تازيون خبرون

Daily Archives: November 2, 2017

اعليٰ عدليه ۽ فوج احتساب کان آجا، وڏين پارٽين جو نيب بدران احتساب ڪميشن تي اتفاق

اسلام آباد (ويب ڊيسڪ): پاڪستان جي پارليامينٽ ۾ موجود سمورين سياسي جماعتن اعليٰ عدليه ۽ فوج کي احتساب جي دائري ۾ آڻڻ بابت شق کي تجويز ڪيل قومي احتساب ڪميشن جي قيام لاءِ غور هيٺ قانون جي مسودي مان ڪڍڻ تي اتفاق ڪيو آهي، پارليامينٽ هائوس ۾ اربع ڏهاڙي ڪميٽي جي اجلاس بعد قانون واري وفاقي وزير زاهد حامد چيو ته ججن ۽ جرنيلن کي احتساب جي دائري ۾ آڻڻ بابت شق کي پاڪستان پيپلز پارٽي واپس وٺي ڇڏيو آهي، قانون واري وفاقي وزير جي صدارت هيٺ ٿيل اجلاس ۾ پاڪستان تحريڪ انصاف جي ميمبر شيرين مزاري حڪومتي ميمبرن جي رويي ۽ پنهنجو موقف پيش ڪرڻ لاءِ مناسب وقت نه ڏيڻ تي احتجاجي طور واڪ آئوٽ ڪيو، ياد رهي ته پاڪستان ۾ ڪرپشن جي روڪ ٿام لاءِ موجود قومي احتساب بيورو جي جڳهه قومي احتساب ڪميشن قائم ڪرڻ لاءِ قانون جو مسودو پارليامينٽ ۾ ڪميٽي سطح تي غور هيٺ آهي، مخالف ڌر جماعت پاڪستان پيپلز پارٽي جي سينيٽر فرحت الله بابر تجويز ڪيل قومي احتساب ڪميشن جي دائره اختيار کي ججن ۽ جرنيلن تائين وسيع ڪرڻ لاءِ غور هيٺ قانون جي مسودي ۾ شامل ڪرڻ جي تجويز ڏني هئي، قانون واري وفاقي وزير زاهد حامد چيو ته مخالف ڌر جي ٻين جماعتن پاڪستان تحريڪ انصاف ۽ جماعت اسلامي به اعليٰ عدليه ۽ فوج کي احتساب جي دائره اختيار ۾ آڻڻ جي مخالفت ڪئي آهي، وفاقي وزير جو چوڻ هيو ته تجويز ڪيل احتساب جي قانون جي دائره اختيار ۾ عدليه ۽ هٿياربند فوجن کي نه آندو ويندو ۽ سمورين جماعتن ان نڪتي تي اتفاق ڪيو آهي، هن چيو ته نئين احتساب ڪميشن جي قيام بعد نيب ۾ سمورين التويٰ هيٺ انڪوائريون ۽ ڪيس ٻين عدالتن ۾ منتقل ڪيا ويندا، زاهد حامد جو چوڻ هيو ته ڪرپشن جا ڪيس احتساب ڪميشن يا نئين عدالتن کي منتقل ٿيڻ باوجود ختم نه ٿيندا ۽ نه ئي شروع ڪيل جاچ ختم ڪئي ويندي، هن چيو ته سن 1999 ۾ بڻايل نيب جو قانون ڪافي سخت هيو، وفاقي وزير جو چوڻ هيو ته احتساب جو اهڙو قانون بڻائڻ چاهيون ٿا، جنهن ۾ انصاف به هجي ۽ احتساب به هجي، اجلاس ۾ پاڪستان تحريڪ انصاف ۽ جماعت اسلامي نيب کي ئي برقرار رکڻ ۽ ان جي ڪارڪردگي کي وڌيڪ بهتر بڻائڻ تي اتفاق ڪيو آهي، پاڪستان تحريڪ انصاف سان تعلق رکندڙ قومي اسيمبلي ميمبر ڊاڪٽر شيرين مزاري جو چوڻ هيو ته اها ججن ۽ جرنيلن کي احتساب جي دائره اختيار ۾ آڻڻ جي تجويز سان اتفاق نه ٿي ڪري، هن چيو ته احتساب ڪميشن جي سربراهه جي مقرري ۾ اپوزيشن ۽ وزيراعظم وچ ۾ مڪ مڪا نه ٿيڻ گهرجي، تحريڪ انصاف جي ميمبر جو چوڻ هيو ته حڪومت قومي احتساب ڪميشن جي بل ۾ پاڪستان تحريڪ انصاف جي تجويزن کي شامل ڪرڻ لاءِ تيار ناهي، هن چيو ته پاڪستان تحريڪ انصاف احتساب ڪيمشن لاءِ پنهنجون ترميمون پارليامينٽ ۾ آڻيندي.

 

سنڌ اسيمبلي ۾ نيب خلاف مذمتي ٺهراءُ منظور، مخالف ڌر مخالفت ڪري ڇڏي

ڪراچي(ويب ڊيسڪ) سنڌ اسيمبلي قومي احتساب بيورو (نيب) جي خلاف مذمتي ٺهراءَ ڪثرت راءِ سان منظور ڪري ورتو آهي. سنڌ اسيمبلي ۾ پيپلز پارٽي جي اسيمبلي ميمبر خورشيد جوڻيجي نيب خلاف ٺهراءُ پيش ڪيو جنهن ۾ اڳوڻي صوبائي وزير شرجيل ميمڻ جي گرفتاري تي نيب کي ڇتي تنقيد جو نشانو بڻايو ويو. مسلم ليگ فنڪشنل ۽ تحريڪ انصاف مخالفت ڪئي. ٺهراءَ ۾ نيب تي ٻٽو معيار اختيار ڪرڻ جو الزام لڳائيندي سنڌ حڪومت مطالبو ڪيو ته وفاقي حڪومت سان رابطو ڪري اڳتي لاءِ ڪنهن شهري سان اهڙو سلوڪ نه ڪيو وڃي. ٺهراءُ پيش ڪندي خورشيد جوڻيجو چيو ته نيب هڪ معزز سنڌ اسيمبلي جي ميمبر بيعزتي ڪئي ۽ سادا ڪپڙا پاتل اهلڪارن عدالت جي اڱڻ مان  شرجيل کي گرفتار ڪيو، عدالت جي اڱڻ ۾ اهڙي گرفتاري عدالت جي تقدس جي به توهين آهي. خورشيد جوڻيجو چيو ته شرجيل انعام ميمڻ پرڏيهه مان ڪيسن کي منهن ڏيڻ لاءِ واپس آيو پر نيب اهلڪارن سياسي بحران پيدا ڪرڻ جي ڪوشش ڪئي، سنڌ حڪومت وفاق کان رابطو ڪري واقعي تي ڪارروائي جو مطالبو ڪري جيئن اڳتي لاءِ ڪنهن به شهري سان ائين نه ٿئي. پ پ پ اڳواڻ چيو ته اسان جي قيادت خلاف ڪوڙا ڪيس بڻايا ويا پر اسان هميشه ڪيسن کي منهن ڏنو، اسان جي اسيمبلي ميمبرن ۽ وزيرن کي بنا ڪنهن سبب جي تنگ ڪيو پيو وڃي ۽ هاڻ معاملو برداشت کان ٻاهر آهي. پي ٽي آءِ ميمبر خرم شير زمان چيو ته اسان نيب جي خلاف ٺهراءَ جي ڀرپور مذمت ڪيون ٿا، شرجيل ميمڻ ۽ سندس ساٿي قرآن پاڪ تي هٿ رکي چون ته انهن ڪرپشن ناهي ڪئي، اهي ماڻهو عدالتن ۾ وڃڻ ۽ پنهنجي صفائي پيش ڪن، ڪرپٽ ماڻهن خلاف نيب جي ڪارروائي کي ناانصافي چيو پيو وڃي. خرم شير زمان جي ان بيان تي پيپلز پارٽي جا ميمبر ڪاوڙجي پيا. ورڪس اينڊ سروسز جي وزير امداد پتافي چيو ته خرم شير زمان جو سهرو وزير اعليٰ هائوس مان ٺيڪا وٺندو آهي، پهرين سي ايم هائوس کان ڪيٽرنگ جا ٺيڪا وٺندڙ پهرين قرآن کڻن ۽ ڪلمو پڙهي جواب ڏين ته انهن ٺيڪا ناهن کنيا، عمران خان جو والد به ڪرپشن جي الزام ۾ نوڪري تان برطرف ٿيو.  فنڪشنل ليگ سنڌ اسيمبلي ۾ شرجيل ميمڻ جي حق ۾ پيش ٿيل ٺهراءَ جي مخالفت ڪري ڇڏي آهي. نصرت سحر عباسي ڊاڪٽر رٿ فائو جي حق ۾ ٺهراءُ بحث هيٺ نه آڻڻ تي سخت ڪاوڙ ڪئي ۽ چيو ته اسيمبلي شرجيل ميمڻ جهڙن ماڻهن لاءِ ناهي، نيب جي خلاف ٺهراءُ پيش ڪندڙ پاڻ نيب جا ساٿي آهن، اينٽي ڪرپشن جي نااهلي تي نيب سنڌ ۾ گرفتاري ڪئي، ملڪ ۾ احتسبا جو عمل شروع ٿي چڪو آهي جنهن کي ڀرپور نموني سپورٽ ڪيون ٿا. تفصيل موجب سنڌ اسيمبلي جو اجلاس ڊپٽي اسپيڪر شهلا رضا جي صدارت هيٺ ٿيو جنهن ۾ پيپلز پارٽي جي ميمبر شرجيل ميمڻ جي نيب طرفان گرفتاري خلاف صوبي جي حڪمران پارٽي طرفان ٺهراءُ پيش ڪيو ويو. ان موقعي تي فنڪشنل ليگ ٺهراءَ جي مخالفت ڪري ڇڏي جڏهن ته نصرت سحر عباسي ڊاڪٽر رٿ فائو جي حق ۾ پنهنجو ٺهراءُ بحث هيٺ آڻڻ جو مطالبو ڪيو. اجلاس دوران نصرت سحر عباسي چيو هي اسيمبلي شرجيل ميمڻ جهڙن ماڻهن جي تحفظ لاءِ ناهي، هن ملڪ ۾ عدالتون موجود آهن جيڪي پنهنجو ڪم ڪري رهيون آهن. احتساب جو عمل شروع ٿي چڪو آهي جنهن کي سپورٽ ڪنداسين. جيڪڏهن پيپلز پارٽي شرجيل ميمڻ لاءِ ڪجهه ڪرڻ چاهي ٿي ته ان لاءِ اسيمبلي جو فورم استعمال نه ٿيڻ گهرجي پر ان لاءِ بلاول هائوس يا پارٽي جا ٻيا ذريعا استعمال ڪيا وڃن. ” نيب تي تنقيد ڪندڙ پاڻ نيب جا ساٿاري آهن“ چيئرمين نيب جي مقرري پيپلز پارٽي جي مخالف ڌر اڳواڻ جي ڳالهين سان عمل ۾ آندي وئي، نيب اينٽي ڪرپشن کاتي جي ناڪامي تي سنڌ ۾ گرفتاري ڪئي. هن چيو ته  ان جي ساٿين مان ڪو به شرجيل ميمڻ جي حق ۾ ٺهراءَ جي حمايت نه ڪندو ۽ جيڪو به ان جي حمايت ڪري رهيو آهي اهو پنهنجي دل کان پڇي ته هو ڪهڙي ريت ان ٺهراءَ جي حمايت ڪندا، پيپلز پارٽي ۾ هاڻ به اهي ماڻهو موجود آهن جيڪي غلط کي غلط سمجهندا آهن. سنڌ اسيمبلي ۾ مخالف ڌر ۽ ايم ڪيو ايم پاڪستان جي اڳواڻ خواجا اظهار الحسن چيو آهي ته سنڌ اسيمبلي ۾ هڪڙي فرد لاءِ ٺهراءُ آندو ويو آهي جنهن جي اسان مخالفت ڪيون ٿا. ٺهراءَ مان اداري تي اثرانداز ٿيڻ جو تاثر ملي رهيو آهي. سنڌ اسيمبلي ٻاهران ميڊيا سان ڳالهائيندي اظهار الحسن چيو ته ارشد وهرا جي وڃڻ سان ايم ڪيو ايم پاڪستان کي وڏو ڌڪ رسيو، هن جلد بازي جو مظاهرو ڪيو، ان لاءِ اسان جا دروازا کليل آهن، هن چيو ته اصل ويڙهه ايم ڪيو ايم ۽ پاڪ سر زمين پارٽي جي وچ ۾ ناهي، ڏسڻو پوندو ته متحده سان پي ايس پي ۾ وڃڻ جو ڪنهن کي فائدو ٿي رهيو آهي. مخالف ڌر اڳواڻ چيو ته هڪ ٻئي کي ڪمزور ڪرڻ مان ڪجهه نه ٿيندو، سنڌ ۾ ڪرپٽ مايا خلاف مهم هلائڻ جي ضرورت آهي. هن چيو ته ڪراچي جي مينڊيٽ جي مضبوطي جو حامي آهيان، خبر ناهي ته سنڌ جو وڏو وزير ڪهڙن ٺيڪن جي ڳالهه ڪري رهيو آهي. هن وڌيڪ چيو ته منظور وساڻ شام جو اخبار پڙهي سمهندو آهي، پوءِ ان کي خواب ايندا آهن ۽ ان جو ڪو به خواب سچو ثابت ناهي ٿيو، خواجا اظهار الحسن چيو ته آءِ جي سنڌ کي هٽائڻو آهي ته ان لاءِ مضبوط دليل ڏيو.

 

تمام چئلينجن باجود سر بلند ٿيڻ ڄاڻون ٿا: آرمي چيف

ڪوئيٽا(ويب ڊيسڪ) آرمي چيف جنرل قمر جاويد باجوه جو چوڻ آهي ته پاڪستاني پر امن ۽ راندين سان محبت ڪندڙ قوم آهي، سمورن چيلنجن جي باوجود سربلند ٿيڻ ڄاڻي ٿي. 21 آڪٽوبر کان خنجراب کان شروع ٿيل موٽر ريلي گوادر ۾ پڄاڻي تي پهتي. آءِ ايس پي آر موجب پڄاڻي واري تقريب ۾ آرمي چيف ۽ بلوچستان جي وڏي وزير سردار ثناءُ الله زهري شرڪت ڪئي. آرمي چيف جنرل قمر جاويد باجوه ريلي جي انتظاميا ۽ شرڪت ڪندرن کي داد ۽ ڀيٽا پيش ڪئي. ان موقعي تي آرمي چيف تقريب کي خطاب ڪندي چيو ته هر چيلينج جي باوجود اسان اڀرڻو ئي آهي، ڪامياب موٽر ريلي پرامن پاڪستان جي دعويٰ جو ثبوت آهي. هن وڌيڪ چيو ته خنجراب کان گوادر هر پاڪستاني امن ۽ ترقي جو خواهشمند آهي، بلوچستان جي ترقي پاڪستان جي ترقي آهي، بلوچستان جي ترقي ۾ سي پيڪ منصوبي جي ڪاميابي مضمر آهي. بلوچستان جي اقتصادي ۽ معاشرتي ترقي لاءِ پاڪ فوج صوبائي حڪومت سان مڪمل سهڪار ڪري رهي آهي.

 

ڪيٽرنگ ٺيڪن جي انڪوائري جو اعلان، عدالتن تي نه نيب تي اعتراض آهي: مراد علي شاهه

ڪراچي(ويب ڊيسڪ) سنڌ جي وڏي وزير سيد مراد علي شاهه چيو آهي ته اسنا کي عدالتي فيصلي تي نه پر نيب جي ٻٽي معيار تي اعتراض آهي. سنڌ اسيمبلي ۾ پنهنجي خيال جو اظهار ڪندي مراد علي شاهه چيو ته پيپلز پارٽي ۽ شرجيل ميمڻ کي عدالتن تي پورو اعتماد آهي،  عدالتون مقدس آهن ۽ اسان انهن جي پيش ٿياسين، اسان کي عدالتي فيصلي تي نه پر نيب جي ٻٽي معيار تي اعتراض آهي. مراد علي شاهه چيو ته شرجيل ميمڻ عدالتن مان ڀڳو ناهي پر هن هر فورم تي عدالت کي منهن ڏنو، شرجيل ميمڻ کي عدالت جي اڱڻ مان گرفتار ڪيو ويو، ڏاڍي احترام سان ٿو چوان ته اها سنڌ هاءِ ڪورٽ جي تذليل آهي. هن چيو ته نيب آرڊيننس ۾ ڏيکاريو ويو آهي ته شرجيل ميمڻ کي شاهراهه عراق يا ڪنهن ٻي جاءِ تان گرفتار ڪيو ويو، عدالت کي چوان ٿو ته هو ڪوڙ ڳالهائيندڙن خلاف ايڪشن وٺي. هن چيو ته هڪ ميمبر کي اسيمبلي جي اڱڻ مان گرفتار ڪيو ويو، هو اسان جو ميمبر نه هو پر پوءِ به اسان ان تي گوڙ ڪيو. مراد علي شاهه جو چوڻ هو ته نيب عدالت نه پر ادارو آهي ۽ اسيمبلي جو ٺهراءُ ڪنهن عدالتي فيصلي جي خلاف ناهي، ٺهراءَ نيب جي خلاف آهي، ٺهراءَ تي هن وقت تائين ڪنهن به ناهي ڳالهايو، ٺهراءَ ۾ ڪٿي ناهي چيو ته شرجيل ميمڻ تي ڪيس ختم ڪيو وڃي ڇو ته جنهن تي ڪيس آهي ان تي ڪيس هلڻ گهرجي. هن چيو ته نيب کي منهنجي خلاف به ڪيس ٺاهڻا آهن ته ٺاهي، اسان ڪيسن کان ڊڄڻ وارا ناهيون، اسان اهو ناهيون جو ٻه سال عدالت ۾ ئي نه وڃون ۽ بعد ۾ معافي گهرون، جيڪو به غلط ڪم ڪندو چاهي اها نيب ئي ڇو نه هجي اسان قانون جي دائري ۾ رهندي تنقيد ڪنداسين. هن وڌيڪ چيو ته ڪيٽرنگ جي ٺيڪن جي انڪوائري مون روڪي هئي پر هاڻ اها آئون ڪرائيندس،  هاڻ ٻڌائيندس ته ڪنهن ڪهڙا ٺيڪا کنيا ۽ هاڻ آئون پوئتي نه هٽندس.

 

نين تڪ بندين سان ڪو به فائدو يا نقصان نه ٿيندو: خورشيد شاهه

اسلام آباد (ويب ڊيسڪ): پبلڪ اڪائونٽس ڪميٽي جي چيئرمين خورشيد شاهه چيو آهي ته ساهيوال پراجيڪٽ اڌ پنجاب کي ٽي بي جو مريض بڻائي ڇڏيندو ۽ ڪوئلي جي دونهين سان ماڻهو مرندا ته قتل جو ڪيس ته ٺهندو، اسلام آباد ۾ چيئرمين خورشيد شاهه جي صدارت هيٺ پبلڪ اڪائونٽس ڪميتي جو اجلاس ٿيو، جنهن ۾ بجلي جي شعبي ۾ مجموعي نقصانن ۽ چوري جو جائزو ورتو ويو، چيئرمين ڪميٽي خورشيد شاهه چيو ته جنهن ڏينهن بجلي جي درست قيمت وصول ڪئي وئي، بجلي جي چوري ختم ٿي ويندي، واپڊا اها ڳالهه سوچي ته بجلي جي چوري ڇو ٿي رهي آهي، جيڪڏهن هڪ رپئي جي جڳهه تي پنج رپيا قيمت وصول ڪندا ته چوريون ته ٿينديون، ڳوٺن ۾ بجلي چوري جو سبب ئي اوور بلنگ آهي، پنج سالن بعد پي ٽي سي ايل وانگر اوهان به گهر گهر وڃي عوام کي منٿون ڪندا ته بجلي وٺو پر ماڻهو بجلي نه وٺندا پر سولر تي اچي ويندا، خورشيد شاهه فضائي گدلاڻ ڦهلائڻ سبب ساهيوال ڪوئله پراجيڪٽ کي بند ڪرڻ جو مطالبو ڪندي چيو ته اهو پراجيڪٽ حڪومت جي خلاف دفعه 302 جو ڪيس آهي، جيڪو اڌ پنجاب کي ٽي بي جو مريض بڻائي ڇڏيندو ۽ جيڪڏهن ماڻهو دونهين سبب مرندا ته قتل جو ڪيس ته ٿيندو، ڪميٽي جي ميمبر نويد قمر چيو ته صارفن کي رڳو اوور بلنگ ڪئي پئي وڃي ۽ 90 سيڪڙو بل بنا ريڊنگ جي اماڻيا پيا وڃن، جڏهن ته صارفن کي ايوريج فارمولا لڳائي بل اماڻيا ويندا آهن، ڪميٽي جي ميمبر شفقت محمود جو چوڻ هيو ته بل آخري تاريخ کان هڪ ڏينهن اڳ گهرن ۾ اڇلايو ويندو آهي ۽ مون کي به اڪثر هڪ ڏينهن اڳ بل ملندو آهي، اجلاس ۾ توانائي وزارت جي سيڪريٽري يوسف نسيم کوکر صارفن کي درپيش ڏکيائين جو اعتراف ڪندي چيو ته سڀ ٺيڪ نه هلي رهيو آهي، بجلي جي اوور بلنگ ٿي رهي آهي ۽ بل دير سان به اماڻيا ويندا آهن، صارفن جي شڪايتن جي ازالي جو موثر نظام ٽن مهينن ۾ فعال ٿي ويندو. ٻئي طرف  قومي اسيمبلي ۾ مخالف ڌر جي اڳواڻ سيد خورشيد جو چوڻ آهي ته نين تڪ بندين سان ڪو به فائدو يا نقصان نه ٿيندو. گذريل ڏينهن قومي اسيمبلي جي اسپيڪر سردار اياز صادق جي صدارت هيٺ ٿيل پارليامين اڳواڻن جي اجلاس ۾ قومي اسيمبلي جون سيٽون 272 ئي رکڻ جو فيصلو ڪيو هو. پارلياماني اڳواڻن جي اجلاس کان پوءِ ميڊيا سان ڳالهائيندي خورشيد شاهه چيو آهي ته ننڍي چونڊ نين تڪ بندين جي تحت ٿيندي پر نين تڪ بندين سان ڪو به فائدو يا نقصان نه ٿيندو.  هن چيو ته آدم شماري تي خدشن جو معاملو الڳ آهي ۽ اِهو پنهنجي جاءِ تي موجود آهي، تڪ بنديون ضروري قدم آهي ان ڪري سمورين پارٽين اتفاق ڪيو. هن حڪومت کان مطالبو ڪيو ته نين تڪ بندين جي آئيني ترميم تي سينيٽ کي به اعتماد ۾ ورتو وڃي.

 

اقامي تي نااهلي جي فيصلي سان پاڪستان کي تمام گهڻو نقصان پهتو: نواز شريف

لنڊن (ويب ڊيسڪ): اڳوڻي وزيراعظم نواز شريف چيو آهي ته ڪيتري جانبداري هجي، عدالتن ۽ احتساب کي منهن ڏيندس، مسلم ليگ ن جي صدر نجي ٽي وي کي انٽرويو ڏيندي چيو ته ڊاڪٽرز سار سنڀال لاءِ ڪلثوم سان گڏ رهڻ جي هدايت ڪئي آهي، ڪلثوم جي ضرورت باوجود عدالتن کي منهن ڏيڻ پاڪستان اچي رهيو آهيان، هن چيو ته سسلين مافيا ۽ گاڊ فادر جا ريمارڪس ڏيندڙ عدالت کي بهادري سان منهن ڏنو، اقامي تي نااهلي جي فيصلي سان پاڪستان کي تمام گهڻو نقصان پهتو، هن چيو ته پاناما معاملي تي منهنجي خلاف ڪجهه نه مليو، شريف خاندان جي آمدني جا ذريعا ۽ وسيلا 1937 کان هلندا پيا اچن، احتساب جي نالي تي نشانو بڻائڻ ناقابل قبول آهي.

 

تڪبنديون آدمشماري مطابق ڪيون وينديون: اياز صادق

اسلام آباد(ويب ڊيسڪ) قومي اسيمبلي جي اسپيڪر سردار اياز صادق جو چوڻ آهي ته تڪبنديون آدمشماري جي مطابق ڪيون وينديون ۽ ان تي سموريون پارٽيون متفق آهن اسلام آباد ۾ قومي اسيمبلي جي اسپيڪر اياز صادق جي صدارت هيٺ پالياماني اڳواڻن جو اجلاس ٿيو جنهن ۾ اپوزيشن ليڊر خورشيد شاهه، شاهه محمود قريشي، قانون وارو وزير زاهد حامد، محمود خان اچڪزئي، آفتاب شيرپائو ۽ اڪرم دراني سميت ٻيا اڳواڻ شريڪ ٿيا سيڪريٽري اليڪشن بابر يعقوب به اجلاس ۾ موجود هو جڏهن ته اجلاس ۾ پارلياماني اڳواڻن کي نئين تڪبندين بابت بريفنگ ڏني وئي اجلاس کانپوءِ ميڊيا کي بريفنگ ڏيندي اياز صادق چيو ته فاٽا ۽ سنڌ جي سيٽن ۾ ۾ ڪابه تبديلي ناهي ڪئي وئي جڏهن ته خيبرپختونخواهه جون ۵ ۽ بلوچستان جو ن ۳ سيٽون وڌنديون قومي اسيمبلي جي اسپيڪر ٻڌايو ته اسلام آباد جي قومي اسيمبلي جي هڪ سيٽ وڌندي ۽ پنجاب جون ۹ قومي اسيمبلي جون سيٽون گهٽ ٿينديون اياز صادق جو چوڻ هو ته تڪبندين بابت بل جو ڊرافٽ تيار ڪري ورتو آهي ۷ لک ۸۰ هزار جي آبادي تي هڪ سيٽ هوندي هن چيو ته تڪبندين تي هاڻ اليڪشن ڪميشن پنهنجو ڪم شروع ڪندي تڪنبديون آدمشماري مطابق ڪيون وينديون ۽ ان تي سموريون پارٽيون مفتق آهن.

 

نيب قانون ۾ منهنجي ۽ شريف خاندان لاءِ ٻٽو معيار ڇو آهي: شرجيل ميمڻ

ڪراچي(ويب ڊيسڪ) اڳوڻي صوبائي وزير شرجيل ميمڻ جو چوڻ آهي ته نيب قانون ۾ مون لاءِ ۽ شريف خاندان لاءِ ٻٽو معيار ڇو آهي پيپلز پارٽي جي اڳواڻ شرجيل ميمڻ کي نيب ۲۳ آڪٽوبر تي ضمانت رد ٿيڻ تي سنڌ هاءِ ڪورٽ مان حراست ۾ ورتو هو جنهن کانپوءِ ان کي عدالت جيل موڪلي ڇڏيو جڏهن ته کيس سنڌ اسيمبلي جي ڊپٽي اسپيڪر جي درخواست تي اجلاس ۾ شرڪت لاءِ آندو ويو ته پيپلز پارٽي جي ميمبرن سندس پرجوش استقبال ڪيو پارٽي جي ميمبرن شرجيل ممين جي اچڻ تي گل ڇٽيا ۽ ان جي حق ۾ نعريبازي به ڪئي جڏهن ته ان دوران ميڊيا اڳوڻي وزير سان ڳالهائڻ جي ڪوشش ڪئي جنهن تي هن ڳالهائڻ کان انڪار ڪيو اسيمبلي جي اجلاس ۾ خيالن جو اظهار ڪندي شرجيل ميمڻ چيو ته جيڪو شخص ملڪ ۾ ناهي ان جو نالو اي سي ايل ۾ وجهڻ جو طريقيڪار سمجهه ۾ نه ٿو اچي نئين نيب چيئرمين کي گذارش آهي ته نالو اي سي ايل وجهڻ جي طريقيڪار جو جائزو وٺي شرجيل ميمڻ جو چوڻ هو ته نيب مون کي ڪوبه سمن جاري ڪرڻ کان بغير ئي گرفتار ڪيو جيئن ئي اسلام آباد ايئرپورٽ تي جهاز جي آخري ڏاڪڻ تي قدم رکيو ته نيب اهلڪارن ڦڙتي ڏيکاريندي مون کي گرفتار ڪري ورتو جڏهن ته گرفتاري وقت مون وٽ ضمانت جا ڪاغذ به موجود هئا اڳوڻي وزير ميان نواز شريف جي ناٺي ڪيپٽن رٽائرڊ صفدر جي گرفتاري جو حوالو ڏيندي چيو ته ڪيپٽن صفدر اسلام آباد ايئرپورٽ پهتو ته انهن ئي نيب اهلڪارن کي ايئرپورٽ وڃڻ جي اجازت نه هئي ان صورتحال کي ڇا مان نيب جي مسلم ليگ ن سان محبت جو نالو ڏيان؟ پ پ اڳواڻ وڌيڪ چيو ته گذريل ۷ مهينن کان ملڪ ۾ موجود آهيان ۽ هر پيشي تي عدالت ۾ پيش به ٿي رهيو آهيان پر ان جي باوجود منهنجو نالو اڃان تائين اي سي ايل ۾ شامل آهي شرجيل ميمڻ جو چوڻ هو ته نواز شريف ۽ ان جي سموري فيملي خلاف نيب ريفرنس داخل آهي جڏهن ته اسحاق ڊار ريفرنس جي باوجود پوري دنيا ۾ گهمي رهيو آهي هن سوال ڪيو ته نيب جي قانون ۾ منهنجي لاءِ ۽ ميان صاحب لاءِ ٻٽو معيار ڇو آهي؟ ٻئي طرف سنڌ اسيمبلي ۾ نيب پاران شرجيل ميمڻ جو نال اي سي ايل ۾ وجهڻ ۽ گرفتاري خلاف مذمتي قرارداد به منظور ڪئي وئي.

 

نيب اسحاق ڊار جي گهرڀاتين ۽ پي ٽي آءِ اڳواڻ عليم خان کي به طلب ڪري ورتو

لاهور(ويب ڊيسڪ) نيب پراڻيون فائلون کوليندي ناڻي واري وفاقي وزير اسحاق ڊار جي گهرڀاتين ۽ تحريڪ انصاف جي اڳواڻ عليم خان کي سڏائي ورتو آهي، نيب چيئرمين جسٽس ر جاويد اقبال جي حڪم تي لاهور ۾ التوا هيٺ پيل ڪيسن تي ڪم ڪرڻ تيز ڪري ڇڏيو آهي، نيب لاهور اسحاق ڊار ۽ ان جي گهرواري کي سڀاڻي ۽ ٻارڙن کي ٦ نومبر تي طلب ڪري ورتو آهي، کانئن اثاثن بابت پڇاڳاڇا ڪئي ويندي، اسحاق ڊار ۽ سندس خاندان نيب ٽيم کي مطمئن نه ڪري سگهيو ته اثاثا مجمند ٿي ويندا.

 

ڄامشورو انڊس هاءِ وي تي ٻن ڪارن ۾ ٽڪر، ۴ ڄڻا فوت، ۵ زخمي

رتو ديرو/ڄامشورو(نمائندن وٽان) ٿرمل پاور هائوس ويجهو خان پيٽرول پمپ وٽ ٻن ڪارن ۾ ٽڪر ٿي پيو، جنهن جي نتيجي ۾ ۴ ڄڻا فوت ٿي ويا ۽ ٻن عورتن سميت ۵ ڄڻا زخمي ٿي پيا، ڄامشورو انڊس هاءِ وي تي ٿرمل پاور هائوس ڀرسان خان پيٽرول پمپ وٽ تيز رفتار ٻن ڪارن وچ ۾ ٽڪر ٿي پيو، جنهن جي نتيجي ۾ ڊاڪٽر انور لولائي، امداد سناڻي، عبدالحئي سناڻي ۽ اقبال پنهور فوت ٿي ويا، جڏهن ته ارشاد بيگم زال غلام مرتضيٰ مستوئي، شبانا مستوئي، نويد مستوئي، حبدار مستوئي ۽ محمد خان مستوئي زخمي ٿي پيا، فوتين جا لاش ۽ زخمين کي لمس اسپتال ڄامشورو نيو ويو آهي، جڏهن ته ڄامشورو پوليس ٻنهي گاڏين کي پنهنجي تحويل ۾ وٺي ڇڏيو آهي.