تازيون خبرون

Daily Archives: October 24, 2017

عامر خان کي اجي ديوگن جي هٿان باڪس آفيس تي شڪست

ممبئي (شوبز نيوز)  ائين لڳي ٿو باليوڊ جي مسٽر پرفيڪشنسٽ عامر خان کي اجي ديوگن جي هٿان باڪس آفيس تي شڪست سامهون آهي. جي ها پر عامر خان جي سيڪريٽ سپر اسٽار ۽ اجي ديوگن  جي گول مال سيريز جي چوٿين فلم جي وچ ۾ هن هفتي باڪس آفيس ۾ ٽڪراءُ ٿيو جيڪو واضع طور تي ڪاميڊي فلم کٽڻ ۾ ڪامياب نظر اچي ٿي.  ان سيريز جي چوٿين فلم گول مال اگين  خميس تي رليز  ٿي هئي ان جي دوران  ٻن ڏينهن  58 ڪروڙ انڊين رپيا پنهنجي نالي ڪيا،  جڏهن ته ان جي مقابلي ۾ عامر خان جي فلم سيڪريٽ سپر اسٽار  ٽن ڏينهن ۾ 22.75 ڪروڙ انڊين رپيا پنهنجي نالي ڪيا. گول مال اگين ۾ اجي ديوگن، توشار ڪپور، ارشد وارثي،  ۽ پرنيتي چوپڙا سميت ٻين به ڪيترن ئي اداڪارن مرڪزي ڪردار ادا ڪيو.  ان فلم پهرين ڏينهن 30 ڪروڙ جڏهن ته ڇنڇر تي 28 ڪروڙ رپيا ڪمايا،   ان جي مقابلي ۾ عامر خان جي فلم سيڪريٽ سپر اسٽار جنهن ۾ عامر خان ۽   زائره وسيم   مرڪزي ڪردار   ادا ڪيو ان فلم 4.8 ڪروڙ رپيا پهرين ڏينهن ، 9.30 ڪروڙ رپيا ٻئي ڏينهن جڏهن ته ٽئين ڏينهن 8.65 ڪروڙ رپيا ڪمايا. گول مال اگين  پرڏيهي ۾ 15 ڪروڙ رپيا ڪمايا، گڏيل طور تي هن وقت  تائين 73 ڪروڙ رپيا ڪمائي ورتا آهن.

 

راني مکرجي جو پيءُ رام مکرجي ۸۴ سالن جي ڄمار ۾ ديهانت ڪري ويو

ممبئي(شوبز نيوز) بالي ووڊ جي خوبصورت اداڪارا راني مکرجي جو پيءُ رام مکرجي ۸۴ سالن جي ڄمار ۾ ديهانت ڪري ويو آهي. ڀارتي ميڊيا مطابق راني مکرجي جو پيءُرام مکرجي ۱۳ آڪٽوبر کان نئين دهلي جي اسپتال ۾ داخل هو، جتي ڪالهه اسر ويل ۵ وڳي ڌاري سندس بلڊ پريشر ڪري پيو، جنهن ڪري هن دم ڌڻي حوالي ڪيو. ان حوالي سان فلم ميڪر جي گهرواري ڪرشنا ٻڌايو ته رام مکرجي بالي ووڊ ۾ ڪيتريون ئي بلاڪ بسٽر فلمون ڏنيون آهن، ڪجهه ڏينهن کان رام مکرجي اسپتال ۾ داخل هو پر ان جي طبيعت ۾ سڌارو نه آيو ۽ ڪالهه اسان کان هميشه لاءِ وڇڙي ويو آهي. ٻئي طرف اطلاع ملڻ تي راني مکرجي به اسپتال پهچي وئي. جڏهن ته بالي ووڊ اسٽارن راني مکرجي سان ڏک جو اظهار ڪيو آهي.

 

پاڪستان سريلنڪا کي ون ڊي سيريز ۾ وائيٽ واش ڪري ڇڏيو

شارجا(اسپورٽس نيوز)پاڪستان پنجن مئچن واري ون ڊي سريز ۾ سريلنڪا کي وائيٽ واش ڪندي ٽيسٽ سيريز جو حساب برابر ڪري ڇڏيو آهي، شارجا ۾ کيڏي ويندڙ پنجين ۽ آخري هڪ ڏينهن واري مئچ ۾ سريلنڪا عثمان خان جي شاندار بالنگ جي ڪري سريلنڪا جي پوري ٽيم ۲۷ اوورن ۾ ۱۰۳ رنسن تي پويلين موٽي وئي، جڏهن ته پاڪستان ڏنل هدف سولائي سان هڪ وڪيٽ جي نقصان تي ۲۱ اوورن ۾ پورو ڪيو. قومي ٽيم پاران امام الحق ۽ فخر زمان ۸۴ رنسن جي سٺي شروعات ڪئي، پر رڳو ٻن رنسن جي کوٽ سان پنهنجي نصف سينچري پوري نه ڪري سگهيا، ان جي اننگز ۾ ۷ چوڪا شامل هئا، جڏهن ته امام الحق ۴۵ ۽ فهيم اشرف ۵ رنسن تي ناٽ آئوٽ رهيا.

 

پهريون دفعو پرفارمنس کان پوءِ ڇوڪرين جون فون ڪالز اچڻ تي موبائيل فون بند ڪري ڇڏي : امام الحق

شارجه (اسپورٽس نيوز)ڊيبيو تي سينچري ٺاهڻ واري قومي ٽيم جي اوپننگ  بلي باز امام الحق چيو آهي ته  پهريون دفعو پرفارمنس کان پوءِ ڇوڪرين جون تمام گھڻيون فون ڪالز اچڻ شروع ٿي ويون جنهن تي  تنگ اچي مان موبائيل فون بند ڪري ڇڏي. امام الحق پنهنجي هڪ انٽرويو ۾ چيو ته جڏهن قومي ٽيم ۾ سليڪشن جي لاءِ نالوآيو ان وقت گاڏي ڊرائيو ڪري رهيو هئس ۽ ڀاءُ اها خوش خبري ٻڌائي جنهن کان پوءِ بار بار الله تعاليٰ  جو شڪر ادا ڪندو رهيس. هن چيو ته سينچري کانپوءِ ٽي يا چار سئو ڇوڪرين جون فون ڪالز آيون ۽ فيس بڪ مختلف فينز  جا ميسج ايندا  رهيا ٽي ڏينهن پريشان رهڻ کانپوءِ موبايئل  فون بند ڪري ڇڏيو. هن چيو ته مان ڪڏهن سوچيو به نه هيو ته ڊيبيو  تي سينچري ٺاهي سگھندس.  هن چيو ته پاڪستاني ٽيم نوجوانن رانديگرن تي ٻڌل  آهي  هن چيو ته منهنجو آئيڊيل شعيب ملڪ آهي  ۽ مان يونس خان کان هارڊ ورڪنگ سکي، هڪ سوال جي امام الحق چيو ته   قومي ٽيم ۾ سليڪشن   پرفارمنس جي بنياد تي ٿي ۽ انڊر 19 ۽  ٽرافي جي ميچن ۾ پرفارمنس ڏئي قومي ٽيم ۾ شامل ٿيس. امام الحق چيو ته چاچا انضمام الحق ۽ ان جو ڪوبه جوڙ ناهي هن کي پنهنجي الڳ سڃاڻ ٺاهڻي آهي.  امام الحق  خواهش جو اظهار ڪندي چيو ته خواهش آهي ته پاڪستان کي ورلڊ ڪپ کٽرايان ۽ ڪنهن به فارميٽ  ۾ پاڪستان کي  ورلڊ ڪپ جو فاتح بڻائن چاهيون ٿا.

 

سوشل ميڊيا وقت جي گهرج…!!:

اڄ جي جديد دور ۾ سوشل ميڊيا وڏو اهم ڪردار ادا ڪري رهي آهي، جيڪي معاملا اليڪٽرانڪ ميڊيا ۽ پرنٽ ميڊيا تي پيا اچن اهي معاملا اڄ ڪلهه سوشل ميڊيا تي اچي وڃن، جن خبرن تي پابنديون لڳايون وڃن ٿيون،اهي معاملا سوشل ميڊيا جي زينت بڻجي وڃن ٿا، اهو ئي سبب آهي جو دنيا جا اڪثر ملڪ سوشل ميڊيا تي پابندي لڳائڻ جو سوچي رهيا آهن ته ڪن  ملڪن ۾ وري اڻ سڌي ريت سوشل ميڊيا تي پابندي به لڳائي وئي آهي، جنهن سبب اصل حققتون عوام آڏو نه پيون پهچن،  پر ان باوجود سوشل ميڊيا تي انصاف جي لاءِ آواز اٿي رهيو آهي،
سنڌ اندر به سوشل ميڊيا جو درست استعمال ٿي رهيو آهي، گوسڙو استادن خلاف به مهم به سوشل ميڊيا تي شروع ٿي هئي، ان کان علاوه سنڌ يونيورسٽي ۾ آپگهات ڪندڙ شاگردياڻي  وارو معاملو به سوشل ميڊيا تي تڪراري بڻجي ويو هو. ان سان گڏوگڏ تانيا خاصخيلي  جي قتل تي به سوشل ميڊيا تي مهم هلي هئي، جنهن به سنڌ جو و ڏو وزير مجبور ٿي متاثر خاندان وٽ پهتو ۽ مجبور امڙ انهن جي پيرن ۾ ڪري پئي هئي، جڏهن پوليس جي ڪردار تي سوشل ميڊيا تي تنقيد ٿي ته ان وقت چيو ويو هو ته سوشل ميڊيا جا مداري حد ۾ رهي پوسٽون شروع ڪن. بهرحال هن وقت سڄي دنيا ۾ سوشل ميڊيا کي هڪ هٿيار جيان استعمال ڪيو پيو وڃي، جن ملڪن ۾حڪومت طرفان ظلم ڪيو پيو وڃي، انهن کي وائکو به سوشل ميڊيا تي ڪيو پيو وڃي، ايتري قدر جو روهنگا جي مسلمانن جو معاملو به سوشل ميڊيا تي ئي اٿيو هو. ان کان علاوه سنڌ ۾ ماڻهن جي گمشدگين ۽ حق گهرندڙن کي کنڀي گم ڪرڻ واريون خبرون به سوشل ميڊيا تي ئي گردش ڪري رهيون آهن
، اهو ئي سبب آهي جو ڪڏهن هن ملڪ ۾ بلاگرز کي کنڀيو ويندو آهي ته ڪڏهن وري انهن جي حمايت ڪندڙن جو آواز دٻايو ويندو آهي. اڄ ڪلهه هن ملڪ ۾ به سوشل ميڊيا تي قيد ڪرڻ جون سازشون ٿي رهيون آهن، جنهن سبب نوان نوان  قانون ٺاهي سزائن جا اعلان ڪيا ويا آهن. جنهن سبب سوشل ميڊيا به اليڪٽرانڪ ميڊيا ۽ پرنٽ ميڊيا جيان بي اثر ٿي  وئي آهي، ڇاڪاڻ ته اڄ ڪلهه هن ملڪ جيڪو رياست چاهيندي آهي، ڪهڙي خبر هلائڻي آهي ۽ ڪهڙي خبر نه هلائڻي آهي، ان جو فيصلو هاڻ پيمرا کي ڪرڻو آهي، ڇاڪاڻ ته قانون جي ڀڃڪڙي ڪندڙ اخبارن يا وري چينلن جا لائسنس رد ڪيا ويندا آهن يا انهن تي پابندي لڳائي ويندي آهي، جيئن مشرف جي دور هڪ سنڌي چينل ۽ هڪ اردو چينل تي پابندي لڳائي وئي  هئي، اهو سلسلو هن وقت تائين رڪجي نه سگهيو آهي.
هاڻ ته عوام جو آواز ۽ عوام جي حقن جي اصل ترجماني سوشل ميڊيا تي به ٿي رهي آهي. اليڪٽرانڪ ميڊيا ۽ سوشل ميڊيا کان پوءِ سوشل ميڊيا واحد پليٽ فارم آهي، جتي ماڻهو پنهنجي حق جي ڳالهه ڪري سگهي ٿو، جيئن ته اهو هن ملڪ ۾ ممڪن نه آهي، ڇاڪاڻ ته جيڪڏهن ڪو هن ملڪ جي مقدس اداري خلاف ڪا پوسٽ يا ڪمنٽ ڪري ٿو ته هتان جا ادارا ان لاءِ رڻ ٻاري ڏين ٿا، جنهن سبب سوشل ميڊيا تي ڏينهون ڏينهن پابنديون وڌنديون پيون وڃن ۽ هن ملڪ ۾ ڪيترن ئي ماڻهن کي گرفتار به ڪيو ويو آهي. ايتري قدر جو اڳوڻي وزيراعظم نوازشريف چيو هو ته ته مسلم ليگ ن جي حامي سوشل ميڊيا صارفين جي گمشدگي تي کيس ڳڻتي آهي. ۽ نوازشريف ته اهو به چيو هو ته ن ليگ جي موقف جي حمايت ڪندڙ سوشل ميڊيا صارفين کي هيسائڻ اظهار جي آزاديءَ تي حملو آهي.
جيڪڏهن ڏٺو وڃي ته نوازشريف اڄ اهي دانهون ڪري رهيو آهي ته سوشل ميڊيا تي حامين کي به کنڀي گم ڪيو پيو وڃي پر جڏهن هو پاڻ وزيراعظم هو ته ان وقت اسلام آباد جهڙي شهر ڏينهن ڏينهن بلاگرز کي کنڀيو  ويو هو پر ان باوجود نوازشريف ڪي به قدم نه کنيا هئا، پر جڏهن اليڪشن دوران سندس ماڻهو گم ٿيا ته سندس دانهون لنڊن تائين ٻڌڻ ۾ اچي رهيون هيون. بهرحال هن ملڪ ۾ جيڪو ڪجهه ٿي رهيو آهي، اهو  سڀ ڪجهه سوشل ميڊيا ذريعي سڄي دنيا کي خبر پئجي رهي آهي، ڀلي  هتان جا وزير، مشير ۽  ٻيا ڪيترو به لڪائڻ چاهين پر دنيا ان کان مڪمل طور  واقف آهي. هن ملڪ ۾ ڪيترو امن آهي، معيشيت ڪيتري مضبوط آهي، اهو سڀني کي خبر آهي. هن ملڪ ۾ عوام غربت کان تنگ آپگهات ڪرڻ تي مجبور آهي، اهو به خبر آهي پر خبر نه آهي ته صرف ملڪ جي حڪمرانن کي  نه آهي، جيڪي ڏسندي به اڻڄاڻ آهن، بي روزگاري سبب هن  ملڪ  جا نوجوان در در جا ڌڪا کائي رهيا آهن پر اسان جي حڪمران کي نظر اچي رهيا آهن ته  افغان مهاجر نظر اچي  رهيا آهن، اسان جي حڪمرانن کي نظر اچي رهيا آهن ته صرف روهنگيا جا مسلمان نظر اچي رهيا آهن ۽ انهن کي ڪيئن هن ملڪ ۾ آباد ڪجي، انهن کي صرف اها ئي ڳڻتي آهي.  هنن حڪمران کي  هن ملڪ جي عوام جو ڪو به فڪر نه آهي،
مشرف افغان مهاجرن کي سنڌ ۾ آباد ڪري سنڌ کي مذهبي انتهاپسندي ۽ دهشتگردي جي ورچاڙهي ڇڏيو، اهو ئي سبب جو اڄ سنڌ ۾ درگاهن ۽ صوفي بزرگن تي ڌماڪا ٿي رهيا آهن. ڌارين جي لوڌ کي آباد ڪري انهن کي نوڪريون ڏئي، انهن کي گهر ڏئي ڌرتي ڌڻين کي بي دخل ڪيو ويو، جيڪو سلسلو اڄ به جاري ساري آهي. هن ملڪ جي حڪمرانن کي سنڌ ۾ ڌاريا ته منظور آهن پر ڌرتي جا اصل وارث منظور نه آهن، اهو ئي سبب آهي جو اڄ  به ڪراچي ۾ سنڌي وسندين کي ڊاٿيو پيو وڃي، ڌرتي ڌڻين کي گهرن کان بي دخل ڪيو پيو وڃي، جن کي سنڌ جي ماڻهن ووٽ ڏنو، انهن ئي ڪراچي ۾ ڌرتي جي اصل وارثن کي گهرن مان تڙي ڪڍيو. اڄ به  گهرن کي ڊاهڻ وارا فوٽيجز سوشل ميڊيا توڙي اليڪٽرانڪ ميڊيا تي گردش ڪري رهيا آهن پر سنڌ سرڪار افغان مهاجرن جون وسنديون، بنگالين جون وسنديون، بهارين جون  وسنديون ڊاهن بنا ڪراچي ۾ سنڌين جون وسنديون ڊاهي رهي آهي، اهو ڪٿان جو انصاف آهي، جيڪڏهن انهن خلاف سوشل ميڊيا تي آواز اٿارجي ته ان کي به ڏوهي قرار ڏنو پيو وڃي.
بهرحال آمريڪي صدر ڊونلڊ ٽرمپ به سوشل ميڊيا جي حمايت ۾ ڳالهايو آهي، هن وقت اهو پهريون شخص آهي جيڪو چئي رهيو آهي ته جيڪڏهن سوشل ميڊيا نه هجي ها ته  هو ڪڏهن به صدارت حاصل نه ڪري سگهي ها، آمريڪي صدر ڊونلڊ ٽرمپ چيو آهي ته سندس اقتدار ۾ اچڻ ۾ سوشل ميڊيا جو تمام وڏو ڪردار آهي، جنهن جي استعمال کانسواءِ صدارتي چونڊ نه پئي کٽي سگهيو. آمريڪي صدر ڊونلڊ ٽرمپ ته اهو به چيو آهي ته هو پاڻ سوشل ميڊيا استعمال ڪندو آهي،  جتي پيغام لکڻ ايئن آهي جيئن ٽائپ رائيٽر تي لکڻ هوندو آهي، اڄ هر ڪو سوشل ميڊيا استعمال ڪندو آهي جنهن ذريعي پيغام سڌو سنئون سموري دنيا تائين پهچي ويندو آهي. ان ڳالهه ۾ ڪو شڪ به نه آهي، اليڪٽرانڪ ميڊيا ۽  پرنٽ ميڊيا ته هاڻ قانون جو پابند بڻجي ويون ويون آهن ته  ڪهڙي خبر هلائڻ آهي يا ڪهڙي نه هلائڻي آهي.
دنيا ۾ سوشل ميڊيا کي حقن لاءِ آواز اٿارڻ جو بهترين هٿيار قرار ڏنو پيو وڃي پر اسان جي ملڪ ۾ وري سوشل ميڊيا تي مذهب جي آڙ ۾  پابندي لڳائڻ جون سازشون ٿي رهيون آهن، جيئن ماضي ۾ ٿينديون آهن. ڪجهه ماڻهو ته هن ملڪ ۾ سوشل ميڊيا کي خراب چئي رهيا آهن، انهن جو چوڻ آهي ته سوشل ميڊيا جا ذهنن تي خراب اثر پون ٿا پر اصل حقيقت  ان جي ابتڙ آهي. ڇاڪاڻ ته  هڪ تحقيق خبر پئي آهي ته سوشل ميڊيا جي روزاني استعمال سان ذهني صحت تي سٺا ثر پون ٿا.
يونيورسٽي آف ميلبورن جي شايع ٿيل تحقيق مطابق ماڻهن کي هڪ ٻئي سان رابطي ۾ رکڻ ۾ سوشل ميڊيا جو اهم ڪردار آهي. اهي ماڻهو جن کي آمهون سامهون رابطن ۾ ڏيکائيون پيش اچن ٿيون. سوشل ميڊيا انهن جي وچ ۾ رابطا قائم ڪرڻ ۾ مددگار ثابت ٿئي ٿو. جڏهن ته سوشل ميڊيا انهن ماڻهن لاءِ فائديمند نه هوندي آهي جيڪي پاڻ کي ٻين ماڻهن سان ڀيٽيندا آهن ۽ اها خبر اليڪٽرانڪ ميڊيا ۽ پرنٽ ميڊيا تي به شايع ٿي چڪي آهي پر ان باوجود سوشل ميڊيا جا مخالفت ڪندڙ ان کي تسليم ڪرڻ لاءِ تيار ئي نه آهن.اسان جي ملڪ جي حڪمرانن کي به گهرجي ته ڏوهاري ڀلي ڪهڙي به اداري سان تعلق ڇو نه رکندڙ هجي يا  جيڪڏهن ڪو غلط ڪم ڪري رهيو آهي ته انهن خلاف ڳالهائڻ جو سڀني کي حق ڏنو وڃي ته جيئن  اظهار جي آزادي تي ڪا به پابندي  نه لڳي سگهي ۽ سوشل ميڊيا تي پابنديون لڳائڻ بدران انصاف جي گهرجن کي پوريو ڪيو وڃي ته جيئن ادارن تي سوشل ميڊيا تي تنقيد جو نشانو بڻائڻ جي ضرورت ئي نه پئي.

sahibalisindhi@gmail.com

پاڪستان ۾ سياسي جمھوري نظام۔۔: تحرير: جنيد عدنان ڏھراج

جمھوريت  جي لُغوي معنیٰ آھي ”عوام جي حڪمراني“۔ يونان جي مفڪر مطابق ” جمھوريت ھڪ اھڙي حڪومت ھوندي آھي جنھن ۾ رياست جا حاڪمانه اختيار قانوني طور تي پوري معاشري کي حاصل ھوندا آھن۔“ جمھوريت جو لفظ پڻ ٻن يوناني لفظن Demo يعني عوام ۽ Kratos يعني حڪومت سان ملي ٺھي ٿو۔ جنھن جي تشريح اھا به ٿي سگھي ٿي ته ماڻھن جي اڪثريتي راءِ کي مڃڻ۔ اھو اھڙي رويي جو نالو آھي جو ڪجھ ماڻھو عوام جي بھتري لاءِ ڪم ڪن ۽ اھي عوام جي نمائندگي پڻ ڪندا ھجن عوام ئي انھن کي منتخب ڪيو ھجي۔ سابق آمريڪي صدر  ابراھيم لنڪن جمھوريت جي تعريف ھن نموني ڪئي آھي ته: ”عوام جي حاڪميت۔ عوام جي ذريعي۔ عوم تي۔“
سياست مان مراد اھڙو عمل آھي جنھن سان معاشري جي معيشت۔ عدل و انصاف ۽ آزادي جي اصول کي فراھم ڪرڻو آھي۔ سياست ۾ رياستي فيصلا عوامي راءِ عامه سان ڪيا ويندا آھن۔ سياست جي تعريف ھيئن به ٿي سگھي ٿي ته ھڪ معاشري جي وڏن وڏن مسئلن مشڪلاتن جي باري ۾ فيصلو ڪرڻ انجي تدبير ڪرڻ ۽ ان معاشري جي مشڪلاتن کي رفع ڪرڻ مختلف امورن کي منظم ڪرڻ منصوبه بندي ڪرڻ ۽ انجي اجراء کي شامل ڪرڻ آھي۔
سياست جو پھريون بنيادي مقصد اقتدار جو حصول ھوندو آھي ۽ پوءِ حقن جو حصول مذھبي قدرن جي تحفظ جمھوري روايتن جي تحفظ کي يقيني بنائڻ ھوندو آھي۔

ملوڪيت جي معنیٰ آھي شخصي حاڪميت يعني ھڪ اھڙو نظام جتي ھڪ شخص طاقت جي زور تي حڪومت حاصل ڪندو آھي ۽ عوام انکي پنھنجو اڳواڻ رھنما تسليم ڪرڻ تي مجبور ھوندو آھي۔ انجو مثال بادشاھت۔ مارشل لا يا جاگيردارن سرمايه دارن جي حڪمرانيءَ کي تصور ڪندي محسوس ڪري سگھجي ٿو۔
پاڪستاني حڪمران بار بار جمھوريت جو راڳ آلاپيندا آھن پر انھن لاءِ جمھوريت جو مقصد اقتدار حاصل ڪري صرف ذاتي مفاد حاصل ڪرڻ ھوندو آھي۔ پاڪستان ۾ سياست جو گھڻو عرصو فوجي حڪمرانن يا آمريت جي نظر ٿيو پر جمھوري وقتن ۾ به سياست سرمايه دار جاگيردار جي گھر جي ڪنيز بڻيل رھي۔ غريب جو سياست ۾ حصو وٺڻ ممڪن ئي ناھي البته ووٽ ڏيڻ۔ جلسن ۾ ماڻھن جي تعداد وڌائڻ۔ وڏن وڏن نعرن ھڻڻ ۾ غريب نظر ايندا آھن۔ سياسي اڳواڻ عوام کي خوبصورت خواب ڏيکاري قتدار حاصل ڪن ٿا ۽ پوءِ کين ياد به نه ٿو رھي ته ڪھڙا ڪھڙا وعده وچن ڪري اچي ھن منزل پڳا آھيون جيڪڏھن ڪجھ ياد رھي ٿو ته اھو ذاتي مفاد ۽ سياسي انتقام۔ پاڪستان ۾ جمھوري انداز ۽ فڪر ڪنھن ھڪ به سياسي جماعت ۾ نظر نه ٿو اچي۔ ھر سياسي اڳواڻ جي پنھنجي پنھجي جماعت اندر ملوڪيت يعني بادشاھت قائم ڪيل آھي مطلب ته اقتدار ملڻ شرط شخصي نظام شخصي غرض تي حڪومت ۽ پارٽيءَ کي ھلايو وڃي ٿو۔ مٿان نظر ايندڙ سياسي جمھوري پارٽيون اندر ۾ درحقيقت بدترين ملوڪيت جو شڪار رھن ٿيون۔اھو ئي سبب آھي جو ڪنھن به سياسي پارٽي ۾ انٽرا پارٽي اليڪشن نه ٿي ٿئي ۽ ساڳا پارثي چيئرمين۔ صدر ۽ ساڳيون تنظيمي باڊيون سالن کان قابض آھن۔ اگر ھڪ اڌ پارٽيءَ ۾ جيڪڏھن پارٽي اندر اليڪشن ٿئي به ٿي ته به فقط ڏيکاو کان سواءِ ڪجھ نه آھي۔ مطلب صرف خانا پوري ڪرڻ لاءِ ۽ ڪاغذن جو پيٽ ڀرڻ لاءِ اھو ڍونگ رچايو ويندو آھي۔ جمھوريت ۾ ته ھر ھڪ جي راءِ کي اھميت حاصل ھوندي آھي پر ھتي فيصلا مشاورت سان نه پر زاتي شخصي سوچ سان مڙھيا ويندا آھن۔ مطلب پوري ملڪ کي يا پارٽيءَ کي شخصي سوچ تي پرائيويٽ ڪمپني طور ھلايو ويندو آھي اگر ڪوئي فيصلي کان اختلاف راءِ رکي ٿو ته انکي اقتدار کان پري ڪري پارٽي عھدا کسي سياسي طور تڙيو ويندو آھي۔

ملوڪيت ۾ ھميشه اڳواڻ پنھنجي ھوندي ئي پنھنجو جانشين مقرر ڪندو آھي جيڪو عام طور تي سندس گھر جو ڀاتي جھڙوڪ پٽ۔ڌيءُ ۔ ڀاءُ۔ ڀيڻ يا ڪو غزيز رشتيدار وغيره ھوندو آھي پوءِ ڀلي اھو ان عھدي جي اھل ھجي يا نه پر فيصلو مسلط ڪيو ويندو آھي۔ اگر ڪنھن ٻئي سياسي پارٽي سان ٺاھ يا اتحاد ڪرڻ جي ضرورت پيش ايندي آھي ته اُھي اتحاد پڻ ملڪي مفاد خاطر نه پر پنھنجي ڪمزور حڪومت کي تقويت ڏيڻ خاطر يا اقتدار کي طول ڏيڻ خاطر يا ٻئي ڪنھن ذاتي غرض خاطر جوڙيا ويندا آھن۔ سياسي جمھوري پارٽين جي حڪمرانن۔ اقتدار ۾ شامل اڳواڻن۔ وزيرن مشيرن انھن جي واٺن جي لائيف اسٽائيل پروٽول ۽ عيش عشرت ڏسي ئي پتو پئجي وڃي ٿو ته ھڪ غريب ملڪ جا حڪمران ملڪ ۽ غريب عوام سان ڪيترو مخلص آھن۔ شخصي اثر ۽ غلامانه سوچ رکندڙ ماڻھن کي جمھوريت ۽ انجي قدرن جي ڪھڙي خبر؟ حاڪميت جو مقصد خدمت خلق بدران اگر ذاتي غرض بڻجي وڃي پوءِ سياسي حڪومت ھجي چاھي آمريت جمھوريت ڪڏھن نه ايندي۔ جمھوريت آڻڻ جا دعويدار حڪمران پنھنجي عملن کي ڏسي ثابت ڪن ته اُھي جمھوري اصولن جي پاسداري ڪري رھيا آھن يا اڻسڌي طرح آمريت جي ٻوٽي کي پاڻي ڏئي پروان چاڙھي رھيا آھن۔

Ja.dehraj@gmail.com

 

آمريڪا کي ”نو ڊو مور“ جو پيغام ڏيڻ جي حڪمت عملي…!

پاڪستان آمريڪي پرڏيهي وزير ريڪس ٽلرسن جي دوري دوران ”نو ڊو مور“ جو پيغام ڏيڻ جو فيصلو ڪري ورتو آهي، آمريڪي پرڏيهي وزير ريڪس ٽلرسن جي پاڪستان جي دوري بابت حڪومت پنهنجي حڪمت عملي تيار ڪري ورتي آهي، جنهن موجب پاڪستان آمريڪي عملدارن کي واضح پيغام ڏيندو ته آمريڪا ۽ افغانستان انهن دهشتگرد تنظيمن جي خلاف اثرائتيون ڪارروايون ڪري، جيڪي افغان سرزمين تي ويهي پاڪستان ۾ دهشتگردي ڪرائڻ ۾ ملوث آهن. پاڪستان آمريڪا سان دهشتگردي جي خاتمي لاءِ وڌيڪ تعاون ڪرڻ جي حوالي سان پنهنجي حڪمت عملي جوڙي ورتي آهي، جنهن موجب پاڪستان آمريڪا سان گڏ ”گڏيل انٽيليجنس شيئرنگ“ جي نظام کي اثرائتو بڻائڻ جي حوالي سان پنهنجي قومي سلامتي جي پاليسي کي اڳيان رکندي سهڪار ڪندو. پاڪستان جي حدن ۾ رڳو پاڪ فوج ۽ سيڪيورٽي ادارا ئي ڪارروايون ڪندا ۽ آمريڪا سان گڏ ڪوبه گڏيل آپريشن نه ڪيو ويندو ۽ نه ئي آمريڪا يا افغانستان سميت ڪنهن به ٻئي ملڪ کي پاڪستان حدن ۾ ڪنهن آپريشن جي اجازت ڏني ويندي، ان حڪمت عملي جي حوالي سان وفاق جا عملدار آمريڪي پرڏيهي وزير ريڪس ٽلرسن جي هلندڙ مهيني پاڪستان جي دوري جي موقعي تي ملاقاتن ۾ آگاهه ڪندا. رپورٽون آهن ته وفاقي حڪومت آمريڪي پرڏيهي وزير جي دوري بابت پنهنجو هوم ورڪ مڪمل ڪري ورتو آهي، اعليٰ وفاقي سطح جي حلقن ۾ ٿيندڙ مشاورت ۾ پاڪ آمريڪا ناتن ۾ ايندڙ ڇڪتاڻ، افغانستان لاءِ نئين ٽرمپ پاليسي، دهشتگردي جي خاتمي لاءِ وڌيڪ سهڪار، افغان مفاهمتي عمل ۾ پاڪستان جو ڪردار، ڀارت جي افغانستان ۾ ڪردار تي پاڪستان جي خدشن، پاڪستان ۽ آمريڪا وچ ۾ مختلف شعبن ۾ سهڪار کي هٿي ڏيڻ سميت ٻين معاملن تي آمريڪي پرڏيهي وزير سان ٿيندڙ ڳالهين جي حوالي سان غور ڪيو ويو آهي.

پاڪستان آمريڪا سان گڏ مستقبل جي لاڳاپن جي حوالي سان پاليسي طئي ڪري ورتي آهي، ان پاليسي جي واضح ايجنڊا هڪ ئي آهي ”نو ڊو مور ۽ برابري جي سطح تي لاڳاپا“ ان ئي پاليسي تحت پاڪستان طرفان آمريڪا سان ڳالهين جي ايجنڊا کي اڳتي وڌايو ويندو، پاڪستان عملدار آمريڪي پرڏيهي وزير جي دوري جي موقعي تي دهشتگردي جي خاتمي لاءِ وڌيڪ تعاون جي حوالي سان پنهنجي حڪمت عملي واضح ڪندا، پاڪستان آمريڪا سان رڳو انٽيليجنس شيئرنگ ۾ گڏيل سهڪار کي وڌائيندو، پاڪستان طرفان آمريڪا سان گڏيل طور تي ڪو فوجي آپريشن نه ڪندو. پاڪستان آمريڪي عملدارن کي خبردار ڪندو ته جيڪڏهن هن وٽ پاڪستان جي حدن ۾ ڪنهن دهشتگردي تنظيم جي حوالي سان ڪو اطلاع آهي ته ان بابت ٺوس معلومات فراهم ڪئي وڃي، پاڪستان ان جي بنياد تي پاڻمرادو ڪارروائي ڪندو. پاڪستان آمريڪي عملدارن تي اهو به واضح ڪندو ته آمريڪا ۽ افغانستان دهشتگرد تنظيمن جي خلاف به اثرائتين ڪارروائين کي وڌيڪ تيز ڪري جيڪي افغان سرزمين تي ويهي ڪري پاڪستان ۾ دهشتگردي ڪرائڻ ۾ سڌي يا اڻ سڌي طرح ملوث آهن. جيڪڏهن آمريڪي عملدار پنهنجو ماضي جو اهو مطالبو ورجايو ته پاڪستان پنهنجي سرزمين تي دهشتگردن جي پناهگاهن يا نيٽ ورڪ کي ختم ڪري ته پوءِ پاڪستان جو واضح جواب هوندو ته پاڪستان جي سرزمين تي دهشتگردن جا ڪا پناهگاهه يا نيٽ ورڪ ناهي. وفاق ٽرمپ عملدارن تي واضح ڪندو ته ان معاملي تي مطالبو نه ڪيو وڃي، بلڪه ٺوس معلومات يا انهن هنڌن جي نشاندهي ڪرڻ جو چيو ويندو.