تازيون خبرون

Daily Archives: October 17, 2017

نواز شريف خلاف اٿي بيهڻ جو فيصلو، هن ڀيري آر اوز اليڪشن ٿيڻ نه ڏبي: آصف زرداري

لاهور (ويب ڊيسڪ)پاڪستان پيپلز پارٽي جي شريڪ چيئرمين آصف علي زرداري 2018ع جي چونڊن بابت چيو آهي ته هن ڀيري آر اوز اليڪشن نه ٿيڻ ڏينداسين، 2013ع واري مينڊيٽ وارا خوش فهمي ۾ نه رهن، پنجاب جي محاذ تي ڀرپور تياري سان لهي رهي آهيون. اهڙن خيالن جو اظهار هن پارٽي اڳواڻن سان پنجاب اليڪشن پلان تي ڳالهين دوران ڪيو.  اجلاس ۾ عام چونڊن ۾ پنجاب مان هر سيٽ تي اميدوار بيهارڻ واري حڪمت عملي تيار ڪئي وئي، پارٽي ۾ نون ماڻهن کي شامل ڪرڻ لاءِ رابطا تيز ڪرڻ جو به فيصلو ڪيو ويو آهي. ان سان گڏوگڏ ٻهراڙي وارن علائقن کي خاص طور هدف بڻائڻ جو فيصلو ڪيو ويو آهي. پ پ جي حڪمت عملي بابت ٻڌايو ويو ته سياسي هدفن کي حاصل ڪرڻ واري حڪمت عملي الڳ هوندي جڏهن ته چونڊ منشور ۾ عوامي مسئلن کي فوڪس ڪيو ويندو. اڳوڻي صدر آصف زرداري چيو آهي ته اسان ته ڪوڙن ڪيسن کي عدالتن ۾ منهن ڏنو، ن ليگ به منهن ڏئي، هن چيو ته ن ليگ ڪيسن کي منهن ڏيڻ بدران دئونس تي لهي آئي آهي، نواز شريف عدالتن ۾ ڪيس وڙهڻ بدران عدالتن سان وڙهي رهيا آهن، نواز شريف پاڻ کي بچائڻ لاءِ جمهوريت ۽ عدليه کي ناڪام ڪرڻ چاهي ٿو، اسان نواز شريف جي برائين خلاف اٿي بيهڻ جو فيصلو ڪري ورتو آهي، مفاهمت جمهوريت جي لاءِ هئي، نواز شريف جي لاءِ نه هئي.

 

حڪومت نئين احتساب قانون ۾ فوج ۽ عدليه کي شامل ڪرڻ جي مخالفت ڪري ڇڏي

اسلام آباد( ويب ڊيسڪ ) حڪومت فوج ۽ عدليه کي نئين احتساب قانون ۾ شامل نه ڪرڻ بابت شهباز شريف جي بيان جي حمايت ڪئي آهي. قانون واري وزير زاهد حامد اسلام آباد ۾ ميڊيا سان ڳالهائيندي زاهد حامد چيو ته نئين احتساب قانون ۾ فوج ۽ عدليه کي شامل ڪرڻ تي کين خدشا آهن. هن چيو ته پنجاب جي وڏي وزير شهباز شريف جو بيان مسلم ليگ ن جي پاليسي آهي. سندس چوڻ هو ته نئين احتساب قانون ۾ فوج ۽ عدليه کي شامل ڪرڻ بابت ڪو به فيصلو نه ٿيو آهي..

 

عابد شير علي ۽ ڪئپٽن صفدر سميت 261 اسيمبلي ميمبرن جي ميمبر شپ معطل

اسلام آباد (اين اين آءِ) اليڪشن ڪميشن آف پاڪستان 261 پارليامينٽ جي ميمبرن ۽ صوبائي اسيمبلي جي ميمبرشپ مطعل ڪري ڇڏي آهي، گوشوارا جمع ڪرائڻ تائين ميمبرن جي ميمبرشپ معطل رهندي، الڪيشن ڪميشن پاران 7 سينٽر، 71 قومي اسيمبلي جا ميمبر، پنجاب اسيمبلي جا 84 ميمبر، سنڌ اسيمبلي جا 50، ڪي پي ڪي جي 38 ۽ بلوچستان جي 11 ميمبرن جي ميمبرشپ مطعل ڪري ڇڏي آهي، جن ۾ اڳوڻو وزيراعظم نواز شريف جو نياڻو محمد صفدر، سردار يوسف، عائشا گلالئي، طارق فضل چوڌري، طلال چوڌري، فهميده مرزا ۽ ٻيا شامل آهن، اليڪشن ڪميشن ان سلسلي ۾ نوٽيفڪيشن به جاري ڪري ڇڏيو آهي.

 

نااهلي جي فيصلي کي اسان مڃيو پر پاڪستاني عوام ناهي مڃيو: وزير اعظم

اسلام آباد (ويب ڊيسڪ): وزيراعظم شاهد خاقان عباسي چيو آهي ته نااهلي جي فيصلي کي اسان مڃيو پر پاڪستاني عوام ناهي مڃيو، هن چيو ته آرمي چيف معيشت تي پنهنجي راءِ جو اظهار ڪيو، سول ملٽري ڇڪتاڻ ناهي، اختلاف راءِ ٿي سگهي ٿو، سٺي ڳالهه آهي، آرمي چيف پبلڪ فورم تي ڳالهه ڪئي، اختلاف راءِ هر گهر ۾ هوندو آهي، سڀني جو مقصد هڪ آهي ته ملڪ ترقي ڪري، مون کي هميشه گلاس اڌ ڀريل نظر ايندو آهي، وزيراعظم شاهد خاقان عباسي چيو ته جيڪڏهن عدم اعتماد ٿيو ته مان پنهنجي خلاف ووٽ نه ڏيندس باقي پنهنجو فيصلو ڪندا، ن ليگ واحد جماعت آهي، جنهن جا ميمبر معاملن تي کلي عام اختلاف ڪندا آهن، پارٽي ۾ فارورڊ بلاڪ جو مون کي علم ناهي، سياست آئين ۽ عوام جي خواهش موجب ٿيڻ گهرجي.

 

شريف خاندان خلاف ڪيسن جي ڪارروائي ٽي وي تي ڏيکارڻ جي درخواست منظور

لاهور( ويب ڊيسڪ ) لاهور هاءِ ڪورٽ شريف خاندان ۽ اسيمبلي ميمبرن خلاف عدالتن ۾ هلندڙ ڪيسن جي ڪارروائي ٽي وي تي سڌي ڏيکارڻ جي درخواست ٻڌڻي لاءِ منظور ڪري ورتي آهي. لاهور هاءِ ڪورٽ اسيمبلي ميمبرن خلاف عدالتن ۾ ٻڌڻي هيٺ ڪيسن جي ڪارروائي ٽي وي تي ڏيکارڻ جي درخواست منظور ڪري ورتي آهي. درخواستگذار موقف پيش ڪندي چيو ته اسيمبلي ميمبرن خلاف ڪيسن جي ڪارروائي ڏسڻ عوام جو آئيني حق آهي. درخواستگذار چيو ته آمريڪا ۽ يورپ ۾ اهم ڪيسن جي ڪارروائي ٽي وي چئلنز تي سڌي ڏيکاري ويندي آهي، تنهن ڪري عدالت ماڊل ٽائون ڪيس ۽ سپريم ڪورٽ ۾ ٻڌڻي هيٺ شريف خاندان تي ڪيسن جي ٻڌڻي ۽ ٻين ڪيسن جي ڪارروائي سڌي ٽي وي چئنلز تي ڏيکارڻ جو حڪم جاري ڪري. عدالت وفاقي سرڪار سميت ٻين ڌرين کي نوٽيس جاري ڪندي 27 نومبر تائين جواب جمع ڪرائڻ جو حڪم ڏنو آهي.

 

حڪومت ۽ فوج ۾ ڪنهن سطح تي وار برابر فرق ناهي: احسن اقبال

ننڪانه صاحب (ويب ڊيسڪ): وفاقي گهرو وزير احسن اقبال چيو آهي ته اهو پاڪ فوج جي هر هڪ سپاهي جي عزت ڪري ٿو، ان جو بيان فوج جي خلاف نه هيو، ننڪانه صاحب ۾ شهيد ڪيپٽن حسنين نواز جي گهر ڀاتين سان تعزيت بعد ميڊيا سان ڳالهائيندي سندس چوڻ هيو ته حڪومت ۽ پاڪ فوج وچ ۾ هن وقت ڪنهن قسم جو ۽ ڪنهن سطح تي هڪ وار برابر به فرق ناهي، اسان سڀ پاڪستان کي مضبوط ۽ پرامن بڻائڻ لاءِ ڪردار ادا ڪري رهيا آهيون، هن چيو ته جيڪا جنگ اسان وڙهي رهيا آهيون، ان ۾ ڪاميابي تڏهن ئي حاصل ڪري سگهجي ٿي، جڏهن اسان ان جذبي سان ڪم ڪريون ته اسان هڪ ئي ٻيڙي جا سوار آهيون، سندس چوڻ هيو ته پاڪ فوج حڪومت جي پٺيءَ تي ۽ حڪومت پاڪ فوج جي پٺيءَ تي آهي، ملڪ جي دشمنن جي ڪوشش آهي ته بداعتمادي پيدا ڪئي وڃي، مضبوط پاڪستان لاءِ اسان کي صفن ۾ ٻڌي جي ضرورت آهي، گهرو وزير چيو ته اسان هڪ اقتصادي جنگ به وڙهي رهيا آهيون ته جيئن پاڪستان جو مستقبل محفوظ بڻجي اسان اوندهه کي شڪست ڏني آهي، جتي 20 ڪلاڪ بجلي نه ايندي هئي اتي هاڻي 20 ڪلاڪ ايندي آهي، ڊي جي آءِ ايس پي آر جي بيان جي حوالي سان هڪ سوال تي هن چيو ته مون بيان ڏنو ۽ انهن وضاحت ڪري ڇڏي، ڳالهه ختم ٿي وئي، منهنجو بيان نه فوج جي خلاف هيو هر هڪ سپاهي جي اسان عزت ڪندا آهيون، هن چيو ته هڪ طبقو چوي ٿو ته ملڪ ۾ هر شئي جو ٻيڙو غرق آهي، اسان کي ايئن چوندڙ طبقي سان اختلاف آهي، ميڊيا شين کي تڪراري بڻائڻ کان پاسو ڪري، گهرو وزير چيو ته ڪيپٽن حسنين اهو قابل فخر سرمايو آهي، جنهن تي اسان جا نسل فخر ڪندا، جن 3 سپاهين ان سان گڏ شهادت ماڻي، انهن تي به فخر آهي.

 

مالي سال جي پهرين ٽه ماهي ۾ 765 ارب رپين جا ٽيڪس گڏ ٿيا: اسحاق ڊار

اسلام آباد (ويب ڊيسڪ): ناڻي واري وفاقي وزير اسحاق ڊار چيو آهي ته پهرين ٽه ماهي ۾ مالي ڪارڪردگي کي منظم ڪيو آهي، پريس ڪانفرنس ڪندي اسحاق ڊار چيو ته پهرين ٽه ماهي ۾ 765 ارب رپين جا ٽيڪس گڏ ٿيا، پهرين ٽه ماهي ۾ 570 ارب رپين جا ٽيڪس صوبن کي منتقل ٿيا، هن چيو ته مالي ڪارڪردگي ۾ نظم ۽ ضبط ترجيح آهي، هلندڙ مالي سال جي پهرين ٽه ماهي ۾ روينيو وصولي 765 ارب رپيا رهي، پهرين ٽه ماهي ۾ روينيو وصولي 20 سيڪڙو وڌي، حڪومت پنهنجي خرچن کي مانيٽر ڪري رهي آهي، پهرين ٽه ماهي ۾ مالي خسارو 324 ارب رپيا رهيو، ناڻي واري وفاقي وزير چيو ته پهرين ٽه ماهي دوران ترسيلات زر 4.79 ارب ڊالر رهيون، ملڪي درآمدات 14.26 ارب ڊالر رهيون، ملڪي برآمدات ۾ 6 سيڪڙو اضافو رڪارڊ ڪيو ويو، معاشي ترقي جي شرح جو هدف 6 سيڪڙو رکيو ويو آهي، معاشي ترقي جي شهر 3.7 مان وڌي 5.3 سيڪڙو تائين پهچي چڪي آهي، پهرين ٽه ماهي ۾ جاري خرچ 894 ارب رپيا رهيو، گذريل سال جاري خرچ ان دوران 914 ارب رپيا هيا، جاري کاتن جو خسارو ٻن مهينن ۾ 3 ارب 10 ڪروڙ رپيا رهيو، گذريل سال جاري کاتن جو خسارو پهرين ٻن مهينن ۾ 2 ارب 60 ڪروڙ ڊالر هيو، اسحاق ڊار چيو ته گذريل سال ان ئي عرصي ۾ پرڏيهي سيڙپڪاري 179 ملين ڊالرز هئي، مٽا سٽا واري ناڻي جا ذخيره 14 ارب ڊالرز آهن، مٽا سٽا واري ناڻي جي ذخيرن ۾ ڪا پريشاني واري ڳالهه ناهي، 2013 کان اڳ ملڪ ۾ 18 ڪلاڪن جي لوڊشيڊنگ ٿيندي هئي، اسان اقتصادي ترقي جي شرح کي 3.7 سيڪڙو کان 5.3 سيڪڙو تائين پهچايو، باوقار قوم طور تي ذميداريون پوريون ڪنداسين، اسان 480 ارب رپيا گردشي قرض ادا ڪيا، گردشي قرض چار سئو ارب کان گهٽ آهن، مورگن اسٽنلي اسٽينڊرڊز اينڊ پورز معيشت کي ساراهيو.

 

وڌيڪ تيز ڳالهائڻ سان مصطفيٰ ڪمال ليڊر نه بڻجي ويندو: نثار کهڙو

حيدرآباد (ويب ڊيسڪ): پيپلز پارٽي سنڌ جي صدر نثار کهڙي چيو آهي ته وڌيڪ تيز ڳالهائڻ سان مصطفيٰ ڪمال ليڊر نه بڻجي ويندو، ڪارڪنن کي خطاب ڪندي نثار کهڙو چيو ته ڪنهن کي الڳ نه ٿيڻ ڏينداسين، دل مان خيال ڪڍي ڇڏيو، جيڪو ٻاهر ويهي ڳالهيون پيو ڪري، اهو ٻڌي وٺي سنڌ جي ورهاست ٿيڻ نه ڏينداسين، نثار کهڙو چيو ته نواز شريف 4 ڏينهن جيل ۾ روئي روئي گذاريا، آصف زرداري جيل ۾ 11 سال گذاريا، نواز شريف هڪ سال جيل ۾ نٿو گذاري سگهي، عمران خان اسپتال لاءِ پرويز مشرف کان 2 ڪروڙ رپيا ورتا، هن چيو ته نڪاح نامي ۾ حق مهر جمائما جو هيو يا عمران خان جو؟، عمران خان چوي ٿو جمائما بني گالا جي لاءِ رقم ڏني هئي، جمائما کي طلاق ٿي وئي هئي، ڇا اها حق مهر ۾ پئسا ڏئي وئي هئي؟.

 

نيب سنڌ جي بلديات واري وزير ڄام خان شوري خلاف جاچ جي شروعات ڪري ڇڏي

ڪراچي(ويب ڊيسڪ) نيب سنڌ جي بلديات واري وزير ڄام خان شوري خلاف جاچ جي شروعات ڪري ڇڏي آهي. ميڊيا رپورٽن موجب سنڌ جي بلديات واري صوبائي وزير ڄام خان شوري تي حيدرآباد جي علائقي قاسم آباد ۾ سرڪاري واٽر هائيڊرينٽ جي زمين تي پيٽرول پمپ قائم ڪرڻ الزام لڳايو آهي جنهن تي اڳوڻي نيب چيئرمين قمر زمان چوڌري سنڌ جي ڊي جي نيب کي هن خلاف جاچ جو حڪم ڏئي ڇڏيو آهي. اڳوڻي نيب چيئرمين جي حڪم تي سنڌ جي ڊي جي نيب جاچ جو آغاز ڪري ڇڏيو آهي ۽ ان ۾ لينڊ کاڌي جي آفيسرن کي به شامل ڪرڻ جو فيصلو ڪيو ويو آهي.

 

آصف زرداري دورا ڪندو آهي ته عمران خان کي دورا پئجي ويندا آهن: مولا بخش چانڊيو

حيدرآباد (ويب ڊيسڪ): پيپلز پارٽي اڳواڻ مولا بخش چانڊيو چيو آهي ته مان نٿو ٻڌائڻ چاهيان، عمران خان چهري مان ڇا لڳندو آهي، هن چيو ته آصف زرداري جيئن جيئن دورا ڪندو آهي، عمران خان کي دورا پئجي ويندا آهن، مخالف 5 سال گاريون ڏيندا رهيا، عمران خان ڪجهه ڏينهن کان ويران آهي، مولا بخش چانڊيو چيو ته عرمان خان جي شادي ٿي ته بلاول ذاتي زندگي تي ڳالهه ڪرڻ کان منع ڪري ڇڏيو، مخالف 5 سال گاريون ڏيندا رهيا، آصف زرداري کلندو رهيو، هن چيو ته خان صاحب اوهان اڀري نه الهي رهيا آهيو، عمران خان آئيني ۽ جمهوري ادارن کي تباهه ڪرڻ چاهي ٿو.