تازيون خبرون

Daily Archives: October 14, 2017

مريم نواز مڙس سميت احستاب عدالت ۾ پيش، وڪيلن ۽ ليگين ۾ جهيڙو، ٻڌڻي ملتوي، فرد جرم لاڳو نه ٿيو

اسلام آباد (اين اين آءِ)اسلام آباد  جي احتساب عدالت ۾  وڪيلن جي هلٽر بازي جي سبب  جج محمد بشير  خميس تي ڪاروائي ڪرڻ کانسواءِ ئي  ٻڌڻي ملتوي ڪري ڇڏي، جنهن  جي سبب نوازشريف، مريم  نواز ۽ ڪيپٽن صفدر   تي فرد جرم  لاڳو نه ٿي سگھي. تفصيل جي مطابق اڳوڻي وزيراعظم  محمد نوازشريف جي نياڻي مريم نواز ۽ ڪيپٽن صفدر   جي احتساب عدالت  ۾ پيشي جي موقعي تي  جوڊيشل ڪمپليس جي ٻاهران سيڪيورٽي  جا سخت انتظام ڪيا ويا جنهن جي سبب جوڊيشل ڪمپليڪس  جي ٻاهران هڪ دفعو ٻيهر بد نظمي نظر آئي،  ان دوران هڪ وڪيل پوليس اهلڪار کي ٿڦڙ هنيو  جنهن تي پوليس وڪيلن تي ڏنڊا وسايا جنهن سان هڪ وڪيل  جو مٿو ڦاٽي پيو جنهن جي سبب  صورتحال وڌيڪ خراب ٿي وئي ۽ عدالت جي ڪمري تائين پهچي وئي،  عدالت جي ڪمري  ۾ بدنظمي جي سبب معزز جج عدالت جي ڪمري مان اٿي هليا ويا ۽ ٽن جوابدارن نوازشريف، مريم نواز ۽ ڪيپٽن صفدر تي فرد جرم لاڳو  ٿي سگھي ۽ ٻڌڻي 19 آڪٽوبر تائين ملتوي ڪئي وئي، ميڊِيا رپورٽ جي مطابق اڳواڻي وزيراعظم نوازشريف   جي زال ڪلثوم نواز بيماري جي سبب لنڊن ۾ موجود آهي،  جنهن جي سبب ظافر خان نمئاندي جي طور تي عدالت ۾ پيش ٿيو،  ياد رهي ته  عدالت گذريل ٻڌڻي تي لنڊن ۾ رهندڙ حسن نواز ۽ هسين نواز  کي فرار جوابدار قرار ڏئي  ان جو ڪيس الڳ ڪري ڇڏيو هو جڏهن ته ٻنهي جوابدارن کي اشتهار جي ذريعي پيش ٿيڻ جو حڪم جاري ڪيو ويو هو.  جوابدارن جي لاهور ۾ رهائشگاهه ۽ عدالت جي اڱڻ ۾ لڳايل اشتهار ۾ لکيل هو ته ٻئي هڪ مهيني جي اندر عدالت ۾ پيش نه ٿيا ته  انهن کي اشتهاري جوابدار قرار ڏنو ويندو.  ٻئي طرف اسلام آباد جي  احتساب عدالت جي جج محمد بشير  آئي جي اسلام آباد   کي وڪيل تي تشدد جي واقعي جي جاچ جو حڪم  ڏئي ڇڏيو، خميس تي اڳواڻي وزيراعظم  نوازشريف جي نياڻي مريم نواز ۽ ڪيپٽن صفدر جي احتساب عدالت  ۾ پيشي جي موقعي تي  جوڊيشل ڪمپليڪس جي ٻاهر سيڪيورٽي  جا سخت انتّظام ڪيا ويا جنهن جي سبب جوڊيشل ڪمپليڪس جي ٻاهران هڪ دفعو ٻيهر بد نظمي نظر آئي.  ان دوران پوليس وڪيلن تي ڏنڊا هنيا جنهن سان هڪ وڪيل جو مٿو ڦاٽي پيو جنهن سبب صورتحال وڌيڪ خراب ٿي وئي ۽ عدالت جي  ڪمري تائين پهچي وئي.  ڪيس جي ٻڌڻي ملتوي ٿيڻ کان پوءِ احتساب عدالت جي جج محمد بشير آئي جي اسلام آباد  کي وڪيل تي تشدد  جي و اقعي جي جاچ جو حڪم ڏئي ڇڏيو. زخمي ٿيڻ وارن وڪيلن  جي مطابق  احتساب عدالت  جي جج ان ج مٿو ڦاٽل ڏسي غصي جو اظهار ڪيو ۽ جيڪڏهن وڪيلن سان ائين ٿيندو ته مان ڪيس  جي ٻڌڻي نه ڪندس. هوڏانهن  وفاقي گهرو وزير احسن اقبال اسلام آباد احتساب عدالت ۾ بدنظمي جو نوٽيس وٺندي گهرو سيڪريٽري کان رپورٽ طلب ڪري ورتي آهي، جاري ڪيل بيان موجب گهرو وزير اسلام آباد جي احتساب عدالت ۾ بدنظمي جي سخت مزمت ڪئي آهي، هن چيو ته عدالت جي احترام تي ڪنهن به قسم جي سوديبازي نه ڪئي ويندي، هن چيو ته وڳوڙ ۽ قانون کي هٿ ۾ کڻندڙ وڪيل قانون جا محافظ نٿا ٿي سگهن، هن چيو ته عدالت ۾ محدود گنجائش سبب پاسون جاري ڪيون وينديون آهن، هن چيو ته عدالت جو تحفظ هر قيمت تي يقيني بڻايو ويندو، واقعي جو نوٽيس وٺندي گهرو سيڪريٽري کان رپورٽ طلب ڪري ورتي آهي.

 

چئلينجن کي منهن ڏئي رهيا آهيون، غير جمهوري حڪومت مسئلا حل نٿي ڪري سگهي: وزير اعظم

اسلام آباد(ويب ڊيسڪ) وزير اعظم شاهد خاقان عباسي چيو آهي ته ملڪ ۾ ترقي انهيءَ وقت ٿيندي آهي جڏهن جمهوريت هوندي ڇو ته ٽيڪنوڪريٽ يا غير جمهوري حڪومت پاڪستان جا مسئلا حل نٿي ڪري سگهي. وزير اعظم اٽڪ ۾ تيل ۽ گيس جي منصوبي جهنڊيال ون جي افتتاحي تقريب کي خطاب ڪندي چيو ته منصوبي جو افتتاح بهتر مسقتبل جو نويد آهي،  پاڪستان ۾ هر شعبي کي ۽ هر صارف کي گيس ويهه ڪلاڪ ملي رهيو آهي، نواز شريف اهڙيون پاليسيون شروع ڪيون جن کي اسان اڳتي وڌائي رهيا آهيون. وزير اعظم چيو ته هي اهي ڪاميابيون آهن جيڪي اليڪشن جي ڪري ملڪ حاصل ڪري رهيون آهن، عوام فيصلو ڪيو ۽ ان جا ثمر ان تائين پهچي رهيا آهن ۽ پهچندا رهندا. هن چيو ته جيڪو ڪم پنج سالن ۾ ٿيو اهو معمولي ناهي، 1999ع کان وٺي 2013ع تائين ڪنهن به شعبي جو ڪم هڪ پاسي رکجي ۽ اسان جي چار سالن جي ڪم کي ڏسجي ته اهو 15 سالن جي عرصي تي ڳرو پوندو. وزير اعظم چيو ته ملڪ ۾ ترقي رڳو ان وقت ممڪن ٿيندي آهي جڏهن جمهوريت پروان چڙهندي ڇو ته جمهوريت مضبوط ٿيندي تڏهن ئي ملڪ ترقي ڪندو، ان کان سواءِ ڪو به ٻيو رستو ناهي، ٽيڪنوڪريٽ يا غير جمهوري حڪومت پاڪسان جا مسئلا حل نٿي ڪري سگهي.

 

ڪراچي دنيا جي 60 محفوظ ترين شهرن جي فهرست ۾ شامل

ڪراچي(ويب ڊيسڪ)عالمي رسالي ”دي اڪانومسٽ“ دنيا جي 60 محفوظ ترين شهرن جي لسٽ جاري ڪئي آهي. جنهن ۾ ڪراچي آخري نمبر تي آهي.جريدي جي انٽيلي جنس يونٽ  فهرست ۾ شامل 60 شهرن کي ڊجيٽل،هيلٿه انفراسٽرڪچر ۽ سيڪورٽي جي پيماني تي رکيو آهي، ٽيوڪيو 89.80 پوائنٽ سان دنيا جو محفوظ ترين شهر قرار ڏنو ويو آهي.سنگاپور 89.64 پوائنٽ سان ٻه نمبر ۽ اوساڪا 88.87 پوائنٽ سان گڏ 3 نمبر تي رهيو.لسٽ ۾ لنڊن 82.10 پوئنٽ سان 20 وين، نيويارڪ 81.01 پوائنٽ سان 21 نمبر تي، فرانسيسي شهر پيرس 79.71 پوائنٽ سان 25 نمبر ۽ امريڪي جي گادي وارو شهر واشنگٽن ڊي سي80.37 پوائنٽ سان گڏ 23 نمبر تي رهيو. محفوظ ترين شهرن جي فهرست ۾ ڀارت جي گادي وارو شهر نئين دهلي 62.37 پوائنٽ سان 43 وين نمبر تي ۽ ممبئي 61.84 پوئنٽ سان 45 نمبر تي رهيو. ان فهرست ۾ واحد پاڪستاني شهر ڪراچي هو جيڪو 38.38 پوائنٽ سان 60 نمبر تي رهيو.

 

آرمي چيف سان برطانوي چيف آف جنرل اسٽاف جي ملاقات، سهڪار وڌائڻ تي اتفاق

راولپنڊي (اين اين آءِ) پاڪ فوج جي سربراهه جنرل قمر جاويد باجوه سان برطانوي چيف آف جنرل اسٽاف سرنڪلسن ملاقات ڪئي، جنهن ۾ گڏيل دلچسپي جي معاملن، ٻه طرفي سيڪيورٽي ۽ بچاءَ ۾ سهڪار وڌائڻ وارن معاملن تي غور ڪيو ويو، آءِ ايس پي آر موجب برطانوي چيف آف جنرل اسٽاف سرنڪلسن پاڪستان جي سرڪاري ٻن ڏينهن جي دوري تي جي ايڇ ڪيو راولپنڊي پهتو ته پاڪ فوج جي ڦڙت جٿي کيس سلامي ڏني، جنرل نڪلسن جي ايڇ ڪيو ۾ شهيدن جي يادگار تي حاضري ڀري گلن جي چادر چاڙهي، جنرل قمر جاويد باجوه سان برطانوي چيف آف جنرل اسٽاف ملاقات ڪئي، برطانوي چيف آف جنرل اسٽاف دهشتگردي خلاف ڪاميابين ۽ علائقائي امن ۽ سلامتي لاءِ پاڪ فوج جي مسلسل ڪوششن جو اعتراف ڪندي چيو ته برطانيا ان ڏس ۾ پاڪستان جي قربانين کي قدر جي نگاهه سان ڏسي ٿو.

 

آصف زرداري پاران ڪرپشن جي ڳالهه ڪرڻ معجزو آهي، احسن اقبال جو رينجرز بابت ڊرامو اڄ سمجهه ۾ آيو: عمران خان

اسلام آباد/پشاور (ويب ڊيسڪ): پاڪستان تحريڪ انصاف جي سربراهه عمران خان چيو آهي ته آصف زرداري اڄ ڪرپشن جي ڳالهه ڪري رهيو آهي، جيڪا قيامت جي نشاني آهي، /ڏسو صفحو 2 بقايا نمبر 22

پشاور ۾ جلسي کي خطاب ڪندي عمران خان چيو ته آصف زرداري چار ڏينهن کان پشاور جا چڪر لڳائي رهيو آهي ۽ زرداري ڪرپشن جي ڳالهه ڪري رهيو آهي، جنهن کي مان قيامت جي نشاني سمجهان ٿو، زرداري چئي رهيو آهي ته پختونخواهه ۾ تمام گهڻي ڪرپشن آهي ته زرداري تون پاڪستان جي سڀ کان وڏي بيماري آهين، سندس چوڻ هيو ته زرداري تون تمام وڏو ڌاڙيل آهين ۽ مان سنڌ اچي رهيو آهيان، ماڻهو تيار ڪري رهيو آهيان، ته جيئن ڊڄ جا زنجير ٽٽي وڃن، هن چيو ته شاهد خاقان عباسي ٻڌي وٺ، اوهان وزيراعظم آهي يا شريف خاندان جا درٻاري، اڄ ملڪ ۾ غربت ان لاءِ آهي، جو اسان جي مٿان ڌاڙيل ويٺا آهن، پختونن جي ليڊر جو نالو وٺون ٿا ته ماڻهو شور مچائيندا آهن، ايزي لوڊ، بلوچستان ۾ پختونن جو ليڊر اچڪزئي بڻيل آهي، اچڪزئي ۽ فضل الرحمان پختونخواهه تي وڏو ظلم ڪيو، فاٽا جي پختونخواهه ۾ ضم ٿيڻ تي فضل الرحمان ۽ اچڪزئي مخالفت ڪئي، اسفند يار ولي، نواز شريف، فضل الرحمان، آصف زرداري اهي سڀ ڌاڙيل آهن، جيڪو گهر مان چوري ڪندو آهي، ان کي چور ئي چيو ويندو آهي. پاڪستان تحريڪ انصاف جي چيئرمين عمران خان چيو آهي ته اڄ مسلم ليگ ن ٻيون ڀيرو عدالت تي حملو ڪيو. نيب ريفرنسن جي ٻڌڻي جي موقعي تي احتساب عدالت ۾ وڪلين جي جهيڙي سبب جج محمد بشير اڄ ڪارروائي ڪرڻ کان سواءِ ئي ٻڌڻي ملتوي ڪري ڏي جنهن جي ڪري نواز شريف، مريم نواز ۽ ڪيپٽن (ر) صفدر تي فرد جرم لاڳو نه ٿي سگهيو. عمران خان احتساب عدالت ۾ پيش آيل واقعي تي سماجي رابطن واري ويب سائيٽ ٽوئيتر تي پنهنجي رد عمل جو اظهار ڪيو. عمران خان چيو ته نواز شريف پرڏيهه ۾ پيل رقم کي بچايو ويو آهي. هن چيو ته اڄ درٻاري احسن جو عدالت جي ٻاهران رينجرز بابت ڊرامو سمجهه ۾ آيو جيڪو نيب جج کي غير محفوظ ڪرڻ جي لاءِ هيو.  هن چيو ته ن ليگ رياستي ادارن کي تباهه ڪرڻ پٺيان پئي آهي، قوم ان جي خلاف تيار ٿئي ۽ پنهنجي رياستي ادارن جو دفاع ڪري. عمران خان وڌيڪ چيو ته ادارن جي تباهي جو مطلب رياست جي تباهي آهي ۽ اها شريفن جي ايجنڊا آهي جنهن کي قوم ختم ڪندي.

 

پاڪستان پيپلز پارٽي، پارٽي گولڊن جوبلي تقريبون ڀرپور نموني ملهائڻ جو اعلان

ڪراچي (اين اين آءِ) پ پ، پارٽي جون گولڊن جوبلي تقريبون ڀرپور نموني ملهائڻ جو اعلان ڪيو آهي، 30 نومبر 2017 تي اسلام آباد جي پريڊ گرائونڊ ۾جلسو ڪيو ويندو جنهن ۾ بلاول ڀٽو زرداري ۽ ٻيا اڳواڻ خطاب ڪندا، ان ئي ڏينهن هڪ انٽرنيشنل ڪانفرنس به ڪوٺائي ويندي، جڏهن ته گولڊن جوبلي تقريبون سڄو سال جاري رهنديون، اهو فيصلو پ پ چيئرمين بلاول ڀٽو جي صدارت هيٺ ٿيل اجلاس ۾ ڪيو ويو جيڪو جمعي تي بلاول هائوس ۾ ٿيو، اجلاس کانپوءِ پ پ اڳواڻ نير بخاري، فرحت الله بابر، چوڌري منظور، شيري رحمان، سيد قائم علي شاهه ۽ ٻيا موجود هئا، پ پ اڳواڻن عدالت کان مطالبو ڪيو ته نواز شريف ۽ ان جي نياڻي مريم نواز، ناٺي صفدر جو نالو اي سي ايل ۾ وڌو وڃي ته جيئن اهي ملڪ مان فرار نه ٿي سگهن، احتساب عدالت ۾ جمعي تي ٿيندڙ واقعو عدالتن تي حملو آهي، ن ليگ پنهنجي تاريخ ورجائي آهي، اهو واقعو سوچيل سمجهيل منصوبابندي جو حصو آهي ته جيئن شريف خاندان تي فرد جرم لاڳو ٿيڻ ۾ دير ٿئي، نبير بخاري چيو ته جيڪڏهن 30 نومبر تي عيد ميلاد النبي ٿي ته جلسو پهرين ڊسمبر 2017 تي ٿيندو، پ پ جي عالمي ڪانفرنس ۾ پاڪستان ۽ پرڏيهه کان ڪيترائي وفد شرڪت ڪندا، پ پ ملڪ ۾ جمهوريت لاءِ سڀ کان گهڻيون قربانيون ڏنيون، پهريان 1973 جو آئين ڏنو ۽ ٻيهر ان کي اصل شڪل ۾ بحال ڪيو، نئون اين ايف سي ايوارڊ پ پ جي ڪري ئي آهي، چوڌري منظور چيو ته پ پ جمهوريت ۽ پورهيت طبقي جي حقن لاءِ جدوجهد ڪئي آهي، پارٽي جي ٽنهي چيئرپرسن ذوالفقار علي ڀٽو، محترمه شهيد بينظير ڀٽو ۽ بيگم نصرت ڀٽو شهيد ٿيون، پ پ 4 مارشل لا حڪومتن کي شڪست ڏني، 2017 ۾ پ پ جي گولڊن جوبلي آهي ۽ محترمه بينظير ڀٽو جي ڏهين ورسي آهي ۽ ان سان گڏ عام چونڊن جو سال به آهي، ان لاءِ اهو سال پ پ لاءِ وڏي اهميت وارو آهي.

 

راڻا ثناءُ الله تي لاهور هاءِ ڪورٽ اچڻ تي تاحيات پابندي لاڳو، ميمبر شپ به ختم

لاهور (اين اين آءِ) لاهور هاءِ ڪورٽ بار ايسوسئيشن جي جنرل هائوس اجلاس ۾ قانون جي وزير راڻا ثناءُ الله جي هاءِ ڪورٽ بار جي ميمبرشپ رد ڪري بار ۾ داخلا تي تاحيات پابندي لڳائڻ جو ٺهراءُ منظور ڪري ورتو آهي، گذريل ڏينهن بار ايسوسئيشن جي جنرل هائوس جو هنگامي مزمتي اجلاس وقتي صدر لاهور هاءِ ڪورٽ بار ايسوسئيشن جي راشد جاويد لوڌي جي صدارت ۾ ڪياني هائوس ۾ ٿيو، راشد جاويد لوڌي چيو ته حضرت محمد صلي الله عليه وسلم، اهل بيت جي محبت ۽ ختم نبوت تي ايمان کانسواءِ اسان مسلمان سڏرائي نٿا سگهون، راڻا ثناءُ الله جي بيان جي جيتري مزمت ڪئي وڃي اها گهٽ آهي، شهيد ڀٽو ڏانهن ڪريڊٽ وڃي ٿو ته هن قاديانين کي غير مسلم قرار ڏنو، سيڪريٽري عامر راڻا ثناءُ الله جو قاديانين کي مسلمان قرار ڏيڻ واري بيان جي مزمت ڪندي چيو ته اسان جو ايمان ان وقت تائين مڪمل نٿو ٿي سگهي جيستائين ختم نبوت تي ايمان نه آندو وڃي، ان جو بيان آئين جي ڀڃڪڙي آهي جنهن تحت قاديانين کي 1974 ۾ آئين تحت غير مسلم قرار ڏنو ويو، 1984 ۾ صدارتي آرڊيننس ذريعي قاديانين کي اسلام جو نالو استعمال نه ڪرڻ جو پابند ڪيو ويو، مقررين حضرت محمد صلي الله عليه وسلم جي حديث جو حوالو ڏيندي چيو ته حضرت محمد صلي الله عليه وسلم چيو هو ته مان آخري نبي آهيان، قرآن پاڪ ۾ به الله جو فرمان آهي ته حضرت محمد صلي الله عليه وسلم توهان مان ڪنهن هڪ مرد جو پيءُ نه آهي پر هو الله جو رسول ۽ خاتمل نبي آهي، هنن چيو ته راڻا ثناءُ الله کي نه ته قانون جي ڄاڻ آهي ۽ نه ئي ڳالهائڻ اچي ٿو، حڪومت يهودي ايجنڊا تي عمل ڪري رهي آهي، اجلاس کانپوءِ وڪيلن پرامن احتجاج رڪارڊ ڪرائڻ لاءِ جي پي او گيٽ تي ريلي ڪڍي.