تازيون خبرون

Daily Archives: October 23, 2017

فلم ”پدماوتي“ ڏسڻ کان پهرين ان تي بحث ڪرڻ اجايو آهي: شاهد ڪپور

ممبئي (شوبز نيوز) بالي ووڊ اداڪار شاهد ڪپور فلم ”پدماوتي“ بابت تڪرار کي هڪ پاسي رکندي چيو آهي ته مداح فلم ”پدماوتي“ کي ڏسڻ کانپوءِ ئي ان جي سٺي يا خراب هئڻ جو فيصلو ڪن. ڀارتي سڌ سماءَ وارن ذريعن موجب شاهد ڪپور جو پنهنجي نئين فلم ”پدماوتي“ بابت چوڻ آهي ته ان کي ڏسي هر ڀارتيءَ کي فخر محسوس ٿيندو. هن مداحن تي زور ڏيندي چيو ته فلم کي ڏسڻ کان پوءِ ئي ان جي سٺي يا خراب هئڻ جو فيصلو ڪن. فلم جي ڪاسٽ ۾ دپيڪا پڊوڪون، شاهد ڪپور ۽ رنوير سنگهه شامل آهن. فلم جو هدايتڪار سنجي ليلا ڀنسالي آهي. فلم هلندڙ سال پهرين ڊسمبر تي نمائش لاءِ پيش ڪئي ويندي.

 

مفتي عبدالقوي طرفان ڪيس واپس وٺڻ تي ڪروڙن جي آڇ آهي: قنديل جا والدين

ملتان (شوبز نيوز) قتل ڪيل ماڊل قنديل بلوچ جي والدين مفتي عبدالقوي کي اصل ۽ مک ملزم قرار ڏيندي دعويٰ ڪئي آهي ته ڪيس تان هٿ کڻڻ لاءِ مفتي عبدالقوي طرفان ڪروڙين رپين جي آڇ ڪئي وئي آهي پر اهي ڌيءَ جو خون پئسي جي لالچ ۾ اچي وڪرو نه ڪندا. هڪ رپورٽ مطابق قنديل جي والدين چيف جسٽس آف پاڪستان کي اپيل ڪئي آهي ته هو ان ڪيس تي نظر رکي ته جيئن مرڪزي ملزم عبدالقوي کي سزا ملي سگهي. قنديل بلوچ قتل ڪيس ۾ عدالت خميس تي مفتي عبدالقوي کي چئن ڏينهن جي جسماني رمانڊ تي پوليس جي حوالي ڪيو هو.

 

پاڪستان ۽ نيوزي لينڊ وومين جي وچ ۾ پهريون ون ڊي انٽرنيشنل ڪرڪيٽ ميچ 31 اڪٽوبر تي شارجه ۾ کيڏيو ويندو

اسلام آباد (اسپورٽس نيوز)پاڪستان ۽ نيوزي لينڊ وومين ڪرڪيٽ ٽيمن جي وچ ۾  ٽي ون ڊي بين الاقوامي ميچن تي  ٻڌل سيريز جي پهرين ميچ 31 اڪٽوبر تي شارجه ۾ کيڏي ويندي، پاڪستان ۽ نيوزي لينڊ وومين جي وچ ۾ ٽي ون ڊي ۽ چار ٽي ٽونيٽي بين الاقوامي ڪرڪيٽ ميچن جي سيريز کيڏي ويندي.، سيريز جي تياري جي سلسلي ۾ قومي ٽيم جو تربيتي ڪيمپ جاري آهي، پاڪستان  نيوزي لينڊ وومين وچ ۾ ون ڊي سيريز 31 اڪٽوبر کان پهرين ون ڊي ميچ سان شروع ٿيندي. ٻنهي ٽيمن وچ ۾ ٻيو ون ڊي  2 نومبر جڏهن ته ٽيون ۽ آخري ون ڊي 5 نومبر تي ٿيندو ٻنهي ٽيمن جي وچ ٽي ٽونيٽي سيريز پهرين ميچ 8 نومبر، ٻي 9،ٽين 12 ، چوٿين ۽ آخري ميچ 147 نومبر تي کيڏي ويندي.

 

پاڪستان اسڪوائش فيڊريشن سياست کان پاڪ آهي پر رانديگر محنت ڪري ملڪ جو نالو روشن ڪري سگھن ٿا : جان شير

اسلام آباد (اسپورٽس نيوز)اڳوڻي عالمي چيمپئين (اسڪوائش) جان شير خان چيو ته پاڪستان اسڪوائش فيڊريشن سياست کان پاڪ آهي پر رانديگر محنت ڪري ملڪ جو نالو روشن ڪري سگھن ٿا اهڙن خيالن جو  اظهار هن ميڊيا سان ڳالهائنيدي ڪيو، 10 سالن تائين دنيا تي حڪمران ڪندڙ جان شير خان چيو ته هن وقت پاڪستان اسڪوائش فيڊريشن سياست کان پاڪ  آهي ان جو سڀ کان وڏو سبب اهو آهي ته پاڪستان ايئرفورس هن  راند جي سرپرستي ڪري رهي آهي ۽ پاڪستان اسڪوائش فيڊريشن جو صدر ايئرچيف مارشل سهيل امان ملڪ ۾ اسڪوائش کي هٿي ڏيڻ جي لاءِ ڏينهن رات ڪوشان آهي ۽ مان به هن فيڊريشن سان گڏ ڪم ڪرڻ تي فخر  ڪري رهيو آهيان، هن چيو ته ملڪ ۾ ٽيلنٽ جي ڪم ناهي ضرورت ان    ڳالهه جي آهي ته  رانديگر محنت ڪن ۽ ڪوچز ايمانداري ۽ نيڪ نيتي سان رانديگرن جي رهنمائي ڪن ته ان ۾ ڪو شڪ ناهي ته پاڪستان اسڪوائش ۾ وڃايل مقام ٻيهر  حاصل نه ڪري سگھي، ڪو چ هڪ استاد جو درجو رکي ٿو جيڪڏهن رانديگر دلچسپي نه وٺندو ته ڪوچ به ڀلا ڇا ڪري سگھندو.  هن چيو ته اسڪوائش  تان منهنجي رٽائر ٿيڻ جي 17سالن کانپوءِ به اڄ تائين پاڪستان اسڪوائش ۾ اهڙو ڪو به رانديگر ناهي آيو جيڪو عالمي نمبر ون رينڪنگ ۾ پهتو هجي ان جو اهو ئي سبب اهي ته رانديگر محنت نه پيا ڪن ۽ اسان جي دور ۾ هڪ ٽورنامينٽ کٽڻ کانپوءِ ٻي ٽورنامينٽ لاءِ وڌيڪ سخت محنت ڪندا هيا سين ته ايندڙ  ٽائيٽل به پنهنجي نالي ڪري سگھجي.

 

زال ۽ سالن هٿان قتل ٿيل اياز سانگي انصاف گهري ٿو..!: ثقلين سانگي

سفاڪ زال ٻن دھشتگردن ڀائرن ھٿان نوجوان خوبصورت ، خوبصيرت شھزادي گلن جھڙي مڙس مٿان تشدد ڪرائي کيس مارائي ڇڏيو. شھيد اياز حيسن سانگي گورنمينٽ پرائمري اسڪول غلام محمد ۾ ھيڊ ماستر ھيو.مقتول اياز حيسن سانگي جي قاتلن کي پوليس ۽ سياسي ماڻھن سان گڏ با اثر ملڪ جي بدنام ڪندڙ سزا يافته ، جعلي ڪرنسيءَ جي ڏوھن ۾ ملوث ، فحاشيءَ جا اڏا ۽ شراب ھلائيندڙ ظالم قسم جي ماڻھن جي طرفان تحفظ مليل آھي ۽ قاتلن جي گھرن مٿان پھرو مقرر ٿيل آھي.20.10.2017 تي قاتلن کي پوليس جي موبائل ۾ ويھاري تحفظ ڏئي ٽنھي قاتلن پروين سومرو، نصير سومرو  ۽ وسيم سومرو کي ھاءِ ڪورٽ ۾ پروٽيڪٽو بيل لاءِ آندو ھاءِ ڪورٽ ۾ اڳ ئي موجود آصف سومرو وڪيل پنھنجي عھدي جو ناجائز استعمال ڪندي ، ياري دوستي جي بنيادن قاتلن جي شفارش ڪري کين پروٽيڪٽو بيل 15 ڏينھن لاءِ ملي ويو جڏھن ته اھو بيل ھڪ ھفتي يعني 7 ڏينھن لاءِ ھوندي آھي.

انسانن ۽ انسانيت جي پيروڪارن مظلومن جي مدد ڪرڻ بدران قاتلن جو ساٿ ڏيندي انصاف ۽ انسانيت جا بکيا اُڍيڙي ڇڏيا آھن، پروٽيڪٽو بيل ملڻ کان پوءِ قاتلن طرفان شھيد اياز حسين سانگي جي وارثن کي ڌمڪيون ملي رھيون آھن ته ڪيس تان ھٿ کڻي وڃو ٻي صورت ۾ اوھان تي ڪيس داخل ڪري گھرن مٿان حملا ڪيا ويندا . ھن ملڪ جي محبوب اڳواڻ شھيد ذوالفقار علي ڀٽي جي قاتل، شھيد مير مرتضٰي جي قتل، شھيد محترمه بينظير ڀٽو جي قتل جو انصاف ئي نه ملي سگھيو ته پوءِ شھيد اياز حسين سانگيءَ جي قتل جو انصاف ڪير ڪندو جنھن ملڪ جا ماڻھو ظالمن جا ساٿاري ھجن اُتي مظلومن جي داد رسي ڪئين ٿيندي؟

ھن سفاڪ عورت جيڪو عمل ڪيو آھي ان واقعي تي ھر غيرتمند انسان جي اکين مان لڙڪ اکين جا بند ٽوڙي ڳلن تي لڙي آيا. 14 سيپٽمبر 2017ع جي باک ڦٽندي عجيب موت جو پرونو کڻي موت وارو ملائڪ استاد اياز حسين سانگيءِ جي گھر پھتو سندس ئي نمڪ حرام زال پروين سومرو پنھنجي ٻن دھشتگرن ڀائرن نصير سومرو ۽ وسيم سومرو کي فون ڪري گھرائي ورتو . وسيم سومري تي اڳ به (ATC) ڪورٽ ۾ ڪيس ھلندڙ آھن ھن پروين سان گڏجي ھڪ گلن جھڙي خوبصورت ۽ شھزادي مٿان تشدد ڪري مرڻينگ ڪري پنھنجي خيال ۾ موقع تي ماري ويا . استاد اياز سانگي کي سول اسپتال لاڙڪاڻي ۾ داخل ڪيو ويوجتي سندس طبيعت نه سڌري سگھي کيس نازڪ حالت ۾ ڪراچيءَ پھچايو ويو. نيشنل ميڊيڪل سينٽر ڪراچي ۾ موت سان جھيڙيندي زندگي جي جنگ ھارائيندي خالق حقيقيءَ سان وڃي مليو.5 آڪٽوبز 2017ع تي استاد اياز حسين سانگيءَ جو مڙھ لاڙڪاڻي آندو ويو ضروري ڪاروائي بعد شھيد اياز حسين سانگيءَ جي جسد خاکي کي سندس جي اباڻي ڳوٺ جيءَ وادي حسين قبرستان مڏ باھوءَ ۾ دفنايو ويو. استاد اياز حسين سانگي جي موت جي خبر باھ جيان جھر جھنگ ۾ پکرجي وئي ڏسندي ئي ڏسندي ھزارين ماڻھو پھچي ويا جنھن ۾ استاد ، دوست ۽ ھمدرد ھيا.

استاد اياز حسين سانگي سنڌ يونيورسٽي مان ماس ڪميونيڪيشن ۾ ايم اي جي ڊگري حاصل ڪئي شھيد اياز حسين سانگي پنھنجن دوستن جا اڪثر يونيورسٽي جا استادن جون ساروڻيون ساريندو ھيو.

ھن مظلوم انسان جنھن ظالم عورت سان شادي ڪئي جيڪا پنجاب جي رحيم يار خان ڪوٽي شاھ چاچڙان شريف جي ھئي.ھن سفاڪ عورت جي اڳ ۾ شادي حاجي محمد نواز سومرو سان ٿيل ھئي جنھن کي پڻ ھن پنھنجن ڀائرن کان ئي قتل ڪرايو . حاجي محمد نواز سومرو کي اھڙي طرح قتل ڪيو ويو ھو جيئن استاد اياز حسين سانگيءَ کي قتل ڪيو ويو . پنجاب ۾ قتل ڪرڻ بعد ڀڄي آيا ۽ ھنن مٿان رحيم يارخان ضلع ۾ ڪيس داخل آھن . پروين سومرو کي اڳئي مڙس مان ٻه ڌيئر پڻ ھيون جيڪي استاد مير اياز حسين سانگي پالي جوان ڪيون. جڏھن ته پروين سومرو کي استاد اياز سانگي مان 5 ٻارڙا آھن جيڪي روئيندي روئيندي پيءُ کي ياد ڪري بابا کي پڪاري ھينانءُ ڏاريندڙ منظر سندن آھون پڪارون دل ۾ درد رکندڙ نٿا برداشت ڪري سگھن خبر ناھي استاد اياز حسين سانگي جي گھر کي ڪنھن بد نظر جي نظر کائي وئي جو وسندڙ گھر ويران ٿي ويو.

شھيد استاد اياز سانگي جي قتل تي سندس پوڙھو پيءَ ۽ ماءُ روئيندي پنھنجو نور نچوئي رھيا آھن .

شھيد اياز حيسن سانگي جي ايف آءِ آر الهه آباد ٿاڻي تي گناھ نمبر 95 ۽ قلم 302.114.348 تحت داخل آھي. ليڪن SHO الھه آباد امداد هليو گرفتار ڪرڻ بجائي قاتلن جو سھولتڪار بڻيل آھي ۽ قاتلن جي ھر طريقي سان مدد ڪرڻ ۾ رڌل آھي ۽ قاتلن جي گھرن مٿان پوليس جو پھرو بيھاريو ويو آھي جنھن جا ثبوت فوٽيج ذريعي حاصل ڪيل آھن. استاد اياز حسين سانگيءَ جي قاتلن ۾ ملوث زال پروين سومرو ، نصير سومرو ۽ وسيم سومرو ۽ قاتلن جي سھولتڪارن سليم سومرو ۽ سندس ڀائر نديم سومرو جن انسانيت جا ليڪا لتاڙي ڇڏيا آھن مقتو ل جي وارثن پاڪستان پيپلز پارٽي جي چيئرمين بلاول ڀٽو زرداري . محترم فريال ٽالپر صاحبه کي اپيل ڪندي چيو آھي ته شھيد اياز حسين سانگيءَ جي قاتلن کي سزا ڏني وڃي سانگي قبيلو جيڪو لاڙڪاڻي سميت سموري پاڪستان ۾ آباد آھي جن اندر سخت ڪاوڙ ۽ غصي جي لھر ڦھليل آھي . سانگي قبيلي جا بزرگ ۽ نوجوان پاڪستان پيپلز پارٽي جي چيئرمين ۽ محترمه فريال ٽالپر کان انصاف جي گھر ڪري رھيا آھن ۽ شڪايت ڪري رھيا آھن ته لاڙڪاڻي ضلع جو صدر عبدالفتاح ڀٽو دوستي نڀائيندي قاتلن جو ساٿاري بڻجي قاتلن جي درن تي پنھنجا ذاتي ھٿيار بند ويھاري ڇڏيا آھن ۽ مختلف ھربا ھلائيندي شھيد اياز حسين سانگي جي ڪيس کي خراب ڪرائڻ جي سازش ۾ مصروف آھي.

شھيد اياز حسين سانگي پنھنجي ڌڪن جي لڳڻ کانپوءِ الھه آباد ٿاڻي تي دانھيو ھيو ۽ NC داخل ڪرائي ھئي ليڪن ان باوجود به پوليس ھن جي داد رسي نه ڪري سگھي شھيد ٿيڻ بعد SHO الھه آباد امداد ھليو قاتلين سان ۽ ظالمن سان گڏ بيٺو آھي جنھن جا ثبوت ڦوٽيج آھن. جيڪڏھن لاڙڪاڻي ۾ اھڙي قسم جا سياستدان ۽ پوليس آفيسر رھيا ته لاڙڪاڻي ۾ ڪيترن ئي مائرن جون جھوليون برباد ٿي وينديون . پوليس ۽ سياستدان تماشائي وارو ڪردار ڪندي نظر ايندا. پروين سومرو شھيد ٿي ويل اياز حسين سانگي جي وارثن تي ڪوڙيون پٽيشنون داخل ڪرائڻ جو سلسلو شروع ڪري ڇڏيو آھي.

شھيد استاد اياز حسين سانگيءَ جي وارثن چيف جسٽس آف سپريم ڪوٽ آف پاڪستان ، چيف جسٽس آف ھاءِ ڪورٽ آف سنڌ ، ڊي آئي جي لاڙڪاڻي ، ونگ ڪمانڊر رينجرس لاڙڪاڻي کي اپيل ڪندي چيو آھي ته شھيد اياز حسين سانگيءَ جي قاتلن ۾ نامزد ٿيل قاتل عورت پروين سومرو، نصير سومرو، وسيم سومرو ۽ قاتلن جي سھولتڪارسليم سومرو، نديم سومرو ۽ فھيم سومرو خلاف سخت ڪاروائي ڪري شھيد جي وارثن کي انصاف ڏنو وڃي . مڙس جي قتل ھڪ زال ٻه سالا ۽ ٽي سھولتڪار ۽ حد جي پوليس ۽ سياستدان مددگار ان کان وڌيڪ ٻيو ڪھڙو ظلم ٿيندو ڌمڪيون وري ملن ٿيون موتمار. شھيد اياز حسين سانگيءَ جي قتل ۾ ملوث جوبدارن سھولتڪارن کي پاڪستان پيپلزپارٽي مان ڪڍيو وڃي جيئن پيپلزپارٽي جي ساخ خراب ٿيڻ کان بچي وڃي.

*****

 

سنڌ جا آبادگار ۽ معاشي ڦرلٽ: ڪامريڊ منان چانڊيو

اسان جي سون ورني ۽ سونهاري سنڌ ڌرتي هڪ زرعي پرڳڻو ۽کيت آھي، جنهن جي رهواسين جي گهڻائي جيڪا يقينن ڪروڙين ۾ هوندي، انهن جي گزر سفر جو دارومدار پوکي راهي تي آھي. اها پڻ حقيقت آهي، ته سنڌ جا ماڻهو هڪڙا جهڙوڪ ننڍا زميندار، آبادگار ۽ ھاري سڌا سنوان زراعت سان تعلق رکن ٿا. ٻيا وري مختلف فصلن جي تيار ٿيڻ کان پوءِ شھرن جي مارڪيٽن، اناج منڊين توڙي سبزي، فروٽ منڊين ۾ اچڻ تي انهن جي خريد فروخت ڪن ٿا. ٽيان وري زرعي مشينري، دوائون، ڪيميائي ڀاڻ ۽ ٻج وڪرو ڪندڙن کان وٺي سيلرن وغيره تائين مزدوري ڪندڙن جو واستو يا پيٽ ڪوٿ به زراعت سان وابستا آھي. هاڻي جيتوڻيڪ جديد زرعي مشنري عام جام هئڻ ڪري هاري ۽ زرعي مزدور جي اهميت گهٽ ٿي وئي آھي، پر پوءِ به افرادي قوت زراعت لاءِ ڪرنگهي جي هڏي واري حيثيت رکي ٿي. مثال طور تي سارين جو رونبو، ڪمند جي ڪٽائي ۽ ڇلائي يا وري مختلف ڀاڄين جي پوکائي ۽ انهن کي زمين مان ڪڍڻ يا لڻڻ ۽ فروٽ کي وڻن ۽ ٻوٽن مان لاهڻ جو ڪم به هاري ۽ زرعي مزدور پنهنجي هٿن سان ڪري ٿو. جنهن جو مطلب اهو ٿيو، ته زمين ۾ ٻج پوکڻ ۽ ان اُپائڻ، ڀاڄيون، فروٽ پيدا ڪري، ويندي مختلف مارڪيٽن تائين پهچائڻ ۾ هاري، آبادگار توڙي کيت مزدور جي قليدي اهميت ۽ محنت مزدوري ۾ شامل آھي. هتي ان ڳاله جي پڻ وڏي حيثيت ۽ ضرورت آھي، ته اناج وارا فصل، تيلي ٻج، فروٽ يا وري ڪيش واري پوک ڪمند، ووئنڻ کان سواءِ مختلف دالين جي پوکي ۽ تياري لاءِ زمين جو زرخيز هئڻ ان کي کيڙي سنوت مندائتي پوک پوکڻ سٺو اصل ٻجُ، ڀاڻ، دوائون وقت ۽ ضرورت موجب ڏيڻ يا وري لاباري ۽ ڪٽائي ۾ نه تڪڙ نه دير ڪرڻ. ها! اڃان اهم ڳاله اها به آھي، ته مندائتو ۽ ججهو پاڻي هجڻ.

ڏٺو وڃي ته سنڌ ۽ سنڌين جي حصي جي پاڻي واري مامري ۾ ڪيتريون ئي ويڌنون ورهين کان وٺي ٿينديون پيون اچن. يعني هڪ طرف وفاق جي ڏڍ تي پنجاب قيام پاڪستان کان اڳ مُنڍ تي هئڻ جو ناجائز فائدو وٺي، سنڌو درياءَ تي ڌاڙا هڻڻ لاءِ ڪيترائي ڊئم، ڪئنال ۽ بئراج تعمير ڪرڻ کان سواءِ لفٽ مشينن ذريعي چوري ۽ سينا زوري ڪري سنڌين جي حصي جو پاڻي کڻي پنهنجي ڪلر بنجر ۽ ريگستانن وارين زمينن کي آباد ڪندو پيو اچي. ان ڪري سنڌ ۾ پاڻي جي کوٽ پيدا ٿيڻ ڪري، جتي هزارين لکين ايڪڙ سنڌ جي زرخيز زمين غيرآباد ٿي وئي آھي، اتي وري سنڌوءَ جي ٻنهي ڪنارن جي لکين ايڪڙ ڪچي واري زمين سُڪي ٺوٺ ٿي وئي آھي. نتيجتن سنڌ جا ٻيلا ۽ چراگاهه پڻ ختم ٿي ويا آھن. نه صرف اهو پر ڪوٽڙي بئراج کان هيٺ سمنڊ ڏانهن مقرر مقدار پاڻي ڇوڙ نه ٿيڻ ڪري سمنڊ سنڌ جي ڏکڻين ضلعن خاص ڪري ٺٽو ۽ بدين جون لکين ايڪڙ زمينون هڪ طرف ڳڙڪائي ويو آھي، ته ٻئي طرف وري دهن جون دهون کاري پاڻي جي سيڪ ۽ لپيٽ ۾ اچي بڙڀانگ ٿي ويون آھن. پنجاب وفاق ۽ ارسا جون سنڌي آبادگارن سان ٿيندڙ ڏاڍايون پنهنجي جاءِ تي گهٽ ۽ نظرانداز ڪرڻ جهڙيون ڪونه آھن، پر وري ٻي مصيبت سنڌ جي آبادگارن هارين سان خود سنڌ جو وڏو ۽ منڍ وارو زميندار آبپاشي جي ڪرپٽ عملدارن سان ملي ڀڳت ڪري ننڍن زميندارن، آبادگارن هارين، خاص ڪري پڇڙي وارن کاتيدارن جي حصي جو پاڻي کڻي رھيا آھن. جن کي ڪا به جهل پل ڪونهي، ۽ نه وري کين خدا ۽ قانون جو ڪو خوف آھي. حالانڪ آبپاشي جي قائدن موجب هر هڪ بئراج ڪئنال ۽ شاخ مان نڪرندڙ واٽر ڪورسن تي جيڪا به زمين هوندي آھي، ان تحت سڀني آبادگارن ۾ برابري جي تناسب سان پاڻيءَ جي ونڊ ورڇ جو هڪ طئي ٿيل فارمولو هوندو آھي، جنهن موجب پڇڙيءَ تائين مناسب مقدار ۾ پاڻي پهچائڻ آبپاشي آفيسرن جو قانوني ۽ اخلاقي ذمو ۽ فرض آھي. پر افسوس سان چوڻو پئي ٿو، ته ڪيترن ئي ڏھاڪن کان خاص ڪري سنڌ ۾ پ. پ جي موجوده اقتداري دور ۾ جيڪو اڳي سو تڳي يا جيڪو ڏاڍو سو گابو، وارو ڪارونهوار هلي رهيو آھي. هتي ستم ظريفي جي ڳالھ اها پڻ آھي، ته هر سال بئراجن، ڪئنالن ۽ شاخن جي کاٽي، صفائي توڻي ريگيوليٽرن جي معرمت ۽ تبديليءَ لاءِ ڪروڙين اربين رپيا مخصوص ڪيا ويندا آھن، جيڪي صرف ۽ صرف ڪاغزن جو پيٽ ڀريندا آھن. باقي سڀ خير خدا جو.

اسان مٿي ڄاڻايل اصل حقيقت جي پٽاڻ انڪري ڪئي آھي، ته جيئن پڙهندڙن کي اهو پتو پئي، ته سنڌ جا آبادگار ڪهڙين ڪٺن مشڪلاتن کي منهن ڏيندا پيا اچن، ۽ جڏھن انهن جا فصل تيار ٿي مارڪيٽ ۽ منڊين ۾ پهچن ٿا، ته پوءِ اتي وري واپاري ڪهڙي ريت ٻنهي هٿن سان کين لُٽين ٿا. هتي نوٽ ڪرڻ جهڙي ڳالھ اها به آھي ته، اڄ کان ٻه ٽي ڏهاڪا اڳ آبادگار پنهنجي زمينن ۾ ديسي ٻج پوکيندا هئا، ۽ اهي ٻج اڪثر ڪري گذريل فصل واري مند ۾ صاف سٿرا ڪري سانڍي رکندا هئا. جنهن ڪري هنن کي هڪ ته اڄ وارا ڳاٽي ٽوڙ اگهن، ٻج وٺڻان ڪونه پوندا هئا. ٻيو ته هنن کي نقلي ٻج پلئي ڪونه پوندا هئا. ان کان سواءِ ڪيميائي ڀاڻ جو رواج به گهٽ ھيو. اهڙي ريت ڏاندن ذريعي هر ڦار ٿيندو ھيو فصل لابارو ۽ ڳاهه پڻ ھاري پاڻ يا وري هڪ ٻئي سان وريءَ تي ڪندا هئا. چوڻ جو مطلب ته اهو اجايو خرچ نقلي ۽ مهانگو ٻج، ڀاڻ ۽ دوائن واري جنجهٽ کان آبادگار بچيل هئا. تنهن ڪري ٿوري اپت هوندي به هنن جا مالي مامرا آسانيءَ سان هلي ويندا هئا.

پاڻ ڳالھ پئي ڪئي سين آبادگارن سان تيار ٿيل فصل جا مناسب اگھ نه ملڻ جي، ته هن وقت سنڌ ۾ سارين جو فصل تيار ٿي اناج منڊين يا شھر جي ننڍن واپارين وٽ پهچي رهيو آھي. جيڪي حضرات پنهنجي مرضيءَ موجب ان جو اگھ ڏين ٿا. جيڪو ڇھن سون کان اٺن سون تائين به مشڪل آھي. هڪ ته اگھ تمام گهٽ آھي، ٻيو ته في مڻ تي ڪلو ڪٽ پڻ ڪئي وڃي ٿي، جيڪا آبادگارن سان سراسر ناانصافي آھي. حقيقيت ۾ ٿيڻ ايئن کپي، ته سنڌ سرڪار، آبادگارن کان سڌو سئون ساريون خريد ڪري جنهن جو اگھ گھٽ ۾گھٽ ھزار کان ٻارنهن سون تائين هئڻ گهرجي، يا ته وري ڪارخانيدارن کي پابند ڪيو وڃي، ته اهي اگھ آبادگارن کي ڏنا وڃن. اهو تڏھن ممڪن ٿي سگهي ٿو، جڏھن وفاقي توڙي صوبائي سرڪار ڪارخانيدارن کان چانور خريد ڪري ياوري وڏن بروڪرن کي سهولتون فراهم ڪري ۽ انهن جي ھمٿ افزائي ڪري، ته جيئن بين الاقوامي منڍين ۾ پاڪستان جا چانور پهچي سگهن. هتي وري ويل اهو به آھي، ته اسان وٽ جيڪي سارين صاف ڪرڻ جا ڪارخانا آھن، انهن جي هڪ ته ڪوالٽي بهتر ڪونهي، ٻيو ته چانورن ۾ ملاوٽ ڪئي وڃي ٿي، جنهن ڪري بيروني منڍين ۾ اسان جي چانورن جو ڪو پڇي ئي ڪونه ٿو. بحرهال، ننڍي واپاري کان ويندي ڪارخانيدار ۽ ايسڪپورٽن تائين هر هڪ پنهنجو پنهنجو نفعو حاصل ڪري ٿو، باقي گهاٽي ۾ صرف آبادگار آھي. خير هيءُ ته صورتحال هئي سارين جي اگھ جي، پر ان کان سواءِ ڪمند جي آبادگارن سان پڻ سنڌ حڪومت جي ٽيڪ تي شگرمل مالڪان، جن جي گهڻائي وري وڏي رئيس جي پارٽنرن جي آھي. اهي به قيس ڪلور ڪرڻ ۾ گهٽ ڪانه ٿا ڪن. جنهن جو مثال هڪ اهو آھي، ته پندرنهن آڪٽوبر کان سنڌ جي سڀني شگر ملز کي چمنيون ٻارڻيون هيون، ۽ هلندڙ مهيني جي آخر تائين آبادگارن کان ڪمند خريد ڪرڻ لازمي آهي، پر اڃا تائين ڪنهن به مل چمني ڪانه ٻاري آھي. انڪري ڪمند دير سان خريد ڪرڻ، جتي ڪمند واري زمين ڪڻڪ جي فصل لاءِ تيار ٿيڻ ۾ دير ٿيندي، اتي وري ڪمند جي رسُ ۽ طاقت گهٽ جي ويندي، جنهنجو نقصان پڻ آبادگار کي پوندو. ٻئي ڳالھ ته ڪمند جو اگھ جيڪو ڪمند جي پوکائي سار سنڀار ۽ ڪٽائيءَ جي حساب سان اڍائي سو هئڻ گهرجي. اهو گذريل چئن سالن کا وٺي 160 کان 180 تائين مس آبادگارن کي ڏنو وڃي ٿو، ۽ ان پئسن جي ادائگي به سالن کان پوءِ قسطن طور آبادگارن کي ڏني وڃي ٿي. سنڌ جي ڪمند جي آبادگارن کان وڌيڪ اگھ پنجاب جي آبادگارن کي ڏنو پيو وڃي. جيتوڻيڪ پنجاب جي ڪمند کان وڌيڪ ميٺاڄڙ ۽ رسُ سنڌ جي ڪمند ۾ وڌيڪ آھي. انڪري ان مان کنڊ وڌيڪ ٺھي ٿي. پر پوءِ به سنڌ جي آبادگارن سان ايڏي ويڌن ڇو؟ اسان آخر ۾ سنڌ سرڪار جي والي وارثن ۽ رئيس وڏي کي گذارش ڪريون ٿا ته خدارا پنهنجي ذاتي ۽ مالي مفادن جي حاصلات واري انڌي لالچ ۾ اچي سنڌ جي ڪروڙين آبادگارن جو معاشي قتل بند ڪري کين فصلن جا مناسب اگھ ڏنا وڃن، ته جئين هو فصل تي ڪيل ڳرا خرچ واپس ڪرڻ سان گڏوگڏ پنهنجو گهر به ھلائي سگهن.

 

 

دهشتگرد تائين رسائي جي ڀارتي درخواست….!

ڀارتي پرڏيهي وزير سشمان سوراج پاڪستان کان هڪ ڀيرو ٻيهر مطالبو ڪيو آهي ته جاسوس ڪلڀوشن ياديو جي موت جي سزا تي نظرثاني ڪئي وڃي، ڀارتي ميڊيا موجب ڀارت ۾ مقرر پاڪستاني هاءِ ڪمشنر سهيل محمود سان ڀارتي پرڏيهي وزير سشما سوراج ملاقات ڪري ٻن طرفن لاڳاپن، سرحدي ڇڪتاڻ ۽ خطي جي موجوده صورتحال تي ڳالهايو ڪري مطالبو ڪيو ته پاڪستاني حڪومت ڀارتي جاسوس ڪلڀوشن جي موت جي فيصلي تي نظرثاني ڪري، جڏهن ته ڪلڀوشن جي ماءُ کي پاڪستان اچڻ ۽ پٽ سان ملاقات ڪرڻ جي اجازت ڏني وڃي، ميڊيا اهي به اڳڪٿيون ڪيون ته ايندڙ ڪجهه ڏينهن ۾ ان حوالي سان ڀارتي قومي سلامتي جو صلاحڪار اجيت ۽ پرڏيهي سيڪريٽري جي شنڪر به پاڪستان جي هاءِ ڪمشنر سان ملاقات ڪندا. پاڪستاني پرڏيهي آفيس جي ترجمان جو چوڻ آهي ته خطي ۾ امن لاءِ ڪشمير سميت سمورن تڪرارن کي ڳالهين وسيلي حل ڪرڻ جا خواهشمند آهيون، ڀارت ڪشميرين جي حق خود اراديت کي تسليم ڪري، ڪشمير جو مسئلو گڏيل قومن جي قراردادن تحت حل ٿيڻ گهرجي. ڀارت پنهنجي فورسز کي لائين آف ڪنٽرول ۽ ورڪنگ بائونڊي تي فائربندي معاهدي جي پاسداري جو پابند بڻائي، معصوم شهرين تي گولاباري ۽ بنا جواز فائرنگ کي برداشت نٿو ڪري سگهي.