشن هو جنهن ۾ سيڪيورٽي بابت جيو اسٽريٽجڪ جي معاملن تي ڳالهيون ٿيون، بريفنگ ۾ دهشتگردي خلاف جنگ، نيشنل سيڪيورٽي جي خطرن کان آگاهه ڪيو ويو ۽ ايندڙ حڪمت عملي بابت ڳالهيون ٿيون. ڊي جي آءِ ايس پي آر چيو ته ان دوران بهتر نموني سوال ۽ جواب ڪيا ويا، سينيٽرن، آرمي چيف ۽ سندس ٽيم جي اچڻ تي خوشي جو اظهار ڪيو، سينيٽرن پاڪستان جي فوج جي ڪردار جو به اعتراف ڪيو، ترجمان موجب سيشن ۾ سمورا سوال ميرٽ تي ڪيا ويا، آرمي چيف انهن جا تفصيلي جواب ڏنا، آصف غفور چيو ته سمورا ميمبر سوال نه ڪري سگهيا، جڏهن ته ڪجهه ميمبرن جا سوال هئا جن تي آرمي چيف جواب ڏئي انهن جا خدشا ختم ڪيا، ڊي جي آءِ ايس پي آر موجب سينيٽر ميمبر سيڪيورٽي صورتحال تي وڌيڪ باخبر هئا، جڏهن ته سيڪيورٽي صورتحال تي پاڪ فوج جي ڪردار جي واکاڻ ڪئي وئي ۽ اتفاق ڪيو ويو ته پاڪستان کي خطرن جو گڏجي مقابلو ڪنداسين، پاڪ فوج جي ترجمان ڊگهي انتظار لاءِ صحافين جو شڪريو ادا ڪيو ۽ چيو ته تفصيلي پريس ڪانفرنس ايندڙ 3 کان 4 ڏينهن اندر ڪئي ويندي.

 

ڪراچي ۾ پاڻيءَ جي کوٽ ايتري نه آهي جيتري واويلا ڪئي پئي وڃي، اصل مسئلو ورهيا واري ورهاستي نظام جو آهي: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته شهر ۾ پاڻيءَ جي کوٽ ايتري نه آهي جيتري واويلا ڪئي پئي وڃي پر اصل مسئلو 70 کان 80 ورهيا واري ورهاستي نظام جو آهي. هن اها ڳالهه اڄ وزيراعليٰ هائوس ۾ صوبي اندر پيئڻ جي صاف پاڻيءَ جي فراهميءَ بابت هڪ اعليٰ سطحي اجلاس جي صدارت ڪندي ڪئي. اجلاس ۾ صوبائي وزيرن منظور حسين وساڻ، ڊاڪٽر سڪندر مينڌرو، فياض ٻٽ، چيف سيڪريٽري سنڌ رضوان ميمڻ، ايڊووڪيٽ جنرل ضمير گهمرو، چيئرمين رٿابندي ۽ ترقي محمد وسيم، وڏي وزير جو پرنسپل سيڪريٽري سهيل راجپوت، ورلڊ بينڪ جا نمائندا، صحت، انڊسٽري، پبلڪ هيلٿ انجنيئرنگ، توانائي کاتن جا سيڪريٽريز، مختلف کاتن جا چيف انجنيئرز، ڊويزنل ڪمشنرن ۽ ٻين شرڪت ڪئي. وڏي وزير سيد مراد علي شاهه چيو ته شهر ۾ پاڻيءَ جي ايتري به کوٽ نه آهي جيئن واٽر بورڊ واويلا ڪري رهيو آهي.  واٽر بورڊ جي بيورو ڪريسي ۽ لوڪل گورنمينٽ گذريل ڪيترن ئي سالن کان سياستدانن کي گمراهه ڪري رهيا آهن ۽ سياستدان انهن جي غلط انگن اکرن تي يقين ڪندا آهن. هن چيو ته مان هڪ پروفيشنل انجنيئر آهيان ۽ اوهان مون کي مس گائيڊ نه ٿا ڪري سگهو. هن واٽر بورڊ کي چيو ته اصل مسئلو غيرموئثر ورهاست جي نظام جو آهي جيڪو واٽر بورڊ پاڻيءَ جي کوٽ جي آڙ ۾ لڪائيندي رهي آهي. هن چيو ته اصل مسئلو زنگ آلود، خراب ۽ پراڻي ورهاست وارو نظام آهي. ان تي صوبائي وزير بلديات ڄام خان شوري چيو ته شهر ۾ 1200 ڪلوميٽر ڊگهو پاڻيءَ جي فراهميءَ جو نيٽورڪ آهي. جنهن جي تبديليءَ تي اٽڪل 2000 بلين رپيا لاڳت ايندي. وڏي وزير چيو ته نئين آدمشماريءَ مطابق شهر جي آبادي 16 ملين آهي. واٽر بورڊ جي معيار مطابق پاڻيءَ جي گهرج 50 جي في ماڻهو روزاني آهي. جيڪڏهن 16 ملين جي آباديءَ کي 50 جي /ڪي پيٽا / ڏينهن جي حساب سان ضرب ڏجي ته شهر جي پاڻيءَ جي گهرج 800 ايم جي ڊي ٿيندي. هن چيو ته مان اهو چوڻ چاهيان ٿو ته هن وقت ڪراچيءَ کي 650 ايم جي ڊي پاڻي ملي رهيو آهي، جنهن ۾ 550 ايم جي ڊي ڪينجهر ۽ 100 ايم جي ڊي حب ڊيم مان ملي رهيو آهي. 2018 جي آخر تائين ڪي فور مان 260 ايم جي ڊي پلس 65 ايم جي ڊي ٻين ننڍين اسڪيمن مان حاصل ٿيندو، اهڙي ريت اهو 325 ايم جي ڊي ٿي ويندو، جيڪڏهن هاڻوڪي دستياب 650 ايم جي ڊي ۽ ڪي فور ۽ ٻين ننڍين اسڪيمن جي 325 ايم جي ڊي کي ملائجي ٿو ته اهڙي طرح شهر ۾ دستياب پاڻي 975 ايم جي ڊي ٿي ويندو، جڏهن ته گهرج 800 ايم جي ڊي آهي ۽ اهڙي ريت اهو پاڻي ايندڙ 3 کان 4 سالن لاءِ ڪافي ٿيندو. شهر ۾ پاڻيءَ جي ورهاست بابت وڏي وزير چيو ته 80 کان 100 ورهيا پراڻو نظام آهي ۽ هن پنهنجي لوجيڪل ڄمار مڪمل ڪري ڇڏي آهي ۽ نه رڳو پراڻيون لائنن ڪري پاڻي آلوده ٿي رهيو آهي پر ليڪيج ڪري ضايع به ٿي رهيو آهي. هن صوبائي وزير بلديات کي هدايت ڪئي ته هُو پراڻي ورهاست واري نظام جي تبديليءَ لاءِ پلان تيار ڪري. هن چيو ته مان اوهان کي صلاح ڏيندس ته اوهان پاڻيءَ جي فراهميءَ لاءِ وڇايل لائنن جو علائقي جي حساب سان ڊيٽا فراهم گڏ ڪريو ۽ ان بعد پهرين مرحلي ۾ سڀني کان پراڻي لائنن جي تبديلي شروع ڪريو ۽ پوءِ مرحليوار تبديل ڪيون وڃن. هن چيو ته پراڻن علائقا جتي پاڻي جي ورهاست واريون پائپ لائنون 60 کان 70 ورهيا اڳ وڇايون ويون هيون ۽ ڪجهه لاءِ چيو ويندو آهي ته 100 سال پراڻيون آهن. هن چيو ته ان رٿا تي جيتري به لاڳت ايندي ان لاءِ فنڊ فراهم ڪرڻ لاءِ تيار آهيان. صوبائي بلديات واري وزير ڄام خان شورو چيو ته حيسڪو واٽر بورڊ کان ڪينجهر ڍنڍ تي ڪي فور پروجيڪٽ جي پمپنگ اسٽيشن کي 50 ميگاواٽ بجليءَ جي فراهميءَ لاءِ 6 بلين رپين جي دائيگيءَ جو مطالبو ڪيو آهي. ان تي وڏي وزير سيد مراد علي شاهه چيو ته واٽر بورڊ 50 ميگاواٽ بجلي ۽ ٽرانميشن لائن لاءِ 6 ملين رپيا ادا ڪري رهيو آهي ته پوءِ اهي پنهنجو ايل اين جي تي هلندڙ يا 50 ميگاواٽ جو ونڊ پاور پلانٽ ڇو نه ٿو لڳايو وڃي؟، ڪي فور لاءِ فنڊ موجود آهن. هن چيو ته مان صلاح ڏيندس ته اوهان پنهنجو ذاتي 50 ميگاواٽ وارو پاور پلانٽ لڳايو ۽ واٽر بورڊ لاءِ پاور پلانٽ جي تعمير ۽ ٽرانسميشن لائين لاءِ خانگي پارٽي ۽ حڪومت گڏجي شراڪت ڪندا. هن چيو ته هُو چوڻ چاهي ٿو ته اهو هڪ سال اندر لڳايو ويندو. وڏي وزير اهو هدف صوبائي توانائي واري سيڪريٽري آغا واصف کي هدايت ڏيندي چيو ته هُو صوبائي وزير بلديات ۽ ايم ڊي واٽر بورڊ سان گڏجي هڪ پلان جوڙي ۽ 50 ميگاواٽ پاور پلانٽ لاءِ سروري شروع ڪيو وڃي.  اجلاس کي ٻڌايو ويو ته ويسٽ واٽر جون ٽي ميونسپل، اسپتال ۽ صعنتي قسمون آهن ۽ اهي لياري ۽ ملير ندين ۾ وهايو ويندو آهي. هن چيو ته هڪ 94 ايم جي ڊي ويسٽ واٽر ٽريٽمينٽ پلانٽ لڳائڻ جو هڪ منصوبو آهي. وڏي وزير کي 162.9 بلين رپين جي پبلڪ هيلٿ انجئينرنگ کاتي جي پاڻيءَ جي فراهميءَ جي اسڪيمن بابت بريفنگ ڏني وئي. صوبائي وزير پي ايڇ اِي فياض ٻٽ اجلاس کي ٻڌايو ته 22 ضلعن ۾ 3896 اسڪيمون آهن جن ۾ 1671 هلندڙ ۽ 2225 نين رٿائن تي ڪم هلندڙ آهي. وڏي وزير پي ايڇ اي کاتي جي سيڪريٽري تميزالدين کيڙو کي هدايت ڪئي ته انهن 22 ضلعن جتي پاڻيءَ جي فراهميءَ جون اسڪيمون هلندڙ آهن اتي جي وڏن ڳوٺن لاءِ نيڪاليءَ واري نظام لاءِ تفصيلي پلان جوڙيو وڃي. هن چيو ته نيڪاليءَ وارو نظام نئين آدمشماريءَ  مطابق آبادي جي انگن اکن کي ڏسندي ڊزائن ڪيو وڃي. وڏي وزير سيد مراد علي شاهه ڊويزنل ڪمشنرن کي هدايت ڪئي ته اهي پنهنجي لاڳاپيل علائقن جي پاڻيءَ جي ٽيسٽ رپورٽ فراهم ڪئي وڃي. هن چيو ته اوهان (ڊويزنل ڪمشنرز) ميونسپل جي پاڻيءَ کي درياهه يا ٻين پاڻيءَ جي واهن ۾ وهائڻ بدران نالن ۾ ڇوڙ ڪرڻ لاءِ ضروري اپاءَ ورتا وڃن. هن چيو ته پهرين مرحلي ۾ هر هڪ ضلعي هيڊڪواٽر ۽ ٻئي مرحلي ۾ تعلقي هيڊڪوارٽر ۾ ٽريٽمنٽ پلانٽ لڳائڻ تائين ڊسيپلين کي لازمي برقرار رکيو وڃي. وڏي وزير ڊويزنل ڪمشنرن کي اها به هدايت ڪئي ته هُو سنڌوءَ تي واقع شهرن لاءِ درياهه مان پاڻيءَ جي فراهمي جي حوالي سان به پلان جوڙيو وڃي. وڏي وزير چيو ته هُو 28 ڊسمبر تي وڌيڪ اڳڀرائي بابت ٽيون اجلاس گهرائيندو.

 

اسلام آباد پوليس  ۾ مذهب، لسانيت ۽ صوبائي تعصب نه هجڻ گھرجي : گھرو وزير

اسلام آباد (اين اين آءِ) گھرو وزير احسن اقبال چيو آهي ته اسلام آباد پوليس ۾ مذهب لسانيت ۽ صوبائي تعصب نه هجڻ گھرجي ميڊيا کيسيڪيورٽي آپريشن جي سڌيڪوريج کان پاسو ڪرڻ گھرجي ، ڏوهن سان مقابلي جي لاءِ ميڊيا سان گڏجي نئون ضابطه اخلاق بڻائنون پوندو، دهشتگردن جي ڪوريج بدران معاشري جي هاڪاري مسئلن کي اٿارڻون پوندو. ميڊيا پوليس جي ڪارڪردگي جي احتساب سان  گڏ سيڪيورٽيءَ جي گھرجن جو به خيال رکڻون پوندو. مسجدن ۾ نمازين، بازارن ۽ تعليمي ادارن ۾ مشقوڪ ماڻهن ۾ نظر رکڻي پوندي اڱاري تي گھرو وزير احسن اقبال پوليس لائين ۾ پوليس دربار کي خطاب ڪندي چيو ته ڇهن مهينن ۾ ڇهن سالن جو ڪم ڪرڻ ڇاهيان ٿو هن چيو ته پوليس جو بهتر معاشرو اڏڻ ۾ خاص ڪردار هوندو آهي ، هن چيو ته جڏهن ڪنهن معاشري ۾ امن نه هجي ته ان معاشري جي رزق ۾ برڪت ناهي رهندي امن جيڪڏهن به هجي ته ملڪ ترقي نه ٿو ڪري سگھي. امن ۽ استحڪام قائم ڪرڻ سان پوليس جو ڪرادار خاص اهميت وارو آهي هن چيو ته پوليس راتين جون ننڊون ڦٽائي عوام کي سڪون ڪرڻ جو  حق ڏئي ٿي، هن چيو ته عيد جي ڏينهن به ٿاڻن ۽ رستن تي ڊيوٽي ڪندي نظر ايندا آهن. هن چيو ته پوليس جي فرض ۽ ڪم معاشري جي لاءِ اهميت وارو آهي هن چيو ته پوليس جون خدمتن ۽ قربانين تي اسانکي ناز آهي، گھرو وزير  ٻڌايو ته پوليس جي اصلاح لاءِ ستر سالن کان  ڳالهيون ڪيون پيون وڃن، هن چيو ته نئين آءِ جي پوليس جي اڳواڻي ۾ اسلام آباد جي پوليس هڪ مثالي پوليس ثابت ٿيندي، احسن اقبال چيو ته مونکي گھرو وزارت جو منصب مونکي ملڪي حالتن ۾ تبديلين لاءِ ڏ نو ويو. هن چيو ته مان چاهيان ٿو ته ڇهن مهينن ۾ ڇهن سالن جو ڪم ڪري سگھان.  هن چيو ته اسانکي پوليس کي عوامي خدمتگار سان گڏ پيشيواراڻا صلاحيتن کي به وڌائڻو آهي هن چيو ته ميڊيا جي آزادي وڏي ذميواري به آهي ۽ ميڊيا کي سيڪيورٽي اپريشن جي سڌي ڪوريج کان پاسو ڪرڻ گھرجي.  گھرو و زير چيو ته دهستگرد پاڪستان ۾ عدم استحڪام پيدا ڪرڻ چاهين ٿا اسلام آباد پوليس کي ان پاڪستانيت جو مثال بڻجڻ گھرجي جيڪو هڪ خاندان جو مثال هجي، گھرو وزير چيو ته اسلام آباد پوليس ۾ مذهبي لسانيت ۽ صوبائي تعصب نه هجڻ گھرجي ، عورتن ۽ ٻارڙن بابت ڏوهن تي به زيرو ٽالرنس هجڻ گھرجي، اسلام اسان کي عورتن جي تحفظ جو درس ڏئي ٿو، عورتن تي تشدد ڪندڙ مرد ڪنهن رعائت جي مستحڪ ناهن ٻارڙا قوم جو مستقبل آهن انهن  جي خلاف ڏوهن ۾ ملوث ماڻهون به رعائت جي مستحڪ ناهن.  گھرو وزير چيو ته  ماڊل پوليس اسٽيشنن ۾ جديدميس ۽ ليڪچر هال به هجڻ گھرجي ، پوليس جي هر گاڏي سان ڪيمرا هجڻ گهرجي تي لائيو فوٽيج سيف سٽي ٿاڻي کي ڏئي سگھجي هن چيو ته پوليس جي ويلفيئر جي حوالي سان اسلام آباد جي پوليس ڪنهن به صوبي جي پوليس کان گھٽ نه هوندي.

 

نواز شريف عدليا مخالف تحريڪ هلائيندو ته اسان آئين جي حق ۾ تحريڪ جو اعلان ڪنداسين: فواد چوڌري

اسلام آباد (ويب ڊيسڪ) تحريڪ انصاف اڳواڻ فواد چوڌري چيو آهي ته نواز شريف تاريخ ٻڌائي ڪڏهن عدليا خلاف تحريڪ جو اعلان ڪندو، جنهن ڏينهن هو عدليا مخالف تحريڪ جو اعلان ڪندو، ساڳي ڏينهن اسان آئين جي حق ۾ تحريڪ جو اعلان ڪنداسين. صحافين سان ڳالهائيندي فواد چوڌري چيو ته حديبيا پيپرز مل فيصلي سان شهباز شريف کي فائدو ٿيو، نواز شريف ان فيصلي مان خوش ناهي، نواز شريف توهان جو ڀاءُ شهباز ۽ چوڌري نثار توهان سان گڏ ناهن، اسان توهان جيان گهٽ ۾ گهٽ ملڪ جي ناڻي کي اي ٽي ايم ناهي سمجهيو. سندس چوڻ هو ته نواز شريف ايم ڪيو ايم لنڊن جي رستي تي هلي رهيو آهي، اسان جهانگير ترين بابت فيصلي مان مطمئن ناهيون پر عدليا تي چڙهائي نه ڪنداسين. هن چيو ته تڪ بندين جو ڪم جلد مڪمل ڪيو وڃي، اليڪشن ڪميشن کي ٽن مهينن ۾ تڪ بندين جو ڪم مڪمل ڪرڻ گهرجي، پي ٽي آءِ آئيني ترميمي بل جي مڪمل حمايت ڪري ٿي، ڊاڪٽر طاهر القادري جي مطالبي جي به حمايت ڪيون ٿا.27

 

جهانگير ترين جي نااهلي پي ٽي آءِ جي ديانتداري جا پول کولي ڇڏيا: قمر زمان ڪائرا

سرگوڌا (ويب ڊيسڪ) پ پ اڳواڻ قمر زمان ڪائرا چيو آهي ته ڪو چاهي پيو ته چونڊون جلد ٿين ۽ ڪو چاهي پيو ته دير سان ٿين، عمران خان کي چونڊن جي ڏاڍي تڪڙ آهي، پ پ جي خواهش آهي ته چونڊون وقت تي ٿين، فيصلو رڳو عوام جي ووٽ سان ٿيندو. سرگوڌا ۾ صحافين سان ڳالهائيندي قمر زمان ڪائرا چيو ته عدالت تحريڪ انصاف سربراهه کي شڪ جو فائدو ڏنو آهي، عمران خان ڪرپٽ ماڻهن کي گڏ ڪري ڪهڙو نئون پاڪستان ٺاهي رهيو آهي، جهانگير ترين جي برطرفي پي ٽي آءِ جي ديانتداري جو پول کولي ڇڏيو. هن چيو ته هر دور ۾ پ پ جو احتساب ٿيو، پ پ 40 سالن کان احتساب کي منهن ڏئي رهي آهي، ڪيسن ۾ ڪامياب ٿياسين، اسان تي الزام لڳائيندڙ اڄ دربدر ٿي رهيا آهن، شهيد بي بي تي نواز شريف ڪوڙا ڪيس ڪيا، اڄ پ پ قيادت تي ڪوڙا ڪيس ڪندڙن جو خاندان عدالت ۾ آهي. سندس چوڻ هو ته چونڊن ۾ ڪاميابي حاصل ڪري مخالفن جا وات بند ڪري ڇڏينداسين.27