تازيون خبرون

Daily Archives: November 7, 2017

اڳوڻي وزير اعظم جي نيب عدالت ۾ شاهي انداز ۾ پيشي، فيصلو محفوظ

اسلام آباد( ويب ڊيسڪ ) احتساب عدالت شريف خاندان خلاف ٽنهي ريفرنسز کي گڏ ڪرڻ جي درخواست تي فيصلو محفوظ ڪري ڇڏيو. اڳوڻي وزيراعظم نواز شريف پنهنجي نياڻي مريم نواز ۽ ناٺي ڪيپٽن رٽائر صفدر سميت پهريون ڀيرو گڏجي احتساب عدالت ۾ پيش ٿيو. احتساب عدالت جي جج محمد بشير نيب طرفان داخل ٽن ريفرنسز تي ٻڌڻي ڪئي. اڳوڻو وزيراعظم نواز شريف، مريم نواز ۽ ڪيپٽن صفدر پهريون ڀيرو گڏجي هڪ ئي گاڏي ۾ سوار ٿي احتساب عدالت پهتا. اڳوڻي وزيراعظم جي وڪيل خواجه حارث دليل ڏيندي چيو ته الزام آهي ته نواز شريف اثاثن جي قانوني حيثيت ثابت ڪرڻ ۾ ناڪام رهيو آهي، تاثر آهي ته لنڊن فليٽس نواز شريف جي ملڪيت آهن. هن چيو ته اڳوڻي وزيراعظم خلاف ٽئي ريفرنسز عبوري آهن، هي ريفرنس هڪ ئي آهي، جي آءِ ٽِي جي رپورٽ تي داخل ٿيا ۽ اهڙن ڪيسن جا شاهد به گڏيل آهن، ٽنهي ريفرنسز کي هڪ ريفرنس بڻائي فائل ڪرڻ گهرجي، عدالت هڪ ئي فرد جرم لاڳو ڪري. خواجه حارث اسلام آباد هاءِ ڪورٽ جو فيصلو پڙهي ٻڌايو ۽ عدالت کي ٽئي ريفرنسز گڏائڻ جي درخواست ڪئي. ٻڌڻي دوران عدالت رمارڪس ڏيندي چيو ته اسلام آباد هاءِ ڪورٽ سيڪشن 17 بي تحت درخواست اڪلائڻ جو حڪم ڏنو آهي. نيب پراسيڪيوٽر ريفرنسز گڏائڻ جي مخالفت ڪري ڇڏي. عدالت خواجه حارث جا دليل مڪمل ٿيڻ کانپوءِ ٻڌڻي ڪجهه دير لاءِ ملتوي ڪئي ۽ فيصلو محفوظ ڪيو. عدالت جي اجازت کانپوءِ اڳوڻو وزيراعظم نواز شريف، مريم نواز ۽ ڪيپٽن صفدر پنجاب هائوس پهتا. شريف خاندان خلاف ريفرنسز جي ٻڌڻي دوران جوڊيشل اڪيڊمي ٻاهران حفاظتي انتظام سخت ڪيا ويا. جوڊيشل ڪمپليڪس ۾ عام ۽ اڻ لاڳاپيل ماڻهن جي داخلا تي پابندي لڳائي وئي. سڪيورٽي لاءِ 2 ايس ايس پيز، 6 ڊي ايس پيز ۽ 10 انسپيڪٽرن سميت هڪ هزار کان وڌيڪ اهلڪارن کي مقرر ڪيو ويو. عورت اهلڪار به ڊيوٽي تي مقرر رهيون، جڏهن ته رينجرز جو ڪو به اهلڪار مقرر نه ڪيو ويو. جوڊيشل ڪمپليڪس ۾ ليگي ڪارڪنن جو وڏو انگ پڻ پهتو، جيڪي نواز شريف جي حق ۾ نعريبازي ڪري رهيا هئا. ليگي اڳواڻ امير مقام، تهمينا دولتانه، ميئر اسلام آباد شيخ انصر، حنيف عباسي، آصف ڪرماني ۽ ٻيا به قافلي جي صورت ۾ احتساب عدالت پهتا. راجا ظفر الحق، دانيال عزيز، طلال چوڌري، ڊاڪٽر طارق چوڌري ۽ ٻيا به عدالت ۾ موجود هئا.

اڳوڻي وزير اعظم نواز شريف چيو آهي ته عدالتن مان ڀڄڻ وارا ناهيون، ڀڄڻ وارا ڀڄي ويا تنهن هوندي موجوده حالتن ۾ ڪامياب ٿي وينداسين. اڳوڻي وزير اعظم نواز شريف احتساب عدالت ۾ پيشي ۽ پنجاب هائوس ۾ پارٽي اڳواڻن ۽ ٻين سان ملاقات کان پوءِ ڌي مريم نواز سان گڏ مري لاءِ روانو ٿي ويو. پنجاب هائوس ۾ نواز شريف پارٽي اڳواڻن سان غير رسمي ڳالهه ٻولهه دوران چيو ته عوام سان گڏ رشتو قائم آهي ۽ اميد آهي ته عوام هڪ ڀيرو ٻيهر اعتماد ڪندو، 7 سالن جي جلاوطني به عوام سان رشتو نه ٽوڙي سگهي. هن چيو ته موجوده حالتن ۾ ڪامياب ٿي وينداسين، عدالتن کي پهرين به منهن ڏنو ۽ اڳتي به عدالتن ۾ پيش ٿينداسين. هن وڌيڪ چيو ته عدالتن مان ڀڄڻ وارا ٻيا ماڻهو آهن، جنهن کي ڀڄڻو هو اهي ڀڄي ويا.

 

نيون تڪبنديون، آئيني ترميم معاملي تي حڪومت ۽ اپوزيشن ۾ ڊيڊ لاڪ برقرار

اسلام آباد(ويب ڊيسڪ) قومي اسيمبلي جي اسپيڪر اياز صادق جي صدارت هيٺ پارلياماني اڳواڻن جي اجلاس ۾ نين تڪ بندين تي پ پ ۽ تحريڪ انصاف جي حڪومي وضاحتون رد ڪري ڇڏيون. تفصيل موجب قومي اسيمبلي جي اسپيڪر سردار اياز صادق جي هيٺ پارلياماني اڳواڻ جو اجلاس شروع ٿيو، اجلاس ۾ پيپلز پارٽي جي نويد قمر، تحريڪ انصاف جي شاهه محمود قريشي، وفاقي وزير زاهد حامد، محمود اچڪزئي ۽ ٻيا اڳواڻ شريڪ ٿيا جنهن ۾ نين تڪ بندين جي آئيني ترميم تي پيپلز پارٽي جا خدشا ختم ڪرڻ تي ڳالهيون ٿيون. پيپلز پارٽي ۽ تحريڪ انصاف نين تڪ بندين تي حڪومتي وضاحتون رد ڪندي سخت تنقيد ڪئي، نويد قمر جو چوڻ هو ته ڇا توهان هڪ طرفي اتفاق راءِ تي ڳالهه ڪندا آهيو ۽ ٻئي پاسي بلڊوز ڪندا آهيو، هن چيو ته قومي اسيمبلي جو اجلاس اڻ ڄاتل مدي تائين ملتوي ڪرڻ تي معاملو اٿاريو، نويد قمر چيو ته حڪومت ۽ اسپيڪر اهڙي ريت ايوان نٿا هلائي سگهن، ٻڌايو وڃي ته اهڙو فيصلو ڪرڻ کان پهرين اسان کي اعتماد ۾ ڇو نه ورتو ويو.

 

سنڌ اسيمبليءَ جي اجلاس ۾ ٻي ڏينهن به هنگامو، ايوان مڇي مارڪيٽ بڻجي ويو

ڪراچي( ويب ڊيسڪ ) سنڌ اسيمبليءَ جي اجلاس ۾ ٻي ڏينهن به هنگامو ٿيو، ڊپٽي اسپيڪر شهلا رضا ۽ نصرت سحر عباسي ۾ سخت جملن جي ڏي وٺ سبب ايوان مڇي مارڪيٽ بڻجي ويو. سنڌ اسيمبليءَ جي اجلاس ۾ ڳالهائڻ جي اجازت نه ملڻ تي نصرت سحر عباسي ڳالهائڻ جي اجازت نه ملڻ تي شهلا رضا کي امي جان قرار ڏئي ڇڏيو. شهلا رضا جواب ڏيندي چيو ته ڪاش توهان کي امي جان جي احترام جي خبر هجي ها. نصرت سحر عباسي چيو ته توهان کي طنزيه جملا چوڻ جو حق ناهي.  شهلا رضا چيو ته مون کي خبر آهي ته توهان کي سٺي ڪوريج ملي رهي آهي. اجلاس ۾ فنڪشنل ليگ جي ايم پي اي چيو ته امي جان منهنجي مائيڪ کوليو، امي چيو آهي ته ته تميز سان ئي ڳالهائينديس. ڊپٽي اسپيڪر چيو ته پٽ مان توهان کي ئي فيور ڪري رهي آهيان، اڳتي به خيال رکجان، جي پٽ کوليان ٿي، توهان ڳالهايو نه ته توهان کي آئوٽ ڪري ڇڏينديس.

 

وزير اعظم شاهد خاقان عباسي جي نواز شريف سان ملاقات، حڪومتي معاملن تي ڳالهيون

اسلام آباد(ويب ڊيسڪ) وزير اعظم شاهد خاقان عباسي مسلم ليگ ن جي صدر نواز شريف سان ملاقات ڪئي جنهن ۾ سياسي معاملن ۽ ٻين اهم معاملن تي ڳالهيون ڪيون ويون. ميڊيا رپورٽن موجب وزير اعظم شاهد خاقان عباسي پنجاب هائوس پهچي نواز شريف سان ملاقات ڪئي. ان موقعي تي وزير اعظم شاهد خاقان عباسي نواز شريف کي حڪومتي معاملن تي وضاحت ڏني جنهن ۾ نين تڪ بندين ۽ آئيني ترميم جي معاملن تي ڳالهيون ٿيون. ملاقات ۾ پارٽي معاملن ۽ عوامي رابطا مهم تي ڳالهيون ڪيون ويو جڏهن ته اڄ ٿيل ٻڌڻي تي به ڳالهيون ڪيون ويون.

 

حڪومت تڪ بندين بابت بل سي سي آءِ ۾ آڻڻ کان ڇو گهٻرائي رهي آهي؟: خورشيد شاهه

اسلام آباد( ويب ڊيسڪ ) قومي اسيمبليءَ ۾ مخالف ڌر جي اڳواڻ خورشيد شاهه چيو آهي ته قومي اسيمبليءَ جو اجلاس اوچتو ختم ڪرڻ پارليامينٽ سان مذاق آهي، حڪومت نون تڪبندين جو بل گڏيل مفادن واري ڪائونسل ۾ پيش ڪرڻ کان ڇو گهٻرائي رهي آهي؟ اسلام آباد ۾ نوير قمر سان گڏ ميڊيا سان ڳالهائيندي خورشيد شاهه چيو ته اسان چاهيون ٿا ته چونڊون نه پهريون ۽ نه وري بعد ۾ ٿين پر پنهنجي وقت تي ٿين. هن چيو ته تڪ بندين ۾ ترميم لاءِ گڏيل مفادن واري ڪائونسل مان منظوري آئيني گهرج آهي پر خبر ناهي ڇو حڪومت معاملو سي سي آءِ ۾ کڻي وڃڻ کان ڇو گهٻرائي رهي آهي؟ سندس چوڻ هو ته ڪلهه طئي هو ته قومي اسيمبليءَ جو اجلاس ايندڙ اڱاري تائين هلندو پر حڪومت پارلياماني پارٽين سان مشوري کانپوءِ اوچتو چيو ته اجلاس نه ٿيندو ۽ بعد ۾ گهرايو ويندو. خورشيد شاهه چيو ته حڪومت طرفان اهڙي نموني اجلاس ختم ڪرڻ پارليامينٽ سان مذاق آهي، حڪومت اڱاري تي اجلاس گهرائڻ کان ڪيٻائي رهي هئي ڇو ته سينيٽ مان منظور اليڪشن ترميمي بل اجلاس ۾ پيش ٿيڻو هو. نويد قمر چيو ته حڪومت غلط بياني ڪري رهي آهي ته موجوده صورتحال تي پراڻين تڪبندين تي اليڪشن نه ٿي ٿي سگهي، جيستائين نئين آدمشماري جا نتيجا ظاهر نه ٿا ٿين تيستائين پراڻيون تڪ بنديون موثر آهن.

 

جهانگير ترين ۽ عمران خان نااهلي ڪيس: جمائما جا اثاثا سموري دنيا ۾ ٿي سگهن ٿا: چيف جسٽس

اسلام آباد( ويب ڊيسڪ ) سپريم ڪورٽ ۾ عمران خان ۽ جهانگير ترين نااهلي ڪيس جي ٻڌڻي دوران چيف جسٽس ثاقب نثار رمارڪس ڏيندي چيو ته ڪيس هلي رهيو آهي، سوال اٿيا ته نوان دستاويز آيا، جج قانون جي ماتحت آهن، اختيارن جي ڳالهه ناهي. چيف جسٽس ثاقب نثار جي سربراهي ۾ سپريم ڪورٽ جي بئنچ جهانگير ترين ۽ عمران خان جي نااهلي بابت درخواستن جي ٻڌڻي ڪئي. ٻڌڻي دوران درخواستگذار جي وڪيل اڪرم شيخ چيو ته جيڪي دستاويز اچي رهيا آهن اهي تڪراري آهن. چيف جسٽس درخواستگذار جي وڪيل کان پڇاڻو ڪيو ته دستاويز تڪراري آهن ته عدالت کي ڇا ڪرڻ گهرجي. حنيف عباسي چيو ته نون دستاويزن ۾ يورو اڪائونٽ ڏيکاريو ويو، جڏهن ته عمران خان ڪاغذن ۾ گهر واريءَ جا اثاثا ظاهر نه ڪيا. هن بني گالا کانسواءِ ڪنهن اثاثي جو ذڪر نه ڪيو آهي، سندن ڪيس به اثاثن کي لڪائڻ جو آهي. چيف جسٽس چيو ته جمائما جو تعلق امير خاندان سان آهي، سندس اثاثا سموري دنيا ۾ ٿي سگهن ٿا، توهان اهو اعتراض ڪڏهن نه اٿاريو آهي.

 

ڪرپشن ثابت نه ٿيڻ تي وزيراعظم کي اقامي تي گهر موڪليو ويو: مريم اورنگزيب

اسلام آباد( ويب ڊيسڪ ) سڌ سماءَ ۽ اطلاعات واري ممڪلتي وزير مريم اورنگزيب چيو آهي ته نواز شريف تي ڪوڙن الزامن باوجود سپريم ڪورٽ ۾ ٽرائل ٿيو آهي. اسلام آباد جي احتساب عدالت ٻاهران ميڊيا سان ڳالهائيندي مريم اورنگزيب چيو ته اسان بابت سپريم ڪورٽ مان ڀڄڻ جو تاثر ڏنو ويندو هو پر وقت سان گڏ سمورا تاثر غلط ثابت ٿيا آهن. هن چيو ته 2 ڀيرا وزيراعظم ۽ 3 ڀيرا وزيراعظم رهڻ باوجود ڪا هڪ ڪرپشن ثابت نه ٿي آهي، اهو ڪهڙو خراب عمل آهي جنهن سبب وزيراعظم کي گهر موڪليو ويو. سندس چوڻ هو ته جڏهن ڪجهه مليو ته اقامي تي فيصلو ٻڌائيندي چونڊيل وزيراعظم کي گهر موڪليو  ويو جيڪو به فيصلو هجي آئين ۽ قانون موجب هئڻ گهرجي. مريم اورنگزيب چيو ته عمران خان جلسن ۾ عدالتن ۽ فوج کي تڪراري بڻائيندو آهي،  عدالتن مان ڀڄي رات جو جلسا ڪندڙن خلاف ڪارروائي ڇو نه ٿيندي آهي.

 

آصف زرداري نامعلوم ۽ ڳجهي ايجنڊا تي ڪم ڪري رهيو آهي: سعد رفيق

اسلام آباد( ويب ڊيسڪ ) ريلوي واري وزير خواجه سعد رفيق چيو آهي ته جمهوريت کي مضبوط ٿيڻ نه پيو ڏنو وڃي. اسلام آباد ۾ ميڊيا سان ڳالهائيندي خواجه سعد رفيق چيو ته نواز شريف سان پهريون ڀيرو ايئن نه ٿي رهيو آهي پر پر اڳ وارا مرحلا به قوم کي چڱي نموني ياد ٿي چڪا آهن. هن چيو ته عوام کي خبر آهي ته اڳتي ڇا ٿيڻ وارو آهي. سندس چوڻ هو ته مان ڪنهن جي ذات کي نشانو بڻائڻ نه ٿو چاهيان پر زرداري صاحب نامعلوم ۽ ڳجهي ايجنڊا تي ڪم ڪري رهيو آهي. پيرا ڊائيز ليڪس بابت خواجه سعد رفيق چيو ته مون کي خبر ناهي ته اهڙين ليڪس ۾ ڪهڙو سچ آهي پر گهڻي قدر ليڪس ۾ ڪوڙ ئي هوندو آهي.

 

پيپلز پارٽي ڪو مطالبو نه آئيني گهرجون پوريون ڪرڻ جي ڳالهه پئي ڪري: قمر الزمان ڪائره

لاهور (ويب ڊيسڪ): پيپلز پارٽي اڳواڻ قمر زمان ڪائره چيو آهي ته پيپلز پارٽي 5 ڊسمبر تي اسلام آباد ۾ جلسو ڪندي، جنهن ۾ بلاول ڀٽو آئنده جي حڪمت عملي جو اعلان ڪنداسين، هن چيو ته پيپلز پارٽي جو ايجنڊا هميشه جمهوريت رهيو آهي، اسان ڪو مطالبو نه ڪري رهيا آهيون، آئيني گهرجون پوريون ڪرڻ جي ڳالهه ڪئي آهي، حڪومت پنهنجي نالائقي جو الزام اسان تي لڳائي رهي آهي، پريس ڪانفرنس ڪندي قمر زمان ڪائره چيو ته تحريڪ انصاف جو وقت کان اڳ چونڊن جو مطالبو غير آئيني ناهي پر هن وقت ضرورت ناهي، سندس چوڻ هو ته پيپلز پارٽي عوام جي طاقت تي يقين رکي ٿي ۽ هميشه پنهنجي زبان ڳالهائيندي آهي، جڏهن ته اهي ماڻهو ٻين جي زبان ڳالهائيندا آهن، پيپلز پارٽي جي اڳواڻ چيو ته قومي حڪومت يا ٽيڪنوڪريٽ حڪومت جي آئين ۾ ڪا گنجائش ناهي، قمر زمان ڪائره چيو آهي ته ملڪ ۾ جمهوريت کي ڪو خطرو ناهي، ن ليگ جمهوري نظام کي هلندو نٿي ڏسڻ چاهي، نواز شريف خلاف ڪيس هلي رهيا آهن، اهو چونڊون نٿو وڙهي سگهي، ن ليگ چاهي ٿي ته ملڪ ۾ ڪو سانحو ٿئي، فوج عدليه تي مسلسل تنقيد ڪئي پئي وڃي پر اهي برداشت ڪري رهيا آهن، هن چيو ته طعنا ڏيڻ وارا ڪڏهن جمهوريت سان گڏ ناهن رهيا، حيرت جي ڳالهه آهي ته ن ليگ وارا اسان کي طعنا ڏئي رهيا آهن، اسان کي طعنا ڏيڻ وارا پهرين پنهنجي ڳلي ۾ جهاتي پائي ڏسن، پيپلز پارٽي جي اڳواڻ چيو ته عمران خان جلسن ۾ ماڻهن کي گاريون ڏيندو آهي، بادشاهن، شهزادين خلاف ڪيس هلي رهيا آهن، احتساب جو نظام سڀني لاءِ هڪ جهڙو هجڻ گهرجي، قمر زمان ڪائره يچو ته پيپلز پارٽي ملڪ ۾ وقت تي چونڊن جي خواهشمند آهي، آصف زرداري جمهوريت ۾ يقين رکي ٿو، انهن جي سياست سمجهڻ لاءِ پي ايڇ ڊي جي ضرورت آهي، هن چيو ته نين تڪ بندين جو معاملو گڏيل مفادن واري ڪائونسل ۾ ناهي ويو، چونڊن ۾ دير نه ٿيڻ ڏينداسين، قانون سازي ناهي ڪئي، جنهن سبب چونڊن ۾ دير ٿي سگهي ٿي، هن چيو ته حڪومت رڳو هڪ خاندان کي بچائڻ ۾ مصروف آهي.

 

سلمان خان جو ڪترينا ڪيف سان فحش منظر ڪرڻ کان انڪار

ممبئي (شوبز نيوز) سلمان خان ڪترينا ڪيف سان فلم ٽائيگر زندهه هي ۾ فحش منظر ڪرڻ کان انڪار ڪري ڇڏيو. بالي ووڊ دبنگ اسٽار سلمان خان هينئر تائين ڪيترين ئي فلمن ۾ ڪم ڪيو پر ڊگهي فلمي ڪيريئر هئڻ باوجود سلمان خان اڄ تائين فحش منظرن جي عڪس بندي ناهي ڪرائي. سلمان خان فلمي ڪيريئر وچ ۾ ڪيترن ئي ڪردارن ۾ جلوا ڏيکاريا پر اڄ تائين هن ڪڏهن به ڪا فحش منظرن جي عڪس بندي ناهي ڪرائي ۽ ايئن نه ڪرڻ جو سبب هو پنهنجي ماءُ کي ٻڌائيندو آهي. فلمن جي شوٽنگ دوران ڪيترائي ڀيرا فحش منظر آيا پر سلمان خان هميشه اهڙن منظرن کي فلم جي ڪهاڻي مان ڪٽرائي ڇڏيو ۽ هاڻ هڪ ڀيرو ٻيهر سلمان خان فحش منظرن کان انڪار ڪندي فلم مان سين کي ئي ڪڍي ڇڏيو آهي. سلمان خان هن ڏينهن ڪترينا ڪيف سان گڏ فلم ”ٽائيگر زندهه هي“ جي شوٽنگ ۾ مصروف آهي ۽ ڀارتي ميڊيا موجب فلم ۾ هڪ جاءِ تي فحش منظر ادا ڪرڻا هئا جڏهن ته فلم جي هدايت ڪار علي عباس ظفر کي لڳو ته شايد ڪترينا جي ڪري هن ڀيرو دبنگ خان منع نه ڪري سگهي پر سلمان خان فحش جا منظر فلمائڻ کان صاف انڪار ڪري ڇڏيو. ڀارتي ميڊيا جو چوڻ آهي ته فلم جي هدايت ڪار سلمان خان کي فحش جا منظر فلمائڻ لاءِ هر ريت ريجهائڻ جي ڪوشش ڪئي پر سلمان خان پنهنجي فيصلي کان پوئتي نه هٽيو ۽ آخر ڪار فلم مان فحش منظرن کي ئي ڪٽڻو پيو.